དཔལ་ཡོངས་གྲུབ་ཐམས་ཅད་ལ་ཕྱག་འཚལ་ལོ། །གཞི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་དབྱིངས་དེ་བཞིན་ཉིད་ཀྱི་མཁྱེན་པ་གསུམ་ལ་ཕྱག་འཚལ་ལོ། །ལམ་ཤེས་རབ་ཀྱི་ཕ་རོལ་ཏུ་ཕྱིན་པ་ཤེར་ཕྱིན་ཟབ་མོའི་རྣལ་འབྱོར་ཐབས་སྦྱོར་བ་བཞིའི་མཁྱེན་པ་གསུམ་ལ་ཕྱག་འཚལ་ལོ། །འབྲས་བུ་ཤེས་རབ་ཀྱི་ཕ་རོལ་ཏུ་ཕྱིན་པ་བྲལ་འབྲས་ཆོས་སྐུའི་མཁྱེན་པ་གསུམ་ལ་ཕྱག་འཚལ་ལོ། །
ཤེས་རབ་བདག་ཉིད་ཕ་རོལ་ཕྱིན་པའི་གཙོ། །དུས་གསུམ་འཕགས་ཀུན་བསྐྱེད་མ་ཆོས་ཀྱི་དབྱིངས། ། གཞི་འབྲས་དབྱེར་མེད་གཉིས་མེད་ཡེ་ཤེས་མཆོག །རྒྱལ་བའི་ཡུམ་ལ་གུས་པས་ཕྱག་འཚལ་ལོ། ། རྒྱལ་ལས་ཆེས་མཁས་འགའ་ཡང་ཡོད་མིན་ཕྱིར། །རྒྱལ་ལས་ལྷག་པའི་དབང་པོ་གཞན་མེད་ཕྱིར། །རྒྱལ་དང་འགལ་བའི་བཤད་སྲོལ་རྣམས་དོར་ནས། །རྒྱན་གྱི་དགོངས་པ་མདོ་བཞིན་བྲི་བར་བྱ། དེ་ལ་རྒྱལ་ཚབ་བྱམས་པ་མགོན་པོའི་ཞལ་སྔ་ནས་གསུངས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དོན་ཆོས་སྤྱོད་བཅུ་ཡི་བདག་ཉིད་བདེ་བླག་ཏུ་རྟོགས་པར་བྱེད་པའི་བསྟན་བཅོས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པ་འདི་འཆད་པ་ལ་གསུམ་སྟེ། བསྟན་བཅོས་ལ་འཇུག་པའི་སྒོ་འདོད་པའི་ལྷ་ལ་ཕྱག་འཚལ་བ་དང༌། དགོས་འབྲེལ་བསྟན་ནས་དངོས་པོ་བརྒྱད་ཀྱིས་ཤེར་ཕྱིན་བཤད་པ་དང༌། དོན་བསྡུས་གཞན་དང་གཞན་གྱིས་མཇུག་བསྡུས་དེ་བསྟན་པའོ། ། དེ་དག་གི་ཡང་ཐོག་མར། རྒྱ་གར་གྱི་སྐད་དུ་བཞུགས་པའི་བསྟན་བཅོས་བོད་སྐད་དུ་བསྒྱུར་ཞིང༌། སྡུད་པར་བྱེད་པ་པོ་ལོ་ཙཱ་བ་རྣམས་ཀྱིས་བསྡུ་བར་བྱ་བའི་བསྟན་ཆོས་སྡུད་བྱེད་བོད་ཀྱིས་བསྡུས་པའི་ཚུལ་ནི་འདི་ལྟ་སྟེ། རྒྱ་སྐད་དང་བོད་སྐད་རིམ་པ་ལྟར་པྲཛྙཱ་པཱ་ར་མི་ཏ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཨུ་པ་ད་ཤ་ནི་མན་ངག་དང༌། ཤཱསྟྲ་ནི་བསྟན་བཅོས་དང༌། ཨ་བྷི་ས་མ་ཡ་ནི་མངོན་པར་རྟོགས་པ་དང༌། ཨ་ལང་ཀ་ར་ནི་རྒྱན་དང༌། ན་མ་ནི་ཞེས་བྱ་བ་དང༌། ཀཱ་རི་ཀ་ནི་ཚིག་ལེའུར་བྱས་པའོ། ། མཚན་དོན་གྱི་སྤྲོས་པ་གཞན་རྣམས་ནི་ཡོངས་སུ་གྲགས་ཤིང་ཐམས་ཅད་ན་གསལ་བའི་ཕྱིར་འདིར་མ་བྲིས་སོ། །
༼༡༽བསྟན་བཅོས་ལ་འཇུག་པའི་སྒོ་འདོད་པའི་ལྷ་ལ་ཕྱག་འཚལ་བ།
དེ་ལ་བསྟན་ཆོས་ལ་འཇུག་པའི་སྒོ་འདོད་པའི་ལྷ་ལ་ཕྱག་འཚལ་བ་ནི་འདི་ལྟ་སྟེ། །ཉན་ཐོས་ཞི་བ་ཚོལ་རྣམས་ཀུན་ཤེས་ཉིད་ཀྱིས་ཉེར་ཞིར་ཁྲིད་མཛད་གང་ཡིན་དང༌། །འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང༌། །གང་དང་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུང་བ། །ཉན་ཐོས་བྱང་ཆུབ་སེམས་དཔའི་ཚོགས་བཅས་སངས་རྒྱས་ཀྱི་ནི་ཡུམ་དེ་ལ་ཕྱག་འཚལ། །ཞེས་གསུངས་སོ། །དེ་ལ་མཁྱེན་པ་གསུམ་གྱི་ངོས་འཛིན་ནི། བདག་ཉིད་ཇི་བཞིན་ཀུན་མཁྱེན་ནི། །གསུམ་གྱི་སྒྲིབ་པ་རྣམ་གསུམ་དང༌། །ཞེས་པའི་སྐབས་ཀྱི་མདོ་ཉིད་ལས། རབ་འབྱོར་ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིའོ། ཞེས་པ་ལ་སོགས་པ་གསུངས་ཤིང༌། རྒྱལ་བ་བྱམས་པའི་དངོས་སློབ་ཤིང་རྟ་ཆེན་པོ་སློབ་དཔོན་དབུ་མ་པ་དབྱིག་གཉེན་གྱི་ཞལ་སྔ་ནས་ཀྱང༌། འབུམ་པ་དང་ཉི་ཁྲི་ལྔ་སྟོང་པ་དང༌། ཁྲི་བརྒྱད་སྟོང་པ་སྟེ། ཡུམ་རྒྱས་འབྲིང་བསྡུས་པ་གསུམ་གྱི་གཞུང་འགྲེལ་གནོད་འཇོམས་སུ། དེ་ལ་ཡེ་ཤེས་ནི་རྣམ་པ་གསུམ་སྟེ། རྣམ་པ་ཐམས་ཅད་མཁྱེན་པ་ཉིད། ལམ་གྱི་རྣམ་པ་ཐམས་ཅད་མཁྱེན་པ་ཉིད་དང༌། ཐམས་ཅད་ཤེས་པ་ཉིད་དོ། །དེ་ལ་སངས་རྒྱས་བཅོམ་ལྡན་འདས་རྣམས་ཀྱི་གནས་ཤིན་ཏུ་གྱུར་པས་རྡོ་རྗེ་ལྟ་བུ་ཏིང་ངེ་འཛིན་གྱིས་བསྡུས་པ་འཇིག་རྟེན་ལས་འདས་པ་རྣམ་པར་མི་རྟོག་པའི་ཡེ་ཤེས་ལ་རྣམ་པ་ཐམས་ཅད་མཁྱེན་པ་ཉིད་ཅེས་བྱའོ། །བྱང་ཆུབ་སེམས་དཔའ་རྣམས་ཀྱི་སྒྲུབ་པའི་སར་གཏོགས་པ་ས་བཅུའི་རིམ་པས་ངེས་པར་འབྱུང་བས་ཕ་རོལ་ཏུ་ཕྱིན་པའི་སྤྱོད་པ་ལ་སོགས་པ་བྱང་ཆུབ་སེམས་དཔའི་ལམ་གྱི་བདག་ཉིད་ཀྱི་ཡེ་ཤེས་ལ་ལམ་གྱི་རྣམ་པ་ཐམས་ཅད་མཁྱེན་པ་ཉིད་ཅེས་བྱའོ། །ཉན་ཐོས་དང་རང་སངས་རྒྱས་རྣམས་ཀྱི་འདུ་བྱེད་ཐམས་ཅད་མི་རྟག་པའོ། །ཟག་པ་དང་བཅས་པ་ཐམས་ཅད་ནི་སྡུག་བསྔལ་བའོ། །ཆོས་ཐམས་ཅད་ནི་བདག་མེད་པའོ། །ཞེས་བྱ་བ་ཐམས་ཅད་མི་རྟག་པ་ལ་སོགས་པའི་རྣམ་པར་འཇུག་པ་བསྒོམ་པའི་རྒྱུ་ལས་བྱུང་བ་འཇིག་རྟེན་ལས་འདས་པའི་ལམ་གྱི་ཡེ་ཤེས་ལ་ཐམས་ཅད་ཤེས་པ་ཉིད་ཅེས་བྱའོ། །ཞེས་སེམས་བསྐྱེད་ཀྱི་སྐབས་སུ་གསུངས་པ་ནི། གང་ཟག་སོ་སོའི་རྒྱུད་ལ་ཡོད་པའི་མཁྱེན་གསུམ་ངོ་བོ་ཐ་དད་པ་རྣམས་བསྟན་ཏོ། །མཁྱེན་གསུམ་ངོ་བོ་གཅིག་པ་གཞི་འབྲས་དབྱེར་མེད་ཀྱི་ཤེར་ཕྱིན་དེ་བཞིན་ཉིད་ནི་རྟེན་དང༌། གཞི་དེ་ལ་སློབ་ཅིང་འཇུག་པ་གང་ཟག་སོ་སོའི་རྒྱུད་ཀྱི་མཁྱེན་གསུམ་ངོ་བོ་ཐ་དད་པ་ནི་དེ་ལ་བརྟེན་པར་འགྱུར་ཚུལ་ཡང་སེམས་བསྐྱེད་ཀྱི་སྐབས་སུ་གནོད་འཇོམས་དེ་ཉིད་ལས། ཐམས་ཅད་དུ་དེ་བཞིན་ཉིད་ནི་གཅིག་མོད་ཀྱི་འོན་ཀྱང་དེའི་གཞི་ལ་འཇུག་པ་ཐ་དད་པས་རྣམ་པ་གསུམ་དུ་བཞག་སྟེ། ལམ་གྱི་རྣམ་པ་ཤེས་པ་ཉིད་ཀྱི་ས་པ་དང༌། རྣམ་པ་ཐམས་ཅད་མཁྱེན་པ་ཉིད་ཀྱི་ས་པ་དང༌། ཐམས་ཅད་ཤེས་པ་ཉིད་ཀྱི་ས་པའོ། ། དང་པོ་ནི། ཕྱི་དང་ནང་གི་ཆོས་གང་ཡིན་པ་དེ་དག་ཡོངས་གྲུབ་ངོ་བོ་ཉིད་གང་ཡིན་པ་དེ་ནི་ཆོས་ཐམས་ཅད་ཀྱི་དེ་བཞིན་ཉིད་ཅེས་བྱ་སྟེ། འདི་ལྟ་སྟེ། གཟུགས་ཀྱི་དེ་བཞིན་ཉིད་དང༌། སྒྲའི་དེ་བཞིན་ཉིད་དང༌། དྲིའི་དེ་བཞིན་ཉིད་ཅེས་བྱ་བ་ལ་སོགས་པའོ། །སངས་རྒྱས་ཐམས་ཅད་ཀྱི་དེ་བཞིན་གཤེགས་པའི་སྙིང་པོ་གནས་གྱུར་པ་ཆོས་ཀྱི་སྐུ་ནི་གཉིས་པ་ཆོས་ཀྱི་དབྱིངས་ཀྱི་དེ་བཞིན་ཉིད་ཅེས་བྱ་བ་སྟེ། སངས་རྒྱས་ཀྱི་ཆོས་ཐམས་ཅད་ཀྱི་གཞི་ཡིན་པའི་ཕྱིར་རོ། །ཉན་ཐོས་དང་རང་སངས་རྒྱས་རྣམས་ཀྱི་ཕུང་པོ་ལྷག་མ་མེད་པའི་མྱ་ངན་ལས་འདས་པ་ནི་གསུམ་པ་ཡང་དག་པའི་མཐའི་དེ་བཞིན་ཉིད་ཅེས་བྱ་སྟེ། འདིས་ཡང་དག་པའི་མཐའ་མངོན་སུམ་དུ་མི་བྱའོ། །ཞེས་བྱ་བ་དང༌། འཁོར་བ་ཡང་མི་ལེན་ཏོ། །ཞེས་བྱ་བ་དང༌། ཡང་དག་པའི་མཐའ་ཡང་མངོན་སུམ་དུ་མི་བྱེད་དོ་ཞེས་དེ་དང་དེ་ལས་བཤད་པ་གང་ཡིན་པའོ། །ཡང་ཆོས་ཐམས་ཅད་ཀྱི་དེ་བཞིན་ཉིད་ཅེས་བྱ་བ་སྔ་མ་ནི་ས་བརྒྱད་པ་ལ་ལྷུན་གྱིས་གྲུབ་པར་རྣམ་པར་མི་རྟོག་པས་རྟོགས་པ་བརྟན་པའི་ཕྱིར་གསུངས་སོ། །འདིར་ནི་མཐར་ཕྱིན་པའི་བསྟན་པའི་ཕྱིར་གསུངས་པར་རིག་པར་བྱའོ། །ཞེས་དང༌། ལམ་ཤེས་ཉིད་ཀྱི་ཚུལ་ལ་ནི། ཞེས་པའི་སྐབས་ཀྱི་མདོའི་བཤད་པ་ལས་ཀྱང༌། ཤེས་རབ་ཀྱི་ཕ་རོལ་ཏུ་ཕྱིན་པ་ནི། ཉན་ཐོས་དང་རང་སངས་རྒྱས་ཀྱི་ས་ལ་ཐམས་ཅད་ཤེས་པ་ཉིད་ཀྱི་ཕྱོགས་དང་མཐུན་པ་དང༌། བྱང་ཆུབ་སེམས་དཔའི་ས་ལ་ལམ་གྱི་རྣམ་པར་ཤེས་པའི་ཕྱོགས་དང་མཐུན་པ་གཉིས་ཀ་ཡང་འདིར། བྱང་ཆུབ་སེམས་དཔའ་རྣམ་པ་ཐམས་ཅད་མཁྱེན་པ་ཉིད་ཐོབ་པར་འདོད་པ་ལམ་གྱི་རྣམ་པ་ཤེས་པ་ཉིད་དུ་བསྟན་པར་བྱའོ། །ཞེས་གསུངས་སོ། །དེ་ལྟར་ན་གཞི་ཤེར་ཕྱིན་འཕགས་པའི་ཆོས་ཐམས་ཅད་ཀྱི་རྒྱུ་ཆོས་དབྱིངས་དེ་བཞིན་ཉིད་ཀྱི་མཁྱེན་པ་གསུམ་ངོ་བོ་གཅིག་ཏུ་གྱུར་པ་གང་ཡིན་པ་དེ་ཉིད་དང༌། གང་ཟག་སོ་སོའི་རྒྱུད་ལ་ཡོད་པ་ངོ་བོ་ཐ་དད་པའི་མཁྱེན་པ་གསུམ་གང་ཡིན་པ་དེ་གཉིས་རྟེན་དང་བརྟེན་པ་དང༌། སྔ་མ་ནི་གང་ལ་བསླབ་པར་བྱ་བའི་གཞི་འམ་ཡུམ་མཁྱེན་པ་གསུམ་ཡིན་ལ། ཕྱི་མ་ནི་དེ་ལ་འཇུག་པའམ། སློབ་པར་བྱེད་པའི་ཐབས་མཁྱེན་པ་གསུམ་ཡིན་ནོ། ། དེ་ལྟ་བས་ན། ཉན་ཐོས་ཞི་བ་ཚོལ་རྣམས་ཞེས་སོགས་ཀྱིས་ཀྱང་མཁྱེན་གསུམ་ངོ་བོ་ཐ་དད་པ་སོ་སོའི་རྒྱུད་ལ་ཡོད་པ་ལམ་བདེན་གྱིས་བསྡུས་པའི་ཡེ་ཤེས་དང༌། ཚོགས་བཅས་སངས་རྒྱས་ཀྱི་ནི་ཡུམ་ཞེས་པས་མཁྱེན་གསུམ་ངོ་བོ་གཅིག་པ་གཞི་འབྲས་དབྱེར་མེད་པའི་ཡེ་ཤེས་དེ་གཉིས་ཀ་བསྟན་ཏོ། །དོན་དམ་པའི་ཤེར་ཕྱིན་རང་བྱུང་གི་ཡེ་ཤེས་དེ་ཉིད་ཉན་རང་ལ་སོགས་གང་དང་གང་གི་གང་ལ་དེ་དང་དེའི་མངོན་པར་རྫོགས་པའི་ཕྱོགས་དང་མཐུན་པ་དང༌། ཆོས་ཀྱི་དབྱིངས་གཅིག་པུ་དེ་ཉིད་ལ་འཇུག་པ་ཐ་དད་པ་དང༌། སློབ་ཚུལ་མི་འདྲ་བའི་རྒྱུས་གནས་སྐབས་སུ་དེ་དག་གི་མངོན་པར་རྟོགས་པའི་རིམ་པ་ཡང་མི་འདྲ་བར་བསྟན་ཏོ། །དངོས་པོ་གཅིག་ཉིད་ལ་ཡང་བློའི་འཕེན་པ་དང་འཇུག་ཚུལ་དང་མོས་པ་མི་འདྲ་བའི་དབང་གིས་སྡུག་པ་དང་མི་སྡུག་པ་ལ་སོགས་པར་མཐོང་བ་བཞིན་ནོ། །ཉན་ཐོས་རྣམས་ནི་བདེན་གཉིས་མ་ཕྱེ་བར་ཕྱོགས་གཅིག་ཏུ་ཐམས་ཅད་མི་རྟག་པ་དང༌། མི་སྡུག་པ་ལ་སོགས་པར་ཡིད་ལ་བྱེད་ཅིང་བསྒོམ་ལ། བྱང་ཆུབ་སེམས་དཔའ་རྣམས་ནི་ལེགས་པར་རྣམ་པར་ཕྱེ་ནས་ཀུན་རྫོབ་ཀྱི་མ་དག་པའི་ཆོས་རྣམས་དེ་ལྟར་ཡིན་ཡང་དོན་དམ་པའི་ཆོས་རྣམས་ནི་རྟག་པ་དང་བདེ་བ་དང་གཙང་བ་ལ་སོགས་སུ་ཡིད་ལ་བྱེད་ཅིང་འདྲིས་པར་བྱེད་པའི་ཕྱིར་གནས་སྐབས་སུ་ཆོས་ཉིད་རྟོགས་པ་ལ་ཡང་མི་འདྲ་བའི་ཁྱད་པར་གསུངས་སོ། ། ཉན་རང་རྣམས་ནི་རང་གཅིག་པུ་གྲོལ་བ་དང༌། ཞི་བ་དང༌། མྱ་ངན་ལས་འདའ་བར་བྱ་བའི་ཕྱིར་འཁོར་འདས་ལ་བླང་དོར་གྱི་མཚན་མར་བཟུང་ནས་ཤིན་ཏུ་ཡིད་འབྱུང་བའི་བློས་བར་མ་དོར་འདུ་བྱེད་ཐམས་ཅད་ཉེ་བར་ཞི་བ་ཡང་དག་པའི་མཐའ་མངོན་སུམ་དུ་བྱེད་ཅིང་འཁོར་པའི་མཚམས་བཅད་པ་ཡིན་པར་གསུངས་ཤིང༌། བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་གྲོལ་བ་དང༌། མྱ་ངན་ལས་འདས་པར་བྱ་བའི་ཕྱིར་ཐབས་ལ་མཁས་པའི་མཐུས་ཐམས་ཅད་མཉམ་པ་ཉིད་དུ་གོམས་ཤིང་འདྲིས་པར་བྱེད་པ་དང༌། ཇི་སྲིད་དུ་བླ་མེད་བྱང་ཆུབ་ཀྱི་དགེ་བའི་རྩ་བ་རྣམས་ཡོངས་སུ་རྫོགས་ཤིང་སྨིན་པར་མ་གྱུར་པ་དེ་སྲིད་དུ་བར་མ་དོར་ཡང་དག་པའི་མཐའི་དེ་བཞིན་ཉིད་མངོན་སུམ་དུ་མི་བྱེད་དོ། །དེ་ལྟར་བྱས་ནས་ས་འོག་མ་གཉིས་པོ་གང་རུང་གི་འབྲས་བུ་མངོན་དུ་གནས་བྱས་པར་འགྱུར་བའི་ཕྱིར་དེ་ལྟར་མི་བྱེད་ཀྱི། བྱང་ཆུབ་སེམས་དཔའ་ནི་ཡོངས་སུ་འདྲིས་པ་ཤེས་པའི་ཡེ་ཤེས་ཀྱིས་དུས་དང་དུས་མ་ཡིན་པ་ཤེས་པ་ལ་མཁས་པའི་ཕྱིར་རྣམ་ཐར་སྒོ་གསུམ་གྱི་ཏིང་ངེ་འཛིན་གྱིས་སྟོང་པ་ཉིད་ལ་གནས་ཤིང་བསྒོམ་པར་བྱེད་ཀྱང༌། ཆོགས་གཉིས་ཡོངས་སུ་རྫོགས་ཤིང་མ་སྨིན་པ་དེ་སྲིད་དུ་སྟོང་པ་ཉིད་དམ་པ་དེ་ལ་གནས་ཀྱང་དེ་མངོན་སུམ་དུ་མི་བྱེད་དོ། ། དཔེར་ན་བྱ་ནམ་མཁའ་ལ་འཕུར་བ་ཡང་ནམ་མཁའ་དེ་ཉིད་ལ་བརྟེན་ནས་མི་སྟོང་ཅིང་ས་ལ་ཡང་མི་ལྷུང་བ་བཞིན་ནོ། ། དེ་ལྟར་མཁྱེན་པ་གསུམ་གྱི་ངོ་བོ་དང༌། དབྱེ་བ་བསྟན་ནས། ཉན་ཐོས་ཞི་བ་ཚོལ་རྣམས་ཞེས་སོགས་ཀྱི་ཚིགས་སུ་བཅད་པ་གཅིག་པུ་འདིས་ནི་ངོ་བོ་ཐ་དད་པའི་མཁྱེན་གསུམ་སོ་སོ་དང༌། ངོ་བོ་གཅིག་པའི་ཡུམ་གཞི་ཤེར་ཕྱིན་ཉིད་ཀྱི་བྱེད་ལས་རྣམས་གཙོ་བོར་སྟོན་པ་སྟེ་རིམ་པ་ལྟར། ཉན་ཐོས་ཞེས་པ་ནི་བྱང་སེམས་ཀྱི་སྡེ་སྣོད་ལས། ཉན་ཐོས་རྣམས་ནི་རྣམ་གྲོལ་སྒྲ་ཕྱིར་འགྲོ། ཞེས་པའི་ཚུལ་གྱིས་ཉན་ཐོས་དེ་སྲིད་པ་ཐ་མའི་ཚེ་འང་གཞན་གྱི་སྒྲ་ཕྱིར་འབྲང་བའི་ཕྱིར་ཐོས་སྒྲོགས་དེ་ཉན་ཐོས་སོ། །ཐེག་པ་དམན་པ་ཉིད་དུ་མཚུངས་པའི་རང་སངས་རྒྱས་རྣམས་ཀྱང་དེའི་ཕྱོགས་སུ་བསྡུའོ། །རང་སངས་རྒྱས་ཞེས་པ་ནི། སྲིད་པ་ཐ་མའི་ཚེ་སློབ་དཔོན་མེད་པར་སྔོན་གོམས་པའི་དབང་གིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་རྣམས་བསྒོམས་པས་ཉོན་མོངས་པ་ཐམས་ཅད་སྦངས་པའི་དགྲ་བཅོམ་པ་ཉིད་མངོན་སུམ་དུ་བྱེད་དེ། དེ་བས་ན་རང་སངས་རྒྱས་ཞེས་བྱའོ། །ཉན་རང་དེ་རྣམས་ཞི་བ་མྱང་འདས་ཚོལ་བས་ན་ཞི་བ་ཚོལ་རྣམས་སོ། །མྱ་ངན་འདས་ཀྱང་ཕུང་པོའི་ལྷག་མ་དང་བཅས་པ་དང༌། ཕུང་པོའི་ལྷག་མ་མེད་པ་གཉིས་ལས། ཉན་རང་དེ་དག་གི་ལུགས་ནི་ཚེ་ཕྱི་མའི་ཕུང་པོ་སྐྱེད་པའི་རྒྱུ་ཉོན་མོངས་པའི་ཀུན་འབྱུང་སྤངས་ཀྱང་སྔ་མའི་ལས་ཉོན་གྱི་འབྲས་བུ་ཚེ་འདིའི་ཕུང་པོ་མ་སྤངས་པ་ནི་ལྷག་མ་དང་བཅས་པའི་མྱ་ངན་ལས་འདས་པ་སྟེ། ཟད་དུ་ཉེ་བའི་དངོས་པོ་ལ་ལྷག་མ་ཞེས་པ་བཞིན་ནོ། །དེ་ཉིད་ཚེའི་དུས་བྱས་པ་ན་སྔ་མའི་འབྲས་བུ་སྡུག་བསྔལ་སྤངས་པའི་ཕྱིར་ཕུང་པོ་ལྔ་ཟད་པ་ནི། ལྷག་མ་མེད་པའི་མྱ་ངན་ལས་འདས་པའོ། ། དེ་སྐད་དུ་ཆེད་དུ། བརྗོད་པའི་ཚོམས་ལས། མ་འགགས་པའི་ལུས་ཀྱི་སུ། །ཚོར་བ་དང་དུ་ལེན་པ་དང༌། །དེ་ཡི་སེམས་ནི་རྣམ་པར་གྲོལ། །མར་མེ་ཤི་བར་གྱུར་པ་བཞིན། །ཞེས་དང༌། གང་ན་ལུས་ཞིག་ཚོར་བ་འགགས། །འདུ་བྱེད་ཉེ་བར་ཞི་བ་དང༌། །འདུ་ཤེས་ཐམས་ཅད་བྲལ་གྱུར་ཅིང༌། །རྣམ་པར་ཤེས་པ་ནུབ་གྱུར་པ། །འདི་འདྲས་འདི་ནི་སྡུག་བསྔལ་མཐའ། །ཞེས་སོ། །རྣམས་ཞེས་པ་ནི་མང་པོའི་ཚིག་སྟེ་དེ་ལས་དེ་དག་གི་དབྱེ་བ་འགྱུར་བ་འདི་ལྟ་སྟེ། ལྟ་བ་ཁས་ལེན་པའི་དང༌། སྤྲུལ་བའི་དང༌། རིགས་མ་ངེས་པའི་དང༌། ངེས་པའི་ཉན་ཐོས་སོ། །དང་པོ་ནི་སེམས་བསྐྱེད་དང་ལྡན་ལ་ཉན་ཐོས་དང་ལྟ་བ་མཐུན་པ་ཕྱི་རོལ་གྱི་གཟུང་འཛིན་བདེན་པར་འདོད་པའོ། །གཉིས་པ་ནི་གདུལ་བྱའི་དོན་དུ་སྤྲུལ་པ་གནས་བརྟན་རབ་འབྱོར་ལྟ་བུ་རྣམས་དེ། འདོགས་པའི་རྒྱུ་ནི་དམ་ཆོས་པད་དཀར་ལས། ཇི་སྐད་དུ། མགོན་པོ་དེ་རང་བདག་ཅག་ཉན་ཐོས་གྱུར། །བྱང་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པའི་སྒྲ་ཡང་རབ་ཏུ་བརྗོད། །དེ་བས་བདག་ཅག་ཉན་ཐོས་མི་ཟད་འདྲ། །ཞེས་དང༌། དགོས་པ་ནི་མདོ་ལས་ཇི་སྐད་དུ། ཐེག་པ་རླབས་པོ་ཆེས་ནི་སྐྲག་འགྱུར་ཞིང༌། ། འདི་ནི་སེམས་ཅན་དམན་ལ་མོས་རིག་ནས། །བྱང་ཆུབ་སེམས་དཔའ་དེ་དག་ཉན་ཐོས་འགྱུར། ། རང་རྒྱལ་བྱང་ཆུབ་པར་ཡང་རབ་ཏུ་སྟོན། །ཞེས་སོ། །དངོས་ལ་གནོད་བྱེད་ཀྱང་དེ་དག་ལས་གསལ་ལོ། །གསུམ་པ་ནི་མདོ་སྡེའི་རྒྱན་ལས་ཇི་སྐད་དུ། ཉན་ཐོས་མ་ངེས་རྣམ་གཉིས་དེ། །ཐེག་དོན་མཐོང་དང་མ་མཐོང་བའོ། དོན་མཐོང་འདོད་ཆགས་བྲལ་བ་དང༌། །འདོད་ཆགས་བྲལ་མིན་འདི་དམན་པའོ། །དེ་གཉིས་འཕགས་པའི་ལམ་ཐོབ་པ། སྲིད་པ་དག་ཏུ་བསྒྱུར་བའི་ཕྱིར། །བསམ་གྱིས་མི་ཁྱབ་བསྒྱུར་བ་ཡི། །སྐྱེ་བ་དང་ནི་ཡང་དག་ལྡན། །གཅིག་ནི་སྨོན་ལམ་དབང་གིས་ནི། །སྐྱེ་བ་རབ་ཏུ་བསྒྲུབ་པར་བྱེད། །གཅིག་ཤོས་ཕྱིར་མི་འོང་བ་དང༌། །ལྡན་ཕྱིར་སྤྲུལ་པས་རབ་ཏུ་བསྒྲུབ། ། དེ་གཉིས་ཡང་དང་ཡང་དུ་ནི། །རང་སེམས་ཀུན་ཏུ་འབྱུང་ལྡན་པས། །མྱ་ངན་འདས་ལ་མངོན་དགའི་ཕྱིར། །རྟོགས་པས་དབུལ་བ་ཡིན་པར་འདོད། །དོན་བྱས་མ་ཡིན་དེ་སངས་རྒྱས། །མེད་པར་སྐྱེས་ནས་སྤྲུལ་དོན་གཉེར། །བསམ་གཏན་དོན་བརྩོན་དེར་བརྟེན་ནས། །བྱང་ཆུབ་དམ་པ་ཐོབ་པར་འགྱུར། །ཞེས་གསུངས་པ་ལྟར་ད་ལྟ་ཉན་ཐོས་ཀྱི་ལམ་ལ་གནས་ཀྱང་ཕྱིས་ལམ་དེ་བོར་ནས་སངས་རྒྱས་སམ་རང་རྒྱལ་དུ་འགྱུར་རོ། །དེ་ལ་འཕགས་པ་དང་སོ་སྐྱེ་གཉིས་ཏེ། སོ་སྐྱེ་དྲོད་རྩེ་ལ་གནས་པ་སངས་རྒྱས་སུ་འགྱུར་བ་དང༌། བཟོད་པ་འབྲིང་ལ་གནས་པ་རང་རྒྱལ་དུ་འགྱུར་བ་གཉིས་སོ། །མཛོད་ལས་ཇི་སྐད་དུ། གཉིས་སློབ་རིགས་ལས་བཟློག་ནས་ནི། །སངས་རྒྱས་སུ་འགྱུར་གཞན་གསུམ་ཡང༌། །ཞེས་སོ། །འཕགས་པ་འདོད་པ་ལ་འདོད་ཆགས་དང་མ་བྲལ་བ་དང་བྲལ་བ་གཉིས་སོ། །དང་པོ་ནི་རྒྱུན་ཏུ་ཞུགས་དང་ལན་ཅིག་ཕྱིར་འོང་སྟེ་སྨོན་ལམ་གྱི་དབང་གིས་འདོད་པར་སྐྱེ་བ་འཛིན་ནོ། །གཉིས་པ་ཕྱིར་མི་འོང་ནི་འདོད་པར་སྐྱེ་བའི་རྒྱུ་འདོད་པའི་ཉོན་མོངས་པ་དགུ་པོ་སྤངས་ཀྱང༌། སྤྲུལ་པའི་སྟོབས་ཀྱིས་སྐྱེ་བ་འཛིན་ནོ། །དེ་གཉིས་འཕགས་པའི་ལམ་ཐོབ་པ་དེ་སྲིད་པའི་སྐྱེ་བ་དག་ཏུ་བསྒྱུར་བའི་ཕྱིར་བསམ་གྱིས་མི་ཁྱབ་པར་བསྒྱུར་བའི་སྐྱེ་བ་དང་ཡང་དག་པར་ལྡན་ནོ། །དེ་གཉིས་རང་སེམས་ཡང་དང་ཡང་དུ་འཁོར་བ་ལ་ཡིད་ཀུན་ཏུ་འབྱུང་བ་དང་ལྡན་པ་ལ་གོམས་པ་མྱ་ངན་ལས་འདས་པ་ལ་མངོན་པར་དགའ་བའི་བསམ་པ་ཡང་ཡང་སྐྱེ་བས་གེགས་བྱས་པའི་ཕྱིར། རྟོགས་པ་དབུལ་བ་ཡིན་པར་བསྟན་ཏོ། །བདེན་པ་མཐོང་བ་འདོད་པ་ལས་འདོད་ཆགས་དང་མ་བྲལ་བ་ལམ་གྱི་དོན་མ་བྱས་པ་ནི་སངས་རྒྱས་མེད་པའི་ཞིང་དུ་སྐྱེས་ནས་སྤྲུལ་པ་དོན་དུ་གཉེར་བས་བསམ་གཏན་ལ་བརྩོན་ཞིང་སྤྲུལ་པ་དེ་བརྟེན་ནས་རང་རྒྱལ་ལམ་སངས་རྒྱས་སུ་འགྱུར་རོ། །དཔལ་འཕྲེང་གི་མདོར། ཇི་སྐད་དུ། ཉན་ཐོས་སུ་གྱུར་ནས་རང་སངས་རྒྱས་སུ་འགྱུར་རོ། །ཕྱིས་ནི་སངས་རྒྱས་སུ་ཡང་འགྱུར་རོ་ཞེས་གསུངས་སོ། །རིགས་ངེས་པའི་ཉན་ཐོས་ནི། རང་གི་ལམ་འབའ་ཞིག་ལ་བརྟེན་ནས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་མངོན་དུ་བྱེད་པའོ། །དེ་ལྟར་ཉན་ཐོས་ཀྱི་དབྱེ་བ་རྣམ་པ་བཞིའོ། །རང་སངས་རྒྱས་ལ་ཡང་བསེ་རུ་ལྟ་བུ་དང་ཚོགས་ན་སྤྱོད་པ་ལ་སོགས་པའི་དབྱེ་བའོ། །ཐེག་པ་བླ་ན་མེད་པ་ལྟར་ན་གནས་སྐབས་ཐེག་པ་གསུམ་གྱིས་ངེས་པར་འབྱུང་ཞིང་ཐམས་ཅད་ཀྱང་མཐར་ཐུག་ཐེག་པ་གཅིག་གི་འབྲས་བུར་གནས་པར་བཞེད་པ་ནི་ངེས་པའོ། །ཀུན་ཤེས་ཉིད་ཅེས་པ་ནི་འདུས་བྱས་ཐམས་ཅད་ནི་མི་རྟག་པའོ། །ཟག་པ་དང་བཅས་པ་ཐམས་ཅད་སྡུག་བསྔལ་བའོ། །ཆོས་ཐམས་ཅད་བདག་མེད་པའོ། ། ཞེས་པ་གསུམ་དང་བདེན་པ་བཞིའི་སྒོ་ནས་ཆོས་ཐམས་ཅད་ལ་རྨོངས་པ་མེད་པའི་ཤེས་པ་ནི་ཉན་རང་གི་ཡེ་ཤེས་ཏེ། ཀུན་ཤེས་དེ་ཉིད་ཀྱིས་འདུ་བྱེད་ཉེ་བར་ཞི་བའི་མྱ་ངན་ལས་འདས་པར་ཁྲིད་པར་མཛད་པ་གང་ཡིན་པའོ། །དང་ཞེས་པ་ནི་སྡུད་པའི་ཏོན་ཏོ། །འགྲོ་ལ་ཕན་པར་བྱེད་ཅེས་པ་ནི། བྱང་ཆུབ་སེམས་དཔའོ། །ཇི་སྐད་དུ། གཞུང་འགྲེལ་གནོད་འཇོམས་ལས། བྱང་ཆུབ་སེམས་དཔའ་ནི་རྣམ་པ་གཉིས་ཏེ། ཀུན་རྫོབ་ཀྱི་བྱང་ཆུབ་སེམས་དཔའ་དང༌། དོན་དམ་པའི་བྱང་ཆུབ་སེམས་དཔའོ། །གང་གི་ཕྱིར། ཡང་དག་པར་རྫོགས་པའི་བྱང་ཆུབ་དང༌། སེམས་ཅན་ལ་དམིགས་ནས་སྐྱེས་པའི་སེམས་དང་པོ་ནི་བྱང་ཆུབ་དང་སེམས་ཅན་ལ་དམིགས་པའི་བྱང་ཆུབ་སེམས་དཔའ་ཞེས་བྱའོ། །སེམས་དེ་གང་ལ་ཡོད་པ་དེ་ལ་ཡང་ཆུབ་སེམས་དཔའ་ཞེས་བྱའོ། །ཨེ་མའོ། །བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས། སེམས་ཅན་ཐམས་ཅད་ཤིན་ཏུ་མཐར་ཐུག་པའི་མྱ་ངན་ལས་འདས་པ་ལ་དགོད་པར་བྱའོ། །སྙམ་དུ་བསམ་སྟེ། བྱང་ཆུབ་དང་སེམས་ཅན་ལ་དམིགས་ན་ཀུན་རྫོབ་དང་དོན་དམ་པའི་བདེན་པ་གཉིས་ལ་གནས་ཏེ། ཤེས་རབ་དང་སྙིང་རྗེ་དེ་གཉིས་ཀྱི་སེམས་རིན་པོ་ཆེ་བསྐྱེད་པ་དང་ལྡན་པའི་ཕྱིར་བྱང་ཆུབ་སེམས་དཔའ་ཞེས་བྱའོ། ། རབ་ཏུ་དགའ་བ་ལ་སོགས་པ་སེམས་བསྐྱེད་པ་བཅུ་ལ་ནི། དོན་དམ་པའི་བྱང་ཆུབ་སེམས་དཔའ་ཞེས་བྱའོ་ཞེས་གསུངས་སོ། །བྱང་ཆུབ་སེམས་དཔའི་ཚིག་གི་དོན་ནི། རིགས་ཀྱི་སྐབས་སུ་འཆད་པར་འགྱུར་ཞིང༌། བྱང་ཆུབ་སེམས་དཔའ་ཆེན་པོའི་རྒྱུ་མཚན་ནི། ཆེད་དུ་བྱ་བའི་སྐབས་ཀྱིས་འཆད་པར་འགྱུར་རོ། །རྣམས་ཞེས་པས་དེ་དག་གི་དབྱེ་བ་མང་པོ་སྟོན་ཏོ། །མདོ་སྡེའི་རྒྱན་ལས་ཇི་སྐད་དུ། གཅིག་ནི་མོས་དང་ལྡན་པ་དང༌། ལྷག་པའི་བསམ་པ་དག་པ་གཞན། མཚན་མ་དང་ནི་མཚན་མེད་དང༌། མངོན་པར་འདུ་བྱེད་མེད་སྤྱོད་པ། ལྔ་པོ་འདི་དག་ས་ཀུན་ལ། བྱང་ཆུབ་སེམས་དཔའ་ཡིན་ཞེས་བྱ། ཞེས་སོ། །གནོད་འཇོམས་ལས། ཇི་སྐད་དུ། གླེང་གཞིའི་སྐབས་སུ་བྱང་ཆུབ་སེམས་དཔའ་ནི་རྣམ་པ་ལྔ་སྟེ། ལྷག་པའི་བསམ་པ་དག་པ་དང༌། རྩོལ་བ་དང་བཅས་པར་མཚན་མ་མེད་པ་ལ་གནས་པ་དང༌། མཚན་མ་མེད་པ་ལ་ལྷུན་གྱིས་གྲུབ་པར་གནས་པ་དང༌། སྤྱོད་པ་ངེས་པ་ལ་ཞུགས་པ་དང༌། སྐྱེ་བ་གཅིག་གིས་ཐོགས་པ་རྣམས་དེ་དེ་དག་ནི་འདིར་གཏོགས་སོ། །ས་དང་པོ་ལ་གནས་པ་རྣམས་ནི་ལྷག་པའི་བསམ་པ་དག་པའོ། ། ས་བདུན་པའི་བར་དུ་ནི་རྩོལ་བ་དང་བཅས་པར་མཚན་མ་མེད་པ་གནས་པ་དག་གོ། ས་བརྒྱད་པ་ནི་མཚན་མ་མེད་པ་ལ་ལྷུན་གྱིས་གྲུབ་པར་གནས་པ་དག་གོ། དེ་ནས་ས་བཅུ་པའི་པར་དུ་ནི་སྤྱོད་པ་ལ་ངེས་པ་ཞུགས་པ་དག་གོ། དེ་ཡན་ཆད་ནི་སྐྱེ་བ་ནི་གཅིག་གིས་ཐོགས་པ་དག་གོ། ཞེས་སོ། །རྡོ་རྗེ་སྙིང་པོ་རྒྱན་གྱི་རྒྱུད་དང༌། སངས་རྒྱས་ཕལ་པོ་ཆེ་དང༌། འགྲེལ་ཆེན་དྲི་མེད་འོད་རྣམས་སུ་བྱང་ཆུབ་སེམས་དཔའི་འོད་རྣམས་སུ་བྱང་ཆུབ་སེམས་དཔའི་རྣམ་པར་བཞག་པ་བཅུ་གསུངས་སོ། །ལམ་ཤེས་ཉིད་ཅེས་པ་ནི། བྱང་ཆུབ་སེམས་དཔའ་དང་པོའི་སེམས་བསྐྱེད་ཅིང་མོས་པས་སྤྱོད་པའི་ས་ནས་བཟུང་སྟེ། ས་ཆོས་ཀྱི་སྦྲིན་ལ་ཐུག་པའི་པར་དུ་ཀུན་འགྲོ་བའི་དོན་དང༌། མཆོག་གི་དོན་ལ་སོགས་པ་རབ་ཏུ་རྟོགས་པས་དེ་བཞིན་ཉིད་ཡོངས་སུ་སྤྱོད་བ་ལ་ཞུགས་པ་གནས་གྱུར་པའི་རྒྱུར་གྱུར་པ་དང༌། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་ཤིང་རྣམ་མཁྱེན་གྱི་གྲོང་ཁྱེར་ཆེན་པོར་ཕྱིན་པར་བྱེད་པའི་ཡེ་ཤེས་ནི་ལམ་གྱི་རྣམ་པས་འཇུག་པའི་ཕྱིར་ལམ་ཤེས་ཏེ། ལམ་ཤེས་དེ་ཉིད་ཀྱིས་འཇིག་རྟེན་གྱི་དོན་ཕན་དང་བདེ་དང་སྐྱོབ་པ་ལ་སོགས་པ་བསྒྲུབ་པར་མཛད་པ་གང་ཡིན་པའོ། །གང་དང་ཡང་དག་ལྡན་ཞེས་པ་ནི། རྣམ་མཁྱེན་དང་ལྡན་པ་སྟེ། དེ་ནས་སངས་རྒྱས་རྣམས་ཀྱི་ཡེ་ཤེས་ནམ་མཁའི་ཁམས་ཀྱི་མཐས་གཏུགས་པའི་སེམས་ཅན་གྱི་དོན་རྒྱུན་མི་འཆད་པ་ཆོས་ཀྱི་སྐུར་རབ་ཏུ་རྟོགས་པ་བག་ཆགས་ཀྱི་མཚམས་སྦྱོར་བ་རབ་ཏུ་སྤངས་པའི་འབྲས་བུ་ཡེ་ཤེས་ནི་ཆོས་ཐམས་ཅད་ལ་རྣམ་པ་ཐམས་ཅད་དུ་ཞུགས་པའི་འབྲས་བུ་ཡིན་པའི་ཕྱིར་རྣམ་པ་ཐམས་ཅད་མཁྱེན་པ་སྟེ། དེ་དང་ཡང་དག་པར་ལྡན་པས་ཐུབ་པ་སངས་རྒྱས་བཅོམ་ལྡན་འདས་རྣམས་རྣམ་པ་ཀུན་གྱི་མཆོག་དང་ལྡན་པ་པྲ་ཕབ་དང་མཚུངས་པའི་སྟོང་ཉིད་ཟབ་མོ་སྟོན་པར་བྱེད་པའི་ཆོས་ཀྱི་འཁོར་ལོ་སྣ་ཚོགས་ཤེར་ཕྱིན་ལ་སོགས་པ་འདི་གསུང་བར་མཛད་པ་གང་ཡིན་པའོ། །ཇི་སྐད་དུ། འགྲེལ་ཆེན་དྲི་མེད་འོད་ལས། འདིར་དངོས་པོ་དང་དངོས་པོ་མེད་པ་གཅིག་ཏུ་འདྲེས་པར་གྱུར་པ་རང་བཞིན་མེད་ཅིང་རྫས་དང་རྣམ་པར་རྟོག་པ་དང་བྲལ་བ་པྲ་ཕབ་པ་དང་མཚུངས་པ་སྐད་ཅིག་རྣམ་བྲལ་དེ་སྐྱེ་བ་དང་འཇིག་པ་དང་བྲལ་བའི་དངོས་པོ་ནི་སངས་རྒྱས་རྣམས་ཀྱི་ཆོས་ཀྱི་འཁོར་ལོ་བསྐོར་བའི་དོན་དུ་ཡོད་དོ་ཞེས་གསུངས་སོ། ། དེས་ན་དོན་དམ་པའི་སྲིད་པ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་དང་རྣམ་ཀུན་མཆོག་ལྡན་གྱི་སྟོང་པ་ཉིད་དང་རྣམ་པ་ཐམས་ཅད་མཁྱེན་པ་ཉིད་དང༌། སྐྱེ་འཇིག་མེད་པའི་ཡེ་ཤེས་ཀྱི་དེ་ཁོ་ན་ཉིད་ཡིན་ཏེ། འགྲེལ་ཆེན་དེ་ཉིད་ལས། སྐད་ཅིག་གཅིག་དང་དུུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ན་ཉིད་ཅེས་གསུངས་སོ། །ཞེས་སོ། །དེ་ལྟར་ན་ཉན་རང་རྣམས་ཉེར་ཞིར་ཁྲིད་པར་མཛད་པའི་ཀུན་ཤེས་པ་ཉིད་གང་ཡིན་པ་དང༌། བྱང་ཆུབ་སེམས་དཔའ་རྣམས་འཇིག་རྟེན་གྱི་དོན་བསྒྲུབ་པར་མཛད་པའི་ལམ་ཤེས་པ་ཉིད་གང་ཡིན་པ་དང༌། སངས་རྒྱས་རྣམས་ཆོས་ཀྱི་འཁོར་ལོ་བསྐོར་བར་མཛད་པའི་རྣམ་པ་ཐམས་ཅད་མཁྱེན་པ་ཉིད་གང་ཡིན་པ་དེ་དག་རྣམས་ནི་ངོ་བོ་ཐ་དད་པའི་མཁྱེན་པ་གསུམ་གང་ཟག་སོ་སོའི་རྒྱུད་ལ་མངའ་བ་རྣམས་ཡིན་ནོ། །གང་ལ་བསླབས་ན་འཕགས་པ་དེ་རྣམས་འབྱུང་ཞིང་བཞེད་པ་ཐམས་ཅད་བསྒྲུབ་པར་མཛད་པ་ཉན་ཐོས་དང་བྱང་ཆུབ་སེམས་དཔའི་ཚོགས་བཅས་སངས་རྒྱས་ཀྱི་ཆོས་མཐའ་དག་བསྐྱེད་པར་བྱེད་པ་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་དབྱིངས་ཡིན་ཏེ། དེ་ཉིད་འཕགས་པའི་ཆོས་ཐམས་ཅད་ཀྱི་རྒྱུ་ཡིན་པའི་ཕྱིར་མཆོད་འོས་བསྟོད་འོས་ཕྱག་གི་གནས་སུ་གྱུར་པ་དེ་ལ་རྒྱལ་བ་བྱམས་པ་བདག་ཀྱང་ཕྱག་འཚལ་ལོ། །དེ་ཉིད་ནི་གང་ལ་བསླབ་པར་བྱ་བའི་ཡུལ་གཞི་ཤེས་རབ་ཀྱི་ཕ་རོལ་ཏུ་ཕྱིན་པ་འཆད་པར་འགྱུར་བའི་རྣམ་པ་བརྒྱ་དང་བདུན་ཅུ་རྩ་གསུམ་གྱི་བདག་ཉིད་ཆོས་དབྱིངས་དེ་བཞིན་ཉིད་ཀྱི་མཁྱེན་པ་གསུམ་ངོ་བོ་གཅིག་པ་ནམ་མཁའ་ལྟར་ཀུན་ལ་ཁྱབ་པའི་གཉིས་མེད་ཡེ་ཤེས་ཡིན་ནོ། །དེ་ནས་ལམ་བདེན་གྱིས་བསྡུས་ཤིང་གང་ཟག་སོ་སོའི་རྒྱུད་ལ་ཡོད་པ་གཞན་བྱུང་ཡེ་ཤེས་ནི་དུས་གསུམ་གྱི་འཕགས་པ་རྣམས་ཀྱི་བསྐྱེད་བྱེད་ཀྱི་ཡུམ་མ་ཡིན་ཏེ། གང་ཟག་གཅིག་གི་རྒྱུད་ལ་ཡོད་པའི་འདུས་བྱས་ཀྱི་དངོས་པོ་གཅིག་ཉིད་དུས་གསུམ་གྱི་གང་ཟག་གཞན་དང༌། གཞན་གྱི་རྒྱུད་ལ་འཕོ་བ་མི་སྲིད་པའི་ཕྱིར་དང༌། དེ་དང་རིགས་འདྲ་བའི་དངོས་པོ་གཞན་དང་གཞན་གྱིས་གང་ཟག་གཞན་དང་གཞན་གྱི་རྒྱུད་ལ་ཡོན་ཏན་གྱི་ཆོས་བསྐྱེད་པ་ཡིན་ན་ཡང་དེ་ཉིད་ཀྱི་བསྐྱེད་པར་མི་འགྱུར་བའི་ཕྱིར་རོ། །དེ་ལྟ་བས་ན་འདུས་བྱས་ཀྱི་ཡེ་ཤེས་གཅིག་ཉིད་དུས་གསུམ་གྱི་འཕགས་པ་ཐམས་ཅད་ཀྱི་ཡུམ་ཡིན་པར་འགལ་ཞིང་དུུ་མ་ཡིན་པ་ལ་ཡང་ལུང་གི་གནོད་དོ། །ཇི་སྐད་དུ། །ཡོན་ཏན་རིན་ཆེན་སྡུད་པ་ལས། །དེ་བཞིན་ཕྱོགས་བཅུའི་འཇིག་རྟེན་ཁམས་ཀྱི་སངས་རྒྱས་ཀྱང༌། །ཡུམ་གྱུར་ཤེས་རབ་དམ་པ་འདི་ལ་དགོངས་པ་མཛད། །གང་དག་འདས་དང་ཕྱོགས་བཅུའི་འཇིག་རྟེན་མགོན་གང་དང༌། །མ་འོངས་དུས་ན་འབྱུང་འགྱུར་དེ་དག་འདི་ལས་བྱུང༌། །འཇིག་རྟེན་སྟོན་པ་རྒྱལ་བ་རྣམས་ཀྱི་བསྐྱེད་བྱེད་ཡུམ།། ཞེས་གསུངས་སོ། །དེ་ཕྱིར་དུས་གསུམ་གྱི་རྒྱལ་བ་ཐམས་ཅད་ཡུམ་གཅིག་པ་འདི་ལས་བྱུང༌། ཞེས་གསུངས་པར་འགྱུར་གྱི་དུ་མ་ལས་བྱུང་ཞེས་ནི་མ་གསུངས་སོ། །བྱང་ཆུབ་སེམས་དཔའི་ཚོགས་བཅས་སངས་རྒྱས་ཀྱི་ནི་ཡུམ་དེ་ལ་ཞེས་པས་ཀྱང་འཕགས་པ་ཐམས་ཅད་ཀྱི་ཡུམ་གཅིག་ཉིད་དུ་བསྟན་ཏོ། །དེས་ན་འདིར་འདུས་བྱས་ཀྱི་དངོས་པོ་གང་ལ་ཡང་འཕགས་པ་ཐམས་ཅད་ཀྱི་ཡུམ་དུ་མི་རུང་བའི་ཕྱིར་དོན་དམ་པ་ཆོས་ཀྱི་དབྱིངས་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་དང་ཡེ་ཤེས་དང་འཕགས་པ་ཐམས་ཅད་ཀྱི་ཡུམ་གཅིག་པུ་ཉིད་ཡིན་ཏེ། ཡང་དེ་ཉིད་ལས། མཁས་པ་གང་ཞིག་བསླབ་ཀུན་ཕ་རོལ་འགྲོ་འདོད་པས། །སངས་རྒྱས་བསླབ་པ་ཤེས་རབ་ཕ་རོལ་ཕྱིན་འདིར་སླབ། ། འདི་ནི་ཆོས་གཏེར་མཆོག་དང་ཆོས་མཛད་དམ་པ་ཡིན། །སངས་རྒྱས་རིགས་ཡིན་འགྲོ་བའི་བདེ་དང་སྐྱིད་པའི་མཛོད། །འདས་དང་མ་བྱོན་ཕྱོགས་བཅུའི་འཇིག་རྟེན་མགོན་པོ་རྣམས། །དེ་དག་འདི་ལས་འཁྲུངས་ཀྱང་ཆོས་དབྱིངས་ཟད་མི་འགྱུར། །ཞེས་པས་ནི་ཆོས་དབྱིངས་དེ་ཉིད་ཆོས་ཀྱི་གཏེར་དང་མཆོག་དང་ཆོས་ཀྱི་མཛོད་དང་དོན་དམ་པ་དང་གཤིས་ལུགས་ཀྱི་སངས་རྒྱས་དང་རང་བཞིན་གྱི་རིགས་དང༌། འགྲོ་བའི་བདེ་བའི་མཛོད་དང༌། སྐྱིད་པའི་མཛོད་དང༌། དུས་གསུམ་གྱི་རྒྱལ་བ་རྣམས་དེ་ལས་འཁྲུངས་ཀྱང་གཅིག་པུ་དེ་ཉིད་ཟད་པར་མི་འགྱུར་བའི་ཤེས་རབ་ཀྱི་ཕ་རོལ་ཏུ་ཕྱིན་པར་གསུངས་སོ། །དེ་ལྟར་བསྟན་པ་དེ་རྣམས་ཀྱིས་ནི་བསྟན་བཅོས་ལ་འཇུག་པའི་སྒོ་འདོད་པའི་ལྷ་ལ་ཕྱག་འཚལ་བ་བཤད་ཟིན་ཏོ། ། ༼༢༽དགོས་འབྲེལ་བསྟན་ནས་དངོས་པོ་བརྒྱད་ཀྱིས་ཤེར་ཕྱིན་བསྟན་པ། ད་ནི་དགོས་འབྲེལ་བསྟན་ནས་དངོས་པོ་བརྒྱད་ཀྱིས་ཤེར་ཕྱིན་བཤད་པ་གང་ཡིན་པ་དེ་སྟོན་ཏོ། ། ༡༽དགོས་འབྲེལ་བསྟན་པ། དེ་ལ་ཐོག་མར་དགོས་འབྲེལ་བསྟན་པ་ནི། རྣམ་པ་ཐམས་ཅད་མཁྱེན་ཉིད་ལམ། །སྟོན་པས་འདི་ལས་བཤད་པ་གང༌། གཞན་གྱིས་མྱོང་བ་མ་ཡིན་ཏེ། །ཆོས་སྤྱོད་བཅུ་ཡི་བདག་ཉིད་ཀྱི། ། མདོ་དོན་དྲན་པ་ལ་བཞག་ནས། །བློ་དང་ལྡན་པས་མཐོང་འགྱུར་ཕྱིར། །བདེ་བླག་ཏུ་ནི་རྟོགས་པ་ཞེས། །བྱ་བ་རྩོམས་པའི་དགོས་པ་ཡིན། །ཞེས་གསུངས་སོ། །ཡང་དེ་ལ་ཡིག་ཆ་ཕལ་བ་རྣམས་སུ་དགོས་འབྲེལ་གྱི་ཆོས་བཞིར་ཡོངས་སུ་གྲགས་ཤིང༌། འཆད་ལུགས་ཀྱང་ཅི་རིགས་པར་མཐོང་བའི་ཕྱིར། ཡིད་ཆེས་ཀྱི་གནས་སུ་མི་འཛིན་ཏོ། །གཞུང་འདི་ནི་ས་བཅུ་པས་མཛད་པ་ཡིན་པར་ཕྱིར། དགོས་འབྲེལ་ཡང་ས་བཅུ་པ་རྣམས་ཀྱི་རྗེས་སུ་འབྲང་སྟེ་བསྟན་པར་བྱ་དགོས་སོ། །འདི་ལ་བརྗོད་པར་བྱ་བ་དང༌། བརྗོད་པར་བྱེད་པ་དང༌། འབྲེལ་བ་དང༌། དགོས་པ་དང། དགོས་པའི་དགོས་པ་སྟེ་རྣམ་པ་ལྔའོ། ། དེས་ན་སེམས་བསྐྱེད་པ་ལ་སོགས་པའི་རིམ་པས་གསུང་བར་འགྱུར་བའི་དོན་དངོས་པོ་བརྒྱད་ཀྱི་ངོ་བོ་ཉིད་ཀྱིས་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་བརྗོད་པར་བྱ་བའོ། །འདི་སྟོན་པར་བྱེད་པའི་ལེའུའི་ཚོགས་ཀྱི་མདོ་རྣམས་ནི་བརྗོད་པར་བྱེད་པའོ། །བརྗོད་བྱ་དང་བརྗོད་བྱེད་འདི་དག་ཕན་ཚུན་བརྗོད་བྱ་བརྗོད་བྱེད་ཀྱི་མཚན་ཉིད་ནི་འབྲེལ་པའོ། །དེ་ནས་ཆོས་སྤྱོད་བཅུའི་རིམ་པས་ལམ་ལ་འཇུག་ཅིང་སློབ་པ་ནི་དགོས་པའོ། །སྦྱོར་བ་བཞིའི་ངོ་བོ་ཤེར་ཕྱིན་ཟབ་མོའི་རྣལ་འབྱོར་རྣམ་པར་མི་རྟོག་པའི་ཡེ་ཤེས་ལ་བརྟེན་ནས་སྒྲིབ་པ་ཐམས་ཅད་དང་བྲལ་བའི་འབྲས་བུ་ཆོས་ཀྱི་སྐུ་ཐོབ་ཅིང༌། མཛད་པའི་འཕྲིན་ལས་དང་བཅས་པ་ལྷུན་གྱིས་གྲུབ་པ་ནི་དགོས་པའི་དགོས་པའོ། །གལ་ཏེ་སྟོན་པས་གསུངས་པའི་མདོ་ཉིད་ལས་དགོས་པ་ལ་སོགས་པ་དེ་ལྟར་གྲུབ་ན། མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པ་འདི་བརྩམས་པ་ལ་དགོས་པ་མེད་དོ། །ཞེ་ན། མེད་པ་མ་ཡིན་ཏེ། གང་གི་ཕྱིར། བདེ་བླག་ཏུ་ནི་རྟོགས་པ་ཞེས་བྱ་བ་རྩོམ་པའི་དགོས་པ་ཡིན། ཞེས་འབྲེལ་ལོ། །ཚུལ་ཇི་ལྟར་ཞེ་ན། རྣམ་པ་ཐམས་ཅད་མཁྱེན་པ་ཉིད་ཀྱི་ལམ་སྟོན་པ་སངས་རྒྱས་ཀྱིས་ཤེར་ཕྱིན་གྱི་མདོ་འདི་ལས་བཤད་པའི་དོན་གང་ཡིན་པ་བྱང་ཆུབ་སེམས་དཔའ་ལས་གཞན་མཚན་མ་ལ་སྤྱོད་ཅིང་དམིགས་པའི་འདུ་ཤེས་ཅན་གྱིས་མྱོང་ཞིང་རྟོགས་པ་མ་ཡིན་པ་དེ་གང་ཡིན་ན། ཆོས་སྤྱོད་བཅུའི་བདག་ཉིད་ཀྱི་མདོའི་དོན་ཡིན་ལ། ཚིག་ལེའུར་བྱས་པ་འདི་ཐོས་པ་ལས་དཀའ་ཚེགས་ཆུང་ངུས་མདོའི་དོན་དེ་མི་བརྗེད་པའི་དྲན་པ་ལ་བཞག་ནས་བློ་དང་ལྡན་པ་བྱང་ཆུབ་སེམས་དཔས་མདོ་རྣམས་མཐོང་བ་ཙམ་གྱིས་མདོའི་དོན་རྟོགས་པར་འགྱུར་བའི་ཕྱིར། མདོའི་དོན་བདེ་བླག་ཏུ་ནི་རྟོགས་པ་ཞེས་བྱ་བ་གང་ཡིན་པ་དེ་ཚིག་ལེའུར་བྱས་པ་འདི་རྩོམ་པའི་དགོས་པ་ཡིན་པའི་ཕྱིར་དགོས་པ་མེད་པར་མི་འགྱུར་རོ། །དེ་ལ་སོ་སོའི་ངོ་བོ་ངོས་འཛིན་པ་ལ་རྣམ་པ་ཐམས་ཅད་མཁྱེན་པ་ཉིད་ལམ་ཞེས་པ་ནི་སློབ་པའི་གནས་སྐབས་ན་རྣམ་མཁྱེན་ཉིད་ལམ་ཡིན་པའི་ཕྱིར། རྣམ་མཁྱེན་ལ་བསླབ་པས་ལམ་ལ་བསླབ་པར་ཡང་འགྱུར་རོ། །དེ་བཞིན་དུ་གང་དང་གང་ལ་སློབ་པའི་གནས་སྐབས་སུ་དེ་དང་དེ་ལམ་ཡིན་པའི་རྣམ་མཁྱེན་དང་དེ་བཞིན་ཉིད་དང༌། ཡང་དག་པའི་མཐའ་དང༌། ཆོས་ཀྱི་དབྱིངས་དང༌། བྱང་ཆུབ་ཀྱང་དེ་དག་ལ་སློབ་པའི་གནས་སྐབས་སུ་དེ་དག་ལམ་ཡིན་པར་གསུངས་ཏེ། འཕྲིན་ལས་ཀྱི་སྐབས་སུ་མདོ་ལས། བྱང་ཆུབ་ཉིད་ཀྱང་ལམ་མོ་ལམ་ཉིད་ཀྱང་བྱང་ཆུབ་པོ་ཞེས་དང༌། དེ་ཉིད་ཀྱི་འགྲེལ་བ་གནོད་འཇོམས་ལས། གཉིས་ཀ་ཡང་ཆོས་ཀྱི་དབྱིངས་རྣམ་པར་དག་པས་རབ་ཏུ་ཕྱེ་བའི་ཕྱིར་བྱང་ཆུབ་དང་ལམ་དག་ལ་ཐ་དད་པ་གང་་ཡང་མེད་མོད་ཀྱི། འོན་ཀྱང་སྔོན་གྱི་གནས་སྐབས་ནི་རྒྱུ་ཡིན་པའི་ཕྱིར་ལམ་ཞེས་བྱ། ཕྱི་མའི་གནས་སྐབས་ལ་བྱང་ཆུབ་ཅེས་བྱའོ། །ཞེས་དང༌། ཡང་སྐབས་དེ་ཉིད་ཀྱི་མདོ་ལས་ཆོས་་ཀྱི་དབྱིངས་ལ་བསླབ་པས་ན་ཆོས་ཐམས་ཅད་ལ་བསླབ་པ་ཡིན་ནོ། །ཞེས་དང༌། འདི་ལྟར་དེས་རྟག་ཏུ་རྒྱུན་མི་འཆད་པར་རྣམ་པ་ཐམས་ཅད་མཁྱེན་པ་ཉིད་ཤིན་ཏུ་བསྒོམས་པའི་ཕྱིར་ཏེ། དེས་རྣམ་པ་ཐམས་ཅད་མཁྱེན་པ་ཉིད་ཤིན་ཏུ་བསྒོམས་པས་ལམ་ཐམས་ཅད་ཀྱང་ཤིན་ཏུ་བསྒོམས་པ་ཡིན་ཏེ། ཉན་ཐོས་ཀྱི་ལམ་མམ། རང་སངས་རྒྱས་ཀྱི་ལམ་མམ། བྱང་ཆུབ་སེམས་དཔའི་ལམ་མམ། སངས་རྒྱས་ཀྱི་ལམ་དག་ཀྱང་ཤིན་ཏུ་བསྒོམས་པ་ཡིན་ནོ་ཞེས་རྣམ་མཁྱེན་བསྒོམ་པ་ཉིད་ལ་ལམ་བསྒོམ་པ་ཡིན་པར་་གསུངས་སོ། །འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ལས། བཙུན་པ་ཤཱ་ར་དྭ་ཏིའི་བུ་གཞན་ཡང་དེ་བཞིན་གཤེགས་པའི་སྐུའི་གསང་བ་གང་ཡིན་པ་དེ་ནི་ཆོས་ཀྱི་སྐུའོ། །ཆོས་ཀྱི་སྐུ་གང་ཡིན་པ་དེ་ནི་ཆོས་རྣམས་ཀྱི་དབུ་མའི་ལམ་དུ་བལྟའོ། །ཞེས་ཆོས་ཀྱི་སྐུ་ཉིད་རྣམ་དག་ལེགས་པའི་ལམ་དུ་གསུངས་སོ། །བྱང་ཆུབ་སེམས་དཔའི་ས་ལས་དངོས་པོ་གང་ཡིན་པ་དེ་དང་དངོས་པོ་མེད་པ་འདི་གཉིས་ཀྱི་ཡོད་པ་དང་མེད་པ་ལ་རྣམ་པར་གྲོལ་བའི་ཆོས་ཀྱི་མཚན་ཉིད་ཀྱིས་བསྡུས་པའི་དངོས་པོ་དེ་ན་གཉིས་སུ་མེད་པ་ཡིན་ནོ། །གཉིས་སུ་མེད་པ་གང་ཡིན་པ་དེ་ནི་དབུ་མའི་ལམ་མཐའ་གཉིས་སྤངས་པ་བླ་ན་མེད་པ་ཞེས་བྱ་སྟེ་ཞེས་དང། དབུས་མཐའི་འགྲེལ་པ་ལས་ཀྱང་གལ་ཏེ་ཆོས་ཀྱི་དབྱིངས་ཀུན་ནས་ཉོན་མོངས་པར་འགྱུར་བའམ། རྣམ་པར་དག་པར་འགྱུར་བའོ་སྙམ་ཏུ་རྣམ་པར་རྟོག་ན། འདི་ནི་མཐའ་སྟེ། རང་བཞིན་གྱིས་ཀུན་ནས་ཉོན་མོངས་པ་ཅན་མ་ཡིན་པ་ལ་ནི་ཀུན་ནས་ཉོན་མོངས་པ་དང་རྣམ་པར་དག་པ་མེད་པའི་ཕྱིར་རོ། །མཐའ་དེ་གཉིས་ཡོངས་སུ་སྤངས་པའི་ཕྱིར་དབུ་མའི་ལམ་སྟེ། གང་སྟོང་པ་ཉིད་ཀྱིས་ཆོས་རྣམས་སྟོང་བར་མི་བྱེད་ཀྱི་ཆོས་རྣམས་ཉིད་ཀྱིས་སྟོང་པའོ་ཞེས་འབྱུང་བ་ལ་སོགས་པའོ། །ཞེས་གསུངས་དེ་མདོ་རྒྱུད་དང་བསྟན་བཅོས་ཁུངས་མ་རྣམས་སུ་ཆོས་ཀྱི་དབྱིངས་ཉིད་དབུ་མའི་ལམ་དུ་གསུངས་པའི་དགོངས་པ་ནི་གང་དང་གང་ལ་སློབ་པའི་གནས་སྐབས་དེར་དེ་དང་དེ་ཉིད་ལམ་དུ་བསྟན་པར་སྣང་ངོ༌། །ངེས་འབྱུང་བསྒྲུབ་པའི་སྐབས་སུ་ཡང༌། རྣམ་པ་ཐམས་ཅད་མཁྱེན་པ་ཉིད་དང་ཞེས་བསྒྲུབ་པ་ཉིད་རྣམ་མཁྱེན་དུ་གསུངས་པ་དང༌། སྐབས་དེ་ཉིད་ཀྱི་ཆེད་དུ་བྱ་དང་ཞེས་པའི་སྐབས་ཀྱི་མདོ་ལས་ཀྱང༌། རབ་འབྱོར་གལ་ཏེ་གཟུགས་དེ་བཞིན་མ་ནོར་བ་དང་གཞན་མ་ཡིན་པ་དང་ཕྱིན་ཅི་མ་ལོག་པ་དང༌། དེ་ཁོ་ན་དང་ཡང་དག་པ་དང། བདེན་པ་དང། ཇི་ལྟ་བ་བཞིན་དང། རྟག་པ་དང། བརྟན་པ་དང། ཐེར་ཟུག་དང་མི་འགྱུར་བའི་ཆོས་ཅན་ཡིན་ལ། དེ་དངོས་པོ་མེད་པ་མ་ཡིན་ན་ནི་ཐེག་པ་ཆེན་པོ་འདིས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ནས་ངེས་པར་འབྱུང་བར་མི་འགྱུར་བ་ཞིག་ན། རབ་འབྱོར་གང་གི་ཕྱིར་གཟུགས་ནི་བརྟགས་པ་རྣམ་པར་བསྒྲུབས་པ་ཚིག་གིས་བསྟན་པ་སྟེ། དེ་ཐམས་ཅད་མི་བརྟག་ཅིང་མི་བརྟན་ཞིང་ཐེར་ཟུག་མ་ཡིན་ལ་འགྱུར་བའི་ཆོས་ཅན་ཏེ། དངོས་པོ་མེད་ཅིང་དངོས་པོ་མ་ཡིན་པས་དེའི་ཕྱིར་ཐེག་པ་ཆེན་པོ་འདིས། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ནས་ངེས་པར་འབྱུང་བར་འགྱུར་རོ། །ཞེས་གསུངས་པའི་དོན་ཡང་དེ་བཞིན་ཉིད་ལ་སོགས་པའི་ངོ་བོར་འགྱུར་པའི་ཐེག་པ་ཆེན་པོ་ཉིད་ངེས་འབྱུང་བསྒྲུབ་པ་ཡིན་ལ། སྒྲུབ་པ་དེས་འཇིག་རྟེན་ཟིལ་གྱིས་མནན་ཅིང་ཁམས་གསུམ་ནས་ངེས་པར་འབྱུང་ཞེས་པར་མདོ་སྡེ་རྒྱན་གྱི་འགྲེལ་པར་སློབ་དཔོན་དབུ་མ་པ་ཆེན་པོ་དབྱིག་གཉེན་གྱིས་གསུངས་སོ། །གཞན་ཡང་བསྒོམ་པའི་ལམ་ནི་ཟབ་པ་སྟེ། །ཟབ་མོ་སྟོང་པ་ཉིད་ལ་སོགས། ཞེས་པ་དང༌། སྐབས་དེ་ཉིད་ཀྱི་མདོ་ལས་ཀྱང༌། རབ་འབྱོར་ཟབ་མོ་ཞེས་བྱ་བ་འདི་ནི་དེ་བཞིན་ཉིད་དང་ཡང་དག་པའི་མཐའ་དང་ཆོས་དབྱིངས་ཀྱི་ཚིག་བླ་དྭགས་སོ། །ཞེས་སྐབས་དེ་ཉིད་ཀྱི་སྟོང་པ་ཉིད་ལ་སོགས་པ་དང་དེ་བཞིན་ཉིད་ལ་སོགས་པ་སྒོམ་པའི་ལམ་ཡིན་པར་གསུངས་སོ། །སྐད་ཅིག་མའི་སྦྱོར་བའི་སྐབས་སུ་ཡང༌། བར་ཆད་མེད་པའི་ཏིང་ངེ་འཛིན་ནི། དེ་ནི་རྣམ་པ་ཀུན་མཁྱེན་ཉིད། ཅེས་སྦྱོར་བའི་ངོ་བོར་གྱུར་པའི་རྣམ་མཁྱེན་དེ་ཉིད་ཀྱི་དམིགས་པ་དངོས་མེད་དང༌། རྣམ་པ་ཞི་བ་དང་མཚན་ཉིད་ནི་མཚན་ཉིད་མེད་པ་མཚན་ཉིད་གཅིག་པ་ལ་སོགས་པའི་ཚུལ་གྱིས་རྣམ་ཀུན་མཆོག་ལྡན་གྱི་སྟོང་པ་ཉིད་ཡིན་པར་གསུངས་སོ། །དེས་ན་སློབ་པའི་སྐབས་སུ་ཆོས་དབྱིངས་དང༌། རྣམ་མཁྱེན་ཉིད་ལ་སློབ་པ་དང༌། ཞུགས་པ་གང་ཡིན་པ་དེ་ཉིད་ལམ་ལ་སློབ་པ་དང་ལམ་ལ་ཞུགས་པ་ཡིན་པར་གསུངས་པའི་ཕྱིར། འདིར་ཡང་རྣམ་པ་ཐམས་ཅད་མཁྱེན་པ་ཉིད་ལམ་ཞེས་པའི་དོན་ནི་དེ་ཡིན་ནོ། །གལ་ཏེ་ཆོས་ཀྱི་དབྱིངས་དང༌། བྱང་ཆུབ་དང༌། རྣམ་མཁྱེན་རྣམས་གཞི་འབྲས་ཡིན་པའི་ཕྱིར་ལམ་ཡིན་པར་འགལ་ལོ་ཞེ་ན། གཞི་དང་འབྲས་བུའི་གནས་སྐབས་ན་ལམ་དུ་མ་གསུངས་པའི་ཕྱིར་བདེན་མོད་ཀྱི། སློབ་པའི་གནས་སྐབས་ན་ནི། ལམ་དུ་གསུངས་པའི་ལུང་རྣམ་དག་ཤིན་ཏུ་མང་བར་སྣང་བའི་ཕྱིར་སྐབས་ལ་ལྟོས་ནས་ལེགས་པར་ཕྱེ་ནས་གསུངས་པ་ཡང་ཤིན་ཏུ་མང་བར་སྣང་ངོ༌། །ཇི་སྐད་དུ། སྔོན་གྱི་གནས་སྐབས་ནི་རྒྱུ་ཡིན་པའི་ཕྱིར་ལམ་ཞེས་བྱའོ། །ཕྱི་མའི་གནས་སྐབས་ལ་བྱང་ཆུབ་ཅེས་བྱའོ། །ཞེས་པ་ལ་སོགས་པ་རྣམས་སོ། །དེས་ན་སྐབས་ལ་ལྟོས་ནས་ལེགས་པར་འབྱེད་པ་ནི་ཤིན་ཏུ་གལ་ཆེ་སྟེ། ཇི་སྐད་དུ། མྱང་འདས་ཆེན་པོ་ལས། ཅི་དང་ཅིར་ལྡན་པ་དེ་དང་དེའི་སྐབས་སུ་མིང་འདོགས་སོ། །ཞེས་གསུངས་སོ། །གལ་ཏེ་དེ་ལྟ་ན། ལམ་འདུས་བྱས་སུ་གསུངས་པའི་ཕྱིར་ཆོས་ཀྱི་དབྱིངས་ལ་སོགས་པ་ཡང་འདུས་བྱས་སུ་འགྱུར་རོ་ཞེ་ན། ཆོས་དབྱིངས་རང་གི་ངོ་བོ་ཆོས་གཞན་དང་མ་འདྲེས་པ་ནི་ཇི་ལྟར་སྔར་བཞིན་ཕྱིས་དེ་བཞིན། ཞེས་པའི་ཚུལ་གྱིས་རྟག་པ་བརྟན་པ་ཐེར་ཟུག་པ་མི་འགྱུར་བའི་ཆོས་ཅན་འདུས་མ་བྱས་ཡིན་པ་ནི་བདེན་མོད་ཀྱི། འོན་ཀྱང་གནས་སྐབས་ལ་ལྟོས་ནས་འདུས་བྱས་དང་མི་རྟག་པ་དང་གློ་བུར་བར་གསུངས་པའི་དོན་གོ་ན་ཆོས་དབྱིངས་འདུས་བྱས་སུ་བྲལ་བ་དང་ལམ་འདུས་མ་བྱས་སུ་ཐལ་བས་གནོད་པར་མི་འགྱུར་རོ། ། བསྒོམ་ལམ་གདམས་ངག་གི་སྐབས་ཀྱི་མདོའི་འགྲེལ་བར་དབུ་མ་པ་ཆེན་པོ་སློབ་དཔོན་དབྱིག་གཉེན་གྱིས་ཇི་སྐད་དུ། དེ་ཡང་འདི་ལྟར་དེ་བཞིན་ཉིད་དེ་ཉིད་མ་དག་པའི་གནས་སྐབས་ན་ནི་འདུས་བྱས་ཞེས་བྱ་ལ། དེ་ཉིད་དག་པའི་གནས་སྐབས་ན་ནི་འདུས་མ་བྱས་ཞེས་བྱའོ། །ཞེས་དང། དབུས་མཐའ་རྩ་འགྲེལ་དུ་ཡང༌། །མི་རྟག་དོན་ནི་མེད་དོན་དང། །སྐྱེ་ཞིང་འཇིགས་པའི་མཚན་ཉིད་དང༌། །དྲི་བཅས་དྲི་མ་མེད་དོན་དེ། །རྩ་བའི་ཁོ་ནར་གོ་རིམ་བཞིན། །ཞེས་ངོ་བོ་ཉིད་གསུམ་ལ་མི་རྟག་པའི་ཚུལ་མི་འདྲ་བ་གསུམ་གསུངས་པ་ལ། ཆོས་ཉིད་ཡོངས་གྲུབ་ཀྱི་མི་རྟག་པའི་ཚུལ་འདི་ནི་ལམ་གྱི་གནས་སྐབས་ཀྱི་ཆོས་ཉིད་དེ་ལྟར་གསུངས་པ་དང་གཅིག་ཏུ་གོ་དགོས་སོ། །ཇི་སྐད་དུ། གལ་ཏེ་དྲི་མ་དང་བཅས་པར་གྱུར་ལ་དྲི་མ་མེད་པར་ཡང་འགྱུར་ན་འགྱུར་བའི་ཆོས་ཅན་ཡིན་པས་ཇི་ལྟར་མི་རྟག་པར་མི་འགྱུར་ཞེ་ན། དེ་ནི་འདི་ལྟར་ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་དག་པར་འདོད། །གློ་བུར་གྱི་དྲི་མ་དང་བྲལ་བ་ལ་བྱའི། དེའི་ངོ་བོ་ཉིད་གཞན་དུ་འགྱུར་བ་ནི་མ་ཡིན་ནོ། །ཞེས་དང༌། ཆོས་ཀྱི་དབྱིངས་ནི་རང་བཞིན་རང་བཞིན་གྱིས་རྣམ་པར་དག་ཕྱིར་ནམ་མཁའ་བཞིན། གཉིས་ནི་གློ་བུར་བྱུང་བ་སྟེ། །དེ་ཡང་དེ་ལ་མ་ལོག་པའོ། །ཆོས་ཀྱི་དབྱིངས་ནི་ནམ་མཁའ་བཞིན་དུ་རང་བཞིན་གྱིས་རྣམ་པར་དག་པའི་ཕྱིར། རྣམ་པར་མ་དག་པ་དང༌། ཕྱིས་རྣམ་པར་དག་ཅེས་བྱ་བ་འདི་གཉིས་ཀྱང་གློ་བུར་ཡིན་པ་དེ་ལྟར་ཤེས་པ་གང་ཡིན་པ་དེ་ནི་གློ་བུར་དུ་བྱུང་བ་ཉིད་ལ་ཕྱིན་ཅི་མ་ལོག་པའོ། །ཞེས་གསུངས་པ་རྣམས་ཀྱི་དོན་ཡང་གཞི་འབྲས་དང་ལམ་གྱི་གནས་སྐབས་ལ་ལྟོས་ནས་ངོ་བོ་མི་འགྱུར་ཡང་ཆོས་གཞན་དང་འདྲེས་པ་དང་བྲལ་བའི་གནས་སྐབས་ལ་ལྟོས་ནས་དེ་དང་དེའི་སྐབས་སུ་ཆོས་ཀྱི་དབྱིངས་ཀྱང་མི་རྟག་པ་དང་གློ་བུར་བ་དང་འདུས་བྱས་སུ་གསུངས་སོ། །ལམ་འདུས་བྱས་སུ་གསུངས་པའི་འདུས་བྱས་ལུགས་ནི་དེ་ལྟར་ཡིན་གྱི། ཀུན་བརྟག་དང་གཞན་དབང་གི་ལྟར་མེད་པའི་དོན་དང༌། སྐྱེ་ཞིང་འཇིག་པའི་དོན་དང་མི་གཅིག་སྟེ། གལ་ཏེ་གཅིག་ན་གསུང་རབ་ནང་འགལ་བར་འགྱུར་བའི་ཕྱིར་རོ། །འཕགས་པ་བློ་གྲོས་མི་བཟད་པའི་མདོ་ལས། དང་པོར་སེམས་བསྐྱེད་པ་ལ་སོགས་བྱང་ཆུབ་སེམས་དཔའི་ལམ་གྱི་ཆོས་ཐམས་ཅད་ཕུང་པོ་ལྷག་མ་མེད་པར་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་ན་ཡང་མི་ཟད་ན། གཞན་དུ་མཛད་པར་འགྱུར་བ་ལྟ་ཅི་སྨོས་པར་གསུངས་ཤིང༌། དོར་བ་མེད་པ་སྟོང་པ་ཉིད་ཀྱི་དོན་ཡང་དེ་ཉིད་དེ། དགེ་བ་མི་ཟད་བྱ་བའི་ཕྱིར་ཞེས་གསུངས་སོ། ། གལ་ཏེ་བྱང་ཆུབ་སེམས་དཔའི་ལམ་གྱི་གནས་སྐབས་ཀྱི་ཡོན་ཏན་ཐམས་ཅད་འབྲས་བུ་ཐོབ་པའི་ཚེ་ཟད་པར་མི་འགྱུར་ན། འོ་ན་སེམས་ནི་ལྔ་མས་བྱང་ཆུབ་པར་རིགས་མིན་ཞེས་སོགས་དང༌། གཟིངས་ལྟ་བུར་འབྲས་བུ་ཐོབ་པའི་ཚེ་ལམ་གྱི་ཆོས་ཐམས་ཅད་འདོར་བར་གསུངས་པའི་དོན་ཅི་ཞེ་ན། སྐད་ཅིག་སྐྱེ་འགག་དང༌། འདོར་ལེན་དང༌། ཟད་པ་དང༌། འཕེལ་འགྲིབ་དང༌། དངོས་པོ་ཡོད་མེད་ལ་སོགས་པ་རྣམས་ནི་རྣམས་པར་རྟོག་པའི་སྒོས་ཆོས་ཡིན་པའི་ཕྱིར་ཇི་སྲིད་རྣམ་རྟོག་ཡོད་པ་དེ་སྲིད་དུ་དེས་ཇི་ལྟར་སྒྲོ་བཏགས་པ་དེ་ལྟར་ཐ་སྙད་ཀྱིས་བསྟན་པར་ཟད་ཀྱི། དོན་ལ་ནི་སྐྱོན་སྤངས་པའི་ཤས་ཅི་ཙམ་པ་དེ་ཙམ་གྱི་ཡོན་ཏན་མངོན་དུ་འགྱུར་ཞིང་མངོན་དུ་གྱུར་པའི་ཡོན་ཏན་རྣམས་གོང་ནས་གོང་དུ་སྐྱོན་སྤངས་པ་ཇི་བཞིན་དུ་འཕེལ་ཞིང་རྒྱས་པར་གསུངས་ཀྱི་ཡོན་ཏན་སྔ་མ་རྣམས་ཟད་ཅིང་ཉམས་པར་འགྱུར་བ་ནི། དོན་ཡིན་ལུགས་ཀྱི་དགོངས་པར་མི་སྣང་སྟེ། དྲི་མེད་འོད་ལས་ཇི་སྐད་དུ། དང་པོར་མངོན་པར་རྫོགས་པར་སངས་རྒྱས་ནས་དེའི་རྗེས་ལ་སངས་རྒྱས་རྣམས་ཀྱི་རྣལ་འབྱོར་སྐད་ཅིག་ཐམས་ཅད་མེད་པ་གཅིག་དང་དུུ་མ་དང་བྲལ་བ་མཆོག་གི་གཉིས་སུ་མེད་པ་སྟེ། དོན་དམ་པ་ཡོད་པ་དང་མེད་པ་དང་བྲལ་བའི་ཕྱིར་རོ། །ཇི་སྲིད་འཇིག་རྟེན་པའི་སེམས་ཡོད་པ་དེ་སྲིད་དུ་ཆོས་རྣམས་གཅིག་དང་དུ་མས་རྣམ་པར་དཔྱོད་དེ་སྐད་ཅིག་མའི་སེམས་སྣང་བའི་ཕྱིར་རོ། ། གང་གིས་ཚེ་སེམས་སྐད་ཅིག་གི་ཆོས་དང་བྲལ་བ་དེའི་ཚེ་རང་བཞིན་མེད་པ་ཞེས་བརྗོད་དོ་ཞེས་དང༌། དབང་མདོར་བསྟན་ལས། ཇི་ལྟར་ཟླ་ཤར་རིམ་པ་ཡིས། །ཆ་རྣམས་ཀྱིས་ནི་རྫོགས་པར་འགྱུར། །གྲིབ་མ་ཉམ་པ་རྫོགས་པ་སྟེ། །ཟླ་བ་ཆ་དང་རྫོགས་པ་མིན། །དེ་བཞིན་ཡེ་ཤེས་ཤར་རིམ་པས། །ས་རྣམས་ཀྱིས་ནི་རྫོགས་པར་འགྱུར། །ཉོན་མོངས་ལ་སོགས་ཉམས་པ་རྫོགས། །ཡེ་ཤེས་ཆ་དང་རྫོགས་པ་མིན། ཞེས་དང༌། གནོད་འཇོམས་ལས་ཀྱང༌། ཆོས་མ་སྐྱེས་པ་ནི་སུས་ཀྱང་ཐོབ་པའམ་མངོན་པར་རྟོགས་པར་མི་ནུས་ཤིང༌། མ་སྐྱེས་པ་ལ་གང་ཡང་རྒྱུན་དུ་ཞུགས་པར་མི་འགྱུར་གྱི་ཀུན་བརྟགས་པའི་སྒྲིབ་པ་ཙམ་བསལ་བ་ནི་གཟུང་བ་དང་འཛིན་པའི་རྣམ་པར་རྟོག་པ་མེད་པའི་ཕྱིར་ཐོབ་པ་དང་མངོན་པར་རྟོགས་པར་འདོད་དོ་ཞེས་སོ། །དེས་ན་ཆོས་ཀྱི་དབྱིངས་ལ་སློབ་པའི་ཚེ་སྐྱོན་གྱི་ཆ་ཀུན་རིམ་གྱིས་ཟད་པར་འགྱུར་ཞིང་སྔར་ཐོབ་པའི། ཡོན་ཏན་དྲན་པ་ཉེར་བཞག་སོགས་རེ་རེ་ཡང་མི་ཟད་གྱི་སྟེང་དུ་རིམ་གྱིས་འཕེལ་བའི་སྒོ་ནས་འབྲས་བུ་མཐར་ཐུག་ཐོབ་པའི་ཚེ་ཡོན་ཏན་རེ་རེས་ཀྱང་ནམ་མཁའ་ཇི་སྙེད་པར་ཁྱབ་ཅིང་ཡོངས་སུ་རྫོགས་ལ་མུར་ཐུག་པས་བྲི་གང་དང་འཕེལ་འགྲིབ་མེད་པར་གནས་སོ། །དེའི་ཕྱིར་སློབ་པའི་གནས་སྐབས་ཀྱི་སྐད་ཅིག་མའི་སེམས་སྣང་བའི་དབང་གིས་སྤང་བྱ་འབྲི་བ་དང་གཉེན་པོ་འཕེལ་བའི་རྒྱུས་ཆོས་ཀྱི་དབྱིངས་ཀྱང་གང་ཟག་ལ་ལྟོས་ནས་དྲི་བཅས་དྲི་མེད་དུ་འགྱུར་བ་ལ་མི་རྟག་པའི་དོན་དུ་གསུང་པའི་ཕྱིར། སེམས་ནི་སྔ་མས་བྱང་ཆུབ་པར་རིགས་མིན་ཞེས་སོགས་ཀྱི་དོན་ཡང་སྐྱོན་སྲབ་འཐུག་གི་ཆ་ཤས་སྔ་མ་ལ་ལྟོས་ནས་ཡོན་ཏན་ཕྱི་མ་ཕྱི་མ་རྣམས་གོང་ནས་གོང་དུ་རྒྱས་ཤིང་མཐུ་ཆེ་བ་ལ་སྔ་མ་འགགས་པ་དང༌། ཕྱི་མ་སྐྱེས་པའི་ཐ་སྙད་ཀྱིས་བསྟན་པ་ནི་འཇིག་རྟེན་པའི་འཁྲུལ་སྣང་ལ་ལྟོས་ནས་བཤད་པ་ཙམ་ཡིན་གྱི། དོན་གྱི་ངོ་བོ་ལ་བྱང་ཆུབ་སེམས་དཔའི་ཡོན་ཏན་སྔ་ཕྱི་སྐྱེས་པ་འགགས་ཤིང་ཟད་པ་མེད་པ་སྐྱེ་ཞིང་གནས་པ་ནི་ཟབ་མོའི་ཆོས་ཉིད་རྣམ་པ་བརྒྱད་ཀྱིས་བཀག་གོ། གལ་ཏེ་སློབ་པའི་ཚེ་ཆོས་ཀྱི་དབྱིངས་ཀྱང་ལམ་ཡིན་ན་ཤེར་ཕྱིན་བཏགས་པ་པར་བཤད་པ་དང་འགལ་ལོ་ཞེ་ན། ཤེར་ཕྱིན་མཚན་ཉིད་པ་འཕེལ་འགྲིབ་དང་སྐྱེ་འགག་ལ་སོགས་སྤྲོས་པ་ཐམས་ཅད་བྲལ་བའི་ཆོས་ཀྱི་དབྱིངས་ཀྱི་ངོ་བོ་གང་ཡིན་པ་དེ་ཡིན་གྱི། ལམ་གྱི་གནས་སྐབས་འཕེལ་འགྲིབ་དང་བཅས་པ་ནི་དེ་ཐོབ་པར་བྱེད་པའི་རྒྱུ་དང༌། འདུས་བྱས་སུ་གསུངས་པའི་ཕྱིར་བཏགས་པ་ཡིན་པ་དང༌། མཚན་ཉིད་པ་མ་ཡིན་པར་བསྟན་ཏོ། །འབྲས་བུ་བླ་མེད་ཐོབ་པའི་ཚེ་འཕེལ་འགྲིབ་དང་བཅས་པའི་ལམ་གྱི་གནས་སྐབས་ཐམས་ཅད་དོར་བའི་ཕྱིར། ལམ་གཟིངས་ལྟ་བུའི་དོན་ཡང་དེ་ཉིད་དོ། །ཁ་གཅིག་ནི་གཟིངས་ལྟ་བུ་ཞེས་པ་དེ་ཐེག་པ་འོག་མའི་ལུགས་ཡིན་ཞེས་ཀྱང་འཆད་དོ། །དེ་ལྟར་ན་གནས་སྐབས་ལ་ལྟོས་ནས་གསུངས་པའི་ཕྱིར་རོ། །རྣམ་པ་ཐམས་ཅད་མཁྱེན་པ་ཉིད་ལམ་དུ་བསྟན་པའི་དོན་ཡང་དེ་ཉིད་ཡིན་པར་སྣང་ངོ༌། །རྣམ་པ་ཐམས་ཅད་མཁྱེན་པ་ཉིད་ཀྱི་ལམ་ལ་སློབ་པའི་ངོ་བོ་ཆོས་སྤྱོད་བཅུའི་བདག་ཉིད་ཤེར་ཕྱིར་གྱི་མདོའི་དོན་རྣམ་མཁྱེན་ཉིད་ཡི་གེར་འབྲི་བ་ལ་སོགས་པ་ནི་དབུས་མཐའ་རྩ་འགྲེལ་ལས། ཡི་གེ་འབྲི་མཆོད་སྤྱིན་པ་དང། །ཉན་དང་ཀློག་དང་ལེན་པ་དང༌། །འཆད་དང་ཁ་དོན་བྱེད་པ་དང། །དེ་སེམས་པ་དང་བསྒོམ་པའོ། །ཐེག་པ་ཆེན་པོ་ཡི་གེ་འབྲི་བ་དང༌། མཆོད་པ་དང༌། གཞན་དག་ལ་སྦྱིན་པ་དང༌། གཞན་དག་ཀློག་པ་ལ་ཉན་པ་དང༌། བདག་ཉིད་ཀློག་པ་དང༌། ལེན་པ་དང་ཚིག་དང་དོན་འཆད་པ་དང༌། ཁ་དོན་བྱ་བ་དང༌། སེམས་པ་དང༌། བསྒོམ་པའོ། །སྤྱོད་པ་དེ་བཅུའི་བདག་ཉིད་ནི་བསོད་ནམས་ཕུང་པོ་དཔག་ཏུ་མེད། ཅིའི་ཕྱིར་མདོ་དག་ལས་ཐེག་པ་ཆེན་པོ་ཉིད་ཀྱི་ཆོས་སྤྱོད་པ་ཤིན་ཏུ་འབྲས་བུ་ཆེ་བར་བསྟན་གྱི། ཉན་ཐོས་ཀྱི་ཐེག་པ་ལ་མ་ཡིན་ཞེ་ན། རྣམ་པ་གཉིས་ཀྱི་ཕྱིར་ཏེ། ཁྱད་པར་ཕྱིར་དང་མི་ཟད་ཕྱིར། ཁྱད་པར་གྱི་ཕྱིར་ནི་ཇི་ལྟ་བུ་མི་ཟད་པའི་ཕྱིར་ནི་ཇི་ལྟ་བུ་ཞེ་ན། གཞན་ལ་ཕན་འདོགས་མ་ཞུགས་པའི་ཕྱིར་གཞན་ལ་ཕན་འདོགས་པར་ཞུགས་པའི་ཕྱིར་རོ། །ཡོངས་སུ་མྱ་ངན་ལས་འདས་པ་ན་ཡང་ཞི་བ་མེད་ཅིང་རྒྱུན་མི་འཆད་པའི་ཕྱིར། མི་ཟད་པར་རིག་པར་བྱའོ། །ཞེས་གསུངས་ཏེ། ཐེག་ཆེན་དང༌། ཤེར་ཕྱིན་དང༌། རྣམ་མཁྱེན་རྣམས་གཅིག་པའི་ཕྱིར་རྣམ་མཁྱེན་ཡི་གེར་འབྲི་བ་ལ་སོགས་རྣམ་མཁྱེན་ལ་སློབ་པའི་ཆོས་སྤྱོད་བཅུ་སྤྱོད་པ་གང་ཡིན་པ་དེ་ཉིད་ཉན་ཐོས་ཀྱི་ཐེག་པ་ལ་ཡོད་པ་མ་ཡིན་པས། གཞན་གྱི་མྱོང་བ་མ་ཡིན་པའི་དོན་ཡང་དེ་ཉིད་དོ། །མྱ་ངན་ལས་འདས་པ་ན་ཡང་མི་ཟད་པར་གསུངས་པ་འདིས་ཀྱང་བྱང་ཆུབ་སེམས་དཔའི་ལམ་གྱི་སྐབས་སུ་ཐོབ་པའི་ཡོན་ཏན་གྱི་ངོ་བོ་འབྲས་བུ་ཐོབ་པའི་ཚེ་ཉམས་པར་འདོད་པ་བསལ་བ་ཡིན་ནོ། །དེ་ཡན་ཆད་ཡུམ་གྱི་གླེང་གཞིའི་ལེའུའོ། ། ༢༽དངོས་པོ་བརྒྱད་ཀྱིས་ཤེར་ཕྱིན་བཤད་པ། ༡ བསྡུས་དོན་ལུས་རྣམ་བཞག དེ་ལྟར་དགོས་འབྲེལ་བསྟན་པ་དེའི་མཇུག་ཐོགས་དེ་མ་ཐག་ཉིད་ལ་དངོས་པོ་བརྒྱད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་ནི། ཤེས་རབ་ཀྱི་ཕ་རོལ་ཕྱིན་པ་ནི། དངོས་པོ་བརྒྱད་ཀྱི་ཡང་དག་བཤད། ཅེས་སོ། །དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་རྣམ་པ་གཉིས་ཏེ། དངོས་དང་བཏགས་པ་གང་ཡིན་པའོ། ། ཤེར་ཕྱིན་དངོས་ནི་ཆོས་ཉིད་དེ་བཞིན་ཉིད་རང་བྱུང་གི་ཡེ་ཤེས་དོན་དམ་པའི་ཤེས་རབ་ནམ་མཁའ་ལྟར་ཀུན་ལ་ཁྱབ་པའི་ཡེ་ཤེས་ཆེན་པོ་སེམས་ཀྱི་རང་བཞིན་འོད་གསལ་བ་དེ་བཞིན་གཤེགས་པའི་སྙིང་པོ་གཉིས་སུ་མེད་པའི་གཤིས་ལུགས་ཀྱི་སངས་རྒྱས་བདེན་པ་དེ་ཁོ་ན་ཉིད་ཆོས་ཀྱི་སྐུ་བླ་ན་མེད་པའི་བྱང་ཆུབ་དེ་བཞིན་ཉིད་བདག་བཏགས་པའི་བདག་དམ་པ་རང་གི་ངོ་བོ་སྐྱེ་འགག་དང་འཕེལ་འགྲིབ་ལ་སོགས་ཀུན་རྫོབ་ཀྱི་ཆོས་ཐམས་ཅད་ཀྱི་ཡེ་ནས་སྟོང་པའི་གཞི་ལ་ལྷག་མར་གྱུར་པ་གང་ཡིན་པའི་གཞན་སྟོང་ཟབ་མོ་རྣམ་པ་ཀུན་གྱི་མཆོག་དང་ལྡན་པ་པྲ་ཕབ་བརྒྱད་དང་མཚུངས་པ་ཁམས་གསུམ་པ་མ་ལུས་པའི་སངས་རྒྱས་ཀྱི་གཟུགས་རང་བཞིན་གཉུག་མའི་ཡོན་ཏན་མཚན་དཔེ་དང་སྟོབས་བཅུ་ལ་སོགས་པ་ནམ་མཁའ་གང་བའི་བདག་ཉིད་རྡུལ་ཕྲན་དང་རྣམ་ཤེས་ལས་འདས་པའི་ཕྱག་རྒྱ་ཆེན་པོ་གང་ཡིན་པ་དེ་ཡིན་ནོ། །ཇི་སྐད་དུ་རབ་ཀྱི་རྩལ་གྱིས་རྣམ་པར་གནོན་པས་ཞུས་པར། ཕུང་པོ་དང་ཁམས་དང་སྐྱེ་མཆེད་དང་རྟེན་འབྲེལ་ལ་སོགས་པ་ཆོས་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་མ་ཡིན་གྱི། ཆོས་དེ་རྣམས་ཀྱི་དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་དེ་ཉིད་དང༌། ཇི་ལྟ་བ་བཞིན་གྱི་དེ་བཞིན་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་པའི་དོན་འདི་རྒྱས་པར་གསུངས་པ་དང༌། ཤེར་ཕྱིན་གྱི་མཚན་བརྒྱ་རྩ་བརྒྱད་པར་ཡང༌། རྣམ་མཁྱེན་དང༌། ཡང་དག་པའི་མཐའ་དང༌། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། བདེན་པ་དང༌། དེ་ཁོ་ན་དང༌། ཆོས་ཉིད་དང་ཆོས་ཀྱི་དབྱིངས་དང་ཆོས་ཀྱི་གནས་ཉིད་དང་ཆོས་མི་འགྱུར་བ་ཉིད་དང༌། ཆོས་སྐྱོན་མེད་པ་ཉིད་ལ་སོགས་པ་རྣམས་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཡིན་པར་གསུངས་པ་དང༌། རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ལས་ཀྱང༌། དེ་བཞིན་ཉིད་དང༌། སྟོང་པ་ཉིད་དང༌། མཐའ་ལས་འདས་པ་སྟོང་པ་ཉིད་དང༌། ཕྱི་མའི་མཐའ་སྟོང་པ་ཉིད་དང༌། ཆོས་ཀྱི་དབྱིངས་རང་གི་ངོ་བོ་གང་ཡིན་པ་འདི་ནི་འདིར་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་དང༌། ཉི་ཁྲིའི་ལེའུ་སོ་བརྒྱད་པར་ཡང༌། དེ་བཞིན་གཤེགས་པ་རྣམས་ཀྱི་བྱང་ཆུབ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཟབ་ཅིང་བལྟ་དཀའ་བ་བྱང་དུ་ཆུབ་པར་དཀའ་ཞིང་རྟག་ཏུ་མ་མཆིས་ལ་རྟོག་གེའི་སྤྱོད་ཡུལ་མ་ལགས་ཏེ། ཞེས་དང༌། བྱངཆུབ་དེ་བཞིན་ཉིད་མཚན་ཉིད་དེ་ཡང་དེའི་མཚན་ཉིད་བཞེད་ཅེས་དང༌། དེ་ཉིད་ཀྱི་སྐབས་ཀྱི་མདོ་ལས། རབ་འབྱོར་ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པོ་ཞེས་དང༌། གཟུགས་ཀྱི་དེ་བཞིན་ཉིད་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ། ཞེས་སོགས་ཀྱི་ཤེར་ཕྱིན་དང༌། བྱང་ཆུབ་དང༌། དེ་བཞིན་ཉིད་རྣམས་གཅིག་ཡིན་པར་གསུངས་པ་དང༌། ཡུམ་བར་མའི་ལེའུ་ཉེར་གཉིས་པར་ཡང༌། ཀོའུུ་ཤི་ཀ་དེ་ནི་འདི་ལྟར་དེ་བཞིན་ཉིད་དང༌། ཡང་དག་པའི་མཐའ་དང༌། བསམ་གྱིས་མི་ཁྱབ་པའི་དབྱིངས་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་གཉིས་སུ་མེད་དེ་གཉིས་སུ་དབྱེར་མེད་དོ་ཞེས་དང་ཡང་དེ་ཉིད་ཀྱི་ལེའུ་ཞེ་ལྔ་པར་ཡང༌། ཆོས་རྣམས་ཀྱི་ཆོས་ཉིད་དང༌། ཆོས་ཀྱི་གནས་ཉིད་དང༌། ཆོས་སྐྱོན་མེད་པ་ཉིད་དང༌། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། ཆོས་ཀྱི་དབྱིངས་དང༌། ཡང་དག་པའི་མཐའ་འདི་ནི་གནས་ཡིན་ནོ་ཞེས་བྱ་བར་ཤེས་ན་བྱང་ཆུབ་སེམས་དཔའ་ཆེན་པོ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་བྲལ་བ་ཡིན་ཏེ། ཞེས་གསུངས་ཏེ། ཆོས་ཉིད་ལ་སོགས་པ་ཤེར་ཕྱིན་ཡིན་པའི་རྒྱུས་དེ་དག་གནས་པར་ཤེས་ན་ཤེར་ཕྱིན་དང་མ་བྲལ་བ་ཡིན་ཞེས་པའི་དོན་ཏོ། །གསང་བདག་ཕྱག་ན་རྡོ་རྗེའི་ཞལ་སྔ་ནས་ཀྱང་དེ་ནི་རྡོ་རྗེ་རྣལ་འབྱོར་མ་རང་གི་སེམས་ཀྱི་སྣང་བ་ཙམ་ཕྱག་རྒྱ་ཆེན་པོ་རྣམ་པ་ཐམས་ཅད་ཀྱི་མཆོག་དང་ལྡན་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པ་ཉིད་དང་དེ་བཞིན་ཉིད་དང་རིགས་ལྡན་མ་དང༌། པད་མ་ཞེས་བརྗོད་པར་བྱའོ། །ཞེས་དང༌། མགོན་པོ་སྦྱན་རས་གཟིགས་དབང་ཕྱུག་གི་ཞལ་སྔ་ནས་ཀྱང༌། མི་འཕོ་བའི་རྒྱུ་དེའི་ཕྱིར་གཡོ་མེད་བདེ་བའི་སྐད་ཅིག་གང་ཡིན་པ་འདིར་ནི་ཆོས་ཀྱི་དབྱིངས་དེ་ཤེས་རབ་ཀྱི་ཕ་རོལ་ཏུ་ཕྱིན་མས་སྟེར་བར་བྱེད་དོ། །ཞེས་དང༌། ཕྱག་རྒྱ་ཆེན་མོ་ནི་ཆོས་ཐམས་ཅད་ཀྱི་རང་བཞིན་མེད་པའི་མཚན་ཉིད་ཅན་རྣམ་པ་ཐམས་ཅད་ཀྱི་མཆོག་དང་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་མ་སངས་རྒྱས་བསྐྱེད་པར་མཛད་མའོ། །ཞེས་པ་ལ་སོགས་པ་ཕྱག་རྒྱ་ཆེན་མོ་དང༌། བྱང་ཆུབ་དང༌། དེ་བཞིན་ཉིད་ལ་སོགས་པ་ཤེར་ཕྱིན་མཚན་ཉིད་པ་ཡིན་པར་སྟོན་པའི་ལུང་རྣམ་དག་ཤིན་ཏུ་མང་ཡང་སྤྲོས་པས་འཇིགས་པའི་ཕྱིར་འདིར་ནི་ཐམས་ཅད་འབྲི་བར་མི་ནུས་སོ། །གལ་ཏེ་ཆོས་ཀྱི་བྱིངས་ནི་ཀུན་རྫོབ་རྣམས་རྣམ་པར་དཔྱད་ན་ཅིར་ཡང་མ་གྲུབ་ཙམ་གྱི་སྟོང་ཆ་ཡིན་པས་རང་གི་ངོ་བོ་སྟོང་པའི་ཕྱིར་ཡོན་ཏན་ཅི་ཡང་མེད་ལ་ཤེར་ཕྱིན་ནི་ཡོན་ཏན་དཔག་ཏུ་མེད་པའི་བདག་ཉིད་ཡིན་པའི་ཕྱིར་དེ་དག་མི་གཅིག་གོ་ཞེ་ན། མ་ཡིན་ཏེ། ཇི་སྐད་དུ་ཡུམ་བར་མའི་ལེའུ་ཉེར་གཉིས་པ་ལས། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་ཀྱི་གནས་ཉིད་དང༌། ཆོས་མི་འགྱུར་བ་ཉིད་དང༌། ཡང་དག་པའི་མཐའ་དང༌། བསམ་གྱིས་མི་ཁྱབ་པའི་དབྱིངས་དང༌། བག་ཆགས་ཀྱི་འཚམས་སྦྱོར་བའི་ཉོན་མོངས་པ་ཐམས་ཅད་སྤངས་པ་དང༌། རྟག་ཏུ་གཏང་སྙོམས་ལ་གནས་པ་དང༌། མི་ཉམས་པའི་མཚན་ཉིད་ཀྱི་ཡོན་ཏན་ལྟ་ཇི་སྙེད་གཅིག་བརྗོད་པར་བགྱི་སྟེ། མི་ཉམས་པའི་ཆོས་ཉིད་ཀྱི་ཡོན་ཏན་ནི་ཚད་མ་མཆིས་སོ། །ཞེས་གསུངས་པའི་ཕྱིར་དང༌། ཚོགས་བསྒྲུབ་ཀྱི་ཡེ་ཤེས་དང་ནི་ཞེས་པའི་སྐབས་ཀྱི་མདོ་ཉིད་ལས་ཀྱང་དེ་ལ་གཞན་གྱི་དངོས་པོ་སྟོང་པ་ཉིད་གང་ཞེ་ན། དེ་བཞིན་གཤེགས་པ་རྣམས་བྱུང་ཡང་རུང༌། དེ་བཞིན་གཤེགས་པ་རྣམས་མ་བྱུང་ཡང་རུང་སྟེ། ཆོས་ཉིད་དང༌། ཆོས་ཀྱི་གནས་ཉིད་དང༌། ཆོས་ཀྱི་དབྱིངས་ཉིད་དང༌། ཆོས་སྐྱོན་མེད་པ་ཉིད་དང༌། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་དེ་བཞིན་ཉིད་དང༌། ཡང་དག་པའི་མཐའ་ནི་དེ་བཞིན་དུ་གནས་པ་སྟེ། དེ་ལྟར་ཆོས་དེ་དག་གཞན་གྱི་སྟོང་པ་གང་ཡིན་པ་དེ་ནི། གཞན་གྱི་དངོས་པོ་སྟོང་པ་ཉིད་ཅེས་བྱ་སྟེ། རབ་འབྱོར་འདི་ནི་བྱང་ཆུབ་སེམས་དཔའ་ཆེན་པོའི་ཐེག་པ་ཆེན་པོའོ། །ཞེས་སངས་རྒྱས་གཟུགས་ཀྱི་སྐུ་འཇིག་རྟེན་དུ་བྱོན་རུང་མ་བྱོན་རུང་ཆོས་ཀྱི་དབྱིངས་ནི་རྟག་ཏུ་ཤེར་ཕྱིན་ཟབ་མོའི་ངོ་བོ་དེ་བཞིན་ཉིད་དུ་འཕོ་འགྱུར་མེད་པར་གནས་པ་དང༌། རང་གི་ངོ་བོ་ཐེག་ཆེན་ཡིན་པས་མི་སྟོང་པས་ཕྱིར་ཀུན་རྫོབ་ཀྱི་ཆོས་ཐམས་ཅད་ཀྱིས་སྟོང་པའི་གཞན་སྟོང་དུ་གསུངས་པ་དང༌། ཆོས་ཉིད་རང་གི་ངོ་བོ་ཅི་ཡང་མ་གྲུབ་པའི་རང་སྟོང་དུ་འདོད་པ་འགལ་ལོ། །དེས་ན་ཆོས་ཀྱི་དབྱིངས་ལ་ཡོན་ཏན་མེད་པ་དང་རང་སྟོང་དུ་འདོད་པ་མདོ་རྒྱུད་ཟབ་མོ་དགོངས་འགྲེལ་ཡང་དག་པ་དང་བཅས་པ་རྣམས་ཀྱིས་བཀག་པའི་ཕྱིར་ཤིན་ཏུ་མི་རིགས་སོ། །གལ་ཏེ་ཤེར་ཕྱིན་མཚན་ཉིད་པ་དོན་དམ་པའི་སངས་རྒྱས་དེ་བཞིན་ཉིད་ཀྱི་ངོ་བོ་ཡིན་ན། རྡོ་རྗེ་ལྟ་བུའི་ཏིང་ངེ་འཛིན་དུ་གསུངས་པ་དང་འགལ་ལོ། །ཞེ་ན་དེ་ལྟ་མ་ཡིན་དེ་གང་གི་ཕྱིར་མྱང་འདས་ཆེན་པོའི་མདོར། རིགས་ཀྱི་བུ་དཔའ་བར་འགྲོ་བའི་ཏིང་ངེ་འཛིན་ལ་ནི་མིང་རྣམ་པ་ལྔ་ཡོད་དེ། དཔའ་བར་འགྲོ་བའི་ཏིང་ངེ་འཛིན་ཞེས་ཀྱང་བྱ། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་ཀྱང་བྱ། རྡོ་རྗེ་ལྟ་བུའི་ཏིང་ངེ་འཛིན་ཞེས་ཀྱང་བྱ། སེང་གེ་སྒྲ་སྒྲོགས་པའི་ཏིང་ངེ་འཛིན་ཞེས་ཀྱང་བྱ། སངས་རྒྱས་ཀྱི་རང་བཞིན་ཞེས་ཀྱང་བྱ་སྟེ་ཞེས་དང་གཞན་ཡང་རིགས་ཀྱི་བུ་སངས་རྒྱས་ཀྱི་རང་བཞིན་ཞེས་བྱ་བ་ནི་དཔའ་བར་འགྲོ་བའི་ཏིང་ངེ་འཛིན་དེ་རང་བཞིན་མར་གྱི་ཉིང་ཁུ་དང་འདྲ་བས་སངས་རྒྱས་ཐམས་ཅད་ཀྱི་ཡུམ་མོ། །དཔའ་བར་འགྲོ་བའི་ཏིང་ངེ་འཛིན་གྱི་མཐུས་དེ་བཞིན་གཤེགས་པ་རྣམས་རྟོག་པ་དང་བདེ་བ་དང་བདག་དང་ཡོངས་སུ་དག་པར་གྱུར་ཏོ། །སེམས་ཅན་ཐམས་ཅད་ལ་ཡང་དཔའ་བར་འགྲོ་བའི་ཏིང་ངེ་འཛིན་ཡོད་མོད་ཀྱི། མ་བསྒོམ་པའི་ཕྱིར་མི་མཐོང་སྟེ། དེའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་གྱུར་ཏོ། །ཞེས་སེམས་ཅན་གྱི་དུས་ན་དྲི་བཅས་དེ་བཞིན་ཉིད་དང༌། སངས་རྒྱས་ཀྱི་དུས་ན་དྲི་བྲལ་དེ་བཞིན་ཉིད་བླ་ན་མེད་པའི་བྱང་ཆུབ་དེ་ལ་རང་བཞིན་པའི་སངས་རྒྱས་གཞི་འབྲས་དབྱེར་མེད་ཀྱི་ཤེར་ཕྱིན་རྡོ་རྗེ་ལྟ་བུའི་ཏིང་ངེ་འཛིན་ཞེས་བསྟན་ཏོ། །དེས་ན་རྡོ་རྗེ་ལྟ་བུའི་ཏིང་ངེ་འཛིན་འདི་ཉིད་ཤེར་ཕྱིན་མཚན་ཉིད་པ་ཡིན་གྱི་སློབ་པའི་གནས་སྐབས་རྒྱུན་མཐའི་ཡེ་ཤེས་འབའ་ཞིག་ནི་ཏིང་ངེ་འཛིན་དེ་མ་ཡིན་ནོ། །སློབ་དཔོན་དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས་ཀྱང༌། འཇིག་རྟེན་ལས་འདས་པའི་ཡེ་ཤེས་རྣམ་པར་མི་རྟོག་པ་རྡོ་རྗེ་ལྟ་བུའི་ཏིང་ངེ་འཛིན་གྱིས་བསྡུས་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །ཞེས་པའི་རྗེས་ལ་ལམ་བདེན་གྱིས་བསྡུས་པའི་ཡེ་ཤེས་བཞི་དང༌། ཉན་རང་དགྲ་བཅོམ་པའི་ཡེ་ཤེས་དང༌། བྱང་ཆུབ་སེམས་དཔའི་མོས་སྦྱོད་ནས་བཟུང་སྟེ་ས་ཆོས་ཀྱི་སྤྲིན་གྱི་པར་གྱི་ཡེ་ཤེས་དང༌། ཤེར་ཕྱིན་སྟོན་པའི་གཞུང་གི་ཚོགས་ཇི་སྙེད་པ་རྣམས་ཤེར་ཕྱིན་བཏགས་པ་པར་བསྟན་ནས། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བར་བརྗོད་པ་དེ་དག་ལས་འདིར་ནི་སངས་རྒྱས་ཀྱི་སས་བསྡུས་པའི་ཤེས་རབ་འཇིག་རྟེན་ལས་འདས་པ་རྣམ་པར་མི་རྟོག་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ། ཞེས་བྱའོ། །ཞེས་དང༌། དེ་ལ་སངས་རྒྱས་བཅོམ་ལྡན་འདས་རྣམས་ཀྱི་གནས་ཤིན་ཏུ་གྱུར་པས་རྡོ་རྗེ་ལྟ་བུའི་ཏིང་ངེ་འཛིན་གྱིས་བསྡུས་པ་འཇིག་རྟེན་ལས་འདས་པ་རྣམ་པར་མི་རྟོག་པའི་ཡེ་ཤེས་ལ་རྣམ་པ་ཐམས་ཅད་མཁྱེན་པ་ཉིད་ཅེས་བྱའོ། །ཞེས་གསུངས་སོ། །འབུམ་ཊིཀ་ཀྱང་དེ་དང་མཐུན་ནོ། །ཡུམ་བར་མའི་ལེའུ་ཉེར་གཉིས་པ་ལས་ཀྱང༌། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཀྱང་དོན་དེ་ཉིད་གཟིགས་ཏེ། རྡོ་རྗེ་ལྟ་བུའི་ཏིང་ངེ་འཛིན་ལ་མཉམ་པར་བཞག་ནས་ཞེས་གསུངས་སོ། །དེས་ན་རྡོ་རྗེ་ལྟ་བུའི་ཏིང་ངེ་འཛིན་ལ་ཡིན་པ་ཉིད་ཀྱིས་ལམ་གྱི་གནས་སྐབས་འབའ་ཞིག་ལ་གོ་བར་མི་བྱ་སྟེ། སེམས་ཅན་དང༌། སངས་རྒྱས་དང་སློབ་པའི་གནས་སྐབས་ཐམས་ཅད་ལ་ནམ་མཁའ་ལྟར་ཁྱབ་པའི་ཆོས་གྱི་དབྱིངས་དེ་བཞིན་ཉིད་གཉིས་མེད་ཡེ་ཤེས་དོན་དམ་པའི་དེ་བཞིན་གཤེགས་པ་ཉིད། རྡོ་རྗེ་ལྟ་བའི་ཏིང་ངེ་འཛིན་དང༌། ཤེར་ཕྱིན་དངོས་ཡིན་ཞིང༌། གཞུང་གི་ཚོགས་དང་ལམ་ནི་ཤེར་ཕྱིན་བཏགས་པ་བ་ཡིན་པའི་ཕྱིར་རོ། །ཇི་སྐད་དུ། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱ་དོན་དེ་དང་ལྡན་པས། །གཞུང་ལམ་དག་ལ་དེའི་སྒྲ་ཡིན། ། ཞེས་གསུངས་པ་ལྟར་དེ་ཁོ་ན་ལྟར་ཡིན་ནོ། །དེ་བཞིན་གཤེགས་པ་ཞེས་པས་འབྲས་བུ་ཁོ་ན་ལ་གོ་བར་ཡང་མི་བྱ་སྟེ། ཆོས་ཀྱི་དབྱིངས་ཉིད་དེ་བཞིན་གཤེགས་པ་ཡིན་པའི་ཕྱིར་རོ། །ཇི་སྐད་དུ། ཁང་པ་བརྩེགས་པའི་གཟུངས་ལས། བཙུན་པ་ཤཱ་ར་དྭ་ཏིའི་བུ་དེ་བཞིན་གཤེགས་པ་ཞེས་བྱ་བ་དེ་ནི་དེ་བཞིན་ཉིད་ཀྱི་མཚན་ཉིད་དོ་ཞེས་དང༌། རབ་ཞི་རྣམ་ངེས་སུ་ཡང༌། ཆོས་ཀྱི་དབྱིངས་ནི་སངས་རྒྱས་ཏེ། །སངས་རྒྱས་ནི་ཡང་དག་པའི་མཐའ་འོ་ཞེས་དང༌། ཤེར་ཕྱིན་བདུན་བརྒྱ་པར་ཡང༌། འདི་ལྟར་ཆོས་ཀྱི་དབྱིངས་ཉིད་བཅོམ་ལྡན་འདས་ཡིན་པའི་ཕྱིར་རོ། །ཞེས་སོགས་དང༌། ཆོས་ཀྱི་དབྱིངས་ཉིད་བྱང་ཆུབ་པོ་ཞེས་དང༌། རྒྱན་སྡུག་པོར་ཡང༌། ཆོས་རྣམས་ཀྱི་ཆོས་ཉིད་དང་ཆོས་ཀྱི་དབྱིངས་དང༌། ཆོས་སྐྱོན་མེད་པ་ཉིད་འདི་ཉིད་དེ་བཞིན་གཤེགས་པའོ། །ཞེས་སོ། །དེ་བཞིན་དུ་ཆོས་འཕགས་ཀྱི་ལེའུ་ལ་སོགས་ཤེས་བྱེད་ཡང་དག་དཔག་ཏུ་མེད་དེ་སྤྲོས་པ་ཆོག་གོ །དེ་ལྟར་བསྟན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་དངོས་པོ་བརྒྱད་ཕྱིན་ཅི་མ་ལོག་པར་བཤད་པ་ཉིད་ཀྱིས་འོག་གནས་འབྱུང་བའི་ཕྱིར་རིམ་པས་ཡང་དག་པ་བཤད་པར་བྱའོ། ། གལ་ཏེ་དེ་ལྟར་ན་ཚུལ་ཇི་ལྟར་འཆད་ཅེ་ན། ཁོ་བོ་ཅག་ནི་སངས་རྒྱས་རང་ཉིད་ཀྱིས་འཆད་ཚུལ་གསུངས་པ་དང་མི་མཐུན་པའི་བཤད་སྲོལ་རྣམས་ལ་ཡིད་མི་རྟོན་པའི་ཕྱིར་དེང་སང་ཡོངས་སུ་གྲགས་པའི་འཆད་ལུགས་ཅི་རིགས་རྣམས་དོར་ནས། རྒྱལ་བས་བསྟན་པ་འབའ་ཞིག་གི་དབང་དུ་བྱས་ཏེ། དེ་ཉིད་དང་དེ་དང་མཐུན་བའི་བཤད་སྲོལ་ཁྱད་པར་དུ་འཕགས་པའི་རྗེས་སུ་འབྲང་ཞིང་གཟུགས་སོགས་ཆོས་རྣམས་རང་བཞིན་གསུམ་དུ་ལེགས་པར་ཕྱེ་བའི་ཚུལ་གྱིས་མདོ་ཇི་ལྟ་བ་བཞིན་དུ་བཤད་པར་བྱའོ། ། སངས་རྒྱས་རང་ཉིད་ཀྱིས་ཡུམ་གྱི་འཆད་ཚུལ་གང་དུ་ཇི་ལྟར་བསྟན་ཞེ་ན། འདི་ལྟ་སྟེ། བྱང་ཆུབ་སེམས་དཔའི་བསླབ་པ་རབ་ཏུ་དབྱེ་བའི་ལེའུར། དེ་ནས་བྱང་ཆུབ་སེམས་དཔའ་བྱམས་པས་ཞུས་པ། བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ། བྱང་ཆུབ་སེམས་དཔའི་བསླབ་པ་ལ་བསློབ་པར་འཚལ་པས། གཟུགས་ལ་ཇི་ལྟར་བསླབ་པར་བགྱི། ཚོར་བ་དང༌། འདུ་ཤེས་དང༌། ཞེས་པ་ནས། བྱང་ཆུབ་དང་སངས་རྒྱས་ཀྱི་ཆོས་རྣམས་ལ་ཇི་ལྟར་བསླབ་པར་བགྱི་ཞེས་གསོལ་བ་ནི། འདིར་བྱང་ཆུབ་སེམས་དཔའི་བསླབ་པ་ནི་ཆོས་ཐམས་ཅད་ཚུལ་བཞིན་དུ་ཤེས་པ་ཡིན་ལ། དེས་ན་ཚུལ་དེ་ཆོས་ཐམས་ཅད་སོ་སོ་རང་རང་གི་ཡིན་ལུགས་ཇི་ལྟ་བ་བཞིན་དུ་ཤེས་པ་ལ་བསློབ་པར་འདོད་པས་ཞེས་པའི་དོན་ཏོ། །ཤེར་ཕྱིན་ལ་སྤྱོད་པ་ནི་ཤེར་ཕྱིན་ལ་སློབ་པ་སྟེ། དེའི་ཕྱིར་བྱང་ཆུབ་སེམས་དཔའ་ཤེར་ཕྱིན་ལ་སློབ་པ་ཆོས་ཐམས་ཅད་སོ་སོ་རང་རང་གི་གནས་ལུགས་ཇི་ལྟ་བ་བཞིན་ཤེས་པར་འདོད་པ་དེས་གཟུགས་སོགས་ལ་ཇི་ལྟར་བསླབ་པར་བགྱི་ཞེས་གཟུགས་སོགས་ལ་སློབ་ལུགས་ཞུས་པ་འདིས་ནི། ཤེར་ཕྱིན་ལ་སྤྱོད་པ་དེས་གཟུགས་སོགས་ཆོས་རྣམས་ཇི་ལྟར་བཤད་པར་བགྱི། ཇི་ལྟར་མཉན་པར་བགྱི། ཇི་ལྟར་བསམ་པར་བགྱི། ཇི་ལྟར་བསྒོམ་པར་བགྱི། ཞེས་ཞུས་པར་འགྱུར་རོ། ། དེས་ན་བྱང་ཆུབ་སེམས་དཔའི་བསླབ་པ་རབ་ཏུ་དབྱེ་བའི་ལེའུ་འདི་ནི་བཅོམ་ལྡན་འདས་རང་ཉིད་ཀྱིས་གསུངས་པའི་ཤེར་ཕྱིན་གྱི་རང་འགྲེལ་ཡིན་པའི་ཕྱིར་ཚུལ་འདི་ལྟར་འཆད་པ་རྣམས་ནི་རྒྱལ་བའི་དགོངས་པ་དང་མཐུན་ནོ། །དབུ་མ་པ་ཆེན་པོ་འཕགས་པ་ཐོགས་མེད་དང༌། དབུ་མ་པ་ཆེན་པོ་དབྱིག་གཉེན་དང༌། དབུ་མ་པ་ཆེན་པོ་སློབ་དཔོན་ཕྱོགས་ཀྱི་གླང་པོ་དང༌། འབུམ་ཊིཀ་མཁན་པོ་དང༌། དཔལ་ལྡན་རྒྱལ་པོ་ཛ་གང་ལར་གནས་པའི་བླ་མཆོད། སློབ་དཔོན་ཞི་བ་འབྱུང་གནས་རྣམས་ཀྱང་ཚུལ་འདི་དང་མཐུན་པར་བཤད་པའི་ཕྱིར་བཤད་སྲོལ་ཁྱད་པར་དུ་འཕགས་སོ། །ཉི་ཁྲི་སྣང་པ་རྗེས་འབྲང་དང་བཅས་པ་རྣམས་ནི་སངས་རྒྱས་རང་ཉིད་ཀྱིས་མཛད་པའི་རང་འགྲེལ་དང་འཆད་ལུགས་ཀྱང་མི་མཐུན་ཞིང་དེ་རྣམས་ལ་བསླབས་ནས་འདྲེས་ཤིང་བྱང་བར་བྱས་ཀྱང༌། ཤེར་ཕྱིན་མདོ་ལ་གོ་བ་ཅི་ཡང་ཡུམ་དོན་མི་རྙེད་ལ་ངེས་པ་ཐོབ་པའི་རྟོགས་པ་མི་བསྐྱེད་པར་སྣང་པས། མཁས་པ་རྣམས་ཀྱིས་ལེགས་པར་དཔྱད་ནས་བཤད་སྲོལ་ཡང་དག་དང་གཅིག་ཤོས་ཀྱི་ཁྱེད་པར་དབྱེ་འཚལ་ལོ། དེ་ལ་རྒྱན་ཚིག་ལེའུར་བྱས་པ་དག །ཀུན་གྱི་རྒྱན་དུ་འགྱུར་བར་ནི། །རྣམ་པར་དབྱེ་ཕྱིར་ཞེས་པ་ཡང༌། །དོན་ལ་མི་གནས་པར་སྣང་སྟེ། །འགྲེལ་བ་དེ་ལ་བརྟེན་ནས་མངོན་རྟོགས་རྒྱན་ལ་ཡུན་རིང་མོ་ཞིག་ཏུ་བསླབས་ཤིང་འབད་དེ། བཤད་སྲོལ་དེ་ལ་ཤིན་ཏུ་བྱང་ཞིང་འདྲིས་པ་དེས་མདོ་ལ་བལྟས་པའི་ཚེ་ཤོག་གུ་གཅིག་ཀྱང་མི་གོ་ན། ཤེར་ཕྱིན་གྱི་མདོ་ཀུན་གྱི་རྒྱན་དུ་གྱུར་བར་བཀྲལ་བའི་ཚུལ་གྱིས་མདོ་ཐམས་ཅད་གོ་ཞིང་རྟོགས་པ་ལྟ་ཅི་སྨོས། དེས་ན་དབུ་མ་པ་ཆེན་པོ་སློབ་དཔོན་དབྱིག་གཉེན་དང༌། ཕྱོགས་གླང་ལ་སོགས་པའི་གསུང་ཚིགས་སུ་བཅད་པ་རེ་རེས་ཀྱང་མདོ་དཔག་ཏུ་མེད་པ་གསལ་བར་ནུས་པའི་ཕྱིར་ཀུན་གྱི་དོན་གསལ་བར་བྱེད་པའི་རྒྱན་དུ་གྱུར་པའི་འགྲེལ་ལུགས་ནི་དེ་དག་གི་བཤད་སྲོལ་དེ་ཡིན་པར་སྣང་ངོ༌། །ཇི་སྐད་དུ། བརྒྱད་སྟོང་དོན་བསྡུས་ལས། ཤེས་རབ་ཕ་རོལ་ཕྱིན་པ་ནི། །བསྟན་པ་གསུམ་ལ་ཡང་དག་བརྟེན། །བརྟགས་པ་དང་ནི་གཞན་དབང་དང༌། །ཡོངས་སུུ་གྲུབ་པ་ཁོ་ནའོ། །མེད་ཅེས་བྱ་ལ་སོགས་ཚིག་གིས་བཏགས་པ་ཐམས་ཅད་འགོག་པ་སྟེ། སྒྱུ་མ་ལ་སོགས་དཔེ་རྣམས་ཀྱིས། །གཞན་གྱི་དབང་ནི་ཡང་དག་བསྟན། །རྣམ་པར་བྱང་བ་བཞི་ཡིས་ནི། །ཡོངས་སུ་གྲུབ་པ་རབ་ཏུ་སྒྲགས། །ཤེས་རབ་ཕ་རོལ་ཕྱིན་པ་ནི། ། སངས་རྒྱས་ཀྱིས་ནི་གཞན་བསྟན་མེད། །ཅེས་ལེགས་པར་མཐའ་ཆོད་ཅིང་གདེང་ཐོབ་ལ་ངེས་ཤེས་བརྟན་པོ་གཏིང་ཚུགས་པའི་བཤད་སྲོལ་ཁྱད་པར་འཕགས་གསལ་ལ་འཆུན་ཆེ་བ། སླ་ལ་ཕན་ཡོན་ཆེ་བ། རྒྱལ་བའི་དགོངས་པ་ཡིན་ངེས་པ། མདོའི་དོན་ཕྱིན་ཅི་མ་ལོག་པར་བདེ་བླག་ཏུ་རྟོགས་པར་བྱེད་པའི་འཆད་ལུགས་རྣམ་དག་གསུངས་སོ། །གལ་ཏེ་དེ་ལྟ་ཡིན་ཡང་འཕགས་པ་ཐོགས་མེད་སྐུ་མཆེད་དང་སློབ་དཔོན་ཕྱོགས་ཀྱི་གླང་པོ་ལ་སོགས་པ་རྣམས་ཀྱིས་ངོ་བོ་ཉིད་གསུམ་གྱི་ཆོས་སྐད་གྱིས་ཡུམ་སེམས་ཙམ་དུ་བགྲོལ་བར༌། སློབ་དཔོན་སེང་བཟང་རྗེས་འབྲང་དང་བཅས་རྣམས་ཀྱིས་གསུངས་སོ། །ཞེ་ན༌། གསུངས་ལ་རག་མོད་བདེན་པ་ནི་མ་ཡིན་ནོ། ། གལ་དེ་ཡིན་ན་སངས་རྒྱས་རང་ཉིད་ཀྱིས་ཀྱང་ཡུམ་སེམས་ཙམ་དུ་གསུངས་པར་ཧ་ཅང་ཐལ་བར་འགྱུར་དེ། ཤེར་ཕྱིན་གྱི་འཆད་ཚུལ་སོགས་ཇི་ལྟར་ཡིན་པ་ལེགས་པར་སྟོན་བྱེད་བྱང་ཆུབ་སེམས་དཔའི་བསླབས་པ་རབ་ཏུ་དབྱེ་བའི་ལེའུ་ཉིད་ལས། བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱྀན་པ་ལ་སྤྱོད་པ་ཆོས་རབ་ཏུ་དབྱེ་བ་ལ་མཁས་པ་ལ་ཞུགས་པས། གཟུགས་རབ་ཏུ་དབྱེ་བའི་བརྟགས་པ་རྣམ་པ་དུ་ཞིག་ཏུ་རྟོགས་པར་བགྱི། ཚོར་བ་དང་འདུ་ཤེས་དང་ཞེས་པ་ནས་སངས་རྒྱས་ཀྱི་ཆོས་རྣམས་ཀྱི་པར་དུ་རབ་ཏུ་དབྱེ་བའི་བཏགས་པ་རྣམ་པ་དུ་ཞིག་ཏུ་རྟོགས་པར་བགྱི་ལགས། ཞེས་ཞུས་པའི་ལན་དུ། བྱམས་པ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཆོས་རབ་ཏུ་དབྱེ་བ་ལ་མཁས་པ་ལ་ཞུགས་པས། གཟུགས་ནས་སངས་རྒྱས་ཀྱི་ཆོས་རྣམས་ཀྱི་བར་དུ་རབ་ཏུ་དབྱེ་བའི་བཏགས་པ་རྣམ་པ་གསུམ་དུ་རྟོགས་པར་བྱས་ཏེ། འདི་ལྟ་སྟེ། འདི་ནི་ཀུན་བཏགས་པའི་གཟུགས་སོ། །འདི་ནི་རྣམ་པར་བཏགས་པའི་གཟུགས་སོ། འདི་ནི་ཆོས་ཉིད་ཀྱི་གཟུགས་སོ། །ཞེས་པ་ནས། འདི་དག་ནི་ཀུན་བཏགས་པའི་སངས་རྒྱས་ཀྱི་ཆོས་རྣམས་ཀྱི་བར་དག་གོ །འདི་དག་ནི་རྣམ་པར་བཏགས་པའི་སངས་རྒྱས་ཆོས་རྣམས་སོ། །འདི་དག་ནི་ཆོས་ཉིད་ཀྱི་སངས་རྒྱས་ཀྱི་ཆོས་རྣམས་སོ། ། ཞེས་བྱའོ། །ཞེས་ཤེར་ཕྱིན་ལ་སློབ་པས་འཁོར་འདས་ཀྱི་ཆོས་ཐམས་ཅད་རང་བཞིན་གསུམ་དུ་ཕྱེ་ནས་རྟོགས་པར་བྱའོ། །ཞེས་གསུངས་པ་དང༌། ཤེར་ཕྱིན་ལྔ་བརྒྱ་པར་ཡང་རབ་འབྱོར་གཟུགས་ནི་དངོས་པོ་མེད་པ་དང༌། དངོས་པོ་ངན་པ། དངོས་པོ་ཡོད་པའོ། །ཞེས་ཕུང་པོ་ལྔ་དང་ཁམས་བཅོ་བརྒྱད་སོང་པའི་མཐར། དེ་ལྟར་གཟུགས་དེ་ལེའུ་གསུམ་དུ་བྱིས་པ་སོ་སོའི་སྐྱེ་བོ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་པས། གཟུགས་དེ་ལ་མངོན་པར་ཞེན་ཏོ། །མངོན་པར་བསྒྲུབ་པོ། །སྒྲིབ་པར་བྱེད་དོ། །ཞེས་ཀུན་བཏགས་པའི་གཟུགས་སོགས་ལ་དངོས་པོ་མེད་པ་དང༌། གཞན་དབང་གི་གཟུགས་སོགས་ལ་དངོས་པོ་ངན་པ་དང༌། ཆོས་ཉིད་ཀྱི་གཟུགས་སོགས་ལ་དངོས་པོ་ཡོད་པ་དང༌། སོ་སོ་སྐྱེ་བོས་གཟུགས་སོགས་ཆོས་དེ་རྣམས་ངོ་བོ་ཉིད་གསུམ་དུ་ཕྱེ་ནས་ལེའུ་གསུམ་སྟེ་ཚན་པ་གསུམ་དུ་རང་རང་གི་ཡིན་ལུགས་ལྟར་མི་ཤེས་པས་ཀུན་བཏགས་ཀྱི་གཟུགས་སོགས་དེ་ལ་མངོན་པར་ཞེན་ཏོ། །གཞན་དབང་གི་གཟུགས་སོགས་དེ་མངོན་པར་བསྒྲུབ་པོ། ། ཡོངས་སུ་གྲུབ་ཀྱི་གཟུགས་དེ་སྒྲིབ་པར་བྱེད་དོ། །ཞེས་གསུངས་པའི་ཕྱིར་སངས་རྒྱས་ཀྱིས་ཀྱང་ངོ་བོ་ཉིད་གསུམ་གྱི་སྒོ་ནས་ཤེར་ཕྱིན་སེམས་ཙམ་དུ་གསུངས་པར་ཧ་ཅང་ཐལ་བར་འགྱུར་རོ། །ངོ་བོ་ཉིད་གསུམ་དུ་ཕྱེ་ནས་བཤད་པས། འགྲོ་དོན་རྩ་ལག་དབྱིག་གི་གཉེན། །རང་གི་མོས་པ་གཙོར་བྱེད་པས། །ཤེས་བྱ་ནང་གི་ཡིན་པ་ལ། །ཡང་དག་བརྟེན་ནས་རྣམ་པར་གྲོལ། །ཞེས་འདིར་འགྱུར་ན་འགྲོ་དོན་རྩ་ལག་རྫོགས་སངས་རྒྱས། །རང་གི་མོས་པ་གཙོར་བྱེད་པས། །ཤེས་བྱ་ནང་གི་ཡིན་པ་ལ། །ཡང་དག་བརྟེན་ནས་རྣམ་པར་གྲོལ། །ཞེས་པར་ཡང་ཅིའི་ཕྱིར་མི་འགྱུར་ཏེ། མཚུངས་པའི་ཕྱིར་འགྱུར་དགོས་སོ། །གལ་ཏེ་དངོས་སུ་མ་སྨྲས་ཀྱང་ཁོ་བོ་ཅག་ནི་དོན་གྱིས་སངས་རྒྱས་ལ་ཡང་རྒོལ་བ་ཡིན་ཏེ། སངས་རྒྱས་ཀྱི་མདོའི་དེ་ཉིད་དོན་སྡུད་བྱེད། ཅེས་དང༌། མདོ་སྡེ་དྲང་དོན་ངེས་པའི་དོན་རྣམ་པ་མང་པོ་རབ་ཏུ་འབྱེད། གཞུང་བྱེད་དང་ཚུལ་ཅན་དུ་འགྱུར། ཞེས་འཕགས་པ་ཐོགས་མེད་བཀའ་ཕྱིན་ཅི་མ་ལོག་པར་འགྲེལ་ཞིང་དེ་ཉིད་ལ་མ་ནོར་བ་མེད་པར་ལུང་བསྟན་ལ། འཕགས་པ་དེས་ཡུམ་སེམས་ཙམ་དུ་བཀྲལ་བས་ནོར་པའི་ཚབ་དེ་ལས་ཆེ་བ་མེད་པར་འདོད་པས་སོ་ཞེ་ན། ཀྱེ་མ་རང་ཉིད་ལ་རྣམ་པར་དཔྱོད་པའི་མཐུ་མེད་ཅིང་བློ་གྲོས་གཞན་གྱི་དྲིང་ལ་འཇོག་པ་གྲགས་པ་ཙམ་གྱི་རྗེས་སུ་ཡིད་རྟོན་པའི་འཇིག་རྟེན་འདི་གནས་སྐབས་ཇི་ལྟར་གནས་པར་འགྱུར་ཞིག་གོ །འགྲེལ་ཆེན་དྲི་མེད་འོད་དུ་ལུང་དྲངས་པར། །མ་ཡང་སྲིན་མོའི་འཇིག་རྟེན་ན། །རང་གི་བུ་ལ་བཟའ་བར་སེམས། །རང་གི་བུ་ལ་བརྩེ་མེད་པ། །དེ་ལ་སྐྱེ་བོ་གཞན་ལྟ་ཅི། །ཞེས་གསུངས་པ་ལྟར། ས་གསུམ་པ་འོད་བྱེད་པ་བརྙེས་པའི་འཕགས་པ་ཐོགས་མེད་ལ་སྐུར་པ་འདེབས་པ་ནི་རྫོགས་པའི་སངས་རྒྱས་ལ་ཡང་ཚམ་ཚོམ་མེད་པར་རྒོལ་བར་འགྱུར་བའི་ཕྱིར་ཕྱོགས་དེ་འཛིན་པ་དེ་དང༌། གཞན་སུ་ཞིག་ལྷན་ཅིག་གནས་ཤིང་སྨྲ་བར་ནུས། དེས་ན་བྱམས་པས་དྲིན་དུ་མི་གཟོ་བ་འཕགས་པ་ལ་སྐུར་བ་འདེབས་པའི་ལྟ་བ་མི་བཟད་པ་འདི་དོར་ན་ལེགས་པར་འགྱུར་རོ། །གལ་ཏེ་དབུ་མ་པ་ནི་དོན་དམ་དུ་ཅི་ཡང་གྲུབ་པར་མི་འདོད་ལ་འཕགས་པ་ཐོགས་མེད་སྐུ་མཆེད་རྗེས་འབྲང་དང་བཅས་པས་དོན་དམ་དུ་ཡོད་པར་བསྟན་པའི་འགྱུར་མེད་ཡོངས་གྲུབ་གང་ཡིན་པ་དེ་སེམས་ཙམ་པའི་མཐར་ཐུག་གི་དོན་དེ་ཁོ་ན་ཡིན་ནོ། །ཞེ་ན། འོ་ན་འཕགས་པ་ཀླུ་གྲུབ་ཀྱི་ཞལ་སྔ་ནས། དབུ་མ་བསྒོམ་རིམ་དུ། དེ་ལྟར་ཤེས་རབ་དག་པ་ཡིས། །རང་གི་ངོ་བོ་དོན་དམ་འདི། །ཤིན་ཏུ་ཡང་ནི་གྲུབ་པས་ན། །བཏགས་པའི་གཞན་དོན་འབྱུང་བ་ཡིན། །ཞེས་འཕགས་པའི་ཤེས་རབ་ཀྱིས་དོན་དམ་པར་རང་གི་ངོ་བོ་ཤིན་ཏུ་ཡང་གྲུབ་པར་གསུངས་པ་འདི་ཅི་ཡིན། འཕགས་པ་འདི་ཉིད་ལུང་བསྟན་པར་ཡང༌། ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པས། ། དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ངའི་ཐེག་པ་འཇིག་རྟེན་དུ། ། བླ་མེད་ཐེག་ཆེན་རབ་བཤད་ཏེ། །རབ་ཏུ་དགའ་བའི་ས་བསྒྲུབས་ནས། །བདེ་བ་ཅན་དུ་དེ་འགྲོའོ། ། ཞེས་ལུང་བསྟན་པར་ཇི་ལྟ་བ་བཞིན་དུ་འཕགས་པ་འདིས། དབུ་མ་རིགས་པའི་ཚོགས་ཀྱིས་ཐ་སྙད་པའི་དངོས་པོ་ཐམས་ཅད་དོན་དམ་པར་ཡོད་པ་བཀག་ཅིང་མེད་པར་བསྟན་པས་ཀུན་རྫོབ་ཀྱི་ཆོས་དོན་དམ་དུ་ཡོད་པར་འདོད་པའི་ཕྱོགས་བཤིག་ལ། དབུ་མ་བསྟོད་པའི་ཚོགས་ཀྱིས་འགྱུར་བ་མེད་པའི་ཡོངས་གྲུབ་ཆོས་དབྱིངས་དེ་བཞིན་ཉིད་ཀྱི་དབུ་མ་དོན་དམ་དུ་མེད་པ་བཀག་ཅིང་ཡོད་པར་བསྟན་པས་དོན་དམ་པར་ཅི་ཡང་མེད་པར་འདོད་པའི་ཕྱོགས་བཤིག་གོ །དེ་ལྟར་ཕྱོགས་གཉིས་པོ་དེ་བཤིག་པའི་ལྷག་མ་དབུ་མ་བར་མ་གང་ཡིན་པ་སངས་རྒྱས་ཀྱི་ཐེག་པ་བླ་ན་མེད་པའི་ཐེག་ཆེན་དེ་ཉིད་མཐར་ཐུག་གི་དབུ་མ་ཡིན་པས་དེ་འཇིག་རྟེན་དུ་གསལ་བར་བཤད་པའོ། ། དེ་ཡང་བསྟོད་པའི་ཚོགས་སྔོན་ལ་གསུངས་ཤིང༌། རིགས་པའི་ཚོགས་དེའི་ཕྱི་ནས་གསུངས་པར་རིགས་པ་དྲུག་བཅུ་པ་ལས་གསལ་ཏེ། དེ་ཉིད་ལས་ཇི་སྐད་དུ། རེ་ཞིག་གཉེས་ཀུན་འབྱུང་བའི་གནས། །མེད་ཉིད་རྣམ་པར་བཟློག་ཟིན་གྱིས། །རིགས་པ་གང་གིས་ཡོད་ཉིད་ཀྱང༌། །བཟློག་པར་འགྱུར་བ་མཉན་པར་གྱིས། །ཞེས་ཉེས་པ་ཐམས་ཅད་འབྱུང་བའི་གནས་སམ། རྒྱུ་ཆོས་ཉིད་ཀྱི་དབུ་མ་གཤིས་ལ་མེད་པ་ཉིད་དུ་འདོད་པ་དེ་བསྟོད་པའི་ཚོགས་ཀྱིས་བཀག་ཟིན་གྱིས། ད་ནི་རིགས་པའི་ཚོགས་ཀྱིས་ཀུན་རྫོབ་ཀྱི་ཆོས་གཤིས་ལ་ཡོད་པ་ཉིད་དུ་འདོད་པ་ཡང་བཟློག་པར་འགྱུར་བ་མཉན་པར་གྱིས་ཞེས་གདམས་པའོ། །འཇམ་དཔལ་རྩ་བའི་རྒྱུད་དུ་ཡང་འཕགས་པ་འདི་ལུང་བསྟན་པར། ཁམས་དོན་བསྟན་ཆོས་དུ་མ་དང༌། །དངོས་མེད་དོན་གྱི་དེ་ཉིད་རིག། ཅེས་བདེ་གཤེགས་སྙིང་པོ་ཆོས་ཁམས་དགེ་བ་གང་ཡིན་པ་དེ་གཤིས་ལ་ཡོད་པར་སྟོན་པའི་བསྟན་ཆོས་བསྟོད་པའི་ཚོགས་དུ་མ་དང༌། ཐ་སྙད་པའི་ཆོས་གཤིས་ལ་དངོས་མེད་དུ་བསྟན་པའི་གཞི་ལ་ཡང་དག་དོན་གྱི་དེ་ཉིད་རིག་པར་བྱེད་པའི་བསྟན་ཆོས་རིགས་པའི་ཚོགས་དག་ཀྱང་ལུང་བསྟན་ཏོ། །དེས་ན་དབུ་མ་སྟོན་པ་ལ་ཡོད་པ་བཀག་ཙམ་གྱིས་མི་ཆོག་གི ཡོད་མེད་གཉིས་ཀའི་མཐའ་སེལ་དགོས་སོ། །སྒྲོ་འདོགས་བསལ་ཙམ་གྱིས་མི་ཆོག་གི སྐུར་འདེབས་ཡང་སེལ་དགོས་སོ། འཕགས་པ་ཀླུ་སྒྲུབ་འདིས་ནི་རྒྱལ་བའི་ལུང་བསྟན་པ་ཇི་ལྟ་བ་བཞིན་དུ། ཡོད་མེད་སྒྲོ་སྐུར་གཉིས་ཀའི་མཐའ་བསལ་ནས་དེ་གཉིས་ཀྱི་དབུ་མ་བླ་ན་མེད་པའི་ཐེག་པ་ཆེན་པོ་ཡོད་པར་གསུངས་པ་ཡིན་ནོ། ། རིགས་པའི་ཚོགས་ཀྱིས་ཡོད་པ་བཀག་ཙམ་ལ་ཚོད་འཛིན་པ་ནི་དབུ་མ་མ་ཡིན་གྱི། བསྟོད་པའི་ཚོགས་ཀྱིས་བཀག་པ་དེའི་གཞི་ལ་ཆོས་དབྱིངས་ཡོད་པར་བསྟན་པས་མཐར་ཐུག་དེ་ཁོ་ན་ཉིད་ཀྱི་དབུ་མ་ཇི་ལྟ་བ་བཞིན་བསྟན་པ་ཡིན་ནོ། །དེ་ཡང་དབུ་མ་པར་ཁས་འཆེ་བ་ཕལ་ཆེ་བ་ནི་ཡོད་པ་བཀག་ཙམ་གྱི་ཕྱོགས་ལ་འཆོལ་བ་འབའ་ཞིག་ཏུ་སྣང་སྟེ། ཡང་དག་པའི་དོན་ལ་སྐུར་བ་བཏབ་ཉེན་ཡོད་ལགས་སོ། །འཕགས་པ་ཀླུ་སྒྲུབ་ཀྱིས་ཡོད་མེད་གཉིས་ཀ་བཤིག་པ་དེ་བཞིན་དུ། རྒྱལ་བས་གསུང་རབས་ཀྱི་དགོངས་པ་ཇི་ལྟ་བ་བཞིན་འབྱེད་པར་ལུང་བསྟན་པའི་འཕགས་པ་ཐོགས་མེད་ཞབས་ཀྱིས་ཀྱང༌། ཀུན་བཏགས་དང་གཞན་དབང་གིས་བསྡུས་པའི་ཆོས་ཐ་སྙད་པའི་རང་བཞིན་རྣམས་དོན་དམ་དུ་ཡོད་པ་བཀག་ཅིང་མེད་པར་བསྟན་པས། ཀུན་རྫོབ་ཀྱི་ཆོས་དོན་དམ་དུ་ཡོད་པར་འདོད་པའི་ཕྱོགས་བཤིག་ལ། ཡོངས་སུ་གྲུབ་པ་ཆོས་ཐ་སྙད་པའི་རང་བཞིན་རྣམས་དོན་དམ་དུ་ཡོད་པ་བཀག་ཅིང་ཡོད་པར་བསྟན་པས་དོན་དམ་དུ་ཅི་ཡང་མེད་པར་འདོད་པ་བཤིག་གོ །དེ་ལྟར་ཕྱོགས་གཉིས་པོ་བཤིག་པའི་ལྷག་མ་དབུས་མ་བར་མ་གང་ཡིན་པ་བླ་ན་མེད་པའི་ཐེག་ཆེན་མཐར་ཐུག་དོན་གྱི་དབུ་མ་གསལ་བར་བསྟན་པ་ཡིན་ནོ། །དེས་ན་འཕགས་པ་དེ་དག་ཇི་ལྟ་བ་བཞིན་དུ་དབུ་མ་པ་ཆེན་པོ་སློབ་དཔོན་དབྱིག་གཉེན་དང༌། ཕྱོགས་ཀྱི་གླང་པོ་དག་གིས་ཀྱང་མཐར་ཐུག་དོན་དམ་གྱི་དབུ་མ་དེ་ཉིད་གསལ་བར་མཛད་དོ། །དེ་ཉིད་ཀྱི་ཕྱིར། ཐོགས་མེད་སྐུ་མཆེད་ལ་སོགས་པས་ཡུམ་དངོས་སྨྲའི་གཞུང་དུ་བཀྲོལ་ཞེས་ཟེར་བ་ནི་རང་གཞན་གཉིས་ཀ་ཉམས་པར་བྱེད་པའི་ཚིག་ཏུ་སྣང་ངོ༌། ། སེམས་ཙམ་པའི་མཐར་ཐུག་གི་དོན་ནི། ཕྱི་རོལ་གྱི་གཟུང་འཛིན་དང་བྲལ་བའི་རྣམ་ཤེས་སྐད་ཅིག་མ་དེ་ཉིད་དོན་དམ་དུ་གྲུབ་པར་འདོད་པ་ཡིན་ལ། འགྱུར་བ་མེད་པའི་ཡོངས་གྲུབ་ཆོས་དབྱིངས་དེ་བཞིན་ཉིད་ནི་རྣམ་ཤེས་དང་སྐད་ཅིག་ཐམས་ཅད་ལས་འདས་པའི་གཉིས་མེད་ཡེ་ཤེས་ཡིན་པའི་ཕྱིར། དངོས་སྨྲའི་སྐྱོན་གྱིས་ནམ་ཡང་གོས་པ་མེད་དོ། །དེས་ན་རྣམ་ཤེས་ཙམ་དུ་སྨྲ་བའི་མཐར་ཐུག་གི་དོན་དམ་ནི། རྣམ་ཤེས་དང་མི་རྟག་པ་དང༌། འདུས་བྱས་དང༌། ཁམས་གསུམ་པོ་ཡི་ངོ་བོ་དང༌། མ་རིག་པའི་བདག་ཉིད་ཡིན་ལ། འགྱུར་བ་མེད་པའི་ཡོངས་གྲུབ་ནི་ཡེ་ཤེས་དང༌། རྟག་པ་དང༌། འདུས་མ་བྱས་དང༌། ཁམས་གསུམ་ལས་འདས་པ་དང་ནང་རིག་འགྱུར་བ་མེད་པ་ཡིན་པའི་ཕྱིར་དེ་དག་གཅིག་པར་ཇི་ལྟར་འགྱུར། གལ་ཏེ་དེ་དག་གཅིག་ན་སྣང་བ་དང་མུན་པ་གཅིག་པ་དང༌། དུག་དང་བདུད་རྩི་གཅིག་པ་དང༌། ཚ་རེག་དང་གྲང་རེག་གཅིག་པ་དང༌། སྡུག་བསྔལ་དང་བདེ་བ་གཅིག་གོ་ཞེས་པ་ལས་གཞན་ཅིར་འགྱུར། སེམས་ཙམ་པ་ནི་རྣམ་ཤེས་མ་ཡིན་པའི་ཡེ་ཤེས་དང་སངས་རྒྱས་ཞེས་བྱ་བ་མི་འདོད་དེ། མགོན་པོ་སྦྱན་རས་གཟིགས་ཀྱི་དབང་ཕྱུག་གི་ཞལ་སྔ་ནས། ཇི་སྐད་དུ། འདིར་རྣམ་པར་ཤེས་པར་སྨྲ་བ་རྣམས་ཀྱི་ནང་ན་ཡེ་ཤེས་ཀྱི་སྐུ་ཉིན་མོར་བྱེད་པའི་སྐུ་ཡང་དག་པར་རྫོགས་པའི་སངས་རྒྱས་སུ་གྱུར་པ་ནི་འགའ་ཡང་མེད་དོ། །འདིར་ཅིའི་ཕྱིར་རྣམ་པར་ཤེས་པར་སྨྲ་བ་རྣམས་ཀྱི་ནང་ན། ཡེ་ཤེས་ཀྱི་སྐུ་ཉིན་མོར་བྱེད་པའི་སྐུ་ཡང་དག་པར་རྫོགས་པའི་སངས་རྒྱས་སུ་གྱུར་པ་འགའ་ཡང་མེད་ཅེ་ན། བརྗོད་པར་བྱ་སྟེ། འདིར་རྣམ་པར་ཤེས་པར་སྨྲ་བ་རྣམས་རྣམ་པར་ཤེས་པའི་ཆོས་ལ་གནས་པའི་ཕྱིར་དང༌། ཡང་དག་པར་རྫོགས་པའི་སངས་རྒྱས་རྣམ་པར་ཤེས་པའི་ཆོས་ཉིད་ལས་འདས་པའི་ཕྱིར་རོ། །ཞེས་གསུང་སོ། ། དེས་ན་སེམས་ཙམ་པ་ནི་སངས་རྒྱས་ཀྱང་རྣམ་ཤེས་སྐུར་འདོད་ཅིང་ཡེ་ཤེས་ཀྱི་སྐུར་མི་འདོད་ན། རྣམ་ཤེས་མ་གཏོགས་པའི་ཡེ་ཤེས་གཞན་འདོད་པ་ལྟ་ཅི་སྨོས་ཀྱང་ཅི་དགོས། སེམས་ཙམ་པ་ནི་མཐར་ཐུག་དོན་དམ་བདེན་པ་རྣམ་ཤེས་ཡིན་པར་འདོད་ལ། དེ་ཉིད་ཆོས་དབྱིངས་དེ་བཞིན་ཉིད་ཀྱང་ཡིན་པར་འདོད་པས་དེ་ལས་མི་འདའ་བའི་ཕྱིར། དེ་དག་རྣམ་པར་ཤེས་པའི་ཆོས་ལ་གནས་ཞེས་གསུངས་ལ། དབུ་མ་པ་ནི་མཐར་ཐུག་དོན་དམ་བདེན་པ་གཉིས་མེད་ཡེ་ཤེས་ཡིན་པར་འདོད་ལ། དེ་ཆོས་ཉིད་དེ་བཞིན་ཉིད་ཀྱང་ཡིན་པར་འདོད་ཅིང༌། དོན་ལའང་གནས་པ་དེ་རྣམས་ཐམས་ཅད་ལས་འདས་པའི་དེ་བཞིན་གཤེགས་པ་ཡིན་པའི་ཕྱིར་རྣམ་པར་ཤེས་པའི་ཆོས་ཉིད་ལས་འདས་ཞེས་གསུངས་སོ། ། དེས་ན་ཆོས་དབྱིངས་དོན་དམ་པ་དེ་ཉིད་ཡེ་ཤེས་ཡིན་པ་དང༌། རྣམ་ཤེས་ཡིན་པར་འདོད་པ་ལས་དབུ་མ་དང་སེམས་ཙམ་གྱི་ཁྱད་པར་དུ་འགྱུར་གྱི། འགྱུར་མེད་ཡོངས་གྲུབ་འདོད་མི་འདོད་དང༌། དོན་དམ་དུ་གྲུབ་ཡོད་པར་འདོད་མི་འདོད་ལས། དབུ་སེམས་སུ་འཇོག་པ་ནི་མདོ་རྒྱུད་ལ་སོགས་ཡིད་ཆེས་ཀྱི་ལུང་གང་ལས་ཀྱང་མ་གསུངས་སོ། །རང་རང་གི་མཐར་ཐུག་གི་དོན་གང་དང་གང་འདོད་པ་དེ་དང་དེ་ཉིད་དེ་དང་དེའི་གྲུབ་པའི་མཐར་འགྱུར་གྱི། གནས་སྐབས་ཀྱི་ཁྱད་པར་ཅུང་ཟད་མི་འདྲ་བ་ལས། གྲུབ་མཐའ་མི་གཅིག་པར་འགྱུར་བ་ནི་མ་ཡིན་ནོ། །དེའི་ཕྱིར་སྐྱེ་བའི་ཆ་ཤས་ཅན་གྱི་སེམས་ཅན་དོན་དམ་དུ་འདོད་པས་བྱེ་བྲག་ཏུ་སྨྲ་པ་དང། སྐྱེ་པའི་ཆ་ཤས་ཅན་གྱི་སེམས་ཅན་མི་འདོད་ཀྱང་ཕྱི་རོལ་དོན་དམ་དུ་འདོད་པས་མདོ་སྡེ་བ་དང༌། རྣམ་པར་ཤེས་པ་ཙམ་དོན་དམ་དུ་འདོད་པས་སེམས་ཙམ་པ་དང༌། དོན་དམ་དེ་བཞིན་ཉིད་དེ་ཁོ་ན་ཉིད་དུ་གྲུབ་པར་འདོད་པས་དབུ་མ་པར་འགྱུར་བ་ནི། ཡིན་ལུགས་ཀྱི་སྟེང་དུ་མ་ཕེབས་ཀྱི་བར་དུ་འོག་མ་འོག་མའི་ཁྱད་པར་དེ་མི་འདོད་ཀྱང༌། གོང་མ་གོང་མ་དང་མི་མཐུན་པའི་ཁྱད་པར་ཁས་ལེན་པ་ལས་གནས་སྐབས་སུ་ཐེག་པ་དང་གྲུབ་མཐའ་སོ་སོར་འབྱུང་སྟེ། ཇི་སྐད་དུ། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གིས་འབྲས་བུར་གནས། །ཞེས་དང༌། འཇིག་རྟེན་མགོན་པོའི་ཞལ་སྔ་ནས་ཀྱང༌། བྱེ་བྲག་ཏུ་སྨྲ་བ་ནི་སྐྱེ་བའི་ཆ་ཤས་ཅན་གྱི་སེམས་ཅན་རབ་ཏུ་གསལ་བར་བྱེད་པའི་བསྟན་བཅོས་སོ། །མདོ་སྡེ་པ་ནི་དོན་རབ་ཏུ་གསལ་བར་བྱེད་པའི་བསྟན་བཅོས་སོ། །རྣལ་འབྱོར་སྤྱོད་པ་བ་ནི་རྣམ་པར་ཤེས་པ་ཙམ་རབ་ཏུ་གསལ་བར་བྱེད་པའི་བསྟན་བཅོས་སོ། །དབུ་མ་པ་ནི་དོན་དམ་པའི་དེ་ཁོ་ན་ཉིད་རབ་ཏུ་གསལ་བར་བྱེད་པའི་བསྟན་བཅོས་དེ་ཞེས་གསུངས་སོ། །གཞན་ཡང་འཕགས་པ་འཇམ་དཔལ་དང༌། མགོན་པོ་སྦྱན་རས་གཟིགས་དང༌། འཕགས་པ་ལྷ་དང༌། སློབ་དཔོན་ཛེ་ཏ་རི་སྒྲ་ལས་རྣམ་པར་རྒྱལ་བ་རྣམས་ཀྱི་དགོངས་པ་གཅིག་དང་དབྱངས་གཅིག་གིས་ནང་བའི་གྲུབ་མཐའ་བཞི་པོ་སོ་སོར་གསུངས་པ་འདི་ལྟ་སྟེ། ནམ་མཁའ་དང་ནི་འགོག་པ་གཉིས། །འདུས་མ་བྱས་གསུམ་རྟག་པ་སྟེ། །འདུས་བྱས་ཐམས་ཅད་སྐད་ཅིག་མ། །བདག་གིས་སྟོང་ཞིང་བྱེད་པོ་མེད། །དབང་སྐྱེས་བློ་ནི་རྣམ་མེད་ཀྱིས། །ཕྲ་རབ་བསགས་པ་དངོས་སུ་རིག །ཁ་ཆེའི་གཞུང་གི་ཆུ་གཏེར་གྱི། །བྱེ་བྲག་སྨྲ་བའི་གཞུང་འདོད་འགྱུར། །ཞེས་པ་བྱེ་བྲག་ཏུ་སྨྲ་བའི་གྲུབ་མཐའ་དང་ཤེས་པ་རྣམ་བཅས་སྐྱེད་བྱེད་ནི། དབང་པོའི་སྤྱོད་ཡུལ་སྣང་བ་མིན། །ནམ་མཁའ་མོ་གཤམ་བུ་དང་མཚུངས། །འགོག་པ་དང་ནི་ནམ་མཁའ་མཚུངས། །འདུ་བྱེད་བེམ་པོ་ཡོད་མ་ཡིན། །དུས་གསུམ་རྗེས་འགྲོ་དག་ཀྱང་མེད། །ཐོགས་པ་མེད་པའི་གཟུགས་ཡོད་མིན། །ཞེས་པ་མདོ་སྡེ་པ་ཡས་རིག། ཅེས་པ་མདོ་སྡེ་པའི་གྲུབ་མཐའ་དང༌། ཆ་ཤས་ཅན་ཞེས་བྱ་བ་མེད། །ཕྲ་རབ་རྡུལ་རྣམས་ཡོད་པ་མིན། །རྨི་ལམ་ཉམས་སུ་མྱོང་བ་བཞིན། །དམིགས་པ་མེད་པར་རབ་ཏུ་སྣང༌། །གཟུང་དང་འཛིན་ལས་རྣམ་གྲོལ་བའི། །རྣམ་པར་ཤེས་པ་དོན་དམ་ཡོད། །ཅེས་པ་རྣལ་འབྱོར་སྤྱོད་པའི་གཞུང༌། །རྒྱ་མཚོའི་ཕ་རོལ་ཕྱིན་རྣམས་སྒྲོགས། །ཞེས་པ་སེམས་ཙམ་པའི་གྲུབ་མཐའ་དང༌། རྣམ་ཤེས་དེ་ཡང་དོན་དམ་དུ་ཡོད་པར་མཁས་རྣམས་མི་འདོད་དེ། གཅིག་དང་དུ་མའི་རང་བཞིན་དང༌། །བྲལ་བ་ནམ་མཁའི་པད་མ་བཞིན། །ཡོད་མིན་མེད་མིན་ཡོད་མིན་མིན། །གཉིས་ཀའི་བདག་ཉིད་མིན་པའང་མིན། །མཐའ་བཞི་ལས་ནི་རྣམ་གྲོལ་བའི། །དེ་ཉིད་དབུ་མ་པ་ཡིས་རིག །ཅེས་པ་དབུ་མ་པའི་གྲུབ་པའི་མཐའོ། །དེ་ལྟར་གྲུབ་མཐའ་བཞི་བོ་སོ་སོའི་འདོད་ཚུལ་རང་རང་གི་མཐར་ཐུག་གི་དོན་གང་ཡིན་ངོས་འཛིན་པའི་ཚིགས་སུ་བཅད་པ་འདི་དག་འཕགས་པ་འཇམ་དཔལ་ལ་སོགས་པ་ཚད་མར་གྱུར་ཅིང་དཔང་དུ་གྱུར་པ་རྣམས་ཀྱིས་གསུངས་པའི་ཕྱིར་གྲུབ་མཐའ་སོ་སོའི་དབྱེ་བ་དང་ཁྱད་པར་དབུ་སེམས་ཀྱི་བྱེ་བྲག་གང་ཡིན་ཡང་འདི་བཞིན་འབྱེད་པར་རིགས་སོ། ། དེས་ན་སེམས་ཙམ་པའི་མཐར་ཐུག་གི་དོན་ནི་རྣམ་པར་ཤེས་པ་ཡིན་ནོ། །རྣམ་ཤེས་དེ་ཡང་ཕྱི་རོལ་ལ་དམིགས་པའི་གཟུང་འཛིན་དང་བྲལ་བའི་ཕྱིར་ཕྱིའི་དོན་ལ་དམིགས་པ་མེད་ཀྱང་རྨི་ལམ་བཞིན་དུ་ཕྱི་ནང་སྣོད་བཅུང་སྣ་ཚོགས་ཀྱི་རྣམ་པར་སྣང་བའི་ཚུལ་གྱིས་དོན་དམ་དུ་གྲུབ་པར་འདོད་ལ། ཆོས་ཉིད་ཀྱང་དེ་ཡིན་པར་འདོད་དོ། །དེས་ན་མཐའ་ཐུག་གི་དོན་རྣམ་ཤེས་ཡིན་པས་རྣམ་པར་ཤེས་པ་སྨྲ་བ་ཡིན་ལ། རྣམ་པར་ཤེས་པའི་དངོས་པོ་ཡིན་པའི་དངོས་སྨྲ་བ་ཡིན་ནོ། །བློ་དང་སེམས་དང་རིག་པ་གང་ཡིན་ཐམས་ཅད་ཀྱང་རྣམ་ཤེས་ཡིན་པར་འདོད་ཀྱི། རྣམ་ཤེས་མ་ཡིན་པའི་ཡེ་ཤེས་ཞེས་བྱ་བ་ནི་མི་འདོད་དོ་དེས་ནས་སེམས་ཙམ་པའི་གྲུབ་མཐའ་ལས། རྣམ་པར་ཤེས་པ་དོན་དམ་ཡོད། ཅེས་གསུངས་ཀྱི། འགྱུར་མེད་ཡོངས་གྲུབ་དོན་དམ་ཞེས་མ་གསུངས་པའི་ཕྱིར་དང༌། གཉིས་མེད་ཡེ་ཤེས་དོན་དམ་ཡོད་ཅེས་ཀྱང་མ་གསུང་བའི་ཕྱིར་རོ། །དབུ་མ་པས་འགོག་པའི་ཚེ་ཡང༌། རྣམ་ཤེས་དེ་ཡང་དོན་དམ་དུ། ། ཡོད་པར་མཁས་རྣམས་མི་འདོད་དེ། །ཞེས་གསུངས་ཀྱི། འགྱུར་མེད་ཡོངས་གྲུབ་དོན་དམ་དུ། ། ཡོད་པར་མཁས་རྣམས་མི་འདོད་དེ། །ཞེས་མ་གསུངས་པའི་ཕྱིར་དང༌། གཉིས་མེད་ཡེ་ཤེས་དོན་དམ་དུ། །ཡོད་པ་མཁས་རྣམས་མི་འདོད་དེ། །ཞེས་ཀྱང་མ་གསུངས་པའི་ཕྱིར་རོ། །དེས་ན་རྣམ་ཤེས་དོན་དམ་དུ་འདོད་པ་དང༌། དོན་དམ་རྣམ་ཤེས་སུ་འདོད་པ་ལས་སེམས་ཙམ་པ་དང་དངོས་པོར་སྨྲ་བ་ཡིན་གྱི། འགྱུར་མེད་ཡོངས་གྲུབ་ནི་རྣམ་ཤེས་མ་ཡིན་ལ་རྣམ་ཤེས་ཀྱང་འགྱུར་མེད་ཡོངས་གྲུབ་མ་ཡིན་པའི་ཕྱིར། འགྱུར་མེད་ཡོངས་གྲུབ་དོན་དམ་དུ་འདོད་པས་སེམས་ཙམ་པ་མ་ཡིན་ཞིང་དངོས་པོར་སྨྲ་བ་ཡང་མ་ཡིན་ནོ། །དེས་ན་དབུ་མའི་མཐར་ཐུག་གི་དོན་ཆོས་ཀྱི་དབྱིངས་འགྱུར་བ་མེད་པའི་ཡོངས་གྲུབ་ཤེར་ཕྱིན་ཟབ་མོ་གཉིས་སུ་མེད་པའི་ཡེ་ཤེས་ལ། དེ་སེམས་ཙམ་པ་འདོད་པའི་རྣམ་ཤེས་ཀྱང་ཡིན། ཆོས་ཉིད་ཀྱང་ཡིན་པ་དེ་ལས་འདས་པའི་ཕྱིར། རྣམ་པར་ཤེས་པའི་ཆོས་ཉིད་འདས། །ཞེས་ཡང་དང་ཡང་དུ་གསུངས་སོ། །དེས་དབུ་སེམས་ཀྱི་ཁྱད་པར་གསུངས་ཀྱི། ངོ་བོ་ཉིད་གསུམ་འདོད་མི་འདོད་དང༌། རྣམ་ཤེས་ཚོགས་བརྒྱད་འདོད་མི་འདོད་དང༌། ཀུན་གཞི་རྣམ་ཤེས་འདོད་མི་འདོད་དང༌། རིགས་ཆད་འདོད་མི་འདོད་དང༌། དོན་དམ་དུ་གྲུབ་པའི་ཆོས་འདོད་མི་འདོད་ལས། དབུ་མ་དང་སེམས་ཙམ་གྱི་ཁྱད་པར་འབྱེད་པ་ནི་རྒྱལ་བའི་བཀའ་ཡང་ཡང་དག་དང༌། ས་བཅུ་བ་རྣམས་ཀྱིས་མ་གསུངས་སོ་དེའི་ཕྱིར་སློབ་དཔོན་དབྱིག་གཉེན་སོགས་ཀྱིས་རྒྱལ་བའི་ཡུམ་སེམས་ཙམ་དུ་བཀྲལ་ན་ངེས་དོན་མཐར་ཐུག་གི་སྐབས་ཐམས་ཅད་རྣམ་ཤེས་དོན་དམ་དུ་བསྟན་པ་འབའ་ཞིག་འོང་དགོས་པ་ལས། གནོད་འཇོམས་སུ། ཡོད་པ་མ་ཡིན་ཞེས་བྱ་བས་ནི་རྣམ་པར་ཤེས་པ་ཡོད་པ་མ་ཡིན་པར་བསྟན་ཏོ། །ཞེས་རྣམ་པར་ཤེས་པ་བཀག་པ་མ་གཏོགས་པ་གཞུང་འགྲེལ་གནོད་འཇོམས་དང་བརྒྱད་སྟོང་དོན་བསྡུས་དང་འབུམ་ཊིཀ་ལ་སོགས་ཐོག་མཐའ་བར་གསུམ་རྣམ་ཤེས་དོན་དམ་དུ་བསྟན་པ་ཡིག་འབྲུ་གཅིག་ཀྱང་མི་སྣང་ངོ༌། །ཁྱད་པར་དུ་སློབ་དཔོན་དབྱིག་གཉེན་འདི་ནི་རྣམ་ཤེས་གང་ཡིན་ཐམས་ཅད་སྦང་བྱ་ཡིན་པར་བཞེད་དོ། །སུམ་ཅུ་པའི་རབ་ཏུ་བྱེད་པར་རྣམ་ཤེས་གང་ཡིན་རྣམ་རྟོག་ཡིན་པ་དང༌། ཡུམ་གྱི་གཞུང་འགྲེལ་དང༌། མདོ་སྡེ་རྒྱན་གྱི་འགྲེལ་པ་དང༌། དབུས་མཐའ་རྣམ་འབྱེད་ཀྱི་འགྲེལ་པ་ལ་སོགས་པར་རྣམ་རྟོག་གང་སྦང་བྱ་ཡིན་པར་གསུངས་པའི་ཕྱིར་རོ། །སློབ་དཔོན་དུལ་བ་ལྷ་ལ་སོགས་པས་སློབ་དཔོན་འདིའི་དགོངས་པ་ཡིན་ཟེར་ནས་དབུ་མ་པ་ཕྱོགས་སྔར་བྱས་ཀྱིན་བཀག་པ་མང་པོ་ཡོད་དེ། སློབ་དཔོན་འདི་ཉིད་ཀྱི་གསུང་རབ་གང་ལས་ཀྱང་དབུ་མ་པའི་འདོད་ལུགས་ལ་དགག་པ་བྱ་བ་ཡིག་འབྲུ་གཅིག་ཀྱང་མ་བྱུང་བའི་ཕྱིར། སློབ་དཔོན་གྱི་ཞབས་འདྲེན་དུ་འགྱུར་བ་བྱེད་པར་མི་རིགས་སོ། །དེས་ན་རྣམ་ཤེས་གང་ཡིན་སྦང་བྱར་བྱེད་པའི་རྣམ་པར་ཤེས་པར་སྨྲ་བ་པོ་དེ་ལ་ཡང་མཁས་པ་རྣམས་ཀྱིས་ལེགས་པར་ཞིབ་ཏུ་དགོངས་པ་གཏོང་བར་ཞུ་ལགས་སོ། །དེ་ལྟ་བས་ན་མཐར་ཐུག་གི་དོན་རྣམ་ཤེས་ཡིན་པར་འདོད་མི་འདོད་ལས་སེམས་ཙམ་པ་ཡིན་མིན་དུ་འཇོག་པ་འདི་ནི་ས་བཅུ་པ་རྣམས་ཀྱི་མན་ངག་འདོད་ལུགས་ཕན་ཚུན་དུ་མི་འཆུག་པའི་ཁོང་གཟེར་ལྟ་བུ་ཡ་ཡོར་མི་འགྲོ་བའི་ཚངས་ཐིག། དབུ་སེམས་ཀྱི་ཁྱད་པར་གཏན་ལ་ཕེབས་པའི་གདམ་ངག་གི་དོན་ཡིན་ནོ། ། དེའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་དང་ཆོས་ཉིད་དུ་ཕྱེ་བ་དང༌། དབུས་དང་མཐའ་མར་ཕྱེ་བ་དང༌། རང་བཞིན་དང་བཅོས་མར་ཕྱེ་བ་དང༌། གཉུག་མ་དང་གློ་བུར་བར་ཕྱེ་བ་དང༌། སྙིང་པོ་དང་ཤུན་པར་ཕྱེ་བ་དང༌། རང་སྟོང་དང་གཞན་སྟོང་དུ་ཕྱེ་བ་དང༌། གཤིས་ལུགས་དང་འཁྲུལ་ལུགས་སུ་ཕྱེ་བ་དང༌། རྣམ་ཤེས་དང་ཡེ་ཤེས་སུ་ཕྱེ་བ་དང༌། མཉམ་བཞག་དང་རྗེས་ཐོབ་ཏུ་ཕྱེ་བ་དང༌། ཀུན་གཞིའི་རྣམ་ཤེས་དང་ཀུན་གཞིའི་ཡེ་ཤེས་སུ་ཕྱེ་བ་ལ་སོགས་པ་དངོས་པོ་བརྒྱད་རང་བཞིན་གསུམ་གྱི་བར་ནས་བཏོན་དེ་སོ་སོར་ལེགས་པར་རྣམ་པར་ཕྱེ་ནས་བཤད་པ་ཉིད་ཀྱིས་མདོ་ཇི་ལྟ་བ་བཞིན་དུ་འཆད་པ་ནི། བདེན་པ་གཉིས་ཀྱི་རྣམ་དབྱེ་ལ་བརྟེན་ནས་ཐུབ་པའི་བཀའ་ལ་མི་རྨོངས་པར་འགྱུར་བའི་ཚུལ་གྱིས་བཤད་པ་ནི་འདི་ལྟར་སྟེ། རྣམ་ཀུན་མཁྱེན་ཉིད་ལམ་ཤེས་ཉིད། །དེ་ནས་ཐམས་ཅད་ཤེས་པ་ཉིད། །རྣམ་ཀུན་མངོན་རྫོགས་རྟོགས་པ་དང༌། །རྩེ་མོར་ཕྱིན་དང་མཐར་གྱིས་པ། །སྐད་ཅིག་གཅིག་མངོན་རྫོགས་བྱང་ཆུབ། །ཆོས་ཀྱི་སྐུ་དང་དེ་རྣམ་བརྒྱད། །རིམ་པ་བཞིན་དུ་བཤད་བར་བྱའོ། ། ༢ ཚིག་དོན་ཡན་ལག་རྒྱས་པར་བཤད་པ། དེ་ལ་སོ་སོའི་ངོ་བོ་ནི། མཁྱེན་པ་གསུམ་སྔར་བསྟན་ལ། ཆོས་དབྱིངས་དེ་བཞིན་ཉིད་ཀྱི་མཁྱེན་པ་གསུམ་གྱི་མཚན་ཉིད་ལ་སློབ་པ་གཞི་ཤེས་རབ་ཀྱི་ཕ་རོལ་ཏུ་ཕྱིན་པའི་རྣམ་པ་བརྒྱ་དང་བདུན་བཅུ་རྩ་གསུམ་པོ་ཀུན་མངོན་སུམ་དུ་རྫོགས་པར་རྟོགས་པར་བྱེད་པ་ཤེར་ཕྱིན་ཟབ་མོའི་རྣལ་འབྱོར་དང༌། རྣལ་འབྱོར་དེ་རབ་ཏུ་གྱུར་བའི་གནས་སྐབས་ནི་རྩེ་མོར་ཕྱིན་པ་དང༌། རབ་དེའི་གོ་རིམ་ནི་མཐར་གྱིས་པ་དང་རྣལ་འབྱོར་དེ་བསྒོམ་པ་ཡོངས་སུ་རྫོགས་ཤིང་མཐར་ཐུག་གི་གནས་སྐབས་ནི་སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་པ་སྟེ། ནམ་ཞིག་སའི་མཐར་ཐུག་ན་ཆོས་ཀྱི་སྐུ་ཡང་རྫོགས་ཤིང་གསལ། ཞེས་གསུངས་པའོ། །རྣལ་འབྱོར་ཟབ་མོ་དེས་སྒྲིབ་གཉིས་བག་ཆགས་དང་བཅས་པ་ལས་གྲོལ་བར་བྱས་པའི་དེ་བཞིན་ཉིད་ནི་བྲལ་འབྲས་ཆོས་ཀྱི་སྐུ་སྟེ། རྣལ་འབྱོར་ཟབ་མོའི་བསྒོམ་པ་ཡོངས་སུ་རྫོགས་ཤིང་སྨིན་པའི་འབྲས་བུ་ལྷུན་གྱིས་གྲུབ་པའོ། །རྒྱས་པར་ནི་སོ་སོའི་སྐབས་སུ་བབ་པའི་ཚེ་བརྗོད་པར་བྱའོ། །དབུ་མ་ཆེན་པོ་སློབ་དཔོན་དབྱིག་གཉེན་གྱི་ཞལ་སྔ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་འདི་ནི་བཅོམ་ལྡན་འདས་ཀྱིས་སྒོ་གསུམ་དང༌། རྣམ་གྲངས་བཅུ་གཅིག་གིས་བཤད་དེ། མགོ་སྨོས་པས་གོ་བ་དང༌། སྤྲོས་ནས་གོ་བ་དང༌། དྲང་དགོས་པའི་གདུལ་བྱ་འདུལ་བ་ལས་བརྩམས་ཏེ། མདོར་བསྟན་པའི་སྒོ་དང༌། འབྲིང་བསྟན་པའི་སྒོ་དང་རྒྱས་པར་བསྟན་པའི་སྒོའོ། །དེ་ལ་རྣམ་གྲངས་བཅུ་གཅིག་ནི་དང་པོར་ཤཱ་རིའི་བུ་ལ་བཀའ་སྩལ་ཏེ་བཤད་པ་དང༌། དེའི་འོག་ཏུ་གནས་བརྟན་རབ་འབྱོར་གྱིས་རྒྱས་པར་བཤད་པ་དང༌། དེ་ནས་བརྒྱ་བྱིན་ལ་བཀའ་སྩལ་བ་དང། །དེ་ནས་གནས་བརྟན་རབ་འབྱོར་དང༌། དེ་ནས་འཕགས་པ་བྱམས་པ་དང༌། །དེ་ནས་རབ་འབྱོར་དང༌། དེ་ནས་བརྒྱ་བྱིན་དང༌། དེ་ནས་རབ་འབྱོར་དང༌། དེ་ནས་བྱམས་པ་དང༌། དེ་ནས་རབ་འབྱོར་ལ་བཀའ་སྩལ་པ་དང༌། རྟག་ཏུ་དུ་དང་ཆོས་འཕགས་ཀྱི་གཏམ་གྱིས་ཡང་ཀུན་དགའ་བོ་ལ་བཀའ་སྩལ་ནས་ཡོངས་སུ་གཏད་པ་སྟེ། འདི་དག་ནི་རྣམ་གྲངས་བཅུ་གཅིག་གོ །ཞེས་པའི་དོན་འདི་གསུངས་སོ། །དེས་ན་སེམས་བསྐྱེད་མདོར་བསྟན་ནི་མདོར་བསྟན་པའི་སྒོ་དང༌། སེམས་བསྐྱེད་རྒྱས་བཤད་ནས་སྐབས་དང་པོ་རིལ་པོ་ནི་འབྲིང་དུ་བསྟན་པའི་སྒོ་དང༌། སྐབས་གཉིས་ནས་ཡོངས་སུ་རྫོགས་པའི་པར་ནི། རྒྱས་པར་བསྟན་པའི་སྒོ་ཡིན་ནོ།། དང་པོ། རྣམ་མཁྱེན་རྒྱས་པར་བཤད་པ། དེ་ལ་ཐོག་མར་རྣམ་པ་ཐམས་ཅད་མཁྱེན་པ་ཉིད་བཤད་པ་ནི། སེམས་བསྐྱེད་པ་ལ་སོགས་པ་དོན་བཅུའི་སྒོ་ནས་རྒྱས་བར་བསྟན་པ་ཡིན་ནོ། །དེ་ཡང་རྣམ་མཁྱེན་ཉིད་བསྒོམས་པས་ལམ་ཐམས་ཅད་བསྒོམས་པར་འགྱུར་ཞེས་མདོ་ལས་གསུངས་པའི་ཚུལ་གྱིས་སློབ་ཡུལ་དེ་བཞིན་ཉིད་ཀྱིས་རྣམ་མཁྱེན་དུ་གཅིག་མོད་ཀྱང༌། རྣམ་པ་ཐམས་ཅད་མཁྱེན་པ་ཉིད་ལས་བརྩམས་ཏེ་རྣམ་པར་མི་རྟོག་པའི་ཤེར་ཕྱིན་ཉིད་གཟུང་ནས་སེམས་བསྐྱེད་པ་ལ་སོགས་པ་བཅུ་དོན་དམ་བདེན་པའི་ཚུལ་དུ་བཤད་པ་ནི་རྣམ་པ་ཐམས་ཅད་མཁྱེན་པ་ཉིད་སྐབས་ཡིན་དེ། གནོད་འཇོམས་ལས། འབྲིང་དུ་བསྟན་པ་འདི་ཡང་རྣམ་པ་ཐམས་ཅད་མཁྱེན་པ་ཉིད་ལས་བརྩམས་ཏེ། རྣམ་པར་མི་རྟོག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་བཟུང་ནས་དོན་དམ་པའི་བདེན་པའི་ཚུལ་དུ་བཤད་དོ་ཞེས་སོ། །ལམ་ཤེས་ཉིད་ལས་བརྩམས་ཏེ་རྟོགས་བཅས་དང་རྟོགས་མེད་ཀྱིས་ཤེར་ཕྱིན་ཉིད་བཟུང་ནས་དྲང་དགོས་པ་རྣམས་ཀྱིས་དོན་དུ་བདེན་པ་གཉིས་ཀའི་ཚུལ་དུ་བསྟན་པ་ནི། སྐབས་ལྷག་མ་བདུན་པོ་ཡིན་ཏེ། གནོད་འཇོམས་ལས་དེའི་འོག་ཏུ་རྒྱས་པར་བསྟན་པ་འདི་ནི་བྱང་ཆུབ་སེམས་དཔའི་ལམ་གྱི་རྣམ་པར་ཤེས་པ་ཉིད་ལས་བརྩམས་ཏེ་རྣམ་པར་རྟོག་པར་བཅས་དང༌། རྣམ་པར་མི་རྟོག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་བཟུང་ནས་དྲང་དགོངས་པ་རྣམས་ཀྱི་དོན་དུ་ཀུན་རྫོབ་དང་དོན་དམ་པའི་དབང་གིས་རྣམ་པ་གཉིས་སུ་རྒྱས་པར་བཤད་དེ། ཞེས་གསུངས་སོ། ། ༡༽སེམས་བསྐྱེད་བཤད་པ། དེ་ལ་དོན་དམ་བདེན་པའི་ཚུལ་དུ་རྣམ་མཁྱེན་བཤད་པ་ལ་སེམས་བསྐྱེད་པ་ལ་སོགས་པ་བཅུ་ལས། དང་པོ་སེམས་བསྐྱེད་བཤད་པ་ལས། སེམས་བསྐྱེད་ཀྱི་མཚན་ཉིད་བཤད། བསྡུས་དང་རྒྱས་པའི་སྒོ་ནས་ཡུམ་གྱི་མདོ་བཞིན་དུ་བརྗོད། དཔེ་ཉི་ཤུ་རྩ་གཉིས་དང་ལྡན་པའི་སེམས་བསྐྱེད་ཀྱི་དབྱེ་བ་མདོ་གཞན་དང་སྦྱར་ཏེ་བཤད་པ་དང་གསུམ་མོ། ། སེམས་བསྐྱེད་ཀྱི་མཚན་ཉིད་བཤད་པ། དེ་ལ་དང་པོ་ནི། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད་ཅེས་པས་མཚན་ཉིད་སྟོན་ཏེ་ཡོན་ཏན་གསུམ་དང་སེམས་ཅན་དང་བྱང་ཆུབ་ཆེན་པོ་ལ་དམིགས་པ་་་་དང་ལྡན་པའི་འདོད་པ་ནི་མཚན་ཉིད་དོ། །ཐེག་པ་ཆེན་པོའི་སེམས་བསྐྱེད་ནི་མཚོན་བྱའོ། །བྱང་སེམས་སོ་སོའི་རྒྱུད་ལ་ཡོད་པ་ནི་མཚན་གཞིའོ། མདོ་སྡེ་རྒྱན་རྩ་འགྲེལ་ལས་སེམས་བསྐྱེད་པའི་མཚན་ཉིད་དུ་ཚིགས་སུ་བཅད་པ། སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །བྱང་ཆུབ་སེམས་དཔའི་སེམས་དཔའ་སྟེ། །དོན་གཉིས་ལྡན་པའི་སེམས་འབྱུང་བ། །སྤྲོས་བ་ཆེན་པོ་ནི་གོ་ཆའོ་བརྩོན་འགྲུས་ཀྱིས་དེ་ཟབ་མོ་དང༌། ཡུན་རིང་པོར་དཀའ་བ་སྤྱད་པ་བསྒྲུབས་པ་ལ་སྤྲོ་བའི་ཕྱིར་རོ། །རྩོམ་པ་ཆེན་པོ་ནི་གོ་ཆ་ཇི་ལྟ་བ་བཞིན་དུ་སྦྱོར་བའི་བརྩོན་འགྲུས་ཀྱིས་སོ། །དོན་ཆེན་པོ་ནི་བདག་དང་གཞན་ལ་ཕན་པའི་ཆེད་ཀྱི་ཕྱིར་རོ། །འབྱུང་བ་ཆེན་པོ་ནི་བྱང་ཆུབ་ཆེན་པོ་ཡང་དག་པར་འགྲུབ་པའི་ཕྱིར་རོ། །འདིས་ནི་ཡོན་ཏན་རྣམ་པ་གསུམ་ཡོངས་སུ་བསྟན་ཏེ། སྐྱེས་བུ་བྱེད་པའི་ཡོན་ཏན་ནི་དོན་གཉིས་ཀྱིས་སོ། །དོན་བྱེད་པའི་ཡོན་ཏན་དང༌། འབྲས་བུ་འཛིན་པའི་ཡོན་ཏན་ནི་ཚིག་གཉིས་ཀྱིས་སོ། །དོན་གཉིས་དང་ལྡན་པ་ནི་བྱང་ཆུབ་ཆེན་པོ་དང༌། སེམས་ཅན་གྱི་དོན་བྱ་བ་ལ་དམིགས་པའི་ཕྱིར་རོ། །ཡོན་ཏན་གསུམ་དང་དོན་གཉིས་ལ་དམིགས་པ་དང་ལྡན་པའི་སེམས་པ་ནི་སེམས་བསྐྱེད་པ་ཞེས་བྱའོ། །སེམས་བསྐྱེད་པ་རབ་ཏུ་དབྱེ་བར་ཚིགས་སུ་བཅད་པ་སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང༌། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་ནི་རྣམ་པ་བཞི་སྟེ། མོས་པས་སྦྱོད་པའི་ས་ལ་ནི་མོས་པ་ལས་བྱུང་བའོ། །ས་བདུན་པ་ལ་ནི་ལྷག་པའི་བསམ་པ་རྣམ་པར་དག་པའོ། ། སངས་རྒྱས་པ་ལ་སོགས་པ་ནི་རྣམ་པར་སྨིན་པའོ། །སངས་རྒྱས་ཀྱིས་ལ་ནི་སྒྲིབ་པ་མེད་པའོ། ། སེམས་བསྐྱེད་པ་རྣམ་པར་གཏན་ལ་དབབ་པར་ཚིགས་སུ་བཅད་པ་བཞི་པ་སྟེ། དེའི་རྩ་བ་སྙིང་རྗེར་འདོད། །རྟག་ཏུ་སེམས་ཅན་ཕན་པར་སེམས། །ཆོས་ལ་མོས་དང་དེ་བཞིན་དེའི། །ཡེ་ཤེས་ཚོལ་བར་དམིགས་པའོ། །གོང་དུ་འདུན་པ་འགྲོ་བ་སྟེ། །སྡོམ་པ་རྒྱ་ཆེན་དེ་རྟེན། །ལམ་འགོག་པ་ནི་མི་མཐུན་ཕྱོགས། །སློང་ཞིང་དང་དུ་ལེན་པའོ། །བསོད་ནམས་ཡེ་ཤེས་རང་བཞིན་གྱི། ། དགེ་བ་འཕེལ་བ་དེའི་ཕན་ཡོན། །ཕ་རོལ་ཕྱིན་ལ་རྟག་སྦྱོར་བ། །དེ་ནི་ངེས་པར་འབྱུང་བར་བརྗོད། །འདི་ཡི་མཐའ་ཐུག་ས་ཡིན་ཏེ། །སོ་སོ་རང་གི་དེ་སྦྱོར་བས། །བྱང་ཆུབ་སེམས་དཔའི་སེམས་བསྐྱེད་པ། ། རྣམ་པར་ངེས་པར་ཤེས་པར་བྱ། །དེ་ལ་རྣམ་པར་གཏན་ལ་དབབ་པ་ནི་འདི་ཡིན་ཏེ། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་རྣམ་པ་བཞི་པོ་འདིའི་རྩ་བ་ནི་གང་བསམ་པ་ནི་གང༌། མོས་པ་ནི་གང་དམིགས་པ་ནི་གང་འགྲོ་བ་ནི་གང་རྟེན་ནི་གང༌། ཉེས་དམིགས་ནི་གང༌། ཕན་ཡོན་ནི་གང༌། ངེས་པར་འབྱུང་བ་ནི་གང༌། མཐར་ཐུག་པ་ནི་གང་ཞེ་ན། སྨས་པ་སྙིང་རྗེ་ཆེན་པོ་ནི་རྩ་བའོ། །རྟག་ཏུ་སེམས་ཅན་ལ་ཕན་པར་སེམས་པའོ། །ཐེག་པ་ཆེན་པོའི་ཆོས་ལ་མོས་པའོ། །དེའི་ཡེ་ཤེས་ཚོལ་བར་དམིགས་པ་སྟེ། དེའི་ཡེ་ཤེས་ལ་ཚོལ་བའི་རྣམ་པར་དམིགས་པའི་ཕྱིར་རོ། །གོང་ནས་གོང་དུ་འདུན་པ་ནི་འགྲོ་བའོ། །བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ནི་རྟེན་ནོ། ། ལམ་གཅོད་པ་ནི་ཉེས་དམིགས་ཏེ། ལམ་གཅོད་པ་དེ་ཡང་གང་ཞེ་ན། མི་མཐུན་པའི་ཕྱོགས་ཐེག་པ་གཞན་གྱི་སེམས་སློང་ཞིང་དང་དུ་ལེན་པའོ། །བསོད་ནམས་དང་ཡེ་ཤེས་ཀྱི་རང་བཞིན་གྱི་དགེ་བའི་རྩ་བ་འཕེལ་བ་ནི་ཕན་ཡོན་ནོ། །རྟག་ཏུ་ཕ་རོལ་ཏུ་ཕྱིན་པ་ལ་གོམས་པ་ནི་ངེས་པར་འབྱུང་བའོ། །ས་ནི་མཐར་ཐུག་པ་ཡིན་ཏེ། སོ་སོ་རང་གི་ས་ལ་སྦྱོར་བས་གང་ཞིག་གང་ལ་ཞུགས་པའི་ས་དེ་ནི་དེའི་མཐར་ཐུག་པ་ཡིན་ནོ། །ཡང་དག་པར་བླངས་པ་བརྡ་ལས་བྱུང་བའི་སེམས་བསྐྱེད་པར་ཚིགས་སུ་བཅད་པ། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས།། མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །གཞན་གྱིས་བསྟན་ཅིང་གཞན་གྱིས་རྣམ་པར་རིག་བྱེད་ལས་སེམས་བསྐྱེད་པ་གང་ཡིན་པ་དེ་ནི་ཡང་དག་པར་བླངས་པ་བརྡ་ལས་བྱུང་བ་ཞེས་བྱའོ། །དེ་ཡང་གྲོགས་ཀྱིས་སྟོབས་ལས་ཏེ། དགེ་བའི་བཤེས་གཉེན་གྱི་ངོར་སྐྱེ་བ་ཡང་ཡོད་དོ། །རྒྱུའི་སྟོབས་ལས་ཏེ། རིགས་མཐུས་སྐྱེ་བ་ཡང་ཡོད་དོ། །དགེ་བའི་རྩ་བ་སྟོབས་ལས་དེ་དེའི་རིགས་རྒྱས་པའི་སྒོ་ནས་སྐྱེ་བ་ཡང་ཡོད་དོ། །ཐོས་པའི་སྟོབས་ལས་སྐྱེ་བ་ཡང་ཡོད་དོ། ཆོས་ཀྱི་རྣམ་གྲངས་དེ་དང་དེ་བཤད་པ་ན་མང་དུ་བྱང་ཆུབ་ཏུ་སེམས་བསྐྱེད་པའི་ཕྱིར། དགེ་བ་གོམས་ལས་ཏེ། ཚེ་འདི་ཉིད་ལ་རྟག་ཏུ་ཉན་པ་དང་འཛིན་པ་དང་འཆད་པ་ལ་སོགས་པ་ལས་སྐྱེ་བ་ཡང་ཡོད་དོ། །དེ་ཡང་གྲོགས་ཀྱི་སྟོབས་ལས་ནི་མི་བརྟན་པ་འབྱུང་བ་རིགས་པར་བྱའོ། །རྒྱུ་ལ་སོགས་པའི་སྟོབས་ལས་ནི་བརྟན་པ་བྱུང་ངོ༌། །དོན་དམ་པའི་སེམས་བསྐྱེད་པར་ཚིགས་སུ་བཅད་པ་བདུན་ཏེ། རྫོགས་པའི་སངས་རྒྱས་རབ་བསྙེན་བྱས། ། བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེ་ཕྱིར་དེ་ནི་དམ་པར་འདོད། །ཆོས་དང་སེམས་ཅན་རྣམས་དང་ནི། །དེ་ཡི་བྱ་བ་སངས་རྒྱས་ཉིད། །མཆོག་ལ་སེམས་མཉམ་རྙེད་པའི་ཕྱིར། །དེ་ཡི་རབ་དགའ་ཁྱད་པར་འཕགས། །སྐྱེ་བ་རྒྱ་ཆེ་དེ་ལ་སྤྲོ། །བསམ་པ་ཡང་ནི་དག་པ་དང༌། །ལྷག་མ་དག་ལ་མཁས་པ་དང༌། །ངེས་པར་འབྱུང་བ་ཤེས་པར་བྱ། །ཆོས་ལ་མོས་པ་ས་བོན་དང༌། །ཕ་རོལ་ཕྱིན་མཆོག་མ་ལས་སྐྱེས། །བསམ་གཏན་ལས་བྱུང་བདེ་བ་མངའ། །སྙིང་རྗེ་སྐྱེ་བའི་མ་མའོ། །སྨོན་ལམ་ཆེན་པོ་བཅུ་བསྒྲུབ་ཕྱིར། །རྒྱ་ཆེ་བར་ནི་ཤེས་པར་བྱ། །དཀའ་བ་ཡིན་རིང་མི་སྐྱོའི་ཕྱིར། །སྤྲོ་བ་ཁོང་དུ་ཆུད་པར་བྱ། །བྱང་ཆུབ་ཉེ་བར་རྟོགས་པ་དང༌། །དེ་ཡི་ཐབས་ཤེས་རྙེད་པའི་ཕྱིར། ། བསམ་པ་དག་པར་ཤེས་པར་བྱ། །ས་གཞན་ཚུལ་ལ་མཁས་པ་ཉིད། །ཇི་ལྟར་རྣམ་བཞག་ཡིད་བྱེད་པས། །དེ་རྟོག་ཉིད་དུ་ཤེས་ཕྱིར་དང༌། །དེ་ཉིད་ལ་ཡང་མི་རྟོག་ཕྱིར། །ངེས་པར་འབྱུང་བར་ཤེས་པར་བྱ། །ཚིགས་སུ་བཅད་པ་དང་པོ་ནི། ལུང་དང་བསྒྲུབ་པ་དང་རྟོགས་པའི་ཁྱད་པར་དག་གིས་སེམས་བསྐྱེད་པ་དོན་དམ་པ་ཉིད་དུ་སྟོན་པར་བྱེད་དོ། །དོན་དམ་མེད་པའི་སེམས་བསྐྱེད་པ་དེ་ཡང་ས་རབ་ཏུ་དགའ་བ་ལ་ཡིན་པས། དེའི་རབ་ཏུ་དགའ་བ་ཁྱད་པར་དུ་འཕགས་པའི་རྒྱུ་སྟོན་ཏེ། དེ་ལ་ཆོས་རྣམས་ལ་སེམས་མཉམ་པ་ཉིད་ནི་ཆོས་ལ་བདག་མེད་པར་རྟོག་པའི་ཕྱིར་རོ། །སེམས་ཅན་རྣམས་ལ་སེམས་མཉམ་པ་ཉིད་ནི་བདག་དང་གཞན་མཉམ་པ་ཉིད་ཏུ་རྟོག་པའི་ཕྱིར་རོ། །སེམས་ཅན་གྱི་བྱ་བ་དག་ལ་སེམས་མཉམ་པ་ཉིད་ནི། བདག་ཉིད་ཀྱི་སྡུག་བསྔལ་དང་འདྲ་བར་དེ་དག་གིས་སྡུག་བསྔལ་ཟད་པར་འདོད་པའི་ཕྱིར་རོ། །སངས་རྒྱས་ཉིད་ལ་སེམས་མཉམ་པ་ཉིད་ནི་དེའི་ཆོས་ཀྱི་དབྱིངས་དང་བདག་དབྱེར་མེད་པར་རྟོགས་པའི་ཕྱིར་རོ། ། དོན་དམ་པའི་སེམས་བསྐྱེད་པ་དེ་ཉིད་ལ་དོན་རྣམ་པ་དྲུག་ཏུ་རིག་པར་བྱ་སྟེ། སྐྱེ་བ་དང་རྒྱ་ཆེ་བ་དང༌། སྤྲོ་བ་དང༌། བསམ་པ་དག་པ་དང༌། ལྷག་མ་ལ་མཁས་པ་དང་ངེས་པར་འབྱུང་བའོ། །དེ་ལ་སྐྱེ་བ་ནི་ས་བོན་དང༌། མ་དང༌། མངལ་དང༌། མ་མའི་བྱེ་བྲག་ལས་རིག་པར་བྱའོ། །རྒྱ་ཆེན་པོའི་སྨོན་ལམ་ཆེན་པོ་བཅུ་མངོན་པར་བསྒྲུབ་པའི་ཕྱིར་རོ། །སྤྲོ་བ་ནི་དཀའ་བ་ཡུན་རིང་པོས་མི་སྐྱོ་བའི་ཕྱིར་རོ། །བསམ་པ་དག་པ་ནི་བྱང་ཆུབ་དང་ཉེ་བར་ཤེས་པའི་ཕྱིར་དང༌། དེའི་ཐབས་ཤེས་པའི་ཕྱིར་རོ། །ལྷག་མ་ལ་མཁས་པ་ནི་ས་གཞན་དག་ལ་མཁས་པའོ། །ངེས་པར་འབྱུང་བ་ནི་ས་ཇི་ལྟར་རྣམ་པར་བཞག་བཞིན་ཡིད་ལ་བྱེད་པས་སོ། །ཇི་ལྟར་ཡིད་ལ་བྱེད་པས་ཞེ་ན། འདི་ནི་རྟོག་པ་ཙམ་མོ་ཞེས་པ་རྣམ་པར་བཞག་པ་དེ་རྟོག་པ་ཉིད་དུ་ཤེས་པའི་ཕྱིར་རྟོག་པ་ཉིད་དུ་ཤེས་པ་དེ་ཉིད་ལ་ཡང་རྣམ་པར་མི་རྟོག་པའི་ཕྱིར་རོ། །ཞེས་གསུངས་སོ། །སྨོན་ལམ་ཆེན་པོ་བཅུ་ནི། རྒྱལ་བ་ཀུན་ལ་མཆོད་ཅིང་རིམ་གྲོ་བྱ་བར་སྨོན་པ་དང༌། རྒྱལ་བ་ཀུན་གྱི་དམ་ཆོས་འཛིན་པར་སྨོན་པ་དང༌། རྒྱལ་བ་ཀུན་གྱི་དྲུང་དུ་འགྲོ་བར་སྨོན་པ་དང༌། རྒྱལ་སྲས་སྦྱོད་པ་རྒྱ་ཆེན་སྒྲུབ་པར་སྨོན་པ་དང༌། འགྲོ་ཀུན་ཡོངས་སུ་སྨིན་པར་སྨོན་པ་དང༌། ཞིང་ཁམས་ཀུན་ཏུ་འཇུག་པར་སྨོན་པ་དང༌། རྒྱལ་བའི་ཞིང་ཀུན་སྦྱོང་པར་སྨོན་པ་དང༌། འགྲོ་ཀུན་ཐེག་པ་ལ་འཇུག་པར་སྨོན་པ་དང༌། སྤྱོད་པ་ཐམས་ཅད་དོན་ཡོད་པར་སྨོན་པ་དང༌། མངོན་པར་བྱང་ཆུབ་ནས་ཐེག་ཆེན་སྒྲུབ་པར་སྨོན་པ་སྟེ། བཅུའི་དོན་འདི་ནི་ས་བཅུ་པའི་མདོ་ལས་བྱུང་ངོ༌། །སེམས་བསྐྱེད་འདི་སྤངས་པས་བདེ་བ་རྣམ་པ་བཞི་མི་འཐོབ་པ་ཡང་མདོ་སྡེའི་རྒྱན་ལས། ཆེར་འོས་སེམས་བསྐྱེད་སྤངས་པའི་སྐྱེ་བོ་དག །གཞན་དོན་སེམས་དང་དེ་ཡི་ཐབས་རྙེད་དང༌། །དགོས་ཆེན་དོན་དང་དེ་ཉིད་མཆོག་མཐོང་བས། །བདེ་བ་དེ་སྦངས་ཞི་བར་འགྲོ་བར་འགྱུར། ཞེས་དང༌། སེམས་འདི་སྐྱེས་མ་ཐག་ཏུ་སེམས་ཅན་མཐའ་ཡས་པའི་རྟེན་ཅན་གྱི་ཉེས་པ་བྱེད་པ་ལས་སེམས་བསྡམས་པས་ངན་འགྲོས་མི་འཇིག་པ་དེ་ནི་དགེ་བའི་ལས་དང་སྙིང་རྗེ་གཉིས་འཕེལ་པས་གཞན་དོན་དུ་སྡུག་བསྔལ་གྱིས་དགའ་བ་དེ་ཉིད་ལས། བློ་ལྡན་སེམས་མཆོག་སྐྱེས་མ་ཐག་ཏུ་ཡང༌། །མཐའ་ཡས་ཉེས་པ་བྱེད་ལས་སེམས་རབ་སྡམས། །གཉིས་འཕེལ་བྱེད་པས་རྟག་ཏུ་དགེ་བ་དང༌། །བརྩེ་ལྡན་བདེ་དང་སྡུག་བསྔལ་དག་གིས་དགའ། །ཞེས་དང༌། སེམས་བསྐྱེད་པ་སྟེ། ཉེས་པ་ལ་མི་འཇུག་པའི་སྡོམ་པ་ཐོབ་པ་ཡང་དེ་ཉིད་ལས། །གང་ཚེ་གཞན་གྱི་དོན་ཕྱིར་ལུས་དང་ནི། །སྲོག་ལ་མི་ལྟ་རབ་ངལ་ཁས་ལེན་པ། །དེ་ལྟ་བུ་དེ་གཞན་ཕྱི་གནོད་པ་ཡིས། ། ཇི་ལྟར་ངན་པར་བྱེད་པའི་ལས་ལ་འཇུག །ཅེས་དང༌། སེམས་མི་རྟོག་པའི་རྒྱུ་ཡང་དེ་ཉིད་ལས། ། དེ་ཡིས་ཆོས་ཀུན་སྒྱུ་མ་ལྟ་བུ་དང༌། །སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །འབྱོར་བའི་དུས་དང་རྒུད་པའི་དུས་ན་འང༌། །ཉོན་མོངས་སྡུག་བསྔལ་དག་གིས་འཇིགས་པ་མེད། །རང་གི་ཡོན་ཏན་སེམས་ཅན་ཕན་འདོགས་དགའ། །བསམ་བཞིན་སྐྱེ་བ་རྫུ་འཕྲུལ་རྣམ་པར་འཕྲུལ། །རྒྱན་དང་སྟོན་མོ་ས་མཆོག་རྩེ་དགའ་བ། །སྙིང་རྗེའི་བདག་ཉིད་མིན་པ་རྣམས་ལ་མེད། ། ཅེས་དང༌། རང་གི་ཡོན་ཏན་གྱི་རྒྱན་དང༌། གཞན་ལ་ཕན་འདོགས་པས་དགའ་བའི་སྟོན་མོ་དང༌། བསམ་བཞིན་སྐྱེ་བའི་སྐྱེད་མོས་ཚལ་གྱིས་དང༌། རྫུ་འཕྲུལ་གྱི་རྣམ་པར་འཕྲུལ་བའི་རྩེད་མོས་དགའ་བའོ། །སེམས་བསྐྱེད་པ་སྡུག་བསྔལ་གྱིས་མི་འཇིགས་པ་ཡང༌། གཞན་དོན་བརྩོན་ལྡན་སྙིང་རྗེའི་བདག་ཉིད་འདི། ། གང་ཚེ་མནར་མེད་པ་ལའང་དགར་འཛིན་པ། །དེ་འདྲ་བ་དག་སྲིད་ན་གཞན་རྟེན་ཅན། །སྡུག་བསྔལ་འབྱུང་བ་རྣམས་ཀྱིས་ག་ལ་འཇིགས། །ཞེས་དང་དེ་འདྲ་བས་སེམས་ཅན་མི་འདོད་ཞིང་གཞན་དོན་དུ་གནས་པ་ལ་དགེ་བའི་བཤེས་གཉེན་གཞན་གྱིས་བསྐུལ་བ་ངོ་ཚ་བ་ཡང༌། སློབ་དཔོན་བརྩེ་ཆེན་རྟག་ཏུ་བསྟེན་པའི་བདག །ཕ་རོལ་སྡུག་བསྔལ་དག་གིས་སེམས་གདུང་བ། །གཞན་གྱི་བྱ་བ་ཉེ་བར་གནས་པ་ལ། །གཞན་གྱིས་བསྐུལ་བ་ཤིན་ཏུ་ངོ་ཡང་ཚ། ། ཞེས་པ་དང༌། ལེ་ལོ་སྨད་ཅིང་ཉན་ཐོས་པས་བརྩོན་པ་བརྒྱ་འགྱུར་དུ་བྱ་བར་རིགས་པ་ཡང༌། མགོ་ལ་སེམས་ཅན་ཁུར་ཆེན་ཁྱེར་པ་ཡི། །སེམས་ཅན་མཆོག་ནི་དལ་གྱིས་འགྲོ་མི་མཛེས། །བདག་གཞན་སྣ་ཚོགས་འཆིང་བས་རབ་བཅིངས་པ། །བརྩོན་པ་བརྒྱ་འགྱུར་དུ་ནི་བྱ་བར་རིགས། །ཞེས་ཐེག་པ་ཆེན་པོ་མདོ་སྡེའི་རྒྱན་ལས། སེམས་བསྐྱེད་ཀྱི་མཚན་ཉིད་དང༌། དབྱེ་བ་དང༌། གཏན་ལ་དབབ་པ་དང༌། ཡང་དག་པར་བླངས་པ་བརྡ་ལས་བྱུང་བའི་དང༌། དོན་དམ་པའི་དང༌། དཔེའི་ཆེ་བ་ཉིད་དང༌། སེམས་མ་སྐྱེས་པ་སྨད་པ་དང༌། ངན་འགྲོ་དང༌། སྐྱོ་བས་མི་འཇིགས་པས་སེམས་བསྐྱེད་བསྔགས་པ་དང༌། ཉེས་པ་མི་བྱེད་པའི་སྡོམ་པ་ཐོབ་པ་དང༌། སེམས་མི་ལྡོག་པའི་རྒྱུ་དང༌། སྡུག་བསྔལ་གྱིས་མི་འཇིགས་པ་དང༌། སེམས་ཅན་མི་འདོར་བ་དང༌། ལེ་ལོ་སྨད་པ་སྟེ། ཆོས་བཅུ་གསུམ་པོ་འདིའི་སྒོ་ནས་ཐེག་པ་ཆེན་པོའི་སེམས་བསྐྱེད་རྒྱས་པར་གསུངས་པ་ཇི་ལྟ་བ་བཞིན་དུ་འདིར་ཡང་རྟོགས་པར་བྱའོ། །སྨོན་པ་དང་འཇུག་པའི་ཁྱད་པར་ཡང་རང་གཞན་གྱི་དབྱེ་བ་ལས་གཞན་དོན་འདོད་པ་སྨོན་པའི་སེམས་དང༌། བྱང་ཆུབ་འདོད་པ་འཇུག་པའི་སེམས་ཡིན་ཏེ། འཇིག་རྟེན་མགོན་པོ་སྦྱན་རས་གཟིགས་ཀྱི་ཞལ་སྔ་ནས། འཇུག་པའི་སེམས་དང་སྨོན་པ་ཡི་ནི་སེམས་ཉིད་དེ། །དེ་གཉིས་དག་ལ་དབྱེ་བ་དེ་ནི་ཅུང་ཟད་ཡོད། །འགྲོ་བར་འདོད་པ་དང་ནི་འགྲོ་བ་ཉིད་ཡིན་ཏེ། །གང་ཡང་བྱེ་བྲག་དེ་ནི་སེམས་ཀྱི་དབང་ཉིད་དོ། །འཁོར་བའི་བདེ་བ་སྨོན་པ་ཡི་ནི་སེམས་ཡིན་ཏེ། །དཔག་མེད་སྐལ་པ་རུ་ནི་གཞན་གྱི་དོན་ཕྱིར་རོ། །མ་ཉམས་བདེ་བ་འཇུག་པ་ཡི་ནི་སེམས་ཡིན་ལ། །མྱ་ངན་འདས་པའི་མཐར་ཐུག་དེ་བཞིན་བདག་གི་དོན། །ཞེས་གསུངས་པའི་ཕྱིར། འདིར་ཡང་དེ་དང་དགོངས་པ་གཅིག་ཏུ་གོ་དགོས་སོ། །དེ་ལྟར་དེས་ནི་སེམས་བསྐྱེད་ཀྱི་མཚན་ཉིད་བསྟན་ཟིན་ཏོ། ། བསྡུས་དང་རྒྱས་པའི་སྒོ་ནས་ཡུམ་གྱི་མདོ་བཞིན་བརྗོད་པ། དེ་ནི་ཡུམ་གྱི་མདོ་བཞིན་དུ། བསྡུས་དང་རྒྱས་པའི་སྒོ་ནས་བརྗོད་པ་ནི། གལ་ཏེ་ཁྱོད་སེམས་བསྐྱེད་ཀྱི་ངོ་བོ་འདོད་པ་ཡིན་པར་སྟོན་ན། དེ་ནི་ཉི་ཁྲི་སྣང་བ་རྗེས་འབྲང་དང་བཅས་པས་བཀག་གོ་ཞེ་ན། རྒྱལ་བས་བསྟན་པ་འབའ་ཞིག་གི་དབང་དུ་བྱས་ནས་མི་འཆད་ཅིང༌། རྒྱལ་བའི་རྒྱལ་ཚ་བ་རྗེས་འབྲང་གི་ལུགས་ལྟར་མི་སྟོན་ན། དེ་ལྟར་ཡིན་མོད་ཀྱང་འདིར་ནི་རྣལ་འབྱོར་པ་ཡང་བློ་ཁྱད་ཀྱིས་གོང་མ་གོང་མ་རྣམས་ཀྱིས་གནོད་པའི་ཚུལ་དུ་སྟོན་དགོས་པས། རྒྱལ་བ་དང་རྒྱལ་ཚབ་དག་གིས་གསུངས་པ་དེ་ཁོ་ན་ལྟར་བཤད་པར་བྱའོ། ། སྨོན་པ་སེམས་བསྐྱེད་ཀྱི་ངོ་བོ་གཞན་དོན་འདོད་པ་དེ་དང༌། འཇུག་པ་སེམས་བསྐྱེད་ཀྱི་ངོ་བོ་བྱང་ཆུབ་འདོད་པ་དེ་ནི་ཤེར་ཕྱིན་གྱི་མདོ་ཇི་ལྟ་བ་བཞིན་དུ་རྒྱས་འབྲིང་བསྡུས་པ་གསུམ་ཆར་ལས་བསྡུས་པའི་སྒོ་ནས་བརྗོད་པ་ནི་འདི་ལྟ་སྟེ། ཤཱ་རིའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ། །ཞེས་གསུངས་སོ། ། གནོད་འཇོམས་ལས། དེ་ལ་འབྲིང་དུ་བསྟན་པ་ནི་རྣམ་པ་བརྒྱད་དེ། གང་གི་ཕྱིར་བརྩོན་པར་བྱ་བ་དང༌། ཇི་ལྟར་བརྩོན་པར་བྱ་བ་དང༌། བརྩོན་པར་བྱེད་པ་རྣམས་ཀྱི་མཚན་ཉིད་གང་ཡིན་པ་དང༌། བརྩོན་པར་བྱེད་པ་རྣམས་ཀྱི་རབ་ཏུ་དབྱེ་བ་དང༌། བརྩོན་པར་གདམས་པ་གང་ཡིན་པ་དང༌། བརྩོན་པའི་ཕན་ཡོན་གང་ཡིན་པ་དང༌། བརྩོན་པའི་རབ་ཏུ་དབྱེ་བ་གང་ཡིན་པ་དང༌། བཤད་པ་འདིའི་གཏན་ལ་དབབ་བ་གང་ཡིན་པ་དང་བརྒྱད་བསྟན་ཏོ། །ཞེས་ གསུངས་པ་ལྟར་སེམས་བསྐྱེད་རྒྱས་བཤད་ནས། སྐབས་དང་པོ་ནི་ཆོས་བརྒྱད་པོ་དེས་འཆད་པ་དང་པོ་གང་གི་ཕྱིར་བརྩོན་པར་བྱ་བ་ནི། གཞན་དོན་འདོད་པ་དང་བྱང་ཆུབ་འདོད་པ་དེ་དང་དེ་ནི་ཡུམ་གསུམ་ཆར་ལས་རྒྱས་པའི་སྒོ་ནས་བརྗོད་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པའི་ཡེ་ཤེས་རྣམ་པ་ཐམས་ཅད་ཀྱི་མཆོག་དང་ལྡན་པ་མངོན་པར་རྫོགས་པར་བྱང་ཆུབ་པར་འདོད་པ་དང༌། ལམ་གྱི་རྣམ་པར་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པ་དང༌། ཐམས་ཅད་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པ་དང༌། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའི་རྣམ་པར་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ། །ཞེས་པ་ནས་ཤཱ་རའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྤྱོད་ལམ་ལ་སློབ་པར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསླབ་པར་བྱའོ། །ཞེས་པའི་བར་དུ་སེམས་བསྐྱེད་རྒྱས་བཤད་ཀྱི་སྐབས་སུ་འདོད་པ་ཞེས་པའི་ཚིག་འདི་དགུ་བཅུ་རྩ་ལྔ་དང་མདོར་བསྟན་གྱི་སྐབས་སུ་གཅིག་སྟེ། ཁྲི་བརྒྱད་སྟོང་པར་འདོད་པ་ཞེས་པའི་ཚིག་འདི་དགུ་བཅུ་རྩ་དྲུག་འགྱུར་ཞིང༌། བར་མ་དང་རྒྱས་པ་གཉིས་སུ་ཡང་སྐབས་དེ་དང་དེར་འདོད་པ་ཞེས་པའི་ཚིག་འདི་ཉིད་ཡང་དང་ཡང་དུ་བྱུང་བའི་ཕྱིར་རོ། །དེས་ན་རྒྱལ་བས་སེམས་བསྐྱེད་འདོད་པ་ཡིན་པར་གསུངས་ཤིང༌། གསུངས་པ་དེ་ཉིད་ཡིན་ལུགས་ལྟར་སྡུད་པར་མཛད་པ་པོ་རྒྱལ་ཚབ་གྱིས། ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པའི་ཕྱིར་རྒྱལ་བའི་དགོངས་པ་སྟོན་པ་ལ་རྒྱལ་ཚབ་ལས་མཁས་པ་ནི་སུ་ཡང་མེད་དོ། །འཕགས་པ་ཐོགས་མེད་ཀྱིས་ཀྱང༌། སེམས་བསྐྱེད་འདོད་པ་ཡིན་པར་གསུངས་ཏེ། བྱང་ས་ལས། དེ་ལ་རང་གི་མཐུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པར་གྱུར་པ་གང་ཡིན་པ་དེ་ནི་བྱང་ཆུབ་སེམས་སྐྱེ་པའི་ནང་གི་སྟོབས་ཞེས་བྱའོ། །གཞན་གྱི་མཐུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འདོད་པ་བསྐྱེད་པ་གང་ཡིན་པ་དེ་ནི་བྱང་ཆུབ་སེམས་དཔའི་སེམས་བསྐྱེད་བའི་ནང་གི་སྟོབས་ཞེས་སོ། །དབུ་མ་པ་ཆེན་པོ་སློབ་དཔོན་དབྱིག་གཉེན་ཀྱིས་ཀྱང༌། སེམས་ཞེས་བྱ་བ་ནི་འདིར། མངོན་པར་འདོད་པ་ལ་བྱ་སྟེ། བྱང་ཆུབ་སེམས་དཔའི་ཆོས་ཐམས་ཅད་དང་སངས་རྒྱས་ཀྱི་ཆོས་ཐམས་ཅད་ལ་མངོན་པར་འདོད་པ་སྐྱེས་པ་བསྟན་པ་ལ་སེམས་པའི་ལེའུ་ཞེས་བྱའོ། །ཞེས་གསུངས་སོ། །གཞན་ཡང་སློབ་དཔོན་ཤན་ཏི་བ་སོགས་དང༌། ཀ་མ་ལ་ཤི་ལ་དང༌། བཙུན་པ་ངོ་བོ་ཉིད་མེད་པ་རྣམས་ཀྱིས་ཀྱང་བཀའ་འགྲེལ་སྙིང་པོ་མཆོག་ལ་སོགས་པ་དང་བསྒོམ་རིམ་དང་མདོ་སྡེ་རྒྱན་གྱི་འགྲེལ་བཤད་རྣམས་སུ་སེམས་བསྐྱེད་ཀྱི་ངོ་བོ་འདོད་པ་ཡིན་པར་གསུངས་སོ། །པཎ་ཆེན་ཤཱཀྱ་ཤྲིའི་ཞལ་སྔ་ནས་ཀྱང༌། སེམས་ནི་རྟག་པར་བྱང་ཆུབ་འདོད་ཅེས་གསུངས་སོ། །དེས་ན་རྒྱལ་བ་རྒྱལ་ཚབ་སྲས་དང་བཅས་པ་དེ་སྙེད་དང་འགལ་པའི་བཤད་པ་ནི་གང་ན་འདུག་ཀྱང་མཁས་པ་རྣམས་ཀྱིས་དེ་ལ་ཡིད་རྟོན་པར་མི་རིགས་སོ། །ཉི་ཁྲི་སྣང་བ་རྩོམ་པ་པོ་དེ་སློབ་དཔོན་དབྱིག་གཉེན་གྱི་དངོས་སློབ་བཞི་ཡོད་པའི་ནང་ནས་ཕར་ཕྱིན་རང་ལས་མཁས་པ་ཡིན་ཞེས་ཟེར་བ་ཡང་གྲགས་པ་ཙམ་དུ་བས་གྱིས། དོན་ལ་དེ་ལྟར་མི་གནས་པར་སྣང་སྟེ། ཉི་ཁྲི་སྣང་བའི་འཆད་ལུགས་དེ་ལ་སློབ་དཔོན་དབྱིག་གཉེན་གྱི་དྲི་ཙམ་ཡང་མི་བྲོ་བར་བཤད་པ་ཤ་སྟག་ཏུ་བྱུང་བའི་ཕྱིར་རོ། །གལ་ཏེ་དངོས་སློབ་ཡིན་ཡང༌། དབུ་སེམས་ཀྱི་ཁྱད་པར་ལས་དེ་ལྟར་གྱུར་ཏོ། ། ཞེ་ན། ངེས་དོན་ལ་དེ་ལྟ་ཡིན་པར་འདོད་དུ་ཆུག་ན་ཡང་དྲང་དོན་ལ་ཉི་ཁྲི་སྣང་པ་རྩོམ་པ་པོ་དེ་སློབ་དཔོན་དབྱིག་གཉེན་ལས་མཁས་པ་མི་སྲིད་པའི་ཕྱིར་རོ། །དེ་དང་མཐུན་པར་འཆད་འཐད་དོ། ། དེས་ན་ཉི་ཁྲི་སྣང་བ་རྩོམ་པ་པོ་ནི་དངོས་སློབ་མ་ཡིན་པ་ཙམ་དུ་མ་ཟད་ཀྱི། སློབ་དཔོན་དབྱེག་གཉེན་དང་དེ་གཉིས་ཀྱི་བར་དུ་ཡུམ་གྱི་མདོ་སྡེའི་བླ་མ་བརྒྱུད་པའི་རིམ་པ་ཡང་འཆད་པར་གསལ་ལོ། །སློབ་དཔོན་གསེར་གླིང་བ་ཆོས་གྲགས་ཀྱིས། མདོ་སྡེའི་བླ་མ་གཅིག་ནས་གཅིག་ཏུ་བརྒྱུད་པ་ནུབ་པས། ཞེས་གསུངས་པའི་ཤེས་པར་བྱེད་པ་ལས་སོ། །དེས་ན་སློབ་དཔོན་དབྱིག་གཉེན་དང་ཕྱོགས་ཀྱིས་གླང་པོའི་བར་དུ་ནི་བླ་མ་བརྒྱུད་པའི་རིམ་པ་མ་ནུབ་པ་སྟེ། དེའི་བར་ལ་མདོ་ཇི་ལྟ་བ་བཞིན་དུ་ཆོས་སྐད་དང་འཆད་ལུགས་གཅིག་ཏུ་བྱུང་ལ། དེའི་རྗེས་ལ་ཉི་ཁྲི་སྣང་བ་ནས་བརྩམས་དེ་སྔར་གྱི་བཤད་སྲོལ་དེ་མེད་པར་ཕྱིས་ཀྱི་འཆད་པ་པོ་རྣམས་གཞུང་གཅིག་ལ་ཡང་བཤད་པ་ཕན་ཚུན་འགལ་བ་སྣ་ཚོགས་དང༌། གྲུབ་མཐའ་རྐང་ཚུགས་པ་མེད་པས། ཡུམ་གྱི་དོན་ལ་འདོད་ལུགས་དང་ཆོས་སྐད་མི་གཅིག་པའི་གྲུབ་མཐའ་འགལ་བ་དུ་མར་སོང་ཞིང་ཐགས་འཁྲུགས་པ་བཞིན་དུ་གྱུར་པའི་ཕྱིར་རོ། །ཉི་ཁྲི་སྣང་པའི་རྗེས་སུ་འབྲང་བར་འདོད་པའི་སློབ་དཔོན་སེང་བཟང་ལ་སོགས་པ་ཡང་འཇུག་བསྒྲུབ་དང༌། ས་ཡོངས་སུ་སྦྱོར་བ་དང༌། ངེས་འབྱུང་སྒྲུབ་པ་དང༌། བསྔོ་བ་ལ་སོགས་པའི་སྐབས་དུ་མར་དེ་དང་མི་མཐུན་ཞིང་དེ་དང་འགལ་བ་དུུ་མ་སྨྲ་ལ་མཁས་པའི་དྲེགས་པ་ས་སྔ་མ་སྔ་མ་བཞིན་སུན་ཕྱུང་ཞིང་རང་འདོད་འབའ་ཞིག་ལ་རྗེས་འཇུག་རྣམས་བཀྲི་བར་འདོད་པའི་བཤད་ལུགས་ཁོ་ན་བྱེད་ན། རྩོམ་པ་པོ་ཕོ་མཉམ་རང་སྐད་སོ་སོར་འདོན་པ་དེ་རྣམས་ལས། རྟོག་པ་ལྡན་པ་སུ་ཞིག་གང་ཟག་རྗེས་སུ་འཇུག་པར་བགྱི། ཐམས་ཅད་དང་དུ་ལེན་པར་ནི་མི་རིགས་དེ་དོན་གཅིག་ལ་འགལ་པ་སྣ་ཚོགས་མི་སྲིད་པའི་ཕྱིར་རོ། །གལ་ཏེ་དོན་ལ་དེ་ལྟ་ཡིན་ཡང་ཁོ་བོ་ཅག་ནི་སློབ་དཔོན་ཐ་དད་ཀྱི་དགོངས་པ་ཐ་དད་དང་འདི་བཤད་དང་འདི་ཟེར་འབའ་ཞིག་ལྷུར་བྱེད་པས་ཐམས་ཅད་དང་དུ་ལེན་ཏོ། །ཞེ་ན། ཚིག་འབྲུ་ཙམ་ལ་ཆགས་པ་ཁྱེད་ལ་དེ་རིགས་མོད་ཀྱི་དོན་ལ་རྟོན་པ་རྣམས་ཀྱི་བཞད་གད་ཀྱི་གནས་སུུ་མ་གྱུར་རམ། དེས་ན་ཉི་ཁྲི་སྣང་བ་ནས་ཆོས་སྐད་དེ་འཁྱོར་བའི་ཕྱིར་དེ་ནི་སློབ་དཔོན་གྱི་དངོས་སློབ་ཕར་ཕྱིན་རང་ལས་མཁས་པ་མ་ཡིན་ནོ། །གལ་ཏེ་ཉི་ཁྲི་སྣང་བ་རྩོམ་པ་པོ་འདི་ལ་ནོར་པ་གཏན་ནས་མེད་ཅིང༌། འདི་འཕགས་པ་ཡང་ཡིན་ན། ཞེས་འཇུག་པར་འདོད་པའི་སློབ་དཔོན་སེང་བཟང་སོགས་དེ་དང་འགལ་བ་དུ་མ་ཅིའི་ཕྱིར་སྨྲ། ནོར་པ་དུ་མ་ཡོད་ན་འདི་འཕགས་པ་ཇི་ལྟར་ཡིན། ཚོགས་ལམ་ཆེན་པོ་ཐོབ་ནས་ཀྱང༌། དེ་བཞིན་གཤེགས་པས་དངོས་སུ་འདོམས་པར་བྱེད་ནས་དང་པོ་ཕན་ཆད་ཆོས་དང་ཆོས་ཉིད་ཀྱི་ལུགས་མངོན་སུམ་དུ་གྱུར་ཅིང་ཡང་དག་པའི་ལྟ་བ་ཐོབ་པ་ཟག་པ་མེད་པའི་ཤེས་རབ་མངའ་བ་སངས་རྒྱས་ལ་དངོས་སུ་ཆོས་གསན་པ་དེ་ཇི་ལྟར་ནོར་པ་སྨྲ་པ་འགྱུར། མདོ་རྒྱུད་ཡང་དག་གི་ཤེས་བྱེད་ངེས་པ་ཅན་མ་མཐོང་བར་སློབ་དཔོན་སེང་བཟང་གིས་འཕགས་པར་ལུང་བསྟན་པ་ཙམ་ལ་ཡང་རྟོག་དཔྱོད་ལྡན་པ་སུ་ཞིག་ཡིད་ཆེས། སློབ་དཔོན་སེང་བཟང་གིས་ནི་སློབ་དཔོན་དབྱིག་གཉེན་དངོས་སྨྲ་ཡིན་པར་ལུང་བསྟན། བཙུན་པ་གྲོལ་སྡེ་དད་པའི་ས་ལ་གནས་པར་ལུང་བསྟན། བྱང་ཆུབ་སེམས་དཔའ་རྟག་ཏུ་སྔོན་ཤེར་ཕྱིན་ཚོལ་བ་དེའི་ཚེ་ཚོགས་ལམ་བར་ལུང་བསྟན་ཏེ། སངས་རྒྱས་དང་འགལ་ལོ། །ང་འམ་ང་ལྟ་བུས་གང་ཟག་གི་ཚོད་བཟུང་གིས་གང་ཟག་གི་ཚོད་བཟུང་བར་མི་བྱ་སྟེ་གང་ཟག་གིས་གང་ཟག་གི་ཚོད་བཟུང་ན་ཉམས་པར་འགྱུར་རོ། །ཞེས་ཡང་དང་ཡང་དུ་གསུང་བཞིན་དུ་དེ་ལྟར་བྱེད་པ་དེ་སངས་རྒྱས་ཀྱི་བཀའ་བཞིན་བྱེད་པ་ཇི་ལྟར་ཡིན། སློབ་དཔོན་དབྱིག་གཉེན་ནི་དངོས་སྨྲ་མ་ཡིན་པར་ཁོ་རང་གི་གསུང་རབ་མཐོང་པས་ཤེས་སོ། ། དེས་ན་ཉི་ཁྲི་སྣང་བ་རྗེས་འབྲང་དང་བཅས་པའི་ཐོག་མཐའ་བར་གསུམ་ན་རྒྱལ་བ་རྒྱལ་ཚབ་དང་མི་མཐུན་པའི་བཤད་་་པ་མང་དུ་འདུག་པ་རྣམས་ལ་མཁས་པ་ལུང་རིགས་ལ་སྦྱངས་པ་རྣམས་ཀྱིས་བསྲེགས་བཅད་བདར་བས་གསེར་བཞིན་དུ་བརྟག་དགོས་སོ། །འདིར་ཡང་སེམས་བསྐྱེད་མདོར་བསྟན་དང་རྒྱས་བཤད་གཉིས་ཀྱི་བར་དུ་སྦྱིན་པར་བྱ་བ་དང༌། གཏོང་པ་པོ་དང༌། ལེན་པ་པོ་མི་དམིགས་པའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱའོ། །ཞེས་པ་ནས། བཏང་སྙོམས་ཆེན་པོ་ཡོངས་སུ་རྫོགས་པར་བྱའོ་ཞེས་པའི་པར་གྱི་མདོ་རྣམས་བྱུང་བ་སེམས་བསྐྱེད་ཀྱི་མདོར་སྦྱར་རྒྱུ་མ་ཡིན་ཡང༌། ཉི་ཁྲི་སྣང་བ་ལ་སོགས་ཀྱིས་སྦྱར་བ་ནི་མདོ་དང་མི་འགྲིག་ཅིང༌། སྐབས་གང་དང་སྦྱར་བའི་སེམས་བསྐྱེད་དེ་དང་ཡང་མི་འགྲོགས་པར་སྣང་ངོ༌། །ཤེར་ཕྱིན་སོགས་པའི་ཆོས་ཀྱི་མངའ་བདག་ཆེན་པོ་སློབ་དཔོན་དབྱིག་གཉེན་གྱིས་མདོ་དེ་རྣམས་སེམས་བསྐྱེད་སྟོན་པའི་མདོར་མ་གསུངས་ཤིང༌། མདོ་དེ་རྣམས་ཀྱི་བྱང་ཆུབ་སེམས་དཔའི་སྦྱོད་པ་རྣམ་པ་བཞི་སྟོན་བར་བཀྲལ་དེ། ཇི་སྐད་དུ། གནོད་འཇོམས་ལས། འདིས་ནི་སྤྱོད་པ་བཞི་བསྟན་པ་ཡིན་ནོ། །རྣམ་པར་མི་རྟོག་པའི་ཕ་རོལ་ཏུ་ཕྱིན་པའི་སྤྱོད་པ་དང༌། ཉེ་བའི་ཉོན་མོངས་པ་མེད་པའི་བྱང་ཆུབ་ཀྱི་ཕྱོགས་དང་མཐུན་པའི་སྤྱོད་པ་དང༌། གནོད་པ་མེད་པར་སེམས་ཅན་ཡོངས་སུ་སྨིན་པར་བྱ་བའི་སྤྱོད་པ་དང༌། གོས་པ་མེད་པར་སངས་རྒྱས་ཀྱི་ཆོས་ཐམས་ཅད་ཡོངས་སུ་སྨིན་པར་བྱ་བའི་སྤྱོད་པའོ། །ཞེས་དང༌། སྤྱོད་པ་བཞི་སྟོན་པའི་མདོ་དེ་རྣམས་ཀྱི་བཤད་པ་ཚར་ནས་སེམས་བསྐྱེད་རྒྱས་བཤད་ལ་འཇུག་པའི་ཚེ་ཡང་དེ་ཉིད་ལས། གང་སྔར་ཆོས་ཐམས་ཅད་དུ་མངོན་པར་རྫོགས་པར་བྱང་ཆུབ་པར་འདོད་པས་ཞེས་བྱ་བ་རྨོད་པས་ནི་བྱང་ཆུབ་སེམས་དཔའི་བསམ་པ་བསྟན་ཏོ། །དེ་ནི་བསམ་པ་དེ་ཉིད་ཀྱི་བསམ་པའི་རྒྱུ་དང་འབྲས་བུ་དང་བཅས་པ་ལ་སོགས་པས་རྒྱས་པར་རྣམ་པར་ཕྱེ་སྟེ་བསྟན་པར་བཞེད་ནས། ཞེས་གསུངས་པ་ལྟར་མདོ་དང་འགྲིག་ཅིང་ལེགས་པར་སྣང་ངོ༌། །དེས་ན་སེམས་བསྐྱེད་འདོད་པ་ཡིན་པ་ལ་གནོད་བྱེད་ཡང་དག་མེད་ཅིང་ཤེས་བྱེད་རྣམ་དག་ནི་ཤིན་ཏུ་མང་ངོ༌། ། དེ་རྣམས་ཀྱིས་ནི་བསྡུས་པ་དང་རྒྱས་པའི་སྒོ་ནས་ཡུམ་གྱི་མདོ་བཞིན་དུ་བརྗོད་པ་བཤད་ཟིན་ཏོ། ། སེམས་བསྐྱེད་ཀྱི་དབྱེ་བ་མདོ་གཞན་དང་སྦྱར་ནས་བསྟན་པ། ད་ནི་དཔེའི་ཆེ་བ་ཉིད་བསྟན་པའི་ཕྱིར། དཔེ་ཉི་ཤུ་རྩ་གཉིས་དང་ལྡན་པའི་སེམས་བསྐྱེད་ཀྱི་དབྱེ་བ་མདོ་གཞན་དང་སྦྱར་ནས་བསྟན་པ་ནི་འདི་ལྟ་སྟེ། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང༌། །ཡིད་བཞིན་ནོར་བུ་ཉི་མ་གླུ། ། རྒྱལ་པོ་མཛོད་དང་ལམ་བོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། ། རྣམ་པ་ཉི་ཤུ་རྩ་གཉིས་སོ། །ཞེས་པ་སློབ་དཔོན་དབྱིག་གཉེན་གྱི་ཞལ་ནས། དཔེ་ཉི་ཤུ་རྩ་གཉིས་དང་ལྡན་པའི་སེམས་བསྐྱེད་པ་འདི་ནི་འཕགས་པ་བློ་གྲོས་མི་ཟད་པས་བསྟན་པའི་མདོ་ལས་མི་ཟད་པ་ཉིད་འབྱུང་བར་སྦྱར་བར་ཁུང་དུ་ཆུད་པར་བྱའོ། །ཞེས་གསུངས་སོ། །དེས་ན་དེ་ཉིད་དང་སྦྱོར་བ་ནི་མདོ་དེ་ལས། དང་པོ་བྱང་ཆུབ་ཀྱི་སེམས་མི་ཟད་དང༌། གཉིས་པ་བསམ་པ་དང༌། གསུམ་པ་སྦྱོར་བ་དང༌། བཞི་པ་ལྷག་པའི་བསམ་པ་དང༌། ལྔ་པ་ནས་བཅུ་པའི་བར་དུ་སྦྱིན་སོགས་ཕར་ཕྱིན་དྲུག་མི་ཟད་པ་དང༌། བཅུ་གཅིག་པ་ཚད་མེད་པ་བཞི་དང༌། བཅུ་གཉིས་པ་མངོན་ཤེས་ལྔ་དང༌། བཅུ་གསུམ་པ་བསྡུ་བའི་དངོས་པོ་བཞི་དང༌། བཅུ་བཞི་པ་སོ་སོ་ཡང་དག་པར་རིག་པ་བཞི་དང༌། བཅོ་ལྔ་པ་རྟོན་པ་བཞི་དང༌། བཅུ་དྲུག་པ་ཚོགས་གཉིས་དང༌། བཅུ་བདུན་པ་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང༌། བཅོ་བརྒྱད་པ་ཞི་གནས་དང་ལྷག་མཐོང་དང༌། བཅུ་དགུ་པ་གཟུངས་དང་སྤོབ་པ་དང༌། ཉི་ཤུ་པ་ཆོས་ཀྱི་མདོ་བཞི་དང༌། ཉེར་གཅིག་པ་བགྲོད་པ་གཅིག་པའི་ལམ་དང༌། ཉེར་གཉིས་པ་ཐབས་མི་ཟད་པ་ཞེས་རེ་རེ་ལ་ཡང་མི་ཟད་པ་རེ་རེ་སྟེ་མི་ཟད་པ་བརྒྱད་ཅུ་འབྱུང་ངོ༌། །མི་ཟད་པ་བརྒྱད་ཅུ་པོ་དེ་ཉེར་གཉིས་སུ་བསྡུས་ནས་དཔེ་ཉེར་གཉིས་དང་ལྡན་པའི་སེམས་བསྐྱེད་དང་སྦྱར་བ་འདི་ལྟ་སྟེ། གཞན་དོན་གྱི་ཕྱིར་བྱང་ཆུབ་འདོད་པ་དེ་ཡང་གི་སྒྲས་ཡུམ་ལས། གཞན་འཕགས་པ་བློ་གྲོས་མི་ཟད་པས་བསྟན་པའི་མདོ་ལས་བྱུང་བ་ཡང༌། དང་བོ་བྱང་ཆུབ་ཀྱི་སེམས་ནི་ས་དང་འདྲ་སྟེ། སངས་རྒྱས་ཀྱི་ཆོས་ཐམས་ཅད་དང་དེའི་ཚོགས་འཕེལ་བའི་རྟེན་དུ་གྱུར་པའི་ཕྱིར་རོ། །གཉིས་པ་བསམ་པ་དང་ལྡན་པ་ནི་གསེར་བཟང་པོ་དང་འདྲ་སྟེ། ཕན་དང་བདེ་བའི་བསམ་པ་གཞན་དུ་མི་འགྱུར་བའི་ཕྱིར་རོ། །གསུམ་པ་སྦྱོར་བ་ལྡན་པ་ནི། ཡར་ངོ་ཚེས་པའི་ཟླ་་བ་དང་འདྲ་སྟེ། དགེ་བའི་ཆོས་འཕེལ་བར་འགྱུར་བའི་ཕྱིར་རོ། །བཞི་བ་ལྷག་པའི་བསམ་པ་དང་ལྡན་པ་ནི་མེ་དང་འདྲ་སྟེ། ཤིང་བསྣན་པའི་མེ་བཞིན་དུ་རྟོགས་པ་གོང་ནས་གོང་དུ་ཁྱད་པར་དུ་རྟོགས་ཤིང་འགྲོ་བས་ལྷག་པའི་བསམ་པ་ཡིན་པའི་ཕྱིར་རོ། །ལྔ་པ་སྦྱིན་པའི་ཕར་ཕྱྀན་དང་ལྡན་པ་ནི། གཏེར་ཆེན་པོ་དང་འདྲ་སྟེ། ཟང་ཟིང་ལོངས་སྤྱོད་ཀྱིས་སེམས་ཅན་དཔག་ཏུ་མེད་པ་ཚིམ་པར་བྱེད་པ་དང༌། མི་ཟད་པའི་ཕྱིར་རོ། །དྲུག་པ་ཚུལ་ཁྲིམས་ཀྱི་ཕར་ཕྱིན་དང་ལྡན་པ་ནི། རིན་ཆེན་གྱི་འབྱུང་གནས་དང་འདྲ་སྟེ། དེ་ལས་ཡོན་ཏན་རིན་པོ་ཆེ་ཐམས་ཅད་འབྱུང་བའི་ཕྱིར་རོ། །བདུན་པ་བཟོད་པའི་ཕར་ཕྱིན་དང་ལྡན་པ་ནི་རྒྱ་མཚོ་དང་འདྲ་སྟེ། ཉམ་ང་བ་འབྱུང་བ་ཐམས་ཅད་ཀྱིས་མི་འཁྲུགས་པའི་ཕྱིར་རོ། །བརྒྱད་པ་བརྩོན་འགྲུས་ཀྱི་ཕར་ཕྱིན་དང་ལྡན་པ་ནི། རྡོ་རྗེ་དང་འདྲ་སྟེ། མི་ཤིག་པ་ཉིད་ཀྱིས་སྲ་བའི་ཕྱིར་རོ། །དགུ་པ་བསམ་གཏན་གྱི་ཕར་ཕྱིན་དང་ལྡན་པ་ནི་རིའི་རྒྱལ་པོ་དང་འདྲ་སྟེ། གཡེང་བས་མི་གཡོ་བའི་ཕྱིར་རོ། །བཅུ་པ་ཤེས་རབ་ཀྱི་ཕར་ཕྱིན་དང་ལྡན་པ་ནི་སྨན་གྱི་རྒྱལ་པོ་དང་འདྲ་སྟེ། སྒྲིབ་པ་གཉིས་གྱི་ནད་རབ་ཏུ་ཞི་བར་བྱེད་པའི་ཕྱིར་རོ། ། བཅུ་གཅིག་པ་ཚད་མེད་བཞི་དང་ལྡན་པ་ནི་དགེ་བའི་བཤེས་གཉེན་དང་འདྲ་སྟེ་གནས་སྐབས་ཐམས་ཅད་དུ་སེམས་ཅན་ཐམས་ཅད་ཡལ་བར་མི་འདོར་བའི་ཕྱིར་རོ། །བཅུ་གཉིས་པ་མངོན་ཤེས་ལྔ་དང་ལྡན་པ་ནི་ཡིད་བཞིན་གྱི་ནོར་བུ་དང་འདྲ་སྟེ། ཇི་ལྟར་མོས་པ་བཞིན་དེའི་ཕྱིར་འབྲས་བུ་འབྱོར་བའི་ཕྱིར་རོ། །བཅུ་གསུམ་པ་བསྡུ་བའི་དངོས་པོ་བཞི་དང་ལྡན་པ་ནི་ཉི་མ་དང་འདྲ་སྟེ། གདུལ་བའི་ལོ་ཏོག་ཡོངས་སུ་སྨིན་པར་བྱེད་པའི་ཕྱིར་རོ། །བཅུ་བཞི་པ་སོ་སོ་ཡང་དག་པར་རིག་པ་བཞི་དང་ལྡན་པ་ནི་དྲི་ཟའི་གླུ་དབྱངས་སྙན་པ་དང་འདྲ་སྟེ། གདུལ་བྱ་འདུན་པར་བྱེད་པའི་ཆོས་སྟོན་པའི་ཕྱིར་རོ། །བཅོ་ལྔ་པ་རྟོན་པ་བཞི་དང་ལྡན་པ་ནི་རྒྱལ་པོ་དང་འདྲ་སྟེ་ཆུད་མི་ཟ་བའི་རྒྱུ་ཡིན་པའི་ཕྱིར་རོ། །བཅུ་དྲུག་པ་ཚོགས་གཉིས་དང་ལྡན་པ་ནི་མཛོད་དང་འདྲ་སྟེ། བསོད་ནམས་དང་ཡེ་ཤེས་ཀྱི་ཚོགས་མང་པོའི་མཛོད་ཀྱི་གནས་ཡིན་པའི་ཕྱིར་རོ། །བཅུ་བདུན་པ་བྱང་ཆུབ་ཀྱི་ཕྱོགས་ཀྱི་ཆོས་དང་ལྡན་པ་ནི་ལམ་པོ་ཆེ་དང་འདྲ་སྟེ། འཕགས་པའི་གང་ཟག་ཐམས་ཅད་གཤེགས་ཤིང་རྗེས་སུ་གཤེགས་པའི་ཕྱིར་རོ། །བཅོ་བརྒྱད་པ་ཞི་གནས་དང་ལྷག་མཐོང་དང་ལྡན་པ་ནི་བཞོན་པ་དང་འདྲ་སྟེ། བདེ་བླག་ཏུ་ཁྱེར་བའི་ཕྱིར་རོ། །བཅུ་དགུ་པ་གཟུངས་དང་སྦོབས་པ་དང་ལྡན་པ་ནི་བཀོད་མའི་ཆུ་དང་འདྲ་སྟེ། ཆུ་འཛིན་ཅིང་མི་ཟད་པར་འབྱིན་པ་དང་འདྲ་བར་ཐོས་པ་དང་མ་ཐོས་པའི་ཆོས་ཀྱི་ཚིག་དང་དོན་འཛིན་ཅིང་མི་ཟད་པར་འབྱིན་པའི་ཕྱིར་རོ། །ཉི་ཤུ་པ་ཆོས་ཀྱི་སྡོམ་བཞི་དང་ལྡན་པ་ནི་ཀུན་དགའི་སྒྲ་སྙན་དང་འདྲ་སྟེ། ཐར་པ་འདོད་པའི་གདུལ་བྱ་རྣམས་ལ་སྙམ་པ་ཐོབ་པར་བྱེད་པའི་ཕྱིར་རོ། །ཉེར་གཅིག་པ་བགྲོད་པ་གཅིག་པའི་ལམ་དང་ལྡན་པ་ནི་ཆུ་བོའི་རྒྱུན་དང་འདྲ་སྟེ། མི་སྐྱེ་བའི་ཆོས་ལ་བཟོད་པ་ཐོབ་པ་ན་རང་གི་ངང་གིས་འབྱུང་བའི་ཕྱིར་རོ། །བགྲོད་པ་གཅིག་པ་ཉིད་པ་ནི་ས་དེར་གཏོགས་བའི་བྱང་ཆུབ་སེམས་དཔའི་རྣམས་ཀྱི་བྱ་བ་བྱེད་པ་ཐ་མི་དད་པའི་ཕྱིར་རོ། །ཉེར་གཉིས་པ་ཐབས་མཁས་པ་མི་ཟད་པ་དང་ལྡན་པ་ནི་སྤྲིན་དང་འདྲ་སྟེ། ཇི་ལྟར་སྣོད་ཀྱི་འཇིག་རྟེན་གྱི་འབྱོར་བ་ཐམས་ཅད་སྤྲིན་ལས་བྱུང་བ་ལྟར་དགའ་ལྡན་གྱི་གནས་ན་བཞུགས་པ་ལ་སོགས་པ་སྟོན་པའི་སྒོ་ནས་སེམས་ཅན་ཐམས་ཅད་ཀྱི་དོན་གྱི་བྱ་བ་རྣམས་དེ་ལ་རག་ལས་པའི་ཕྱིར་རོ། །རྒྱལ་སྲས་རྣམས་ཀྱི་སེམས་བསྐྱེད་པ། །སྤྲིན་དང་འདྲ་བར་བསྟན་པ་སྟེ། །དེ་ཕྱིར་དེ་ལྟར་ཡོན་ཏན་ཕྱུག །སེམས་ནི་དགའ་བས་ཡང་དག་བསྐྱེད། །ཅེས་གསུངས་པ་ལྟར། ས་གསེར་ལ་སོགས་་པ་ནས་སྒྲ་སྙན་ཆུ་བོ་སྤྲིན་གྱི་དཔེ་རྣམས་ཀྱིས་སེམས་བསྐྱེད་པ་རྣམས་པ་ཉི་ཤུ་རྩ་གཉིས་བསྟན་པས་སོ། །སྔར་བཤད་པའི་ཆོས་བརྒྱད་ལས་གང་གི་ཕྱིར་བརྩོན་པར་བྱ་བ་ཞེས་པ་དེ་སོང་ངོ༌། ། དེ་རྣམས་ཀྱིས་རྣམ་མཁྱེན་གྱི་སྐབས་ཀྱི་ཆོས་བཅུ་ལས་དང་པོ་སེམས་བསྐྱེད་དཔེ་དང་ཞེས་པ་བཤད་ཟིན་ཏོ། ། ༢༽གདམས་ངག་སྤྱིར་བསྟན་པ། ད་ནི་གཉིས་པ་གདམས་ངག་རྗེས་སུ་བསྟན་པ་ལ་ཚིགས་སུ་བཅད་པ་གཉིས་དེ། སྒྲུབ་དང་བདེན་པ་རྣམས་དང་ནི། །སངས་རྒྱས་ལ་སོགས་དཀོན་མཆོག་གསུམ། །མ་ཞེན་ཡོངས་སུ་མི་ངལ་དང༌། །ལམ་ནི་ཡོངས་སུ་འཛིན་པ་དང༌། །སྦྱན་ལྔ་དང་ནི་མངོན་ཤེས་ཀྱི། །ཡོན་ཏན་དྲུག་དང་མཐོང་ལམ་དང༌། །བསྒོམ་ཞེས་བྱ་ལ་གདམས་ནི། །བཅུ་ཡི་བདག་ཉིད་ཤེས་པར་བྱ། །ཞེས་པ་ཇི་ལྟར་བརྩོན་པར་བྱ་བ་འདི་ལ་དོན་བཞིའི་སྒོ་ནས་ཤེས་པར་བྱས་ཏེ། གདམས་པར་བྱ་བའི་ཡུལ་དུ་གདུལ་བྱའི་གང་ཟག་ལ་བསོད་ནམས་འདོམས་པར་བྱེད་པ་པོའི་སློབ་དཔོན་གྱིས། གདམས་པར་བྱ་བའི་དོན། འདོམས་པར་བྱེད་པའི་ཚིག་གིས་དེ། ཆོས་ཀྱི་སྒོ་ལ་རྣམ་པར་གནས་པ་ལ། །དེ་བཞིན་གཤེགས་རྟག་མངོན་སུམ་འདོམས་མཛད་ཅིང༌། །ཅོ་ནས་འདྲེན་བཞིན་ཉེས་པའི་ཚང་ཚིང་ནས། །ཚན་གྱིས་དྲངས་དེ་བྱང་ཆུབ་ལ་འགོད་དོ། །ཞེས་གསུངས་པའི་ཚུལ་གྱིས་སོ། །དེ་ལ་གདུལ་བྱའི་གང་ཟག་ནི་སེམས་དང་པོ་བསྐྱེད་པ་ནས་བཟུང་པའི་བྱང་ཆུབ་སེམས་དཔའ་རྣམས་སོ། །འདོམས་པར་བྱེད་པ་པོའི་སློབ་དཔོན་ནི། སངས་རྒྱས་དང༌། བྱང་ཆུབ་སེམས་དཔའ་དང༌། ཉན་ཐོས་ཀྱང་རུང་སྟེ། མདོར་ན་ཕར་ཕྱིན་དྲུག་ཕྱིན་ཅི་མ་ལོག་པར་སྟོན་པ་གང་ཡིན་པའོ། །རྩེ་སྦྱོར་གྱི་རྟགས་ཀྱི་སྐབས་ཀྱི་མདོ་ཉིད་ལས་རབ་འབྱོར་སངས་རྒྱས་བཅོམ་ལྡན་འདས་རྣམས་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར་ཉན་ཐོས་རྣམས་ཀྱང་བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །རབ་འབྱོར་གང་དག་ཕ་རོལ་ཏུ་ཕྱིན་པ་དྲུག་སྨྲ་བ་དང་བརྗོད་པ་དང་སྟོན་པ་དང་འདོགས་པ་དང་འགོད་པ་དང་རྣམ་པར་འབྱེད་པ་དང༌། རྣམ་པར་འགྲེལ་པ་དང༌། གསལ་བར་བྱེད་པ་དང༌། ཡང་དག་པར་སྟོན་པར་བྱེད་པ་དེ་དག་ཀྱང་བྱང་ཆུབ་སེམས་དཔའ་ཆེན་པོ་རྣམས་ཀྱི་དགེ་བའི་བཤེས་གཉེན་དུ་རིག་པར་བྱའོ། །ཞེས་གསུངས་སོ། ། གདམས་པར་བྱ་བའི་དོན་ནི། ལམ་ལྔའི་གནས་སྐབས་ཅན་སྒྲུབ་པ་ལ་སོགས་པ་བཅུ་པོ་འདི་རྣམས་སོ། །འདོམས་པར་བྱེད་པའི་ཚིག་ནི། སྒྲུབ་པ་ཞེས་བྱ་བའི་ཚིག་དང༌། བདེན་པ་རྣམས་ཞེས་བྱ་བའི་ཚིག་དང༌། སངས་རྒྱས་ལ་སོགས་དཀོན་མཆོག་གསུམ་ནས་བསྒོམ་ཞེས་བྱ་བའི་ཚིག་ལ་གདམས་པའི་ངག་ནི་བཅུའི་བདག་ཉིད་དུ་ཤེས་པར་བྱའོ། ། བྱང་ཆུབ་སེམས་དཔའ་ལ་ཐེག་ཆེན་ཆོས་ཕྱིན་ཅི་མ་ལོག་པར་འདོམས་བྱེད་ཀྱི་ངག་ནི་མཚན་ཉིད་དོ། །མཚན་གཞི་ལ་སོགས་པ་ནི་གོ་སླའོ། །དེ་ཡང་དང་པོ་སེམས་བསྐྱེད་པ་ནས་བཟུང་སྟེ་ཚོགས་སྦྱོར་དང་མཐོང་སྒོམ་སྟོན་པར་བྱེད་པ་ཡིན་དེ་རིམ་པ་ལྟར་མདོ་སྡེ་རྒྱན་ལས། བསྐལ་པ་གྲངས་མེད་ངེས་འབྱུང་ཞིང༌། །མོས་པ་རྣམ་པར་འཕེལ་བྱེད་པ། །ཇི་ལྟར་ཆུ་ཡི་རྒྱ་མཚོ་བཞིན། །དགེ་ཆོས་རྣམས་ཀྱིས་ཡང་དག་རྫོགས། །དེ་བཞིན་དུ་ནི་ཚོགས་བསགས་པའི། རྒྱལ་སྲས་བཟོད་ནས་དག་པས་སོ། །ལེགས་པར་ཤེས་ཤིང་སེམས་དགེ་བ། །བསྒོམས་པ་ལ་ནི་རབ་ཏུ་སྦྱོར། །ཞེས་པ་ལ་སོགས་པས་ཚོགས་ལམ་སྟོན་ནོ། །དེ་ལ་མོས་པ་ཆེན་པོའི་གནས་སྐབས་སུ་ཕྱིན་པ་ནི་རྣམ་པར་འཕེལ་བར་བྱེད་པའོ། །བྱང་སེམས་ཀྱི་སྡོམ་པ་སྦྱངས་པ་དང་ཕྱིན་ཅི་མ་ལོག་པར་འཛིན་པའི་སྒོ་ནས་ཐེག་ཆེན་ལ་ལྟ་བ་དྲང་པོར་བྱས་པའི་ཕྱིར་བཟོད་ནས་དག་པའོ། །ཐོས་པ་མང་བའི་ཕྱིར་ལེགས་པར་ཤེས་པའོ། །སྒྲིབ་པ་དང་བྲལ་བའི་ཕྱིར་སེམས་དགེ་བའོ། །དེ་འདྲར་གྱུར་པ་དེ་ཚེ་ཆོས་ཀྱི་རྒྱུན་ལ་ནི། སངས་རྒྱས་རྣམས་ལས་ཞི་གནས་དང༌། །ཡེ་ཤེས་སྦངས་པ་ཐོབ་བྱའི་ཕྱིར། །གདམས་ངག་རྒྱ་ཆེན་རྙེད་པར་འགྱུར་ཞེས་པ་དང༌། དེའི་རྗེས་ལ་སེམས་རྣམ་པ་དྲུག་ཚོགས་ལམ་གྱི་སྐབས་དེར་དམིགས་པར་སྟོན་པའི་ཚིགས་བཅད་གསུམ་དང༌། དེའི་རྗེས་ལ་ཡིད་བྱེད་པ་བཅུ་གཅིག་སྟོན་པའི་ཚིགས་བཅད་བཞི་དང༌། དེའི་རྗེས་ལ་རྣམ་པ་དགུས་སེམས་གནས་པའི་ཐབས་སྟོན་པའི་ཚིགས་བཅད་བཞིའོ། །དེ་ལྟར་དམིགས་པ་དེ་ལ་ཡིད་ལ་བྱེད་པ་དེ་དང་ཐབས་དེས་སེམས་གནས་པར་བྱས་པ། དེ་ནས་དེའི་ལུས་དང་སེམས། ཤིན་ཏུ་སྦྱངས་པ་ཆེ་ཐོབ་ནས། །ཡིད་ལ་བྱེད་དང་བཅས་ཤེས་བྱ། །དེ་ཡིས་དེ་ནི་འཕེལ་བྱས་ནས། ། འཕེལ་བ་རིང་དུ་འགྲོ་བ་ཡིས། །དངོས་གཞིའི་གནས་པ་དེས་འཐོབ་པོ། །མངོན་ཤེས་དོན་དུ་གཉེར་པས་དེ། །སྦྱངས་ན་ལས་སུ་རུང་བའི་མཆོག །བསམ་གཏན་ལས་ཐོབ་མངོན་པར་ཤེས། ། མངོན་པར་བསྒྲུབས་པའི་སྒོ་ནས་དེ། །སངས་རྒྱས་དཔག་ཏུ་མེད་པ་ལ། །མཆོད་པའི་ཕྱིར་དང་མཉན་པའི་ཕྱིར། །འཇིག་རྟེན་ཁམས་ནི་རྣམས་སུ་འགྲོ། །འདིས་ནི་སངས་རྒྱས་དཔག་མེད་ལ། ། སྐལ་དཔག་མེད་བར་བསྙེན་བཀུར་བྱས། །དེ་ལ་བསྙེན་བཀུར་བྱས་པའི་ཕྱིར། །སེམས་ནི་ལས་རུང་མཆོག་ཏུ་གྱུར། །ཞེས་པ་བསམ་གཏན་ལས་སུ་རུང་པའོ། །དེ་ནས་དགའ་བའི་སྔོན་རོལ་དུ། ཕན་ཡོན་ལྔ་ཐོབ་པ་ནི། དེ་ནས་དེ་དག་སྔོན་རོལ་དུ། །ཕན་ཡོན་ལྔ་ནི་ཐོབ་གྱུར་ཏེ། །ལྔ་པོ་གང་ཞེ་ན། དེས་ན་རྣམ་པར་དག་པའི་སྣོད། །བླ་ན་མེད་པ་ཉིད་འགྱུར་འདིའི། །ལུས་ལ་གནས་ངན་ལེན་པ་ཀུན། །སྐད་ཅིག་རེ་རེ་ལ་ཟད་འགྱུར། །ལུས་དང་སེམས་ནི་ཀུན་ཏུ་ཡང༌། ཤིན་ཏུུ་སྦྱངས་པས་གང་བར་འགྱུར། །ཆོས་རྣམ་སྣང་བ་ཐམས་ཅད་དུ། །ཡོངས་སུ་ཆུད་པ་མེད་རྟོགས་འགྱུར། །ཡང་དག་པ་ཡི་རྒྱུ་མཚན་ནི། །མ་བརྟགས་པ་དག་རབ་ཏུ་མཐོང་བ་དང་ལྔའོ། །ལྔ་པོ་དེ་དག་རབ་ཏུ་ཐོབ་པས་དག་པའི་སྣོད་ལྷག་པའི་བསམ་པ་དག་པའི་སའོ། །དེ་ཉིད་ཐེག་པ་བླ་ན་མེད་པ་ཉིད་དུ་འགྱུར་རོ། །ལྔ་པོ་འདི་ལས་གསུམ་ཞི་གནས་དང༌། གཉིས་ལྷག་མཐོང་གི་ཕྱོགས་དང་མཐུན་པའོ། །དེ་བཞིན་ཆོས་སྐུ་རབ་རྫོགས་དང༌། །རྣམ་པར་དག་པར་བྱ་བའི་ཕྱིར། །བློ་དང་ལྡན་པ་རྣམ་ཀུན་ཏུ། །རྟག་ཏུ་རྒྱུ་ཡོངས་འཛིན་པར་བྱེད་ཅེས་པ་སྟེ། །བྱང་ཆུབ་སེམས་དཔའི་ས་བཅུ་པ་ལ་ནི་ཡོངས་སུ་རྫོགས་པའོ། །སངས་རྒྱས་ཀྱི་ས་ལ་ནི་ཆོས་སྐུ་རྣམ་པར་དག་པའོ། །དེ་གཉིས་བྱ་བའི་ཕྱིར། ཞེས་པ་རྣམས་ཀྱིས་ཚོགས་ལམ་བསྟན་ཏོ། །དེ་ནས་སྦྱོར་ལམ་སྟོན་པའི་ཚིགས་བཅད་ལྔ་སྟེ། འདིའི་ངེས་འབྱེད་ཆ་བཞིའི་སྐབས་སུ་དྲངས་ནས་འཆད་དོ། །དེ་ནས་མཐོང་ལམ་སྟོན་པའི་ཚིགས་བཅད་རྣམས་འབྱུང་སྟེ། འདི་ཡི་སྐབས་དེ་དང་དེར་དྲངས་ནས་འཆད་དོ། ། སྒྲུབ་པ་ལ་སོགས་པ་ལ་གདམས་པ་ནི། དོན་དེ་དང་དེ་ལ་འགོད་པ་འམ་སྦྱོར་པའོ། །འདིར་བསྒྲུབ་པའི་ངོ་བོ་ནི་ཤེར་ཕྱིན་ཟབ་མོའི་རྣལ་འབྱོར་རྣམ་པར་མི་རྟོག་པ་ཡིན་ནོ། །དེ་ཉིད་གནས་སྐབས་དང་མཐར་ཐུག་གི་དོན་སྒྲུབ་པའི་ཐབས་མཆོག་བླ་ན་མེད་པའི་ཉམས་ལེན་ཡིན་པའི་ཕྱིར་ཕར་ཕྱིན་པ་རྣམས་ཀྱིས་བཙལ་ཞིང་ཉམས་སུ་བླང་བར་བྱའོ། །རྣལ་འབྱོར་དེ་ཉིད་ཉིན་མཚན་གྱི་བྱེ་བྲག་གིས་ཉིན་མོའི་རྣལ་འབྱོར་དང༌། མཚན་མོའི་རྣལ་འབྱོར་དེ། རྣལ་འབྱོར་དེ་རྣལ་འབྱོར་དེ་དག་གིས་དུས་དེ་དང་དེར་གང་དང་གང་ལ་བལྟ་བ་ནི། མགོན་པོ་སྦྱན་རས་གཟིགས་ཀྱི་དབང་ཕྱུག་གི་ཞལ་སྔ་ནས། མཚན་མོའི་དུས་སུ་མཚན་མོའི་རྣལ་འབྱོར་དང༌། ཉིན་མོའི་དུས་སུ་ཉིན་མོའི་རྣལ་འབྱོར་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་ལྟ་བ་གང་ཡིན་པ་དེ་ནི་མཚན་མོ་ནམ་མཁའ་ལ་ལྟ་ཞིང་ཉིན་མོ་བླ་གབ་མེད་པ་ལ་བལྟ་བའོ། །ཞེས་དང༌། འདིར་སྔགས་ཀྱི་ཐེག་པ་དང༌། ཕ་རོལ་ཏུ་ཕྱིན་པའི་ཐེག་པ་ལ་རྣལ་འབྱོར་གོམས་པ་རྣམ་པ་གཉིས་དེ། ནམ་མཁའ་དང་བླ་གབ་མེད་པ་ལ་རྣལ་འབྱོར་གོམས་པའོ།། ཞེས་མདོ་སྔགས་ཀྱི་རྣལ་འབྱོར་ཟབ་མོ་གཅིག་ཏུ་གསུངས་པ། གསང་བདག་ཕྱག་ན་རྡོ་རྗེའི་ཞལ་སྔ་ནས་ཀྱང། དེའི་ཕྱིར་སོ་སོར་སྡུད་པའི་སྒོམ་པ་ལ་རྣམ་པར་རྟོག་པའི་བསྒོམ་པ་དམིགས་སུ་མེད་པའོ།། ཞེས་བཅོམ་ལྡན་འདས་ཀྱིས་གསུངས་སོ། །བསྒོམ་པ་འདི་ནི་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པར་ཡང་གསུངས་པ་འདི་ལྟ་སྟེ། དེ་ནས་ལྷའི་དབང་པོ་བརྒྱ་བྱིན་གྱིས་ཚེ་དང་ལྡན་པ་རབ་འབྱོར་ལ་འདི་སྐད་སྨྲས་སོ། །འཕགས་པ་རབ་འབྱོར་འདིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེས་གང་ལ་རྣལ་འབྱོར་དུ་བྱ། རབ་འབྱོར་གྱིས་སྨྲས་པ། ཀོའུ་ཤི་ཀ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེས་ནམ་མཁའ་ལ་རྣལ་འབྱོར་དུ་བྱའོ། ། ཀོའུ་ཤི་ཀ་གང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེས་བླ་གབ་མེད་པ་ལ་རྣལ་འབྱོར་དུ་བསླབ་པར་བྱའོ། །ཞེས་པ་ཕྱག་རྒྱ་ཆེན་པོའི་བསྒོམ་པ་པྲ་ཕབ་པ་དང་སྒྱུ་མ་དང་མཚུངས་པ་སྤྲིན་མེད་པའི་ནམ་མཁའ་ལ་སྣང་བ་བཅོམ་ལྡན་འདས་ཀྱིས་གསུངས་སོ། །ཞེས་མདོ་སྔགས་ཀྱིས་རྫོགས་རིམ་ཟབ་མོ་དང་ཕྱག་རྒྱ་ཆེན་པོ་བསྒོམ་པ་ཡང་རྣལ་འབྱོར་འདི་ཉིད་ཡིན་པར་གསུངས་པ་དང༌། རྩེ་སྦྱོར་བསྒོམ་ལམ་གྱི་སྐབས་སུ་སློབ་དཔོན་དབྱིག་གཉེན་གྱི་ཞལ་སྔ་ནས་ཀྱང༌། དེ་ལ་མཚན་མ་དང༌། རློམ་སེམས་དང༌། རོ་མྱོང་བ་དང༌། དམིགས་པའི་འདུ་ཤེས་རྣམས་བསལ་ཏེ་རང་བཞིན་གྱིས་ཡོངས་སུ་དག་པའི་འདུ་ཤེས་བསྐྱེད་ཅིང༌། སྤྱད་ནས་ནམ་མཁའ་ཡིད་ལ་བྱེད་པ་དེ་ཉིད་ཀྱིས་མངོན་པར་རྫོགས་པར་སངས་རྒྱས་ཞེས་གསུངས་སོ། །དཔལ་ས་ར་ཧའི་ཞལ་སྔ་ནས་ཀྱང༌། གདོད་ནས་དག་པའི་རང་བཞིན་ནམ་མཁའ་ལ། །བལྟས་ཤིང་བལྟས་ཤིང་མཐོང་བ་དགག་པར་འགྱུར། །ཞེས་གསུངས་པ་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། སེམས་ལ་དམིགས་་པ་མེད་པ་ཡིས། །གནས་པ་ནམ་མཁའི་མཚན་ཉིད་ཅན། །དེ་དག་སྟོང་ཉིད་བསྒོམ་པ་ནི། །ནམ་མཁའ་བསྒོམ་པར་བཞེད་པ་ཡིན༌། ཞེས་གསུངས་པ་རྣམས་དགོངས་པ་གཅིག་ཏུ་བྱུང་བས་རྣལ་འབྱོར་འདི་ཉིད་བསྟན་ཏོ། །རྣལ་འབྱོར་ཟབ་མོ་འདི་ཇི་ལྟར་ཉམས་སུ་ལེན་པའི་ཚུལ་ནི། བླ་མ་བཟང་པོའི་དྲུང་དུ་མན་ངག་ལས་ཁོང་དུ་ཆུད་པར་བྱའོ། །རྣལ་འབྱོར་འདི་རྣམ་པར་མི་རྟོག་པ་ནི་རྣམ་རྟོག་བཅུའི་གཉེན་པོ་ཡིན་ཞིང༌། རྣམ་རྟོག་བཅུ་ནི་མདོ་སྡེའི་རྒྱན་ལས། རྒྱལ་བའི་སྲས་རྣམས་ཀྱིས་ནི་མེད་དང་ཡོད་པ་དང༌། །སྒྲོ་འདོགས་སྐུར་པའི་རྟོག་དང་གཅིག་དང་དུ་མ་ཉིད། །རང་དང་ཁྱད་པར་རྟོག་དང་མིང་དོན་ཇི་བཞིན་དུ། །མངོན་པར་ཞེན་པའི་རྟོག་པ་ཡང་དག་སྤང་བར་བྱ། ། ཞེས་པའི་ཚིག་བཅད་འདི་སྐབས་འདིའི་མདོ་དོན་སྡུད་བྱེད་ཡིན་པར་སློབ་དཔོན་དཔྱིན་གཉེན་གྱིས་གསུངས་ཤིང༌། སྐབས་འདིའི་མདོ་ནི། འབྱམ་ཀླས་པས་མདོ་དྲངས་ནས་འཆད་པ་ཡི་གེ་མང་བའི་ཕྱིར་སློབ་དཔོན་ཕྱོགས་ཀྱི་གླང་པོས་མདོ་བསྡུས་་པའི་གསུང་གི་ཚིགས་སུ་བཅད་པ་འདིའི་དོན་སྟོན་པ་འདི་ལྟ་སྟེ། སེམས་ཀྱི་རྣམ་པར་གཡེང་བ་བཅུས། ། གཞན་ལས་སེམས་ནི་རྣམ་གཡེངས་པས། ། བྱིས་པ་རྣམས་ལ་གཉིས་མེད་ཀྱི། །ཡེ་ཤེས་བསྒྲུབ་པའི་སྐལ་བ་མེད། །དེ་དག་ཕན་ཚུན་གཉེན་པོ་དང༌། མི་མཐུན་ཕྱོགས་ཀྱིས་བཟློགས་པའི་ཕྱིར། །ཤེས་རབ་ཕ་རོལ་ཕྱིན་གཞུང་སྟེ། །དེ་རྣམས་ཀྱང་ནི་བསྡུས་ཏེ་བསྟན། །ཞེས་སྤྱིར་གསུངས་ལ། མེད་པར་རྟོག་པའི་གཉེན་པོ་ནི། །སྟོན་པས་ཕུང་པོ་ཀུན་རྫོབ་བོ། །གཟིགས་ཕྱིར་བྱང་སེམས་དཔའ་ཡོད་ཅེས། །གང་གསུངས་པ་ཡི་དངོས་མེད་ཀྱི། །རྟོག་པའི་གཡེང་བ་འགོག་པ་ཡིན་ཞེས་དང༌། ཡོད་པར་རྟོགས་པའི་གཉེན་པོར། །བདག་གིས་བྱང་ཆུབ་སེམས་དཔའ་ནི། །མ་མཐོང་ཞེས་སོགས་རྒྱས་རྣམས་ཀྱིས། །བཅོམ་ལྡན་དངོས་པོ་ཀུན་རྟོག་གི། །འཁྲུལ་པ་འགོག་པར་མཛད་པ་ཡིན། །ཞེས་དང༌། སྒྲོ་འདོགས་པའི་རྟོག་པའི་གཉེན་པོར། །ངོ་བོས་སྟོང་པའི་གཟུགས་རྣམས་ལ། །གང་དུ་འང་གང་གིས་སྒྲོ་འདོགས་པ། །དེས་ན་ངག་གཞན་རྣམས་ལ་ཡང༌། །དེ་ཟློག་པར་ནི་ཤེས་པར་བྱ། །ཞེས་དང༌། སྐུར་པ་འདེབས་པའི་རྟོག་པའི་གཉེན་པོར། སྟོང་པ་ཉིད་ཀྱིས་མི་སྟོང་ཞེས། །བྱ་བའི་ངག་ནི་སྟོན་པ་ནི། །སྐུར་པ་ཡི་ནི་རྣམ་རྟོག་རྣམས། །ཐམས་ཅད་དུ་ནི་སེལ་བར་གསུངས། །ཞེས་དང༌། གཅིག་ཏུ་རྟོག་པའི་གཉེན་པོར་ཕན་ཚུན་དུ་ནི་འགལ་བའི་ཕྱིར། གཟུགས་ནི་སྟོང་ཉིད་ཡིན་མི་རིགས། །སྟོང་ཉིད་རང་བཞིན་མེད་ཉིད་ལ། །གཟུགས་ནི་རྣམ་པ་དང་འབྲེལ་པ། །དེས་ན་གཅིག་ཏུ་རྣམ་རྟོག་ལ། །གནོད་འགྱུར། ཞེས་དང༌། དུ་མར་རྟོགས་པའི་གཉེན་པོར། གཟུགས་དེ་སྟོང་ཉིད་ལས། ཇི་ལྟ་བུར་ཡང་གཞན་མིན་པས། །ཐ་དད་ཀྱི་ནི་རྣམ་རྟོག་འགོག །ཅེས་དང༌། རང་གི་ངོ་བོ་ཉིད་དུ་རྟོགས་པའི་གཉེན་པོར། །གཟུགས་འདི་མིང་ཙམ་དུ་དེ་ཉིད་དུ། །རང་གི་ངོ་བོ་ཡོད་མིན་པས། །དེས་ནི་ངོ་བོ་ཉིད་དུ་ནི། །རྣམ་རྟོག་རྣམས་ཀྱི་གོ་སྐབས་སེལ། །ཞེས་དང༌། ཁྱད་པར་དུ་རྟོགས་པའི་གཉེན་པོར། །ཆོས་རྣམས་ཀྱི་ནི་སྐྱེ་བ་དང༌། །འགག་པ་མཐོང་བ་མེད་ཅེས་གང༌། །བཅོམ་ལྡན་འདས་ཀྱིས་གསུངས་པ་གང༌། །དེ་ཡིས་ཁྱད་པར་རྣམ་རྟོག་བསལ། །ཞེས་དང༌། མིང་ཇི་ལྟ་བ་བཞིན་དོན་དུ་རྟོག་པའི་གཉེན་པོར། ། དུས་འདིར་ཇི་ལྟར་མིང་བྱ་བ། །དེ་ལྟར་བརྗོད་བྱའི་དངོས་པོ་དེ། །ཡོད་མིན་ཕྱིར་དང་མིང་ཇི་བཞིན། །དོན་དུ་རྟོག་པ་འདོད་མ་ཡིན་ཞེས་དང་དོན་ཇི་ལྟ་བར་མྀང་དུ་རྟོག་པའི་གཉེན་པོར། །དེ་ཉིད་རིག་པས་མིང་རྣམས་ཀུན། །དོན་ཇི་ལྟ་བར་ཡང་དག་ཏུ། །དམིགས་པ་མེད་དེ་ཉིད་དེའི་ཕྱིར། ། ཞེས་པ་རྣམས་ཀྱིས་དེ་དང་དེར་མངོན་པར་ཞེན་པའི་རྟོག་པ་ཡང་དག་སྤང་བར་བྱ་ཞེས་པའི་ཏོན་ཏོ། ། དེས་ན་རྣམ་རྟོག་བཅུ་པོ་དེའི་གཉེན་པོར་མི་རྟོག་པའི་རྣལ་འབྱོར་ནི་བསྒྲུབ་པ་ཡིན་པའི་ཕྱིར། སྤང་གཉེན་གྱི་དེ་དག་སྟོན་པའི་ངག་ནི་བསྒྲུབ་པ་ལ་གདམས་པའོ། །དེས་ཤེར་ཕྱིན་ལ་ཇི་ལྟར་བརྩོན་པར་བྱ་བ་བཤད་ཟིན་ཏོ། །ད་ནི་བརྩོན་པར་བྱེད་པའི་མཚན་ཉིད་གང་ཡིན་པ་དེ་ནི་བདེན་པ་ལ་སོགས་པ་གདམས་པ་སྟེ། དང་པོ་སྡུག་བསྔལ་གྱི་བདེན་པ་ལ་གདམས་པ་ནི། མདོ་ལས། ཇི་ལྟར་ཤེར་ཕྱིན་ལ་བརྩོན་པར་བགྱིས་ན་བརྩོན་ཞེས་བགྱི་བ་ལགས། ཞེས་ཞུས་པའི་ལན་དུ། ཕུང་པོ་དང་ཁམས་དང་སྐྱེ་མཆེད་དང༌། འཕགས་པའི་བདེན་པ་དང༌། རྟེན་འབྲེལ་དང༌། འདུས་བྱས་དང༌། འདུས་མ་བྱས་དེ། ཆོས་བདུན་པོ་དེའི་སྟོང་པ་ཉིད་ལ་བརྩོན་ན་ཤེར་ཕྱིན་ལ་བརྩོན་པ་ཡིན་ཞེས་པའི་དོན་ཏོ། །ཀུན་འབྱུང་ལ་གདམས་པ་ནི། གཟུགས་སོགས་ཡང་དག་པར་སྐྱེ་བ་དང༌། འགག་པ་དང༌། ཉོན་མོངས་པ་དང༌། རྣམ་པར་བྱང་བའི་ཆོས་ཅན་དུ་མི་མཐོང་ངོ༌། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པ་ཉིད་ཀྱི་ཕྱིར་ཞེས་པ་ལ་སོགས་པའི་ངག་གོ། འགོག་པའི་བདེན་པ་ལ་གདམས་པ་ནི། རང་བཞིན་སྟོང་པ་ཉིད་གྱི་འགོག་བདེན་ཟབ་མོ་དེ་ལ་ནི་སྐྱེ་འགག་དང་གཟུགས་སོགས་ནས་བྱང་ཆུབ་ཀྱི་པར་གྱི་བཏགས་པའི་ཆོས་ཐམས་ཅད་མེད་དོ། །ཆེས་སྟོན་པའི་ངག་གོ །སྐབས་འདིར་བྱང་ཆུབ་དང༌། སངས་རྒྱས་སོགས་མེད་ཅེས་པའི་ཚིག་གིས་དག་པའི་ཆོས་རྣམ་འགོག་པར་ཤེས་དགོས་ཀྱི། གཤིས་ལུགས་ཀྱིས་སངས་རྒྱས་དང་བྱང་ཆུབ་དང་ཆོས་དབྱིངས་བཀག་པར་ནི་མི་བསམ་སྟེ། འཕགས་པ་ཀླུ་སྒྲུབ་ཀྱི་ཞལ་སྔ་ནས། །སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང༌། །དེ་དག་ཀུན་གྱིས་ཉོན་མོངས་ལྡོག །དབྱིངས་དེ་ཉམས་པར་བྱེད་མ་ཡིན། ། ཞེས་དང༌། སློབ་དཔོན་ཕྱོགས་ཀྱི་གླང་པོའི་ཞལ་སྔ་ནས་ཀྱང༌། མེད་ཅེས་བྱ་ལ་སོགས་ཚིག་གིས་བཏགས་པ་ཐམས་ཅད་འགོག་པ་སྟེ། ཞེས་གསུངས་པའི་དོན་ཡིན་པའི་ཕྱིར་རོ། །ལམ་གྱི་བདེན་པ་ལ་གདམས་པ་ནི། གཟུགས་ལ་ཡང་དག་པར་བརྩོན་ཞེས་བྱ་བའམ་མི་བརྩོན་ཞེས་བྱ་བར་མི་མཐོང་བ་དེ་བས་ན་བྱང་ཆུབ་སེམས་དཔའ་ཤེར་ཕྱིན་ལ་དེ་ལྟར་བརྩོན་པ་ནི་བརྩོན་ཞེས་བྱ་བར་རིག་པར་བྱའོ། །ཞེས་པ་ལ་སོགས་པའི་ངག་གོ། སངས་རྒྱས་དཀོན་མཆོག་ལ་འགོད་པ་ནི། ཡང་དག་པར་དུས་གསུམ་མ་མཐོང་བས་རྣམ་མཁྱེན་དང་དུས་གསུམ་མི་སྦྱོར་བ་དང༌། གཟུགས་སོགས་ཡང་དག་པར་མ་མཐོང་བས་གཟུགས་དང་རྣམ་མཁྱེན་ཉིད་དུ་མི་སྦྱོར་རོ། །དེ་ལྟར་བརྩོན་པ་ནི་ཤེར་ཕྱིན་ལ་བརྩོན་པ་ཞེས་བྱའོ། །ཞེས་པ་ལ་སོགས་པ་ཞེས་བྱའོ། །ཞེས་པ་ལ་སོགས་པས་སྟོན་པའོ། །ལ་སོགས་པའི་སྒྲས་ཆོས་དཀོན་མཆོག་ལ་སྦྱོར་བ་ནི། གཟུགས་སོགས་ཆོས་རྣམས་འབྱུང་བ་དང་འཇིག་པ་དང་རྟག་མི་རྟག་དང༌། བདེ་སྡུག་དང༌། བདག་དང་བདག་མེད་པ་དང༌། ཞི་མ་ཞི་སྟོང་མི་སྟོང་མཚན་མ་དང་སྨོན་པ་ཡོད་མེད་དང་སྐྱེ་འགག་དང་དུས་གསུམ་ཞེས་བྱ་བ་ལ་སོགས་པར་མི་སྦྱོར་བ་དེ་ལྟར་བརྩོན་པ་ནི་ཤེར་ཕྱིན་ལ་བརྩོན་ཞེས་བྱའོ། །ཞེས་དང༌། སྟོང་པ་ཉིད་ཀྱི་རྣལ་འབྱོར་ནི་རྣལ་འབྱོར་ཐམས་ཅད་ཀྱི་ནང་ན་རྣལ་འབྱོར་དམ་པ་ཡིན་པའི་ཕྱིར། གཟུགས་སོགས་དེ་ལྟར་མི་སྦྱོར་བའི་ཤེར་ཕྱིན་གྱི་རྣལ་འབྱོར་དེས་སྐྱོན་ཐམས་ཅད་སེལ་ཞིང་ཡོན་ཏན་ཐམས་ཅད་སྒྲུབ་པར་བྱེད་དོ། །ཞེས་གདམས་པའོ། །དེ་ལྟར་བདེན་པ་རྣམས་དང་དཀོན་མཆོག་གཉིས་ཀྱིས་བརྩོན་པར་བྱེད་པའི་མཚན་ཉིད་བཤད་ཟིན་ཏོ། ། ད་ནི་བརྩོན་པར་བྱེད་པའི་དབྱེ་བ་སྟོན་པ་ནི་སྔར་གྱི་སོགས་པའི་སྒྲས་བསྡུས་པ་དགེ་འདུན་དཀོན་མཆོག་ལ་གདམས་པ་འཆད་དེ། མདོ་ལས། ཤཱ་རིའི་བུ་བྱང་ཆུབ་སེམས་དཔའ་གང་ཤེར་ཕྱིན་གྱི་རྣལ་འབྱོར་འདིས་གནས་པ་དེ་གང་ནས་ཤི་འཕོས་དེ་འདིར་སྐྱེས་པ་ལགས །ཞེས་ཞུས་པའི་ལན་དུ། བརྩོན་ལྡན་འདས་ཀྱིས་ཤེར་ཕྱིན་གྱི་རྣལ་འབྱོར་འདིས་གནས་པ་ནི་སངས་རྒྱས་ཀྱི་ཞིང་གཞན་དག་ནས་ཤི་འཕོས་ཏེ་འདིར་སྐྱེས་པའམ། དགའ་ལྡན་གྱི་ལྷའི་རིས་ནས་ཤི་འཕོས་དེ་འདིར་སྐྱེས་པའམ། མི་རྣམས་ཀྱིས་ནང་ནས་ཤི་འཕོས་དེ་འདིར་སྐྱེས་པར་རིག་པར་བྱའོ། །ཞེས་རབ་འབྲིང་ཐ་མ་གསུམ་དུ་ཕྱེ་ནས་གསུངས་སོ། །དེའི་རྗེས་ལ་གསུམ་པོ་དེ་ཉིད་བཤད་པ་མཛད་དོ། ། དེའི་འོག་ཏུ་གསུམ་པོ་དེ་དག་ཉིད་ལ་རྣམ་པ་མང་དུ་ཡོད་པར་བསྟན་པའི་ཐབས་མི་མཁས་པ་གཉིས་དང་ཐབས་མཁས་པ་བཞི་བཅུ་རྩ་གསུམ་སྟེ། བྱང་ཆུབ་སེམས་དཔའི་དགེ་འདུན་བཞི་བཅུ་རྩ་ལྔ་བསྟན་ཏོ། །དབུ་མ་པ་ཆེན་པོ་སློབ་དཔོན་དབྱིག་གཉེན་གྱི་ཞལ་སྔ་ནས། དེའི་འོག་ཏུ་གནས་བརྟན་གྱིས་འཁོར་རྣམས་མགུ་བར་བྱ་བ་དང་སྐབས་དེ་ཉིད་ལས་ཆོས་བཤད་པ་ཆེན་པོར་འགྱུར་བར་བྱ་བའི་ཕྱིར་དེ་གང་ནས་ཤི་འཕོས་ཏེ་འདིར་སྐྱེས་པ་ལགས་ཞེས་བྱ་བ་ལ་སོགས་པས་ཞུས་སོ། །དེ་ལ་མཆོག་ནི་སངས་རྒྱས་ཀྱི་ཞིང་ནས་ལྷགས་ནས་སངས་རྒྱས་ཀྱི་ཞིང་ཉིད་དུ་འཕོའོ། །བར་མ་ནི་དགའ་ལྡན་ནས་ལྷགས་པར་གྱུར་ཏོ། །ཐ་མ་ནི་མིའི་ནང་ཉིད་ནས་ལྷག་པར་གྱུར་ཏོ། །ཞེས་རྣམ་པ་གསུམ་དུ་བསྟན་ཏོ། །དེའི་འོག་ཏུ་སྐབས་དེ་ཉིད་ལས་བྱང་ཆུབ་སེམས་དཔའ་ལ་རྣམ་པ་མང་དུ་ཡོད་པར་བསྟན་པའི་ཕྱིར། ཤཱ་རིའི་བུ་བྱང་ཆུབ་སེམས་དཔའ་ཆེན་པོ་ཐབས་ལ་མི་མཁས་པ་ཞེས་བྱ་བ་ལ་སོགས་པ་བྱང་ཆུབ་སེམས་དཔའ་བཞི་བཅུ་རྩ་བཞིར་གཏོགས་པ་རྣམས་བསྟན་ཏོ། །ཞེས་ཐབས་ལ་མི་མཁས་པ་གཅིག་དང་སོགས་པའི་སྒྲས་ཞེ་བཞི་པོ་རྣམས་གསུངས་སོ། །འབུམ་ཊིཀ་ཀྱང་དེ་དང་མཐུན་ནོ། ། རྒྱལ་བ་དང་རྒྱལ་ཚབ་དག་གི་དགོངས་པ་དེ་ལྟར་ཡིན་པར་མདོ་ཉིད་སྦྱར་ནས་བལྟས་ན་ཤིན་ཏུ་གསལ་ཡང༌། ཉི་ཁྲི་སྣང་བ་ལ་སོགས་ཀྱི་སྐབས་འདིའི་མདོ་རྣམས་གདམས་ངག་གི་ནང་ན་མེད་པའི་ཐེག་དམན་གྱི་གང་ཟག་ཉི་ཤུ་ངོ་སྐལ་དུ་སྦྱོར་རོ། དེ་ཡང་ཐད་སོར་མ་འབྱོར་བས་རྒྱས་འབྲིང་བསྡུས་གསུམ་གྱི་གོ་རིམ་ལས་འཁྲུགས་ཤིང་ཆེས་འཁྲུགས་པར་དཀྲུགས་ནས་སྦྱར་རོ། །ཤཱ་རིའི་བུས་བྱེ་བྲག་དུུ་མ་ཕྱེ་བར་བྱང་ཆུབ་སེམས་དཔའ་དགེ་འདུན་ཙམ་ཞུས་པའི་མདོ་ཉི་ཁྲི་སྣང་བས་གང་ཟག་བརྒྱད་པ་གཅིག་པུ་ལ་སྦྱར་རོ། །ལན་གྱི་གསུང་རབ་འབྲིང་ཐ་མ་གསུམ་དུ་ཕྱེ་བ་ལ། ཐ་མ་སྟོན་པའི་མདོ་དད་པའི་རྗེས་འབྲང་ལ་སྦྱར་མཆོག་དང་བར་མ་གཉིས་སྟོན་པའི་མདོ་ཆོས་ཀྱི་རྗེས་འབྲང་ལ་སྦྱར་བ་ལ་སོགས་པ་དང་མདོ་དང་འགལ་བར་གསལ་ངེས་པའི་བཤད་པ་བྱས་སོ། །དེས་ནས་སློབ་དཔོན་དབྱིག་གཉེན་གྱི་བཤད་ལུགས་དང༌། གཞན་གྱི་བཤད་པའི་ལུགས་གཉིས་སངས་རྒྱས་ཀྱི་གསུང་དང་གང་འགྲིག་ཐམས་ཅད་མདོ་ཉིད་བསྟུན་ནས་མིག་ཅན་གྱིས་གཟུགས་ཅན་ལ་བལྟས་ཏེ། མཁས་པ་རྣམས་ཀྱིས་དཔྱད་པར་ཞུའོ། །འདིར་འདོམས་པའི་ཚུལ་ཡང་ཆོས་དཀོན་མཆོག་གི་སྐབས་ཀྱི་རྣལ་འབྱོར་དེས་གནས་པའི་བྱང་ཆུབ་སེམས་དཔའི་དབྱེ་བ་བསྟན་པ་ནི་དགེ་འདུན་དཀོན་མཆོག་པ་གདམས་ཤིང་བསྟན་པའོ། །མ་ཞེན་པ་ལ་གདམས་པ་ནི། འདིར་ལུས་དང་ངག་དང་ཡིད་དུ་ཞེན་ཅིང༌། དམིགས་པ་ནི་བྱང་ཆུབ་སེམས་དཔའི་གནས་ངན་ལེན་ཏོ། །ལུས་སོགས་མི་དམིགས་པ་དང་ཉན་རང་གི་སེམས་སྤངས་ནས་དུས་ཐམས་ཅད་དུ་སེམས་ཅན་ལ་སྙིང་རྗེ་ཉེ་བར་གནས་པས་གནས་ངན་ལེན་སྤྱོད་ཞེས་པ་ཉིད་ལུས་སོགས་ལ་མ་ཞེན་པར་གདམས་སོ། །ཡོངས་སུ་མི་ངལ་བ་ལ་གདམས་པ་ནི། ཆོས་ཐམས་ཅད་ལ་དམིགས་པའི་འདུ་ཤེས་ཀྱིས་རློམ་སེམས་བྱེད་པ་ནི་ངལ་ཞིང་དུབ་པར་འགྱུར་བ་ལས་དེ་མི་བྱེད་པ་ནི་སུས་ཀྱང་མི་ཐུབ་ཅིང་མི་ངལ་ཞེས་གདམས་པའོ། །ལམ་ཡོངས་སུ་འཛིན་པ་ལ་གདམས་པ་ནི། ས་བརྒྱད་པའི་ཡེ་ཤེས་ཀྱིས་ཐེག་པ་འོག་མའི་སྦངས་རྟོགས་ཀྱང་བསྡུས་པས་ཡེ་ཤེས་དེ་དང་ལྡན་པ་ནི་ཐེག་པ་ཐམས་ཅད་ཀྱི་ལམ་ཡོངས་སུ་འཛིན་པ་སྟེ། ཡེ་ཤེས་དེ་དང་ལྡན་པ་དེས་ངན་སོང་ལ་སོགས་པའི་སྐྱོན་ཐམས་ཅད་མི་འཛིན་ནོ་ཞེས་གདམས་སོ། །མདོ་ལས་འདི་ལ་རྣམ་མཁྱེན་གྱི་ཡེ་ཤེས་སུ་གསུངས་པ་རྒྱུ་ལས་འབྲས་བུར་བཏགས་ཞེས་གནོད་འཇོམས་དང་འབུམ་ཊིཀ་གསུངས་སོ། ། སྦྱན་ལྔ་གདམས་ཤིང་འགོད་པ་ནི། གནོད་འཇོམས་ལས། གཟུགས་ཐམས་ཅད་ལ་འཇུག་པའི་ཤེས་པ་ནི་ཤའི་མིག་གོ །ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་ཤེས་པ་ནི་ལྷའི་མིག་གོ །ཐམས་ཅད་མཁྱེན་པའི་ཡེ་ཤེས་ནི་ཤེས་རབ་ཀྱི་མིག་གོ། གནས་དང་གནས་མ་ཡིན་པ་མཁྱེན་པ་མ་གཏོགས་པའི་ཤེས་པ་དགུ་པོ་དག་ནི་ཆོས་ཀྱི་མིག་གོ། རྡོ་རྗེ་ལྟ་བུའི་ཏིང་ངེ་འཛིན་གྱི་ཡེ་ཤེས་ནི་སངས་རྒྱས་ཀྱི་མིག་ཡིན་ནོ། །ཞེས་གསུངས་སོ། །མདོ་ལས་ཀྱང༌། བྱང་ཆུབ་སེམས་དཔའི་ཤའི་མིག་གིས་དཔག་ཚད་བརྒྱ་དང་གཉིས་བརྒྱ་དང་སྟོང་དང་འཛམ་བུ་གླིང་གཅིག་དང་གཉིས་དང་གླིང་བཞི་དང་སྟོང་གཅིག་དང་གཉིས་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མཐོང་བ་ཡོད་དོ། །ཞེས་སོ། ། སྦྱན་རས་གཟིགས་དབང་ཕྱུག་གི་ཞལ་སྔ་ནས། སྟོང་གཅིག་ཅེས་བྱ་བ་ནི་མི་མཇེད་ཀྱི་འཇིག་རྟེན་གྱི་ཁམས་ཀྱི་དབུས་ནས་སྟེང་དང་འོག་ཏུ་སྟོང་ཕྲག་རེ་རེ་སྟེ། འོག་དང་སྟེང་བཞིན་དུ་གང་དང་ནུབ་དང་བྱང་དང་ལྷོ་དང་བདེན་བྲལ་དང་དབང་ལྡན་དང་རླུང་དང་མེར་རོ། །དེ་བཞིན་དུ་སྟོང་ཕྲག་གཉིས་དང་གསུམ་མོ། །དེ་ནས་སྟོང་ཆེན་པོ་ཞེས་བྱ་བ་གྲངས་མེད་པ་ཚན་པའི་འཇིག་རྟེན་གྱི་ཁམས་རྣམས་དེ་ཞེས་གསུངས་སོ། །སློབ་དཔོན་དབྱིག་གཉེན་གྱི་ཞལ་སྔ་ནས། གླིང་བཞི་ནི་གླིང་བཞི་པ་སྟེ། དེ་དག་སྟོང་ལ་སྟོང་གཅིག་ཅེས་བྱའོ། །སྟོང་གཅིག་པ་སྟོང་ལ་སྟོང་གཉིས་ཞེས་བྱའོ། །སྟོང་གཉིས་པ་སྟོང་ལ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཏེ། ཁོར་ཡུག་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོ་ཞེས་བྱའོ། །ཞེས་གསུངས་སོ། །དེ་དག་ཀྱང་སེམས་ཅན་གྱི་བསམ་པའི་དབང་གིས་མདོ་དང་རྒྱུད་ཀྱི་ལུགས་སོ། །མདོ་ལས། བྱང་ཆུབ་སེམས་དཔའ་ལྷའི་མིག་གིས་རྒྱལ་ཆེན་བཞིའི་རིས་ནས་འོག་མིན་གྱི་བར་གྱི་ལྷ་རྣམས་ཀྱི་ལྷའི་མིག་ཤེས་ཤིང་དེ་དག་གི་མིག་གིས་བྱང་ཆུབ་སེམས་དཔའ་ལྷའི་མིག་དེ་མི་ཤེས་པ་དང༌། བྱང་ཆུབ་སེམས་དཔའི་ལྷའི་མིག་དེས་ཕྱོགས་བཅུའི་འཇིག་རྟེན་གྱི་ཁམས་གང་གའི་ཀླུང་གི་བྱེ་མ་སྙེད་གྱི་སེམས་ཅན་རྣམས་ཀྱི་འཆི་་་་་འཕོ་བ་དང་སྐྱེ་བ་ཤེས་ཞེས་དང༌། བྱང་ཆུབ་སེམས་དཔའ་ཤེས་རབ་ཀྱི་མིག་གིས་ཆོས་གང་ཡང་མི་ཤེས་པ་མེད་དོ། །ཞེས་དང༌། བྱང་ཆུབ་སེམས་དཔའི་ཆོས་ཀྱི་མིག་གིས་ཐེག་པ་གསུམ་གྱི་ལམ་ལ་གནས་པའི་གང་ཟག་གིས་ལས་དང་ལས་དེའི་རྒྱུ་དང་ལས་དེའི་རྣམ་སྨིན་དང༌། གང་ཟག་དེ་དག་གི་བསམ་པའི་ཁམས་ཀྱིས་ཉན་རང་དང་སངས་རྒྱས་སུ་འགྱུར་བ་ལ་སོགས་པའི་རྒྱུ་སོགས་དང༌། དེ་དག་གི་མོས་པ་སྣ་ཚོགས་དང་དེ་དག་གིས་དབང་པོ་མཆོག་འབྲིང་ཐ་མ་རྣམས་དང༌། དེ་དག་ངེས་པ་དང་མ་ངེས་པ་རྣམས་དང༌། མཐུན་པའི་ལམ་དང༌། བསམ་གཏན༌། རྣམ་ཐར། ཏིང་ངེ་འཛིན། སྙོམས་འཇུག་ གི་ཀུན་ནས་ཉོན་མོངས་དང༌། ཉོན་མོངས་དེའི་རྒྱུ་དང༌། བསམ་གཏན་སོགས་ཀྱི་རྣམ་བྱང་དང༌། རྣམ་བྱང་དེའི་རྒྱུ་དང༌། སྔོན་གྱི་གནས་རྗེས་སུ་དྲན་པ་དང༌། ལྷའི་མིག་གིས་མངོན་ཤེས་དང༌། ཟག་པ་ཟད་པ་རྣམ་ཤེས་པར་སྟོན་པ་དང༌། སངས་རྒྱས་ཀྱི་མིག་ནི། བྱང་ཆུབ་ཀྱི་སེམས་ཀྱི་མཇུག་ཐོགས་སུ་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས་རྣམ་མཁྱེན་ཐོབ་པར་བྱེད་དེ། དེ་ནི་སྟོབས་བཅུ་མི་འཇིགས་པ་ལ་སོགས་པ་སངས་རྒྱས་ཀྱི་ཆོས་ཐམས་ཅད་དང་ལྡན་ཞིང༌། མིག་དེ་དང་ལྡན་པ་དེས་མ་མཐོང་བ་དང་མ་ཐོས་པ་དང༌། མི་དྲན་པ་མི་ཤེས་པ་ཅི་ཡང་མེད་དོ། ། ཞེས་པའི་དོན་རྣམས་གསུངས་སོ། །འདོམས་ཚུལ་ནི་དེ་ལྟར་བྱང་ཆུབ་སེམས་དཔའ་མིག་ལྔ་ཡོངས་སུ་དག་པ་དང་ཐོབ་པར་འདོད་པས་ཕར་ཕྱིན་དྲུག་ལ་བརྩོན་པར་བྱའོ། །ཞེས་གདམས་སོ། ། མངོན་ཤེས་ཀྱི་ཡོན་ཏན་དྲུག་ལ་གདམས་ཤིང་སྦྱོར་བ་ནི། རྫུུ་འཕྲུལ་གྱི་དང། ལྷའི་རྣ་བའི་དང། གཞན་གྱི་སེམས་ཤེས་པའི་དང། སྔོན་གྱི་གནས་རྗེས་སུ་དྲན་པའི་དང། ལྷའི་མིག་དང། ཟག་པ་ཟད་པ་མངོན་སུམ་དུ་ཤེས་པའི་མངོན་པར་ཤེས་པ་སྟེ། དྲུག་གོ །དེ་རྣམས་ཀུན་རྫོབ་ཀྱི་ཤེས་པས་ཡོངས་སུ་རྫོགས་པ་དང། དོན་དམ་པར་མི་དམིགས་པས་རྣམ་པར་དག་པ་སྟེ་གཉིས་སུ་བསྟན་ཏོ། དེ་ལ་ས་གཡོ་བ་ལ་སོགས་པ་དང༌། ལྷ་མི་གཉིས་ཀའི་སྒྲ་ཐོས་པ་དང། གཞན་གྱི་སེམས་ཆགས་བཅས་ལ་སོགས་ཡང་དག་པ་ཇི་ལྟ་བ་བཞིན་ཤེས་པ་དང། དེ་དང་དེའི་རྣམ་པ་དང་བཅས་པར་རང་གཞན་གྱིས་སྔོན་གྱི་གནས་དུུ་མ་རྗེས་སུ་དྲན་པ་དང༌། སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་དང་ཁ་དོག་སྡུག་མི་སྡུག་དང་བཟང་ངན་དང་ལས་ཇི་ལྟ་བ་བཞིན་དུ་བདེ་འགྲོ་དང་ངན་འགྲོར་འགྲོ་བ་ཤེས་པ་དང༌། ཟག་ཟད་ཀྱི་མངོན་ཤེས་དེས་རྡོ་རྗེ་ལྟ་བུའི་ཏིང་ངེ་འཛིན་ལས་བརྟེན་ནས་བག་ཆགས་དང་འཚམས་སྦྱོར་བ་དང༌། ཉོན་མོངས་པ་ཐམས་ཅད་སྤོང་བར་བྱེད་པ་ནི་ཀུན་རྫོབ་ཀྱི་ཤེས་པས་ཡོངས་སུ་རྫོགས་པ་ཡིན་ནོ། །དེ་དག་རེ་རེའི་རྗེས་སུ་ཤེས་པ་དེ་ཉིད་མི་དམིགས་དེ་ངོ་བོ་ཉིད་ཀྱི་སྟོང་ཞིང་དབེན་ལ་སྐྱེ་བ་མེད་པའི་ཕྱིར་བདག་གིས་ཤེས་སོ་སྙམ་དུ་རློམ་སེམས་མི་བྱེད་དེ་ཞེས་གསུངས་པ་ནི་དོན་དམ་པར་མི་དམིགས་པས་རྣམ་པར་དག་པ་ཡིན་ནོ། །གནོད་འཇོམས་ལས་ཀུན་རྫོབ་ཀྱི་ཤེས་པས་ཡོངས་སུ་རྫོགས་པར་བྱས་ནས་ཕྱིས་དོན་དམ་པར་དམིགས་པར་བྱེད་ཏེ་དེའི་ཕྱིར་ཤིན་ཏུ་ཡོངས་སུ་རྫོགས་པ་དང༌། ཤིན་ཏུུ་རྣམ་པར་དག་པར་འགྱུར་རོ། །ཞེས་སོ། །མདོ་ཉིད་ལས་ཀྱང༌། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དེ་ལྟར་སྦྱོད་པ་ནི་མངོན་པར་ཤེས་པ་དྲུག་ཡོངས་སུ་རྫོགས་པར་འགྱུར། ཡོངས་སུ་དག་པར་འགྱུར་དེ་མངོན་པར་ཤེས་པ་རྣམས་ཡོངས་སུ་དག་པས་རྣམ་པ་ཐམས་ཅད་མཁྱེན་པ་ཉིད་ཐོབ་པ་བྱེད་དོ། །ཞེས་གསུངས་པས་གདམས་པ་མཛད་དོ། །ཉི་ཁྲི་སྣང་བར། སྦྱན་ལྔའི་ལྷའི་སྤྱན་ནི་རྣམ་པར་སྨིན་པ་ལས་བྱུང༌། མངོན་ཤེས་ཀྱི་ལྷའི་སྦྱན་ནི། བསམ་གཏན་འདུས་བྱས་པ་ལས་བྱུང་ཞེས་ཟེར་ཏེ། སྐད་ཅིག་མ་ཡི་སྦྱོར་བའི་སྐབས་ཀྱི་མདོ་ཉིད་ལས། བྱང་ཆུབ་སེམས་དཔའི་ལྷའི་མིག་རྣམ་པར་སྨིན་པ་ལས་བྱུང་བ་གང་གིས་ཞེས་དང༌། རྣམ་པར་སྨིན་པ་ལས་བྱུང་བའི་མངོན་པར་ཤེས་པ་རྣམས་ཞེས་པ་ལན་གཉིས་དང༌། འཕྲིན་ལས་ཀྱི་སྐབས་ལས་ཀྱང༌། བྱང་ཆུབ་སེམས་དཔའ་རྣམ་པར་སྨིན་པ་ལས་བྱུང་བའི་མངོན་པར་ཤེས་པ་དྲུག་ལ་སྦྱོད་པ། ཞེས་དང༌། བྱང་ཆུབ་སེམས་དཔའ་དེ་རྣམ་པར་སྨིན་པ་ལས་བྱུང་བའི་མངོན་པར་ཤེས་པ་དེ་དག་ལ་གནས་ནས། ཞེས་གསུངས་པ་རྣམས་དང་འགལ་བའི་བཤད་པར་སྣང་ངོ༌། །དེས་ན་དེ་དག་གི་ཁྱད་པར་ནི། ལྷའི་སྦྱན་ཞེས་པས་མིང་གཅིག་ཀྱང་སྦྱན་དང་མངོན་ཤེས་ཡིན་མིན་ལས་ཐ་དད་དུ་གཟུང་བར་བྱའོ། །དེ་རྣམས་ཀྱིས་བརྩོན་པར་བྱེད་པའི་དབྱེ་བ་སོང་ཞིང་རྣམ་གྲངས་བཅུ་གཅིག་ལས་དང་པོ་བཤད་ཟིན་ཏོ། །ད་ནི་བརྩོན་པ་ལས་གདམས་པ་འཆད་པ་ནི། རྣམ་གྲངས་གཉིས་པ་རབ་འབྱོར་གྱིས་རྒྱས་པར་བཤད་པ་ནས་བརྩམས་ཏེ། འདིར་བཅོམ་ལྡན་འདས་ཀྱིས་ལྗགས་ཀྱི་དབང་པོ་ཕྱུང་ཞིང་ཕྱོགས་བཅུ་སྣང་བས་བཀང་སྟེ། མཐོང་བསྒོམ་གདམས་ངག་གསན་པའི་སྣོད་ཕྱོགས་བཅུའི་བྱང་ཆུབ་སེམས་དཔའ་རྣམས་བསྡུ་པ་མཛད་དོ། ། དེ་ལ་གདུལ་བྱ་མཐོང་ལམ་ལ་གདམས་པ་ནི། དེ་ནས་བཅོམ་ལྡན་འདས་ཀྱིས་རབ་འབྱོར་ཅི་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཤེར་ཕྱིན་ལ་ངེས་པར་འབྱུང་བར་འགྱུར་བར་ཤེར་ཕྱིན་ལས་བརྩམས་དེ་བྱང་ཆུབ་སེམས་དཔའ་ཆེན་པོ་རྣམས་ལ་ཆོས་ཀྱིས་གཏམ་བྱ་བར་ཁྱོད་སྤོབས་བར་གྱིས་ཤིག ཅེས་གསུངས་པ་ནས། སྨོན་པ་མེད་པའི་ཚིག་བླ་དྭགས་མི་དམིགས་པས་ཤེར་ཕྱིན་ལ་བསླབ་པར་བྱའོ། །ཞེས་པའི་བར་གྱིས། གནས་བརྟན་རབ་འབྱོར་གྱིས་མིང་དང་བདར་གདགས་པ་དང༌། སེམས་ཅན་མི་དམིགས་པ་དང༌། ཚིག་བླ་དྭགས་མི་དམིགས་པ་དང༌། གསུམ་གྱིས་གདུལ་བྱ་མཐོང་ལམ་ལ་གདམས་པ་མཛད་དོ། །གསུམ་པོ་དེ་ཡང་རིམ་བ་ལྟར་ཆོས་ཐམས་ཅད་བཏགས་པ་ཙམ་དུ་ཟད་པས་གཟུགས་སོགས་མིང་དང་བདར་བཏགས་པ་ལ་བསླབ་པ་དང༌། སེམས་ཅན་བསླབ་པ་དང༌། སེམས་ཅན་གཏན་མེད་ཅིང་མི་དམིགས་པས་གཟུགས་སོགས་བྱང་ཆུབ་སེམས་དཔའ་འགྱུར་བ་མེད་པ་དེ་ལྟར་ཤེར་ཕྱིན་ལ་བསླབ་པ་དང༌། གཟུགས་སོགས་གཏན་མེད་ཅིང་མི་དམིགས་པས་བྱང་ཆུབ་སེམས་དཔའ་གཟུགས་སོགས་ཀྱི་ཚིག་བླ་དྭགས་སུ་འགྱུར་བ་མེད་པ་དེ་ལྟར་ཤེར་ཕྱིན་ལ་བསླབ་པར་བྱའོ། །ཞེས་གདམས་སོ། །ཉི་ཁྲི་སྣང་བ་ལ་སོགས་ཀྱིས་སྐབས་འདིའི་མདོ་རྣམས་སྐད་ཅིག་མ་བཅུ་དྲུག་ཏུ་ཕྱེ་ནས་བཤད་དེ་ཤེས་བྱེད་ཁུངས་མ་ནི་མ་མཐོང་ངོ༌། །ད་ནི་གདུལ་བྱ་བསྒོམ་པའི་ལམ་ལ་གདམས་ཤིང་སྦྱར་བ་ནི། ཆོས་ཐམས་ཅད་མ་དམིགས་ཤིང་མ་མཐོང་བའི་ཕྱིར་ཆོས་ཐམས་ཅད་ལ་སེམས་མི་སྐྲག་པ་དེ་ལྟར་ཤེར་ཕྱིན་ལ་བསླབ་པར་བྱའོ་ཞེས་ཆོས་ཐམས་ཅད་མི་དམིགས་པས་བརྩོན་པ་ལ་གདམས་པ་མཛད་དོ། ། མཐོང་བསྒོམ་གཉིས་ཀའི་གདམས་པ་མཇུག་བསྡུས་དེ་བསྟན་པ་ནི། རབ་འབྱོར་བྱང་ཆུབ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་གལ་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་མི་དམིགས་ཤིང་བྱང་ཆུབ་སེམས་དཔའ་དེ་དང་བྱང་ཆུབ་སེམས་དཔའི་མེང་དེ་དང་བྱང་ཆུབ་ཀྱི་སེམས་དེ་ཡང་མི་དམིགས་ན་འདི་ཉིད་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གདམས་པ་ཡིན་ཏེ། འདི་ཉིད་རྗེས་སུ་བསྟན་པ་ཡིན་ནོ། །ཞེས་པས་གདམས་ངག་རིལ་རྫོགས་པར་མཛད་དོ། །བརྩོན་པ་ལ་གདམས་པ་བཤད་ཟིན་ཏོ། །དེ་ལྟར་གདམས་པའི་ངག་གི་ཆེ་བ་ཉིད་ནི་མདོ་སྡེའི་རྒྱུན་ལས། དེ་ལྟར་མཐོང་དཀའི་ཐུབ་པ་རྟག་མཐོང་བ། །ཐོས་པ་མཉམ་མེད་ལས་བྱུང་རབ་དང་བའི། །ཤུགས་ཀྱིས་བརྟག་པར་ཤིན་ཏུ་སེམས་ཚིམ་པ། །ཇི་ལྟར་བུར་ནི་དོན་ཆེན་འགྱུར་མ་ཡིན། །ཆོས་ཀྱི་སྒོ་ལ་རྣམ་པར་གནས་པ་ལ། །དེ་བཞིན་གཤེགས་རྟག་མངོན་སུམ་འདོམས་མཛད་ཅིང༌། །ཇོ་ནས་འདྲེན་བཞིན་ཉེས་པའི་ཚང་ཚིང་ནས། །ཚན་ཕྱིས་དྲངས་དེ་བྱང་ཆུབ་ལ་འགོད་དོ། །སངས་རྒྱས་རྣམས་ནི་རྟག་ཏུ་རང་དོན་ཡང་དག་སྦྱོར་ལ་ལེགས་པར་བསྔགས་པ་དང༌། ལོག་པར་སྦྱོར་ལ་སྨོན་མཛད་གནས་དང་རྣམ་འབྱེད་ལྷུར་ལེན་མཆོག་གི་སེམས་དཔའ་ལ། ། གང་ཞིག་སྤང་དང་བསྟེན་པས་བདེ་གཤེགས་བསྟན་པ་འདི་ལ་རྣལ་འབྱོར་ཡངས་འགྱུར་བ། །བར་ཆད་མཐུན་པའི་ཆོས་ནི་རྣམ་པ་ཐམས་ཅད་རྒྱལ་རྣམས་ཚུལ་བཞིན་འདི་ན་སྟོན། །ཞེས་དེ་གང་གིས་ཆོས་ཀྱི་སྒོའི་རྒྱུན་ལ་གདམས་ངག་ཐོབ་པོ་དེས་ནི་རྟག་ཏུ་སངས་རྒྱས་མཐོང་བར་འགྱུར་རོ། ། དེས་ན་གང་གིས་ནི་ཤིན་ཏུ་དང་བའི་ཐུགས་ཀྱིས་སེམས་ཚིམ་པར་བྱས་པ་འདི། སངས་རྒྱས་རྣམས་རྟག་ཏུ་མཐོང་བ་དེ་དོན་ཆེན་པོར་འགྱུར་བ་མཚུངས་པ་མེད་པའི་ཆོས་ཐོས་སོ། །རང་གི་དོན་ལ་ཡང་དག་སྦྱོར་བ་ནི་ལྷག་པའི་ཚུལ་ཁྲིམས་སོ། །གནས་དང་རྣམ་འབྱེད་ནི་ལྷག་པའི་སེམས་དང་ལྷག་པའི་ཤེས་རབ་པོ། །དེ་དག་གི་བར་ཆད་མཐུན་པའི་ཆོས་སྟོན་པའོ། །གང་ཞིག་སྦངས་དང་བསྟེན་པས་ཞེས་པ་དེ་དག་གོ་རིམ་བཞིན་ནོ། །རྣལ་འབྱོར་ནི་ཞི་གནས་དང་ལྷག་མཐོང་བསྒོམ་པའོ། །དེ་ནི་མཐོང་བར་རབ་དག་མི་རྟོག་བྱང་ཆུབ་ཀྱིས། འཇིག་རྟེན་ཐམས་ཅད་ཟིལ་མནན་མུན་པ་ཆེན་པོ་ཡང་རྣམ་པ་ཀུན་ཏུ་བསལ་ནས་ཉི་མ་ཆེན་པོ་དག ཤར་བ་བཞིན་དུ་འགྲོ་བ་རྣམས་ལ་ལ་མེའོ། །དེ་ལྟར་རྟག་ཏུ་དགེ་བ་བསགས་པས་རབ་གང་ཞིང༌། །ཐུབ་པ་ལས་ནི་རྟག་ཏུ་གདམས་ངག་ཆེ་ཐོབ་པའི། །སེམས་དཔའ་མཆོག་ནི་སེམ་ཀྱི་ཏིང་འཛིན་རབ་སྤངས་པ། །ཐོབ་ནས་ཡོན་ཏན་རྒྱ་མཚོ་ཕ་རོལ་འགྲོ་བར་འགྱུར། །ཞེས་ལམ་བཞི་དང་དེས་འབྲས་བུ་ཐོབ་པ་བསྟན་ནས་ཕན་ཡོན་གྱི་སྒོ་ནས་གདམས་ངག་རྫོགས་པར་གསུངས་པ་ལྟར་འདིར་ཡང་ཆོས་བཅུའི་སྒོ་ནས་གདམས་ངག་བཤད་ཟིན་ཏོ།། ཐེག་དམན་གྱི་དགེ་འདུན་བྱེ་བྲག་ཏུ་བཤད་པ། གདམས་ངག་རྫོགས་ཤིང་ངེས་པར་འབྱེད་པའི་ཡན་ལག་ལམ་ཟིན་པའི་སྐབས་འདིར། ཐེག་དམན་གྱི་གང་ཟག་འདི་རྣམས་ཉི་ཤུའི་གྲངས་ངེས་དང་བཅས་པ་ཕྱོགས་གཅིག་ཏུ་བསྡུས་ནས་སྟོན་པའི་ཤེར་ཕྱིན་གྱི་མདོ་མེད་ཀྱང༌། མདོ་ཉིད་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐེག་པ་གསུམ་ག་རྒྱ་ཆེར་བསྟན་ཞེས་དང༌། མཐར་གྱིས་པའི་སྐབས་སུ་ཡང༌། སྐྱེས་བུ་ཟུང་བཞི་དང༌། གང་ཟག་བརྒྱད་ཅེས་དང༌། གླིང་བཞིའི་སྐབས་བསུ་ཡང༌། བྱང་ཆུབ་སེམས་དཔའ་མ་གཏོགས་པའི་འཁོར་རྣམ་བཞི་བསྟན་པ་དང་གཞན་ཡང་ཐོག་མཐའ་བར་གསུམ་ནས། རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་དང༌། རང་བྱང་ཆུབ་དང༌། ཞེས་པ་ཡང་དང་ཡང་དུ་འབྱུང་ཞིང༌། ཉན་ཐོས་དང་རང་སངས་རྒྱས་ཞེས་ཀྱང་ཡང་དང་ཡང་དུ་གསུངས་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདིར་ཐེག་པ་གསུམ་ག་རྒྱ་ཆེར་བསྟན་པའི་ཕྱིར་དེ་ལ་སློབ་པའི་གང་ཟག་གསུམ་ཡང་བསྟན་དགོས་པ་ལ། ཐེག་ཆེན་ལ་སློབ་པའི་གང་ཟག་ནི་སྔར་རྒྱལ་སྲས་བཞི་བཅུ་རྩ་ལྔ་མདོ་ཉིད་ལས་གསུངས་པ་སློབ་དཔོན་དབྱིག་གཉེན་དང་འབུམ་ཊིག་མཁན་པོ་ལ་སོགས་པ་ཤིང་རྟའི་སྲོལ་འབྱེད་ཆེན་པོ་ཚད་མར་གྱུར་པ་དེ་དག་གིས་ལེགས་པར་བཀྲལ་ལ། སྐབས་འདིར་ནི་རྗེ་བཙུན་མི་ཕམ་མགོན་པོས། ཐེག་པ་འོག་མ་གཉིས་ལས། སློབ་པའི་གང་ཟག་ཀུན་ཤེས་ཉིད་ཀྱིས་ཉེར་ཞིར་ཁྲིད་པར་བྱ་རྒྱུ་ཉི་ཤུ་བསྟན་པ་ནི་ཐེག་དམན་གྱི་གང་ཟག་མདོའི་གོང་འོག་བར་གསུམ་དུ་འབྱུང་བ་རྣམས་ཕྱོགས་གཅིག་ཏུ་བསྡུས་ནས། དབང་པོ་རྟུལ་དང་རྣོན་པོ་དག། དད་དང་མཐོང་ཐོབ་རིགས་ནས་རིགས། །བར་ཆད་གཅིག་པར་སྐྱེས་ནས་དང༌། །བྱེད་དང་བྱེད་མིན་འོག་མིན་འགྲོ། འཕར་གསུམ་སྲིད་རྩེའི་མཐར་ཐུག་འགྲོ། །གཟུགས་ཀྱི་ཆགས་བཅོམ་མཐོང་བ་ཡི། །ཆོས་ལ་ཞི་ལུས་མངོན་གསུམ་བྱེད། །བསེ་རུ་དང་ནི་ཉི་ཤུའོ། །ཞེས་ཚིགས་སུ་བཅད་པ་གཉིས་པོ་འདིས་རྣམ་པའི་དབྱེ་བ་ཉི་ཤུ་པོ་འདིར་ཐེག་དམན་གྱི་གང་ཟག་འདུས་པར་གསུངས་སོ། ། ཉི་ཤུར་ཇི་ལྟར་དབྱེ་ཞེ་ན་དབང་པོ་རྟུལ་པོ་དང༌། དབང་པོ་རྣོན་པོ་གཉིས་དང༌། དེའི་སྟེང་དུ། དད་པས་མོས་པ་དང༌། མཐོང་བས་ཐོབ་པ་གཉིས་སྟེ་བཞིའོ། །དེའི་སྟེང་དུ་ལྷའི་རིགས་ནས་རིགས་སུ་སྐྱེ་བ་དང༌། མིའི་རིགས་ནས་རིགས་སུ་སྐྱེ་བ་གཉིས་ཏེ་དྲུག་གོ །དེའི་སྟེང་དུ་ཚེ་གཅིག་བར་ཆད་གཅིག་པ་སྟེ་བདུན་ནོ། །དེའི་སྟེང་དུ་བར་མ་དོར། མྱ་ངན་ལས་འདའ་བ་དང༌། སྐྱེ་ནས་འདའ་བ་དང༌། མངོན་པརའདུ་བྱེད་པ་དང་བཅས་པས་འདའ་བ་དང༌། མངོན་པར་འདུ་བྱེད་པ་མ་ཡིན་པར་འདའ་བ་དང་བཞི་སྟེ་བཅུ་གཅིག་གོ །དེའི་སྟེང་དུ། འོག་མིན་དུ་འགྲོ་བ་དང་བཅུ་གཉིས་སོ། །དེའི་སྟེང་དུ། འཕར་བ་གསུམ་དེ་བཅོ་ལྔའོ། །དེའི་སྟེང་དུ། སྲིད་རྩེའི་མཐར་ཐུག་འགྲོ་བ་དང་བཅུ་དྲུག་གོ །དེའི་སྟེང་དུ། གཟུགས་ཀྱི་ཆགས་བཅོམ་དང་བཅུ་བདུན་ནོ། །དེའི་སྟེང་དུ་མཐོང་བའི་ཆོས་ལ་ཞི་བ་ཐོབ་པ་དང་བཅོ་བརྒྱད་དོ། །དེའི་སྟེང་དུ༌། ལུས་ཀྱི་མངོན་གསུམ་དུ་བྱེད་པ་དང་བཅུ་དགུའོ། ། དེའི་སྟེང་དུ། བསེ་རུ་ལྟ་བུུ་སྟེ་རང་སངས་རྒྱས་དང་ཉི་ཤུའོ། །དེ་ཡང་འཇིག་རྟེན་པའི་ལམ་གྱིས་སྔར་བསྒོམས་པ་ཡང་ཅི་རིགས་ལས་གྲོལ་བ་དང༌། མཐར་ཕྱིན་གྱི་འཇུག་པ་གཉིས་སོ། །དེ་ལ་དང་པོ་ནི་དབང་པོ་རྣོ་རྟུལ་དེ་དག་མཐོང་ལམ་སྐད་ཅིག་བཅོ་ལྔ་བཤད་པ་གང་ཡིན་པ་དེ་དག་ལ་གནས་པ་ནི་དད་པས་རྗེས་སུ་འབྲང་བ་དང་ཆོས་ཀྱི་རྗེས་སུ་འབྲང་བའོ། །དེ་གཉིས་འཇིག་རྟེན་པའི་ལམ་གྱིས་སྔོན་བསྒོམ་སྤང་མ་སྤངས་པ་དང༌། སྔོན་འདོད་པའི་སྒོམ་སྤང་ལྔའི་བར་དུ་སྤངས་ན་ཡང་འབྲས་སུ་རྣམས་ཀྱི་དང་པོ་རྒྱུན་དུ་ཞུགས་པའི་འབྲས་བུ་ལ་ཞུགས་པའོ། །མྱ་ངན་ལས་འདས་པའི་རྒྱུ་ནི་ལམ་སྟེ་དེ་ནས་དེར་འགྲོ་བའི་ཕྱིར་དེར་ཞུགས་ཤིང་ཕྱིན་ལ་སོན་པས་ན་རྒྱུན་དུ་ཞུགས་པ་ཡིན་ནོ། །གལ་ཏེ་དེ་གཉིས་ཀྱིས་འདོད་པའི་སྒོམ་སྦང་དྲུག་གམ་བདུན་ནམ་བརྒྱད་དག་གཅིག་སྔོན་སྤངས་ན་འབྲས་བུ་གཉིས་པ་ལན་གཅིག་ཕྱིར་འོང་གི་འབྲས་བུ་ལ་ཞུགས་པ་ཡིན་ནོ། །དགུ་པ་སྤངས་པའི་འདོད་པ་ལས་འདོད་ཆགས་དང་བྲལ་བ་འམ་གོང་མ་ཅི་ཡང་མེད་པ་སྐྱེ་མཆེད་ཀྱི་བར་ལས་འདོད་ཆགས་དང་བྲལ་བ་ཡིན་ན་དེ་གཉིས་འབྲས་བུ་གསུམ་པ་ཕྱིར་མི་འོང་གི་འབྲས་བུ་ལ་ཞུགས་པའོ། །སེམས་བཅུ་དྲུག་པ་སྐྱེས་ན་དེ་གཉིས་དད་་པས་མོས་པ་དང་མཐོང་བས་ཐོབ་པ་ཞེས་བྱ་བ་དང། འབྲས་བུ་དང་དེ་ལ་གནས་ཡིན་གྱི། དད་པ་དང་ཆོས་ཀྱི་རྗེས་སུ་འབྲང་བ་དང༌། ཞུགས་པ་ནི་མ་ཡིན་ནོ། །གལ་ཏེ་རྣམ་པ་ལྔའི་བར་དུ་སྤངས་ཀྱང་སེམས་བཅུ་དྲུག་པ་ལ་རྒྱུན་དུ་ཞུགས་པ་ཁོ་ན་ཡིན་གྱི། ལན་ཅིག་འོང་་གི་འབྲས་བུ་ལ་ཞུགས་པ་མ་ཡིན་ཞེ་ན། གང་གི་ཕྱིར་འབྲས་བུ་ཐོབ་ནས་འབྲས་བུ་ཁྱད་པར་ཅན་གྱི་ལམ་མི་འཐོབ་པ་དེ་ནི་ངེས་སོ། །དེའི་ཕྱིར་འབྲས་བུ་ལ་གནས་པ་ཇི་སྲིད་དུ་ཁྱད་པར་དུ་བྱ་བའི་ཕྱིར་འབྲས་བུ་གཞན་ཐོབ་པར་བྱ་བ་ལ་མི་བརྩོན་པ་དེ་སྲིད་དུ་ཞུགས་པ་མ་ཡིན་ནོ། །དེ་བཞིན་དུ་འབྲས་བུ་གཞན་ལ་ཡང་སྦྱར་བར་བྱའོ། །མཛོད་ལས། དེ་ལ་སྐད་ཅིག་བཅོ་ལྔ་ནི། །མ་མཐོང་མཐོང་ཕྱིར་མཐོང་བའི་ལམ། །དབང་པོ་རྣོ་རྟུལ་དེ་དག་ཏུ། །དད་དང་ཆོས་ཀྱི་རྗེས་འབྲང་བ། །བསྒོམ་པས་སྤང་བྱ་མ་སྤངས་ན། །འབྲས་བུ་དང་པོ་ལ་ཞུགས་པ། །རྣམ་ལྔའི་བར་བཅོམ་གཉིས་པ་ལ། །དགུ་པ་ཚུན་ཆད་ཟད་པ་ཡིན། །འདོད་པ་གཅིག་པ་འམ་ཡང་ན་གོང་མ་ལས། །ཆགས་བྲལ་གསུམ་པ་ལ་ཞུགས་པ། །གང་ཞིག་གང་ལ་ཞུགས་པ་ནི། །བཅུ་དྲུག་པ་ལ་དེ་འབྲས་གནས། ། དེ་ཚེ་དབང་པོ་རྣོ་རྟུལ་དག །དད་པས་མོས་དང་མཐོང་བས་ཐོབ། །འབྲས་ཐོབ་འབྲས་བུ་ཁྱད་པར་གྱི། །ལམ་ཐོབ་མེད་པས་དེ་ཡི་ཕྱིར། །འབྲས་གནས་ཁྱད་པར་བྱ་བའི་ཕྱིར། ། མི་བརྩོན་པ་ནི་ཞུགས་མ་ཡིན། །ཞེས་གསུངས་སོ། ། ད་ནི་གཉིས་པ་མཐར་གྱིས་འཇུག་པ་བརྗོད་པར་བྱ་སྟེ། དེ་ལ་རྒྱུན་དུ་ཞུགས་པ་ལ་ཇི་ལྟར་ཐོགས་ན་ལན་བདུན་པ་དང༌། ལྷ་དང་མིའི་རིགས་ནས་རིགས་སུ་སྐྱེ་བ་གཉིས་ཏེ་གསུམ་མོ། །ཕྱིར་འོང་ལ་ཞུགས་གནས་གཉིས་དང་བར་ཆད་གཅིག་པ་སྟེ་གསུམ་མོ། །ཕྱིར་མི་འོང་བ་ལ་ཞུགས་གནས་གཉིས་ལ་ཞུགས་པ་ནི། སྔར་གྱི་བར་ཆད་གཅིག་པ་དེ་ཉིད་དོ། །གནས་པ་ལ་བདུན་ལས་བར་མ་དོར་མྱ་ངན་ལས་འདའ་བ་དང༌། སྐྱེས་ནས་འདའ་བ་དང༌། འདུུ་བྱེད་པ་དང༌། འདུ་བྱེད་པ་མེད་པ་དང་གོང་དུ་འཕོ་བ་སྟེ་ལྔའོ། །གཟུགས་ཀྱི་ཆགས་བཅོམ་ནི་དྲུག་པའོ། །མཐོང་བའི་ཆོས་ཚེ་འདི་ལ་ཞི་བ་མྱ་ངན་ལས་འདས་པ་ནི་བདུན་པའོ། ། དེ་ལ་ཇི་ལྟར་འདོད་པའི་ཁམས་ཀྱི་ཉོན་མོངས་པ་རྣམ་པ་དགུ་ཡིན་པ་དེ་བཞིན་དུ་སྲིད་རྩེའི་པར་དུས་རེ་རེ་ལ་ཡང་དགུ་དགུའོ། །ས་དང་ས་ན་དེའི་གཉེན་པོ་བར་ཆད་མེད་པའི་ལམ་དང་རྣམ་གྲོལ་གྱི་ལམ་ཡང་དེ་སྙེད་དོ། །ཇི་ལྟར་བྱས་པས་ཞེ་ན། རྩ་བའི་ཆུང་ངུ་དང་འབྲིང་དང་ཆེན་པོ་གསུམ་སྟེ། དེ་རེ་རེ་ཡང་ཆུང་ངུ་ལ་སོགས་སུ་ཕྱེ་བས་སོ། །ཇི་སྐད་དུ་མཛོད་ལས། ས་དང་ས་ནས་མཉེས་རྣམ་དགུ། །དེ་བཞིན་དུ་ནི་ཡོན་ཏན་རྣམས། །ཆུང་དང་འབྲིང་དང་ཆ་རྣམས་ཀྱི། །ཆུང་ངུ་ལ་སོགས་ཐ་དད་ཕྱིར། །ཞེས་སོ། །གོས་ཀྱི་དྲི་མ་ཆེ་ལོང་ནི་སྔར་འཁྲུལ་ཕྲ་མོ་ནི་ཕྱིས་འཁྲུལ་པ་དང་མུན་པ་ཆེ་ལོང་ནི་སྣང་བ་ཆུང་ངུ་དང༌། མུན་པ་ཕྲ་མོ་ནི་སྣང་བ་ཆེན་པོས་སེལ་བ་བཞིན་དུ་སྤངས་གཉེན་དེ་དག་གམ་སྤོང་ཚུལ་ཡིན་ཏེ། སྔར་ལམ་ཆེན་པོ་དང༌། ཕྱིས་སྤང་བྱ་ཆེན་པོ་མི་སྲིད་ཅིང་ཆོས་དཀར་པོ་རྣམས་ནི་སྟོབས་དང་ལྡན་ལ་ནག་པོ་རྣམས་ནི་སྟོབས་ཆུང་བའི་ཕྱིར་རོ། །འབྲས་བུ་ལ་གནས་པ་སྒོམ་སྤང་གི་ཉོན་མོངས་པ་གཅིག་ཀྱང་མ་སྤངས་པ་དེ་ནི་རྒྱུན་དུ་ཞུགས་པ་ཡིན་ལ། ཤིན་ཏུ་ཐོགས་ནས་ཐ་ཤལ་ནི་ཚེ་བདུན་གྱི་བར་སྐྱེ་བ་སྲིད་ཅིང་ཐམས་ཅད་ནི་མ་ཡིན་པས་ན་དེ་ལྟར་ཐོགས་ན་ལན་བདུན་པའོ། །མཛོད་ལས། འབྲས་གནས་བསྒོམ་སྤངས་བྱ་མ་ཟད། །རེ་ལྟར་ཐོགས་ན་ལན་བདུན་པ། །ཞེས་སོ། །ཅིའི་ཕྱིར་སྲིད་པ་བརྒྱད་པ་མི་འགྲུབ་ཅེ་ན། དུས་དེ་སྲིད་ཀྱིས་ངེས་པར་རྒྱུད་ཡོངས་སུ་སྨིན་པའི་ཕྱིར། སྦྲུལ་གོམ་པ་བདུན་པས་ཟིན་པ་ལྟ་བུའོ། །རྒྱུན་དུ་ཞུགས་པ་དེ་ཉིད་རྒྱུ་གསུམ་གྱིས་རིགས་ནས་རིགས་སུ་སྐྱེ་བ་ཡིན་ཏེ། སྦངས་པ་ལ་ཉོན་མོངས་པ་གསུམ་འམ་བཞི་སྤངས་པ་དང༌། དབང་་པོ་ལས་དེའི་གཉེན་པོ་ཟག་མེད་ཀྱི་དབང་པོ་ཐོབ་པ་དང༌། སྐྱེ་བ་ལས་ཚེ་གཅིག་གམ་གཉིས་ལུས་པའི་ཕྱིར་རོ། །ལྔ་སྤངས་པ་ནི་དེ་དག་མ་ཡིན་དེ། །དེ་སྤངས་ན་དྲུག་པ་སྤང་ངེས་པར་སྤོངས་བའི་ཕྱིར་དེ་བར་ཆད་གཅིག་པའི་བཞིན་དུ་གཅིག་གིས་དེའི་འབྲས་བུ་ལ་གེགས་བྱ་བར་མི་་་་་ནུས་ཏེ། ཁམས་ལས་མི་འདའ་བའི་ཕྱིར་རོ། །ལྷ་དག་གི་ནང་དུ་གཉིས་སམ་གསུམ་འཁོར་ནས་ལྷའི་རིགས་དེ་འང་དེ་ལས་གཞན་དུ་མྱ་ངན་འདའ་བ་དང༌། མིའི་ནང་དུ་རིགས་གཉིས་སམ་གསུམ་འཁོར་ནས་གླིང་ཏེ་འམ་གཞན་དུས་ངན་ལས་འདའ་བའི་ཕྱིར་ལྷའི་རིགས་ནས་རིགས་དང་མིའི་རིགས་ནས་རིགས་སོ། ། ཇི་སྐད་དུ། རྣམ་གསུམ་རྣམ་བཞི་ལས་གྲོལ་བ། །ཚེ་གཉིས་གསུམ་དུ་རིགས་ནས་རིགས། ཞེས་གསུངས་སོ། །འབྲས་བུུ་ལ་གནས་པ་དེས་ལྔའི་བར་དུ་སྤངས་ན་ལན་གཅིག་ཕྱིར་འོང་ལ་ཞུགས་པ་ཡིན་ལ། དྲུག་པ་སྤངས་ན་ལན་གཅིག་ཕྱིར་འོང་ཡིན་ཏེ། ཇི་སྐད་དུ། རྣམ་པ་ལྔ་ཡིས་པར་བཅོམ་པ། ། གཉིས་པ་ལ་ནི་ཞུགས་པ་ཡིན། །རྣམ་པ་དྲུག་པ་ཟད་གྱུར་པ། །དེ་ནི་ལན་གཅིག་ཕྱིར་འོང་ཡིན། །ཞེས་གསུངས་སོ། །དེ་ལྷའི་ནང་དུ་སོང་ནས་མིའི་འཇིག་རྟེན་དུ་ལན་གཅིག་ཕྱིར་འོང་གི་ཕན་ཆད་སྐྱེ་བ་མེད་པའི་ཕྱིར་ལན་གཅིག་ཕྱིར་འོང་བ་ཞེས་བྱའོ། ། ཡང་ལན་གཅིག་ཕྱིར་འོང་བ་དེ་ཉིད་རྒྱུ་གསུམ་གྱིས་པར་ཆད་གཅིག་པ་ཡིན་ཏེ། ཉོན་མོངས་བདུན་ནས་བརྒྱད་སྤངས་པ་དང༌། དེའི་གཉེན་པོ་ཟག་མེད་ཀྱི་དབང་པོ་ཐོབ་པ་དང༌། ཚེ་གཅིག་ལུས་པའི་ཕྱིར་རོ། །དེ་ནི་འབྲས་བུ་གསུམ་པ་ལ་ཞུགས་པ་ཡང་ཡིན་ནོ། །ཇི་སྐད་དུ། ཉེས་ཆ་བདུན་དང་བརྒྱད་ཟད་པ། །ཚེ་གཅིག་བར་ཆད་གཅིག་པ་དང༌། །གསུམ་པ་ལ་ནི་ཞུགས་པ་འང་ཡིན་ཞེས་སོ། །མྱ་ངན་འདས་ལ་ཚེ་གཅིག་གིས་ཆོད་པའི་ཕྱིར་རམ་འབྲས་བུ་གསུམ་པ་ལ་ཉོན་མོངས་པ་གཅིག་གིས་ཆོད་པའི་ཕྱིར་ཚེ་གཅིག་བར་ཆད་གཅིག་པའོ། །ཁམས་ལས་འདའ་བའི་ཕྱིར་གཅིག་འབྲས་བུ་ལ་གེགས་བྱེད་པར་ནུས་སོ། །སྔོན་གསུམ་དང་བཞི་སྤངས་པ་དང༌། །བདུན་དང་བརྒྱད་སྤངས་པ་ནི་སྲིད་དུ་འབྲས་བུ་ཁྱད་པར་ཅན་གྱི་ལམ་མངོན་དུ་མ་བྱས་པ་དེ་སྲིད་དུ་རིགས་ནས་རིགས་སུ་སྐྱེ་བ་དང་བར་ཆད་གཅིག་པ་མ་ཡིན་ནོ། །འབྲས་བུ་ལ་གནས་པ་དེ་ཉིད་རྣམ་པ་དགུ་སྤངས་པས་འདོད་པའི་ཁམས་སུ་ཕྱིར་མི་འོང་བ་ཡིན་ཏེ། ཇི་སྐད་དུ་དེ་དགུ་ཟད་པས་ཕྱིར་མི་འོང༌། ཞེས་སོ། །ཕྱིར་མི་འོང་དེ་ཉིད་རེ་ཞིག་རྣམ་པ་ལྔ་ཡིན་ཏེ། བར་དོར་མྱ་ངན་ལས་འདའ་པའི་ཕྱིར་བར་མ་དོར་འདའ་བ་དང་སྐྱེས་ཙམ་ལས་མི་འཕྱི་བར་ཕུང་པོའི་ལྷག་མ་དང་བཅས་པའི་མྱ་ངན་ལས་འདའ་བའི་ཕྱིར་སྐྱེས་ནས་འདའ་བ་དང༌། ལམ་ངང་གིས་འབྱུང་བ་ལམ་ལ་འབད་པ་མེད་པར་མྱ་ངན་ལས་འདའ་བའི་ཕྱིར་མངོན་པར་མ་བྱེད་པ་ཡིན་པ་དང༌། ལམ་ངང་གིས་འབྱུང་བ་མ་ཡིན་པ་ནི་ལམ་ལ་འབད་པས་མྱ་ངན་ལས་འདའ་བའི་ཕྱིར་མངོན་པར་འདུ་བྱེད་པ་དང་བཅས་པ་དང༌། གང་དུ་སྐྱེས་པ་དེ་ཉིད་དུ་མྱ་ངན་ལས་མི་འདའ་བརགོང་དུ་འགྲོ་བའི་ཕྱིར་གོང་དུ་འཕོ་བ་དང་ལྔའོ། །ཇི་སྐད་དུ། དེ་ནི་པར་སྐྱེས་འདུ་བྱེད་དང༌། །འདུ་བྱེད་མེད་ཡོངས་མྱ་ངན་འདའ། །གོང་དུུ་འཕོ་བ་རྣམས་ཞེས་གསུངས་སོ། ། ཕྱིར་མི་འོང་བ་བར་མ་དོ་དང་སྐྱེས་ནས་དང་གོང་ནས་གོང་དུ་འཕོ་བ་གསུམ་པོ་ལ་གསུམ་གསུམ་དུ་ཕྱེ་ནས་གཟུགས་སུ་ཉེ་བར་འགྲོ་བའི་ཕྱིར་མི་འོང་དགུའོ། །བར་མ་དོར་འདའ་ནི་དཔེ་གསུམ་གྱིས་མྱུར་བ་དང༌། མྱུར་བ་མ་ཡིན་པ་དང༌། ཡུན་རིང་མོ་ཞིག་ནས་མྱ་ངན་ལས་འདའ་བ་སྟེ་གསུམ་མོ། ། སྐྱེས་ནས་འདའ་བ་ནི། སྐྱེ་ནས་དང༌། འདུ་བྱེད་པ་དང༌། འདུ་བྱེད་པ་མེད་པར་མྱ་ངན་འདའ་བ་གསུམ་མོ། །གོང་དུ་འཕོ་བ་ནི་འཕར་བ་གསུམ་མོ། །ཡང་སྐྱེས་ནས་ལ་སོགས་པ་གཉིས་པོ་ཡང་མྱུར་བ་ལ་སོགས་པ་གསུམ་གསུམ་དུ་དབྱེའོ། །ཇི་སྐད་དུ། གསུམ་ལ་ཡང་རྣམ་གསུམ་ཕྱེ་ནས། །གཟུགས་སུ་ཉེར་འགྲོ་དགུ་བཤད་དོ། །ཞེས་སོ། །དགུའི་དབྱེ་གཞི་གསུམ་པོ་དེ་དག་གི་ཁྱད་པར་ནི། ལས་དང་དབང་པོ་ཉོན་མོངས་པའི་བྱེ་བྲག་ལས་བར་མ་དོ་ལ་སོགས་པ་གསུམ་པོ་གོ་རིམ་བཞིན་དུ། མངོན་པར་གྲུབ་པ་དང༌། སྐྱེས་བ་དང༌། ལན་གྲངས་གཞན་ལ་མྱོང་འགྱུར་གྱི་ལས་བསགས་པ་དང༌། ཉོན་མོངས་པ་ཀུན་ཏུ་སྤྱོད་བ་ཆུང་བ་དང༌། འབྲིང་དང༌། ཆེན་པོའི་ཕྱིར་དང༌། དབང་པོ་ཆེན་པོ་དང༌། འབྲིང་དང༌། ཆུང་ངུའི་ཕྱིར་རོ། །གསུམ་པོ་རེ་རེ་ཡང༌། ཉོན་མོངས་དང༌། དབང་པོ་ཆུང་ངུའི་ཆུང་ངུ་ལ་སོགས་པའི་བྱེ་བྲག་གིས་ཕྱིར་མི་འོང་དགུ་ཡིན་ནོ། །ཇི་སྐད་དུ། དེ་དག་གི་ནི་ཁྱད་པར་རྣམས། །ལས་དང་ཉོན་མོངས་བྱེ་བྲག་ལས་ཞེས་སོ། །དེ་དག་ལས་གཉིས་པོ་གསུམ་གསུམ་དབྱེ་ཞིང་གོང་དུ་འཕོ་བ་གཅིག་ཏུ་བྱས་པ་ནི་སྐྱེས་བུ་དམ་པའི་འགྲོ་བ་བདུན་ཏེ། ཇི་སྐད་དུ། གོང་དུ་འཕོ་བ་མ་ཕྱེ་བར། །དམ་པའི་འགྲོ་བ་བདུན་དུ་འདོད། །ཅེས་སོ། །འདི་དག་ཁོ་ན་དམ་པ་ཡིན་ཞིང་སློབ་པ་གཞན་དག་མ་ཡིན་པ་ནི་རྣམ་གྲངས་པའི་དམ་པ་སློབ་པ་གཞན་དག་ལ་ཡང་ཡོད་ཀྱང་འདིར་ནི་རྣམ་གྲངས་མེད་པའི་དམ་པ་ཡིན་ནོ། །འདི་དག་དགེ་བ་ཁོ་ན་ལ་འཇུག་པ་དང༌། མི་དགེ་བ་ལ་མི་འཇུག་པ་དང༌། འགྲོ་བ་འདི་དག་དུ་སོན་པ་ནི་དམ་པའི་དོན་དེ། ཇི་སྐད་དུ། དམ་པ་དམ་མིན་འཇུག་མི་འཇུག །སོན་པ་ཕྱིར་མི་འོང་ཕྱིར་ཏེ། །ཞེས་པ་དམ་པའི་འགྲོ་བ་ཡིན་ནོ། ། གོང་དུ་འགྲོ་བ་ལ་འགྲོ་བ་ཞེས་སོ། །འདོད་པའི་ཁམས་སུ་ཚེ་ཡོངས་སུ་གྱུར་པའི་འཕགས་པ་ལ་ནི་གོང་དུ་འགྲོ་བའི་དབྱེ་བ་འདི་མེད་དེ། །ཚེ་དེ་ཉིད་ལ་ཕྱིར་མི་འོང་གི་འབྲས་བུ་ཐོབ་ནས་མྱ་ངན་ལས་འདའ་བའི་ཕྱིར། །འཕགས་པ་འདི་དང་ཁམས་གོང་མར་སྐྱེས་པའི་འཕགས་པ་ནི་ཚེ་གཞན་ལ་འདྲེས་པས་དབང་པོ་རྣམས་སྨིན་པ་དང༌། རྟེན་ཁྱད་པར་ཅན་ཐོབ་པའི་ཕྱིར་རོ། །དབང་པོ་འཕོ་བ་ཡོངས་སུ་ཉམས་པ་མེད་དོ། །ཇི་སྐད་དུ། འདོད་པར་ཚེ་ཡོངས་གྱུར་པའི་འཕགས། །ཁམས་གཞན་དུ་ནི་འགྲོ་བ་མེད། །དེ་དང་གོང་མར་སྐྱེས་པ་ནི། །ཡོངས་ཉམས་དབང་པོ་འཕོ་མི་བསྟེན། །ཞེས་གསུངས་སོ། །ལྔ་པ་གོང་དུ་འཕོ་བ་དེ་ནི་བསམ་གཏན་སྤེལ་ན་པར་སྐབས་སུ་འདའ་བ་སྲིད་ཀྱང་ཐ་མ་འོག་མིན་ལ་ཐུག་པར་འགྲོ་སྟེ། ཇི་སྐད་དུ། དེ་ནི་བསམ་གཏན་སྤེལ་ན་འོག་མིན་འགྲོ། ཞེས་སོ། ། འདི་ནི་ལྷག་མཐོང་སྤྱད་པ་ཡིན་ལ་འོག་མིན་དུ་འགྲོ་བ་འདི་ལ་དབྱེ་བ་གསུམ་སྟེ། བསམ་གཏན་རྣམས་སྤེལ་ནས་བསམ་གཏན་དང་པོའི་རོ་མྱངས་དེ་བསམ་གཏན་གསུམ་པ་ལས་ཉམས་པ་ཚངས་རིས་པའི་ནང་དུ་སྐྱེས་ནས་སྔོན་གོམས་པའི་དབང་གིས་བསམ་གཏན་བཞི་པ་སྤེལ་ཏེ། དེ་ནས་ཤི་འཕོ་ནས་འོག་མིན་པའི་ནང་དུ་སྐྱེ་བ་དེ་ནི་པར་དུ་མི་འགྲོ་བས་འཕར་བ་ཞེས་བྱའོ། །གནས་གཙང་མ་རྣམས་སུ་སྐྱེས་ལ་པར་ནས་གནས་འགའ་ཙམ་རྒལ་དེ་དེ་འོག་མིན་དུ་སྐྱེ་བ་དེ་ནི་ཕྱེད་དུ་འཕར་བ་ཞེས་བྱའོ། །འཕགས་པ་ནི་་ཚངས་ཆེན་པའི་ནང་དུ་མི་སྐྱེ་སྟེ། ལྟ་བའི་གནས་ཡིན་པ་དང་གཙོ་བོ་གཅིག་ཏུ་ཟད་པའི་ཕྱིར་རོ། །གནས་གཞན་ཐམས་ཅད་དུ་འཕོ་ནས་འོག་མིན་དུ་འཇུག་པ་ནི་གནས་ཐམས་ཅད་དུ་འཆི་འཕོ་བ་ཞེས་བྱའོ། །འོག་མིན་འགྲོ་བའི་དབྱེ་བ་འཕར་བ་གསུམ་པོ་དེའོ། །ཇི་སྐད་དུ། དེ་འཕར་བྱེད་འཕར་ཐམས་ཅད་དུ་འཆི་འཕོ་ཞེས་སོ། །ཕྱིར་མི་འོང་བའི་དོན་ནི་སྐྱེ་པའི་སྐྱེ་མཆེད་དེ་ཉིད་དུ་ཚེ་གཉིས་པ་འགྲུབ་པར་མི་བྱེད་དེ། ཁྱད་པར་འགྲོ་བའི་ཕྱིར་རོ། །དེ་ལྟར་ན་ཕྱིར་མི་འོང་བ་ཡིན་དེ་གང་དུ་སྐྱེས་པ་དེར་དང་འོག་ཏུ་གཏན་མི་འོང་བའི་ཕྱིར་རོ། །གོང་དུ་འཕོ་བ་བསམ་གཏན་མ་སྤེལ་ན་བར་སྐབས་སུ་མྱ་ངན་ལས་འདའ་སྲིད་ཀྱང་ཐ་མ་སྲིད་རྩེའི་བར་དུ་འགྲོ་བ་ནི། སྙོམས་པར་འཇུག་པ་གཞན་རྣམས་ཀྱི་རོ་མྱང་བར་བྱེད་ཅང་གནས་གཙང་མ་རྣམས་མ་གཏོགས་པ་གནས་གཞན་ཐམས་ཅད་དུ་གཟུགས་མེད་པར་སྐྱེ་བའི་རིམ་གྱིས་སྲིད་རྩེར་སོང་སྟེ་མྱ་ངན་འདའ་བའོ། །ཇི་སྐད་དུ། གཞན་སྲིད་རྩེ་མོར་འགྲོ་ཞེས་སོ། །འདི་ནི་ཞི་གནས་སྤྱད་པ་ཡིན་ནོ། །དེ་ལ་བསམ་གཏན་སྤེལ་བ་ནི་འདི་ལྟ་སྟེ། དགྲ་བཅོམ་པའམ་ཕྱིར་མི་འོང་བ་ཡང་རུང༌། ཟག་མེད་ཀྱིས་བསམ་གཏན་བཞི་པ་རྒྱུན་ལྡན་ལ་སྙོམས་པར་འཇུག་ཅིང༌། དེ་ལས་ལངས་ནས་དེ་ཉིད་ཟག་བཅས་རྒྱུན་ལྡན་ལ་སྙོམས་པར་འཇུག་ལ། ཡང་ཟག་མེད་ལ་འཇུག་སྟེ། དེ་བཞིན་དུ་ནི་ཕྲི་ནས་སྐད་ཅིག་མ་གཉིས་ཟག་མེད་ལ་འཇུག་ཅིང༌། སྐད་ཅིག་མ་གཉིས་ཟག་བཅས་ལ་འཇུག་ལ་ཡང་ཟག་མེད་ལ་སྙོམས་པར་འཇུག་པ་ནི་སྤེལ་བའི་སྦྱོར་བ་སྟེ། ཟག་བཅས་དང་ཟག་མེད་ཀྱི་སྐད་ཅིག་མ་བསྲེས་པས་སྤེལ་བ་གྲུབ་པོ། །ཇི་སྐད་དུ། དང་བོར་བཞི་པ་སྤེལ་བར་བྱེད། །སྐད་ཅིག་མ་ནི་བསྲེས་པས་འགྲུབ་ཅེས་སོ། །དང་པོ་འདོད་ཁམས་ཀྱི་གླིང་གསུམ་དུ་སྤེལ་བར་བྱེད་ལ་ཕྱིས་ནི་ཡོངས་སུ་ཉམས་པར་གཟུགས་ཀྱི་ཁམས་སུ་སྤེལ་བར་བྱེད་དོ། །བསམ་གཏན་སྤེལ་བའི་དགོས་པ་ནི། ཕྱིར་མི་འོང་དབང་རྣོན་རྣམས་ནི་གནས་གཙང་མ་རྣམས་སུ་སྐྱེ་བའི་ཕྱིར་དང༌། མཐོང་བའི་ཆོས་ལ་བདེ་བར་གནས་པའི་ཕྱིར་རོ། །དབང་པོ་རྟུལ་པོ་རྣམས་ནི་ཉོན་མོངས་པ་འཇིག་པའི་ཡང་ཕྱིར་རོ། །ཇི་སྐད་དུ། སྐྱེ་དང་གནས་པར་བྱ་ཕྱིར་དང༌། ཉོན་མོངས་པས་ནི་འཇིགས་ཕྱིར་ཡང༌། ཞེས་སོ། །བསམ་གཏན་བཞི་པ་སྤེལ་མར་བསྒོམ་པ་ལྔའི་བྱེ་བྲག་གི་ཕྱིར་གནས་གཙང་མར་སྐྱེ་བ་ནི་ལྔ་ཁོ་ན་ཡིན་ནོ། ། སྤེལ་མར་བསྒོམ་པ་དེ་ནི། ཆུང་ངུ་དང་འབྲིང་དང༌། ཆེན་པོ་དང༌། ཤིན་ཏུུ་ཆེན་པོ་དང༌། ཤིན་ཏུ་ཆེ་བ་སྟེ་རིམ་པ་ལྟར། དང་པོ་ལ་ནི་ཟག་མེད་དང༌། ཟག་བཅས་དང༌། ཟག་མེད་དང་སེམས་གསུམ་མངོན་གསུམ་དུ་བྱེད་དོ། །གཉིས་པ་ལ་ནི་དྲུག་གོ །གསུམ་པ་ལ་ནི་དགུའོ། །བཞི་བ་ལ་ནི་བཅུ་གཉིས་སོ། །ལྔ་པ་ལ་ནི་བཅོ་ལྔ་སྤེལ་བ་སྟེ། དེ་དག་གིས་འབྲས་བུ་ནི་གྲངས་བཞིན་དུ་གནས་གཙང་མ་ལྔ་ཡིན་ལ། ཟག་པ་དང་བཅས་པ་དེའི་དབང་གིས་དེ་དག་དུ་སྐྱེའོ། །ཇི་སྐད་དུ། དེ་ན་རྣམ་པ་ལྔ་ཡི་ཕྱིར། །གནས་གཙང་སྐྱེ་བ་ལྔ་ཁོ་ན་ཞེས་སོ། །རེ་ཞིག་བར་མ་དོ་ལ་སོགས་པ་དེ་དག་ནི་གཟུགས་སུ་ཉེ་བར་འགྲོ་བའི་ཕྱིར་མི་འོང་ལྔ་ཡིན་ནོ། །གཟུགས་ཀྱི་ཆགས་བཅོམ་འདི་ནས་ཤི་འཕོས་ནས་གཟུགས་མེད་པའི་ནང་དུ་སྐྱེ་བ་ནི་ཕྱིར་མི་འོང་གཞན་དྲུག་པ་ཡིན་ནོ། །དེ་ཡང་སྐྱེས་ནས་འདའ་བ་ལ་སོགས་པའི་བྱེ་བྲག་བཞིའོ། །དེ་ཡང་ཡ་གྱལ་གསུམ་དབྱེ་གཞི་དང་བཅས་པའོ། ། ཇི་སྐད་དུ། གཞན་ནི་གཟུགས་མེད་འགྲོ་རྣམས་བཞི་ཞེས་སོ། །གཞན་ནི་ཚེ་འདི་ཁོ་ན་ལ་མྱ་ངན་ལས་འདའ་བས་མཐོང་བའི་ཆོས་ལ་མྱ་ངན་ལས་འདའ་བ་སྟེ། ཕྱིར་མི་འོང་བདུན་པ་ཡིན་ནོ། །ཇི་སྐད་དུ། གཞན་ནི་འདི་ལ་མྱ་ངན་ལས་འདའ་ཞེས་སོ། །འགོག་པ་ཐོབ་པའི་ཕྱིར་མི་འོང་ལ་ལ་ནི་མྱ་ངན་འདས་དང་འདྲ་བའི་ཆོས་ལུས་ཀྱིས་མངོན་གསུམ་དུ་བྱེད་པའི་ཕྱིར་ལུས་ཀྱིས་མངོན་གསུམ་དུ་བྱེད་པའོ། །སེམས་མེད་པས་ལུས་ལ་བརྟེན་དེ་སྐྱེ་བའི་ཕྱིར་ལུས་ཀྱིས་མངོན་གསུམ་དུ་བྱེད་པའོ། ། དེ་འགོག་པ་དེ་ལས་ལངས་ནས་དེ་འདི་སྙམ་དུ། ཀྱེ་མ་འགོག་པའི་སྙོམས་པར་འཇུག་པ་ནི་མྱང་འདས་དང་འདྲ་བར་ཞི་བ་ཡིན་ནོ། །སྙམ་དུ་སེམས་པར་འགྱུར་བ། རྣམ་ཤེས་དང་བཅས་པའི་ལུས་ཞི་བ་སྔོན་མ་ཐོབ་པ་ཐོབ་པར་འགྱུར་བས་དེའི་ཞི་བ་ཉིད་ལུས་ཀྱིས་མངོན་སུམ་དུ་བྱས་པ་ཡིན་ཞིང༌། ཐོབ་པ་དང་ཤེས་པས་མངོན་སུམ་དུ་གྱུར་པ་ནི་མངོན་དུ་བྱེད་པ་ཡིན་ནོ། །ཇི་སྐད་དུ། འགོག་པ་ཐོབ་པའི་ཕྱིར་མི་འོང༌། །ལུས་ཀྱིས་མངོན་དུ་བྱེད་པར་འདོད། །ཅེས་སོ། །འགོག་པའི་སྙོམ་འཇུག་ནི། བསླབ་པ་དང་བསླབ་པའི་འབྲས་བུ་ཡང་མ་ཡིན་པའི་ཕྱིར་རོ། །མདོ་ལས། སློབ་པ་བཅྭ་བརྒྱད་གསུངས་པ་དེར་ལུས་མངོན་བྱེད་མ་གསུངས་སོ། །དེ་ནི་རེ་ཞིག་ཕྱིར་མི་འོང་རྣམས་ཀྱི་དབྱེ་བ་ཆེ་བ་ལོང་ཡིན། ཕྱིར་མི་འོང་དེ་བསམ་གཏན་དང་པོའི་གཅིག་ཟད་པ་ནས་སྲིད་རྩེའི་བརྒྱད་ཀྱི་བར་ཟད་པས་དགྲ་བཅོམ་པ་ཉིད་ལ་ཞུགས་་པ་ཡིན་ལ། སྲིད་རྩེའི་ཉོན་མོངས་དགུ་པ་སྤོང་བྱེད་ཀྱི་བར་ཆད་མེད་ལམ་ལ་གནས་པ་ཡང་དགྲ་བཅོམ་པ་ཉིད་ལ་ཞུགས་པ་ཡིན་ཞིང༌། བར་ཆད་མེད་ལམ། དེ་ཉིད་རྡོ་རྗེ་ལྟ་བུའི་ཏིང་ངེ་འཛིན་ཞེས་བྱ་སྟེ། ཇི་སྐད་དུ། སྲིད་་རྩེའི་བར་ཆད་བརྒྱད་ཟད་པ། །དགྲ་བཅོམ་ཉིད་ལ་ཞུགས་པ་ཡིན། །དགུ་པའི་བར་ཆད་མེད་ལམ་ཡང༌། །དེ་ནི་རྡོ་རྗེ་ལྟ་བུ་ཡིན་ཞེས་སོ། །རྡོ་རྗེ་ལྟ་བུའི་བྱེ་བྲག་ནི་ལྔ་བཅུ་རྩ་གཉིས་ལ་སོགས་པ་གསུངས་སོ། །རྡོ་རྗེ་ལྟ་བུས་སྲིད་རྩེའི་དགུ་པ་སྤངས་པས་དགུ་པ་དེ་ཟད་པའི་ཐོབ་པ་དང་ལྷན་ཅིག་ཏུ་ཟད་པ་ཤེས་པ་སྐྱེ་ཏེ། རྡོ་རྗེ་ལྟ་བུའི་མཇུག་ཐོགས་སུ་རྣམ་གྲོལ་གྱི་ལམ་ཐ་མ་སྐྱེ་བ་དེའི་ཕྱིར་དེ་ནི་དང་པོ་ཉིད་དུ་ཟག་པ་ཐམས་ཅད་ཟད་པའི་ཐོབ་པ་དང་ལྷན་ཅིག་སྐྱེ་བའི་ཕྱིར་ཟད་པ་ཤེས་པ་ཡིན་ནོ། །དགྲ་བཅོམ་པ་ཉིད་ལ་ཞུགས་པ་དེ་ཟད་པ་ཤེས་པ་སྐྱེས་པ་དེའི་ཚེ་མི་སློབ་པ་དང༌། དགྲ་བཅོམ་པའི་འབྲས་བུ་ཐོབ་པ་སྟེ། ཇི་སྐད་དུ། དེ་ཟད་ཐོབ་པ་ཟད་པ་ཤེས། །དེ་ནི་དེ་མི་སློབ་དགྲ་བཅོམ། །ཞེས་སོ། །འབྲས་བུ་གཞན་གྱི་ཕྱིར་བསླབ་པར་བྱ་བ་མེད་པས་མི་སློབ་པ་ཡིན་ནོ། །རང་སངས་རྒྱས་བསེ་རུ་ལྟ་བུ་ནི། ཏིང་ངེ་འཛིན་མི་གཡོ་བ་དང༌། གསལ་བའི་ཕྱིར་བསམ་གཏན་བཞི་པ་ཁོ་ན་ལ་བརྟེན་དེ་སྟན་གཅིག་ཁོ་ན་ལ་ངེས་འབྱེད་ཆ་མཐུན་ནས་བཟུང་སྟེ། བྱང་ཆུབ་ཀྱི་བར་བསྐྱེད་པར་བྱེད་དོ། །ཇི་སྐད་དུ། སྔོན་དང་བསེ་རུ་བྱང་ཆུབ་པར། །བསམ་གཏན་མཐའ་བརྟེན་གཅིག་ལ་ཀུན། །ཞེས་སོ། ། བྱང་ཆུབ་ནི་ཟད་པ་དང་མི་སྐྱེ་བའི་ཡེ་ཤེས་སོ། །དེ་ཡང་སྐྱེ་བ་གསུམ་ལས་ཚེ་གཅིག་ལ་ཐར་པ་ཆ་མཐུན་དང༌། ཚེ་གཉིས་པ་ལ་ངེས་འབྱེད་ཆ་མཐུན་དང༌། ཚེ་གསུམ་པ་ལ་འཕགས་པའི་ལམ་བསྐྱེད་པར་བྱེད་དེ། ཆོས་ཉིད་འདི་ལ་ནི་རྒྱུད་རིམ་གྱིས་འཇུག་པ་དང༌། སྨིན་པ་དང་རྣམ་པར་གྲོལ་བར་འགྱུར་བས་ཚེ་དང་པོར་ཁོ་ན་ལ་ངེས་འབྱེད་ཆ་མཐུན་བསྐྱེད་པར་མི་བྱེད་དོ། །དེ་ཡང་མཛོད་ལས། དེ་ཡི་སྔོན་དུ་ཐར་ཆ་མཐུན། མྱུར་བ་སྲིད་པ་གསུམ་གྱིས་མཐར། །ཞེས་གསུངས་སོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདིར་ཀུན་ཤེས་ཉིད་གྱིས་ཉེར་ཞིར་ཁྲིད་པར་བྱ་རྒྱུ་ཐེག་པ་འོག་མ་ལ་སློབ་པའི་གང་ཟག་ཉི་ཤུའི་རྣམ་པར་བཞག་པ་ནི་དེ་ཡིན་ནོ། ། ཉི་ཁྲི་སྣང་བ་ལ་སོགས་པ་རྣམས་ཀྱི་འཆད་ལུགས་ནི་དགོངས་པ་མ་ཡིན་དེ། སློབ་དཔོན་དབྱིག་གཉེན་ལ་སོགས་པ་ཤིང་རྟའི་སྲོལ་འབྱེད་ཆེན་པོ་དག་དང་འགལ་བའི་ཕྱིར་རོ། །སྐབས་འདིའི་གང་ཟག་ཉི་ཤུ་པོ་རྣམས་བཏགས་པ་པར་འཆད་པའི་ལུགས་ལ་ཐེག་པ་གསུམ་ལ་སློབ་པའི་གང་ཟག་གི་དངོས་པོར་སྟོར་ཏེ། སྔར་རྒྱལ་སྲས་ཞེ་ལྔའི་ངོ་བོ་སྟོར་ཞིང་འདིར་ཐེག་པ་འོག་མའི་གང་ཟག་ཉི་ཤུའི་ངོ་བོ་སྟོར་བའི་ཕྱིར་རོ། །དེ་རྣམས་ལས་མ་གཏོགས་པ་མདོ་འདིར་གསུངས་པ་མེད་པས་སོ། །དེས་ན་འདི་རྣམས་བཏགས་པ་བ་ཡིན་ལ། དགོས་པ་ལ་སོགས་པའི་ཆོས་གསུམ་མེད་པའི་ཕྱིར་མི་རིགས་སོ། །གལ་ཏེ་ཕྱིར་མི་ལྡོག་པའི་འཁོར་ལོའི་མདོ་ལས་གསུངས་སོ་ཞེ་ན། དེར་བྱང་སེམས་ལ་བརྒྱད་པ་ལ་སོགས་པའི་མིང་གིས་གསུངས་པའི་དགོས་པ་ནི། མདོ་དེ་ཉིད་དུ་དེ་ལྟར་གསུངས་པའི་དགོས་པ་ཡིན་གྱི། །མདོ་གཞན་དང་གཞན་དུ་གསུངས་པའི་དགོས་པ་ནི་མདོ་དེ་ཉིད་ཀྱི་ཡིན་པར་མི་རིགས་སོ། །གལ་ཏེ་རིགས་ན་དམ་ཆོས་པད་དཀར་ལ་སོགས་སུ་བཏགས་ནས་གསུངས་པའི་དགོས་པ་ཡང་མདོ་དེ་ཉིད་དུ་གསུངས་པའི་དགོས་པར་འགྱུར་བས་དགོས་པ་ལྷག་པོ་མེད་པ་དང༌། གདུལ་བྱ་གཅིག་ཏུ་ཐལ་བ་ལ་སོགས་པར་འགྱུར་རོ། །གལ་ཏེ་མདོ་གཅིག་ཏུ་བཏགས་ནས་གསུངས་པས་ཤེར་ཕྱིན་ལ་སོགས་པའི་མདོ་གཞན་དང༌། གཞན་དུུ་ཡང་བཏགས་པ་བར་འཆད་དགོས་ན། ཐེག་ཆེན་གྱི་གང་ཟག་རང་མིང་གིས་སྨོས་པ་མི་སྲིད་པར་ཐལ་བ་ཡང་བཟློག་པར་དཀའ་འོ། །གལ་ཏེ་སྔར་བྱང་སེམས་ཞེ་ལྔ་སྟོན་པའི་མདོ་དེ་ཉིད་ཉི་ཤུ་པོ་འདིའི་མདོ་ཡིན་པར་འདོད་ན། སྤངས་རྟོགས་དང་སྐྱོན་ཡོན་མི་འདྲ་བའི་ཁྱད་པར་ཕྱེ་བས་ཞེ་ལྔ་ལས་ཉུང་བར་བསྡུར་མི་རུང་བ་དེ་དག་ཇི་ལྟར་ཁྱད་པར་དེ་ཉིད་གྱི་སྒོ་ནས་ཉི་ཤུར་འདུས་པར་འགྱུར། རྒྱལ་བ་དང༌། རྒྱལ་ཚབ་གཉིས་ཀྱང་དགོངས་པ་མི་གཅིག་པར་ཧ་ཅང་ཐལ་བར་འགྱུར་རོ། །དེས་ན་སངས་རྒྱས་ལ་སོགས་དཀོན་མཆོག་གསུམ། ཞེས་པའི་སྐབས་ཀྱི་དགེ་འདུན་དཀོན་མཆོག་ནི་རྒྱལ་སྲས་ཞེ་ལྔ་ཉིད་ཡིན་ལ། གདམས་ངག་གི་ནང་ན་མེད་ཅིང་ཞར་ལ་གསུངས་པའི་ཉི་ཤུ་བོ་འདི་ནི་ཐེག་དམན་པ་ཉིད་ཡིན་ནོ། །ཉི་ཁྲི་སྣང་བ་དང་བསྡུས་དོན་འགྲེལ་པ་ལ་སོགས་སུ། རྒྱུན་ཞུགས་དང༌། འཕར་བ་དང༌། ཕྱེད་དུུ་འཕར་བ་དང་སྲིད་རྩེའི་མཐར་ཐུག་འགྲོ་དང༌། གཟུགས་ཀྱི་ཆགས་བཅོམ་དང༌། བསེ་རུུ་ལྟ་བུ་སྟེ་དྲུག་པོ་འདི་རྣམས་སྟོན་པའི་མདོ་ཡིན་ཟེར་བ་བྱུང་བ་རྣམས། འབུམ་པ་དང༌། ཉི་ཁྲི་ལེ་མངས་དང༌། ཁྲི་བརྒྱད་སྟོང་པ་རྣམས་ན་མེད་པས་མདོ་སྡེ་དེ་ལྟ་བུ་རྣམས་གང་ཡང་གང་ནས་རྙེད་པར་ཡིན་ཞེས་མཁས་པ་རྣམས་ཀྱིས་རྩད་བཅད་པར་བྱའོ། །གལ་ཏེ་འབུམ་ལ་སོགས་པ་ལ་མདོ་དེ་རྣམས་སྔར་ཡོད་ཀྱང་ཡི་གེ་ཉམས་པས་ཕྱིར་མེད་དོ། ། ཞེ་ན། དེ་ལྟར་ན་སློབ་དཔོན་དབྱིག་གཉེན་གྱིས་མཛད་པའི་གཞུང་འགྲེལ་དུ་རྒྱུན་ཞུགས་ལ་སོགས་པའི་མདོ་དེ་རྣམས་མ་བྱུང་བས་དེའི་གོང་དུ་ཡི་གེ་ཉམས་ཟིན་པར་འགྱུར་རོ། །དེ་ལྟར་ཡིན་ན་ཁྱེད་རྣམ་པས་གང་ནས་རྙེད་དེ་ཁུངས་བསྟན་དགོས་སོ། །དེས་ན་སློབ་དཔོན་དབྱིག་གཉེན་གྱིས་མ་རྙེད་པའི་མདོ་སྡེ་ལྷག་པོ་དེ་རྣམས་རྒྱལ་བ་དང༌། རྒྱལ་ཚབ་དང༌། འཕགས་པ་ཐོགས་མེད་གསུམ་པོ་ལས་གང་ཞིག་གོ་མ་ཆོད་ནས་ཉམས་པ་དེ་ཁྱེད་ཀྱིས་རྙེད་པ་ནི་ངོ་མཚར་ཏུ་རྩིའོ། །གལ་ཏེ་ལེ་བརྒྱད་མ་ན་མདོ་ལྷག་པོ་དེ་རྣམས་ཡོད་དོ། །ཞེ་ན། དེ་ལ་འབའ་ཞིག་ཡོད་ལ་ཡུམ་གཞན་གསུམ་གཅིག་ཆར་དུ་མེད་པར་འགྱུར་བའི་རྒྱུ་མཚན་ནི་ཅི་ཞིག་ཡོད། དེ་ལྟར་ན་ཡུམ་གསུམ་གའི་དོན་འགྲེལ་བ་པོ་སློབ་དཔོན་དབྱིག་གཉེན་གྱིས་མི་རྙེད་པར་འགལ་ལོ། །དེའི་ཕྱིར་རྒྱལ་བ་རྒྱལ་ཚབ་དང་ཤིང་རྟའི་སྲོལ་འབྱེད་ཆེན་པོ་དག་ལ་དཔང་དུ་བྱས་ན་བཤད་པ་གཞན་རྣམས་ལ་རང་བཟོའི་རྣམ་འགྱུར་མང་པོ་སྣང་བས་མཁས་པ་རྣམས་ཀྱི་རྟོག་སྤྱོད་མཛད་པར་ཞུའོ། ། དེས་བརྩོན་པ་ལ་གདམས་པ་སོང་ཞིང་རྣམ་མཁྱེན་གྱི་སྐབས་ཀྱི་ཆོས་བཅུ་ལས་གཉིས་པ་གདམས་ངག་དང་ཞེས་པ་བཤད་ཟིན་ཏོ།། །། ༣༽ངེས་འབྱེད་ཡན་ལག་བཤད་པ། ད་ནི་བརྩོན་པའི་ཕན་ཡོན་ཞེས་བྱ་བ་དྲུག་པ་སྟོན་ཅིང༌། སྐབས་འདིའི་ཆོས་གསུམ་པ་ངེས་འབྱེད་ཡན་ལག་རྣམ་པ་བཞི་པོ་གང་ཡིན་པ་དེ་འཆད་པ་ལ་གཉིས་དེ། ཆོས་དྲུག་མདོར་བསྟན་པའི་སྒོ་ནས་ཁྱད་པར་གྱི་ཆོས་བཞིས་ཉན་རང་ལས་འཕགས་པར་བསྟན། ངོ་བོ་ངོས་བཟུང་བའི་སྒོ་ནས་དྲུག་པོ་སོ་སོར་ཕྱེ་སྟེ་རྒྱས་པར་བཤད་པའོ། ། ༡ ཁྱད་པར་གྱི་ཆོས་བཞིས་ཉན་རང་ལས་འཕགས་པར་བསྟན་པ། དེ་ལ་དང་པོ་ནི་འདི་ལྟ་སྟེ། དམིགས་པ་དང་ནི་རྣམ་པ་དང༌། །རྒྱུ་དང་ཡོངས་སུ་འཛིན་པ་ཡིས། །བྱང་ཆུབ་སེམས་དཔའ་སྐྱོབས་པ་ཡིས། །དྲོད་སོགས་བདག་ཉིད་ཇི་བཞིན་དུ། །རྣམ་རྟོག་བཞི་པོ་ལྡན་རྟེན་པ། །ཆུང་དང་འབྲིང་དང་ཆེན་པོ་རྣམས། །ཉན་ཐོས་བསེ་རུ་ལྟ་བུ་དང༌། །བཅས་པ་དག་ལས་ཁྱད་པར་འཕགས། །ཞེས་པ་འདིས་བྱང་ཆུབ་སེམས་དཔའི་ངེས་པར་འབྱེད་པའི་ཆ་མཐུན་པ་རྣམས་ཉན་རང་གི་ངེས་པར་འབྱེད་པའི་ཆ་དང་མཐུན་པ་དག་ལས་ཆོས་སྤྱོད་བཞིས་ཁྱད་པར་དུ་འཕགས་པར་བསྟན་ཏོ། །བྱང་ཆུབ་སེམས་དཔའ་ཇི་ལྟ་བུའི་ངེས་འབྱེད་ཆ་མཐུན་ནི་ཅི་འདྲ་བ་ཞིག་ཆོས་བཞི་ནི་གང་ཞེ་ན། བྱང་ཆུབ་སེམས་དཔའ་འགྲོ་བ་ཐམས་ཅད་སྐྱོབ་པའི་བསམ་པ་ཅན་དེའི་སྦྱོར་ལམ་དྲོད་དང་སོགས་པའི་སྒྲས་བསྡུས་པ་རྩེ་མོ་དང་བཟོད་པ་དང་ཆོས་མཆོག་གི་བདག་ཉིད་བཞི་པོ་གོ་རིམ་ཇི་ལྟ་བ་བཞིན་དུ་ལྡོག་པའི་གཟུང་རྟོག་དང་འཇུག་པའི་གཟུང་རྟོག་དང་རྗེས་སུ་འཛིན་པའི་རྣམ་རྟོག་དང༌། བརྟགས་པར་འཛིན་པའི་རྣམ་རྟོག་བཞི་པོ་སྤང་བྱར་ལྡན་ཅིང༌། དེའི་གཉེན་པོ་བྱང་ཆུབ་སེམས་དཔའི་རྒྱུད་ལ་བརྟེན་པ་དྲོད་སོགས་རེ་རེ་ཡང་ཆུང་དང་འབྲིང་དང་ཆེན་པོར་ཕྱེ་བ་བཅུ་གཉིས་པོ་རྣམས་འཕགས་སོ། །ཁྱད་པར་གྱི་ཆོས་དམིགས་པ་དང་རྣམ་པ་དང་རྒྱུ་དང་ཡོངས་སུ་འཛིན་པ་བཞི་བོ་དེ་ཡིས་སོ། །གལ་ཏེ་དེ་ལྟ་ན་ཉི་ཁྲི་སྣང་བ་ལས་རྟོག་པ་བཞི་པོ་རིམ་པ་ལྟར་དྲོད་སོགས་བཞི་པོ་ཡིན་པར་བཤད་པ་དང་འགལ་ལོ། །ཞེ་ན། འགལ་བར་འདོད་ལ་རག་མོད། རྒྱལ་ཚབ་མི་ཕམ་མགོན་པོའི་དགོངས་པ་ནི། མདོ་སྡེའི་རྒྱན་ལས། དེ་ནས་དེ་འདྲར་འགྱུར་བ་ཡི། །བྱང་ཆུབ་སེམས་དཔའ་མཉམ་བཞག་པས། །ཡིད་ཀྱི་བརྗོད་པ་མ་གཏོགས་པ། །དོན་ཀུན་རབ་ཏུ་མི་མཐོང་ངོ༌། །ཞེས་ཚོགས་ལམ་གྱི་རྗེས་དེ་ནས་དྲོད་ཀྱི་གནས་སྐབས་དེ་འདྲར་འགྱུར་བའི་བྱང་ཆུབ་སེམས་དཔའ་མཉམ་པར་བཞག་པ་དེས་ཡིད་ཀྱི་བརྗོད་པ་རང་དང་སྤྱིའི་མཚན་ཉིད་དུ་སྣང་བར་མཐོང་བ་མ་གཏོགས་པ་གཟུང་བའི་དོན་ཀུན་རབ་ཏུ་མི་མཐོང་བ་ནི་དྲོད་ཀྱི་ཡེ་ཤེས་སོ། ། ཆོས་ཀྱི་སྣང་བ་འཕེལ་བྱའི་ཕྱིར། །བརྩོན་འགྲུས་བརྟན་པ་ཀུན་ཏུ་རྩོམ། ཞེས་རྩེ་མོའི་གནས་སྐབས་ན་ཆོས་ཀྱི་སྣང་བ་སྟེ་ཆོས་ལ་ངེས་པར་རྟོགས་པའི་བཟོད་པ་ཉིད་འཕེལ་བར་བྱ་བའི་ཕྱིར་གཟུང་བའི་དོན་ལ་མི་གནས་པའི་བྱེད་བས་བརྩོན་འགྲུས་བརྟན་པ་རྩོམ་པར་བྱེད་དོ། །ཆོས་ཀྱི་སྣང་བ་འཕེལ་ནས་ནི། །སེམས་ཙམ་ལ་ནི་གནས་པར་འགྱུར། །དེ་ནས་དོན་ཀུན་སྣང་བ་ནི། །སེམས་སུ་རབ་ཏུ་སྣང་བར་འགྱུར། །དེ་ཚེ་དེ་ཡི་གཟུང་བ་ཡིས། །རྣམ་པ་གཡེང་བ་དེ་སྤངས་འགྱུར། དེ་ནས་དེ་ལ་འཛིན་པ་ཡི། །རྣམ་པར་གཡེང་བ་འབའ་ཞིག་ལུས། །ཞེས་བཟོད་པའི་གནས་སྐབས་ན་ཆོས་ཀྱི་སྣང་བ་འཕེལ་ནས་སེམས་ཙམ་ལ་གནས་པ་དེ་ནས་དོན་དུ་སྣང་བ་ཀུན་སེམས་སུ་སྣང་བ་དེའི་ཚེ། གཟུང་བའི་རྣམ་རྟོག་སྤངས་པ་དེ་ནས་བཟོད་པ་ལ་གནས་པའི་བྱང་སེམས་དེ་ལ་འཛིན་པའི་རྣམ་རྟོག་འབའ་ཞིག་ལུས་སོ། །དེ་ཚེ་བར་ཆད་མེད་པ་ཡིས། །ཏིང་ངེ་འཛིན་ལ་མྱུར་དུ་རེག། འདི་ལྟར་དེ་ཡི་འཇུག་ཐོགས་སུ། །འཛིན་པའི་རྣམ་པར་གཡེང་བ་སྤོང༌། །ཞེས་འཇིག་རྟེན་པའི་ཆོས་མཆོག་གི་གནས་སྐབས་ན་བར་ཆད་མེད་པའི་ཏིང་ངེ་འཛིན་ལ་མྱུར་དུ་རེག་ལ་བར་ཆད་མེད་པའི་དོན་ནི་འདི་ལྟར་ཏིང་ངེ་འཛིན་དེའི་མཇུག་ཐོགས་སུ་འཛིན་པའི་རྣམ་རྟོག་སྤོང་བའི་ཕྱིར་རོ། །གོང་དུ་བཤད་པ་དེ་ལྟར། འདི་དག་གོ་རིམ་བཞིན་དུ་ནི། །དྲོ་བར་གྱུར་སོགས་ཡིན་ཤེས་བྱ། །ཞེས་གསུངས་པ་འདི་དང༌། ཉི་ཁྲི་སྣང་བ་གཉིས་གང་ལ་དཔང་དུ་བྱ་བར་རིགས་སོམས་ཤིག དེ་གཉིས་ཀྱི་དགོངས་པ་གཅིག་ཏུ་མི་རུང་སྟེ། དྲོད་གཟུང་རྟོག་ཡིན་ན་དེའི་སྐབས་སུ་བྱང་སེམས་དེས་གཟུང་དོན་མི་མཐོང་བར་འགལ་ལ། བཟོད་པའི་གནས་སྐབས་ན་གཉེན་པོ་མེད་པར་གཟུང་རྟོག་སྤངས་པར་ཐལ་ཏེ། བཟོད་པ་ནི་དྲོད་རྩེ་གཉིས་པོའི་གཉེན་པོ་ཡིན་པ་དང༌། རྫས་འཛིན་གྱི་རྣམ་རྟོག་གཟུང་རྟོག་གཉིས་པོའི་གཉེན་པོ་ཡིན་པ་ནི་གང་ནས་ཀྱང་མ་གསུངས་ཤིང་སྐབས་དེར་གཉེན་པོ་གཞན་ཡང་མ་གསུངས་པའི་ཕྱིར་དང༌། ཆོས་མཆོག་འཛིན་རྟོག་ཡིན་ནོ། །དེ་མཐོང་ལམ་བར་ཆད་མེད་ལམ་ལ་མྱུར་དུ་རིག་པར་འགལ་བའི་ཕྱིར་རོ། ། དེས་ན་ངེས་འབྱེད་ཡན་ལག་རྣམ་བཞི་པོ་འདི་ནི་རྣམ་པར་རྟོག་པ་མ་ཡིན་ནོ། །འོ་ན། རྗེས་སུ་མཐུན་ལ་ཕྱིན་ཅི་ལོག །རྗེས་སུ་འབྲེལ་བཅས་བཟློག་པ་དང༌། །ཕྱིན་ཅི་མ་ལོག་ཕྱིན་ཅི་ལོག རྗེས་སུ་འབྲེལ་མེད་བསྒོམ་བའོ། །ཞེས་གསུངས་པ་ཅི་ཞེ་ན། འདིའི་གཉེན་པོ་བསྒོམ་པའི་གང་ཟག་གསུམ་གྱི་དབྱེ་བ་སྟོན་པ་ཡིན་གྱི། སོ་སྐྱེའི་རྒྱུད་ལ་ཡོད་པའི་སྤངས་རྟོགས་ཀྱི་ངོ་བོ་ཕྱིན་ཅི་ལོག་ཏུ་སྟོན་པ་ནི་མ་ཡིན་ཏེ། །འདིའི་འགྲེལ་བར་གཉེན་པོ་བསྒོམ་པ་དེ་མདོར་བསྡུས་ན། རྣམ་པར་གསུམ་དུ་རིག་པར་བྱ་སྟེ། ཕྱིན་ཅི་མ་ལོག་པའི་རྗེས་སུ་མཐུན་ལ། ཕྱིན་ཅི་ལོག་པ་དང༌། ཕྱིན་ཅི་ལོག་མེད་ལ་ཕྱིན་ཅི་ལོག་རྗེས་སུ་འབྲེལ་བ་དང༌། ཕྱིན་ཅི་ལོག་ཀྱང་མེད་ལ་ཕྱིན་ཅི་ལོག་རྗེས་སུ་འབྲེལ་པ་མེད་པ་སྟེ། སོ་སོའི་སྐྱེ་བོ་ཉིད་དང༌། སློབ་པ་དང་མི་སློབ་པ་དང༌། གོ་རིམ་བཞིན་ནོ་ཞེས་སོ། །དེས་ན་འཕགས་པ་སློབ་པ་ཡན་ཆད་ལ་ལྟོས་དེ། གཉེན་པོ་བསྒོམ་པའི་སོ་སྐྱེ་དེ་ཕྱིན་ཅི་ལོག་ཡིན་ཀྱང་དེའི་མངོན་པར་རྟོགས་པ་ནི་ཕྱིན་ཅི་མ་ལོག་པ་དང་རྗེས་སུ་མཐུན་ཞེས་པའི་ཏོན་ཏོ། །མདོ་སྡེ་རྒྱན་རྩ་འགྲེལ་དུ་ཡང༌། ཡང་དག་མི་རྟོག་ཡང་དག་མིན། །ཡང་དག་མ་ཡིན་མིན་མི་རྟོག། རྟོག་མིན་མི་རྟོག་མ་ཡིན་པ༌། །ཤེས་བྱ་ཐམས་ཅད་ཡིན་པར་བརྗོད། །ཡང་དག་མ་ཡིན་པའི་རྟོག་པ་ནི། འཇིག་རྟེན་ལས་འདས་པའི་ཡེ་ཤེས་ཀྱི་རྗེས་སུ་མཐུན་པ་མ་ཡིན་པའི་རྣམ་པར་རྟོག་པ་གང་ཡིན་པའོ། །ཡང་དག་པ་ཡང་མ་ཡིན་ལ་ཡང་དག་པ་མ་ཡིན་པ་ཡང་མ་ཡིན་པ་ནི་དེའི་རྗེས་སུ་མཐུན་པའི་ངེས་པར་འབྱེད་པའི་ཆ་དང་མཐུན་པའི་པར་གང་ཡིན་པའོ། མི་རྟོག་པ་ནི་དེ་བཞིན་ཉིད་དང་འཇིག་རྟེན་ལས་འདས་པའི་ཡེ་ཤེས་སོ། །རྟོག་པ་ཡང་མ་ཡིན་མི་རྟོག་པ་ཡང་མ་ཡིན་པ་ནི་འཇིག་རྟེན་ལས་འདས་པའི་རྗེས་ལས་ཐོབ་པའི་འཇིག་རྟེན་པའི་ཡེ་ཤེས་སྟེ། ཤེས་བྱ་ཐམས་ཅད་ནི་དེ་ཙམ་དུ་ཟད་དོ། །ཞེས་གསུངས་སོ། །དེས་ན་དྲན་པ་ཉེར་བཞག་ནས་ངེས་འབྱེད་ཆ་མཐུན་གྱི་པར་གྱི་འཇིག་རྟེན་ལས་འདས་པའི་ཡེ་ཤེས་ཀྱང་མ་ཡིན་ལ་ཡང་དག་པ་མ་ཡིན་པའི་ཀུན་རྟོག་ཁམས་གསུམ་གྱིས་བསྡུས་པའི་སེམས་བྱུང་ཡང་མ་ཡིན་ཞིང༌། འཇིག་རྟེན་ལས་འདས་པའི་ཡེ་ཤེས་རྗེས་མཐུན་པ་ཡིན་པར་གསུངས་པ་འདིས་ནི། སྐབས་འདིའི་ངེས་འབྱེད་ཆ་མཐུན་རྣམས་ཕྱིན་ཅི་ལོག་འབའ་ཞིག་ཡིན་པ་དང༌། གཟུང་རྟོག་དང་འཛིན་རྟོག་ཡིན་པ་བསལ་བ་ཡིན་ནོ། །དེས་ན་འདི་རྣམས་ནི་དོན་ཇི་ལྟ་བ་བཞིན་དུ་ཡིད་ལ་བྱེད་པས་བསྡུས་པ་ངེས་པར་རྟོག་པ་ཞེས་བྱ་བ་ཡིན་ཏེ། ཇི་སྐད་དུ། ཆོས་དང་ཆོས་ཉིད་རྣམ་འབྱེད་ལས། དེ་ལ་ངེས་པར་རྟོག་པ་ནི། ཐེག་པ་ཆེན་པོ་མདོ་སྡེ་ལ་བརྟེན་པའི་ཚུལ་བཞིན་ཡིད་བྱེད་པས། བསྡུས་པ་སྦྱོར་ལམ་ཐམས་ཅད་དོ། །ཞེས་སོ། །གཟུང་རྟོག་དང་འཛིན་རྟོག་ནི་ཚུལ་བཞིན་དུ་ཡིད་ལ་བྱེད་པས་བསྡུས་པར་འགལ་ཏེ། དགུ་ཡི་བདག་ཉིད་ཇི་བཞིན་ཡུལ། །མིན་པའི་བདག་ཉིད་དག་ཤེས་བྱ། །ཞེས་སོགས་ཀྱིས་སོ། །འདི་ཡི་རྟོག་པའི་སྐབས་ཀྱི་མདོ་འདི་ཉིད་ལས་ཀྱང༌། ཆོས་འདི་དག་ནི་ཇི་ལྟར་བྱས་པ་སོ་སོའི་སྐྱེ་བོ་རྣམས་མངོན་པར་ཞེན་པ་དེ་ལྟ་བུར་ཡོད་པ་མ་ཡིན་པའི་ཕྱིར་རོ། །ཞེས་སྐབས་འདིའི་རྟོག་པ་ནི་ཚུལ་བཞིན་མ་ཡིན་པར་མངོན་པར་ཞེན་པའི་བདག་ཉིད་ཡིན་པར་གསུངས་སོ། ། དེ་རྣམས་ཀྱིས་མདོར་བསྟན་པ་བཤད་ནས། ༢ ངོ་བོ་ངོས་བཟུང་བའི་སྒོ་ནས་དྲུག་པོ་སོ་སོར་རྒྱས་པར་བཤད་པ། ད་ནི་གཉིས་པ་རྒྱས་པར་བཤད་པ་ལ་དྲུག་སྟེ། དམིགས་པ་དང༌། རྣམ་པ་དང༌། རྒྱུ་དང༌། ཆུང་འབྲང་ཆེ་གསུམ་དུ་དབྱེ་བ་དང༌། རྣམ་རྟོག་བཞི་པོ་དང༌། ཡོངས་སུ་འཛིན་པ་རྒྱས་པར་བཤད་པའོ།། འདི་དག་གོ་རིམ་ཡང༌། སྔར་མདོར་བསྟན་དུ་ནི་སྡེབ་སྦྱོར་གྱི་དབང་གིས་ཡིན་ལ། རྒྱས་བཤད་ནི་མདོ་ལས་བྱུང་བའི་རིམ་པ་བཞིན་དུ་མཛད་པའོ། ། ༡ དམིགས་པ་བཤད་པ། དེ་ལ་དང་པོ་ནི། དམིགས་པ་མི་རྟག་ལ་སོགས་པ། བདེན་པའི་བརྟེན་ཅན། ཞེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཀྱི་དམིགས་པ་བསྟན་ཏོ། །དམིགས་པའི་ངོ་བོ་གང་ཞེ་ན། དྲོད་སོགས་བཞི་པོའི་དམིགས་པ་གཟུགས་སོགས་མི་རྟག་པ་དང་ལ་སོགས་པའི་སྒྲས་བསྡུས་པ། སྡུག་བསྔལ་བ་དང༌། བདག་མེད་པ་དང༌། མི་སྡུག་པ་དང༌། ཞི་བ་དང༌། སྟོང་པ་དང༌། མཚན་མ་མེད་པ་དང༌། སྨོན་པ་མེད་པ་སྟེ། འཕགས་པའི་བདེན་པ་བཞིའི་རྟེན་ཅན་གྱི་ཆོས་རྣམས་སོ། ། ༢ རྣམ་པ་བཤད་པ། གཉིས་པ་ནི། དེས་ནི་རྣམ་པ་མངོན་ཞེན་ལ་སོགས་འགོགས། ཅེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཀྱི་རྣམ་པ་བསྟན་དོ། །རྣམ་པའི་ངོ་བོ་གང་ཞེ་ན་བདེན་པའི་ཆོས་མི་རྟག་པ་ལ་སོགས་པ་དེ་ཡིན། རྣམ་པ་མི་རྟག་ལ་སོགས་ལ་མངོན་པར་ཞེན་པ་དང༌། ལ་སོགས་པའི་སྒྲས་བསྡུས་པ། གནས་པ་དང༌། ཀུན་ཏུུ་ཤེས་པ་སྟེ། རིམ་པ་ལྟར་ལྟ་བ་ཕྱིན་ཅི་ལོག་དང༌། སེམས་ཕྱིན་ཅི་ལོག་དང༌། འདུ་ཤེས་ཕྱིན་ཅི་ལོག་གསུམ་པོ་ཡིན་པས། དེ་གསུམ་འགོག་ཅིང་མེད་པའི་རྣམ་པ་གང་ཡིན་པ་དེ་ཡིན་ནོ། །དབུ་མ་བ་ཆེན་པོ་སློབ་དཔོན་དབྱིག་གཉེན་གྱི་ཞལ་སྔ་ནས༌། མངོན་པར་ཞེན་ཅིང་གནས་དེ་ཀུན་ཏུ་ཤེས་པ་ཞེས་བྱ་བ་ནི། ཆེན་པོར་གྱུར་པའི་གནས་སྐབས་ན། རྣམ་པར་རྟོག་པ་བཅས་པའི་ལྟ་བས་མངོན་པར་ཞེན་པར་བྱེད་དོ། །འབྲིང་གི་གནས་སྐབས་ན་སེམས་ཀྱི་གནས་པར་བྱེད་དོ། །ཆུང་ངུའི་གནས་སྐབས་ན་འདུ་ཤེས་ཀྱིས་ཀུན་ཏུ་ཤེས་པར་བྱེད་དོ། ། ཆོས་རྣམ་པ་གསུམ་ནི་ཕྱིན་ཅི་ལོག་དང་མཐུན་པ་སྟེ། ལྟ་བ་ཕྱིན་ཅི་ལོག་དང༌། སེམས་ཕྱིན་ཅི་ལོག་དང༌། འདུ་ཤེས་ཕྱིན་ཅི་ལོག་གོ །ཆོས་ལ་སྲེད་པ་ཡང་རྣམ་པ་གཉིས་སུ་བསྟན་ཏེ། ཡང་དག་པ་ཇི་ལྟ་བཞིན་དུ་རྣམ་པར་བལྟ་བའི་ཆོས་ཉིད་དང༌། སྒྲུབ་པའི་ཆོས་ཉིད་དོ། །སྐྱོན་མེད་པ་ཞེས་བྱ་བའི་སྒྲ་ནི། མེད་པའི་དོན་དེ། སྐྱོན་ཀྱི་དངོས་པོ་ཡོད་པ་མ་ཡིན་པ་ལ་སྐྱོན་མེད་པ་ཞེས་བྱའོ། །ཞེས་གསུངས་སོ། །འབུམ་ཊིཀ་ལས་ཀྱང༌། དེ་བཞིན་དུ་གསུངས་སོ། །མདོ་ལས་ཀྱང༌། དམིགས་པ་དང༌། རྣམ་པའི་དགག་བྱ་ལྷན་གཅིག་ཏུ་གསུངས་པ། འདི་ལྟ་སྟེ། བྱང་ཆུབ་སེམས་དཔའ་གཟུགས་ལ་མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། མི་སྡུག་པ་དང༌། ཞི་བ་དང༌། སྟོང་པ་དང༌། མཚན་མ་མེད་པ་དང༌། སྨོན་པ་མེད་པ་དང༌། སྨོན་པ་མེད་པ་ཞེས་བྱ་བར་མངོན་པར་ཞེན་ཅིང་གནས་ཏེ་ཀུན་ཏུ་ཤེས་པ་དེ་ནི་བྱང་ཆུབ་སེམས་དཔའི་མཐུན་པའི་ཆོས་ལ་སྲིད་པ་སྟེ་སྐྱོན་ནོ། ། ཞེས་གསུངས་སོ། །མངོན་ཞེན་ལ་སོགས་འགོག་པ་ཡང་མདོ་ལས། བྱང་ཆུབ་སེམས་དཔའི་སྐྱོན་མེད་པ་གང་ཡིན་ཞེས་པའི་ལན་དུ་སྟོང་ཉིད་ཐམས་ཅད་མི་མཐོང་བ་དང༌། ཆོས་ཐམས་ཅད་ཤེས་པར་བྱ་སྟེ་ངེས་རློམ་སེམས་སུ་མི་བྱའོ། །ཞེས་པས་གསུངས་སོ། །དེས་ན་ངེས་འབྱེད་ཡན་ལག་བཞི་པོའི་རྣམ་པ་ཕྱིན་ཅི་ལོག་གསུམ་བཀག་པ་ཡིན་པར་གསུངས་པ་འདིས་ཀྱང་རྣམ་རྟོག་ཡིན་པ་བསལ་བ་ཡིན་ནོ། ། ༣ རྒྱུ་བཤད་པ། གསུམ་པ་ནི། ཐེག་པ་གསུམ་ཆར་འཐོབ་པའི་རྒྱུ། ཞེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཐེག་པ་གསུམ་ཆར་འཐོབ་པའི་རྒྱུ་ཡིན་པར་བསྟན་ཏོ། །མདོ་ལས་ཀྱང༌། བྱང་ཆུབ་སེམས་དཔའ་ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་དང༌། བྱང་ཆུབ་སེམས་དཔའི་ས་ལ་སློབ་པར་འདོད་པས་ཤེར་ཕྱིན་ལ་བསླབ་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་དང༌། སངས་རྒྱས་ཀྱི་ས་གང་ལ་བསླབ་པར་བྱ་བའི་ཐེག་པ་གསུམ་པོ་དག་ཤེར་ཕྱིན་འདི་ལས་རྒྱ་ཆེར་བསྟན་པའི་ཕྱིར་རོ། །ཞེས་གསུངས་སོ། །དེ་རྣམས་ཀྱིས་བརྩོན་པའི་ཕན་ཡོན་བཤད་ཟིན་ཏོ། ། ༤ ཆུང་འབྲིང་ཆེ་གསུམ་དུ་དབྱེ་བ་བཤད་པ། ད་ནི་བརྩོན་པའི་རབ་ཏུ་དབྱེ་བ་ཞེས་བྱ་བ་སྟོན་ཅིང་བཞི་པ་ཆུང་འབྲིང་ཆེ་གསུམ་དུ་དབྱེ་བ་འཆད་པ་ནི་འདི་ལྟ་སྟེ། གཟུགས་སོགས་འདུ་འགོད་གནས་བྲལ་དང༌། ཞེས་པས་དྲོད་ཆུང་ངུ་དང༌། གནས་དང་བརྟགས་དང་བརྗོད་དུ་མེད། ཅེས་པས་དྲོད་འབྲིང་པོ་དང༌། གཟུགས་སོགས་མི་གནས་དེ་དག་ནི། དེ་ཡི་ངོ་བོར་རང་བཞིན་མེད། དེ་དག་གཅིག་གི་རང་བཞིན་གཅིག ཅེས་པས་དྲོད་ཆེན་པོ་རྣམས་བསྟན་ཏོ། དེ་མི་རྟག་སོགས་པར་མི་གནས། །དེ་རྣམས་དེ་ཡི་ངོ་བོས་སྟོང༌། །དེ་དག་གཅིག་གི་རང་བཞིན་གཅིག། ཅེས་པས་རྩེ་མོ་ཆུང་ངུ་དང༌། །ཆོས་རྣམས་མི་འཛིན་གང་ཡིན་དང༌། །དེ་དག་མཚན་མར་མི་མཐོང་ཕྱིར། །ཞེས་པས་རྩེ་མོ་འབྲིང་དང༌། ཤེས་རབ་ཀྱིས་ནི་ཡོངས་རྟོག་པ། །ཐམས་ཅད་དམིགས་སུ་མེད་པར་རོ། །ཞེས་རྩེ་མོ་ཆེན་པོ་རྣམས་བསྟན་ཏོ། །གཟུགས་སོགས་ངོ་བོ་ཉིད་མེད་ཉིད། །དེ་མེད་པ་ཉིད་ངོ་བོ་ཉིད། །ཅེས་པས་བཟོད་པ་ཆུད་ངུ་དང༌། །དེ་དག་སྐྱེ་མེད་ངེས་འབྱུང་མེད། །དག་དང་ཞེས་པས་བཟོད་པ་འབྲིང་དང༌། །དེ་དག་མཚན་མེད་དེའི་མཚན་མར་མི་རྟེན་པས། མོས་མིན་འདུ་ཤེས་མེད་པ་ཡིན། ཞེས་པས་བཟོད་པ་ཆེན་པོ་རྣམས་བསྟན་ཏོ། །ཏིང་ངེ་འཛིན་དེའི་བྱེད་པ་ཉིད། ཅེས་པས་ཆོས་མཆོག་ཆུང་ངུ་དང༌། ལུང་སྟོན་པ་དང་རློམ་པ་ཟད། ཅེས་པས་ཆོས་མཆོག་འབྲིང་དང༌། གསུམ་པོ་ཕན་ཚུན་ངོ་བོ་གཅིག། ཏིང་འཛིན་རྣམ་པར་མི་རྟོག་པ། ཞེས་པས་ཆོས་མཆོག་ཆེན་པོ་རྣམས་བསྟན་ཏོ། །དེ་ལྟར་ངེས་འབྱེད་ཆ་མཐུན་ནི། །ཆུང་དང་འབྲིང་དང་ཆེན་པོ་ཡིན། །ཞེས་པས་རེ་རེ་ཡང་ཆུང་འབྲིང་ཆེན་པོ་གསུམ་གསུམ་ཡིན་པར་མཇུག་བསྡུས་དེ་བསྟན་པ་ཡིན་ནོ། །དེ་རྣམས་རིམ་པ་ལྟར་བཤད་པ་ནི། གཟུགས་སོགས་ཡང་དག་པར་ཡོད་པ་ལ་མིང་ཙམ་གྱིས་སྐུར་པ་འདེབས་པ་ནི་འདུ་འགོད་པ་སྟེ། འགྲུབ་པ་དང་ཡང་དག་པར་མེད་པ་ལ་མིང་ཙམ་གྱིས་སྒྲོ་འདོགས་པ་ནི་འདུ་འགོད་པ་སྟེ། འཕེལ་བའོ། །ཡང་དག་པར་དྲོད་ཆུང་དུའི་ཡེ་ཤེས་དེས་བཏགས་པའི་ཆོས་ཐམས་ཅད་མ་མཐོང་ཞིང་མིང་དེ་ཡང་མེད་པའི་ཕྱིར་གཟུགས་སོགས་འདུ་འགོད་བྲལ་བ་དང་མིང་གནས་པ་དང་བྲལ་བའི་ཡེ་ཤེས་འདི་དྲོད་ཆུང་དུ་ཡིན་ནོ། །འདི་འགོད་ཅེས་པ་འདི་མདོ་ལས། འཕེལ་འགྲིབ་ཅེས་པར་འབྱུང་བ་སློབ་དཔོན་དབྱིག་གཉེན་དང༌། འབུམ་ཊི་ཀ་མཁན་པོས་སྒྲོ་སྐུར་དུ་བཤད་ཅིང་ཉི་ཁྲི་སྣང་བས་སྐྱེ་འགག་ཏུ་བཤད་དེ། མདོ་ལས། མིང་ཙམ་གྱིས་ཇི་ལྟར་འཕེལ་བ་དང་འགྲུབ་པར་བགྱི་སྟེ། ཞེས་གསུངས་པས་འདི་འགོད་ཀྱིས་དོན་སྒྲོ་སྐུར་དུ་འཆད་པ་ཉིད་མདོ་དང་འབྱོར་རོ། །དེས་ན་མིང་གིས་འདི་འགོད་དང་འཕེལ་འགྲིབ་བྱེད་པ་ནི་མིང་གིས་སྒྲོ་སྐུར་བྱེད་ཅེས་པའི་དོན་ཏོ། ། ཉི་ཁྲི་སྣང་བ་ལྟར་ན་མིང་ཙམ་གྱིས་གཟུགས་སོགས་སྐྱེ་འགག་བྱེད་ཅེས་པར་འགྱུར་བས་དེ་ཉིད་ནི་མི་རིགས་སོ། །མདོ་ལས་རབ་འབྱོར་གྱིས། བཅོམ་ལྡན་འདས། འདི་ལྟར་བདག་གིས་ཆོས་ཐམས་ཅད་མ་འཚལ་མ་དམིགས་ཡང་དག་པར་རྗེས་སུ་མ་མཐོང་ན། བྱང་ཆུབ་སེམས་དཔའ་ཞེས་བགྱི་བ་འམ། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས། བགྱི་བའི་མིང་ཙམ་གྱིས། ཇི་ལྟར་འཕེལ་བ་དང་འགྲིབ་བར་བགྱི་སྟེ། འདི་ཉིད་བདག་གི་འགྱོད་པར་འགྱུར་རོ། ། བཅོམ་ལྡན་འདས་མིང་དེ་ཡང་གནས་པ་མ་མཆིས་ཐུག་པ་མ་མཆིས་སོ། །དེ་ཅི་སླད་དུ་ཞེ་ན། མིང་དེ་མ་མཆིས་པས་དེ་ལྟར་ན་མིང་དེ་གནས་པ་མ་མཆིས་ཐུག་པ་མ་མཆིས་པ་ལགས་སོ་ཞེས་པ་འདི་ལ། སློབ་དཔོན་དབྱིག་གཉེན་གྱིས། ཡང་དག་པར་ཡོད་པ་མ་ཡིན་པ་ལ་སྒྲོ་བཏགས་པ་ནི་འཕེལ་བ་ཞེས་བྱའོ། །ཡང་དག་པར་ཡོད་པ་ལ་སྐུར་པ་བཏབ་པ་ནི་འགྲིབ་བ་ཞེས་བྱའོ། །ཞེས་དང༌། འདིར་འགྱོད་པ་ཞེས་བྱ་བ་ནི་ཡིད་ལ་གཅགས་པ་ལ་མི་བྱའི། ཉེས་པ་བྱས་པའི་དངོས་པོ་ལ་འགྱོད་པ་ཞེས་བྱ་སྟེ། མི་ཤེས་པར་བྱས་པའི་སྐྱོན་དུ་འགྱུར་རོ། །སྙམ་དུ་དགོངས་པའོ་ཞེས་དང༌། དེ་ནས་མིང་དེ་ཉིད་ཀྱང་དངོས་པོ་མེད་པར་བསྟན་པའི་ཕྱིར། ཞེས་གསུངས་སོ། །དེ་བཞིན་དུ་འབུམ་འགྲེལ་ལས་ཀྱང་གསུངས་སོ། །དེས་ན་དྲོད་ཆུང་ངུ་ནི་གཟུགས་སོགས་ལ་སྒྲོ་སྐུར་མེད་ཅིང༌། མིང་ཐམས་ཅད་གནས་པ་མེད་པའི་ཡེ་ཤེས་སོ། །ཞེས་པའི་དོན་ཏོ། །དྲོད་འབྲིང་བོ་ནི་ཕྱིར་མི་ལྡོག་པའི་ས་ལ་མི་གནས་པའི་ཚུལ་གྱིས་གནས་པ་དང༌། ཕུང་ཁམས་ནས་མ་འདྲེས་བར་ཆོས་སུ་བཏགས་པ་ཙམ་དང༌། དེ་ལྟར་འདོགས་པའི་མིང་ནི་དགེ་མི་དགེ་ལ་སོགས་ཆོས་གང་གིས་ཀྱང་བརྗོད་དུ་མེད་པའི་ཡེ་ཤེས་སོ། །ཞེས་པའི་དོན་ཏོ། །མིང་དམིགས་སུ་མེད་པའི་ཕྱིར་དགེ་མི་དགེ་ལ་སོགས་སུ་སྡུར་མེད་པ་ལ་དེ་དང་དེས་བརྗོད་དུ་མེད་ཅེས་གསུངས་སོ། ། མདོའི་གོ་རིམ་ལྟར་ན། བཏགས་དང་བརྗོད་དུ་མེད་གནས་དང༌། ཞེས་པར་འབྱུང་ངོ༌། །དྲོད་ཆེན་པོའི་གནས་སྐབས་ཀྱི་བྱང་སེམས་ནི་ཀུན་བཏགས་པ་དང༌། གཞན་དབང་གིས་གཟུགས་སོགས་ལ་གཟུང་བའི་རྣམ་རྟོག་གིས་མི་གནས་ཏེ། ཀུན་བཏགས་དང་གཞན་དབང་གི་གཟུགས་སོགས་དེ་དག་ནི་ཆོས་ཉིད་ཀྱི་གཟུགས་སོགས་དེའི་ངོ་བོར་གྱུར་བ་་ཡོངས་སུ་གྲུབ་པའི་རང་བཞིན་དང་གཅིག་པ་ཉིད་མེད་པའི་ཕྱིར་རོ། །དེ་ལྟར་ན་ཆོས་ཉིད་ངོ་བོ་ཐ་དད་དུ་འགྱུར་རོ། །ཞེ་ན། ཆོས་ཅན་གཟུགས་སོགས་དེ་དག་གཅིག་གི་ཆོས་ཉིད་དང༌། རང་བཞིན་སྟོང་པ་ཉིད་ནི་གཅིག་པ་ཉིད་དོ། །ཇི་སྐད་དུ། གནོད་འཇོམས་ལས། དེ་ལྟར་ཆོས་དང་ཆོས་ཉིད་དག་ཐ་དད་པ་མེད་པར་གྱུར་པས། གང་གི་ཚེ་ཆོས་ཉིད་ཀྱི་ཆོས་བརྗོད་པར་གྱུར་པ་དེའི་ཚེ། གཟུགས་ཉིད་ཀྱང་སྟོང་པ་ཉིད་ཅེས་བྱའོ། །གང་གི་ཚེ་ཆོས་ཀྱིས་ཆོས་ཉིད་བརྗོད་པར་གྱུར་པ་དེའི་ཚེ། སྟོང་པ་ཉིད་ཀྱང་གཟུགས་ཞེས་བྱའོ། །ཞེས་གསུངས་སོ། །རྩེ་མོ་ཆུང་ངུའི་གནས་སྐབས་ཀྱི་བྱང་སེམས་སྟོང་པ་ཉིད་ཀྱི་རྣལ་འབྱོར་ལ་སྤྱོད་པ་དེ་གཟུགས་སོགས་དེ་མི་རྟག་པ་དང་སོགས་པའི་སྒྲས་སྡུག་བསྔལ་བ་དང་བདག་མེད་པ་དང་ཞི་བ་དང་སྟོང་པ་དང་མཚན་མ་མེད་པ་དང༌། སྨོན་པ་མེད་པ་དང་དབེན་པར་གཟུང་བའི་རྣམ་རྟོག་གིས་མི་གནས་སྟེ ། སྟོང་པ་ཉིད་ཀྱི་གཟུགས་མི་རྟག་པ་ལ་སོགས་པ་དེ་རྣམས་བཏགས་པའི་གཟུགས་མི་རྟག་པ་སོགས་དེའི་ངོ་བོས་སྟོང་པའི་ཕྱིར་དང༌། གཟུགས་མི་རྟག་པ་སོགས་དེ་དག་གཅིག་གི་ཆོས་ཉིད་དང་རང་བཞིན་སྟོང་པ་ཉིད་གཅིག་པ་ཉིད་ཀྱི་ཕྱིར་རོ། ། དེས་ན་འདིར་དྲི་བཅས་དང་དྲི་མེད་ལ་རིམ་པ་ལྟར་གཟུགས་སོགས་དང༌། སྟོང་པ་ཉིད་ཅེས་པར་བསྟན་ཅིང་ཆོས་དང་ཆོས་ཉིད་དེ་དག་དེ་ཉིད་དང་གཞན་དུ་བརྗོད་དུ་མེད་པའི་ཕྱིར་གཟུགས་ལས་གུད་ན་སྟོང་པ་ཉིད་མེད་ཅིང༌། སྟོང་པ་ཉིད་ལས་གུད་ན་གཟུགས་མེད་པ་དང༌། སྟོང་པ་ཉིད་ཀྱང་གཟུགས། གཟུགས་ཉིད་ཀྱང་སྟོང་པ་ཉིད་ཅེས་པར་སློབ་དཔོན་དབྱིག་གཉེན་གྱིས་གསུངས་སོ། །རྩེ་མོ་འབྲིང་ནི་གཟུང་བའི་རྣམ་རྟོག་གིས་ཆོས་རྣམས་མི་འཛིན་པ་གང་ཡིན་པ་དེ་ཡིན་ཏེ། ཆོས་དེ་དག་མཚན་པར་མི་མཐོང་བའི་ཡེ་ཤེས་ཡིན་པའི་ཕྱིར་དང༌། ཡོངས་གྲུབ་གཟུགས་སོགས་ནི་ཡོངས་སུ་གཟུང་བ་མེད་ཅིང༌། མཚན་མ་ཡང་མ་ཡིན་པའི་ཕྱིར་རོ། །རྩེ་མོ་ཆེན་པོ་ནི། བརྟག་པ་བཞིས་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ལ་ཡོངས་སུ་རྟོག་པ་ན། ཆོས་ཐམས་ཅད་དམིགས་སུ་མེད་པར་མཐོང་བའི་ཡེ་ཤེས་སོ། །དམིགས་སུ་མེད་པའི་དོན་ནི། དངོས་པོ་མེད་པར་གནོད་འཇོམས་སུ་གསུངས་སོ། ། བརྟག་པ་བཞི་ནི། ཤེར་ཕྱིན་འདི་ནི་གང༌། འདི་ནི་གང་གི འདི་ནི་ཅིའི་ཕྱིར། འདི་ནི་ཅི་ཞིག་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་རིམ་པ་ལྟར་ཤེར་ཕྱིན་གྱི་ངོ་བོ་དང༌། གང་གི་ཕ་རོལ་ཏུ་ཕྱིན་པ་དང༌། ཤེར་ཕྱིན་ཟེར་བའི་རྒྱུ་མཚན་དང༌། ཤེར་ཕྱིན་གྱི་བྱེད་པ་འདྲི་པའི་ལན་དུ། ཤེར་ཕྱིན་ངོ་བོ་ནི་རྟོགས་པའོ། །ཆོས་ཐམས་ཅད་ཀྱི་ཕ་རོལ་ཏུ་ཕྱིན་པའོ། ། ཇི་ལྟ་བ་ཉིད་ཀྱི་མཚན་ཉིད་རྟོགས་པའི་ཕྱིར་རོ། །བླ་ན་མེད་པའི་བྱང་ཆུབ་ཏུ་ངེས་པར་འབྱིན་པའི་ཕྱིར་རོ། །ཞེས་བརྗོད་པར་བྱའོ། །ཞེས་པར་སློབ་དཔོན་དབྱིག་གཉེན་དང༌། འབུམ་ཊིཀ་མཁན་པོ་དག་གསུང་སོ། །རིན་ཆེན་སྡུད་པ་ལས། བྱེད་པ་མ་གཏོགས་པ་གསུམ་གསུངས་སྟེ། ཇི་སྐད་དུ། ཡང་འདི་ཤེས་རབ་འདི་ནི་གང་ཡིན་སུ་ཡི་ཡིན། གང་ལས་ཡིན་ཞེས་ཆོས་འདི་ཐམས་ཅད་སྟོང་པར་རྟོག ཅེས་སོ། །དེས་ན་འདིར་ཡང༌། ཤེས་རབ་ཉིད་ལ་ཡོངས་རྟོག་པ། ཞེས་པར་བསྒྱུར་དགོས་སོ། །བཟོད་པ་ཆུང་ངུ་ནི། ཆོས་ཉིད་ཀྱི་གཟུགས་སོགས་དངོས་པོའི་ངོ་བོ་ཉིད་མེད་པ་ཉིད་གང་ཡིན་པ་དེ་ནི་བཏགས་པའི་མཚན་ཉིད་མེད་པ་ཉིད་ཀྱི་ངོ་བོ་ཉིད་དུ་གྱུར་པའི་ཡེ་ཤེས་སོ། །བཟོད་པ་འབྲིང་ནི། གཤིས་ལ་མེད་པའི་ཕྱིར་བཏགས་པའི་ཆོས་དེ་དག་སྐྱེ་བ་མེད་ཅིང༌། དེ་ལ་ངེས་པར་འབྱུང་བ་མེད་པ་དང༌། རང་བཞིན་གྱི་རྣམ་པར་དག་པའི་ཕྱིར་ཆོས་ཉིད་ཀྱི་གཟུགས་སོགས་དེ་དག་དྲི་བཅས་ཀྱི་གནས་སྐབས་ན་སྐྱེ་བ་མེད་ཅིང་དྲི་མེད་ཀྱི་གནས་སྐབས་ན། གློ་བུར་གྱི་ངེས་པར་འབྱུང་བ་མེད་པས་མི་དམིགས་པར་སྦྱོད་པའི། བྱང་སེམས་དེ་ལུས་ངག་སེམས་མཚན་ཡོངས་སུ་དག་པ་དང་ལས་ཀྱི་དབང་གིས་ངན་སོང་དུ་མི་སྐྱེའོ། །བཟོད་པ་ཆེན་པོ་ནི་ཆོས་ཉིད་གཟུགས་སོགས་ལ་དེ་དག་གཟུགས་སོགས་ལ་འཛིན་རྟོག་གིས་སྦྱོད་པའི་མཚན་མ་མེད་ཅིང་སེམས་ཕྱིན་ཅི་ལོག་གིས་གཟུགས་ལ་གནས་པའི་ཚུལ་གྱིས། དེའི་མཚན་མར་མི་རྟེན་པས། ལྟ་བ་ཕྱིན་ཅི་ལོག་གིས་གཟུགས་སོགས་ལ་མོས་པ་མིན་ཅིང༌། འདུ་ཤེས་ཕྱིན་ཅི་ལོག་མེད་པའི་ཡེ་ཤེས་ཡིན་ནོ། །ཇི་སྐད་དུ། གནས་ཞེས་བྱ་བ་ནི། སེམས་ཕྱིན་ཅི་ལོག་གིས་སོ། །ཀུན་ཤེས་ཞེས་བྱ་བ་ནི་འདུ་ཤེས་ཕྱིན་ཅི་ལོག་གིས་སོ། །མོས་ཞེས་བྱ་བ་ནི་ལྟ་བ་ཕྱིན་ཅི་ལོག་གིས་སོ། །ཞེས་སློབ་དཔོན་དབྱིག་གཉེན་དང༌། འབུམ་ཊིཀ་མཁན་པོ་དག་གསུངས་སོ། ། འདིར་ཕྱིན་ཅི་ལོགས་གསུམ་མེད་པར་བསྟན་པ་འདིས་ཀྱང་བཟོད་པ་འཛིན་རྟོག་ཡིན་པ་བསལ་བ་ཡིན་ནོ། །སྐབས་འདིར་མདོ་ལས་ཐབས་ལ་མི་མཁས་པ་དང། མཁས་པ་དག་གིས་རིམ་ལྟར་བཟློགས་ཕྱོགས་དང་དེའི་གཉེན་པོ་སྦྱོར་ལམ་བཟོད་པ་གཉིས་ཀ་བསྟན་ཏོ། ། ཆོས་མཆོག་ཆུང་ངུ་ནི་རྣམ་པར་མི་རྟོག་པའི་ཏིང་ངེ་འཛིན་དང། ཏིང་ངེ་འཛིན་དེའི་བྱེད་པ་ཉིད་ཡིན་ནོ། །དེ་ལ་ཏིང་ངེ་འཛིན་གྱི་དབྱེ་བ་ནི། ཆོས་ཐམས་ཅད་སྐྱེ་བ་མེད་པ་དང། དཔའ་བར་འགྲོ་བ་དང༌། རིན་ཆེན་ཕྱག་རྒྱའི་ཏིང་ངེ་འཛིན་ལ་སོགས་པ་བརྒྱ་ཉེར་གཅིག་གོ། ཏིང་ངེ་འཛིན་གྱི་བྱེད་པ་ནི་ཏིང་ངེ་འཛིན་དེ་དང་དེས་གནས་པའི་བྱང་སེམས་མྱུར་དུ་འཚང་རྒྱ་བ་ཡིན་ནོ། །མདོ་ལས་དཔའ་བར་འགྲོ་བ་ཞེས་བྱ་བའི་ཏིང་ངེ་འཛིན་ཡོད་དེ་ཏིང་ངེ་འཛིན་དེས་གནས་པའི་བྱང་ཆུབ་སེམས་དཔའ་མྱུར་དུ་བླ་ན་མེད་པ་ཡང་དག་པ་རྫོགས་པར་འཚང་རྒྱ་བར་འགྱུར་རོ། །ཞེས་སོ། །སྡུད་པ་ལས་སྐྱེ་མེད་བློ་ལྡན་ཏིང་ངེ་འཛིན་ཞི་བ་མཆོག་ལ་རེག། ཅེས་ཏིང་ངེ་འཛིན་གྱི་བྱེད་པ་ཞི་བ་རྣམས་ཀྱི་ནང་ནས་ཞི་མཆོག་ལ་རེག་པ་གང་ཡིན་དེ་ཉིད་ཡིན་པར་གསུངས་སོ་ཆོས་མཆོག་འབྲིང་ནི་བྱང་ཆུབ་སེམས་དཔའ་གང་ཏིང་ངེ་འཛིན་དེ་དག་གིས་གནས་པ་དེ། དེ་བཞིན་གཤེགས་པས་ཟླ་ན་མེད་པའི་བྱང་ཆུབ་ཏུ་ལུང་སྟོན་པ་དང༌། བདག་ནི་དུས་གསུམ་དུ་སྙོམ་པར་ཞུགས་སོ། །འཇུག་གོ །འཇུག་པར་འགྱུར་རོ། །ལངས་སོ་སྙམ་དུ་ཏིང་ངེ་འཛིན་དེ་ནི་རློམ་སེམས་སུ་འགྱུར་བ་ཟད་པ་ཡིན་ནོ། །ཇི་སྐད་དུ། བྱང་ཆུབ་སེམས་དཔའ་གང་དེ་འདིར་བདག་ཞིར་གནས་པ། འདི་ནི་སྔོན་གྱི་དེ་བཞིན་གཤེགས་པས་ལུང་བསྟན་ཡིན། །བདག་ནི་མཉམ་པར་བཞག་གམ་ལངས་ཞེས་རློམ་སེམས་མེད། །ཅི་ཕྱིར་ཞེ་ན་ཆོས་ཀྱི་རང་བཞིན་ཡོངས་ཤེས་ཕྱིར། །ཞེས་གསུངས་སོ། །ཆོས་མཆོག་ཆེན་པོ་ནི་གནས་སྐབས་འདིར་གཉིས་འཛིན་ནུབ་པས་ཡུལ་དང་ཡུལ་ཅན་མཉམ་པ་ཉིད་ཀྱི་ཕྱིར་ཤེར་ཕྱིན་དང༌། ཏིང་ངེ་འཛིན་བྱང་ཆུབ་སེམས་དཔའ་གསུམ་པོ་ཕན་ཚུན་གཞི་མཐུན་ཡིན་པའི་ཚུལ་གྱི་ངོ་བོ་གཅིག་གོ །དེ་ཅིའི་ཕྱིར་ཞེ་ན། ཏིང་ངེ་འཛིན་རྣམ་པར་མི་རྟོག་པ་ཡིན་པའི་ཕྱིར་རོ། །མདོ་ལས། ཤཱ་རིའི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་གཞན་ལ་ཏིང་ངེ་འཛིན་ཀྱང་གཞན་ཞེང་བྱང་ཆུབ་སེམས་དཔའ་ཡང་གཞན་ཞེས་བྱ་བ་མེད་ཀྱི་བྱང་ཆུབ་སེམས་དཔའ་ཉིད་ཀྱང་ཏིང་ངེ་འཛིན་ཡིན་ལ། ཏིང་ངེ་འཛིན་ཉིད་ཀྱང་བྱང་ཆུབ་སེམས་དཔའ་ཡིན་པའི་ཕྱིར་རོ། །ཞེས་སོ། །དེའི་བཤད་པར་སློབ་དཔོན་དབྱིག་གཉེན་གྱིས་ཆོས། ཐམས་ཅད་ནི་དེ་བཞིན་ཉིད་ཙམ་དུ་བདག་ཉིད་གཅིག་པའི་ཕྱིར། དེ་སྐད་ཅེས་བྱའོ། །དེ་ཉིད་ཀྱི་ཕྱིར་ཆོས་ཐམས་ཅད་མཉམ་པ་ཉིད་ཀྱི་ཕྱིར་ཞེས་བྱ་བ་གསུངས་སོ། །ཞེས་གསུངས་སོ། །དེས་ན་འདིར་ཡང་ཏིང་ངེ་འཛིན་རྣམ་པར་མི་རྟོག་པ་ཞེས་གསུངས་ཀྱི་ཏིང་ངེ་འཛིན་འདི་དག་འཛིན་རྟོག་ཡིན། ཤེས་ནི་མ་གསུངས་པའི་ཕྱིར་ཆོས་མཆོག་གི་ངོ་བོ་དེ་འཛིན་རྟོག་ཡིན་པ་བསལ་པ་ཡིན་ནོ། །གོང་དུ་བཤད་པ་དེ་ལྟར་ཐམས་ཅད་ཀྱི་མཇུག་བསྡུ་བ་ངེས་འབྱེད་ཆ་མཐུན་དྲོད་རྩེ་མོ་དང་བཟོད་པ་དང་ཆོས་མཆོག་བཞི་པོ་ནི་རེ་རེ་ཡང་ཆུང་དང་འབྲིང་དང་ཆེན་པོ་གསུམ་གསུམ་དུ་ཕྱེ་བས་རྣམ་པ་བཅུ་གཉིས་ཡིན་ནོ། །གང་དག་གཟུགས་སོགས་འདུ་འགོད་གནས་བྲལ་དང་ཞེས་པ་ནས།ཏིང་ངེ་འཛིན་རྣམ་པར་མི་རྟོག་པ་ཞེས་བྱ་བའི་བར་དྲོད་འབྲིང་བོ་ལ་སོགས་པ་རེ་རེ་ཡང་དམིགས་པ་དང་རྣམ་པ་གཉིས་གཉིས་སུ་འཆད་པ་ལ་ནི། དེ་ལྟར་ངེས་འབྱེད་ཆ་མཐུན་ནི། ཆུང་དང་འབྲིང་དང་ཆེན་པོ་ཡིན། ཞེས་པ་འདིས་དངོས་སུ་གནོད་ཅིང༌། མདོར་བསྟན་ཏུ་དམིགས་རྣམ་དང་ཆུང་འབྲིང་ལ་སོགས་སོ་སོར་བྱུང་བ་ལྟར་རྒྱས་བཤད་དུ་ཡང་སོ་སོར་འཆད་པར་རིགས་པས་ཀྱང་གནོད་དོ། །དེས་ན་རྒྱལ་བ་དང༌། རྒྱལ་ཚབ་དག་ལ་དཔང་དུ་བྱས་ནས་གཟུ་བོར་གནས་པའི་བློས་གསེར་བཞིན་དུ་ལེགས་པར་བརྟགས་དགོས་སོ། །དེ་རྣམས་ཀྱིས་ཆུང་དང་འབྲིང་དང་ཆེན་པོར་དེ་དབྱེ་བ་བཤད་ཟིན་ཏོ། ། ༥ རྣམ་རྟོག་བཞི་པོ་བཤད་པ། ད་ནི་ལྔ་པ་རྣམ་རྟོག་བཞི་པོ་འཆད་པ་ནི། ངེས་འབྱེད་ཡན་ལག་བཞི་པོའི་རྣམ་པའི་དགག་བྱ་མངོན་ཞེན་ལ་སོགས་ཕྱིན་ཅི་ལོག་གསུམ་པོའི་ངོ་བོར་གྱུར་པའི་རྣམ་རྟོག་ནི། གཟུང་རྟོག་དང་འཛིན་རྟོག་གཉིས་སོ། །དེ་ལ་གཟུང་བར་འཛིན་པ་ནི། གཟུང་རྟོག་དང༌། འཛིན་པར་འཛིན་པ་ནི་འཛིན་རྟོག་གོ། གཟུང་རྟོག་ལ་ཡང་ལྡོག་པའི་གཟུང་རྟོག་དང༌། འཇུག་པའི་གཟུང་རྟོག་གཉིས་སོ། །དེ་ལ་གང་གཟུང་བྱའི་ཡུལ་སྐྱོན་ཅན་དུ་མཐོང་ཞིང་དེར་ཞེན་པའི་བློ་ནི་ལྡོག་པའི་གཟུང་རྟོག་དང༌། གང་གཟུང་བྱའི་་ཡུལ་ཡོན་ཏན་ཅན་དུ་མཐོང་ཞིང་དེར་ཞེན་པའི་བློ་ནི་འཇུག་པའི་གཟུང་རྟོག་གོ། གཉིས་པོ་དེ་དག་སྟོན་པ་ནི། གཞི་དང་དེའི་གཉེན་པོ་ཡིས། གཟུང་བར་རྟོག་པ་རྣམ་པ་གཉིས། ཞེས་པ་ལ་གཞི་ཀུན་ནས་ཉོན་མོངས་པ་སྐྱོན་ཅན་དུ་འཛིན་པ་དང༌། ཀུན་ནས་ཉོན་མོངས་པ་དེའི་གཉེན་པོ་རྣམ་བྱང་ཡོན་ཏན་ཅན་དུ་འཛིན་པའི་ཁྱད་པར་དེ་ཡིས་རིམ་པ་ལྟར་ལྡོག་པའི་གཟུང་བར་རྟོག་པར་དང༌། འཇུག་པའི་གཟུང་བར་རྟོག་པ་རྣམ་པ་གཉིས་བསྟན་ཏོ། །དེ་དག་རེ་རེ་ཡང་དགུ་དགུར་དབྱེ་བ་ནི། རྨོངས་དང་ཕུང་སོགས་བྱེ་བྲག་གིས། དེ་ནི་སོ་སོར་རྣམ་པ་དགུ ཞེས་པ་ལ་རྨོངས་པ་སྟེ་མ་རིག་པ་དང༌། ཕུང་པོ་དང་སོགས་པའི་སྒྲས་ཁམས་དང་སྐྱེ་མཆེད་ལ་སོགས་པའི་བྱེ་བྲག་གིས་གཟུང་རྟོག་གཉིས་པོ་དེ་ནི་སོ་སོར་དབྱེ་བ་རྣམ་པ་དགུ་དགུ་ཡིན་ནོ། །མདོ་ལས། ཤཱ་རིའི་བུ། ཆོས་འདི་དག་ནི་ཇི་ལྟར་བྱིས་པ་སོ་སོའི་སྐྱེ་བོ་རྣམས་མངོན་པར་ཞེན་པ་དེ་ལྟ་བུར་ཡོད་པ་མ་ཡིན་པའི་ཕྱིར་རོ། །གསོལ་པ། ཆོས་འདི་དག་ཇི་ལྟ་བུར་ཡོད་པ་ལགས། བཀའ་སྩལ་པ། ཇི་ལྟར་མེད་པ་དེ་ལྟར་ཡོད་ལ་དེ་ལྟར་ཡོད་པ་མ་ཡིན་པས་དེའི་ཕྱིར་མ་རིག་པ་ཞེས་བྱའོ། །ཞེས་སོགས་དང་དེ་ལ་བྱིས་པ་གང་དག་མ་རིག་པ་དང་སྲེད་པ་དག་གི་མངོན་པར་ཞེན་པ་དེ་དག་གིས་ཡོད་པ་མ་ཡིན་པ་ལ་བཏགས་ཏེ། ཡོད་པ་མ་ཡིན་པ་ལ་མངོན་པར་ཞེན་ནམ། འདི་ལྟ་སྟེ། རྟག་པ་དང་ཆད་པའི་མཐའ་གཉིས་ལ་ཆགས་པ་ནས། དེ་དག་ནི་མི་ཤེས་མི་མཐོང་བ་སྟེ། དེ་དག་གིས་ཆོས་གང་དག་ཡོད་པ་མ་ཡིན་པའི་ཆོས་དེ་དག་ཡོངས་སུ་བཏགས་པ་མིང་དང་གཟུགས་ལ་མངོན་པར་ཞེན་ཅིང༌། ཞེས་པ་ནས། མ་འདྲེས་པ་བཅོ་བརྒྱད་ཀྱི་བར་དག་ལ་ཡང་མངོན་པར་ཞེན་ཏོ། །ཞེས་སོགས་གསུངས་སོ། །འདིར་ཡང༌། རྟོག་པ་འདི་དག་མ་རིག་པ་དང༌། སྲེད་པ་མཐའ་གཉིས་ལ་ཞེན་པ་དང༌། ཡོད་པ་མ་ཡིན་པ་ལ་ཡོད་པར་ཞེན་པའི་ངོ་བོ་ཡིན་པར་གསུངས་པ། འདིས་ཀྱང་ངེས་འབྱེད་ཡན་ལག་བཞི་པོ་རྟོག་པ་འདི་དག་ཡིན་པ་དང༌། དགག་རྟོག་ཡིན་པ་བསལ་བ་ཡིན་ནོ། །གཉིས་པ་འཛིན་རྟོག་ལ་ཡང༌། སེམས་ཅན་རྫས་སུ་ཡོད་པར་ཞེས་པ་རྫས་འཛིན་དང༌། སེམས་ཅན་བཏགས་པར་ཡོད་པར་ཞེན་པ་བཏགས་འཛིན་གཉིས་སོ། །གཉིས་པོ་དེ་དག་སྟོན་པ་ནི། རྫས་དང་བཏགས་པའི་རྟེན་ཅན་གྱི། འཛིན་པའང་རྣམ་པ་གཉིས་སུ་འདོད། ཞེས་པ་ལ་སེམས་ཅན་རྫས་སུ་ཡོད་པའི་རྟེན་གྱི་འཛིན་པ་དང༌། སེམས་ཅན་བཏགས་པར་ཡོད་པའི་རྟེན་ཅན་གྱི་འཛིན་པ་རྣམ་པ་གཉིས་སུ་འདོད་དེ་བསྟན་ཏོ། །འང་གི་སྒྲ་ནི་སྔ་མ་ལྟར་གཉིས་སུ་སྟོན་པའོ། །འཛིན་རྟོག་དེ་དག་རེ་རེ་ཡང་དགུ་དགུར་དབྱེ་བ་ནི། རང་དབང་བདག་སོགས་ངོ་བོ་དང༌། ཕུང་སོགས་རྟེན་ལས་དེ་བཞིན་ནོ། །ཞེས་པ་ལ་རང་དབང་ཅན་དང༌། བདག་དང་སོགས་པའི་སྒྲས་སེམས་ཅན་ལ་སོགས་ངོ་བོ་རྟེན་གྱི་དབྱེ་བ་དགུ་ལས་དང༌། ཕུང་པོ་དང་སོགས་པའི་སྒྲས་ཁམས་དང་སྐྱེ་མཆེད་ལ་སོགས་རྟེན་གྱི་དབྱེ་བ་དགུ་ལས། རྟེན་ཅན་འཛིན་རྟོག་གཉིས་པོ་ཡང་སོ་སོར་དགུ་དགུར་དབྱེ་བ་ནི་ཇི་ལྟར་གཟུང་རྟོག་དབྱེ་བ་དེ་བཞིན་ནོ། །མདོ་ལས་ཅི་སྒྱུ་མའི་སྐྱེས་བུ་འདི་ཤེར་ཕྱིན་ལ་བསླབས་ནས་རྣམ་མཁྱེན་དུ་ངེས་པར་འབྱུང་བར་འགྱུར་རམ། ཞེས་པ་ནས། སྒྱུ་མ་ཡང་གཞན་ལ་གཟུགས་ཀྱང་གཞན་ཞིག་ཡིན་སྙམ་མམ། ཞེས་སོགས་དང༌། ཉེ་བར་ལེན་པའི་ཕུང་པོ་ལྔ་པོ་འདི་དག་ལ་འདི་ལྟ་སྟེ། བྱང་ཆུབ་སེམས་དཔའ་ཞེས་བྱ་བར་མིང་དང་བརྡས་ཐ་སྙད་དུ་གདགས་སུ་ཡོད་དམ། ཞེས་པ་ནས། བཅོམ་ལྡན་འདས་འདི་ལྟར་ཕུང་པོ་ལྔ་པོ་གང་དག་ལགས་པ་དེ་ཉིད་སྒྱུ་མའི་སྐྱེས་བུར་རིག་པར་བགྱི་བ་ལགས་པའི་སླད་དུའོ། ཞེས་པ་ལ་སོགས་གསུངས་པ་ནི་འཛིན་རྟོག་འདི་དག་གཞན་དབང་ཡིན་པའི་ཕྱིར། སྒྱུ་མ་ལ་སོགས་དཔེ་རྣམས་ཀྱིས། གཞན་གྱི་དབང་ནི་ཡང་དག་བསྟན་ཞེས་པའི། དོན་ཏོ། །སྡུད་པ་ལས། གཟུང་རྟོག་གི་སྐབས་སུ། གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། བྱིས་པ་རྣམས་ཀྱིས་དེ་བཏགས་ཡོད་དང་མེད་པར་བྱེད། ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང༌། ཞེས་གསུངས་པ་ནི་ཆོས་ཐམས་ཅད་གཤིས་ལ་མེད་ཀྱང་ཐ་སྙད་དུ་གཟུང་རྟོག་གིས་ཡོད་པ་དང་མེད་པའི་ཆོས་སུ་འདོགས་པར་བྱེད་པས་ཆོས་ཐམས་ཅད་བཏགས་པ་ཙམ་དུ་དྲོད་རྩེ་ལ་གནས་པའི་བྱང་སེམས་གང་གིས་ཤེས་ཤིང་ཆོས་ཉིད་གཤིས་ལ་གནས་པར་མཐོང་བས་རྣམ་མཁྱེན་དུ་ངེས་པར་འབྱུང་ཞེས་པའི་དོན་ཏེ། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། ཇི་ལྟར་རི་བོང་མགོ་ཡི་རྭ། བཏགས་པ་ཉིད་དེ་མེད་པ་ལྟར། དེ་བཞིན་ཆོས་རྣམས་ཐམས་ཅད་ཀྱང་བཏགས་པ་ཉིད་དེ་ཡོད་མ་ཡིན། ཞེས་གསུངས་པ་དེ་ཡིན་ནོ། །སྡུད་པ་ལས། འཛིན་རྟོག་གི་སྐབས་སུ་ཡང༌། གང་འདིར་ཕུང་པོ་ལྔ་དག་སྒྱུ་མ་འདྲར་ཤེས་ཤིང༌། སྒྱུ་མ་གཞན་དང་ཕུང་པོ་གཞན་དུ་མི་བྱེད་ལ། སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། དེ་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། ཞེས་གསུངས་པ་ནི་བཟོད་པ་དང༌། ཆོས་མཆོག་ལ་གནས་པའི་བྱང་ཆུབ་སེམས་དཔའ་འཛིན་རྟོག་གི་ངོ་བོ་གཞན་དབང་སྒྱུ་མ་ལྟ་བུར་ཤེས་ཤིང་དེ་གཉིས་ཐ་དད་དུ་ཡིད་ལ་མི་བྱེད་པ་ལ་རྫས་དང་བཏགས་པའི་སེམས་ཅན་སྣ་ཚོགས་པའི་འདུ་ཤེས་བྲལ་ཞིང་འཛིན་རྟོག་ཉེ་བར་ཞི་བ་སྦྱོད་པ་དེ་ཤེར་ཕྱིན་མཆོག་སྤྱོད་པ་ཡིན་ཞེས་པའི་དོན་ཏོ། །ཉི་ཁྲི་སྣང་པས། གཟུང་རྟོག་གཉིས་པོའི་ཡུལ་ཀྱི་ཁྱད་པར་འཆད་ལུགས་ལྟར་ན། གཞི་དང་དེ་ཡི་གཉེན་པོ་ཡིས། །ཞེས་པ་འདིས་རྣམ་བྱང་དེ་དངོས་པོ་ཐམས་ཅད་ཀྱི་གཉེན་པོར་བྱས་སྣང་ངོ༌། །གཟུང་རྟོག་དང་འཛིན་རྟོག་གཉིས་ལ་ཡང་མུ་བཞིའི་བཤད་པར་བྱས་ཏེ། ཡུལ་གཅིག་ལ་མ་ལྟོས་པར་ཡུལ་ཐ་དད་པའི་སྒོ་ནས་ཀྱང༌། གཟུང་རྟོག་དང་འཛིན་རྟོག་གཉིས་ཡིན་དུ་འཇོག་ན། རྗེས་དཔག་ལ་སོགས་རྟོག་པ་ཐམས་ཅད་ལ་ཡང༌། ཡུལ་ཐ་དད་པའི་སྒོ་ནས་ལ་ལ་ལ་ལྟོས་ནས་མངོན་སུམ་དུ་འགྱུར་བའི་ཕྱིར་མངོན་སུམ་དང་རྟོག་པ་གཉིས་ཡིན་སྲིད་པར་ཧ་ཅང་ཐལ་བར་འགྱུར་རོ། །དེས་ན་ཡུལ་གང་ལ་གཟུང་བར་ཞེན་པ་དེ་འཛིན་རྟོག་མ་ཡིན་ཞིང་གང་ལ་འཛིན་པར་ཞེན་པ་དེ། གཟུང་རྟོག་མ་ཡིན་ནོ། །ཞེས་བྱ་བར་རིགས་སོ་སུམ་ཅུ་པའི་རབ་ཏུ་བྱེད་པར་གཟུང་རྟོག་དང་འཛིན་རྟོག་གཉིས་ལ་འཛིན་པ་གཉིས་ཞེས་གསུངས་པ་ནི་གཟུང་པར་འཛིན་པ་དང་འཛིན་པར་འཛིན་པ་ཞེས་པའི་དོན་ཏོ། །དེ་རྣམས་ཀྱིས་རྣམ་རྟོག་བཞི་པ་བཤད་ཟིན་ཏོ། ། ༦ ཡོངས་འཛིན་རྒྱས་པར་བཤད་པ། ད་ནི་དྲུག་པ་ཡོངས་འཛིན་རྒྱས་པར་བཤད་པ་ནི། འདིར་ཉན་རང་གི་ཡོངས་འཛིན་ལས་ཁྱད་པར་དུ་འཕགས་པ་ནི་བྱང་ཆུབ་སེམས་དཔའི་ཐབས་ལ་མཁས་པ་ཉིད་ཡིན་ནོ། །དེ་ལྟ་མ་ཡིན་ན་སངས་རྒྱས་གཅིག་ཉིད་ཀྱང་ཉན་རང་དང་བྱང་ཆུབ་སེམས་དཔས་ཐམས་ཅད་ཀྱི་དགེ་བའི་བཤེས་གཉེན་དུ་འགྱུར་ཏེ། སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་ཞིང༌། འཆད་དང་རིགས་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་གསུངས་པའི་ཕྱིར། དགེ་བའི་བཤེས་གཉེན་གཅིག་ཉིད་བཟང་ངན་གཉིས་ཇི་ལྟར་དབྱེ། གཞན་ཡང་རྩེ་སྦྱོར་གྱི་སྐབས་སུ་མདོ་ཉིད་ལས། ཉན་ཐོས་ཆེན་པོ་རྣམས་ཀྱང་བྱང་ཆུབ་སེམས་དཔའ་དགེ་བའི་བཤེས་གཉེན་དུ་གསུངས་པ་དང་འགལ་བའི་ཕྱིར་རོ། །དེས་ན་ཐབས་ལ་མཁས་ཉིད་ཡོངས་འཛིན་ཡིན་ནོ། །འདི་ཉིད་ནི་རྣམ་པ་བཞི་སྟེ། སློབ་དཔོན་དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། ཐབས་ལ་མཁས་པ་དེ་ཡང་རྣམ་བཞིར་བསྟན་ཏེ། ཆོས་ཐམས་ཅད་ལ་སོ་སོར་རྟོག་པའི་ཐབས་ལ་མཁས་པ་དང༌། ཕ་རོལ་ཕྱིན་དྲུག་ཡོངས་སུ་རྫོགས་པར་བྱ་བའི་ཐབས་ལ་མཁས་པ་དང༌། དགེ་བའི་བཤེས་གཉེན་ལ་བརྟེན་པའི་ཐབས་ལ་མཁས་པ་དང༌། སྡིག་པའི་གྲོགས་པོ་སྤོང་པའི་ཐབས་ལ་མཁས་པའོ། །ཞེས་གསུངས་སོ། །འབུམ་ཊིཀ་ལས་ཀྱང་དེ་བཞིན་ནོ། །ཐབས་ལ་མཁས་པ་སྔ་མ་གཉིས་ནི་ལྷག་མཐོང་ཡིན་ལ། ཕྱི་མ་གཉིས་ནི་དགེ་བའི་བཤེས་གཉེན་དང་ལྡན་པ་སྟེ། དེས་ཟིན་པ་ཡིན་ཞིང༌། ཆོས་ཐམས་ཅད་སྟོང་པ་ཉིད་དུ་སྟོན་པའི་ཡུམ་ཐོས་ནས་སྐྲག་པར་མི་འགྱུར་བ་ནི་བཞི་པོ་དེའི་ཕན་ཡོན་ཡིན་ནོ། ། ཐབས་ལ་མི་མཁས་པ་ནི་བཟློག་པའོ། །སྡུད་པ་ལས། དགེ་བའི་བཤེས་གཉེན་ལྡན་ཞིང་ལྷག་མཐོང་ལྡན་གྱུར་པ། །རྒྱལ་བ་རྣམས་ཀྱིས་ཡུམ་ཐོས་སྐྲག་པར་ཡོད་མི་འགྱུར། །གང་ཞིག་སྡིག་པའི་གྲོག་ལྡན་གཞན་གྱི་དྲིང་འཇོག་པ། །དེ་ནི་སྣོད་སོ་མ་བཏང་ཆུས་རེག་ཞིག་པ་བཞིན། །ཞེས་གསུངས་པའི་དོན་ཏོ། །ལྷག་མཐོང་ནི་མི་དམིགས་པའི་ཚུལ་གྱིས་སོ་སོར་རྟོག་པ་དང་ཆོས་སྟོན་པ་ལ་སོགས་པ་ཡིན་ནོ། །རྩེ་སྦྱོར་གྱི་སྐབས་ཀྱི་མདོ་ལས་ཀྱང་ཕ་རོལ་ཏུ་ཕྱིན་པ་རྣམས་དང༌། བྱང་ཆུབ་ཀྱི་ཕྱོགས་དང་མཐུན་པ་ལ་སོགས་པ་རྣམས་བྱང་ཆུབ་སེམས་དཔའི་དགེ་བའི་བཤེས་གཉེན་དུ་གསུངས་པ་ཡང་དེ་དང་དེས་ཡོངས་སུ་ཟིན་པ་ཡིན་ལ། ཡོངས་སུ་ཟིན་པའི་ངོ་བོ་ནི་ཐབས་ལ་མཁས་པ་ཡིན་ནོ། །འདིར་ཡང་དགེ་བའི་བཤེས་གཉེན་གྱིས་ཡོངས་སུ་ཟིན་པའི་ངོ་བོ་ནི་བྱང་ཆུབ་སེམས་དཔའི་ཐབས་མཁས་པ་ཡིན་ཞིང༌། དེས་མི་འགོང་པ་ལ་སོགས་པར་འགྱུར་ལ། དེ་ཉིད་ཉན་རང་ལས་ཁྱད་པར་གྱི་ཆོས་སུ་འགྱུར་གྱི། དགེ་བའི་བཤེས་གཉེན་གྱི་གང་ཟག་ཡོད་པ་ཙམ་ནི་ཐུན་མོང་པ་ཡིན་པའི་ཕྱིར། ཁྱད་པར་གྱི་ཆོས་སུ་མི་འགྱུར་ལ། དེ་ཙམ་གྱིས་མི་སྐྲག་པར་ཡང་མི་འགྱུར་རོ། །མདོ་ལས་ཡོངས་སུ་འཛིན་པ་པོའི་བཤེས་གཉེན་དང༌། འཛིན་བྱའི་བྱང་སེམས་དང༌། ཡོངས་སུ་འཛིན་པ་གསུམ་སོ་སོར་གསུངས་པ་འདི་ལྟ་སྟེ། བཅོམ་ལྡན་འདས་དགེ་བའི་བཤེས་གཉེན་གང་དག་གིས་ཡོངས་སུ་འཛིན་ན་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་འདི་ཐོས་ན་མི་སྐྲག་མི་དངང་ཞིང་དངང་བར་མི་འགྱུར་བའི་བྱང་ཆུབ་སེམས་དཔའི་དགེ་བའི་བཤེས་གཉེན་དག་གང་ལགས་ཞེས་དང༌། རབ་འབྱོར་དེ་དག་ནི་བྱང་ཆུབ་སེམས་དཔའི་དགེ་བའི་བཤེས་གཉེན་དག་སྟེ། དེ་དག་གིས་ཡོངས་སུ་ཟིན་པ་ནི། བསྟན་པ་འདི་ཐོས་ནས་མི་སྐྲག་མི་དངང་ཞིང་དངངས་བར་མི་འགྱུར་རོ། །ཞེས་པ་དགེ་བའི་བཤེས་གཉེན་གྱི་མཚན་ཉིད་ཙམ་གྱིས་མི་སྐྲག་པར་མ་གསུངས་ལ། དེ་ཡོངས་སུ་འཛིན་པ་ཉིད་མི་སྐྲག་པར་གསུངས་པས། ཡོངས་སུ་འཛིན་པའི་ངོ་བོ་ནི། ཐབས་ལས་མཁས་པ་ཡིན་ཞིང༌། དེས་མི་སྐྲག་པར་འགྱུར་ཏེ། མདོ་ལས། རབ་འབྱོར་དེ་ནི་བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པའི་ཐབས་ལ་མཁས་པ་སྟེ། ཐབས་དེ་དང་ལྡན་ན་བྱང་ཆུབ་སེམས་དཔའ་བསྟན་པ་འདི་ཐོས་ན་མི་སྐྲག་མི་དངང་ཞིང་དངང་བར་མི་འགྱུར་རོ། །ཞེས་སོ། །དེས་ཡོངས་སུ་འཛིན་པ་ནི་འཛིན་པ་པོ་མ་ཡིན་ཞིང༌། ཡོངས་སུ་འཛིན་པ་ནི་གཟུང་བྱ་མ་ཡིན་ཏེ། འཛིན་པ་དང་ཟིན་པ་གཅིག་ཡིན་ལ་དེའི་ངོ་བོ་ཐབས་ལ་མཁས་པ་ཡིན་ཞིང་ཐབས་དེའི་ངོ་བོ་བཤེས་གཉེན་དམ་པས་བསྟན་པ་ལྟར་བྱེད་པའི་ཉམས་ལེན་ཡིན་ནོ། །དེས་ན་བཤེས་གཉེན་བཟང་ཡང༌། དེས་བསྟན་པ་ལྟར་བྱེད་པ་མ་ཡིན་ན་དེས་ཡོངས་སུ་ཟིན་པ་མ་ཡིན་ལ་ཟིན་པ་མ་ཡིན་ནོ། །བཤེས་གཉེན་ལ་བརྟེན་པའི་ཐབས་ལ་མཁས་པ་མ་ཡིན་ཞིང་ཐབས་ལ་མཁས་ན་སྐྲག་པ་དང་དངང་བ་དང་དངང་བར་འགྱུར་བའི་ཕྱིར་ཡོངས་སུ་འཛིན་པ་པོ་བཤེས་གཉེན་དང༌། ཡོངས་སུ་འཛིན་བྱའི་ངོ་བོ་བྱང་སེམས་དང་ཡོངས་སུ་འཛིན་པའི་བདག་ཉིད་ཐབས་ལ་མཁས་པ་གསུམ་ཐ་དད་དུ་ཕྱིར་དགོས་སོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ཐབས་ལ་མཁས་པའི་ངོ་བོ་ཡོངས་སུ་འཛིན་ནི་འདི་ལྟ་སྟེ། སེམས་མི་འགོང་པ་ཉིད་ལ་སོགས། །ངོ་བོ་ཉིད་མེད་སོགས་སྟོན་བྱེད། །དེ་ཡི་མི་མཐུན་ཕྱོགས་བོར་བ། །རྣམ་པ་ཀུན་ཏུ་ཡོངས་འཛིན་ཡིན། ཞེས་པ་ལ་སེམས་མི་འགོང་པ་སྟེ་སྐྲག་པ་ཉིད་དང་སོགས་པའི་སྒྲས་དངང་བ་དང་དངང་བར་འགྱུར་བ་ནི་རིམ་པ་ལྟར་སྐྲག་པ་ཆུང་དང་འབྲིང་དང་ཆེན་པོའི་ངོ་བོར་གནོད་འཇོམས་ལས་གསུངས་སོ། །ཐབས་ལ་མི་མཁས་པ་སྐྲག་པ་ལ་སོགས་པར་འགྱུར་བའི་རྒྱུ་ནི་སྐབས་འདིར། ཆོས་ཐམས་ཅད་སྟོང་པ་ཉིད་ཀྱི་རང་བཞིན་ཤེར་ཕྱིན་ཟབ་མོའི་ཐེག་ཆེན་བསྟན་པ་འདི་ཐོས་པ་ཡིན་ནོ། །རྒྱུ་གཞན་ཡང་མེད་པ་ནི་མ་ཡིན་ཏེ། རིགས་མེད་པ་དང་གྲོགས་ངན་པ་དང༌། སྔོན་དགེ་བ་མ་བསགས་པ་དང༌། ཐེག་ཆེན་གྱི་ཆོས་ལ་བློ་གྲོས་མ་སྦྱངས་པ་སྟེ། བཞི་པོ་འདི་ཡང་ངོ༌། ཉེས་དམིགས་ཡང་ཆེ་སྟེ། སྐྲག་མི་དགོས་པ་འདི་ལ་སྐྲག་པ་ནི། སྡིག་པའི་ཕུང་པོ་ཆེན་པོ་བསགས་པའི་ཕྱིར་དུས་ཡུན་རིང་དུ་ངན་སོང་དུ་གདུང་བར་བྱེད་པར་འགྱུར་རོ། །ཇི་སྐད་དུ། འགྲོ་བ་དེ་གནས་མིན་ལ་སྐྲག་པ་གདུང་བྱེད་འགྱུར། །བསོད་ནམས་མ་ཡིན་ཕུང་ཆེན་བསགས་བྱས་ཡུན་རིང་དུ། །རིགས་མེད་གྲོགས་ངན་སྔོན་དགེ་མ་བསགས་བློ་མ་སྦྱངས། །ཆོས་འདིས་སྐྲག་འགྱུར་འདི་ན་དོན་ཆེན་འདི་ལས་ལྷུང། ཞེས་གསུངས་སོ། ། ཉེས་དམིགས་གཞན་ཡང་བྱང་ཆུབ་ཆེན་པོའི་ཚོགས་ཀྱི་དོན་ཐོབ་པ་ལས་ལྷུང་བ་སྟེ། མི་འཐོབ་པའི་ཕྱིར་སྐྲག་པར་མི་རིགས་སོ། །རང་བཞིན་སྟོང་པ་ཉིད་ཀྱི་ཤེར་ཕྱིན་བསྟན་པ་འདི་ཐོས་ན་སེམས་མི་འགོང་བ་ཉིད་ལ་སོགས་པའི་རྒྱུ་ཐབས་ལ་མཁས་པ་ནི་ཆོས་ཐམས་ཅད་ལ་ངོ་བོ་ཉིད་མེད་པར་སོ་སོར་རྟོག་པའི་དང༌། སོགས་པའི་སྒྲས་ཕར་ཕྱིན་དྲུག་རྫོགས་པར་བྱ་བའི་དང༌། ཐེག་ཆེན་ཕྱིན་ཅི་མ་ལོག་པར་སྟོན་བྱེད་ཀྱི་དགེ་བའི་བཤེས་གཉེན་ལ་བརྟེན་པའི་དང༌། བཤེས་གཉེན་དེའི་མི་མཐུན་ཕྱོགས། སྡིག་པའི་གྲོགས་པོ་བོར་བའི་ཐབས་ལ་མཁས་པ་སྟེ། དུས་དང་རྣམ་པ་ཀུན་ཏུ་ཡོངས་འཛིན་གྱི་ངོ་བོར་གྱུར་པ་ནི་དེ་ཡིན་ནོ། །དེས་ན་དགེ་བའི་བཤེས་གཉེན་གྱི་ངོ་བོ་ཡོངས་སུ་འཛིན་པ་པོ་ཐུན་མོང་པ་ཡིན་ཡང༌། ཉན་རང་ལས་ཁྱད་པར་དུ་འཕགས་པའི་ཡོངས་འཛིན་གྱི་ངོ་བོ་ནི་བྱང་ཆུབ་སེམས་དཔའི་ཐབས་ལ་མཁས་པ་གང་ཡིན་པ་དེ་ཡིན་ནོ། །དེ་རྣམས་ཀྱིས་དྲུག་པ་ཡོངས་སུ་འཛིན་པ་རྒྱས་པར་བཤད་པ་སོང་ངོ༌། །དེ་ལྟར་ཆོས་དྲུག་མདོར་བསྟན་པ་དང༌། རྒྱས་པར་བཤད་པའི་ཚུལ་གྱིས་སྐབས་དང་པོའི་སྐབས་ཀྱི་ཆོས་བཅུ་ལས། གསུམ་པ་ངེས་འབྱེད་ཡན་ལག་རྣམས་བཞི་དང༌། ཞེས་པ་དེ་བཤད་ཟིན་ཏོ། །འབྲིང་དུ་བསྟན་པ་ལ་ཆོས་བརྒྱད་ལས་བརྩོན་པའི་དབྱེ་བ་གང་ཡིན་པ་དེ་བསྟན་ཟིན་ཏོ། ། ༤༽སྒྲུབ་པའི་རྟེན་རིགས་བཤད་པ། ད་ནི་འདི་ནས་བརྩམས་ཏེ། སྐབས་དང་པོ་ཡོངས་སུ་རྫོགས་པའི་བར་གྱིས་བཤད་པ་འདི་གཏན་ལ་དབབ་པ་ཞེས་བྱ་བ་ཆོས་བརྒྱད་པ་གང་ཡིན་པ་དེ་སྟོན་ཅིང༌། འདིའི་སྐབས་ཀྱི་ཆོས་བཅུ་ལས་སྒྲུབ་པའི་རྟེན་རིགས་གང་ཡིན་པ་དེ་སྟོན་ཏེ། དེ་ལ་མདོ་སྡེ་རྒྱན་ལས། རིགས་ཡོད་པ་དང༌། རིགས་མཆོག་དང༌། རིགས་ཀྱི་མཚན་ཉིད་དང༌། རྟགས་དང༌། དབྱེ་བ་དང༌། ཉེས་དམིགས་དང༌། ཕན་ཡོན་དང༌། དཔེ་རྣམ་པ་གཉིས་དེ་ཆོས་བརྒྱད་མདོར་བསྟན་ཅིང་དེ་དག་རེ་རེ་ཞིང༌། ངོ་བོ་དང༌། རྒྱུ་མཚན་བསྟན་པའི་སྒོ་ནས་རྒྱས་པར་བཤད་པ་གཉིས་ཀྱི་ཐེག་པ་གསུམ་གྱི་རིགས་ཐ་དད་པ་ཡོད་པ་དང༌། ཆོས་ལྷག་མ་བདུན་གྱིས། བྱང་ཆུབ་སེམས་དཔའི་རིགས་མཆོག་དང༌། དེའི་མཚན་ཉིད་དང༌། དེའི་རྟགས་ལ་སོགས་པ་བསྟན་ཏོ། ། དེ་ལ་དང་པོ་མདོར་བསྟན་པ་ནི་འདི་ལྟ་སྟེ། ཡོད་དང་མཆོག་དང་མཚན་ཉིད་དང༌། །རྟགས་དང་རིགས་རབ་དབྱེ་བ་དང༌། །ཉེས་དམིགས་དང་ནི་ཕན་ཡོན་དང༌། །དཔེ་རྣམ་གཉིས་དེ་རྣམ་པ་བཞི། །ཞེས་པས། དེ་དག་རེ་རེ་ཡང་བཞི་བཞིའི་སྒོ་ནས་རྒྱས་པར་འཆད་ཅེས་པའི་དོན་ནོ། ། ༡ ཐེག་པ་གསུམ་གྱི་རིགས་ཐ་དད་པ་ཡོད་པར་བསྟན་པ། གཉིས་པ་རྒྱས་པར་བཤད་པ་ལ་དང་པོ་རིགས་ཐ་དད་པ་ཡོད་པའི་རྒྱུ་མཚན་བཞི་ནི་པ་རུ་རའི་མདོར་བཤད་པ་ལྟ་བུ་སྦྱིར་སེམས་ཅན་རྣམས་ནི་ཁམས་སྣ་ཚོགས་པས། ཁམས་ཀྱི་དབྱེ་བ་ཐ་དད་པ་དམིགས་པའི་ཕྱིར་དང༌། ཐེག་པ་སོ་སོ་ལ་མོས་པ་ཐ་དད་པ་དམིགས་པའི་ཕྱིར་དང༌། མོས་སུ་ཟིན་ཀྱང་ངེས་པར་བསྒྲུབས་པ་དང༌། མ་ངེས་པར་བསྒྲུབ་པ་ཐ་དད་ཀྱི་དབྱེ་བ་དམིགས་པའི་ཕྱིར་དང༌། འབྲས་བུ་བྱང་ཆུབ་དམན་དང་མཆོག་ཀྱང་དམིགས་པའི་ཕྱིར་ཐེག་པ་གསུམ་གྱི་རིགས་ཐ་དད་པ་ཡོད་དོ། །ཇི་སྐད་དུ། ཁམས་རྣམས་དང་ནི་མོས་པ་དང༌།བསྒྲུབ་པ་ཐ་དད་དབྱེ་བ་དང༌། འབྲས་བུ་ཐ་དད་དམིགས་པའི་ཕྱིར། རིགས་ཡོད་ཉིད་དུ་ངེས་པར་བརྗོད། ཅེས་སོ། ། ༢ རིགས་མཆོག་བཤད་པ། གཉིས་པ་ཐེག་པ་གསུམ་གྱི་རིགས་ཐ་དད་པ་ཡོད་པ་དེའི་ནང་ནས། བྱང་ཆུབ་སེམས་དཔའ་རིགས་མཆོག་ཉིད་དུ་བྱེད་པའི་རྒྱུ་མཚན་བཞི་ནི། རིགས་དེ་ཉན་ཐོས་རྣམས་ལས་དགེ་བའི་རྩ་བའི་ཁྱད་པར་དུ་འཕགས་པའི་ཕྱིར་དང༌། ཉན་རང་ལ་མེད་པའི་སྟོབས་དང་མི་འཇིགས་པ་ལ་སོགས་པ་ཡོད་པས་ཐམས་ཅད་ཡོད་པའི་ཕྱིར་དང༌། ཉན་རང་ལ་མེད་པའི་གཞན་གྱི་དོན་ཆེན་པོ་ཡོད་པའི་ཕྱིར་དང༌། ཉན་རང་གི་ལྟར་ཡོན་ཏན་དེ་དག་མ་ཡིན་པས་ཕུང་པོའི་ལྷག་མ་མེད་པར་མྱ་ངན་ལས་འདས་པ་ན་ཡང་མི་ཟད་པའི་རྒྱུ་མཚན་བཞི་པོ་དེའི་ཕྱིར་བྱང་ཆུབ་སེམས་དཔའི་རིགས་དེ་མཆོག་ཉིད་དུ་བསྟན་པ་ཡིན་ནོ། །ཇི་སྐད་དུ། དེ་དག་ཁྱད་པར་འཕགས་པ་དང༌། །ཐམས་ཅད་དང་ནི་དོན་ཆེན་དང༌། །མི་ཟད་པ་ཡི་རྒྱུ་མཚན་ཕྱིར། །རིགས་མཆོག་ཉིད་ཅེས་བརྗོད་པ་ཡིན། །ཞེས་སོ། ། ༣ རིགས་ཀྱི་མཚན་ཉིད་བཤད་པ། གསུམ་པ་བྱང་ཆུབ་སེམས་དཔའི་རིགས་དེའི་ངོ་བོའམ། མཚན་ཉིད་བཞི་ནི། རང་བཞིན་དུ་གནས་པ་དང༌། ཡང་དག་པར་སྒྲུབ་པ་དང༌། གཉིས་པོ་དེ་ནི་རིམ་པ་ལྟར་རྟེན་གྱི་ངོ་བོ་ཉིད་དང༌། རྟེན་པའི་ངོ་བོ་ཉིད་དང་བཞིའོ། །དེ་ནི་རྒྱུའི་དངོས་པོ་ཡོད་དོ། །འབྲས་བུའི་དངོས་པོ་མེད་དོ། ། རིགས་འདིས་ཡོན་ཏན་སྒྲོལ་ཞིང་འབྱུང་བའི་ཕྱིར་རོ། །དེ་ལ་སེམས་ཅན་ཀུན་ལ་ཡོད་པའི་རང་བཞིན་དང༌། བྱང་ཆུབ་ཏུ་སེམས་བསྐྱེད་ནས་མེད་པ་རྒྱས་པའི་རིགས་གཉིས་སུ་ས་པཎ་སོགས་ཀྱང་བཞེད་པ་ནི། ཇི་སྐད་དུ། རང་བཞིན་དང་ནི་རྒྱས་པ་དང༌། །དེ་ཡི་རྟེན་དང་རྟེན་པ་དང༌། །ཡོད་མེད་ཉིད་དང་ཡོན་ཏན་ནི། །སྒྲོལ་བའི་དོན་དུ་ཤེས་པར་བྱ། །ཞེས་སོ། །དེ་ཡང་སྒྲ་དོན་ནི། ཡོན་ཏན་ལ་བརྟེན་འཁོར་བའི་ཕུལ་དུ་སྒྲོལ་པའི་ཕྱིར་རིགས་སོ། །ཞེས་སོ། ། ༤ རིགས་ཀྱི་རྟགས་བཤད་པ། བཞི་པ་བྱང་ཆུབ་སེམས་དཔའི་རིགས་དེའི་རྟགས་བཞི་ནི། སྦྱོར་བའི་སྔོན་དུ་སེམས་ཅན་ལ་སྙིང་རྗེ་དང༌། ཐེག་ཆེན་གྱི་ཆོས་ལ་མོས་པ་དང༌། དཀའ་སྤྱད་ལ་བཟོད་པ་དང༌། ཕ་རོལ་ཏུ་ཕྱིན་པའི་རང་བཞིན་དགེ་བ་ཡང་དག་པར་སྦྱོད་པའོ། །ཇི་སྐད་དུ༌། སྦྱོར་བའི་སྔོན་དུ་སྙིང་རྗེ་དང༌། །མོས་པ་དང་ནི་བཟོད་པ་དང༌། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཤེས་པར་བྱ། །ཞེས་སོ།། ༥ རིགས་ཀྱི་དབྱེ་བ་བཤད་པ། ལྔ་པ་བྱང་ཆུབ་སེམས་དཔའི་རིགས་ཀྱི་དབྱེ་བ་བཞི་ནི། ངེས་པ་དང༌། མ་ངེས་པ་དང༌། དེ་དག་རིམ་པ་ལྟར་རྐྱེན་གྱིས་མི་འཕྲོགས་པ་དང༌། འཕྲོགས་པ་དེ་བཞིའོ། །ཇི་སྐད་དུ། རིགས་ནི་ངེས་དང་མ་ངེས་དང༌། །རྐྱེན་རྣམས་ཀྱིས་ནི་མི་འཕྲོག་དང༌། །འཕྲོག་པ་ཉིད་དེ་མདོར་ན་རིགས། །དབྱེ་བ་འདི་ནི་རྣམ་པ་བཞི། །ཞེས་སོ། ། ༦ རིགས་ཀྱི་ཉེས་དམིགས་བཤད་པ། དྲུག་པ་བྱང་ཆུབ་སེམས་དཔའི་རིགས་ཀྱི་ཉེས་དམིགས་རིགས་ལ་གནས་ཀྱང་ཡོན་ཏན་ལ་མི་འཇུག་པ་བཞི་ནི། ཉོན་མོངས་པ་མང་བ་དང༌། མི་དགེ་བའི་གྲོགས་པོ་དང༌། ཡོ་བྱད་ཀྱིས་ཕོངས་པ་དང༌། གཞན་གྱི་དབང་དུ་གྱུར་པ་དང་བཞིའོ། །ཇི་སྐད་དུ༌། ཉོན་མོངས་གོམས་དང་གྲོགས་ངན་དང༌།། ཕུངས་དང་གཞན་གྱི་དབང་ཉིད་དེ། །མདོར་ན་རིགས་ཀྱི་ཉེས་དམིགས་ནི། །རྣམ་པ་བཞི་རུ་ཤེས་པར་བྱ་ཞེས་སོ། ། ༧ རིགས་ཀྱི་ཕན་ཡོན་བསྟན་པ། བདུན་པ་བྱང་ཆུབ་སེམས་དཔའི་རིགས་ཀྱི་ཕན་ཡོན་བཞི་ནི། རིང་མོ་ཞིག་ན་ངན་སོང་དུ་འགྲོ་བ་དང༌། དེ་ནས་མྱུར་དུ་ཐར་པ་དང༌། དེ་དག་ཏུ་སྐྱེས་ན་འང་སྡུག་བསྔལ་ཆུང་ངུ་མྱོང་བ་དང༌། སེམས་བསྐྱོ་བ་དང་བཅས་ཤིང་དེར་སྐྱེས་པའི་སེམས་ཅན་རྣམས་སྙིང་རྗེས་སྨོན་པར་བྱེད་པ་དང་བཞིའོ། །ཇི་སྐད་དུ། རིང་མོ་ཞིག་ན་ངན་སོང་དུ། །འགྲོ་ཞིང་མྱུར་དུ་ཐར་པ་དང། །དེ་ན་འང་སྡུག་བསྔལ་ཆུང་དུ་མྱོང། །སྐྱོ་བཅས་སེམས་ཅན་སྨིན་པར་བྱེད། །ཅེས་སོ། ། ༨ རིགས་ཀྱི་དཔེ་བཤད་པ། བརྒྱད་པ་དཔེ་གཉིས་ལས་དང་པོ་གསེར་གྱི་རིགས་ཆེན་པོ་ནི། མང་པོ་དང་འོད་གསལ་བ་དང། དྲི་མ་མེད་པ་དང། ལས་སུ་རུང་སྟེ། གསེར་རྣམ་པ་བཞིའི་གནས་ཡིན་པ་དེ་བཞིན་དུ། བྱང་ཆུབ་སེམས་དཔའི་རིགས་ཀྱང༌། དགེ་བའི་རྩ་བ་དཔག་ཏུ་མེད་པའི་གནས་དང༌། ཡེ་ཤེས་ཀྱི་གནས་དང༌། ཉོན་མོངས་ཀྱི་དྲི་མ་མེད་པའི་གནས་དང༌། མངོན་ཤེས་སོགས་མཐུ་རྣམས་ཀྱི་ཡང་གནས་སུ་ཤེས་པར་བྱའོ། །ཇི་སྐད་དུ། གསེར་གྱི་རིགས་བཞིན་ཤེས་པར་བྱ། །དགེ་བ་དཔག་ཏུ་མེད་པའི་གནས་དང༌། ཡེ་ཤེས་དང་ནི་དྲི་མེད་ལྡན། །མཐུ་རྣམས་ཀྱི་ཡང་གནས་ཡིན་ནོ། །ཞེས་སོ། །དཔེ་གཉིས་པ་རིན་པོ་ཆེ་མཆོག་གི་རིགས་ཆེན་པོ་ནི། རིགས་དང་ལྡན་པ་དང༌། ཁ་དོག་ཕུན་སུམ་ཚོགས་པ་དང་དབྱིབས་ཕུན་སུམ་ཚོགས་པ་དང༌། ཚད་ཕུན་སུམ་ཚོགས་པ་སྟེ་རིན་པོ་ཆེ་བཞིའི་གནས་ཡིན་པ་དེ་བཞིན་དུ་བྱང་ཆུབ་སེམས་དཔའི་རིགས་ཀྱང༌། བྱང་ཆུབ་ཆེན་པོའི་རྒྱུ་དང༌། ཡེ་ཤེས་ཆེན་པོའི་རྒྱུ་དང༌། འཕགས་པའི་ཏིང་ངེ་འཛིན་གྱི་རྒྱུ་དང༌། སེམས་ཅན་མང་པོ་སྨིན་པར་བྱེད་པའི་རྒྱུ་མཚན་དེ་བཞི་པོ་དེའི་ཕྱིར་རོ། །ཇི་སྐད་དུ། རིན་ཆེན་མཆོག་རིགས་བཞིན་ཤེས་བྱ། །བྱང་ཆུབ་ཆེན་པོའི་རྒྱུ་མཚན་ཕྱིར། །ཡེ་ཤེས་ཆེ་དང་འཕགས་ཏིང་འཛིན། །སེམས་ཅན་མང་པོའི་དོན་གནས་ཕྱིར། །ཞེས་གསུངས་སོ། །བྱང་ཆུབ་སེམས་དཔའི་རིགས་མེད་པ་ལ་གནས་པ་ནི། ཇི་སྐད་དུ། ལ་ལ་གཅིག་ཏུ་ཉེས་པར་སྦྱོད་ངེས་ཡོད། །ལ་ལ་དཀར་པོའི་ཆོས་རྣམས་ཀུན་ཏུ་བཅོམ། །ལ་ལ་ཐར་པའི་ཆ་མཐུན་དགེ་བ་མེད། །དཀར་པོ་དམན་པ་ཡོད་པ་རྒྱུ་དང་བྲལ། །ཞེས་པ་འདི་ལ་ཡོངས་སུ་མྱ་ངན་ལས་མི་འདའ་བའི་ཆོས་ཅན་སྟོན་ཅིང༌། དེ་ཡང་གཉིས་དེ། དེའི་དུས་དང༌། གཏན་མྱ་ངན་ལས་མི་འདའ་བའི་ཆོས་ཅན་ནོ། ། དང་པོ་ཡང་རྣམ་པ་བཞི་སྟེ། གཅིག་ཏུ་ཉེས་པར་སྦྱོད་པ་དང༌། དགེ་བའི་རྩ་བ་ཀུན་ཏུ་ཆད་པ་དང༌། ཐར་པའི་ཆ་དང་མཐུན་པའི་དགེ་བའི་རྩ་བ་མེད་པ་དང༌། དགེ་བའི་རྩ་བ་དམན་པ་ཡོད་པ་མ་རྫོགས་པ་སྟེ། བཞི་ནི་དེའི་དུས་གསུམ་མྱ་ངན་ལས་མི་འདའ་བའི་ཆོས་ཅན་ནོ། །གཉིས་པ་ནི་རྒྱུ་དང་བྲལ་བ་སྟེ་གང་ལ་མྱ་ངན་ལས་འདའ་བའི་རིགས་ཉིད་མེད་པའོ། །དེ་ཡང་ཡུན་རིང་པོར་མྱང་འདས་མི་ཐོབ་པ་ལ་དགོངས་སོ། །རིགས་ཆད་པ་འདི་རྣམས་སེམས་ཙམ་པའི་ཁྱད་པར་ཆོས་དང་དབུ་མ་པའི་གཞུང་ལ་མེད་པར་འདོད་པ་ནི་དེ་ལྟར་མི་བདེན་ནོ། །བྱང་ཆུབ་སེམས་དཔའི་རིགས་རང་བཞིན་དང་རྒྱས་པ་ལ་གནས་པའི་ཆེ་བ་ཇི་ལྟ་བུ་ཞེ་ན། ཟབ་ཅིང་རྒྱ་ཆེར་བཤད་པ་གཞན་ལ་ཕན་ཕྱིར་བསྟན་པའི་ཆོས་ཆེན་ལ། མི་ཤེས་བཞིན་དུ་མོས་པ་ཤིན་ཏུ་རྒྱ་ཆེན་འབྱུང་ཞིང་བསྒྲུབ་ལ་བཟོད། དེ་དག་ཐ་མར་རྣམ་པ་གཉིས་མཆོག་ཕུན་སུམ་ཚོགས་འགྱུར་གང་ཡིན་ཏེ། བྱང་ཆུབ་སེམས་དཔའ་རང་བཞིན་ཡོན་ཏན་ལྡན་དེ་རྒྱས་པའི་རིགས་ལས་ཤེས། ཞེས་པ་འདི་ལ་ཆོས་ནི་ཐེག་པ་ཆེན་པོའི་ཆོས་ཆེན་པོ། །རྣམ་པ་གཉིས་ནི་འཇིག་རྟེན་པ་དང། ཉན་ཐོས་སོ། །དེ་གཉིས་ཀྱི་མཆོག་བྱང་ཆུབ་ཆེན་པོ་ཕུན་སུམ་ཚོགས་པ་ཐོབ་པར་འགྱུར་བ་གང་ཡིན་པ་དེ། བྱང་ཆུབ་སེམས་དཔའི་རིགས་རང་བཞིན་གྱིས་ཡོན་ཏན་དང་ལྡན་པ་དང༌། རྒྱས་པའི་ཆེན་པོ་ཡིན་པར་དག་པའོ། །འབྲས་བུའི་སྒོ་ནས་ཀྱང་བྱང་ཆུབ་སེམས་དཔའ་རིགས་ཁྱད་པར་དུ་གྱུར་པ་འདི་ལྟ་སྟེ། ཡོན་ཏན་ཤིན་ཏུ་རྒྱ་ཆེ་བྱང་ཆུབ་ཤིང་སྐྱེད་ཕྱིར། །བདེ་དང་སྡུག་བསྔལ་ཞི་བ་ཆེན་པོ་ཐོབ་བྱའི་ཕྱིར། ། བདག་དང་གཞན་ལ་ཕན་བདེ་བྱེད་པ་འབྲས་བུའི་ཕྱིར། །རིགས་མཆོག་དེ་ནི་རྩ་བ་བཟང་པོ་ལྟ་བུ་ཡིན། །ཞེས་པ་འདིས་ཐེག་པ་གསུམ་གྱི་རིགས་ཐ་དད་པའི་ནང་ནས་མཆོག་བྱང་ཆུབ་སེམས་དཔའི་རིགས་ནི་བྱང་ཆུབ་ཀྱི་ཤིང་རང་གཞན་ལ་ཕན་པ་དང་བདེ་བ་བྱེད་པའི་རྒྱུ་རྩ་བ་བཟང་པོ་ཉིད་ཡིན་པར་བསྟན་ཏོ། །དེ་ལྟར་མདོ་སྡེའི་རྒྱན་ལས། ཐེག་པ་གསུམ་གྱི་རིགས་ཐ་དད་པ་ཡོད་པ་དང༌། གསུམ་པོ་དེའི་ནང་ནས་བྱང་ཆུབ་སེམས་དཔའི་རིགས་ནི་བྱང་ཆུབ་མཆོག་ཉིད་དང༌། མཆོག་དེའི་ངོ་བོ་དང༌། མཆོག་འདིའི་རྟགས་དང༌། མཆོག་དེའི་དབྱེ་བ་དང༌། མཆོག་དེའི་ཉེས་དམིགས་དང༌། མཆོག་དེའི་ཕན་ཡོན་དང༌། མཆོག་དེ་དཔེ་གཉིས་ཀྱིས་བསྟན་པ་དང༌། མཆོག་དེ་ཆད་པ་མྱ་ངན་ལས་མི་འདའ་བའི་ཆོས་ཅན་དང༌། མཆོག་དེའི་ཆེ་བ་དང༌། འབྲས་བུའི་སྒོ་ནས་ཀྱང་དེ་མཆོག་ཉིད་དུ་བསྟན་པ་རྣམས་ཀྱིས་རིགས་ཀྱི་སྐབས་རྫོགས་པར་གསུངས་པ་ཡིན་ནོ། ། འདིར་ཡང་རིགས་གསུམ་གྱི་ནང་ནས་མཆོག་གང་ཡིན་པ་བྱང་ཆུབ་སེམས་དཔའི་རིགས་དེ་ཉིད་སྟོན་པ་འདི་ལྟ་སྟེ། རྟོགས་པ་ཡི་ནི་ཆོས་དྲུག་དང༌། །གཉེན་པོ་དང་ནི་སྤོང་བ་དང༌། །དེ་དག་ཡོངས་སུ་གདུག་པ་དང༌། །ཤེས་རབ་སྙིང་བརྩེར་བཅས་པ་དང༌། །སློབ་མ་ཐུན་མོང་མིན་ཉིད་དང༌། །གཞན་གྱི་དོན་གྱི་གོ་རིམ་དང༌། །ཡེ་ཤེས་རྩོལ་བ་མི་མངའ་བར། །འཇུག་པའི་རྟེན་ལ་རིགས་ཞེས་བྱ། །ཞེས་པ་འདི་ལ་སྔར་སེམས་བསྐྱེད་བསྡུས་པའི་སྒོ་ནས་བརྗོད་པ་ལ་མདོ་ལས། ཤཱ་རིའི་བུ་འདི་ལ་བྱང་ཆུབ་སེམས་དཔའ་ཆེན་པོ་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས། ཞེས་པ་དེ་ནས་བརྩམས་ཏེ། བྱང་ཆུབ་སེམས་དཔའ་ཞེས་བྱ་བའི་ཚིག་གི་བརྗོད་བྱའི་དོན་ནི་གང་ཡིན་ཞེ་ན། མ་དག་དང་དག་པའི་གནས་སྐབས་ཀྱི་ཆོས་ཀྱི་དབྱིངས་ནི་བྱང་ཆུབ་སེམས་དཔའ་ཡིན་ལ། དེ་ཉིད་བྱང་ཆུབ་སེམས་དཔའི་རིགས་མཆོག་ཡིན་ཞིང། དེ་ལ་བྱང་ཆུབ་སེམས་དཔའི་དངོས་པོ་མེད་པའི་ཕྱིར་བྱང་ཆུབ་སེམས་དཔའི་ཚིག་གི་དོན་ནི་དངོས་པོའི་གཞི་མེད་པའི་དེ་བཞིན་ཉིད་ཡིན་ནོ། །ཁྲི་བརྒྱད་སྟོང་པ་ལས་རབ་འབྱོར་བྱང་ཆུབ་སེམས་དཔའི་གཞིའི་དོན་ནི་གཞི་མེད་པའི་དོན་ཏོ། །དེ་ཅིའི་ཕྱིར་ཞེ་ན། རབ་འབྱོར་བྱང་ཆུབ་ཀྱང་སྐྱེ་བ་མེད། སེམས་དཔའ་ཡང་སྐྱེ་བ་མེད་དོ། །རབ་འབྱོར་བྱང་ཆུབ་དང་སེམས་དཔའ་ལ་སྐྱེ་བ་དང་ཡོད་པ་ཉིད་མེད་ཅིང་མི་དམིགས་སོ། །རབ་འབྱོར་བྱང་ཆུབ་ལ་ཡང་གཞི་མེད། སེམས་དཔའ་ལ་ཡང་གཞི་མེད་དོ། །དེ་ལྟ་བས་ན་བྱང་ཆུབ་སེམས་དཔའི་གཞིའི་དོན་ནི་གཞི་མེད་པའི་དོན་ཏོ་ཞེས་གསུངས་སོ། ། སངས་རྒྱས་གཉིས་པ་ལྟར་གྲགས་པ་སློབ་དཔོན་དབྱིག་གཉེན་གྱི་ཞལ་སྔ་ནས་ཀྱང༌། བྱང་ཆུབ་སེམས་དཔའ་རྣམས་ལ་དོན་རྣམ་པ་བཞི་ཡོད་དེ། བྱང་ཆུབ་དང༌། སེམས་དཔའ་དང༌། ཕུང་པོའི་བདག་ཉིད་ཀུན་རྫོབ་ཀྱི་བྱང་ཆུབ་སེམས་དཔའ་དང༌། དོན་དམ་པའི་བྱང་ཆུབ་སེམས་དཔའ་འོ། །དེ་བཞི་ཆར་ཡང་དངོས་པོ་མེད་པའི་ངོ་བོ་ཉིད་ཡིན་པའི་ཕྱིར་བྱང་ཆུབ་སེམས་དཔའ་ཞེས་བྱ་བའི་ཚིག་གི་དོན་ནི་དོན་གྱི་གཞི་མེད་པ་ཡིན་ཏེ། གཞི་མེད་པ་ནི་གནས་མེད་པ་ལ་བྱའོ། །ཚིག་མེད་པ་ལ་དེ་ཡིན་པས། ཚིག་གི་དོན་མེད་པའོ། །གལ་ཏེ་བྱང་ཆུབ་སེམས་དཔའ་ཞེས་བྱ་བ་དངོས་པོ་བདག་ཉིད་འགའ་ཞིག་ཡོད་པར་གྱུར་ན་དེའི་ཚིག་གི་དོན་གཞི་དང་བཅས་ཤིང་གནས་དང་བཅས་པར་འགྱུར་བ་ཞིག་ན། འདི་ལྟར་བྱང་ཆུབ་དང་སེམས་དཔའ་དང༌། བྱང་ཆུབ་སེམས་དཔའ་གཉིས་ཀྱང་མེད་དེ་དེའི་ཕྱིར་བྱང་ཆུབ་སེམས་དཔའི་ཚིག་དོན་གྱི་གཞི་མེད་དེ་གནས་མེད་ཅེས་བྱ་བའི་ཐ་ཚིག་གོ །ཞེས་གསུངས་སོ།། དེ་བཞིན་ཉིད་ཀྱི་གནས་སྐབས་ལ་བྱང་ཆུབ་སེམས་དཔའ་ཞེས་པ་ཡང༌། རྒྱུད་བླ་མ་ནས། མ་དག་མ་དག་དག་པ་དང༌། །ཤིན་ཏུུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང༌། །དེ་བཞིན་གཤེགས་པ་ཞེས་བརྗོད་དོ། །ཞེས་སོ། །དེའི་འགྲེལ་བར། འཕགས་པ་ཐོགས་མེད་ཀྱི་ཞལ་སྔ་ནས་ཀྱང༌། མ་དག་པ་དང་དག་པའི་གནས་སྐབས་སུ་ནི་བྱང་ཆུབ་སེམས་དཔའ་ཞེས་བྱ་བ་དང༌། ཞེས་གསུངས་སོ། །དེ་ལ་རང་བཞིན་གྱི་རིགས་དང་རྒྱས་པའི་རིགས་གཉིས་ཀྱི་ངོ་བོ་སྟེ། དང་པོ་ནི་ཅུང་ཟད་དག་པའི་གནས་སྐབས་ཀྱི་ཆོས་ཉིད་བྱང་ཆུབ་སེམས་དཔའི་ཚེ་རབས་གཅིག་ནས་གཅིག་ཏུ་རྒྱུད་ནས་འོངས་པ་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་སྙིང་རྗེ་དང་ཤེས་རབ་ཀྱི་བདག་ཉིད་ཡིན་ནོ། །གཉིས་པ་ནི་དགེ་བའི་རྩ་བ་ལ་གོམས་པའི་རྐྱེན་གྱིས། ཆོས་ཀྱི་དབྱིངས་དེ་ཉིད་དག་པའི་སྙིང་རྗེ་ཆེར་འཕེལ་ཞིང་རྒྱས་པ་ལ་ཡང་དག་པར་བསྒྲུབས་པ་འམ་བླངས་པའི་རིགས་ཞེས་བསྟན་ཏོ། །བྱང་ཆུབ་སེམས་དཔའི་ས་ལས། དེ་ལ་རང་བཞིན་གྱིས་གནས་པའི་རིགས་ནི། བྱང་ཆུབ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། དེ་ནི་གཅིག་ནས་གཅིག་ཏུ་བརྒྱུད་དེ་འོངས་པ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པ་དེ་ལྟ་བུ་ཡིན་ནོ། །དེ་ལ་ཡང་དག་པར་བསྒྲུབས་པ་རིགས་ནི། སྔོན་དགེ་བའི་རྩ་བ་གོམས་པར་བྱ་བ་ལས་ཐོབ་པ་གང་ཡིན་པ་སྟེ། དོན་གྱི་སྐབས་འདིར་ནི། རྣམ་པ་གཉིས་ཀ་ཡང་འདོད་དོ། །ཞེས་སོ། །རྒྱུད་བླར། དེ་རིགས་དེ་བཞིན་ཐོབ་པ་དང༌། །ཞེས་པའི་འགྲེལ་པར། མདོ་དྲང་པ་ལས་ཀྱང༌། དེའི་རིགས་རང་བཞིན་གྱིས་བསམ་གྱིས་མི་ཁྱབ་པའི་རྣམ་པ་ཐོབ་པའི་དོན་ནི་གང་གིས་དབང་དུ་མཛད་ནས་བརྒྱུད་ནས་འོངས་པ། ཐོག་མ་མེད་པའི་ཆོས་ཉིད་ཐོབ་པ་དེ་ནི་སྐྱེ་མཆེད་དྲུག་གི་ཁྱད་པར་དེ་འདྲ་བ་ཡིན་ནོ། ། ཞེས་གསུངས་པ་ཡིན་ནོ། །ཞེས་གསུངས་སོ། ། དེས་ན་ཚེ་རབས་གཅིག་ནས་གཅིག་ཏུ་བརྒྱུད་ནས་འོངས་པ། ཐོག་མ་མེད་པའི་ཆོས་ཉིད་དག་པའི་གནས་སྐབས་རང་གིས་འཐོབ་པ་ནི་རང་བཞིན་དུ་གནས་པའི་རིགས་ཡིན་ལ། དེ་ཉིད་བརྩེ་བ་དང་ཤེས་རབ་ཀྱི་བདག་ཉིད་ཡིན་ཏེ། བརྒྱད་སྟོང་དོན་བསྡུས་ལས། འདི་ལྟར་རྣམ་ཤེས་རང་བཞིན་རིགས། །བརྩེ་དང་ཤེས་རབ་བདག་ཉིད་ཡིན་གསུངས་སོ། །རྒྱས་པའི་རིགས་ནི་ཕར་ཕྱིན་དྲུག་གི་དབྱེ་བ་ལ་གོམས་པའི་རྐྱེན་གྱི་དབང་གིས་ཆོས་ཀྱི་དབྱིངས་དེ་མ་རིག་སྒོ་ངའི་སྤུབས་ལས་འཐོན་ནས་འཕེལ་ཞིང་རྒྱས་པ་ཉིད་ཡིན་ནོ། །དོན་འདི་ཉིད་རྒྱུད་བླ་མ་རྩ་འགྲེལ་དུ་ཤིན་ཏུ་གསལ་ཏེ། དེར་དཔེ་དགུ་དང༌། དོན་དགུ་ནི། པད་མ་སྲོག་ཆགས་བུང་བ་དང༌། སྤུན་པ་དང་ནི་མི་གཙང་ས། །འབྲས་ཤུན་གོས་ཧྲུལ་བུད་མེད་ཀྱི། །མངལ་དང་ས་ཡི་སྦུབས་ན་ཡང༌། །སངས་རྒྱས་སྦྲང་རྩི་སྙིང་པོ་བཞིན། །གསེར་བཞིན་གཏེར་བཞིན་ལྗོན་པ་བཞིན། ། རིན་ཆེན་སྐུ་དང་འཁོར་ལོ་ཡིས། །བསྒྱུར་བ་བཞིན་དང་གསེར་གཟུགས་བཞིན། །ཞེས་པ་འདི་རྣམས་ཀྱིས་ཆོས་ཀྱི་དབྱིངས་ཉིད་གསལ་བར་བསྟན་ལ། དཔེ་རྣམས་ཀྱི་ནང་ནས་གཏེར་གྱི་དཔེས་རང་བཞིན་གྱི་རིགས་དང༌། ལྗོན་པའི་དཔེས་རྒྱས་པའི་རིགས་བསྟན་ཏོ། །ལྗོན་པའི་དཔེ་དོན་ཉིད་རྒྱས་པར་བཤད་པའི་སྐབས་སུ་ཡང༌། རྒྱུད་བླ་རྩ་འགྲེལ་ལས་ཇི་སྐད་དུ། ཉོན་མོངས་པ་ནི་ཤུན་པའི་སྦུབས་དང་འདྲ་བ་ལ་དེ་བཞིན་གཤེགས་པའི་ཁམས་ནི་ས་བོན་གྱི་མྱུ་གུ་ལྟ་བུ་སྟེ། ཇི་ལྟར་ཨ་མྲ་ལ་སོགས་པའི་ཤིང་འབྲས་ལ། །ཡོད་པའི་ས་བོན་མྱུ་གུ་འཇིག་མེད་ཆོས། །ས་རྨོས་ཆུ་སོགས་ལྡན་ལས་ལྗོན་ཤིང་གི །རྒྱལ་པོའི་དངོས་པོར་རིམ་གྱིས་འགྲུབ་པ་ལྟར། །སེམས་ཅན་རྣམས་ཀྱི་མ་རིགས་སོགས་འབྲས་ཀྱི། །ལྤགས་སྦུབས་ནང་ཆུད་ཆོས་ཁམས་དགེ་བ་ཡང༌། །དེ་བཞིན་དགེ་བ་དེ་དེ་ལ་བརྟེན་ནས། །རིམ་གྱིས་ཐུབ་པའི་རྒྱལ་པོའི་དངོས་པོར་འགྱུར། །ཆུ་དང་ཉི་མའི་འོད་དང་རླུང་དང་ས་དང་དུས་མཁའི་རྐྱེན་རྣམས་ཀྱིས། །ཏ་ལ་དང་ནི་ཨ་མྲའི་འབྲས་སྦུབས་གསེབ་ནས་ཤིང་སྐྱེ་ཇི་ལྟ་བར། །སེམས་ཅན་ཉོན་མོངས་འབྲས་ལྤགས་ནང་ཆུད་རྫོགས་སངས་ས་བོན་མྱུ་གུ་ཡང༌། །དེ་བཞིན་དགེ་རྐྱེན་དེ་དང་དེའི་ས་ཆོས་འཐོན་འཕེལ་བར་གྱུར་པ་ཡིན། །ཞེས་པ་འདི་ཉིད་ཀྱིས་རྒྱས་པའི་རིགས་གསལ་བར་བསྟན་ཏོ། །སྐབས་འདིའི་ཆུ་དང་ཉི་མའི་འོད་ལ་སོགས་པ་དཔེ་དྲུག་གིས་བསྟན་པའི་དགེ་བའི་རྐྱེན་དེ་དང་དེ་ནི་ཕ་རོལ་ཏུ་ཕྱིན་པ་དྲུག་ཡིན་ཏེ། གོང་དུ་རི་མོ་མཁན་གྱི་དཔེ་ཕར་ཕྱིན་དྲུག་གིས་རྣམ་ཀུན་མཆོག་ལྡན་གྱི་སྟོང་པ་ཉིད་ཀྱི་གཟུགས་རྫོགས་པར་བྱེད་པ་ཉིད་དུ་གསུངས་པའི་ཤེས་པར་བྱེད་པ་ལ་སོགས། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། ཤེར་ཕྱིན་བཅུའི་དགེ་བའི་རྐྱེན་གྱིས་རིགས་རྒྱས་པ་གསུངས་པ་འདི་ལྟ་སྟེ། དཀའ་སྦྱོད་སྣ་ཚོགས་སྦྱིན་པ་དང༌།། ཚུལ་ཁྲིམས་སེམས་ཅན་དོན་སྡུད་དང༌། །སེམས་ཅན་ཕན་བྱེད་བཟོད་པ་སྟེ། །གསུམ་པོ་འདིས་ནི་ཁམས་རྒྱས་འགྱུར། །ཆོས་རྣམས་ཀུན་ལ་བརྩོན་འགྲུས་དང༌། །བསམ་གཏན་ལ་སེམས་འཇུག་པ་དང༌། །རྟག་ཏུུ་ཤེས་རབ་བསྟེན་པ་སྟེ། །འདི་ཡང་བྱང་ཆུབ་རྒྱས་བྱེད་ཡིན། །ཐབས་དང་བཅས་པའི་ཤེས་རབ་དང༌། །སྨོན་ལམ་རྣམ་པར་སྦྱངས་པ་དང༌། །སྟོབས་ལ་གནས་དང་ཡེ་ཤེས་ཏེ། །ཁམས་རྒྱས་བྱེད་པའི་ཆོས་བཞི་པོ། །ཞེས་སོ། །རྒྱུད་བླ་མར། དཔེ་དོན་ཆོས་མཚུངས་པར་སྟོན་པའི་སྐབས་སུ་ཡང་རྒྱུས་པའི་རིགས་དེ་ཉིད་ཇི་སྐད་དུ། ཇི་ལྟར་མྱུག་སོགས་རིམ་སྐྱེ་བས། །ས་བོན་ཤུན་པ་གཅོད་པར་ལྟར། །དེ་བཞིན་དེ་ཉིད་མཐོང་བ་ཡིས། །མཐོང་སྤང་རྣམས་ནི་ལྡོག་པར་འགྱུར། ། ཞེས་གསུངས་སོ། དེ་ནས་འདིར་དོན་དགུ་པོ་དེ་ཉིད་ཆོས་སྐུའི་རང་བཞིན་དང་དེ་བཞིན་ཉིད་ཀྱི་རང་བཞིན་དང༌། རིགས་ཀྱི་རང་བཞིན་དེ། རང་བཞིན་རྣམ་པ་གསུམ་དུ་བསྡུས་ནས་དཔེ་གསུམ་དང༌། གཅིག་དང༌། ལྔ་རྣམས་ཀྱིས་རིམ་པ་ལྟར་བསྟན་པ་ནི་ཇི་སྐད་དུ། འདི་ཡིའི་རང་བཞིན་ཆོས་སྐུ་དང༌། །དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་གསུངས་པའི་དོན་རང་བཞིན་སྔ་མ་གཉིས་ནི་དཔེ་གསུམ་དང༌། གཅིག་གིས་བསྟན་པ་ལ། གཏེར་དང་ལྗོན་ཤིང་དང་རིན་པོ་ཆེའི་སྐུ་དང༌། འཁོར་ལོ་བསྒྱུར་བ་དང༌། གསེར་གྱི་གཟུགས་དེ་དཔེ་ལྔས་རིགས་ཀྱི་རང་བཞིན་བསྟན་ཏོ། །གཏེར་དང་རིན་པོ་ཆེའི་སྐུ་གཉིས་ཀྱིས་རང་བཞིན་དུ་གནས་པའི་རིགས་ཀྱི་རང་བཞིན་བསྟན་ཅིང༌། ལྷག་མ་གསུམ་པོས་རྒྱས་པའི་རིགས་ཀྱི་རང་བཞིན་བསྟན་ཏེ་རྒྱུད་བླ་རྩ་འགྲེལ་དུ། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང༌། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡིན། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ངོ་བོ་ཉིད་སྐུ་མཛེས་པ་ནི། །རིན་ཆེན་སྐུ་འདྲར་ཤེས་བྱ་སྟེ། །རང་བཞིན་གྱིས་ནི་བྱས་མིན་དང༌། །ཡོན་ཏན་རིན་ཆེན་གཏེར་ཡིན་ཕྱིར། །ཆོས་ཆེན་རྒྱལ་སྲིད་ཆེ་ལྡན་ཕྱིར། །རྫོགས་ལོངས་འཁོར་ལོས་བསྒྱུར་བཞིན་ནོ། །གཟུགས་བརྙན་གྱི་ནི་རང་བཞིན་ཕྱིར། །སྤྲུལ་པ་གསེར་གྱི་གཟུགས་ལྟ་བུ། །དེ་ཕྱིར་དེ་ལྟར་གཏེར་དང་ལྗོན་ཤིང་དང་རིན་པོ་ཆེའི་སྐུ་དང་འཁོར་ལོས་བསྒྱུར་བ་དང་གསེར་གྱི་གཟུགས་ཏེ། དཔེ་ལྷག་མ་ལྔ་པོ་འདི་དག་གིས་ནི་སངས་རྒྱས་ཀྱི་སྐུ་རྣམ་པ་གསུམ་སྐྱེ་བའི་རིགས་ཡོད་པའི་དབང་དུ་བྱས་ཏེ། དེ་བཞིན་གཤེགས་པའི་ཁམས་སེམས་ཅན་ཐམས་ཅད་ཀྱི་སྙིང་པོར་བསྟན་པ་ཡིན་ནོ། །དེ་བཞིན་གཤེགས་པ་ཉིད་ནི་སངས་རྒྱས་ཀྱི་སྐུ་རྣམ་པ་གསུམ་གྱིས་རབ་ཏུ་ཕྱེ་བ་ཡིན་ཏེ། དེས་ན་དེ་བཞིན་གཤེགས་པའི་ཁམས་ཐོབ་པའི་རྒྱུ་ཡིན་པས་འདིར་ཁམས་ཀྱི་དོན་ནི་རྒྱུའི་དོན་ཏོ། །ཞེས་གསུངས་སོ། །དེས་ན་ཆོས་དབྱིངས་ཉིད་སྔོན་རྒྱུའི་གནས་སྐབས་ན་རིགས་རྣམ་པ་གཉིས་དང༌། ཕྱིས་འབྲས་བུའི་གནས་སྐབས་ན་སྐུ་རྣམ་པ་གསུམ་དུ་གསུངས་པའི་ཕྱིར་རང་བཞིན་དང་རྒྱས་པའི་རིགས་ཀྱི་དོན་ནི་དེ་ཡིན་ནོ། །སྔོན་རྒྱུའི་ཞེས་པ་ལམ་གྱི་གནས་སྐབས་སོ། །དེའི་ཕྱིར་ཆོས་ཀྱི་དབྱིངས་ཉིད་སློབ་པའི་གནས་སྐབས་ན་ལམ་དང༌། རྒྱུ་དང་ས་བོན་དང་རིགས་སུ་གསུངས་པ་འདིས་ཀྱང་སྔར་རྣམ་པ་ཐམས་ཅད་མཁྱེན་པ་ཉིད་ལམ་ཞེས་པའི་དོན་ཉིད་ལེགས་པར་ཕྱེ་བ་ཉིད་དུ་བསྟན་པར་བྱའོ། །སྐབས་འདིར་ནི་ཁམས་དང་དབྱིངས་དང་རྒྱུ་དང་ས་བོན་དང་རིགས་ཞེས་པ་རྣམས་དོན་གཅིག་ཡིན་ནོ། །ཇི་སྐད་དུ། མངོན་པའི་མདོ་ཐེག་བསྡུས་དང་རྒྱུད་བླའི་འགྲེལ་པར་དྲང༌། ཐོག་མ་མེད་དུས་ཅན་གྱི་ཁམས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང༌། །མྱ་ངན་འདས་པའང་ཐོབ་པ་ཡིན། ། ཞེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། ཆོས་དབྱིངས་བསྟོད་པར། ས་བོན་གྱུར་པ་དབྱིངས་དེ་ཉིད། །ཆོས་རྣམས་ཀུན་གྱི་རྟེན་དུ་འདོད། །དེ་ཉིད་སྦྱང་བ་བྱས་པ་ལས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་གསུངས་པ་རྣམས་དོན་གཅིག་པུ་འདི་ཉིད་ཡིན་ནོ། །དེས་ན་ཆོས་ཀྱི་དབྱིངས་ཉིད་ཕྱིར་འཁོར་འདས་ཀྱི་ཆོས་ཐམས་ཅད་ཀྱི་གཞི་དང་གནས་དང་རྟེན་ཡིན་ལ། ཁྱད་པར་སེམས་ཅན་གྱི་དུས་ན་འཁོར་བའི་ཆོས་ཐམས་ཅད་ཀྱི་རྟེན་ཡིན་ཅིང༌། སངས་རྒྱས་ཀྱི་དུས་ན་རྣམ་པར་བྱང་བའི་ཆོས་ཐམས་ཅད་ཀྱི་རྟེན་དང༌། ལམ་གྱི་དུས་ན་སྒྲུབ་པའི་རྟེན་ཡིན་ནོ། །བླ་མེད་བྱང་ཆུབ་ཐོབ་པར་འདོད་པ་རྣམས་ཀྱི་དྲི་མ་སྦྱང་བར་བྱ་བའི་གཞི་ཡིན་པའི་ཕྱིར་ཆོས་དབྱིངས་ཉིད་དག་པ་གཉིས་ལྡན་གྱི་བྱང་ཆུབ་ཆེན་པོའི་ས་བོན་དང་རྒྱུ་ཡིན་པར་བསྟན་ཏོ། །ཆོས་ཀྱི་དབྱིངས་ཉིད་ལམ་གྱི་དུས་སུ་ཐེག་ཆེན་གྱི་རིགས་དང༌། བྱང་ཆུབ་སེམས་དཔའི་རིགས་སུ་བསྟན་ལ། དེ་ཉིད་ཐེག་པ་གསུམ་གྱི་རིགས་ཐ་དད་པ་རྣམས་ཀྱི་ནང་ནས་རིགས་མཆོག་ཉིད་དུ་བསྟན་ཞིང༌། མཆོག་དེ་ཉིད་ཀྱི་ངོ་བོ་རང་བཞིན་དང་རྒྱས་པའི་རིགས་སུ་བསྟན་ཏེ། ཇི་སྐད་དུ། ཐོག་མེད་རང་བཞིན་གནས་པ་དང༌། །ཡང་དག་གནས་པ་མཆོག་ཉིད་དོ། །ཞེས་པ་དང་མདོ་སྡེ་རྒྱན་དུ་ཡང༌། རིགས་མཆོག་ཉིད་ཅེས་བརྗོད་པ་ཡིན། ཞེས་དང༌། རིགས་མཆོག་དེ་ནི་རྩ་བ་བཟང་པོ་ལྟ་བུ་ཡིན་ནོ། ། ཞེས། དེས་ན་སངས་རྒྱས་ཀྱི་སྐུ་གསུམ་པོ་རིགས་གཉིས་པོ་འདིའི་འབྲས་བུར་གསུངས་པའི་ཕྱིར་འདི་གཉིས་ཐེག་ཆེན་གྱི་རིགས་དང༌། བྱང་ཆུབ་སེམས་དཔའི་རིགས་སུ་འཆད་པ་ནི་དགོངས་པ་ཡང་དག་ཡིན་པར་སྣང་ངོ༌། །ཉན་རང་གི་རིགས་ནི་སྐུ་གསུམ་གྱི་རྒྱུར་མ་གསུངས་ཤིང༌། མཆོག་ཡིན་པར་ཡང་མ་གསུངས་པའི་ཕྱིར་རོ། །གལ་ཏེ་རང་བཞིན་གྱི་རིགས་ཆོས་ཀྱི་དབྱིངས་ཡིན་པའི་ཕྱིར་བྱང་ཆུབ་སེམས་དཔའ་འབའ་ཞིག་གི་རིགས་ཡིན་པར་མི་འཐད་དོ། །ཞེ་ན། སྐྱོན་མེད་དེ་འདིར་ནི་ཚེ་རབས་གཅིག་ནས་གཅིག་ཏུ་བརྒྱུད་ནས་འོངས་པའི་ཆོས་ཉིད་ངང་གིས་ཐོབ་པ་དེ་ཉིད་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་ཡིན་ལ། དེ་ཉིད་རང་བཞིན་དུ་གནས་པའི་རིགས་སུ་གསུངས་ཀྱི། ཆོས་ཀྱི་དབྱིངས་ཡོད་པ་ཙམ་ནི་སྐྱེ་མཆེད་དྲུག་གི་ཁྱད་པར་དུ་ཡང་མ་གསུངས་ཤིང་རིགས་མཆོག་ཉིད་དུ་ཡང་མ་གསུངས་པའི་ཕྱིར་དང༌། ཆོས་ཉིད་ཐོབ་པ་ཡང་མ་ཡིན་པའི་ཕྱིར་རོ། ། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་གསུངས་ཀྱི། སེམས་ཅན་ཐམས་ཅད་རང་བཞིན་གྱི་རིགས་ལ་གནས་པར་མ་གསུངས་པའི་ཕྱིར་དང༌། རང་བཞིན་དུ་གནས་པ་རིགས་ཏེ། སེམས་ཅན་རྣམས་སྐྱེ་མཆེད་དྲུག་གི་ཁྱད་པར་དུ་ཡང་མ་གསུངས་པའི་ཕྱིར་རོ། །དེས་ན་ཆོས་ཀྱི་དབྱིངས་གཅིག་ཉིད་ལ་ཁྱད་པར་མེད་ཀྱང་བྱང་ཆུབ་སེམས་དཔའ་རྣམས་ལ་རང་བཞིན་གྱི་རིགས་སུ་འགྱུར་བ་དང༌། སེམས་ཅན་གཞན་རྣམས་ལ་མི་འགྱུར་བའི་ཁྱད་པར་ནི་དེ་ཡིན་ནོ། །ཁྱད་པར་འདི་ཉིད་ཀྱིས་རང་བཞིན་གྱི་རིགས་ཆད་པ་ཡོད་པར་གསུངས་པའི་དོན་ཡང་རྟོགས་པར་བྱའོ། །དེས་ན་ཐེག་པ་ཆེན་པོའི་རིགས་དང༌། བྱང་ཆུབ་སེམས་དཔའི་རིགས་དང་སངས་རྒྱས་ཀྱི་རིགས་ཞེས་པ་འདིར་རྣམས་གྲངས་ཡིན་ལ་འདི་ཉིད་རིགས་མཆོག་གང་ཡིན་པ་དེ་ཡིན་ཞིང་འདི་ལ་གནས་པ་ལ་མངོན་འགྱུར་བའི་ཆོས་ཐེག་ཆེན་ལ་མོས་པ་དང༌། ཤེས་རབ་དང༌། བསམ་གཏན་དང༌། སྙིང་རྗེ་བཞི་ཚང་དགོས་དེ། ཇི་སྐད་དུ། རྒྱུད་བླ་མར་ཐེག་ཆེན་ལ་མོས་ས་བོན་ཤེས་རབ་ནི། ། སངས་རྒྱས་ཆོས་སྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེའི་མ་མ་ཅན། ། གང་ཡིན་དེ་དག་ཐུབ་པའི་རྗེས་སྐྱེས་ལས། །ཞེས་ཏེ་སངས་རྒྱས་ཀྱི་རིགས་སུ་སྐྱེས་པའི་གང་ཟག་ནི་དེ་ལྟ་བུ་ཡིན་ནོ། །ཞེས་པའི་དོན་ཏོ། །གང་གི་ཕྱིར་རིགས་མཆོག་གང་ཡིན་པ་དེ་ཉིད་བྱང་ཆུབ་སེམས་དཔའི་སྒྲུབ་པའི་རྟེན་ཡིན་པ། དེའི་ཕྱིར་འདིར་ཡང་རྟོགས་པའི་ཆོས་དྲུག་ལ་སོགས་པ་འཇུག་པའི་རྟེན་ནི་ཐེག་ཆེན་གྱི་རིགས་ཡིན་ནོ། །རྟོགས་པའི་ཆོས་དྲུག་ནི། སེམས་བསྐྱེད་དང༌། གདམས་ངག་དང༌། ངེས་འབྱེད་ཡན་ལག་རྣམ་བཞི་པོ་ཡིན་པར་འོས་སོ། །གཞན་དག་ནི། སྔ་མ་གཉིས་ཀྱི་ཚབ་ཏུ་མཐོང་བསྒོམ་གཉིས་འཆད་དོ། །རིགས་དང་མི་ལྡན་ན་བྱང་ཆུབ་ཀྱི་སེམས་མི་སྐྱེ་བས་དེའི་སྔོན་དུ་རིགས་ལ་གནས་དགོས་དེ་དབུས་མཐའ་རྩ་འགྲེལ་དུ། བྱང་ཆུབ་ཀྱི་སེམས་སྐྱེ་བའི་སྒྲིབ་པ་གསུམ་གསུངས་པ་འདི་ལྟ་སྟེ། རིགས་དང་བཤེས་གཉེན་མི་ལྡན་དང༌། །སེམས་ནི་ཡོངས་སུ་སྐྱོ་བ་དང༌། །ཞེས་དང༌། ཡང་དག་པར་འཛིན་པ་ནི་བྱང་ཆུབ་ཀྱི་སེམས་བསྐྱེད་པ་སྟེ། དེའི་སྒྲིབ་གསུམ་ནི། རིགས་དང་མི་ལྡན་པ་དང་དགེ་བའི་བཤེས་གཉེན་དང་མི་ལྡན་པ་དང༌། སེམས་ཡོངས་སུ་སྐྱོ་བའོ། །ཞེས་གསུངས་སོ། །དེས་ན་རིགས་དང་མི་ལྡན་པར་བྱང་ཆུབ་ཀྱི་སེམས་བསྐྱེད་ཅེས་སྨྲ་བ་ལ་ལུང་རིགས་ཀྱིས་གནོད་དོ། །གཉེན་པོ་ནི་བར་ཆད་མེད་པའི་ལམ་མོ། །དེས་སྤང་བྱ་སྤོང་བཞིན་པ་ནི་སྤོང་བ་དང་ཞེས་སོ། །དེ་དག་ཡོངས་སུ་གདུགས་པ་ནི། རྣམ་པར་གྲོལ་བའི་ལམ་མོ། །དེ་རྣམས་འཇུག་པའི་རྟེན་ནི་རིགས་ཡིན་ནོ། །བྱང་སེམས་ཀྱི་ཤེས་རབ་སྙིང་བརྩེར་བཅས་པ་འཇུག་པའི་རྟེན་དང༌། སློབ་མ་ཉན་རང་དང་ཐུན་མོང་མ་ཡིན་པའི་ཡོན་ཏན་ཉིད་འཇུག་པའི་རྟེན་དང༌། བྱང་སེམས་ཀྱི་གཞན་གྱི་དོན་གྱི་གོ་རིམ་འཇུག་པའི་རྟེན་དང༌། ས་བརྒྱད་པ་ལ་སོགས་པ་གསུམ་གྱི་ཡེ་ཤེས་རྩོལ་བ་མི་མངའ་བར་འཇུག་པའི་རྟེན་ལ་རིགས་ཞེས་བྱའོ། །འདི་རྣམས་ཀྱི་འཚམས་དང་པོ་དྲུག་སྦྱོར་མཐོང་བསྒོམ་ལམ་ན་ཡོད་འོག་ཏུ་གསུམ་དང་ཡང་གསུམ་དག་ས་གསུམ་ལ་རིམ་པ་བཞིན་ཡོད་ཐ་མས་བཅུ་པའི་ཁྱད་པར་ལམ་ལ་ཡོད་པར་བུདྷ་ཤྲིས་བཤད། དྲི་བཅས་དྲི་མེད་དུ་འགྱུར་བཞིན་པའི་དེ་བཞིན་པའི་དེ་བཞིན་ཉིད་དེ་བྱང་ཆུབ་སེམས་དཔའ་ཡིན་པར་གསུངས་པའི་ཕྱིར་བྱང་ཆུབ་སེམས་དཔའ་ཉིད་སེམས་བསྐྱེད་ལ་སོགས་བསྒྲུབ་བ་ཐམས་ཅད་ཀྱི་རྟེན་ཡིན་ལ། དེ་ཉིད་ཆགས་པ་གཅོད་བྱེད་དང༌། ཆགས་པ་ཟད་པར་འདོད་པ་དང༌། བླ་མེད་བྱང་ཆུབ་རིག་པ་ཡིན་ཏེ། སྡུད་པ་ལས། ཅི་ཕྱིར་འདི་ནི་བྱང་ཆུབ་སེམས་དཔའ་བྱ་ཞེ་ན། །ཆགས་པ་གཅོད་བྱེད་ཀུན་ལ་ཆགས་པ་ཟད་པར་འདོད། །རྒྱལ་བ་རྣམས་ཀྱི་བྱང་ཆུབ་ཆགས་མེད་གྱུར་ལ་རེག། དེས་ན་འདི་ནི་བྱང་ཆུབ་སེམས་དཔའི་མིང་ཐོབ་པོ། །ཞེས་པ་ནི་ཡུམ་རྒྱས་པ་ལ་སོགས་པའི་སྐབས་འདིའི་མདོ་ཐམས་ཅད་ཀྱི་དོན་བསྡུས་པར་སྣང་ངོ༌། །གལ་ཏེ་སེམས་བསྐྱེད་ལ་སོགས་པ་བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱི་རྟེན་ཆོས་ཀྱི་དབྱིངས་ཡིན་ན་ཐོག་མར་ཐར་པའི་ས་བོན་དང་དེ་ནས་རིམ་གྱིས་རྣམ་བྱང་གི་བག་ཆགས་ཐམས་ཅད་ཀུན་གཞི་རྣམ་པར་ཤེས་པ་ལ་འཇོག་ཅིང་དེ་ལ་རྟེན་དགོས་པ་མ་ཡིན་ནམ་ཞེ་ན། མ་ཡིན་ཏེ་སྣང་བ་དང་མུན་པའི་རྟེན་གཅིག་ཏུ་མི་རུང་བ་བཞིན་དུ་སྤང་བྱ་དང༌། གཉེན་པོའི་ཆོས་དག་འཇུག་པའི་རྟེན་ཀུན་གཞི་གཉིས་ཡོད་པའི་ཕྱིར་རོ། ། གཉིས་པོ་གང་ཞེ་ན། ཀུན་གཞིའི་རྣམ་ཤེས་དང༌། ཀུན་གཞིའི་ཡེ་ཤེས་སོ། །དེ་ལ་སྔ་མ་ནི་རྣམ་སྨིན་དང་ས་བོན་ཐམས་ཅད་པ་དང་་རྩ་བའི་་རྣམ་ཤེས་དང༌། ལེན་པའི་རྣམ་ཤེས་དང༌། ལུང་དུུ་མ་བསྟན་པ་ཡིན་པར་དེང་སང་ཡོངས་སུ་གྲགས་སོ། །ཀུན་གཞིའི་ཡེ་ཤེས་ནི་ཆོས་ཀྱི་དབྱིངས་ཉིད་ཡིན་ཞིང༌། དེ་ལ་དེ་བཞིན་གཤེགས་པའི་སྙིང་པོ་དང༌། ས་བོན་དང༌། ཁམས་དང༌། རིགས་དང་ཤེར་ཕྱིན་དང༌། ཏིང་ངེ་འཛིན་དང་ཕྱག་རྒྱ་ཆེན་པོ་དང་ཐེག་ཆེན་དོན་དམ་པ་དང་འགོག་པའི་བདེན་པ་དང་དབུ་མ་དང་དེ་བཞིན་ཉིད་ལ་སོགས་པའི་མིང་དུ་མས་བསྟན་ཏོ། །དེ་ཉིད་ལུང་མ་བསྟན་གྱི་ཀུན་གཞི་དང་མི་གཅིག་སྟེ། དོན་དམ་གྱི་དགེ་བ་ཡིན་པའི་ཕྱིར་རོ། །ཇི་སྐད་དུ། རྒྱན་སྡུག་པའི་མདོ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། ། སྙིང་པོ་ཀུན་གཞིར་བསྒྲགས་པ་ཡང༌། །བློ་ཞན་རྣམས་ཀྱིས་མི་ཤེས་སོ། །ཞེས་དང༌། སྙིང་པོ་དེ་ལ་ཀུན་གཞིའི་སྒྲས། དེ་བཞིན་གཤེགས་རྣམས་སྟོན་པར་མཛད་ཅེས་དང་ཀུན་གཞི་དང་རང་ལུགས་དགེ་བ་ནི། ཞེས་སོགས་རབ་ཏུ་རྒྱས་སོ། །ཡུམ་ལས་ཀྱང༌། དོན་དམ་ཉིད་སྟོན་པའི་སྐབས་སུ་ཆོས་ཐམས་ཅད་ནི་དགེ་བ་སྟེ་གང་དང་ཡང་བྲལ་བས་མ་ཡིན་ནོ། །ཞེས་སོ། །གཞན་ཡང་དོན་དམ་པའི་དགེ་བ་གང་ཞེ་ན་དེ་བཞིན་ཉིད་དོ། །ཞེས་གསུངས་པའི་ཕྱིར་ལུང་མ་བསྟན་གྱི་ཀུན་གཞི་དང་དགེ་བ་ཡིན་པའི་ཀུན་གཞི་གཉིས་ཡོད་དོ། །དེས་ན་ཀུན་ནས་ཉོན་མོངས་པའི་ཆོས་རྣམས་འཇུག་པའི་རྟེན་ཀུན་གཞི་རྣམ་ཤེས་ཡིན་པ་ལྟར། གཉེན་པོ་རྣམ་བྱང་གི་ཆོས་རྣམས་སྐྱེ་ཞིང་འཇུག་པའི་རྟེན་ཡང་ཀུན་གཞིའི་ཡེ་ཤེས་ཡིན་ནོ། །ཇི་སྐད་དུ། བྱམས་པ་མགོན་པོའི་ཞལ་སྔ་ནས། གནས་ཡོངས་གྱུར་པ་མེད་པ་ཡི། །ཉེས་དམིགས་བཞི་སྟེ་ཉོན་མོངས་པ། །མི་འཇུག་རྟེན་མེད་ཉེས་པ་དང༌། །ལམ་འཇུག་རྟེན་མེད་ཉེས་པ་དང༌། །མྱ་ངན་འདས་པའི་གང་ཟག་རྣམས། །གདམས་པའི་གཞི་མེད་ཉེས་པ་དང༌། །བྱང་ཆུབ་གསུམ་གྱི་ཁྱད་པར་དང༌། །གདགས་པའི་གཞི་མེད་ཉེས་པའོ། །བཟློག་ནས་ཕན་ཡོན་འཇུག་པ་ནི། །རྣམ་པ་བཞི་རུ་ཤེས་པར་བྱ། ། ཞེས་དང་དེ་དག་གི་འགྲེལ་པར་རེ་ཤིག་སེམས་དེ་ཉིད་ཡིན་པར་ནི་མི་མཐད་དེ། མི་མཐུན་པའི་ཕྱོགས་དང་གཉེན་པོ་དག་གི་སྐྱེ་བ་དང༌། འགག་པ་དུས་གཅིག་པ་ཡིན་པའི་ཕྱིར། འགལ་བ་དག་ནི་རྟེན་གཅིག་པར་མི་འཐད་པའི་ཕྱིར་ཏེ། གྲང་བ་དང་དྲོ་བའི་རེག་པ་རྟེན་གཅིག་པར་མི་འཐད་པ་བཞིན་ནོ། །ཞེས་གསུངས་སོ། །དེས་ན་སྦང་བྱ་མི་འཇུག་པ་དང༌། གཉེན་པོ་འཇུག་པ་ལ་སོགས་པའི་རྟེན་ནི་ཡོངས་སུ་གྱུར་པ་ཀུན་གཞི་ཡེ་ཤེས་མེད་ན་ཉེས་པ་བཞི་དང༌། ཡོད་ན་ཕན་ཡོན་བཞི་པོ་འདི་བྱུང་ཡང་ཀུན་གཞི་གཉིས་ཡོད་མེད་ལ་ཐུག་གོ །དེས་ན་འཁོར་འདས་གཉིས་ཀའི་བག་ཆགས་ཀུན་གཞི་རྣམ་ཤེས་འབའ་ཞིག་ལ་འཇོག་ན། འཁོར་འདས་གཉིས་ཀའི་ས་བོན་ཡིན་པའི་ཕྱིར་སྦང་བྱའི་ས་བོན་སྤངས་པའི་གནས་གྱུར་མེད་པས་སྤངས་པ་སླར་ལྡོག་པ་དང༌། སངས་རྒྱས་མི་སྲིད་པ་དང༌། སྤང་གཉེན་གྱི་ས་བོན་སོ་སོར་ངེས་པ་མེད་པ་ལ་སོགས་པར་ཧ་ཅང་ཐལ་བས་གནོད་དོ། །ཆོས་དབྱིངས་བསྟོད་པར་ཡང༌། སེམས་ཉིད་རྣམ་པ་གཉིས་སུ་མཐོང༌། །ཇི་ལྟར་འཇིག་རྟེན་འཇིག་རྟེན་འདས། ། བདག་ཏུ་འཛིན་ལས་འཁོར་བ་སྟེ། །སོ་སོར་རིགས་ན་དེ་ཉིད་དོ། །ཞེས་གསུངས་པར་ལྟར་རོ། །འོ་ན་རྣལ་འབྱོར་གྱི་དབང་ཕྱུག་ས་ར་ཧ་པས་སློབ་དཔོན་དྷོ་ཧར་སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལས་སྲིད་དང་མྱ་ངན་འདས་འཕྲོ་བ། །ཞེས་པ་འདི་དང་ཇི་ལྟར་མི་འགལ་ཞེ་ན། དེའི་དོན་བརྗོད་པར་བྱ་སྟེ། ཀུན་གཞི་རྣམ་ཤེས་ཀྱི་སེམས་ཉིད་གཅིག་པུ་ཀུན་ནས་ཉོན་མོངས་ཀྱི་ཆོས་ཀུན་གྱི་ས་བོན་ཏེ། ཀུན་གཞི་རྣམ་ཤེས་གང་ལས་སྲིད་པ་ཐམས་ཅད་འཕྲོ་བའི་ཕྱིར་དང༌། ཀུན་གཞི་ཡེ་ཤེས་ཀྱི་སེམས་ཉིད་གཅིག་པུ་རྣམ་བྱང་གི་ཆོས་ཀུན་གྱི་ས་བོན་ཏེ། ཀུན་གཞི་ཡེ་ཤེས་གང་ལས་མྱ་ངན་ལས་འདས་པ་འཕྲོ་བ་ཡིན་ལ། འདོད་པའི་འབྲས་བུ་སངས་རྒྱས་སྟེར་བར་བྱེད་པའི་ཀུན་གཞི་ཡེ་ཤེས་ཡིད་བཞིན་ནོར་བུ་འདྲ་བའི་སེམས་ལ་ཕྱག་འཚལ་ལོ། །ཞེས་བཤད་ན་བྱམས་མགོན་ལ་སོགས་དང་དཔལ་ས་ར་ཧ་དགོངས་པ་གཅིག་ཏུ་གོ་བས་ལེགས་པ་ཡིན་ནོ། །དེ་ལྟ་མིན་ན་འཕགས་མཆོག་འགལ་ལམ་སྙམ་པའི་བློ་སྐྱེ་སྲིད་ཅིང་ཀུན་གཞི་རྣམ་ཤེས་ཁོ་ན་ལ་འཆད་ན་ཚིགས་སུ་བཅད་པའི་རྐང་པ་ཕྱི་མ་གཉིས་དང་ཡང་མི་འབྲེལ་པའི་སྐྱོན་དུ་འགྱུར་རོ། །བཤད་ལུགས་འདི་ལྟར་བྱས་ན་བདེན་གཉིས་རྣམ་དབྱེ་་ཤེས་པའི་ཕྱིར་ཐུབ་པའི་བཀའ་ལ་མི་རྨོངས་པར་འགྱུར་རོ། །དེས་ན་ཀུན་གཞི་རྣམ་ཤེས་འཁོར་བའི་ཆོས་ཐམས་ཅད་ཀྱི་ས་བོན་ཐམས་ཅད་པ་ཡིན་པར་ལྟར། འབྲུུ་དང་འབྲས་བུའི་ཤུན་པའི་ཚུལ་གྱིས་ཀུན་གཞི་ཡེ་ཤེས་ཀྱང་མྱ་ངན་འདས་པའི་ཆོས་ཐམས་ཅད་ཀྱི་ས་བོན་ཐམས་ཅད་པ་ཡིན་ཞིང་ཐར་པའི་ས་བོན་ཡང་ཆོས་ཀྱི་དབྱིངས་ཀྱིས། བསྐྱེད་ལ་ཐོས་པ་ལ་སོགས་པའི་བག་ཆགས་ཀྱང་ཀུན་གཞི་ཡེ་ཤེས་ཉིད་ཀྱིས་འཛིན་ཏེ། རྒྱུད་བླ་མ་ནས་བདེ་གཤེགས་སྙིང་པོའི་བྱེད་ལས་སྟོན་པའི་སྐབས་སུ་གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང༌། །མྱ་ངན་འདས་ལ་འདོད་པ་དང༌། །དོན་གཉེར་སྨོན་པའང་མེད་པར་འགྱུར།། ཞེས་དང་དེའི་འགྲེལ་པར་མདོ་དྲངས་པ་ལས་ཀྱང་བཅོམ་ལྡན་འདས་གལ་ཏེ་དེ་བཞིན་གཤེགས་པའི་སྙིང་པོ་མ་མཆིས་ན་སྡུག་བསྔལ་ལ་ཡང་ཡིད་འབྱུང་བར་མི་འགྱུར་ཞིང་མྱ་ངན་འདས་པ་ལ་ཡང་འདོད་པ་དང་དོན་དུ་གཉེར་བ་དང༌། སྨོན་པར་ཡང་མི་འགྱུར་རོ། །ཞེས་སོ། །དེའི་འགྲེལ་བར་ཡང༌། དེ་ལ་མདོར་བསྡུ་ན་སངས་རྒྱས་ཀྱི་ཁམས་རྣམ་པར་དག་པའི་རིགས་ནི་ལོག་པ། ཉིད་དུ་ངེས་པའི་སེམས་ཅན་རྣམས་ལ་ཡང༌། ལས་རྣམ་པ་གཉིས་ཉེ་བར་གནས་པར་བྱེད་དེ། འཁོར་བ་ལ་སྡུག་བསྔལ་བའི་ཉེས་པ་མཐོང་བ་ལ་བརྟེན་ནས་སྐྱོ་བ་བསྐྱེད་པར་བྱེད་པ་དང། མྱ་ངན་ལས་འདས་པ་ལ་བདེ་བའི་ཕན་ཡོན་མཐོང་བ་ལ་བརྟེན་ནས་འདུན་པ་དང༌། འདོད་པ་དང་དོན་དུ་གཉེར་བ་དང༌། སྨོན་པ་བསྐྱེད་པར་བྱེད་པའོ། །ཞེས་བདེ་གཤེགས་སྙིང་པོ་ཉིད་དེ་དག་གིས་སྐྱེད་བྱེད་དུ་གསུངས་སོ། །ཐོས་པ་ལ་སོགས་པའི་བག་ཆགས་འཛིན་བྱེད་ཡིན་པར་ཡང༌། ཐེག་བསྡུས་ལས། ཆོས་ཀྱི་དབྱིངས་རྣམ་པར་དག་པའི་རྒྱུ་མཐུན་པ་ཐོས་པའི་བག་ཆགས་ས་བོན་ཐམས་ཅད་པ་ལས་དེ་འབྱུང་ངོ༌། ། ཐོས་པའི་བག་ཆགས་གང་ཡིན་པ་དེ་ཡང་ནི་ཀུན་གཞི་རྣམ་པར་ཤེས་པའི་ངོ་བོ་ཉིད་ཡིན་ནས། འོན་ཏེ་མ་ཡིན་གལ་ཏེ་ཀུན་གཞིའི་རྣམ་པར་ཤེས་པའི་ངོ་བོ་ཉིད་ཡིན་ན་ནི། ཇི་ལྟར་དེ་གཉེན་པོའི་ས་བོན་དུ་རུང༌། ཅི་སྟེ་དེའི་ངོ་བོ་ཉིད་མ་ཡིན་ན་ནི། དེས་ན་ཐོས་པའི་བག་ཆགས་ཀྱི་ས་བོན་དེའི་གནས་ཅི་ཞིག་ཡིན་པར་ལྟ་ཞེ་ན། སངས་རྒྱས་རྣམས་ཀྱི་བྱང་ཆུབ་ལ་བརྟེན་ནས། ཐོས་པའི་བག་ཆགས་སུ་གྱུར་པ་གང་ཡིན་པ་གནས་གང་ལ་འཇུག་པའི་ལྷན་ཅིག་འདུག་པའི་ཚུལ་གྱིས་རྣམ་པར་སྨིན་པའི་རྣམ་པར་ཤེས་པ་ལ་འཇུག་དེ་འོ་མ་དང་ཆུ་བཞིན་ནོ། །དེ་ནི་ཀུན་གཞི་རྣམ་པར་ཤེས་པ་ལ་མ་ཡིན་ཏེ། དེའི་གཉེན་པོའི་ས་བོན་ཉིད་ཡིན་པའི་ཕྱིར་རོ། །དེ་ལ་བག་ཆགས་ཆུང་ངུ་ལ་བརྟེན་ནས་བག་ཆགས་འབྲིང་པོར་འགྱུར་རོ། །བག་ཆགས་འབྲིང་པོ་ལ་བརྟེན་ནས་བག་ཆགས་ཆེན་པོར་འགྱུར་ཏེ། ཐོས་པ་དང་བསམ་པ་དང་བསྒོམ་པ་ལན་མང་བྱ་བ་དང་ལྡན་པའི་ཕྱིར་རོ། །དེ་ལ་ཐོས་པའི་བག་ཆགས་ཀྱི་ས་བོན་གྱི་ཆུང་ངུ་དང༌། འབྲིང་དང་ཆེན་པོ་ཡང་ཆོས་ཀྱི་སྐུའི་ས་བོན་དུ་བལྟ་སྟེ། ཀུན་གཞི་རྣམ་པར་ཤེས་པའི་གཉེན་པོ་ཡིན་པས་ཀུན་གཞི་རྣམ་པར་ཤེས་པའི་ངོ་བོ་ཉིད་མ་ཡིན་པ་དང༌། འཇིག་རྟེན་པ་ཡིན་ཡང་འཇིག་རྟེན་ལས་འདས་པ་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པ་ཡིན་པས་འཇིག་རྟེན་ལས་འདས་པའི་སེམས་ཀྱི་ས་བོན་དུ་གྱུར་པའོ། ། དེ་ནི་འཇིག་རྟེན་ལས་འདས་པའི་སེམས་མ་བྱུང་དུ་ཟིན་ཀྱང་ཉོན་མོངས་པའི་ཀུན་ནས་དཀྲིས་པའི་གཉེན་པོ་དང་ངན་སོང་གི་འགྲོ་བའི་གཉེན་པོ་དང་ཉེས་པར་བྱས་པ་ཐམས་ཅད་དེ་ངེས་པར་བྱེད་པའི་གཉེན་པོ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་དང་ཕྲད་པའི་རྗེས་སུ་མཐུན་པའོ། ། བྱང་ཆུབ་སེམས་དཔའ་ལས་དང་པོ་པ་རྣམས་ཀྱི་འཇིག་རྟེན་པ་ཡིན་ཡང་ཆོས་ཀྱི་སྐུར་བསྡུས་པ་དང༌། ཉན་ཐོས་དང་རང་སངས་རྒྱས་རྣམས་ཀྱི་རྣམ་པར་གྲོལ་བའི་ལུས་སུ་བསྡུས་པར་ཡང་བལྟའོ།། དེ་ནི་ཀུན་གཞི་རྣམ་པར་ཤེས་པ་མ་ཡིན་ཆོས་ཀྱི་སྐུ་དང་རྣམ་པར་གྲོལ་བའི་ལུས་སུ་བསྡུས་པ་སྟེ། ཆུང་ངུ་དང་འབྲིང་དང་ཆེན་པོར་ཇི་ལྟ་ཇི་ལྟ་བུར་རིམ་གྱིས་འཕེལ་བ་དེ་ལྟ་དེ་ལྟ་བུར་རྣམ་པར་སྨིན་པའི་རྣམ་པར་ཤེས་པ་ཡང་འབྲི་ཞིང་གནས་ཀྱང་འགྱུར་རོ། །གནས་རྣམ་པ་ཐམས་ཅད་དུ་གྱུར་པ་ན་རྣམ་པར་སྨིན་པའི་རྣམ་པར་ཤེས་པ་ས་བོན་ཐམས་ཅད་པ་ཡང་ས་བོན་མེད་པར་འགྱུར་བ་དང༌། རྣམ་པ་ཐམས་ཅད་སྤངས་པ་ཡང་ཡིན་ནོ། །ཡང་ཇི་ལྟར་ཀུན་གཞི་རྣམ་པར་ཤེས་པ་དང་ཀུན་གཞི་རྣམ་པར་ཤེས་པ་མ་ཡིན་པ་ཆུ་དང་འོ་མ་བཞིན་དུ་ལྷན་ཅིག་གནས་པ་རྣམ་པ་ཐམས་ཅད་དུ་འགྲིབ་པར་ཇི་ལྟར་འགྱུར་ཞེ་ན། ངང་པས་ཆུ་ལ་འོ་མ་འཐུངས་པ་ལྟ་བུ་དང༌། འཇིག་རྟེན་པའི་འདོད་ཆགས་དང་བྲལ་བ་ནས་མཉམ་པར་བཞགས་པ་མ་ཡིན་པའི་བག་ཆགས་འགྲིབ་སྟེ། མཉམ་པར་བཞག་པའི་བག་ཆགས་འཕེལ་ནས་གནས་གྱུར་པ་བཞིན་ནོ། །ཞེས་ས་གསུམ་པ་འོད་བྱེད་པ་བསྙེས་པའི་འཕགས་པ་ཐོགས་མེད་ཤེས་བྱ་ཐམས་ཅད་ལ་ཆོས་ཀྱི་སྦྱན་དང་ལྡན་པ་དེས་གསུངས་སོ། །ཡང་ཐེག་བསྡུས་སུ་ཐོས་སོགས་བག་ཆགས་མེད་པར་ནི། །དེ་འབྲས་སྐྱེ་བ་མི་རིགས་ཕྱིར། ཞེས་སོགས་སྦྱང་ངོ༌། །དེས་ན་ཆོས་ཀྱི་དབྱིངས་ཉིད་འཕགས་པའི་ཆོས་ཐམས་ཅད་ཀྱི་རྒྱུ་ཡིན་པའི་ཕྱིར་རོ། །མྱ་ངན་ལས་འདས་པའི་ཆོས་ཀྱི་ས་བོན་ཐམས་ཅད་པ་ལྟར་རྣམ་པར་བྱང་བའི་བག་ཆགས་ཐམས་ཅད་སྐྱེད་ཅིང་འཛིན་པ་དང༌། ཉེས་པ་ཐམས་ཅད་སུན་འབྱིན་ཞིང་ཡོན་ཏན་ཐམས་ཅད་སྐྱེད་པ་ནི་འདིའི་རང་བཞིན་ཡིན་པའི་ཕྱིར་སྐྱོན་ཟད་པ་དང་ཡོན་ཏན་རྒྱས་པར་འདོད་པའི་བྱང་ཆུབ་སེམས་དཔའ་རྣམས་ཀྱང་འདི་ལ་བསླབ་པས་ཉེས་པ་སླར་མི་འཇུག་ཅིང་སྒྲུབ་པའི་ཡོན་ཏན་ཐམས་ཅད་འདི་ལ་རྟེན་ནས་ཡིན་ནོ། །གལ་ཏེ་ཆོས་ཀྱི་དབྱིངས་ལ་དབྱེར་མེད་ཕྱིར། དོན་དམ་པའི་དབང་གི་རིགས་ནི་ཐ་དད་དུ་དབྱེ་བར་རུང་བ་མ་ཡིན་ནོ། །སྙམ་ན། དོན་དམ་པ་འདི་ལ་དེ་ལྟ་ཡིན་ཡང་ཀུན་རྫོབ་ཀྱི་དབང་གིས་རྟེན་པའི་ཆོས་བསྒྲུབ་པ་ཐ་དད་པ་ཉིད་ཀྱི་བྱེ་བྲག་རྟོགས་པའི་ཆོས་དྲུག་འཇུག་པའི་རྟེན། གཉེན་པོ་འཇུག་པའི་རྟེན། སྤོང་བ་འཇུག་པའི་རྟེན་ཞེས་པའི་ཚུལ་དག་གིས་རྟེན་ཆོས་ཉིད་དེའི་དབྱེ་བ་ཡོངས་སུ་བརྗོད་པ་ནི་འགལ་བ་མེད་དོ། །དཔེར་ན་ནམ་མཁའ་ལ་དབྱེ་བ་མེད་ཀྱང་རྫ་བུམ་གྱི་ནམ་མཁའ་གསེར་བུམ་གྱི་ནམ་མཁའ་ཞེས་པ་ལྟར་རོ། །དེ་རྣམས་ཀྱིས་ནི། སྒྲུབ་པ་ཡི་ནི་རྟེན་གྱུར་པ་ཆོས་ཀྱི་དབྱིངས་རང་བཞིན་གྱིས་ཞེས་པ་དེ་བཤད་ཟིན་ཏོ། ། ༥༽དམིགས་པ་སྟོན་པ། ད་ནི་སྐབས་འདིའི་ཆོས་བཅུ་ལས། དམིགས་པ་སྟེ། བྱང་ཆུབ་སེམས་དཔའ་རྣམས་ཀྱི་ཤེས་པར་བྱ་བ་གང་ཡིན་པ་དེ་སྟོན་པ་འདི་ལྟ་སྟེ། དམིགས་པ་ཆོས་རྣམས་ཐམས་ཅད་དེ། །དེ་ཡང་དགེ་ལ་སོགས་པ་ཡིན། །འཇིག་རྟེན་པ་ཡི་རྟོགས་པ་དང༌། གང་དག་འཇིག་རྟེན་འདས་འདོད་དང༌། ། ཟག་བཅས་ཟག་པ་མེད་ཆོས་དང༌། །གང་དག་འདུས་བྱས་འདུས་མ་བྱས། །སློབ་མ་ཐུན་མོང་ཆོས་རྣམས་དང༌། །གང་དག་ཐུབ་པའི་ཐུན་མོང་མིན། །ཞེས་པ་ལ་ཁྲི་བརྒྱད་སྟོང་པ་ལས་རབ་འབྱོར་ཆོས་ཐམས་ཅད་ཅེས་བྱ་བ་ནི་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་དང༌། ཟག་པ་དང་བཅས་པ་དང༌། ཟག་པ་མེད་པ་དང༌། འདུས་བྱས་དང༌། འདུས་མ་བྱས་དང༌། ཐུན་མོང་དང༌། ཐུན་མོང་མ་ཡིན་པ་དག་གོ །རབ་འབྱོར་དེ་དག་ནི་ཆོས་ཐམས་ཅད་ཅེས་བྱ་སྟེ། བྱང་ཆུབ་སེམས་དཔའ་ཆེན་པོ་དེ་དག་གི་མེད་པ་ཉིད་ལ་བསླབ་པར་བྱའོ། །བྱང་ཆུབ་སེམས་དཔའ་ཆེན་པོ་ཆོས་ཐམས་ཅད་ཁུང་དུ་ཆུད་པར་བྱ་བ་ཡང་དེ་དག་ཡིན་ནོ། །ཞེས་གསུངས་སོ། །བྱང་ཆུབ་སེམས་དཔའ་ཆེན་པོ་ཆོས་སྲིད་དོ་ཅོག་དེ་དག་ཤེས་པར་བྱ་བ་དང༌། དེ་དག་གི་སྟོང་ཉིད་ཟབ་མོ་ལ་བསླབ་པར་བྱ་དགོས་སོ། །དེ་ལ་དགེ་བའི་ཆོས་ནི་ཕ་དང་མ་དང་དགེ་སྦྱོང་དུ་འཛིན་པ་དང༌། དགེ་བ་བཅུ་དང༌། འདུ་ཤེས་བཅུ་དང༌། རྗེས་དྲན་བཅུ་དང༌། བསམ་གཏན་བཞི་དང༌། ཚད་མེད་བཞི་གཟུགས་མེད་བཞི་སྟེ་འཇིག་རྟེན་པར་གཏོགས་པའི་དགེ་བའི་ཆོས་དེ་རྣམས་སོ། །འཇིག་རྟེན་པའི་མི་དགེ་བའི་ཆོས་ནི་སྲོག་གཅོད་པ་ལ་སོགས་པ་རྣམས་སོ། །ལུང་དུ་མ་བསྟན་པ་ནི་ཕུང་ཁམས་སྐྱེ་མཆེད་གཟུགས་མེད་བཞི་དང་རྣམ་སྨིན་དང་འབྱུང་བ་བཞི་དང་ལུས་དང་ངག་དང་ཡིད་ཀྱི་ལས་ལུང་དུ་མ་བསྟན་པ་གང་ཡིན་པ་རྣམས་སོ། །འཇིག་རྟེན་པའི་རྟོག་པ་སྟེ། ཆོས་ནི་ཕུང་པོ་ཁམས་སྐྱེ་མཆེད་དགེ་བ་བཅུ་བསམ་གཏན་ཚད་མེད་དང་གཟུགས་མེད་དང་མངོན་ཤེས་དང་ལྔའོ། །གང་དག་འཇིག་རྟེན་ལས་འདས་པའི་ཆོས་ནི་དྲན་པ་ཉེར་བཞག་ནས་མ་འདྲེས་བཅོ་བརྒྱད་ཀྱི་བར་གང་ཡིན་པ་རྣམས་སོ། །ཟག་བཅས་ཀྱི་ཆོས་ནི་ཕུང་པོ་ཁམས་དང་སྐྱེ་མཆེད་དང༌། བསམ་གཏན་མེད་ཚད་མེད་གཟུགས་མེད་རྣམས་སོ། །ཟག་པ་མེད་པའི་ཆོས་ནི་དྲན་པ་ཉེར་བཞག་ནས་མ་འདྲེས་པའི་བར་དག་གོ །འདུས་བྱས་ནི་ཁམས་གསུམ་དང༌། འདུས་བྱས་སུ་གཏོགས་པའི་མ་འདྲེས་པའི་བར་དག་གོ །འདུས་མ་བྱས་ནི་དུས་གསུམ་ཟད་པ་དང༌། དེ་བཞིན་ཉིད་ལ་སོགས་པའི་ཡོངས་གྲུབ་རྣམས་སོ། །ཐུན་མོང་གི་ཆོས་ནི་བསམ་གཏན་བཞི་ཚད་མེད་བཞི་གཟུགས་མེད་བཞི་མངོན་ཤེས་ལྔ་རྣམས་སོ། །གང་དག་ཐུབ་པའི་ཐུན་མོང་མིན་ལ་མདོ་ལས། བྱང་ཆུབ་ཀྱི་ཕྱོགས་དང་མཐུན་པའི་ཆོས་སོ་བདུན་དང༌། སྟོབས་སོགས་ནས་མ་འདྲེས་བཅོ་བརྒྱད་ཀྱི་བར་དུ་བྱུང་ངོ༌། །དེ་རྣམས་ཀྱིས་ནི་དམིགས་པ་དག་དང་ཞེས་པ་དེ་བཤད་ཟིན་ཏོ།། ༦༽ཆེད་དུ་བྱ་བ་སྟོན་པ། ད་ནི་ཆེད་དུ་བྱ་བ་སྟོན་པ་ནི། སེམས་ཅན་ཀུན་མཆོག་ཉིད་སེམས་དང༌། །སྤོང་དང་རྟོགས་དང་གསུམ་པོ་ལ། །ཆེན་པོ་གསུམ་གྱི་རང་བྱུང་གི ཆེད་དུུ་བྱ་བ་འདུ་ཤེས་བྱ། དེ་ལ་ཆེད་ནི་གང་བྱ་བ་ནི་གང་ཞེ་ན། ཆེད་ནི་ཆེན་པོ་གསུམ་གྱི་ཆེད་ཡིན་ལ། །བྱ་བ་ནི་སེམས་དཔའ་ཆེན་པོ་ཞེས་པ་འདི་ཡིན་ནོ། །བྱང་ཆུབ་སེམས་དཔའ་ལ་དོན་གང་གིས་ཆེད་དུ་སེམས་དཔའ་ཆེན་པོ་ཞེས་ཟེར་བའི་རྒྱུ་ནི། སེམས་ཅན་ཀུན་གྱི་མཆོག་ཉིད་དུ་གྱུར་པའི་སེམས་ཆེན་པོ་དང༌། སྤོང་བ་ཆེན་པོ་དང༌། རྟོགས་པ་ཆེན་པོ་སྟེ། གསུམ་དང་ལྡན་པའི་བྱང་ཆུབ་སེམས་དཔའ་ཆེན་པོ་གསུམ་གྱི་རང་བྱུང་དེ། རང་བཞིན་གྱི་ཆེད་དུ་བྱ་བ། སེམས་དཔའ་ཆེན་པོ་ཞེས་སྨོས་པ་འདི་ཤེས་པར་བྱའོ། །དེས་ན་ཅིའི་ཆེད་དུ་ཞེས་པ་དང༌། ཅིའི་སླད་དུ་ཞེས་པ་དང༌། ཅིའི་དོན་དུ་ཞེས་པ་དང༌། ཅིའི་ཕྱིར་དུ་ཞེས་པ་རྣམས་དོན་གཅིག་གོ །གཅིག་པ་དེའི་ཕྱིར་སྐབས་འདིའི་ཆེད་དུ་བྱ་བའི་དགོས་པ་ནི་དེ་ཡིན་དེ་ཡོན་ཏན་རིན་སྡུད་པ་ལས། ཅི་ཕྱིར་དེ་ནི་སེམས་དཔའ་ཆེ་ཞེས་བྱ་ཞེ་ན། །སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དང༌། །སེམས་ཅན་ཁམས་ཀྱི་ལྷ་རྣམས་ཆེན་པོ་གཅོད་པ་སྟེ། །དེ་ཕྱིར་འདི་ནི་སེམས་དཔའ་ཆེ་ཞེས་བརྗོད་པ་ཡིན། །གཏོང་བ་ཆེ་དང་བློ་ཆེ་བ་དང་མཐུ་ཆེ་དང༌། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང༌། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། ། དེ་ཡི་ཕྱིར་ན་སེམས་དཔའ་ཆེ་ཞེས་བརྗོད་པ་ཡིན། །ཞེས་དང༌། མདོ་ལས་ཀྱང་བཅོམ་ལྡན་འདས་བྱང་ཆུབ་སེམས་དཔའ་ལ་སེམས་དཔའ་ཆེན་པོ་ཞེས་བགྱི་བ། ཅིའི་སླད་དུ། སེམས་དཔའ་ཆེན་པོ་ཞེས་བགྱི། བཀའ་སྩལ་པ། རབ་འབྱོར། སེམས་ཅན་གྱི་ཕུང་པོ་ཆེན་པོ་དང༌། སེམས་ཅན་གྱི་རིས་ཕལ་མོ་ཆེའམ་ཕལ་བྱེད་པར་འགྱུར་བས། དེའི་ཕྱིར་བྱང་ཆུབ་སེམས་དཔའ་ལ་སེམས་དཔའ་ཆེན་པོ་ཞེས་བྱའོ། །ཞེས་པ་ལ་སོགས་པས་བཅོམ་ལྡན་འདས་ཀྱིས་སེམས་དཔའ་ཆེན་པོ་ཞེས་པའི་རྒྱུ་མཚན་སེམས་ཆེན་པོ་གསུངས་ཤིང༌། ཤཱ་རིའི་བུས་སེམས་དཔའ་ཆེན་པོ་ཞེས་པའི་རྒྱུ་མཚན་སྤོང་བ་ཆེན་པོ་གསུངས་ལ། རབ་འབྱོར་གྱིས་སེམས་དཔའ་ཆེན་པོ་ཞེས་བརྗོད་པའི་རྒྱུ་མཚན་རྟོགས་པ་ཆེན་པོ་གསུངས་པ་དེ་ཉིད། རྗེ་བཙུན་བྱམས་པ་མགོན་པོས་སྐབས་འདིར་ཆེད་དུ་བྱ་བ་ཞེས་པའི་ཚིག་གིས་གསུངས་སོ། །དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས་ཀྱང༌། བྱང་ཆུབ་སེམས་དཔའ་ལ་ཅིའི་སླད་དུ་སེམས་དཔའ་ཆེན་པོ་ཞེས་བགྱི ཞེས་བྱ་བ་ནི་ཅིའི་ཕྱིར་སེམས་དཔའ་ཆེན་པོའི་མིང་དུ་བརྗོད་ཅེས་བྱ་བའི་ཐ་ཚིག་གོ །ཞེས་གསུངས་སོ། །སེམས་དཔའ་ཆེན་པོ་ཞེས་བརྗོད་པའི་རྒྱུ་མཚན་གཏོང་བ་དང་མཐུ་ཆེ་བ་ལ་སོགས་ལྷག་མ་རྣམས་ཀྱིས་འཕགས་པ་གང་པོས་གོ་ཆའི་བསྒྲུབ་པ་ལ་སོགས་པ་གསུངས་སོ། །གནོད་འཇོམས་ལས་སེམས་བསྐྱེད་མདོར་བསྟན་གྱི་སྐབས་སུ། རྒྱུུ་མཚན་བཅུ་གཅིག་གསུངས་པ་འདི་ལྟ་སྟེ། འབྲས་བུ་དང་མཐུན་པའིརིགས་དང༌། རིགས་དང་མཐུན་པའི་མོས་པ་དང༌། མོས་པ་དང་མཐུན་པའི་བསམ་པ་དང༌། བསམ་པ་དང་མཐུན་པའི་སྨོན་ལམ་དང༌། སྨོན་ལམ་དང་མཐུན་པའི་སྤྱོད་པ་དང༌། སྤྱོད་པ་དང་མཐུན་པའི་བརྩོན་འགྲུས་དང༌། བརྩོན་འགྲུས་དང་མཐུན་པའི་དུས་དང༌། དུས་དང་མཐུན་པའི་ཚོགས་དང༌། ཚོགས་དང་མཐུན་པའི་ཡང་དག་པར་འགྲུབ་པ་དང༌། ཡང་དག་པར་འགྲུབ་པ་དང་མཐུན་པའི་འབྲས་བུ་དང༌། འབྲས་བུུ་དང་མཐུན་པའི་སེམས་ཅན་གྱི་དོན་དང༌། ཆེན་པོ་རྣམ་པ་བཅུ་གཅིག་པོ་འདི་དག་དང་ལྡན་པའི་ཕྱིར་བྱང་ཆུབ་སེམས་དཔའ་ལ་སེམས་དཔའ་ཆེན་པོ་ཞེས་བྱའོ། །ཞེས་སོ། །དེ་རྣམས་ཀྱིས་ནི་ཆེད་དང་ནི་ཞེས་པ་དེ་བཤད་ཟིན་ཏོ། ། ད་ནི་བསྒྲུབ་པ་བཤད་པར་བྱ་སྟེ། མདོ་སྡེའི་རྒྱན་ལས་གནས་རྩོམ་འབྲས་བུ་འབྱུང་བ་ཆེ་བདག་ཉིད། །རྒྱལ་སྲས་རྣམས་ཀྱི་བསྒྲུབ་པ་ཡིན་པར་འདོད། །རྟག་ཏུ་ལེན་པ་ཆེ་དང་བཟོད་བ་ཆེ། ། དོན་ཆེན་ཡང་དག་སྒྲུབ་པའི་བྱ་བ་བྱེད། །དེ་ལ་གནས་ཆེན་པོ་ནི། སེམས་བསྐྱེད་ལ་གནས་པའི་ཕྱིར་དེ་ནི་རྟག་ཏུ་སེམས་ཅན་ཐམས་ཅད་ཉེ་བར་ལེན་པའི་ཕྱིར། རྩོམ་པ་ཆེན་པོ་ནི་རང་བཞིན་གྱི་དོན་རྩོམ་པའི་ཕྱིར་དེ་ནི་སྡུག་བསྔལ་ཐམས་ཅད་དང་དུ་ལེན་པས་བཟོད་པ་ཆེ་བའི་ཕྱིར་རོ། ། འབྲས་བུ་འབྱུང་བ་ཆེ་བ་ནི། བྱང་ཆུབ་ཆེན་པོ་འཐོབ་པའི་ཕྱིར་དེ་ནི་སེམས་ཅན་མང་པོའི་དོན་ཆེ་ཡང་དག་བསྒྲུབ་པའི་བྱ་བ་བྱེད་པའི་ཕྱིར་རོ། །དེ་ལ་གོ་ཆ་དང༌། འཇུག་པ་དང༌། ཚོགས་དང་ངེས་པར་འབྱུང་བའི་བསྒྲུབ་པ་སྟེ། བཞི་ཡོད་པ་ལས། ༧༽གོ་སྒྲུབ་བཤད་པ། དང་པོ་གོ་ཆའི་སྒྲུབ་པ་ནི། སྦྱིན་པ་ལ་སོགས་རྣམས་དྲུག་ལ། །དེ་དག་སོ་སོར་བསྡུས་པ་ཡིས། གོ་ཆའི་བསྒྲུབ་པ་གང་ཡིན་ཏེ། །དྲུག་ཚན་དྲུག་གིས་ཇི་བཞིན་བཤད། །ཅེས་ལོ་ཙྪ་བ་རིན་ཆེན་བཟང་པོ་ལ་སོགས་པའི་འགྱུར་དུ་བྱུང་བ་འདི་ལྟར་ལེགས་སོ། །གོ་ཆའི་སྒྲུབ་པ་འདི་ནི་སེམས་བསྐྱེད་པ་ཉིད་ནས་རྩོམ་སྟེ། བསམ་པ་རྒྱ་ཆེ་བ་ཉིད་གཙོ་བོར་བྱུང་ཞིང༌། མདོ་སྡེ་རྒྱན་ལས་ཀྱང༌། གནས་ཆེན་པོ་སེམས་བསྐྱེད་པ་ལ་གནས་ཞེས་གསུངས་པའི་ཕྱིར་རོ། །མདོ་ལས་ཀྱང་སེམས་ཅན་ཉུང་ཟད་ཉི་ཚེ་བའི་དོན་དུ་བྱང་ཆུབ་ཀྱི་ཕྱིར་མི་སྤྱོད་ཅིང་སེམས་ཅན་ཐམས་ཅད་ཀྱི་དོན་དུ་ཕར་ཕྱིན་དྲུག་ལ་སྤྱོད་ཅེས་བསམ་པ་རྒྱ་ཆེན་བསྟན་པའི་ཕྱིར་རོ། །འཇུག་པའི་བསྒྲུབ་པ་ནི། སྦྱོར་ལམ་ཉིད་ནས་རྩོམ་སྟེ། སྐབས་འདིར་ཚེ་དང་ལྡན་པ་གང་བོས་ཞུ་བ་གསུམ་གསོལ་བ་ལས་དང་པོ་པའི་ལམ་གྱིས་གོ་སྒྲུབ་དང༌། ཕྱི་མ་གཉིས་ཀྱིས་འཇུག་སྒྲུབ་བསྟན་ལ། ཞུ་བ་བར་བ་ནི་ཐེག་པ་ཆེན་པོ་ལ་ཡང་དག་པར་ཞུགས་པ་ལགས། ཞེས་པ་ལ་གནོད་འཇོམས་ལས། ཞེས་བྱ་བ་ནི་མོས་པ་སྤྱོད་པའི་ས་ནས་བཟུང་སྟེ། ས་བདུན་བའི་བར་དུ་རྩོལ་བ་དང་བཅས་པ་རྣམ་པ་རྟོག་པ་དང་བཅས་པའི་སྤྱོད་པའི་གནས་སྐབས་ཡིན་པར་བསྟན་ཏོ། །ཞེས་སོ། །ཚོགས་ཀྱི་བསྒྲུབ་པ་ནི་ས་བཅུ་ལ་ཞུགས་པ་ཉིད་ཡིན་པར་མདོ་ལས་བྱུང་ངོ༌། །ངེས་འབྱུང་བསྒྲུབ་པ་ནི། ལྷ་མིར་བཅས་པའི་འཇིག་རྟེན་ཐམས་ཅད་ཟིལ་གྱིས་མནན་ནས་ཁམས་གསུམ་ནས་ངེས་པར་འབྱུང་ཞིང་རྣམ་མཁྱེན་དུ་གནས་ཞེས། མདོ་ལས་བྱུང་བའི་ཕྱིར། རྒྱུན་མཐའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་སྐད་ཅིག་མའི་སྦྱོར་བའི་རང་བཞིན་ནོ། །དེ་ལ་གོ་ཆའི་སྒྲུབ་པ་ཡང་བསམ་པ་དང་སྒྲུབ་པ་རྒྱ་ཆེ་བ་གཉིས་སུ་བསྟན་ཏེ། གནོད་འཇོམས་ལས། དེ་ལ་གོ་ཆ་བགོས་པ་ཡང་རྣམ་པ་གཉིས་སུ་བསྟན་ཏེ། སེམས་ཅན་ཐམས་ཅད་ཀྱི་དོན་ལ་བརྩོན་པར་བྱ་བའི་ཕྱིར་བསམ་པ་རྒྱ་ཆེ་བ་དང༌། སྒྲུབ་པ་གཅིག་གིས་བསྒྲུབ་པ་ཐམས་ཅད་ཡོངས་སུ་རྫོགས་པར་བྱེད་པས་བསྒྲུབ་པ་རྒྱ་ཆེ་བའོ། །ཞེས་གསུངས་སོ། །བསམ་པ་རྒྱ་ཆེན་པོས་ཀུན་ནས་བསླང་བའི་བསྒྲུབ་པ་རྒྱ་ཆེན་པོ་ཡང་ཕ་རོལ་ཏུ་ཕྱིན་པ་གཅིག་གི་ནང་དུ། ཕ་རོལ་ཏུུ་ཕྱིན་པ་ཐམས་ཅད་རྫོགས་པར་བསྒྲུབ་པ་ནི། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་རྣམ་པ་དྲུག་ལ་སྦྱིན་པའི་སྦྱིན་པ་ལ་སོགས་པ་རེ་རེ་ལ་ཡང་དྲུག་དྲུག་ཡོད་པ་རྣམས། དེ་དག་རང་རང་སོ་སོར་བསྡུས་པ་ཡིས་གོ་ཆའི་བསྒྲུབ་པ་གང་ཡིན་པ་དེ་ཕ་རོལ་ཏུ་ཕྱིན་པ་དྲུག་ཚན་པ་དྲུག་གིས་མདོ་ལས་གསུངས་པ་ཅི་ལྟ་བ་བཞིན་དུ་བཤད་པར་བྱ་བ་ཡིན་ནོ། །འདི་དང་རྩེ་སྦྱོར་མཐོང་ལམ་གྱི་སྐབས་སུ་བྱུང་བ་ནི་སྡུད་ཚུལ་མི་གཅིག་སྟེ། འདིར་སོ་སོར་བསྡུས་པ་ཡིན་ལ། དེར་ནི་ཕན་ཚུན་བསྡུས་པ་ཡིན་པའི་ཕྱིར་རོ། །དེ་རྣམས་ཀྱིས་ནི་གོ་ཆ་ཞེས་པ་དེ་བཤད་ཟིན་ཏོ། ། ༨༽འཇུག་པའི་སྒྲུབ་པ་བཤད་པ། ད་ནི་འཇུག་པའི་སྒྲུབ་པ་བཤད་པ་ནི། བསམ་གཏན་གཟུགས་མེད་སྦྱིན་སོགས་དང༌། །ལམ་དང་བྱམས་ལ་སོགས་པ་དང༌། །དམིགས་པ་མེད་དང་ལྡན་པ་དང༌། །འཁོར་གསུམ་རྣམ་པར་དག་པ་དང༌། །ཆེད་དུ་བྱ་དང་མངོན་ཤེས་དྲུག །ཅེས་པ་རྣམས་ཀྱིས་བསྒྲུབ་པའི་ངོ་བོ་སྟོན་ཏོ། །རྣམ་ཀུན་མཁྱེན་པའི་ཚུལ་ལ་ནི། །འཇུག་པའི་བསྒྲུབ་པ་ཞེས་པས་ཡུལ་གང་ལ་འཇུག་པ་སྟོན་ནོ། །ཐེག་ཆེན་ལ། འཇོག་པ་ཡིན་པར་ཤེས་པར་བྱ། ཤེས་པས་བསྒྲུབ་པ་འདིའི་བྱེད་ལས་སྟོན་པ་ཡིན་ནོ། ། དེ་ལ་བྱང་ཆུབ་སེམས་དཔའི་སྦྱིན་སོགས་ཕར་ཕྱིན་དྲུག་ལ་སྤྱོད་པའི་ཚེ་བསམ་གཏན་བཞི་པ་ཚད་མེད་བཞི་གཟུགས་མེད་བཞི་སྙོམས་པར་འཇུག་ཅིང་ལྡང་བ་ན། དགེ་བ་དེ་དག་སེམས་ཅན་ཐམས་ཅད་དང་ཐུན་མོང་དུ་བྱས་ནས་བླ་ན་མེད་པའི་བྱང་ཆུབ་ཏུ་བསྔོ་བ་ནི་བསམ་གཏན་གཟུགས་མེད་ཀྱི་འཇུག་པའི་སྒྲུབ་པ་དང༌། བསམ་གཏན་ཚད་མེད་གཟུགས་མེད་ལ་སྙོམས་པར་འཇུག་པ་ཉིད་ཀྱིས་ངང་ནས་ཕར་ཕྱིན་དྲུག་རྫོགས་པར་བྱེད་པ་ནི་སྦྱིན་སོགས་ཀྱི་འཇུག་པའི་སྒྲུབ་པ་དང༌། དྲན་པ་ཉེར་བཞག་ནས་མ་འདྲེས་བཅོ་བརྒྱད་ཀྱི་བར་དག་བསྒོམ་པ་ནི་ལམ་འཇུག་པའི་བསྒྲུབ་པ་དང༌། སེམས་ཅན་ཐམས་ཅད་སྐྱབ་པར་གཞོལ་བ་བྱམས་པའི་ཏིང་ངེ་འཛིན་དང༌། སེམས་ཅན་ལ་སྙིང་བརྩེ་བར་གཞོལ་བ་སྙིང་རྗེའི་ཏིང་ངེ་འཛིན་དང༌། སེམས་ཅན་ཐམས་ཅད་ལ་དགྲོལ་པར་བྱའོ། །ཞེས་གཞོལ་བ་དགའ་བའི་ཏིང་ངེ་འཛིན་དང་སེམས་ཅན་གྱི་ཟག་པ་ཟད་པར་བྱ་བ་ལ་གཞོལ་བ་བཏང་སྙོམས་ཀྱི་ཏིང་ངེ་འཛིན་ནི་བྱམས་པ་ལ་སོགས་པའི་འཇུག་པའི་སྒྲུབ་པ་དང༌། ནང་སྟོང་པ་ཉིད་ལ་སོགས་པའི་ཆོས་ཐམས་ཅད་ལ་དམིགས་པའི་འཇུག་པ་མེད་པ་དང་ལྡན་པའི་ཚུལ་གྱིས་ཆོས་ཐམས་ཅད་ཤེས་པ་དང༌། འཁོར་གསུམ་རྣམ་པར་དག་པའི་ཕར་ཕྱིན་དྲུག་དང༌། འདི་གནོད་འཇོམས་ལས་ས་བརྒྱད་པའི་ཕར་ཕྱིན་དྲུག་ཏུ་གསུངས་སོ། །སྐབས་འདིའི་ཆེད་དུ་བྱ་བ་ནི་བསྒོམ་པ་རྣམ་པར་བསྒོམ་པའི་ཆེད་དུ་བྱ་བ་ནི་མི་དམིགས་པའི་ཚུལ་གྱིས་ནང་སྟོང་པ་ཉིད་ནས་མ་འདྲེས་པའི་པར་དག་བསྒོམ་པ་ཡིན་ནོ། །བསྒོམ་པ་ནི་དམིགས་པའི་བསྒོམ་པ་ཐམས་ཅད་གཞིག་པའི་དོན་ཡིན་པའི་ཕྱིར་བསྒོམ་པ་རྣམ་པར་གཞིག་པའི་ཆེད་དུ་ཞེས་པའི་དོན་ཏོ། །མངོན་ཤེས་རྣམས་རྫོགས་པའི་ཕྱིར་སེམས་དང་བོ་བསྐྱེད་པ་ནས་བཟུང་སྟེ། བྱང་ཆུབ་སྙིང་པོའི་བར་ཏུ་སེམས་ཅན་སྨིན་པར་བྱེད་པ་དང༌། སངས་རྒྱས་ལ་མཆོད་པ་བྱེད་པ་ནི་མངོན་ཤེས་དྲུག་གི་འཇུག་པའི་བསྒྲུབ་པ་སྟེ། དེ་ཡན་ཆད་ནི་སྒྲུབ་པའི་ངོ་བོ་ཡིན་ནོ། ། འཇུག་པའི་བསྒྲུབ་པ་ཞེས་པའི་རྒྱུ་ཅི་ཞེ་ན། རྣམ་ཀུན་མཁྱེན་པའི་ཚུལ་དེ་ཆོས་ཐམས་ཅད་དངོས་པོའི་ངོ་བོ་ཉིད་མེད་པ་ལ་སློབ་ཅིང་འཇུག་པའི་བསྒྲུབ་པ་ཡིན་པའི་ཕྱིར་རོ། །ལ་ལས་ཅི་ཞིག་བྱེད་པར་ཤེས་པར་བྱ་ཞེ་ན། ཐེག་ཆེན་ལ་འཇོག་པ་ཡིན་པར་ཤེས་པར་བྱའོ། །ཁྲི་བརྒྱད་སྟོང་པ་ལས་དེ་ཐེག་པ་ཆེན་པོ་དེ་ལ་ཞོན་ཏེ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་སངས་རྒྱས་ཀྱི་ཞིང་དག་པར་བྱེད། སེམས་ཅན་ཡོངས་སུ་སྨིན་པར་བྱེད་ཅེས་གསུངས་སོ། །མདོ་ལས་ཞེས་པར་འབྱུང་ཞིང་འདིར་འཛེགས་ཅེས་པར་འབྱུང་ངོ༌། །དེ་རྣམས་ཀྱིས་ནི་འཇུག་པར་བྱ་བ་དང་ཞེས་པ་དེ་བཤད་ཟིན་ཏོ། ། ༩༽ཚོགས་ཀྱི་སྒྲུབ་པ་བཤད་པ། ད་ནི་ཚོགས་ཀྱི་སྒྲུབ་པ་བཤད་པ་ནི། ཚོགས་སྒྲུབ་ཀྱི་ངོ་བོ་དང་ཚོགས་སྒྲུབ་ལ་ཞུགས་པ་དང༌། ཚོགས་སྒྲུབ་ཀྱི་བྱེད་ལས་དེ་གསུམ་མོ། །བརྩེ་དང་སྦྱིན་ལ་སོགས་པ་དྲུག །ཞི་གནས་ལྷག་མཐོང་བཅས་པ་དང༌། །ཟུང་དུ་འབྲེལ་པའི་ལམ་གང་དང༌། །ཐབས་ལ་མཁས་པ་གང་ཡིན་དང༌། །ཡེ་ཤེས་དང་ནི་བསོད་ནམས་དང༌། ལམ་དང་གཟུངས་དང་ཞེས་པ་ནི་ཚོགས་སྒྲུབ་ཀྱི་ངོ་བོ་བསྟན་ཏོ། ། ས་བཅུ་དང་ཞེས་པས་ཚོགས་བསྒྲུབ་ལ་ཞུགས་པ་བསྟན་ཏོ། །གཉེན་པོ་ཞེས་པས་ཚོགས་སྒྲུབ་ཀྱི་བྱེད་ལས་སྟོན་ནོ། ། ཚོགས་ཀྱི་སྒྲུབ་པའི་རིམ་པ་ཡིན་པར་ཤེས་པར་བྱ། ཞེས་པས་ཚོགས་སྒྲུབ་སྟོན་པའི་ཆོས་དེ་དག་མདོ་ལས་འབྱུང་བའི་རིམ་པ་ཡིན་པར་སྟོན་ནོ། །རབ་འབྱོར་གྱིས་གོ་ཆ་ཆེན་པོ་བགོས་ཞེས་བྱ་བགྱི་ན། ཅི་ཙམ་གྱིས་གོ་ཆ་ཆེན་པོ་བགོས་པ་ལགས། ཞེས་གསོལ་བ་ནས། ཆོས་ཐམས་ཅད་མི་དམིགས་པའི་ཚུལ་གྱིས་ཐེག་པ་ཆེན་པོས་རྣམ་པ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་རོ། །ཞེས་པའི་བར་གྱི་མདོ་ཚོགས་ཀྱི་སྒྲུབ་པ་རིལ་སྟོན་པ་ཡིན་ནོ། །གོ་ཆ་བགོས་པ་རྣམས་ཀྱི་ནང་ནས་རྣམ་པར་སྨིན་པ་ལས་བྱུང་བའི་རྫུ་འཕྲུལ་གྱི་ཕྱོགས་བཅུའི་ངན་འགྲོ་ཞི་བར་བྱེད་བ་སྒྱུ་མ་ལྟ་བུ་ནི་བརྩེ་བ་དང་སྒྱུ་མའི་ཆོས་ཉིད་ཉེ་བར་བཟུང་ནས་ཕར་ཕྱིན་དྲུག་ལ་རང་ཉིད་གནས་དེ་གཞན་ཡང་དེ་དག་ལ་འགོད་བ་སྒྱུ་མ་ལྟ་བུ་ནི་སྦྱིན་པ་ལ་སོགས་པ་དྲུག་དང༌། རྣམ་མཁྱེན་དང་ལྡན་པའི་སེམས་རྩེ་གཅིག་པས་གནས་ཤིང་སྒྱུ་མའི་ཆོས་ཉིད་བཟུང་ནས་ཕྱོགས་བཅུའི་སེམས་ཅན་གྱི་སྦྱིན་སོགས་ལ་འགོད་པ་སྒྱུ་མ་ལྟ་བུ་ནི། ཞི་གནས་དང༌། རྒྱུ་མའི་ཆོས་ཉིད་སྒྲུབ་པ་ཡོངས་གྲུབ་ཀྱི་གཟུགས་སོགས་དེ་ཀུན་བཏགས་པའི་ངོ་བོ་དངོས་པོའི་གཟུགས་སོགས་ཀྱིས་སྟོང་པའི་ཡེ་ཤེས་ནི་ལྷག་མཐོང་སྟེ། དེ་དང་བཅས་པ་དང༌། བྱང་ཆུབ་སེམས་དཔའ་གང་གི་དོན་དུ་གོ་ཆ་བགོས་པའི་རྣམ་མཁྱེན་དེ་འགའ་ཞིག་གིས་བྱས་པ་འམ་བཤིག་པ་འམ་མངོན་པར་འདུ་བྱས་པ་ཞིག་ཡིན་ན་བཅིངས་གྲོལ་ཏུ་འགྱུར་བ་ལས་བྱེད་པ་པོ་གཏན་མེད་ཅིང་མི་དམིགས་པའི་ཕྱིར་ཡོངས་གྲུབ་གྱི་གཟུགས་སོགས་མ་བཅིངས་མ་གྲོལ་བར་མཐོང་བའི་ཡེ་ཤེས་ནི། ཞི་ལྷག་གམ་ཐབས་ཤེས་ཟུང་དུ་འབྲེལ་པའི་ལམ་གང་ཡིན་པ་དེ་ཉིད་ཡིན་ནོ། །བརྩེ་བ་ནས་འདིའི་བར་དུ་བྱང་ཆུབ་སེམས་དཔའི་གོ་ཆ་བགོས་པ་དང་ཐབས་མཁས་ནས་གཟུངས་ཀྱི་བར་དུ་བྱང་ཆུབ་སེམས་དཔའི་ཐེག་ཆེན་ཞེས་པར་མདོ་ལས་བྱུང་བ་ནི་ཚོགས་སྒྲུབ་ཀྱི་ངོ་བོ་ཡིན་ནོ། །སྐབས་འདིར་རབ་འབྱོར་གྱིས་བྱང་ཆུབ་སེམས་དཔའི་ཐེག་ཆེན་ནི་གང༌། ཅི་ཙམ་གྱིས་ན་ཐེག་ཆེན་ལ་ཞུགས་པ་ཐེག་པ་དེ་གང་ནས་ངེས་པར་འབྱུང༌། ཐེག་པ་དེ་གང་དུ་གནས། ཐེག་པ་དེས་སུ་ཞིག་ངེས་པར་འབྱུང་བ་ལགས། ཞེས་ཞུ་བ་ལྔ་གསོལ་པ་ལ། དང་པོའི་ལན་གྱིས། ཐབས་མཁས་ནས་གཟུངས་ཀྱི་བར་དང༌། གཉིས་པའི་ལན་གྱིས་ས་བཅུ་དང༌། ལྷག་མ་གསུམ་པོའི་ལན་གྱིས་གཉེན་པོ་གསུངས་སོ། །དེ་ལ་མི་དམིགས་པའི་ཚུལ་གྱིས་ཕར་ཕྱིན་དྲུག་ལ་རང་ཉིད་གནས་ཤིང་གཞན་ཡང་འགོད་པ་ནི་ཐབས་ལ་མཁས་པ་གང་ཡིན་དང༌། ཡེ་ཤེས་དང་ནི་ཞེས་པ་ནི་ནང་སྟོང་པ་ཉིད་ལ་སོགས་པའི་སྟོང་པ་ཉིད་རྣམས་ཡིན་ཏེ། མདོ་ལས། སྟོང་ཉིད་འདི་རྣམས་ཀྱི་ངོ་བོ་ཐེག་ཆེན་ཡིན་པར་གསུངས་ཤིང་བསྟན་ཆོས་འདིར་ཡེ་ཤེས་ཡིན་པར་གསུངས་པའི་ཕྱིར་སྟོང་པ་ཉིད་རྣམས་ཀྱི་ངོ་བོ་རང་སྟོང་དུ་འདོད་ན་སྟོང་པའི་གཞི་གང་ཡིན་དེ་ངོས་མ་ཟིན་པའི་ཕྱིར་རྒྱལ་བ་སྲས་བཅས་ཀྱི་དགོངས་པ་དང་འགལ་ལོ། །འཕགས་པ་ཀླུ་གྲུབ་ཀྱི་ཞལ་སྔ་ནས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང༌། །དེ་དག་ཀུན་གྱིས་ཉོན་མོངས་ལྡོག། ཁམས་དེ་ཉམས་པར་བྱེད་མ་ཡིན། །ཞེས་གསུངས་པ་ནི་སྟོང་ཉིད་སྟོན་པའི་མདོ་རྒྱུད་ཐམས་ཅད་ཀྱི་དགོངས་པ་ཕྱིན་ཅི་མ་ལྡོག་པ་ཡིན་པས་འདི་ལྟར་གོ་དགོས་སོ། །དངོས་པོས་སྟོང་པར་སྟོན་པའི་མདོ་རྣམས་ཀྱི་དངོས་པོར་འཛིན་པའི་ཉོན་མོངས་ལྡོག་པར་བྱེད་ཀྱི། ཁམས་རང་བཞིན་གྱིས་དག་པའི་དེ་བཞིན་ཉིད་དེ་ཉམས་པ་འགོག་པར་བྱེད་པ་ནི་མ་ཡིན་ཏེ། སྟོང་པའི་གཞི་དེ་ཆོས་དབྱིངས་དམ་པ་ཟད་མི་ཤེས་པའི་ངོ་བོར་གཏན་ཏུ་ཡོད་པའི་ཕྱིར་རོ།། དེས་ནི་རིམ་པ་ལྟར་སྒྲོ་སྐུར་བསལ་བ་ཡིན་ནོ། །དཀོན་བརྩེགས་ལས་ཀྱང༌། འོད་སྲུང་གང་ཟག་ཏུ་ལྟ་བ་ནི་རི་རབ་ཙམ་ལ་གནས་པ་ནི་བླའི། མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །ཞེས་དང༌། དཔེར་ན་སྨན་པས་ནད་ནི་བསལ་བའི་ཕྱིར། །མི་ཞིག་ལ་ནི་བཀྲུ་སྨན་བཏང་པ་ལས། །ནད་རྣམས་བསྐྱོད་དེ་འཁྲུས་པར་མ་གྱུར་ན། དེ་ཡི་གཞི་ལས་ནད་ནི་སོས་མི་འགྱུར། །དེ་བཞིན་ལྟ་བའི་ཐིབས་པོར་གནས་པ་ལས། །འབྱུང་བའི་མཆོག་ནི་སྟོང་པ་ཉིད་ཡིན་ན། ། གང་ཞིག་སྟོང་པ་ཁོ་ནར་ལྟ་གྱུར་པ། དེ་ནི་གསོར་མི་རུང་ཞེས་རྒྱལ་བས་གསུངས་ཞེས་སོ། ། མདོ་ཉིད་ཀྱི་དགོངས་པ་འཕགས་པ་ཀླུ་གྲུབ་ཀྱིས་གསུངས་པ་ཡང༌། རྒྱལ་བ་རྣམས་ཀྱིས་སྟོང་པ་ཉིད། ། ལྟ་ཀུན་ངེས་པར་འབྱུང་བར་གསུངས། །གང་དག་སྟོང་པ་ཉིད་ལྟ་བ། །དེ་དག་སྒྲུབ་ཏུ་མེད་པར་གསུངས། །ཞེས་སོ། །དངོས་པོར་ལྟ་བའི་ཐིབས་པོར་གནས་པ་ལས་བྱུང་བ་མཆོག་ནི་སྟོང་པ་ཉིད་ཡིན་ན། སྟོང་པའི་གཞི་དེ་བཞིན་ཉིད་ཀྱང་རི་བོང་གི་རྭ་བཞིན་སྟོང་པ་ཁོ་ནར་ལྟ་ན་གསོར་མི་རུང་ཞེས་པའི་དོན་ཏོ། །སྟོང་ཉིད་བག་ཆགས་གོམས་པ་ཡིས། །དངོས་པོའི་བག་ཆགས་སྤོང་འགྱུར་ཞིང༌།། ཅི་ཡང་མེད་ཅེས་གོམས་པ་ཡིས། །དེ་ཡང་ཕྱི་ནས་སྤོང་པར་འགྱུར། །ཞེས་པ་འདི་ཡིན་ནོ། །གང་དུ་དངོས་པོར་འཛིན་པ་ཡི། །རྣམ་རྟོག་སྣང་བ་དེར་སྟོང་ཉིད་མེད་པའི་ཕྱིར་སྟོང་པ་ཉིད་ཀྱི་དོན་ནི་དངོས་པོ་མེད་པ་ཉིད་ཡིན་ཏེ། འཕགས་པ་ཀླུ་གྲུབ་ཀྱི་ཞལ་སྔ་ནས། དངོས་པོ་ཞེས་བྱ་རྣམ་རྟོག་ཡིན། །རྣམ་རྟོག་མེད་པ་སྟོང་ཉིད་ཡིན། གང་དུ་རྣམ་རྟོག་སྣང་འགྱུར་བ། །དེར་ནི་སྟོང་ཉིད་ག་ལ་ཡོད། །ཅེས་སོ། །འོ་ན་སྐབས་འདིའི་སྟོང་ཉིད་རྣམས་ཡེ་ཤེས་ཡིན་པའི་ཕྱིར་དངོས་པོ་མེད་པར་འགལ་ལོ། །ཞེ་ན། མ་ཡིན་ཏེ་ཐམས་ཅད་རྨི་ལམ་ལྟ་བུར་དངོས་པོ་མེད་པ་ཡིན་ཡང་དངོས་པོར་ཞེན་པའི་བག་ཆགས་ཀྱིས་ཟིན་པའི་རྣམ་རྟོག་རྣམས་ཀྱིས་བེམ་པོ་དང་རིག་པ་ལ་སོགས་པ་དེ་དང་དེའི་དངོས་པོར་མེད་བཞིན་དུ་དེ་དང་དེའི་དངོས་པོར་ཞེན་པ་ཙམ་ཡིན་པའི་ཕྱིར། ཡེ་ཤེས་དང་རིག་པ་དང་སེམས་ཡིན་པ་ལ་དངོས་པོས་མི་ཁྱབ་སྟེ། སྐད་ཅིག་རང་བྲལ་བའི་ཡེ་ཤེས་ཡོད་པའི་ཕྱིར་རོ། །ཇི་སྐད་དུ། སྐད་ཅིག་གཅིག་དང་དུ་མ་དང་བྲལ་བའི་ཡེ་ཤེས་ནི་རྒྱལ་བ་རྣམས་ཀྱིས་དེ་ཁོ་ན་ཉིད་ཅེས་གསུངས་སོ། །ཞེས་རྗེ་བཙུན་སྦྱན་རས་གཟིགས་ཀྱིས་གསུངས་པའི་ཕྱིར་རོ། །དེས་ན་ཆོས་ཀྱི་དབྱིངས་ཉིད་ཡེ་ཤེས་དང་རིག་པ་དང་སེམས་དང་ཤེར་ཕྱིན་དང་སྟོང་པ་ཉིད་དང་མཚན་མ་མེད་པ་དང། སྨོན་པ་མེད་པ་དང༌། སྐྱེ་བ་མེད་པ་དང༌། འགག་པ་མེད་པ་དང༌། འདུས་མ་བྱས་པ་དང༌། རྣམ་ཀུན་མཆོག་ལྡན་གྱི་སྟོང་པ་ཉིད་དུ་མདོ་རྒྱུད་ཐམས་ཅད་དུ་གསུངས་པ་ཡིན་ནོ། །རིགས་པས་དཔྱད་ན་ཅིར་ཡང་མ་གྲུབ་ཙམ་གྱི་སྟོང་ཉིད་ནི་སྙིང་པོ་མེད་པའི་ཕྱིར། ཡེ་ཤེས་དང་ཐེག་ཆེན་མ་ཡིན་ཏེ། འཕགས་པ་འཇམ་དཔལ་གྱིས་མཛད་པའི་རང་གི་ལྟ་བའི་འདོད་པ་མདོར་བསྟན་ལས། ཇི་སྐད་དུ། ཕུང་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་ལྟར་འགྱུར་མ་ཡིན། །ཞེས་རྗེ་བཙུན་འཇམ་དབྱངས་མགོན་གྱིས་གསུངས་པའི་ཕྱིར་རོ། །དེས་ན་ཤེས་བྱ་ཐམས་ཅད་དཔྱད་ན་ཅིར་ཡང་མ་གྲུབ་ཙམ་དུ་བྱས་རང་སྟོང་དེ་ཉིད་དེ་བཞིན་ཉིད་དུ་སྨྲས་པ་ནི་འཁྲུལ་ཏོ། །རང་བཞིན་གསུམ་གྱི་སྒོ་ནས་ཆོས་ཉིད་ཡིན་པའི་སྟོང་ཉིད་གཅིག་དང་མ་ཡིན་པའི་སྟོང་ཉིད་གཉིས་ཤེས་དགོས་པའི་ཕྱིར་རོ། །ཇི་སྐད་དུ། མེད་པའི་སྟོང་པ་ཉིད་ཤེས་ཤིང༌། །དེ་བཞིན་ཡོད་མིན་སྟོང་ཉིད་དང༌། །རང་བཞིན་སྟོང་པ་ཉིད་ཤེས་ན། ། སྟོང་པ་ཤེས་པ་ཞེས་བཤད་དོ། །ཞེས་རྗེ་བཙུན་བྱམས་མགོན་གྱིས་གསུངས་ཀྱི། རང་རང་ངོ་བོས་སྟོང་ཤེས་ན། །སྟོང་པ་ཤེས་པ་ཞེས་བཤད་དོ། །ཞེས་ནི་མ་གསུངས་པའི་ཕྱིར་རོ། །དངོས་པོ་ཐམས་ཅད་ཀུན་བཏགས་ཡིན་པའི་ཕྱིར་དཔྱད་ན་ཅིར་ཡང་མེད་པའི་སྟོང་པ་ཉིད་དང༌། གཞན་དབང་ནི་ཇི་ལྟར་སྣང་བ་དེ་བཞིན་གྱིས་དངོས་པོར་མ་གྲུབ་པས་རྒྱུ་མ་ལྟ་བུར་སྣང་བ་ཙམ་དུ་ཟད་པའི་སྟོང་པ་ཉིད་དང་ཡོང་གྲུབ་ནི་གདོད་ནས་དངོས་པོས་གོས་པ་མེད་པའི་ཕྱིར་རང་བཞིན་སྟོང་པ་ཉིད་དེ། །སྔ་མ་གཉིས་ནི་སྟོང་པ་ཉིད་ཡིན་ཡང་དེ་བཞིན་ཉིད་མ་ཡིན་ཏེ། ཀུན་བཏགས་ནི་གཞི་ནས་མ་གྲུབ་ཀྱང་ཀུན་རྫོབ་ཏུ་དངོས་པོར་ཞེན་པའི་ཡུལ་ཡིན་པའི་ཕྱིར་ཤེས་པར་བྱ་བ་དང༌། གཞན་དབང་ནི་མེད་བཞིན་དུ་དངོས་པོར་འཁྲུལ་པའི་བློ་ཡིན་པའི་ཕྱིར་སྤང་བྱ་དང༌། ཡོངས་གྲུབ་ནི་དྲི་མ་སྦྱང་བར་བྱ་བའི་གཞི་ཡིན་པའི་ཕྱིར་རོ། །དེས་ན་ཡོངས་གྲུབ་པའི་ངོ་བོ་རང་བཞིན་སྟོང་པ་ཉིད་ནི་དེ་བཞིན་ཉིད་དང༌། ཡང་དག་པའི་མཐའ་དང༌། མཚན་མ་མེད་པ་དང༌། དོན་དམ་པ་དང༌། ཆོས་ཀྱི་དབྱིངས་དང༌། བྱང་ཆུབ་ཀྱི་སེམས་ལ་སོགས་པའི་རྣམ་གྲངས་སུ་བསྟན་ཏེ། བྱམས་པ་མགོན་པོའི་ཞལ་སྔ་ནས། སྟོང་པ་ཉིད་ནི་མདོར་བསྡུས་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་པ་དོན་དམ་དང༌། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་ཉིད། །བྱང་ཆུབ་སེམས་མཆོག་དེ་ཉིད་དང༌། །སྟོང་པ་ཉིད་དུའང་བཤད་པ་ཡིན། །ཞེས་སོ། །དེས་ན་སྐབས་འདིའི་སྟོང་ཉིད་ཀྱི་ངོ་བོ་ནི་ཐེག་ཆེན་དང༌། ཡེ་ཤེས་ཡིན་པའི་ཕྱིར་གཞན་སྟོང་ཟབ་མོ་ཡིན་གྱི། དཔྱད་ན་མ་གྲུབ་ཙམ་གྱི་རང་སྟོང་ནི་མ་ཡིན་ཏེ། འདིའི་སྐབས་ཀྱི་མདོ་ཉིད་ལས། ངོ་བོ་ཉིད་ཅེས་བྱ་བ་ནི་ཕྱིན་ཅི་མ་ལོག་པའི་རང་བཞིན་དེ། སྟོང་པ་ཉིད་གང་ཡིན་པ་དེ་ནི་ཤེས་པས་མ་བྱས་མཐོང་བས་མ་བྱས་པས་ན། དེ་ནི་ངོ་བོ་ཉིད་སྟོང་པ་ཉིད་ཅེས་བྱའོ། །དེ་ལ་གཞན་གྱི་དངོས་པོ་སྟོང་པ་ཉིད་གང་ཞེ་ན། དེ་བཞིན་གཤེགས་པ་རྣམས་བྱུང་ཡང་རུང༌། མ་བྱུང་ཡང་རུང༌། ཆོས་གནས་པ་ཉིད་དང༌། ཆོས་ཉིད་དང༌། ཆོས་ཀྱི་དབྱིངས་དང༌། ཆོས་སྐྱོན་མེད་པ་ཉིད་དང༌། དེ་བཞིན་ཉིད་དང༌། མ་ནོར་བ་དེ་བཞིན་ཉིད་དང༌། གཞན་མ་ཡིན་པ་དེ་བཞིན་ཉིད་དང༌། ཡང་དག་པའི་མཐའ་དེ་ནི་གནས་ཉིད་དེ། དེ་ལྟར་གཞན་གྱིས་སྟོང་པ་གང་ཡིན་པ་དེ་ནི་གཞན་གྱི་དངོས་པོ་སྟོང་པ་ཉིད་ཅེས་བྱའོ། ། རབ་འབྱོར་དེ་ནི་བྱང་ཆུབ་སེམས་དཔའི་ཐེག་པ་ཆེན་པོ་ཡིན་ནོ། །ཞེས་ཁྲི་བརྒྱད་སྟོང་པ་ལས་གསུངས་པའི་ཕྱིར་རོ། །དེ་དག་གི་འགྲེལ་པར་དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། ཆོས་རྣམས་ཀྱི་ཀུན་བཏགས་པའི་གནས་སྐབས་ཡོངས་སུ་སྤོངས་པའི་ལྷག་མ་ཡོངས་སུ་གྲུབ་པའི་གནས་སྐབས་ནི་ཤེས་པ་དང་མཐོང་བའི་ངོ་བོ་ཡིན་པའི་ཕྱིར་དེ་སྐད་ཅེས་བྱའོ། །དེ་ལ་ཤེས་པའི་སྟོང་པ་ཉིད་གང་ཡིན་པ་དེ་ནི་ཤེས་པས་མ་བྱས་ལ་མཐོང་བའི་སྟོང་པ་ཉིད་གང་ཡིན་པ་དེ་ཡང་མཐོང་བས་མ་བྱས་དེ། དེ་ལྟ་བས་ན་ངོ་བོ་ཉིད་དེ་གཉིས་ཀྱི་སྟོང་པ་ཉིད་ནི་རང་བཞིན་ཡིན་པས་ངོ་བོ་ཉིད་སྟོང་པ་ཉིད་ཅེས་བྱའོ། །དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཞེས་བྱ་བ་ནི་གནས་པའི་མཚན་ཉིད་དེ་བཞིན་ཉིད་ཆོས་ཉིད་གང་ཡིན་པ་དེ༌། དེ་བཞིན་གཤེགས་པ་ལ་སོགས་པ་ཕ་རོལ་གཞན་གྱིས་བྱས་པ་མ་ཡིན་པའི་ཕྱིར་བྱེད་པ་པོ་གཞན་མེད་པ་ལ་གཞན་གྱི་དངོས་པོ་སྟོང་པ་ཉིད་ཅེས་བྱའོ། །ཞེས་གསུངས་སོ། །སྟོང་པ་ཉིད་ཀྱི་དོན་ནི་འདིར། དགག་བྱ་དངོས་པོས་སྟོང་བའི་གཞི་ཡིན་པའི་ཕྱིར་ཆོས་ཐམས་ཅད་སྟོང་པ་ཉིད་དུ་སྨྲ་བ་དངོས་སྨྲའི་སྐྱོན་གྱིས་ནམ་ཡང་མ་གོས་པ་དབུ་མ་པ་ཆེན་པོ་དབྱིག་གཉེན་གྱི་དགོངས་པ་ནི། ཤེས་པ་དང་མཐོང་བའི་སྟོང་པ་ཉིད་ནི་རང་རང་གིས་རང་བཞིན་ཡིན་གྱིས་རང་རང་གིས་གསར་དུ་བྱས་པ་མ་ཡིན་པ་དང༌། ཆོས་ཀྱི་དབྱིངས་ནམ་མཁའ་ལྟར་རྟག་ཏུ་གནས་པའི་ངོ་བོ་ཡིན་པའི་ཕྱིར། ཆུའི་གནས་པ་འོག་གཞིས་བྱས་པ་ལྟར་བྱེད་པ་པོ་གཞན་གྱིས་གནས་པར་མ་བྱས་ཞེས་པའི་དོན་ཏོ། །སྟོང་པ་ཉིད་ཀྱི་གྲངས་ཀྱང་མདོ་ཉིད་ལས་བཅོ་བརྒྱད་གསུངས་པ་འདི་ལྟ་སྟེ། རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་ཆེན་པོ་ནི། ནང་སྟོང་པ་ཉིད་དང༌། ཕྱི་སྟོང་པ་ཉིད་དང་ཕྱི་ནང་སྟོང་པ་ཉིད་དང༌། སྟོང་པ་ཉིད་སྟོང་པ་ཉིད་དང༌། ཆེན་པོ་སྟོང་པ་ཉིད་དང༌། དོན་དམ་པ་སྟོང་པ་ཉིད་དང༌། འདུས་བྱས་སྟོང་པ་ཉིད་དང༌། འདུས་མ་བྱས་སྟོང་པ་ཉིད་དང༌། མཐའ་ལས་འདས་པ་སྟོང་པ་ཉིད་དང༌། ཐོག་མ་དང་ཐ་མ་མེད་པ་སྟོང་པ་ཉིད་དང༌། དོར་བ་མེད་པ་སྟོང་པ་ཉིད་དང༌། རང་བཞིན་སྟོང་པ་ཉིད་དང༌། རང་གི་མཚན་ཉིད་སྟོང་པ་ཉིད་དང༌། ཆོས་ཐམས་ཅད་སྟོང་པ་ཉིད་དང༌། མི་དམིགས་པ་སྟོང་པ་ཉིད་དང༌། དངོས་པོ་མེད་པ་སྟོང་པ་ཉིད་དང༌། ངོ་བོ་ཉིད་སྟོང་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་ཡིན་ནོ། །ཞེས་སོ། །འདི་རྣམས་ཀྱི་དོན་ནི། རྗེ་བཙུན་བྱམས་མགོན་གྱི་ཞལ་སྔ་ནས། ཟ་བ་བཟའ་དང་དེ་ཡི་ལུས། །གནས་ཀྱི་གཞི་ཡི་སྟོང་པ་ཉིད། །དེ་ཡང་གང་གིས་ཇི་ལྟར་མཐོང༌། །གང་ཕྱིར་དེ་ཡང་སྟོང་པ་ཉིད། །དགེ་གཉིས་ཐོབ་པར་བྱ་བའི་ཕྱིར། །རྟག་ཏུ་སེམས་ཅན་ཕན་བྱའི་ཕྱིར། ། འཁོར་བ་གཏང་བར་མི་བྱའི་ཕྱིར། །དགེ་བ་མི་ཟད་བྱ་བའི་ཕྱིར། རིགས་ཀྱང་རྣམ་པར་དག་བྱ྄འི་ཕྱིར། །མཚན་དང་དཔེ་བྱད་ཐོབ་བྱའི་ཕྱིར། །སངས་རྒྱས་ཆོས་རྣམས་དག་བྱའི་ཕྱིར། །བྱང་ཆུབ་སེམས་དཔའ་སྒྲུབ་པར་བྱེད། །ཅེས་སྟོང་ཉིད་བཅུ་བཞི་ལས། ནང་དང༌། ཕྱི་དང༌། ཕྱི་ནང་དང༌། ཆེན་པོ་སྟོང་པ་ཉིད་བཞི་ནི་རིམ་པ་ལྟར་ཟ་བ་དང༌། བཟའ་བ་དང༌། ལུས་དང༌། ཆེན་པོ་སྡེ་ནང་དང་ཕྱིའི་སྐྱེ་མཆེད་དང༌། ཁོག་པ་དང་སྣོད་ཀྱི་འཇིག་རྟེན་ནོ། །དེ་ཡང་སྟོང་ཉིད་ཤེས་པ་གང་གིས་སྟོང་པར་མཐོང་བ་དེའི་སྟོང་ཉིད་ནི། སྟོང་པ་ཉིད་སྟོང་པ་ཉིད་དང༌། །ཇི་ལྟར་དོན་དམ་པའི་རྣམ་པར་མཐོང་བ་དེའི་སྟོང་པ་ཉིད་ནི་དོན་དམ་སྟོང་པ་ཉིད་དང༌། གང་གི་བྱང་ཆུབ་སེམས་དཔའ་བསྒྲུབ་པ་བྱེད་པ་དེ་ཡང་སྟོང་པ་ཉིད་དོ། །དེ་ཅིའི་ཕྱིར་སྒྲུབ་པར་བྱེད་ན་དགེ་གཉིས་ཐོབ་པར་བྱ་བའི་ཕྱིར། བྱང་ཆུབ་སེམས་དཔའ་སྒྲུབ་པར་བྱེད་པ་དེའི་སྟོང་པ་ཉིད་ནི་འདུས་བྱས་དང་འདུས་མ་བྱས་སྟོང་པ་ཉིད་དོ། །དེ་བཞིན་དུ་སངས་རྒྱས་ཆོས་རྣམས་དག་པར་བྱ་བའི་ཕྱིར་བྱང་ཆུབ་སེམས་དཔའ་སྒྲུབ་པར་བྱེད་པ་དེའི་སྟོང་ཉིད་ནི་ཆོས་ཐམས་ཅད་སྟོང་པ་ཉིད་དོ། །ཞེས་པའི་བར་དུ་སྦྱོར་བར་བྱའོ། ། མི་དམིགས་པ་དང༌། ངོ་བོ་ཉིད་སྟོང་པ་ཉིད་གཉིས་བཅུ་བཞི་པོ་དེར་འདུས་ཤིང༌། དངོས་པོ་མེད་པ་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་གཉིས་ཀྱིས་ཐམས་ཅད་ལ་སྒྲོ་སྐུར་བསལ་བའི་སྒོ་ནས་དེ་རྣམས་གཞན་སྟོང་དུ་གསུངས་པ་ཡིན། གང་ཟག་དང་ནི་ཆོས་རྣམས་ཀྱི། དངོས་པོ་མེད་འདིར་སྟོང་པ་ཉིད་དེ་དངོས་མེད་པའི་དངོས་ཡོད་པ། དེ་ནི་དེ་ལས་སྟོང་ཉིད་གཞན། ཞེས་སོ། ། དེའི་འགྲེལ་བར་དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། གང་ཟག་དང་ཆོས་ཀྱི་དངོས་པོ་མེད་པ་ནི་སྟོང་པ་ཉིད་དོ། །དངོས་པོ་མེད་པ་དེའི་དངོས་པོ་ཡོད་པ་མ་ཡིན་ནོ། །ཟ་བ་ལ་སོགས་པ་སྟོང་པ་ཉིད་ཅེས་ཅི་སྐད་སྨོས་པ་དེར་སྟོང་པ་ཉིད་ཀྱི་མཚན་ཉིད་བསྟན་པའི་ཕྱིར། དངོས་པོ་མེད་པ་ཉིད་དང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་རྣམ་པ་གཉིས་ཐ་མར་རྣམ་པར་འཇོག་སྟེ། གང་ཟག་དང་ཆོས་སུ་སྒྲོ་འདོགས་པ་དང༌། དེའི་སྟོང་པ་ཉིད་ལ་སྐུར་པ་འདེབས་པ་བསལ་པའི་ཕྱིར་གོ་རིམ་བཞིན་ནོ། །དེ་ལྟར་སྟོང་པ་ཉིད་ཀྱི་རབ་ཏུ་དབྱེ་བ་ཤེས་པར་བྱའོ། །ཞེས་སོ། །དཔལ་ཡང་དག་པར་སྦྱོར་པའི་རྒྱུད་ལས་ཀྱང་འགྱུར་གྱི་ཁྱད་པར་ཅུང་ཟད་མ་གཏོགས་པ་སྟོང་ཉིད་བཤད་པ་བྱམས་པ་མགོན་པོ་དཔོན་སློབ་ཀྱི་འདི་ཁོ་ན་ལྟར་གསུངས་སོ། །འདིའི་སྐབས་ཀྱི་མདོར། སྟོང་ཉིད་བཅོ་བརྒྱད་མདོར་བསྟན་ཅིང༌། དེ་ཉིད་རྒྱས་པར་བཤད་པའི་རྗེས་ལ་ཡང༌། དངོས་པོ་མེད་པའི་ངོ་བོ་ཉིད་སྟོང་པ་ཉིད་གཅིག་པུ་ལ་བཞིར་ཕྱེས་ནས། དངོས་པོ་དང་དངོས་པོ་མེད་པ་དང༌། ངོ་བོ་ཉིད་དང༌། གཞན་གྱི་དངོས་པོ་སྟོང་པ་ཉིད་ཅེས་གསུངས་པ་ལ་སྟོང་ཉིད་ཉི་ཤུར་སེང་བཟང་ལ་སོགས་འཆད་པ་ནི་གང་དང་ཡང་མི་མཐུན་ནོ། ། དེ་ལྟར་ན་སྟོང་ཉིད་ཀྱི་ངོ་བོ་ངོས་འཛིན་ལ་སོགས་པ་རྒྱལ་བ་སྲས་བཅས་ཀྱིས་གསུངས་པ་ལྟར་བྱེད་ན་ཡིད་བརྟན་དུ་རུང་གི། དེ་ལྟར་མིན་ན་གསེར་བཞིན་དུ་བརྟག་དགོས་སོ། །གང་གི་ཕྱིར་སྟོང་ཉིད་ལ་རང་སྟོང་ཉིད་དུ་ཁ་ཚོན་མ་ཆོད་པ་དེའི་ཕྱིར་གཞན་སྟོང་ཟབ་མོ་ཉིད་འབད་པས་བཙལ་བར་བྱའོ། །གལ་ཏེ་ལང་གར་གཤེགས་པ་ལས་གཅིག་གིས་གཅིག་སྟོང་པ་དེ་ཉི་ཚེའི་སྟོང་ཉིད་དང༌། སྟོང་ཉིད་ཀྱི་ཐ་ཤལ་དུ་གསུངས་པའི་ཕྱིར་གཞན་སྟོང་གིས་སྟོང་ཉིད་ཟབ་མོའི་གོ་མི་ཆོད་དོ། ། ཞེ་ན། དེ་དང་དེ་གཅིག་པ་མ་ཡིན་ཏེ། མདོ་དེ་ཉིད་ལས་བློ་གྲོས་ཆེན་པོ་དེ་ལ་མདོར་ན་སྟོང་པ་ཉིད་རྣམ་པ་བདུན་ཏེ། འདི་ལྟར་མཚན་ཉིད་སྟོང་བ་ཉིད་དང༌། དངོས་པོའི་རང་བཞིན་སྟོང་པ་ཉིད་དང༌། སྲིད་པ་སྟོང་པ་ཉིད་དང༌། མི་སྲིད་པ་སྟོང་པ་ཉིད་དང༌། ཆོས་ཐམས་ཅད་བརྗོད་དུ་མེད་པ་སྟོང་པ་ཉིད་དང༌། དོན་དམ་པ་འཕགས་པའི་ཡེ་ཤེས་སྟོང་པ་ཆེན་པོ་ཉིད་དང༌། གཅིག་གིས་གཅིག་སྟོང་པ་ཆེན་པོ་ཉིད་དང༌། བདུན་ནོ་ཞེས་སྟོང་པ་ཉིད་བདུན་གསུངས་པ་ལས། དོན་དམ་པ་གཞན་སྟོང་ནི། དྲུག་པ་འདི་ཡིན་ལ། ཉི་ཚེ་བ་དང་ཐ་ཤལ་དང་སྤང་བྱའི་སྟོང་ཉིད་ནི་བདུན་པ་ཡིན་པར་གསུངས་པའི་ཕྱིར་དེ་གཉིས་མི་གཅིག་གོ །དེ་ལ་དང་པོ་ནི་འདོས་པོ་རྣམས་རང་དང་སྦྱིའི་མཚན་ཉིད་ཀྱི་སྟོང་པ་ཉིད། གཉིས་པ་ནི་དངོས་པོ་རང་བཞིན་གྱིས་སྐྱེ་བས་སྟོང་པ་དང༌། གསུམ་པ་ནི་ཕུང་པོ་རྣམས་བདག་དང་བདག་གི་བས་སྟོང་པ་དང༌། བཞི་པ་ནི་ཕུང་པོ་རྣམས་མྱང་འདས་ཀྱིས་སྟོང་པ་དང༌། ལྔ་པ་ནི་ཀུན་བཏགས་པའི་རང་བཞིན་གྱིས་སྟོང་པ་དང༌། དྲུག་པ་ནི་ལྟ་བ་དང་ཉེས་པའི་བག་ཆགས་ཐམས་ཅད་ཀྱིས་སྟོང་པ་དང༌། བདུན་པ་ནི་ཁང་པ་བ་ལང་གིས་སྟོང་པ་ལ་གསུངས་སོ། །དེ་ལྟར་དགག་གཞི་བདུན་གྱི་སྟེང་དུ་དགག་བྱ་བདུན་མེད་པ་ནི་སྟོང་ཉིད་བདུན་ནོ། །དྲུག་པ་དང་བདུན་པའི་རྒྱས་བཤད་ཀྱི་སྐབས་སུ་མདོ་དེ་ཉིད་ལས། བློ་གྲོས་ཆེན་པོ་དོན་དམ་པ་འཕགས་པའི་ཡེ་ཤེས་སྟོང་པ་ཉིད་ཆེན་པོ་གང་ཞེ་ན་འདི་ལྟ་སྟེ་བདག་གི་སོ་སོ་རང་གི་འཕགས་པའི་ཡེ་ཤེས་ཁུང་དུ་ཆུད་པ་ནི་ལྟ་བ་དང་ཉེས་པའི་བག་ཆགས་ཐམས་ཅད་ཀྱིས་སྟོང་སྟེ་དེས་ཕྱིར་དོན་དམ་པ་འཕགས་པའི་ཡེ་ཤེས་སྟོང་པ་ཆེན་པོ་ཉིད་ཅེས་བྱའོ། །བློ་གྲོས་ཆེན་པོ། གཅིག་གིས་གཅིག་སྟོང་པ་ཉིད་གང་ཞེ་ན། འདི་ལྟ་སྟེ། གང་ན་ཅི་མེད་པ་དེ་ནི་དེས་སྟོང་ཞེས་བྱའོ། ། འདི་ལྟ་སྟེ། བློ་གྲོས་ཆེན་པོ་མྲི་ག་རི་མའི་ཁང་པ་ན། གླང་པོ་དང༌། བ་ལང་དང༌། ལུག་ལ་སོགས་པ་མེད་ཀྱང༌། དགེ་སློང་དང་དགེ་སློང་མ་ལ་སོགས་པའི་ནི་སྟོང་པ་མ་ཡིན་ནོ་ཞེས་ངེས་བཤད་དེ་དེ་ནི་དེ་དག་གིས་སྟོང་ངོ་ཞེས་བྱ་ཡང་བློ་གྲོས་ཆེན་པོ་ཁང་པ་ནི་ཁང་པའི་དངོས་པོར་མེད་པ་མ་ཡིན་དགེ་སློང་རྣམས་ཀྱང་དགེ་སློང་གི་དངོས་པོར་མེད་པ་མ་ཡིན་ཏེ། གླང་པོ་དང་བ་ལང་དང་ལུགས་ལ་སོགས་པའི་དངོས་པོ་དེ་དག་ཀུད་ན་མི་འཁོད་པ་ཡང་མ་ཡིན་ནོ། །བློ་གྲོས་ཆེན་པོ་དེ་བཞིན་དུ་ཆོས་ཐམས་ཅད་ཀྱི་རང་དང་སྦྱིའི་མཚན་ཉིད་ནི་གཅིག་ལ་གཅིག་མེད་དེ། དེའི་ཕྱིར་གཅིག་གིས་གཅིག་སྟོང་པ་ཉིད་ཅེས་བྱའོ། །བློ་གྲོས་ཆེན་པོ་གཅིག་གིས་གཅིག་སྟོང་པ་ཉིད་འདི་ནི་ཀུན་གྱི་ཐ་ཤལ་དེ་དེ་ནི་ཁྱེད་ཀྱིས་སྤང་བར་བྱའོ། །ཞེས་གསུངས་སོ། །དངོས་པོ་གཅིག་གིས་གཅིག་ཕན་ཚུན་སྟོང་པ་འདི་ནི་མྱང་འདས་ཆེན་པོ་ལ་སོགས་པར་དོན་དམ་གཞན་སྟོང་གི་དཔེར་གསུངས་ཤིང༌། གཞན་སྟོང་ཟབ་མོ་ཉིད་ཡིན་པ་ནི་མདོ་འདིར་བཀག་ལ། ཁོ་བོ་ཅག་ཀྱང་དེ་ཁོ་ན་ལྟར་འདོད་པའི་ཕྱིར་སྐྱོན་མེད་དོ། །ཉི་ཚེ་བའི་དོན་ཡང་གོ་བསྒྲུབ་ཀྱི་སྐབས་སུ་སེམས་ཅན་ཉུང་ཟད་ཉི་ཚེའི་དོན་དུ་མ་ཡིན་གྱི་སེམས་ཅན་ཐམས་ཅད་ཀྱི་དོན་དུ་ཞེས་གསུངས་པའི་ཕྱིར་རིགས་ཐམས་ཅད་བསྡུས་པ་ནི་དེའི་ཉི་ཚེ་མ་ཡིན་ནོ། །འདིར་དོན་དམ་པ་འཕགས་པའི་ཡེ་ཤེས་ཀུན་རྫོབ་ཀྱི་དངོས་པོ་ཐམས་ཅད་ཀྱིས་སྟོང་པ་ལ་ལྟོས་ཏེ་དངོས་པོ་གཅིག་གིས་གཅིག་སྟོང་པ་ནི་ཉི་ཚེའི་སྟོང་ཉིད་ཡིན་ནོ། །འདུས་བྱས་ཐམས་ཅད་ཀྱི་སྟོང་པ་ལ་ནི་ཉི་ཚེའི་སྐྱོན་མེད་དེ། ཡང་དག་མཐའ་ནི་འདུས་བྱས་ཀྱི། །རྣམ་པ་ཐམས་ཅད་དབེན་པ་སྟེ། །ཞེས་གསུངས་པའི་དོན་ཡིན་པའི་ཕྱིར་རོ། །དེས་ན་སྐབས་འདིའི་སྟོང་པ་ཉིད་རྣམས་ཀྱང་ཐེག་ཆེན་དང་ཡེ་ཤེས་ཡིན་པའི་ཕྱིར་སྟོང་པ་ཉིད་ཀྱི་དོན་ནི་དེ་ལྟར་རྟོགས་པར་བྱའོ། །བསོད་ནམས་དང་ཞེས་པ་ནི་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་རྣམས་སོ། ། སྔར་ཆོས་མཆོག་གི་སྐབས་སུ་ནི་ཏིང་ངེ་འཛིན་རྣམས་ཀྱི་མཐར་ཐུག་གི་བྱེད་པ་མྱུར་དུ་འཚང་རྒྱ་བ་ཉིད་དུ་གཅིག་པར་བསྟན་ལ། འདིར་ནི་གནས་སྐབས་ཀྱི་བྱེད་པ་མི་གཅིག་པའི་དབང་གིས་མིང་ཐ་དད་དུ་བརྗོད་དོ། །གནོད་འཇོམ་ལས། དཔའ་བོ་བཞིན་དུ་ཏིང་ངེ་འཛིན་རྣམས་ཀྱི་བྱ་བ་བྱེད་པ་དང༌། ཏིང་ངེ་འཛིན་ཐམས་ཅད་ཀྱི་སྤྱོད་ཡུལ་ཉམས་སུ་མྱོང་བར་བྱེད་པ་དང༌། ཐམས་ཅད་དུ་ཁྱད་པར་བྱེད་པ་གང་ཡིན་པ་དེ་ལ་དཔའ་བར་འགྲོ་བ་ཞེས་བྱའོ། །འདི་ལ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རྣམ་པར་མི་རྟོག་པ་ཟག་པ་མེད་པ་འཇིག་རྟེན་ལས་འདས་པའི་སེམས་མི་རྟོག་པ་དང་བཅས་པའི་བྱ་བ་མི་བྱེད་པ་དང་རྣམ་པར་གཡེང་བ་མེད་པ་གཙོ་བོར་བྱེད་པའི་ཕྱིར་ཏིང་ངེ་འཛིན་ཞེས་བྱའོ། །ཏིང་ངེ་འཛིན་དེ་ནི་བསམ་གཏན་གྱི་ངོ་བོ་ཉིད་མ་ཡིན་ཏེ། བསམ་གཏན་ནི་གཟུགས་ཡོད་པ་ན་སྤྱོད་པར་གཏོགས་པའི་ཕྱིར་རོ། །སེམས་ཀྱི་བདག་ཉིད་གཅིག་ཏུ་ཟིན་ཀྱང༌། སྔོན་གྱི་བརྩལ་བའི་མཐུས་སོ་སོར་བྱ་བ་བྱེད་པས་ན། བྱ་བ་བྱེད་པའི་དབང་གིས་མིང་ཐ་དད་དུ་བརྗོད་དོ། །དེ་ནི་གཞན་དག་གི་རྟོག་པའི་སྤྱོད་ཡུལ་དུ་མི་འགྱུར་ཏེ། སོ་སོར་རང་རིག་པ་ཡིན་པའི་ཕྱིར་རོ། །དེ་དག་ཀྱང་མདོ་ལས་ཇི་སྐད་འབྱུང་བ་བཞིན་དུ་བཟུང་བར་བྱ་སྟེ། དེ་ལ་རིག་པས་དཔྱད་པར་བྱ་བ་་ནི་མ་ཡིན་ནོ། །ཞེས་སོ། །ལམ་དང་ཞེས་པ་ལ་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང་རྣམ་ཐར་སྒོ་གསུམ་དང༌། ཤེས་པ་བཅུ་གཅིག་དང༌། དབང་པོ་གསུམ་དང༌། ཏིང་ངེ་འཛིན་གསུམ་དང༌། རྗེས་དྲན་བཅུ་དང༌། ཚད་མེད་བཞི་དང༌། བསམ་གཏན་བཞི་དང༌། གཟུགས་མེད་བཞི་དང༌། རྣམ་ཐར་བརྒྱད་དང༌། མཐར་གྱི་གནས་པའི་སྙོམས་པར་འཇུག་པ་དགུ་དང༌། སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། སངས་རྒྱས་ཀྱི་ཆོས་མ་འདྲེས་པའི་བཅོ་བརྒྱད་དེ། དེ་རྣམས་རྒྱས་བཤད་དང་བཅས་པ་སྐབས་འདིར་འཆད་པ་ནི་མདོའི་དགོངས་པ་ཡིན་ནོ། །དེ་ལ་དྲན་པ་ཡང་ཡིན་ཉེ་བར་གནས་པ་ཡང་ཡིན་པས་དྲན་པ་ཉེ་བར་བཞག་པ་ཞེས་བྱའོ། །ཡུལ་མ་བརྗེད་པ་དང་བསྲུང་བའི་དོན་དུ་དྲན་པའོ། །ལུས་དང་ཚོར་བ་དང་སེམས་དང་ཆོས་དེ་དམིགས་པའི་ཡུལ་བཞི་ཡོད་པའི་ཕྱིར་དེ་ཡང་བཞིའོ། །ལུས་ལ་ཡང་ནང་དང་ཕྱི་དང་ཕྱི་ནང་གི་ལུས་གསུམ་མོ། །དེ་ལ་སེམས་ཅན་རང་གི་ལུས་དང༌། སེམས་ཅན་མ་ཡིན་པ་ཕྱི་རོལ་གྱི་གཟུགས་དང༌། སེམས་ཅན་གཞན་གྱི་ལུས་དང༌། དེ་བཞིན་དུ་སྐྱེ་མཆེད་དྲུག་དང༌། དབང་པོས་མ་ཟིན་པ་ཕྱིར་གཟུགས་དང༌། སྐྱེ་མཆེད་དྲུག་ཏུ་མ་གཏོགས་ནང་གི་ཟིན་པའི་གཟུགས་རྣམས་ཀྱང་རིམ་པ་ལྟར་ནང་དང་ཕྱི་ནང་གི་ལུས་སོ། །དེ་བཞིན་དུ་རང་གི་ལུས་སུ་གཏོགས་པ་ནང་གི་འབྱུང་བའི་གཟུགས་དང༌། ཕྱིའི་འབྱུང་བ་དང༌། དེ་རྒྱུར་བྱས་ནས་འབྱུང་བའི་དབང་པོ་དང༌། ཡུལ་གྱི་གཟུགས་རྣམས་ཀྱང་ངོ༌། །དེ་བཞིན་དུ་རྣམ་ཤེས་མེད་པ་རྣམ་པར་སྔོས་པ་ལ་སོགས་པ་དང༌། སྔོས་པ་ལ་སོགས་འདས་པའི་དུས་ན་རྣམ་ཤེས་དང་བཅས་པར་གྱུར་པ་དང༌། རྣམ་ཤེས་དང་བཅས་པའི་ལུས་འདི་ཡང་མ་འོངས་པའི་དུས་ན་དེ་དང་མཚུངས་པའི་ཆོས་ཉིད་རྣམས་ལ་རིམ་པ་ལྟར་ནང་གི་ལུས་དང་ཕྱིའི་ལུས་དང་ཕྱི་ནང་གི་ལུས་ཞེས་བྱའོ། །ལུས་གསུམ་ཚན་བཞི་པོ་དེ་དག་ལ་དམིགས་ནས་ཚོར་བ་ལ་སོགས་པ་བྱུང་བ་དེའི་ཚེ་ནང་གི་ཚོར་བ་དང་སེམས་དང་ཆོས་དང་ཕྱིའི་ཚོར་བ་དང་སེམས་དང་ཆོས་ཞེས་པ་ལ་སོགས་པ་ཡིན་ནོ། །དེ་དག་ལ་ཇི་ལྟར་ལྟ་ཞེ་ན། ལུས་ལ་ལུས་ཀྱི་རྗེས་སུ་བལྟ་ཞེས་པ་ལ་སོགས་པའི་ཚུལ་གྱིས། ནང་ལ་སོགས་པའི་ལུས་ལ་ལུས་ཞེས་གནས་པ་ཙམ་ཡིན་པར་རྗེས་སུ་བརྟགས་ནས་ལྟ་ཞིང་གནས་པའི་ཚེ་གང་ཟག་དང་ཆོས་ཀྱི་དངོས་པོ་ཡོད་པར་ཡང་དག་པར་རྗེས་སུ་མ་མཐོང་བས། ལུས་དང་ལྡན་པའི་རྣམ་རྟོག་འདི་ནི། ལུས་སོ་ཞེས་བྱ་འམ་རྟག་མི་རྟག བདེ་སྡུག སྡུག་མི་སྡུག བདག་བདག་མེད། སྟོང་མི་སྟོང་ལ་སོགས་པར་མི་རྟོག་པའི་ཕྱིར་མི་དམིགས་པར་གནས་སོ། །ཚོར་བ་བདེ་སྡུག་བཏང་སྙོམས་གསུམ་པོ་ལུས་སེམས་ཀྱི་ཚོར་བའི་དབང་གིས་དྲུག་དང་ཟང་ཟིང་ཡོད་མེད་ཞེན་པ་ཕྱི་ནང་ལ་སོགས་པ་ལ་རྟེན་པའི་ཚོར་བའི་བྱེ་བྲག་རྣམས་ལ་ཚོར་བའི་དངོས་པོར་བཏགས་པ་བཟུང་ནས་ཚོར་པ་པོ་བདག་གམ་ཆོས་ཡིན་རྗེས་སུ་བཏགས་ཤིང་བལྟས་ནས་མི་དམིགས་པར་གནས་སོ། །དེ་བཞིན་དུ་སེམས་ཆགས་བཅས་དང་བསྡུས་པ་དང་འཕྲོ་བ་ལ་སོགས་པར་བྱེ་བའི་སེམས་ལ་རྗེས་སུ་བརྟགས་ཤིང་བལྟས་ནས་བདག་དང་ཆོས་ཀྱི་དངོས་པོ་མི་དམིགས་པར་གནས་སོ། །དེ་བཞིན་དུ་ཆོས་ཕུང་ཁམས་སྐྱེ་མཆེད་སྤང་གཉེན་འཕགས་པའི་བདེན་པ་ལ་སོགས་པ་རྗེས་སུ་བཏགས་ནས་ཀུན་བཏགས་པའི་ངོ་བོ་དངོས་པོ་ཐམས་ཅད་མི་དམིགས་པར་བསྒོམ་ཞིང་གནས་སོ། །ཇི་ལྟ་བུས་བསྒོམ་ཞེ་ན། རྔུན་པ་ཤེས་བཞིན་ཅན་དྲན་པ་ལྡན་པའི་བྱང་ཆུབ་སེམས་དཔས་སོ། །རྒྱུན་དད་གུས་པས་སྦྱོར་བས་བརྩོན་པ་ནི། རྔུན་པ་དང༌། རྗེས་སུ་ལྟ་བའི་ཤེས་རབ་དང༌། ཤེས་བཞིན་གྱིས་ཡང་དག་པར་ཡིད་ལ་བྱེད་པ་ནི་ཤེས་བཞིན་ནོ། །མི་བརྗོད་པ་དང་བསྲུང་བར་བྱེད་པ་དང་གཡེང་བ་མེད་པར་བྱེད་པའི་དྲན་པ་དང་ལྡན་པའོ། །དེས་འཇིག་རྟེན་གྱི་ཆོས་ལ་ཆགས་པ་དང་ཡིད་མི་བདེ་བ་བསལ་ནས་བསྒོམ་མོ། །དེ་ལ་རྙེད་པ་དང་གྲགས་པ་དང་བདེ་བ་དང་བསྟོད་པ་བཞི་ལ་ཆགས་སེམས་དང༌། བཟློག་པ་བཞི་ལ་ཡིད་མི་བདེ་བ་འབྱུང་སྟེ། དེ་བཞིན་དུ་གང་ཟག་དང་འདུ་བྱེད་རྣམས་ལ་ཆགས་སྡང་དང༌། སྡིག་པའི་གཙོ་བོ་འདོད་པ་ལ་འདུན་པ་དང༌། གནོད་སེམས་ཏེ། དེ་དག་བསལ་ནས་ཞེས་པ་ནི་འཇིག་རྟེན་གྱི་ཆོས་ཀྱི་མ་གོས་པར་སྒོམ་ཞེས་པའི་དོན་ཏོ། །དེ་ལྟར་མི་དམིགས་སྒོ་ནས་ཐེག་ཆེན་གྱི་ཚུལ་དུ་དྲན་པ་ཉེ་བར་བཞག་པ་བཞི་བསྟན་ནས། ཉན་ཐོས་ཀྱི་ཚུལ་དུ་ལུས་དྲན་པ་ཉེར་བཞག་གཅིག་པུ་རྣམ་པ་དྲུག་ཏུ་བསྟན་པ་ནི། སྤྱོད་ལམ་དང༌། ཤེས་བཞིན་དང་དབུགས་འབྱུང་རྔུབ་དང༌། ཁམས་རྣམས་རྣམ་པར་བཞག་པ་དང༌། རྣམ་པ་སུམ་ཅུ་རྩ་གཉིས་དང༌། མི་སྡུག་པའི་སྒོ་ནས་སོ།། དེ་ལ་དང་པོ་ནི་སྤྱོད་པ་དང་གནས་པ་དང་འདུག་པ་ཉལ་བ་ལ་སོགས་པའོ། །གཉིས་པ་ནི་དེ་དག་ཉིད་ལ་ཤེས་བཞིན་དུ་འཇུག་པ་ཉིད་ཡིན་ནོ། །གསུམ་པ་ནི་དྲན་ཤེས་བཞིན་གཙོ་བོར་བྱས་ནས་དྲན་བཞིན་དུ་དབུགས་འབྱུང་རྔུབ་ལ་སོགས་པ་ཇི་ལྟ་བ་བཞིན་དུ་ཤེས་པའོ། །བཞི་པ་ནི་ལུས་འདི་ལ་ས་ཆུ་མེ་རླུང་གི་ཁམས་སུ་བྱེ་བའོ། །ལྔ་པ་ནི་ལུས་འདི་ལ་སྐྲ་བ་སྤུ་སེན་མོ་སོ་ལྤགས་པ་ཤ་རུས་པ་ཁྲག་རྒྱུས་པ་ལ་སོགས་པ་མི་གཙང་བའི་རྫས་སོ་གཉིས་སོ། །དྲུག་པ་ནི་རྣམ་པར་བམ་པ་དང༌། སྔོས་པ་དང༌། རུལ་བ་དང་འབུས་གཞིགས་པ་དང༌། ཟོས་པ་དང༌། དམར་བ་དང༌། འཐོར་བ་དང༌། རུས་གོང་ཏེ་མི་སྡུག་པ་བརྒྱད་པོ། །འདས་པའི་ལུས་ཐམས་ཅད་ཀྱང་དེ་ལྟ་བུའི་ཆོས་ཅན། མ་འོངས་པར་ཡང་དེ་ལྟ་བུའི་རང་བཞིན་ཅན། ད་ལྟར་བ་ཡང་་ཆོས་ཉིད་དེ་ལས་མ་འདས་སོ། །དེ་ལ་ཤི་ནས་ཞག་གཅིག་དང་གཉིས་དང་གསུམ་དང་བཞི་དང་ལྔ་ལོན་པ་ན་བམ་པ་ནས་འབུས་གཞིགས་པའི་བར་དུ་རིམ་པ་ལྟར་རོ། །ཡང་དག་པར་སྤོང་བ་ནི། སྡིག་པ་མི་དགེ་བའི་ཆོས་ཅན་སྐྱེས་པ་རྣམས་སྤང་བ་དང་མ་སྐྱེས་པ་རྣམས་མི་སྐྱེད་པ་དང་དགེ་བའི་རྩ་བ་སྐྱེས་པ་རྣམས་མི་ཟད་པར་བྱ་བ་དང་མ་སྐྱེས་པ་རྣམས་བསྐྱེད་པར་བྱ་བའི་ཕྱིར། འདུན་པ་བསྐྱེད་པ་ནི་གོ་ཆའི་བརྩོན་འགྲུས་སོ། །རྩོལ་བ་ནི་སྦྱོར་བའི་བརྩོན་འགྲུས་སོ། །བརྩོན་འགྲུས་རྩོམ་པ་ནི་མི་སྐྱོ་བའི་བརྩོམ་འགྲུས་སོ། །སེམས་རབ་ཏུ་འཛིན་ཅིང་ཡང་དག་པར་འཇོག་པ་ནི་ཐབས་ཀྱི་བརྩོན་འགྲུས་སོ། །དེ་ལ་སེམས་བྱིང་ན་རབ་ཏུ་འཛིན་པ་དང༌། རྒོད་ན་སྡུད་པ་ཡིད་ལ་བྱེད་པ་ནི་ཡང་དག་པར་འཇོག་པ་སྟེ་ཐབས་མིན་དུ་སྒྲུབ་པ་སྤངས་ནས་ཐབས་ལ་གནས་པར་བྱེད་པའོ། ། རྫུ་འཕྲུལ་གྱི་རྐང་པ་བཞི་ནི། འདུན་པ་དང་བརྩོན་འགྲུས་དང་སེམས་དང་དཔྱོད་པ་སྟེ་སྤོང་པའི་འདུ་བྱེད་བརྒྱད་དང་ལྡན་པའོ། ། དེ་ལ་འཇིག་རྟེན་ལས་འདས་པའི་ཆོས་རྫུ་འཕྲུལ་གྱི་གཞི་དང་གནས་ཡིན་པའི་ཕྱིར་རྫུ་འཕྲུལ་གྱི་རྐང་པའོ། །དགེ་བ་ལ་འདུན་པའི་སྟོབས་འབའ་ཞིག་གིས་སྦྱོར་པའི་དབང་གིས་སེམས་རྩེ་གཅིག་པ་ནི་འདུན་པའི་ཏིང་ངེ་འཛིན་ནོ། །ཡང་དག་སྤོང་བཞིའི་བརྩོན་འགྲུས་ཀྱིས་སྦྱོར་བའི་དབང་གིས་མི་དགེ་བ་སྤོང་བ་དང་དགེ་བ་བསྐྱེད་པ་ལ་བརྩོན་པའི་སེམས་རྩེ་གཅིག་པ་ནི་བརྩོན་འགྲུས་ཀྱི་ཏིང་ངེ་འཛིན་ནོ། །ཞི་གནས་དང་རབ་ཏུ་འཛིན་པ་དང་བཏང་སྙོམས་རྣམས་ཀྱིས་སེམས་སྦྱོར་བའི་དབང་གིས་སེམས་རྩེ་གཅིག་ཏུ་གནས་པ་ནི་སེམས་ཀྱི་ཏིང་ངེ་འཛིན་ནོ། །ཅི་བདག་མི་དགེ་བའི་ཆོས་ལ་མི་སྤྱོད་དམ། དེ་ཡང་ཡོད་པ་ལ་མི་སྤྱོད་དམ། མེད་པ་ལ་མི་སྤྱོད་པ་དེ་དཔྱད་པར་བྱའོ། །སྙམ་ནས་དཔྱོད་པའི་དབང་གིས་རྩོལ་བ་ན་ཏིང་ངེ་འཛིན་བསྐྱེད་པ་དེ་དཔྱོད་པའི་ཏིང་ངེ་འཛིན་ནོ། །འདུ་བྱེད་པ་བརྒྱད་ནི་ནམ་ཞིག་སྙོམས་འཇུག་བསྐྱེད་པར་བྱ་སྙམ་པའི་འདུན་པ་དང༌། མི་དགེ་བ་ཐམས་ཅད་འཇོམས་པའི་བརྩོན་འགྲུས་དང༌། གོང་དུ་ཐོབ་པའི་ཆོས་ལ་དད་པ་དང༌། དེ་སྔོན་དུ་སོང་བའི་ཤིན་ཏུ་སྦྱངས་པ་དང༌། ཤེས་བཞིན་གྱི་ཕྱོགས་དྲན་པ་དང༌། ལྷག་མཐོང་གི་ཕྱོགས་དང་མཐུན་པར་ཤེས་བཞིན་དང༌། དེ་ལ་སེམས་མངོན་པར་འདུ་བྱེད་པའི་སེམས་དང༌། སེམས་ཀུན་ནས་ཉོན་མོངས་མེད་པའི་ངོ་བོ་བཏང་སྙོམས་སོ། །འདུན་པའི་ཏིང་ངེ་འཛིན་ལ་སོགས་པ་སྤོང་བའི་འདུ་བྱེད་དེ་དག་དང་ལྡན་པའི་རྫུ་འཕྲུལ་གྱི་རྐང་པ་དབེན་པ་ལ་གནས་པ། འདོད་ཆགས་དང་བྲལ་བ་ལ་གནས་པ། འགོག་པ་ལ་གནས་པ། རྣམ་པར་སྤོང་བས་ཡོངས་སུ་བསྒྱུར་བ་བསྒོམ་མོ། །དེ་ལ་ཉོན་མོངས་པ་ལས་དབེན་པའོ། །སྲིད་པ་ལས་འདོད་ཆགས་དང་བྲལ་བའོ། །སྡུག་བསྔལ་འགོག་པའོ། །ཕུང་པོ་ཐམས་ཅད་རྣམ་པར་སྤོང་བའོ། །ཡང་སྡུག་བསྔལ་ཤེས་པའི་ཕྱིར། ཀུན་འབྱུང་སྤངས་པའི་ཕྱིར་དང༌། འགོག་པ་མངོན་སུམ་དུ་བྱ་བའི་ཕྱིར་དང༌། ལམ་བསྒོམ་པའི་ཕྱིར་དབེན་པ་ལ་སོགས་པ་གོ་རིམ་བཞིན་ནོ། །ཡང་ཚུལ་ཁྲིམས་ཀྱི་ཕུང་པོས་དང༌། ཏིང་ངེ་འཛིན་གྱི་ཕུང་པོས་དང༌། ཤེས་རབ་ཀྱི་ཕུང་པོས་དང༌། རྣམ་པར་གྲོལ་བའི་ཕུང་པོས་ནི་དབེན་པ་ལ་གནས་པ་ལ་སོགས་པ་རིམ་པ་ལྟར་རོ། ། སྤོང་བའི་འདུ་བྱེད་བརྒྱད་ནི། ཉེས་པ་ལྔའི་གཉེན་པོའོ། །དབུས་མཐའ་རྣམ་འབྱེད་ལས། དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་པར་འགྱུར། །ཉེས་པ་ལྔ་སྤོང་འདུ་བྱེད་བརྒྱད། །བསྟེན་པའི་རྒྱུ་ལས་བྱུང་བའོ། །ཞེས་སོ། །རྫུ་འཕྲུལ་གྱི་རྐང་པ་བཞི་པོ་ནི་ཡང་དག་པར་སྤོང་བའི་བརྩོན་འགྲུས་དེར་གནས་པའི་སེམས་ལས་སུ་རུང་བའི་ཏིང་ངེ་འཛིན་ཉིད་དོ། །ཉེས་པ་ལྔ་ནི་ལེ་ལོ་དང༌། གདམས་ངག་བརྗེད་པ་དང༌། བྱིང་རྒོད་དང༌། འདུ་མི་བྱེད་པ་དང༌། འདུ་བྱེད་པའོ། །ཇི་སྐད་དུ། ལཻ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང༌། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་སོ། །དེ་ལེ་ལོའི་གཉེན་པོ་ནི་འདུན་པ་དང༌། རྩོལ་བ་དང༌། དད་པ་དང༌། ཤིན་ཏུུ་སྦྱངས་པ་སྟེ་བཞིའོ། །རྩོལ་བའི་གནས་ནི་འདུན་པའོ། ། གནས་པ་ནི་རྩོལ་པའོ། །གནས་འདུན་པའི་རྒྱུ་ནི་དད་པ་དང༌། གནས་རྩོལ་བའི་འབྲས་བུ་ནི། ཤིན་ཏུ་སྦྱངས་པའོ། །ཇི་སྐད་དུ། གནས་དང༌། དེ་ལ་གནས་པ་དང༌། རྒྱུ་དང་འབྲས་བུ་ཉིད་དུའོ། ། ཞེས་སོ། །གདམས་ངག་གི་དམིགས་པ་མ་བརྗེད་པ་དང༌། བྱིང་རྒོད་རྟོགས་པ་དང༌། རྟོགས་ནས་དེ་དང་བྲལ་བའི་ཕྱིར་འདུ་བྱེད་པ་དང༌། བྱིང་རྒོད་ཞི་ཚེ་རྣལ་དུ་འཇོག་པ་ནི་རིམ་པར་དྲན་པ་དང༌། དྲན་པའི་ངང་ནས་ཤེས་བཞིན་དང༌། སེམས་པ་དང༌། བཏང་སྙོམས་སོ། །ཇི་སྐད་དུ། དམིགས་པ་བརྗེད་པར་མ་གྱུར་དང༌། །བྱིང་དང་རྒོད་པ་རྟོགས་པ་དང༌། །དེ་ཡང་མངོན་པར་འདུ་བྱེད་དང༌། ། ཞི་ཚེ་རྣལ་དུ་འཇོག་པའོ། །ཞེས་སོ། །དབང་པོ་ལྔ་དད་པ་དང༌། བརྩོན་འགྲུས་དང༌། །དྲན་པ་དང༌། ཏིང་ངེ་འཛིན་དང༌། ཤེས་རབ་པོ། །སྔར་བཤད་པ་དེ་ལྟར་རྫུ་འཕྲུལ་གྱི་རྐང་པ་བཞིས་ཡང་དག་པར་སྦྱོར་བ་ཁྱད་པར་གྱི་ཆོས་འབྱུང་བའི་རྟགས་མཐོང་བས་གོང་དུ་ཁྱད་པར་གྱི་ཆོས་འབྱུང་བ་ལ་ངེས་པ་སྐྱེ་སྟེ། དེའི་ཚེ་རྣལ་འབྱོར་པ་དེ་སྟོན་པ་དང་ཉན་ཐོས་རྣམས་ཀྱི་ཐོབ་པ་ལ་ཡིད་ཆེས་པ་སྐྱེའོ།། ཡིད་ཆེས་པ་དེ་གོང་དུ་འཇིག་རྟེན་ལས་འདས་པའི་ཆོས་འབྱུང་བ་ལ་དབང་བྱེད་བས་དད་པའི་དབང་པོའོ། །དད་པའི་སྟོབས་ཀྱིས་བརྩོན་འགྲུས་དང༌། དེའི་སྟོབས་ཀྱིས་ཀྱང་དྲན་པ་ཤིན་ཏུ་ལྷག་པོ་སྐྱེ་བ་ཡང་དེ་བཞིན་དུ་དབང་པོ་བྱེད་པས་ཏིང་ངེ་འཛིན་གྱི་དབང་པོ་ལ་སོགས་པའོ། །དབང་བྱེད་པ་གང་ཞེ་ན། རྫུ་འཕྲུལ་གྱི་རྐང་པ་རྣམས་ཀྱིས་སེམས་ལས་སུ་རུང་བ་ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད་ནས། འདུན་པ་ནི་དབང་བྱེད་པ་སྦྱོར་བ་ནི་དབང་བྱེད་པ། དམིགས་པ་མི་བརྗེད་པ་ནི་དབང་བྱེད་པ། མི་འཕྲོ་པ་ནི་དབང་བྱེད་པ། རབ་ཏུ་རྣམ་པར་འབྱེད་པ་ནི་དབང་བྱེད་པ་སྟེ། དད་སོགས་ལྔ་དང་གོ་རིམ་བཞིན་ནོ། །ཇི་སྐད་དུ། ཐར་པའི་ཆ་དང་མཐུན་བསྐྱེད་ནས།། འདུན་པ་སྦྱོར་བ་དབང་བྱེད་དེ། དམིགས་པ་བརྗེད་པར་མ་གྱུར་དང༌། མི་འཕྲོ་རྣམ་པར་འབྱེད་ཀྱང་ངོ༌། །ཞེས་སོ། །སྟོབས་ལྔ་ནི་དད་པ་སོགས་དེ་དག་མི་མཐུན་པའི་ཕྱོགས་མ་དད་སོགས་དང་མི་འདྲེ་བའི་ཚེ་ནའོ། །དད་སོགས་དེ་དག་སྔ་མ་སྔ་མའི་འབྲས་བུ་ཕྱི་མ་ཕྱི་མ་ཡིན་ཏེ། དད་པར་གྱུར་པ་དེ། རྒྱུ་དང་འབྲས་བུ་ལ་བརྩོན་འགྲུས་རྩོམ་མོ། །བརྩོན་འགྲུས་བརྩོམས་པ་ནི་དྲན་པ་ཉེ་བར་གནས་སོ། ། དྲན་པ་ཉེ་བར་གནས་པ་ནི་སེམས་པ་མཉམ་པར་འཇོག་གོ །སེམས་མཉམ་པར་བཞག་པ་ནི་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དད་པ་ལ་སོགས་པ་ལྔ་ནི་དྲོད་དང་རྩེ་མོའི་གནས་སྐབས་ན་དབང་པོ་དང༌། བཟོད་པ་དང་ཆོས་མཆོག་གི་གནས་སྐབས་ན་སྟོབས་སོ། །ཇི་སྐད་དུ། མི་མཐུན་ཕྱོགས་ནི་བསྲབས་པའི་ཕྱིར། །སྟོབས་ལྡན་འབྲས་བུ་ཕྱི་མ་ཡིན། །དབང་པོ་དང་ནི་སྟོབས་རྣམས་ལ། །ངེས་འབྱེད་ཆ་མཐུན་གཉིས་གཉིས་སོ། །ཞེས་སོ། །དད་སོགས་དེ་དག་འཕེལ་བས་ལྷ་འམ་བདུད་དམ་ཚངས་པ་ཡང་རུང་གང་གིས་ཀྱང་ཆོས་མཐུན་པས་ཐུབ་པར་མི་ནུས་ཤིང༌། ཉོན་མོངས་པ་ཀུན་ནས་དཀྲིས་པས་ཀྱང་མི་ཚུགས་པའི་སྟོབས་དེ་དག་གིས་རྣལ་འབྱོར་པ་དེ་སྟོབས་དང་ལྡན་པས་བདུད་ཀྱི་སྟོབས་ཐམས་ཅད་ལས་རྒྱལ་ནས་སྦྱོར་བས་ན་སྟོབས་སོ། །ཆོས་མཆོག་གི་ངོ་བོ་ལྔ་པོ་ཤིན་ཏུ་འཕེལ་ན་དེ་མ་ཐག་ཏུ་བྱང་ཆུབ་ཀྱི་ཡན་ལག་བདུན་འབྱུང་སྟེ། མཐོང་བའི་ལམ་ལ་ཡང་དག་ཇི་ལྟ་བ་བཞིན་དུ་རྟོགས་པའི་ཡན་ལག་ཏུ་འགྱུར་བའི་ཕྱིར་རོ། །བདུན་པོ་ནི་དྲན་པ་དང༌། ཆོས་རྣམ་པར་བྱེད་པ་དང༌། བརྩོན་འགྲུས་དང༌། དགའ་བ་དང༌། ཤིན་ཏུུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་ཡང་དག་པར་བྱང་ཆུབ་ཀྱི་ཡན་ལག་དབེན་པ་ལ་གནས་པ་ལ་སོགས། དེ་ལ་དྲན་པ་ནི་བྱང་ཆུབ་ཀྱི་གནས་ཀྱི་ཡན་ལག་གོ ། ཆོས་རྣམ་པར་འབྱེད་པ་ནི་རང་བཞིན་་གྱི་ཡན་ལག་གོ །བརྩོན་འགྲུས་ནི་ངེས་པར་འབྱུང་བའི་ཡན་ལག་གོ །དགའ་བ་ནི་ཕན་ཡོན་ཡན་ལག་གོ །ལྷག་མ་གསུམ་ནི་ཉོན་མོངས་པ་མེད་པའི་ཡན་ལག་གོ །དབུས་མཐའ་རྣམ་འབྱེད་ལས། རང་བཞིན་ཡན་ལག་གནས་ཡན་ལག། གསུམ་པ་ངེས་འབྱུང་ཡན་ལག་སྟེ། བཞི་པ་ཕན་ཡོན་ཡན་ལག་ཡིན། རྣམ་གསུམ་ཉོན་མོངས་མེད་ཡན་ལག །ཅེས་སོ། །ཉོན་མོངས་མེད་པའི་ཡན་ལག་འདི་ལ་ཤིན་ཏུ་སྦྱངས་པ་ནི་དེའི་གཉེན་པོ་ཡིན་པའི་ཕྱིར་ཉོན་མོངས་མེད་པའི་གཞིའོ། །ཏིང་ངེ་འཛིན་ནི་ཉོན་མོངས་པ་མེད་པའི་གནས་སོ། །བཏང་སྙོམས་ནི་ཉོན་མོངས་པ་མེད་པའི་ངོ་བོ་ཉིད་དོ། །ཇི་སྐད་དུ། འདི་ལ་གཞི་དང་གནས་དང་ནི། །ངོ་བོ་ཉིད་དུ་བསྟན་པ་ཡིན། །ཞེས་སོ། །ཆོས་རྣམ་པར་འབྱེད་པ་དང༌། བརྩོན་འགྲུས་དང༌། དགའ་བ་གསུམ་ནི་ལྷག་མཐོང་གི་ཕྱོགས་སོ། །ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་གསུམ་ནི་ཞི་གནས་ཀྱི་ཕྱོགས་དང་མཐུན་པའོ། །དྲན་པ་ནི་གཉིས་ཀའི་ཕྱོགས་སོ། །དེ་དག་ཐོབ་པས་མཐོང་སྤངས་པར་མཐོང་ཞིང་བསྒོམ་སྤང་མ་སྤངས་པར་མཐོང་ནས་དེ་སྤང་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་མོ། །འཕགས་པ་སློབ་པ་རྣམས་ཀྱིས་ཉོན་མོངས་པ་ཐམས་ཅད་སྤང་བ་དང་རྣམ་པར་གྲོལ་བ་མངོན་སུམ་དུ་བྱ་བའི་ལམ་ཡིན་པའི་ཕྱིར། འཕགས་པའི་ལམ་ཡན་ལག་བརྒྱད་པའོ། །བརྒྱད་པོ་ནི། ཡང་དག་པའི་ལྟ་བ་དང༌། རྟོག་པ་དང༌། ངག་དང༌། ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ་དང༌། ཏིང་ངེ་འཛིན་ནོ། །དེ་ལ་ལྟ་བ་དང་རྟོགས་དང་རྩོལ་བ་གསུམ་ནི་ཤེས་རབ་ཀྱི་ཕུང་པོའོ། ། ངག་དང་ལས་ཀྱི་མཐའ་དང་འཚོ་བ་གསུམ་ནི་ཚུལ་ཁྲིམས་ཀྱི་ཕུང་པོའོ། །དྲན་པ་དང་ཏིང་ངེ་འཛིན་གཉིས་ནི་ཏིང་ངེ་འཛིན་གྱི་ཕུང་པོའོ། །འཇིག་རྟེན་ལས་འདས་པའི་རྗེས་ལས་ཐོབ་པ་འཇིག་རྟེན་པ་དེས་རང་གི་རྟོགས་པ་ཡོངས་སུ་གཅོད་པའི་ཕྱིར་ཡང་དག་པའི་ལྟ་བ་ནི་བསྒོམ་ལམ་གྱི་ཚེ་མཐོང་ལམ་ལ་ཡོངས་སུ་གཅོད་པའི་ཡན་ལག་གོ །ཀུན་སློང་དང་བཅས་པའི་ངག་གིས་གོ་བར་བྱེད་པའི་ཕྱིར་ཡང་དག་པའི་རྟོག་པ་དང༌། ངག་ནི་གཞན་གོ་པར་བྱེད་པའི་ཡན་ལག་གོ །ཡང་དག་དང་ལས་ཀྱི་མཐའ་དང་འཚོ་བ་གསུམ་ནི་གཞན་ཡིད་ཆེས་པར་བྱེད་པའི་ཡན་ལག་གོ །རྩོལ་བ་དང་དྲན་པ་དང་ཏིང་ངེ་འཛིན་གསུམ་ནི་མི་མཐུན་ཕྱོགས་ཀྱི་གཉེན་པོའི་ཡན་ལག་གོ །ཇི་སྐད་དུ། ཡོངས་སུ་གཅོད་པ་གོ་བྱེད་དང༌། །རྣམ་གསུམ་གཞན་ཡིད་ཆེས་པར་བྱེད། ། མི་མཐུན་ཕྱོགས་ཀྱི་གཉེན་པོར་ནི། །ལམ་གྱི་ཡན་ལག་དེ་བརྒྱད་དོ། །ཞེས་སོ། །ངག་གིས་བསྟན་པ་དང་འཕེལ་བའི་གཏམ་རྣམ་པར་ངེས་པའི་ཕྱིར་ལྟ་བ་སྟེ་ཤེས་རབ་ལ་ཡིད་ཆེས་སོ། །ལས་ཀྱི་མཐའ་བྱ་བ་མ་ཡིན་པ་མི་བྱེད་པའི་ཕྱིར་ཚུལ་ཁྲིམས་ལ་ཡིད་ཆེས་སོ། །འཚོ་བས་ཆོས་གོས་ལ་སོགས་པ་ཚོད་ཟིན་པར་ཚོལ་བའི་ཕྱིར་ཡོ་བྱད་བསྙུངས་པ་ལ་ཡིད་ཆེས་སོ། །ལྷ་དང་ཚུལ་ཁྲིམས་ཡོ་བྱད་བསྙུངས་གཞན་ལ་རྣམ་པར་རིག་བྱེད་འདོད། ཅེས་སོ། །མི་མཐུན་པའི་ཕྱོགས་ནི་བསྒོམ་སྤང་གི་ཉོན་མོངས་དང་ཉེ་བའི་ཉོན་མོངས་བྱིང་རྒོད་དང༌། དབང་གི་མི་མཐུན་པའི་ཕྱོགས་དེ་གསུམ་མོ། །དེ་ལ་རྩོལ་བས་ལམ་བསྒོམ་པའི་ཕྱིར་རྩོལ་བ་ནི་དང་པོའི་གཉེན་པོའོ།། ཞི་གནས་ལ་སོགས་པའི་རྒྱུ་རྣམས་ལ་དྲན་པ་ཉེ་བར་གནས་པས་བྱིང་རྒོད་མེད་པའི་ཕྱིར་དྲན་པ་ནི་གཉིས་པའི་གཉེན་པོའོ། །བསམ་གཏན་ལ་གནས་ནས་མངོན་ཤེས་ལ་སོགས་པ་ཡོན་ཏན་འགྲུབ་པའི་ཕྱིར་ཏིང་ངེ་འཛིན་ནི་གསུམ་པའི་གཉེན་པོའོ། །ཇི་སྐད་དུ། ཉོན་མོངས་ཉེ་བའི་ཉོན་མོངས་དབང༌། །མི་མཐུན་ཕྱོགས་ཀྱི་གཉེན་པོའོ། །ཞེས་གསུངས་སོ། ། རྣམ་པར་ཐར་པའི་སྒོ་གསུམ་ནི། ཀུན་བཏགས་པའི་ཆོས་ཐམས་ཅད་རང་གི་མཚན་ཉིད་མེད་པའི་ཕྱིར་ཡོངས་སུ་གྲུབ་པ་སྟོང་པ་ཉིད་དུ་སོ་སོར་རྟོག་པའི་རྩེ་གཅིག་ཏུ་གནས་པ་ནི་རྣམ་པར་ཐར་པའི་སྒོ་སྟོང་པ་ཉིད་ཀྱི་ཏིང་ངེ་འཛིན་ཏོ། །ཡོངས་སུ་གྲུབ་པའི་ཆོས་ཐམས་ཅད་སྤྲོས་པའི་མཚན་མ་མེད་པར་སོ་སོར་རྟོག་པའི་སེམས་རྩེ་གཅིག་ཏུ་གནས་པ་ནི་རྣམ་པར་ཐར་པའི་སྒོ་མཚན་མ་མེད་པའི་ཏིང་ངེ་འཛིན་ཏོ། །ཆོས་ཉིད་རང་བཞིན་གྱིས་དག་པ་ལ་བསོད་ནམས་དང༌། བསོད་ནམས་མ་ཡིན་པ་དང༌། མི་གཡོ་བའི་ལས་འདུ་བྱེད་པ་མེད་པར་སོ་སོར་རྟོག་པའི་སེམས་པ་རྩེ་གཅིག་པ་ནི་རྣམ་པར་ཐར་པའི་སྒོ་སྨོན་པ་མེད་པའི་ཏིང་ངེ་འཛིན་ཏོ། ། དེ་ལ་ཀུན་བཏགས་པ་རྣམས་མཚན་ཉིད་མེད་པར་མཐོང་བ་ནི་སྟོང་པ་ཉིད་ཀྱི་ཏིང་ངེ་འཛིན་ཏོ། །ཡོངས་སུ་གྲུབ་པ་ལ་ཞི་བའི་མཚན་ཉིད་དུ་མཐོང་བ་ནི་མཚན་མ་མེད་པའི་ཏིང་ངེ་འཛིན་ཏོ། །གཞན་གྱི་དབང་ལ་མི་མཐུན་པར་མཐོང་བ་ནི་སྨོན་པ་མེད་པའི་ཏིང་ངེ་འཛིན་ཏོ། །ཤེས་པ་བཅུ་གཅིག་ནི་སྡུག་བསྔལ་ཤེས་པ་དང༌། ཀུན་འབྱུང་ཤེས་པ་དང༌། འགོག་པ་ཤེས་པ་དང༌། ལམ་ཤེས་པ་དང༌། ཟད་པ་ཤེས་པ་དང༌། མི་སྐྱེ་བ་ཤེས་པ་དང༌། ཆོས་ཤེས་པ་དང༌། རྗེས་སུ་རྟོགས་པ་ཤེས་པ་དང༌། ཀུན་རྫོབ་ཤེས་པ་དང༌། ཡོངས་སུུ་འདྲེས་པ་ཤེས་པ་དང༌། སྒྲ་ཇི་བཞིན་ཅེས་པའོ། ། དེ་ལ་དང་པོ་སྡུག་བསྔལ་མི་སྐྱེ་ཞིང་རྒྱུན་ཆད་པར་ཞུགས་པའི་ཤེས་པ་ཡིན་ནོ། །གཉིས་པ་ནི་ཀུན་འབྱུང་གི་ངོ་བོ་ལས་དང་་ཉོན་མོངས་སྤངས་པར་ཤེས་པའོ། །གསུམ་པ་ནི་ཉེ་བར་ལེན་པའི་ཕུང་པོ་ལྔ་ཟད་ཅིང་འགོག་པ་ཤེས་པའོ། །བཞི་པ་ནི་སྡུག་བསྔལ་འགོག་པ་རྒྱུ་འཕགས་པའི་ལམ་ཡན་ལག་བརྒྱད་པ་ཤེས་པའོ། །ལྔ་པ་ནི་དགྲ་བཅོམ་པའི་ས་ལ་དུག་གསུམ་ཟད་པར་ཤེས་པའོ། །དྲུག་པ་ནི་སྲིད་པའི་འགྲོ་བར་མི་སྐྱེ་བར་ཤེས་པའོ། ། བདུན་པ་ནི་རྣམ་པར་གྲོལ་བ་དེ་མངོན་སུམ་དུ་བྱེད་པས་ཕུང་པོ་ལྔ་བཅོས་མར་ཡོངས་སུ་གཅོད་པའི་ཤེས་པའོ། །བརྒྱད་པ་ནི་རྗེས་སུ་དཔག་པ་ཡིན་པའི་ཕྱིར་ཕུང་ཁམས་སྐྱེ་མཆེད་མི་རྟག་པར་ཤེས་པའོ། །དགུ་པ་ནི་གཅིག་ཁོ་ནས་ཀུན་བཏགས་པ་ལ་དམིགས་པའི་ཕྱིར་གཞན་གྱི་སེམས་ཤེས་པའོ། །བཅུ་པ་ནི་ཡོངས་སུ་འདྲེས་པ་དང༌། གོམས་པར་བྱེད་པ་དང༌། བསྒོམས་པ་རྣམས་དོན་གཅིག་གོ །ཡོངས་སུ་འདྲེས་པ་ཤེས་པ་ལ་གཉིས་སྟེ། ཡང་དག་པར་བསྒྲུབ་པའི་ངོ་བོ་ལམ་ཤེས་པ་དང༌། སྡིག་པ་ཐམས་ཅད་ཟིལ་གྱིས་མནན་ཅིང་ཡོངས་སུ་ཟད་པར་བྱས་པར་ཤེས་པའོ། །བཅུ་གཅིག་པ་ནི་དེ་བཞིན་གཤེགས་པ་རིས་དྲུག་གི་སྒྲ་དང་བརྗོད་པ་ཐམས་ཅད་རྟོག་པའོ། །སྒྲ་དང་བརྗོད་པ་དང༌། འདུ་ཤེས་དང་བཏགས་པ་ནི་རྣམ་གྲངས་སོ། །དབང་པོ་གསུམ་ནི་མི་ཤེས་པ་ཀུན་ཤེས་པར་བྱེད་པའི་དབང་པོ་དང༌། ཀུན་ཤེས་པའི་དབང་བོ་དང༌། ཀུན་ཤེས་པ་དང་ལྡན་པའི་དབང་པོའོ། །མཐོང་བའི་ལམ་དང་སློབ་པ་དང་མི་སློབ་དག་གི་གོ་རིམ་བཞིན་ནོ། །དབང་པོའི་ངོ་བོ་ནི་དད་པ་བརྩོན་འགྲུས་དྲན་པ་ཏིང་ངེ་འཛིན་ཤེས་རབ་ཀྱི་དབང་པོའོ། །རྣམ་པར་བྱང་བའི་ཆོས་ལ་དབང་བྱེད་པའི་ཕྱིར་རོ། །ཏིང་ངེ་འཛིན་གསུམ་ནི་རྟོག་དཔྱོད་དང་བཅས་པའི་ཏིང་ངེ་འཛིན་ནི་བསམ་གཏན་དང་པོ་སྒྲུབས་ནས་གནས་པའོ། །རྟོག་པ་མེད་ལ་དཔྱོད་པ་ཙམ་གྱི་ཏིང་ངེ་འཛིན་ནི་བསམ་གཏན་དང་པོ་དང་གཉིས་པའི་བར་གང་ཡིན་པ་མི་རྟོག་མི་དཔྱོད་པའི་ཏིང་ངེ་འཛིན་ནི་བསམ་གཏན་གཉིས་པ་ནས་སྲིད་རྩེའི་པར་གང་ཡིན་པ་དེ། རགས་པ་དང་འབྲིང་དང་ཕྲ་མོ་ཉིད་རྟོགས་པར་བྱ་བའི་ཕྱིར་རོ། །རྗེས་སུ་དྲན་པ་བཅུ་ནི། སངས་རྒྱས་དང་ཆོས་དང་དགེ་འདུན་དང་ཚུལ་ཁྲིམས་དང་གཏོང་བ་དང་ལྷ་དང་སྐྱེ་བ་དང་འཆི་བ་དང་ལུས་སུ་གཏོགས་པ་དང་དབུགས་འབྱུང་རྔུབ་རྗེས་སུ་དྲན་པའོ། །ཚད་མེད་པ་བཞིན་ནི་བྱམས་པ་དང་སྙིང་རྗེ་དང་དགའ་བ་དང༌། བཏང་སྙོམས་ཚད་མེད་པའོ། །དེ་ལ་བྱམས་པ་ནི་གསུམ་སྟེ་མོས་སྤྱོད་ཀྱི་ས་ལ་སེམས་ཅན་ལ་དམིགས་པའོ། །ས་བདུན་པའི་བར་ལ་དེ་བཞིན་ཉིད་ལ་དམིགས་པའོ། །ས་བརྒྱད་པ་ཡན་ཆད་ནི་དམིགས་པ་མེད་པའོ། །སྙིང་རྗེ་ཡང་གསུམ་སྟེ། སེམས་ཅན་སྡུག་བསྔལ་བ་ལ་དམིགས་པ་དང་ཉེས་པར་སྤྱོད་པ་མང་བའི་སེམས་ཅན་ལ་དམིགས་པ་དང༌། རྐྱེན་དང་མི་ལྡན་པར་རྣམ་པར་གྲོལ་བའི་སེམས་ཅན་ལ་དམིགས་པའོ། །དགའ་བ་ཡང་གསུམ་སྟེ། བདེ་བའི་སེམས་ཅན་ལ་དམིགས་པ་དང༌། བདག་གི་ཚོགས་རྫོགས་ལ་དམིགས་པ་དང༌། དམ་པའི་ཆོས་ཀྱི་རོ་མྱང་བ་ལ་དམིགས་པའོ། །བཏང་སྙོམས་ཀྱང་གསུམ་སྟེ། སེམས་ཅན་གྱི་དོན་དཔྱད་པ་ལ་སྐལ་པ་ཡོད་པ་དང་མེད་པ་ལ་དམིགས་པ་དང༌། རྙེད་མ་རྙེད་ལ་སོགས་འཇིག་རྟེན་གྱི་ཆོས་ལ་མཉམ་ཉིད་དུ་དམིགས་པ་དང༌། ཚོགས་ཡོངས་སུ་རྫོགས་པར་བྱ་བ་ལ་དུས་དང་དུས་མ་ཡིན་པ་ལ་དམིགས་པའོ། ། སེམས་ཅན་ཚད་མེད་པ་ལ་དམིགས་པ་དང༌། ཚོགས་ཚད་མེད་པའི་རྒྱུ་དང་ཆོས་ཚད་མེད་པ་འཐོབ་པའི་རྒྱུ་དང༌། ཡེ་ཤེས་ཚད་མེད་པའི་སྤྱོད་ཡུལ་ཡིན་པའི་ཕྱིར་་ཚད་མེད་པའོ། །ཡོན་ཏན་དང་ལྡན་པའི་བྱམས་སོགས་རེ་རེ་ཡང་ཡོན་ཏན་གསུམ་གསུམ་སྟེ་ཆེ་བ་ཉིད་དང་གཅིག་པ་ཉིད་དང་གནོད་པ་མེད་པའོ། །ཆེ་བ་ཡང་གསུམ་སྟེ། བསམ་པས་ཆེ་བ་ནི་ཡངས་པའོ། །འཕེལ་བས་ཆེ་བ་ནི་རྒྱ་ཆེན་པོར་གྱུར་པའོ། ། དམིགས་པས་ཆེ་བ་ནི་ཚད་མེད་པའོ། །གཅིག་པ་ཉིད་ནི་མི་རྟོག་པ་དང་བྱམས་སོགས་ཀྱིས་རྣམ་པར་གཅིག་པའི་ཕྱིར་མི་གཉིས་པའོ། །གནོད་པ་མེད་པ་ཡང་གསུམ་སྟེ། འཚེ་བའི་གཉེན་པོ་ཡིན་པའི་ཕྱིར་ནང་གི་ཆོས་ལས་བྱུང་བའི་གནོད་པ་མེད་པ་ནི་ཁོ་ན་མེད་པའོ། །ཕྱི་རོལ་གྱི་སེམས་ཅན་གྱིས་བྱམས་པ་གནོད་པ་མེད་པ་ནི་འགྲན་ཟླ་མེད་པའོ། །ཕྱི་རོལ་གྱི་འདུ་བྱེད་ལས་གྱུར་པའི་གནོད་པ་མེད་པའོ། །གསུམ་པོ་དེ་དག་ཀྱང་གོ་རིམ་བཞིན་དུ། འདོད་ཆགས་ལ་སོགས་པ་དང། དུག་ལ་སོགས་པ་དང། མེ་ལ་སོགས་པའི་གནོད་པ་མེད་པའི་ཕྱིར་རོ། །བསམ་གཏན་བཞི་ནི། འདོད་པ་དང་མི་དགེ་བའི་ཆོས་ལས་དབེན་པ་རྟོག་དཔྱོད་བཅས་པ་དབེན་པ་ལས་སྐྱེས་པ་དགའ་བ་དང་བདེ་བ་ཅན་བསམ་གཏན་དང་པོ་དང༌། རྟོག་དཔྱོད་བྲལ་བས་ནང་ཡོངས་སུ་དང་ཞིང་སེམས་ཀྱི་རྒྱུ་གཅིག་ཏུ་གྱུར་བས་རྟོག་དཔྱོད་མེད་པའི་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་དང༌། དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་དྲན་ཤེས་བཞིན་ཅན་ཡིན་དེ་བདེ་བ་ལུས་ཀྱིས་མྱོང་ལ། འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ། །ཞེས་བརྗོད་པ་སྟེ་དགའ་བ་མེད་པའི་བསམ་གཏན་གསུམ་པ་དང༌། བདེ་སྡུག་ཡང་ཡིད་བདེ་མི་བདེ་ཡང་ནུབ་པས་བདེ་སྡུག་གང་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པའོ། །དེ་ལ་ཉོན་མོངས་པ་དང་དངོས་པོའི་འདོད་པ་མཚུངས་པར་ལྡན་པ་སྟེ། དམིགས་པ་ལས་དབེན་པའི་ཕྱིར་རོ། །ལུས་ངག་ཡིད་ཉེས་པར་སྤྱོད་པ་མི་དགེ་བ་བཅུའི་ཆོས་ལས་དབེན་པའོ། །འདོད་པའི་སྒྲིབ་པས་དབེན་པ་ལས་སྐྱེས་པའོ། །འདོད་པའི་དོན་རྙེད་པའི་ཕྱིར་དགའ་བ་དང་གནས་ངན་ལེན་ཐམས་ཅད་དང་བྲལ་བས་ལུས་སེམས་ཤིན་ཏུ་སྦྱངས་ཏེ་ལས་སུ་རུང་བའི་ཕྱིར་བདེ་བ་ཅན་ནོ། །བསམ་གཏན་དང་པོར་རྟོག་དཔྱོད་ལ་སྐྱོན་དུུ་མ་མཐོང་བས་འདོད་པའི་གཉེན་པོར་དེ་གཉིས་དང་མཚུངས་པར་ལྡན་ཡང་བསམ་གཏན་གཉིས་ལ་སྐྱོན་དུ་མཐོང་བས་དེ་གཉིས་དང་བྲལ་ཞིང་ནང་ཡོངས་སུ་དང་བ་དང༌། དེ་གཉིས་ཀྱིས་བར་དུ་གཅོད་པ་མེད་པས་སེམས་ཀྱི་རྒྱུད་གཅིག་ཏུ་གྱུར་པའོ། །བསམ་གཏན་གསུམ་པར་སེམས་གཡེང་བར་བྱེད་པའི་དགའ་བའི་ཚོང་བ་སྤངས་ཤིང་བཏང་སྙོམས་ལ་གནས་པ་དགའ་བའི་ཚོར་བ་མི་བསྐྱེད་པའི་ཕྱིར་ཤེས་རབ་ཀྱིས་གནས་པས་དྲན་ཤེས་བཞིན་ཅན་ཞི་བའི་ཚོར་བ་འབྱུང་སྟེ། དེའི་ཚེ་གཟུགས་ཀྱི་ལུས་དང་ཡིད་ཀྱི་ལུས་ཀྱིས་ཚོར་བའི་བདེ་བ་དང༌། ཤིན་ཏུ་སྦྱངས་པའི་བདེ་བ་མྱོང་བར་བྱེད་དོ། །བསམ་གཏན་འོག་མ་གཉིས་ལ་དེ་ལྟ་བུའི་བདེ་བ་དང་བཏང་སྙོམས་མེད་ལ་བཞི་པ་ལ་བཏང་སྙོམས་ཡོད་ཀྱང་བདེ་བ་མེད་པས་གསུམ་པ་འདི་བདེ་བ་དང་བཏང་སྙོམས་ཀྱིས་གནས་ཡིན་པའི་ཕྱིར། སངས་རྒྱས་ཉན་ཐོས་རྣམས་ཀྱིས་འདི་ལ་གཙོ་བོར་དེ་སྐད་བརྗོད་པའོ།། བསམ་གཏན་བཞི་པ་འདིར་སྔ་མ་གསུམ་གྱི་ཚོར་བ་ཐམས་ཅད་སྤངས་ཤིང་བཏང་སྙོམས་དང་དྲན་ཤེས་བཞིན་རྣམས་ཤིན་ཏུ་དག་པའི་ཕྱིར་རོ། །གཟུགས་མེད་པའི་སྙོམས་པར་འཇུག་པ་བཞི་ནི། རྣམ་པ་ཐམས་ཅད་དུ་ཁ་དོག་ཐམས་ཅད་ཀྱི་འདུ་ཤེས་ཐམས་ཅད་ལས་འདས་ཏེ། རྩིག་པ་ལ་སོགས་པ་ཐོགས་པའི་འདུ་ཤེས་ནུབ་ཅིང་བཟའ་བཏུང་གོས་རྒྱན་ལ་སོགས་པ་སྣ་ཚོགས་པའི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ། །སྙམ་པ་ནི་ནམ་མཁའ་མཐའ་ཡས་སྐྱེ་མཆེད་དོ། །དེ་ལས་འདས་དེ་རྣམ་ཤེས་མཐའ་ཡས་སོ། །སྙམ་པ་ནི་རྣམ་ཤེས་མཐའ་ཡས་སྐྱེ་མཆེད་དོ། །དེ་ལས་འདས་དེ་རྣམ་ཤེས་ལས་གུད་ན་དམིགས་པ་བཙལ་ན་གཟུགས་མེད་ཅིང༌། གཟུགས་ཡང་མེད་དོ་སྙམ་པ་ནི་ཅི་ཡང་མེད་པའི་སྐྱེ་མཆེད་དོ། །དེ་ལས་འདས་དེ་སྔར་ཡོད་པའི་འདུ་ཤེས་བཟློག་ཅིང་ད་ནི་ཅི་ཡང་མེད་པའི་འདུ་ཤེས་མེད་པ་དང༌། མཚན་མ་མེད་པའི་འདུ་ཤེས་ཤིན་ཏུ་ཕྲ་བ་ཡོད་པས་འདུ་ཤེས་མེད་མིན་གྱི་སྐྱེ་མཆེད་དོ། ། རྣམ་པར་ཐར་པ་བརྒྱད་ལ། དང་པོ་གཉིས་ནི་མི་སྡུག་པ་བསམ་གཏན་དང་པོ་གཉིས་པའི་རང་བཞིན་ནོ། །གསུམ་པ་ནི་བསམ་གཏན་བཞི་པའི་རང་བཞིན་ཆགས་པ་མེད་པའི་ངོ་བོ་ཉིད་དོ། །དེ་ལ་འདོད་པ་ན་སྤྱོད་པའི་ཁ་དོག་ལ་ཆགས་པའི་གཉེན་པོར་ནང་གི་སོགས་ལ་དམིགས་པའི་སྙོམས་པར་འཇུག་པ་ལ་སྙོམས་པར་ཞུགས་ནས་དེའི་འོག་ཏུ་ཕྱི་རོལ་གྱི་རྣམ་པར་སྔོས་པ་ལ་སོགས་པ་ལ་དམིགས་ནས་བསམ་གཏན་དང་པོ་ལ་སྙོམས་པར་འཇུག་པ་ནི་གཟུགས་ཅན་གཟུགས་རྣམས་ལ་བལྟ་བའོ། །དེ་བཞིན་དུ་བསམ་གཏན་དང་པོའི་ས་པའི་ཁ་དོག་ལ་ཆགས་པའི་གཉེན་པོར་རིམ་པ་ལྟར་བསམ་གཏན་དང་པོ་དང་གཉིས་པ་ལ་སྙོམས་པར་འཇུག་པ་ཡང་གཟུགས་ཅན་གཟུགས་རྣམས་ལ་ལྟ་བ་ཡིན་ནོ། །ནང་གི་དབང་གི་གཟུགས་ཅན་ཕྱི་རོལ་གྱི་དབང་གིས་གཟུགས་རྣམས་ལ་ཞེས་བྱའོ། །ནང་གི་ལ་མ་དམིགས་པར་ཕྱི་རོལ་གྱི་རྣམ་པར་སྔོས་པ་སོགས་འབའ་ཞིག་ལ་དམིགས་ནས་སྔ་མ་བཞིན་དུ་འདོད་པ་དང་བསམ་གཏན་དང་པོའི་ས་པའི་ཁ་དོག་ལ་ཆགས་པའི་གཉེན་པོར་རིམ་ལྟར་བསམ་གཏན་དང་པོ་དང་གཉིས་པ་ལ་སྙོམས་པར་འཇུག་པ་ནི་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་ལྟ་བ་ཡིན་ནོ། །སྡུག་པར་མོས་པ་ནི་མི་སྡུག་པར་བསྒོམ་པས་སེམས་ཀྱི་རྒྱུད་ཞུམ་པ་དགའ་བར་བྱ་བ་འམ་ཅི་ཡིད་དུ་འོང་བའི་གཟུགས་སོགས་ལ་སྡུག་པ་ཉིད་དུ་ཡིད་ལ་བྱེད་ན་ཁ་དོག་ལ་ཆགས་སོགས་ཀྱི་དབང་གིས་སེམས་ཀྱི་རྒྱུད་གཞན་དུ་འགྱུར་རམ་མི་འགྱུར་ཞེས་སད་པའི་ཕྱིར་ཡིད་དུ་འོང་བའི་གཟུགས་སོགས་ལ་་དམིགས་ནས་བསམ་གཏན་བཞི་ལ་སྙོམས་པར་འཇུག་པ་ནི་སྡུག་པའི་རྣམ་པར་ཐར་པ་ཡིན་ནོ། །སྙོམ་པར་འཇུག་པའི་སྐད་ཅིག་ལ་སྡུག་པ་སོགས་ཀྱི་རྟོག་པ་མེད་ཀྱང་སྔར་འཇུག་པའི་དབང་གིས་དེ་སྐད་བྱའོ། །གཟུགས་མེད་ཀྱི་རྣམ་ཐར་བཞི་ནི་སྔར་བཤད་པ་དེ་ཉིད་དོ། །འདི་ཤེས་དང་ཚོར་བ་འགག་པའི་སྙོམས་པར་འཇུག་པ་ནི་སྣམ་པར་ཐར་བ་བརྒྱད་དོ། །མཐར་གྱི་གནས་པའི་སྙོམས་པར་འཇུག་པ་དགུ་ནི་བསམ་གཏན་བཞི་གཟུགས་མེད་བཞི་འགོག་པའི་སྙོམས་འཇུག་གོ །སྟོབས་བཅུ་ནི། གནས་དང་གནས་མ་ཡིན་པ་མཁྱེན་པ་དང་ལས་དང་རྣམ་པར་སྨིན་པ་མཁྱེན་པའི་དང་སྣོད་བཅུད་ཀྱི་འཇིག་རྟེན་གྱི་ཁམས་སྣ་ཚོགས་པ་ཁམས་དུ་མ་པ་མཁྱེན་པའི་དང༌། མོས་པ་སྣ་ཚོགས་མཁྱེན་པའི་དང༌། དབང་པོ་མཆོག་དང་མཆོག་མ་ཡིན་པ་མཁྱེན་པའི་དང༌། ཐམས་ཅད་དུ་འགྲོ་བའི་ལམ་མཁྱེན་པའི་དང༌། བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པའི་ཀུན་ནས་ཉོན་མོངས་པ་དེའི་རྒྱུ་དང་རྣམ་པར་བྱང་བ་དང༌། རྣམ་པར་བྱང་བ་དེའི་རྒྱུ་མཁྱེན་པའི་དང༌། སྔོན་གྱི་གནས་རྗེས་སུ་དྲན་པ་མཁྱེན་པའི་དང༌། ལྷའི་མིག་གི་མངོན་པར་ཤེས་པ་མཁྱེན་པའི་དང༌། ཟག་པ་ཟད་པ་མཁྱེན་པའི་སྟོབས་རྣམས་སོ། །མི་འཇིགས་པ་བཞི་ནི། ང་མངོན་པར་རྫོགས་པར་སངས་རྒྱས་སོ། །ཞེས་དམ་བཅས་པ་དང་ང་ཟག་པ་ཟད་དོ་ཞེས་པ་དང་བར་དུ་གཅོད་པའི་ཆོས་སུ་བསྟན་པ་དང༌། ངེས་པར་འབྱིན་པ་ལམ་དུ་བསྟན་པ་ལ། ཆོས་འདི་སངས་མ་རྒྱས་སོ། །ཟག་པ་མ་ཟད་དེ། འདིས་བར་དུ་མི་གཅོད་དོ། ལམ་འདི་ངེས་པར་མི་འབྱུང་ངོ་ཞེས་ལྷ་དང་བདུད་དང་ཚངས་པ་དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་འཇིག་རྟེན་ན་ཆོས་དང་མཐུན་པར་རྒོལ་བའི་རྒྱུ་མ་མཐོང་བས་བདེ་བ་ཐོབ་བག་ཚ་བ་མེད་པ་ཐོབ་མི་འཇིགས་པ་ཐོབ་སྟེ། ཁྱུ་མཆོག་རླབས་པོ་ཆེའི་གནས་སུ་དམ་འཆའོ། །འཁོར་གྱི་ནང་དུ་སེང་གེའི་སྒྲ་སྒྲོགས་སོ། །ཆོས་དང་མཐུན་པར་དགེ་སྦྱོང་ལ་སོགས་པ་གང་གིས་ཀྱང་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །ལྷའི་མིག་གིས་གཞན་གྱི་སེམས་ཤེས་པ་ལ་སོགས་པ་ཕུན་སུམ་ཚོགས་པའི་ཕྱིར་ལྷ་དང་བདུད་སྨོས་སོ། །རྫུ་འཕྲུལ་དང་མཐུ་ཆེ་བའི་ཕྱིར་ཚངས་པ་སྨོས་སོ། །ཤེས་རབ་ཀྱི་ང་རྒྱལ་བྱེད་པའི་ཕྱིར་དགེ་སྦྱོང་དང་བྲམ་ཟེར་སྨོས་སོ། །སྐུའི་འཕྲིན་ལས་རྣམ་པར་དག་པའི་ཕྱིར་ལུས་ཀྱི་སྐྱོན་སྤུ་ཟིང་བྱེད་པ་ལ་སོགས་པ་མེད་པས་ལུས་བདེ་བ་ཐོབ་ཅིང་དེའི་དབང་གིས་ཁྱུ་མཆོག་ཅང་ཤེས་ཀྱི་གནས་སུ་ཞལ་གྱིས་འཆིས་སོ། །གསུང་གི་འཕྲིན་ལས་རྣམ་པར་དག་པའི་ཕྱིར་གསུང་ཞུམ་པ་ལ་སོགས་པའི་སྐྱོན་མེད་པས་གསུང་བག་ཚ་བ་མེད་པ་ཐོབ་ཅིང་དེའི་དབང་གིས་སེང་གེ་བཞིན་དུ་སྒྲོགས་སོ། །ཐུགས་ཀྱི་འཕྲིན་ལས་རྣམ་པར་དག་པའི་ཕྱིར་ཐེ་ཚོམ་ལ་སོགས་པའི་སྐྱོན་མེད་པས་ཐུགས་མི་འཇིགས་པ་ཐོབ་ཅིང༌། དེའི་དབང་གིས་ཚངས་པ་བཞིན་འཁོར་ལོ་བསྐོར་རོ། །ཡེ་ཤེས་ལེའུ་འགྲེལ་བར། མགོན་པོ་སྦྱན་རས་གཟིགས་དབང་ཕྱུག་གི་ཞལ་སྔ་ནས། སངས་རྒྱས་རྣམས་ཀྱི་མི་འཇིགས་པ་བཞི་ནི་འདི་ལྟ་སྟེ། ཆོས་ཐམས་ཅད་མཁྱེན་པ་ལ་མི་འཇིགས་པ་དང༌། ཆོས་ཐམས་ཅད་སྟོན་པ་ལ་མི་འཇིགས་པ་དང༌། སྒྲིབ་པ་མེད་པའི་ལམ་དུ་འཇུག་པ་ལ་མི་འཇིགས་པ་དང༌། ཟག་པ་ཟད་པའི་ཡེ་ཤེས་ལ་མི་འཇིགས་པའོ། །ཞེས་གསུངས་སོ། །སོ་སོ་ཡང་དག་པ་རིག་པ་བཞི་ནི། ཆོས་དང༌། དོན་དང༌། ངེས་པའི་ཚིག་དང༌། སྤོབས་པ་སོ་སོ་ཡང་དག་པ་རིག་པའོ། །དེ་ལ་སངས་རྒྱས་ཀྱི་གསུང་རབ་ཀྱི་གཞུང་མང་པོ་འདིས་ཆོས་སོ་སོ་ཡང་དག་པར་རིག་པར་འགྱུར་པའི་ཕྱིར་དེ་ཤེས་པ་ནི་ཆོས་སོ་སོ་ཡང་དག་པར་རིག་པའོ། །བརྗོད་བྱའི་ཚོགས་ནི་དོན་དེ་དེ་ཤེས་པ་ནི་དོན་སོ་སོ་ཡང་དག་པར་རིག་པའོ། །རིས་དྲུག་ཏུ་གཏོགས་པའི་སེམས་ཅན་ཐམས་ཅད་ཀྱི་སྐད་བརྗོད་པ་གང་ཡིན་ཐམས་ཅད་ནི་ངེས་པའི་ཚིག་སྟེ་དེ་ཤེས་པ་ནི་ངེས་པའི་ཚིག་སོ་སོ་ཡང་དག་པར་རིག་པའོ། །ཆོས་ཤེས་པ་དང༌། དོན་ཤེས་པ་དང་ངེས་པའི་ཚིག་ཤེས་པ་སྟེ་ཤེས་པ་གསུམ་པོ་དེ་ཉིད་ནི་སྤོབས་པ་སོ་སོ་ཡང་དག་པ་རིག་པའོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ནི། དེ་བཞིན་གཤེགས་པ་ལ་འཁྲུལ་པ་དང༌། ཅ་ཅོ་དང༌། བསྙེལ་བ་དང༌། ཐ་དད་པའི་འདུ་ཤེས་དང༌། སེམས་མཉམ་པར་མ་བཞག་པ་དང༌། སོ་སོར་མ་བརྟགས་པའི་བཏང་སྙོམས་མེད་པ་ནི་སྤྱོད་པ་མ་འདྲེས་པ་དྲུག་དང༌། འདུན་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་ཉམས་པ་མེད་པ་ནི་རྟོག་པ་ལ་མ་འདྲེས་པ་དྲུག་དང་སྐུ་གསུང་ཐུགས་ཀྱི་འཕྲིན་ལས་ཐམས་ཅད་ཡེ་ཤེས་་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ནི་འཕྲིན་ལས་མ་འདྲེས་པ་གསུམ་དང༌། འདས་པ་དང༌། མ་འོངས་པ་དང༌། ད་ལྟར་གྱི་དུས་ལམ་ཆགས་མ་ཐོགས་པའི་ཡེ་ཤེས་གཟིགས་པ་རབ་ཏུ་འཇུག་པ་ནི་ཡེ་ཤེས་མ་འདྲེས་པ་གསུམ་སྟེ་དེ་ལྟར་ན་བཅོ་བརྒྱད་དོ། །དེ་ལ་དགྲ་བཅོམ་པ་རྣམས་བསོད་སྙོམས་ལ་རྒྱུུ་བ་ན་གླང་པོ་ཆེ་དང་ཆོམ་རྐུན་ལ་སོགས་པའི་གནོད་པ་འབྱུང་བ་མ་ཤེས་པའི་འཁྲུལ་པ་འབྱུང་པ་དང༌། དགྲ་བཅོམ་པ་དགོན་པ་ན་ལམ་སྟོར་ནས་ཅ་ཅོའི་སྒྲ་འབྱིན་པ་དང༌། གང་མོ་རྟ་སྐད་འབྱིན་པ་ལ་སོགས་པ་དང༌། དགྲ་བཅོམ་པ་རྣམས་མ་བསམས་ན་བརྗེད་པས་བྱ་བ་ཤོར་བ་དང༌། དུས་ལས་ཡོལ་བ་བྱུང་བ་དང༌། དགྲ་བཅོམ་པ་དག་གང་གི་ཚེ་སྙོམས་པར་ཞུགས་པ་དེའི་ཚེ་མཉམ་པར་བཞག་ཀྱང་གཞན་གྱི་ཚེམ་ཡིན་པ་དང༌། དགྲ་བཅོམ་པ་དག་འཁོར་འདས་ལ་ཐ་དད་པའི་འདུ་ཤེས་སུ་འགྱུར་བ་དང༌། དགྲ་བཅོམ་པ་དག་སོ་སོར་མ་བརྟགས་པར་སེམས་ཅན་གྱི་དོན་ཡལ་བར་འདོར་བ་དང༌། དགྲ་བཅོམ་པ་དག་རང་བཞིན་གྱི་སངས་རྒྱས་ཀྱི་ས་དང་མཛད་པ་ལ་འདུན་པ་མི་སྐྱེའི་ཉན་ཐོས་ཀྱི་བྱ་བ་ཉིད་ལ་འདུན་པར་འགྱུར་ཏེ། དེ་རྣམས་ནི་དེ་བཞིན་གཤེགས་པ་ཐམས་ཅད་ཀྱི་ཐམས་ཅད་དུ་མེད་དོ། །དེ་བཞིན་དུ་དེ་བཞིན་གཤེགས་པའི་བརྩོན་འགྲུས་ལ་སོགས་པ་རྣམས་ཉན་ཐོས་རྣམས་ལ་མེད་དོ་སྤྱོད་པའི་སྐབས་ཀྱི་སྙེལ་བ་མེད་པ་དང༌། རྟོགས་པའི་སྐབས་ཀྱི་དྲན་པ་མེད་པ་གཉིས་ཀྱི་ཁྱད་པར་ནི། གཞན་དག་གི་དྲན་པ་ནི་མ་བསམ་ན་བརྗེད་པར་འགྱུར་བ་ལས་དེ་མེད་པ་ནི་བསྙེལ་བ་མེད་པའོ། །སངས་རྒྱས་ནས་བྱ་བ་ཐམས་ཅད་དྲན་པའི་ལམ་དུ་བཞག་པས་ཕྱིས་བསམ་མི་དགོས་ཤིང་དྲན་བཞིན་པ་ནི་དྲན་པ་ཉམས་པ་མེད་པའོ། །མི་ཉམས་པའི་ཏིང་ངེ་འཛིན་ནི། དེ་བཞིན་ཉིད་ལ་བྱའོ། །ཉན་ཐོས་ཀྱི་རྣམ་གྲོལ་ནི་སྒྲའི་རྗེས་སུ་འགྲོ་བའོ། །རང་རྒྱལ་གྱི་རྣམ་གྲོལ་ནི་རྐྱེན་གྱི་རྗེས་སུ་འགྲོའོ། །སངས་རྒྱས་ཀྱི་རྣམ་གྲོལ་ནི་ཆོས་ཉིད་ཀྱི་རྗེས་སུ་འགྲོ་སྟེ། སྒྲིབ་གཉིས་ལས་གྲོལ་བ་དང༌། འབྲས་བུུ་ཕུན་ཚོགས་འཇུག་པས་གྲོལ་བ་དང༌། མི་གནས་པའི་མྱང་འདས་ཀྱི་གྲོལ་བ་སྟེ་ནམ་མཁའ་ལྟར་རྣམ་པར་གྲོལ་བ་ཟད་མི་ཤེས་ཤིང་སེམས་ཅན་གྱི་དོན་ལ་འཁོར་བ་སྲིད་ཀྱི་པར་དུ་འཇུག་པས་ན་རྣམ་པར་གྲོལ་བ་ཡོངས་སུ་ཉམས་པ་མི་མངའ་འོ། །སྐུ་གསུང་ཐུགས་ཀྱི་བྱ་བ་གསུམ་པོ་ཡེ་ཤེས་སྔར་བྱུང་བའི་ཕྱིར་ཡེ་ཤེས་སྔོན་དུ་འགྲོ་བའོ། །ཡེ་ཤེས་དང་ལྷན་ཅིག་ཏུ་རྒྱུ་བའི་ཕྱིར་ཡེ་ཤེས་ཀྱི་རྗེས་སུ་འབྲང་བའོ། །ཉན་ཐོས་རྣམས་ལ་ལུས་ངག་ཡིད་ཀྱི་བྱ་བ་མ་བསམ་པ་དང་མ་ཚོར་བ་དང༌། སེམས་ཅན་གྱི་དོན་དུ་མི་འགྱུར་བར་བྱེད་པ་སྲིད་དོ། །དགྲ་བཅོམ་པ་དག་གང་དང་གང་དུ་རྩོལ་བ་གཏོང་བ་དེ་དང་དེ་ཉིད་ཤེས་ཀྱི་གཞན་དུ་མི་ཤེས་ལ་ཆགས་ཤིང་ཐོགས་པ་དེ་ལྟ་བུ་དེ་བཞིན་གཤེགས་པ་ལ་མེད་དོ། །དེ་ལྟར་དྲན་པ་ཉེར་བཞག་ནས་མ་འདྲེས་བཅོ་བརྒྱད་ཀྱི་པར་ཆོས་ཚན་པ་ཉི་ཤུ་རྩ་གཅིག་བསྟན་པ་ནི། ལམ་དང་ཞེས་པའོ། །གཟུངས་དང་ཞེས་པ་ནི་འཛིན་པར་བྱེད་པས་ན་གཟུངས་སོ། །དེ་ལ་བཞི་སྟེ་བཟོད་པ་འཐོབ་པར་བྱེད་པའི་རྒྱུར་གྱུར་པའི་གཟུངས་དང༌། གསང་སྔགས་ཀྱི་གཟུངས་དང། ཆོས་ཀྱི་གཟུངས་དང༌། དོན་གྱི་གཟུངས་སོ། །མོས་སྤྱོད་ཀྱི་ས་ལ་ཆོས་ཐམས་ཅད་བརྗོད་དུ་མེད་པར་ངེས་པར་བྱས་བ་དང་ཆོས་ཐམས་ཅད་སྟོང་པ་ཉིད་དུ་རྟོགས་པས་དགའ་བ་ཆེན་པོ་སྐྱེ་སྟེ། དེའི་ཚེ་གཟུངས་འཐོབ་པའོ། །དེ་ཉིད་ས་དང་པོའི་ཡེ་ཤེས་སྐྱེ་བ་དང་མཐུན་པ་དོན་དམ་པའི་ཆོས་ལ་བཟོད་པ་མོས་སྤྱོད་ཀྱི་ས་ཉིད་ལ་འཐོབ་པའི་རྒྱུ་ཡིན་པའི་ཕྱིར་རོ། །དེ་སྐད་ཅེས་བྱའོ།། དེ་ལྟར་མོས་སྤྱོད་ཀྱི་ས་ལ་གཟུངས་ཀྱི་བཟོད་པའི་ཡེ་ཤེས་དེ་སྐྱེས་ནས་མྱུར་དུུ་ས་དང་པོ་ཐོབ་པར་གྱུར་རོ། །གསང་སྔགས་ཀྱི་གཟུངས་ནི་ས་དང་པོ་ཡན་ཆད་དུ་སེམས་ཅན་གྱི་རིམ་ནད་ལ་སོགས་པ་ཉེ་བར་ཞི་བར་བྱེད་པའི་གསང་སྔགས་ཀྱི་གཞི་རྣམས་བྱིན་གྱིས་རློབས་པའི་ཏིང་ངེ་འཛིན་གྱིས་ནུས་པའོ། །ཆོས་ཀྱི་གཟུངས་ནི་སར་ཆུད་བའི་བྱང་ཆུབ་སེམས་དཔའ་རྣམས་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཆོས་ཉན་པ་ན་སྔར་མི་ཤེས་ཤིང་མ་ཐོས་པའི་མིང་ཚིག་ཡི་གེར་གཏོགས་པའི་ཆོས་ཚད་མེད་པ་རྣམས་རིམ་པ་དེ་ཉིད་ཀྱིས་མི་བརྗེད་པར་འཛིན་པའི་དྲན་པ་དང་ཤེས་རབ་ཡིན་ནོ། །དོན་གྱི་གཟུངས་ནི་ཆོས་རྣམས་ཀྱི་དོན་ཚད་མེད་པ་དེ་དག་དུས་དཔག་ཏུ་མེད་པའི་བར་དུ་ཡང་མི་བརྗེད་པར་འཛིན་པའི་དྲན་པ་དང་ཤེས་རབ་གཅིག་ཏུ་བྱས་པ་ཉིད་ཡིན་ནོ། །དེ་ལ་གཟུངས་དང་པོ་ནི་མོས་སྦྱོད་ཀྱི་ས་ཉིད་ལ་འཐོབ་ཅིང༌། ལྷག་མ་གསུམ་པོ་ནི་ས་དང་པོ་ལ་སོགས་པ་ལ་འཐོབ་པོ། ། ས་དང་པོ་ལ་གནས་ཁྱད་པར་དུ་འཕགས་པ་ཞེས་བྱ་བའི་གཟུངས་འཐོབ་བོ། །ས་གཉིས་པ་ལ་དྲི་མ་མེད་པ་ཞེས་བྱ་བ་དང༌། གསུམ་པ་ལ་ཤིན་ཏུ་བརྟན་པ་དང༌། བཞི་བ་ལ་ཐུབ་པར་དཀའ་བ་དང༌། ལྔ་པ་ལ་ཡོན་ཏན་གྱིས་སེམས་བརྒྱན་པ་དང༌། དྲུག་པ་ལ་ཡེ་ཤེས་ཀྱི་དཀྱིལ་འཁོར་གྱི་སྒྲོན་མ་དང༌། བདུན་པ་ལ་ཁྱད་པར་དུ་འགྲོ་བ་དང༌། བརྒྱད་པ་ལ་མི་རྟོག་པ་དང༌། དགུ་པ་ལ་སྒོ་མཐའ་ཡས་པ་དང༌། ས་བཅུུ་བ་ལ་མི་ཟད་པའི་ཟ་མ་དོག་ཞེས་བྱ་བའི་གཟུངས་འཐོབ་པོ། ། དེ་ལྟར་ས་དང་སར་གཟུངས་ཚད་མེད་གྲངས་མེད་པ་སྟོང་ཕྲག་ཏུ་མ་ཐོབ་པར་གསུངས་སོ། །འདིར་གཟུངས་ཀྱི་སྒོ་ནི་ཨ་ལ་སོགས་པའི་ཡི་གེ་སྟེ། ཡི་གེ་དང་དེའི་སྒོ་ནས་ཆོས་ཐམས་ཅད་སྐྱེ་བ་མེད་པ་དང་རྟུལ་དང་བྲལ་བ་ལ་སོགས་པར་རྟོག་པའི་ཡེ་ཤེས་དྲན་པ་དང་ཤེས་རབ་སྐྱེ་སྟེ། སྐྱེ་བ་མེད་པ་ལ་སོགས་པའི་དོན་འཛིན་པས་ན་གཟུངས་སོ། །འདི་ལྟར་ཨ་ལ་སྐྱེ་བ་མེད་པ་འདི་དོན་སྒྲོ་བཏགས་ནས་ཞི་གནས་དང་ལྷག་མཐོང་གི་སྦྱོར་བ་བསྒོམ་པ་དེའི་ཚེ་གོམས་པའི་སྟོབས་ཀྱིས་ཨ་གཅིག་གིས་ཆོས་ཐམས་ཅད་སྐྱེ་བ་མེད་པའི་རྣམ་པར་སྣང་བ་ནི་དེ་ལྟར་རྟོགས་པའི་རྒྱུ་དེ་ཨ་ཡིན་ནོ། །དེ་བཞིན་དུ། ར་པ་ཙན་ལ་སོགས་པ་ཡིག་གེ་བཞི་བཅུ་རྩ་བཞི་ཙམ་བྱུང་བ་ལ་ཡང་སྦྱར་བར་བྱའོ། །དེ་ལྟར་ཆོས་ཐམས་ཅད་སྐྱེ་བ་མེད་པ་དང༌། རྡུལ་དང་བྲལ་བ་ལ་སོགས་པའི་དེ་བཞིན་ཉིད་ཀྱི་རང་བཞིན་རབ་ཏུ་རྟོགས་པའི་ཡེ་ཤེས་ནི་ཡི་གེ་དེ་དང་དེའི་སྒོ་ནས་འཇུག་ཅིང༌། སྐྱེ་བའི་ཕྱིར་ཡི་གེ་རྣམས་ནི་གཟུངས་ཀྱི་སྒོ་ཡིན་ནོ། །ཡི་གེ་དེ་་དག་ལ་དམིགས་ནས་བྱུང་བའི་ཡེ་ཤེས་ལ་ཡང་གཟུངས་ཀྱི་སྒོ་ཞེས་བྱའོ། །ཡི་གེ་འདི་རྣམས་ཀྱི་དོན་སྐྱེ་བ་མེད་པ་དང༌། རྡུལ་དང་བྲལ་བ་དང༌། དོན་དམ་པར་ཁྱད་པར་མེད་པ་ལ་སོགས་་པ་ཐམས་ཅད་ནི་དེ་བཞིན་ཉིད་འབའ་ཞིག་ཡིན་པར་དབུ་མ་པ་ཆེན་པོ་དབྱིག་གཉེན་གྱིས་གསུངས་སོ། །འཇིག་རྟེན་ཁམས་ཀྱི་ལེའུའི་འགྲེལ་པར་མགོན་པོ་སྤྱན་རས་གཟིགས་དབང་ཕྱུག་གི་ཞལ་སྔ་ནས་ཀྱང༌། གང་དུ་དེ་བཞིན་ཉིད་ཀྱི་བརྡ་ཡིན་པ་དེར་ཨ་ཡིག་ནི་ཆོས་ཐམས་ཅད་ཀྱི་སྒོ་སྟེ་གདོད་མ་ནས་མ་སྐྱེས་པའི་ཕྱིར་རོ། །ཞེས་དང༌། མྱ་ངན་ལས་འདས་པ་ཡེ་ཤེས་ཀྱི་ཁམས་གཞོམ་དུ་མེད་ཅིང་བརྗོད་དུ་མེད་པ་སྟེ་བརྗོད་དུ་མེད་པའི་དབྱིངས་དང་གསལ་བྱེད་ཀྱི་མཚན་ཉིད་ཅན་ནོ། །ཞེས་གསུངས་སོ། །དེས་ན་ཆོས་ཀྱི་དབྱིངས་ཉིད་དོན་དམ་པའི་ཨ་དང་ར་དང་པ་ལ་སོགས་པ་དང་དབྱངས་དང་གསལ་བྱེད་ཡིན་ཞེས་པའི་དོན་ཏོ། །ཉི་ཁྲི་སྣང་བ་ལ་སོགས་ཀྱི་བཤད་པ་ནི་འདི་དག་དང་མི་མཐུན་པར་སྣང་བས་གསེར་བཞིན་ཏུ་བརྟག་པར་མཛོད་ཅིག། ས་བཅུ་དང་གཉེན་པོ་ནི་དེ་མ་ཐག་ཏུ་འོག་ནས་རྒྱས་པར་འཆད་པའི་ཚུལ་གྱིས་ཚོགས་ཀྱི་བསྒྲུབ་པའི་རིམ་པ་མདོ་ལས་བྱུང་བ་ལྟར་བཤད་པ་ཡིན་པར་ཤེས་པར་བྱའོ། །དེ་ལ་རབ་འབྱོར་གྱིས་ཞུ་བ་གཉིས་པ་ཇི་ལྟར་བྱང་ཆུབ་སེམས་དཔའ་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་ཞེས་པའི་ལན་དུ་ས་བཅུ་ཡོངས་སུ་སྦྱོང་བ་གསུངས་པ་ནི་ཚོགས་ཀྱི་སྒྲུབ་པ་ལ་ཞུགས་པ་གང་ཡིན་པ་དེ་ཉིད་སྟོན་ཏེ། མདོ་ལས། ས་དང་པོ་རབ་ཏུ་དགའ་བ་གནས་པས་ས་ཡོངས་སུ་སྦྱོང་བ་བཅུ་བྱའོ། །ཞེས་གསུངས་པའི་ཕྱིར་ས་དང་པོ་དེ་ལ་གནས་པས། ཡོངས་སུ་སྦྱོང་བ་ཡིན་ནོ། །ཡོངས་སུ་སྦྱོང་བའི་དོན་ནི་ས་དེ་དང་དེ་ལ་གསུངས་པའི་ཆོས་དེ་དང་དེ་དག་ཡོངས་སུ་སྦྱང་ཞིང་དག་པར་བྱ་བ་ཉིད་ས་དེ་དང་དེ་ཡོངས་སུ་སྦྱོང་ཞིང་དག་པ་ཡིན་ནོ། །ཆོས་དེ་དང་དེ་དག་པ་ཉིད་ས་དེ་དང་དེ་དག་པ་ཡིན་ལ་དག་པ་ལ་ཐབས་ཞེས་བྱའོ། །དེ་ལ་སྦྱོང་གཞི་སྦྱོང་བྱ། སྦྱོང་བྱེད། སྦྱོང་མཁན། སྦྱོང་ཚུལ། སྦྱང་འབྲས་དེ་དྲུག་གིས་རྟོགས་པར་བྱའོ། །སྦྱང་གཞི་ནི་ཀུན་ཏུ་འགྲོ་བའི་དོན་ལ་སོགས་པ་ཆོས་ཀྱི་དབྱིངས་རྣམ་པ་བཅུ་ཡིན་ནོ། །སྦྱང་བྱ་དྲི་མ་ནི་ཉོན་མོངས་པ་ཅན་མ་ཡིན་པའི་མི་ཤེས་པ་བཅུའོ། སྦྱོང་བྱེད་ཀྱི་ཐབས་ནི་འཁོར་གསུམ་དུ་རྟོག་པའི་རང་བཞིན་མི་དམིགས་པའོ། །སྦྱོང་མཁན་གྱི་གང་ཟག་ནི། ས་དེ་དང་དེ་ལ་གནས་པའི་བྱང་ཆུབ་སེམས་དཔའོ། །སྦྱོང་ཚུལ་ནི་ཇི་ལྟར་གཞུང་ལས་བྱུང་བའི་རིག་པ་དེ་ཉིད་དོ། །སྦྱང་འབྲས་ནི་རང་རང་གི་ངོ་སྐལ་གྱི་དྲི་མ་དག་པའི་ས་དེ་དང་དེ་ཉིད་དོ། ། འདི་ལྟར་ས་དང་པོ་ལ་ཆོས་ཀྱི་དབྱིངས་ཀུན་ཏུ་འགྲོ་བའི་དོན་ལ་ཀུན་འགྲོ་བའི་དོན་དུ་རྟོགས་སོ། །ས་གཉིས་པ་ལ་མཆོག་གི་དོན་ཏུ་རྟོགས་སོ། །ས་གསུམ་པ་ལ་ཆོས་ཀྱི་དབྱིངས་ཀྱི་རྒྱུ་མཐུན་པའི་དོན་གྱི་ཐོས་པ་མཆོག་ཉིད་དུ་རྟོགས་སོ། །ས་བཞི་པ་ལ་ཆོས་ལ་སྲེད་པ་ལ་ཡང་ལྡོག་པའི་ཕྱིར་ཡོངས་སུ་འཛིན་པ་མེད་པའི་དོན་དུ་རྟོགས་སོ། །ས་ལྔ་པ་ལ་བསམ་པ་མཉམ་པ་ཉིད་ཀྱིས་རྒྱུད་རྣམས་ཐ་དད་པ་མེད་པར་རྟོགས་སོ། །ས་དྲུག་པ་ལ་ཉོན་མོངས་པ་དང་རྣམ་པར་བྱང་བ་མ་ཡིན་པའི་དོན་ཏུ་རྟོགས་སོ། །ས་བདུན་པ་ལ་མཚན་མ་ཐ་དད་པ་མེད་པའི་དོན་དུ་རྟོགས་སོ། །ས་བརྒྱད་པ་ལ་མི་སྐྱེ་བའི་ཆོས་ལ་བཟོད་པ་ཐོབ་ནས་ཉོན་མོངས་བྲི་བ་མེད་ཅིང་རྣམ་བྱང་འཕེལ་བ་མེད་པའི་དོན་དང༌། དབང་བཞི་ལས་རྣམ་པར་མི་རྟོག་པ་ལ་དབང་བ་དང༌། ཞིང་ཡོངས་སུ་དག་པ་ལ་དབང་བའི་གནས་ཉིད་དུ་རྟོགས་སོ། །ས་དགུ་པ་ལ་ཡེ་ཤེས་ལ་དབང་བའི་གནས་ཉིད་དུ་རྟོགས་སོ། །ས་བཅུ་པ་ལ་ཇི་ལྟར་བཞེད་པ་བཞིན་དུ་སྤྲུལ་པས་སེམས་ཅན་གྱི་དོན་མཛད་པའི་ཕྱིར། ལམ་ལ་དབང་བའི་གནས་ཉིད་དུ་རྟོགས་སོ། །ས་བཅུའི་མི་མཐུན་པའི་ཕྱོགས་སུ་གྱུར་པ་སྒྲིབ་པ་བཅུའི་གཉེན་པོ་དག་ནི་ས་ཉིད་ཡིན་ནོ། །དབུ་མ་ཆེན་པོ་དབུས་མཐའ་རྣམ་འབྱེད་ལས། ཀུན་ཏུ་འགྲོ་དོན་མཆོག་གི་དོན་རྒྱུ་མཐུན་དོན་གྱི་མཆོག་ཉིད་དང༌། ཡོངས་སུ་འཛིན་པ་མེད་དོན་དང། །རྒྱུད་རྣམ་ཐ་དད་མེད་དོན་དང༌། །ཉོན་མོངས་རྣམ་དག་མིན་དོན་དང༌། །ཐ་དད་མེད་པའི་དོན་ཉིད་དང༌། །བྲི་མེད་འཕེལ་བ་མེད་དོན་དང༌། །དབང་ནི་རྣམ་པ་བཞི་ཡི་གནས། །ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། །ས་བཅུའི་མི་མཐུན་ཕྱོགས་རྣམས་ཀྱི། །གཉེན་པོ་དག་ནི་ས་ཡིན་ནོ། །ཞེས་གསུངས་པའི་དོན་ཏོ། །དེ་ལ་ཡོངས་སུ་སྦྱོང་བའི་ཆོས་དུ་ཞིག་གིས་ས་དང་པོ་འཐོབ་པར་འགྱུར་ཞེ་ན། ཡོངས་སུ་སྦྱོང་བ་རྣམ་བཅུ་ཡིས། །ས་ནི་དང་པོ་འཐོབ་འགྱུར་ཏེ། །བཅུ་པོ་གང་ཞེ་ན། བསམ་དང་ཕན་པའི་དངོས་ཉིད་དང༌། །སེམས་ཅན་རྣམས་ལ་སེམས་མཉམ་ཉིད། །གཏོང་དང་བཤེས་གཉེན་བསྟེན་པ་དང༌། །དམ་ཆོས་དམིགས་པ་ཚོལ་བ་དང༌། ། རྟག་ཏུ་ངེས་འབྱུང་སེམས་ཉིད་དང༌། ། སངས་རྒྱས་སྐུ་འདོད་དགའ་བ་དང༌། ཆོས་སྟོན་པ་དང་བདེན་པ་ཡི། །ཚིག་ནི་བཅུ་པ་ཡིན་པར་འདོད། །གང་གིས་ཡོངས་སུ་སྦྱོང་བར་ཤེས་པར་བྱ་ཞེ་ན། འདི་དག་རང་བཞིན་མི་དམིགས་པས། ། ཡོངས་སུ་སྦྱོང་བར་ཤེས་པར་བྱའོ། །འདི་དག་གི་བཤད་པ་ཡང་མདོ་ལས་བྱུང་བའི་ཉིད་བརྗོད་པར་བྱའོ། །དེ་ལ་རྣམ་མཁྱེན་དང་ལྡན་པའི་ཡིད་ལ་བྱ་བས་དགེ་བ་ཐམས་ཅད་བསྒྲུབ་པ་ནི་ལྷག་པའི་བསམ་པ་མི་དམིགས་པའི་ཕྱིར་བསམ་པ་ཡོངས་སུ་སྦྱོང་བ་ཉིད་དང༌། སེམས་ཅན་ཐམས་ཅད་ལ་ཕན་པའི་སེམས་ནི་མཚན་མ་མི་དམིགས་པའི་ཕྱིར་ཕན་པའི་དངོས་པོ་ཡོངས་སུ་སྦྱོང་བ་ཉིད་དང༌། རྣམ་མཁྱེན་དང་ལྡན་པའི་ཡིད་ལ་བྱ་བས་ཚད་མེད་བཞི་སྒྲུབ་པ་ནི་སེམས་ཅན་མི་དམིགས་པའི་ཕྱིར་སེམས་མཉམ་པ་ཡོངས་སུ་སྦྱོང་བ་ཉིད་དང༌། སེམས་ཅན་ཐམས་ཅད་ལ་རྣམ་རྟོག་མེད་པར་སྦྱིན་པ་གཏོང་བ་ནི། སྦྱིན་བྱ་དང༌། སྦྱིན་པ་པོ་དང༌། ལེན་པ་པོ་མི་དམིགས་པའི་ཕྱིར་གཏོང་བ་ཡོངས་སུ་སྦྱོང་བ་དང༌། ཐེག་ཆེན་ལ་འགོད་པའི་དགེ་བའི་བཤེས་གཉེན་ལ་བརྟེན་པ་དང༌། བསྙེན་བཀུར་དང་སྲི་ཞུ་བྱེད་པ་ནི་དེ་དག་གིས། རློམ་སེམས་མེད་པའི་ཕྱིར་བཤེས་གཉེན་ལ་བསྟེན་པ་ཡོངས་སུ་སྦྱོང་བ་དང༌། རྣམ་མཁྱེན་དང་ལྡན་པའི་སེམས་ཀྱིས་ཆོས་ཚོལ་བར་བྱེད་པ་ལ་ཉན་རང་གི་སར་མི་ལྟུང་བ་ནི་ཆོས་ཐམས་ཅད་མི་དམིགས་པའི་ཕྱིར་དམ་ཆོས་དམིགས་པ་ཚོལ་བ་ཡོངས་སུ་སྦྱོང་བ་དང༌། ཚེར་རབས་ཐམས་ཅད་དུ་འདྲེ་བ་མེད་པར་མངོན་པར་འབྱུང་ཞིང་སངས་རྒྱས་ཀྱི་བསྟན་པ་ལ་རབ་ཏུ་འབྱུང་ལ། སུ་ཡང་དེའི་བར་ཆད་མི་བྱེད་པ་ནི་ཁྱིམ་མི་དམིགས་པའི་ཕྱིར་རྟག་ཏུ་ངེས་འབྱུང་གི་སེམས་ཡོངས་སུ་སྦྱོང་བ་ཉིད་དང༌། སངས་རྒྱས་ཀྱི་སྐུ་མཐོང་ནས་རྣམ་མཁྱེན་མ་ཐོབ་ཀྱི་བར་ཏུ་སངས་རྒྱས་ཡིད་ལ་བྱེད་པ་དང་མི་འབྲལ་བ་ནི་མཚན་དཔེ་མི་དམིགས་པའི་ཕྱིར་སངས་རྒྱས་ཀྱི་སྐུ་འདོད་དགའ་བ་ཡོངས་སུ་སྦྱོང་བ་དང༌། ཐོག་མར་དགེ་བ་ལ་སོགས་པ་གསུང་རབ་ཡན་ལག་བཅུ་གཉིས་སེམས་ཅན་རྣམས་ལ་ཕྱིན་ཅི་མ་ལོག་པར་སྟོན་པ་ནི་ཆོས་ཀྱི་དབྱེ་བ་མི་དམིགས་པའི་ཕྱིར་ཆོས་སྟོན་པ་ཡོངས་སུ་སྦྱོང་བ་དང༌། ཇི་སྐད་སྨྲས་པ་དེ་བཞིན་དུ་བྱེད་པ་ནི་ཚིག་མི་དམིགས་པའི་ཕྱིར་བདེན་པའི་ཚིག་ཡོངས་སུ་སྦྱོང་བ་ནི་བཅུ་པ་ཡིན་པར་འདོད་དེ་བསྟན་ནོ། །ས་རྣམས་ཀྱི་ངེས་པའི་ཚིག་ནི་དབུ་མ་མདོ་སྡེའི་རྒྱན་ལས་གསུངས་པ་ལྟར་བརྗོད་པར་བྱ་སྟེ། ཇི་སྐད་དུ། བྱང་ཆུབ་ལ་ནི་ཉེ་བ་དང༌། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །ཞེས་སོ། །ཡོངས་སུ་སྦྱོང་ཞིང་དག་པའི་ཆོས་དུ་ཞིག་གིས་ས་གཉིས་པ་འཐོབ་བར་འགྱུར་ཞེ་ན། ཚུལ་ཁྲིམས་བྱས་བ་བཟོ་དང་བཟོད། །དགའ་དང་མི་གཏོང་སྙིང་བརྩེ་ཆེ། །བཀུར་སྟི་བླ་མ་ལ་གུས་ཉན། །བརྒྱད་པ་སྦྱིན་ལ་སོགས་ལ་བརྩོན་པས་ས་གཉིས་པ་དྲི་མ་མེད་པ་འཐོབ་པོ། །དེ་ལ་ཉན་རང་གི་སེམས་དང༌། འཆལ་པའི་ཚུལ་ཁྲིམས་དང༌། བྱང་ཆུབ་ལ་བར་ཆད་བྱེད་པའི་ཆོས་ཡིད་ལ་མི་བྱེད་པ་ནི། ཚུལ་ཁྲིམས་ཡོངས་སུ་དག་པ་དང༌། བྱང་ཆུབ་སེམས་དཔའི་སྤྱོད་པ་ནི་བྱས་པ་ཆུང་ངུ་ཡང་ཆུད་མི་གསོན་ན་ཆེན་པོ་ལྟ་ཅི་སྨོས་པ་ནི་བྱས་པ་གཟོ་བ་དང༌། སེམས་ཅན་ཐམས་ཅད་ལ་གནོད་པ་དང་འཚེ་བའི་སེམས་མེད་པ་ནི་བཟོད་པ་དང༌། ཐེག་པ་གསུམ་ལ་སེམས་ཅན་སྨིན་པར་བྱེད་པ་ནི་དགའ་ཞིང་རབ་ཏུ་དགའ་བ་དང༌། སེམས་ཅན་ཐམས་ཅད་ཡོངས་སུ་སྐྱོབ་པ་ནི་སེམས་ཅན་མི་གཏོང་བ་དང༌། སེམས་ཅན་རེ་རེའི་ཕྱིར་ཡང་སྐལ་པ་ཚད་མེད་པར་དམྱལ་བའི་སྡུག་བསྔལ་ཡང་མྱོང་བར་བྱའོ། །སྙམ་པ་དང་དེ་བཞིན་དུ་སེམས་ཅན་ཐམས་ཅད་ཀྱི་ཕྱིར་སྤྲོ་ཞིང་མི་སྐྱོ་བ་ནི་སྙིང་བརྩེ་ཆེ་བ་དང༌། བླ་མ་རྣམས་ལ་སྟོན་པའི་འདུ་ཤེས་བསྐྱེད་པ་ནི་བཀུར་སྟི་བླ་མ་ལ་གུས་ཉན་པ་དང༌། སེམས་ཅན་ཐམས་ཅད་སྨིན་པར་བྱ་བའི་ཕྱིར། ལས་གཞན་མི་བྱེད་པར་ཕ་རོལ་ཏུ་ཕྱིན་པ་རྣམས་ཡོངས་སུ་ཚོལ་བ་ནི། བརྒྱད་པ་སྦྱིན་པ་ལ་སོགས་པ་ལ་བརྩོན་པ་ཡིན་ནོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཞེས་པ་དང༌། འདོད་ཆགས་ལ་སོགས་སྣ་ཚོགས་པའི་དྲི་མ་རྟག་ཏུ་དྲི་མ་ཅན། །དྲི་མ་མེད་པས་གང་དག་པ། །དྲི་མ་མེད་ཅེས་བརྗོད་པ་ཡིན། །ཆོས་དུ་ཞིག་ཡོངས་སུ་དག་པས་ས་གསུམ་པ་རྣམ་པར་དག་པ་ཡིན་ཞེ་ན། ཐོས་པས་མི་ངོམས་ཉིད་དང་ནི། །ཟང་ཟིང་མེད་པར་ཆོས་སྦྱིན་དང༌། །སངས་རྒྱས་ཞིང་ཀུན་སྦྱོང་བ་དང༌། །འཁོར་བས་ཡོངས་སུ་མི་སྐྱོ་དང༌། །ངོ་ཚ་ཁྲེལ་ཡོད་ཅེས་བྱ་བ། །རློམ་མེད་བདག་ཉིད་དེ་རྣམ་ལྔ། །དག་པས་ས་གསུམ་པ་འོད་བྱེད་པ་རྣམ་པར་དག་པ་ཉིད་དོ། །དེ་ལ་ཕྱོགས་བཅུའི་སངས་རྒྱས་ཐམས་ཅད་ཀྱིས་གང་ཅི་གསུངས་པ་དེ་ཐམས་ཅད་གཟུང་བར་བྱའོ། །སྙམ་དུ་ཆོག་མི་ཤེས་པ་ནི་ཐོས་པས་མ་ངོམས་པ་ཉིད་དང༌། ཆོས་སྟོན་ཀྱང་ཆོས་ཀྱི་སྦྱིན་པའི་དགེ་བ་དེས་ཐ་ན་བྱང་ཆུབ་ལ་ཡང་རེ་བ་མེད་པ་ནི་ཟང་ཟིང་མེད་པར་ཆོས་སྦྱིན་པ་དང༌། རང་གཞན་གྱི་སེམས་ཀྱི་ཞིང་དག་པར་བྱེད་པའི་དགེ་བ་སྒྲུབ་བ་ནི་སངས་རྒྱས་ཀྱི་ཞིང་ཀུན་ཡོངས་སུ་སྦྱོང་བ་དང༌། སྤྱད་པ་སྤྱོད་པ་ན་རྣམ་མཁྱེན་མ་རྫོགས་ཀྱི་བར་དུ་ནམ་ཡང་སྐྱོ་བར་མི་འགྱུར་བ་ནི། དཔག་ཏུ་མེད་པའི་འཁོར་བས་ཡོངས་སུ་མི་སྐྱོ་དང༌། ཉན་རང་གི་སེམས་ལ་སྨོད་པ་ནི། ངོ་ཚ་ཤེས་པ་དང་ཁྲེལ་ཡོད་པ་ལ་གནས་པ་ཞེས་བྱ་བ་དེ་རྣམས་ཐམས་ཅད་ཀྱང་རློམ་སེམས་མེད་པའི་བདག་ཉིད་དེ་ཆོས་རྣམ་པ་ལྔ་དག་པ་ཡིན་ནོ། །ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པའོ། །ཡང་ཉོན་མོངས་དྲི་མ་རབ་འགགས་ནས། །དྲི་མེད་ཤེས་རབ་རབ་གསལ་བས། །ཚད་མེད་པ་ཡི་མིན་པ་དག །སེལ་བར་བྱེད་པའི་འོད་བྱེད་པའོ། །ཞེས་སོ། །ཆོས་གང་དག་ཡོངས་སུ་སྦྱོང་བས་ས་བཞི་པ་དག་པ་ཡིན་ཞེ་ན། ནགས་གནས་འདོད་ཆུང་ཆོག་ཤེས་དང༌། །ངས་པ་ཡང་དག་སྡོམ་བསྟེན་དང༌། །བསླབ་པ་ཡོངས་སུ་མི་གཏོང་དང༌། །འདོད་པ་རྣམས་ལ་སྨོད་པ་དང༌། །མྱ་ངན་འདས་དང་བདོག་ཀུན་གཏོང༌། །མི་ཞུམ་པ་དང་ལྟ་པ་མེད། །ཅེས་པ་ས་རྣམས་ཀྱིས་ས་བཞི་པ་འོད་འཕྲོ་བ་ཅན་དག་པ་ཡིན་ནོ། །དེ་ལ་ཉན་རང་གི་ས་ནས་ཤིན་ཏུ་འདའ་བ་ནི། ནགས་སུ་གནས་པ་དང༌། རང་དོན་ལ་དམིགས་ནས་བླ་ན་མེད་པའི་བྱང་ཆུབ་ཀྱང་མི་འདོད་པ་ནི་འདོད་པ་ཆུང་བ་དང༌། རྣམ་མཁྱེན་ཐོབ་ཀྱང་རློམ་སེམས་སུ་མི་བྱེད་པ་ནི་ཆོག་ཤེས་པ་དང༌། ཆོས་ཟབ་མོ་ལ་ངེས་པར་སེམས་པའི་བཟོད་པ་ནི། སྦྱངས་པ་ཡང་དག་སྡོམ་སྟེན་དང༌། གང་ལ་བསླབ་པ་ཐམས་ཅད་རྒྱུ་བ་མེད་པ་ནི་བསླབ་པ་ཡོངས་སུ་མི་གཏོང་བ་དང༌། འདོད་སེམས་མི་བསྐྱེད་པ་ནི་འདོད་པའི་ཡོན་ཏན་རྣམས་ལ་སྨོད་པ་དང༌། ཆོས་ཐམས་ཅད་ལ་མངོན་པར་འདུ་བྱེད་པ་མེད་པ་ནི་མྱ་ངན་ལས་འདས་པའི་སེམས་དང༌། ནང་དང་ཕྱི་རོལ་གྱི་ཆོས་རྣམས་འཛིན་པ་མེད་པ་ནི་བདོག་པ་ཀུན་གཏོང་བ་དང༌། རྣམ་ཤེས་ལ་གནས་པ་རྣམས་ལ་སེམས་མི་སྦྱོར་བ་ནི་སེམས་མི་ཞུམ་པ་སྟེ་མི་འདྲ་བ་དང༌། དངོས་པོ་ཐམས་ཅད་ཡིད་ལ་མི་བྱེད་པ་ནི་དངོས་པོ་ཐམས་ཅད་ལ་ལྟ་བ་མེད་པ་ཡིན་ནོ། །དེ་རྣམས་དག་པ་ནི་ས་བཞི་པ་འོད་འཕྲོ་བ་ཅན་དག་ཅིང་ཐོབ་པ་ཡིན་ནོ། །འདི་ལྟར་བྱང་ཆུབ་ཕྱོགས་མཐུན་ཆོས། ། རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་སྲེག་པས་འོད་འཕྲོ་ཅན། ། ཞེས་དང༌། རྟག་ཏུ་དག་པའི་འོད་ཀྱིས་གསལ། །འདུ་འཛི་རྣམ་པར་སྤངས་པ་ཡིན། །ཡེ་ཤེས་འོད་ནི་རབ་འཕྲོ་བས། །ས་དེ་འོད་འཕྲོ་ཅན་དུ་འདོད། །ཅེས་སོ། །སྤང་བྱའི་ཆོས་དུ་ཞིག་སྤངས་ན་ས་ལྔ་པ་འཐོབ་ཅེ་ན། འདྲེས་དང་ཁྱིམ་ལ་འཁྲེན་པ་དང༌། །འདུུ་འཇིའི་གནས་དང་གནོད་སེམས་དང༌། །བདག་བསྟོད་གཞན་ལ་བརྙས་པ་དང༌། །མི་དགེ་ལས་ཀྱི་ལམ་བཅུ་དང༌། རློམས་པས་ཁེངས་དང་ཕྱིན་ཅི་ལོག། བློ་ངན་དང་ནི་ཉོན་མོངས་བཟོད། ཐེ་ཚོམ་དང་ནི་ཉོན་མོངས་བཟོད། །བཅུ་པོ་འདི་ནི་རྣམ་སྤངས་ནས། །ས་ལྔ་པ་ནི་ཡང་དག་འཐོབ་པ་ཡིན་ནོ། །དེ་ལ་རྫུས་ཏེ་སྐྱེ་བ་དང༌། །སྐྲ་བྲེགས་ཤིང་ངུར་སྨིགས་གྱོན་པ་ནི། ཁྱིམ་དང་འདྲེས་པ་སྤོང་བ་དང༌། དགེ་སློང་དང་དགེ་སློང་མ་རྣམས་དང་ཡུད་ཙམ་ཡང་ལྷན་ཅིག་མི་གནས་ཤིང་དེ་དག་མེད་ན་ཡང་སྐྱོ་བར་མི་འགྱུར་བ་ནི་རབ་ཏུ་བྱུང་བ་དང་འདྲེས་པ་སྤོང་བ་ཡིན་ནོ། །སེམས་ཅན་ཐམས་ཅད་ལ་བདག་གིས་བདེ་བའི་ཡོ་བྱད་སྦྱར་དགོས་པ་ལ་སེམ་ཅན་འདི་དག་བདག་གི་བསོད་ནམས་ཀྱིས་བདེ་བར་གྱུར་པ་ལ་སེར་སྣའི་སེམས་བསྐྱེད་པར་མི་བྱའོ། །སྙམ་པ་ནི་རང་གི་ཁྱིམ་ལ་འཁྲེན་པ་སྟེ། སེར་སྣ་བྱེད་པ་སྤོང་བ་ཡིན་ནོ། །ཉན་རང་གི་སེམས་ནི་འདུ་འཛི་སྟེ་དེ་སྐྱེ་བའི་གནས་སྦོང་བ་ཡིན་ནོ། །གནོད་འཚེ་དང་འཐབ་རྩོད་ཀྱི་སེམས་ཀྱི་སྐབས་མི་འབྱེད་པ་ནི་གནོད་སེམས་སྤོང་བ་ཡིན་ནོ། །ནང་གི་ཆོས་རྣམས་ཡང་དག་པར་རྗེས་སུ་མི་མཐོང་བ་ནི་བདག་ལ་བསྟོད་པ་སྤོང་བ་དང༌། ཕྱིའི་ཆོས་རྣམས་ཡང་དག་པར་རྗེས་སུ་མི་མཐོང་བ་ནི་གཞན་ལ་བརྙེས་པ་སྟེ། སྨོད་པ་སྤོང་བ་ཡིན་ནོ། །སྲོག་གཅོད་པ་ལ་སོགས་པ་ནི་བདེ་འགྲོ་ལ་ཡང་བར་ཏུ་གཅོད་པར་བྱེད་ན་འཕགས་པའི་ལམ་དང་བྱང་ཆུབ་ལ་ལྟ་ཅི་སྨོས་ཏེ། ཞེས་མི་དགེ་བའི་ལས་ཀྱི་ལམ་བཅུ་སྤོང་བ་ཡིན་ནོ། །རློམ་སེམས་དང་ཁེངས་པ་སྐྱེ་པའི་ཆོས་ཅི་ཡང་མ་མཐོང་བ་ནི་རློམ་སེམས་སྤོང་བ་དང་ཁེངས་པ་སྤོང་བ་ཡྀན་ནོ། །དངོས་པོ་རྣམས་མི་དམིགས་པ་ནི་ཕྱིན་ཅི་ལོག་སྤོངས་པ་ཡིན་ནོ། །བློ་ངན་སྟེ་ཐེ་ཚོམ་སྤོང་བ་ཡིན་ནོ། །དུག་གསུམ་གྱི་དངོས་པོ་མ་མཐོང་བ་ནི་ཉོན་མོངས་པ་བཟོད་པ་སྟེ་རང་དགར་འཇོག་པ་སྤོང་བ་ཡིན་ནོ། །དེ་ལྟར་བཤད་པ་ནི་སྤང་བྱའི་ཆོས་བཅུ་པོ་ནི་རྣམ་པར་སྤངས་ནས་ལྔ་པ་སྦྱང་དཀའ་བ་གང་ཡིན་པ་དེ་ནི་ཡང་དག་པར་འཐོབ་པ་ཡིན་ནོ། །སེམས་ཅན་ཡོངས་སུ་སྨིན་བྱེད་ཅིང༌། །རང་གི་སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བྱའོ། །ཞེས་དང་ཡང་རང་བཞིན་སྒྱུ་རྩལ་བཟོད་གནས་ཀུན། བསམ་གཏན་རྣམ་པ་སྣ་ཚོགས་ཉིད། །ཉོན་མོངས་ཤིན་ཏུ་སྦྱངས་དཀའ་ལས། །རྣམ་པར་རྒྱལ་བ་སྦྱངས་དཀའ་འདོད། །ཅེས་སོ། །གཉེན་པོ་བའི་ཆོས་དུ་ཞིག་རྫོགས་པ་དང་སྤོང་བྱའི་ཆོས་དུ་ཞིག་སྤོང་བས་ས་དྲུག་པ་འཐོབ་ཅེ་ན། སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་རབ་རྫོགས་པས། །སློབ་མ་དང་ནི་བསེ་རུ་ལ། །དགའ་དང་སྐྲག་པའི་སེམས་སྤངས་དང༌། །བསླངས་ན་མི་ཞུམ་བདོག་པ་ཀུན། །བཏངཡང་མི་དགའ་མེད་པ་དང༌། །དབུལ་ཡང་སློང་པ་མི་སྤོང་བས། །ས་ནི་དྲུག་པ་ཡང་དག་འཐོབ་པ་ཡིན་ནོ། ། དེ་ལ་རྫོགས་པར་བྱ་བ་གཉེན་པོའི་ཆོས་ནི། །ཕ་རོལ་ཏུ་ཕྱིན་པ་དྲུག་གོ །བྱང་ཆུབ་ཀྱི་ལམ་མ་ཡིན་པའི་ཕྱིར། །སློབ་མ་ཉན་ཐོས་ལ་དགའ་བའི་སེམས་སྤངས་པ་དང༌། བྱང་ཆུབ་ཀྱི་ལམ་མ་ཡིན་པའི་ཕྱིར། བསེ་རུ་རང་སངས་རྒྱས་ལ་དགའ་པའི་སེམས་སྤངས་པ་དང༌། བྱང་ཆུབ་ཀྱི་ལམ་མ་ཡིན་པའི་ཕྱིར། གཞན་དོན་ལ་སྐྲག་པའི་སེམས་སྤངས་པ་དང༌། བྱང་ཆུབ་ཀྱི་ལམ་མ་ཡིན་པའི་ཕྱིར། སློང་བ་པོས་བསླངས་ནས་སེམས་མི་ཞུམ་པར་བྱ་བ་དང༌། བྱང་ཆུབ་ཀྱི་ལམ་མ་ཡིན་པའི་ཕྱིར། བདོག་པ་ཀུན་བཏང་ཡང་སེམས་མི་དགའ་བ་མེད་བ་དང༌། རང་ཉིད་དབུལ་ཡང་སློངས་མོ་པ་མི་སྤོང་ཞིང༌། སེམས་དང་པོ་བསྐྱེད་ཕྱིན་ཆད་རྟག་ཏུ་སྦྱིན་པ་གཏོང་ཞིང་ཁ་ཟ་ཡག་ཏུ་མི་བྱེད་པ་དང༌། སེམས་གསོགས་དུ་མི་བྱེད་པས་ས་དྲུག་པ་མངོན་དུ་གྱུར་པ་ཡང་དག་པར་འཐོབ་པ་ཡིན་ནོ། །ཤེས་རབ་ཕ་རོལ་ཕྱིན་བསྟེན་ནས། །འཁོར་བ་དང་ནི་མྱ་ངན་འདས། གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བཤད། །ཅེས་སོ། ། ཉེས་པའི་ཆོས་དུ་ཞིག་ཆད་པས་བདུན་པ་འཐོབ་ཅེ་ན། བདག་དང་སེམས་ཅན་འཛིན་པ་དང༌། ། སྲོག་དང་གང་ཟག་ཆད་རྟག་དང༌། །མཚན་མ་རྒྱུ་དང་ཕུང་པོ་དང༌། །ཁམས་དང་སྐྱེ་མཆེད་དག་དང་ནི། །ཁམས་གསུམ་པོ་ལ་གནས་དང་ཆགས། ། སེམས་ནི་ཀུན་ཏུ་ཞུམ་པ་དང༌། །དཀོན་མཆོག་གསུམ་དང་ཚུལ་ཁྲིམས་ལ། །དེར་ལྟ་བ་ཡི་མངོན་ཞེན་དང༌། སྟོང་པ་ཉིད་ལ་རྩོད་པ་དང༌། །དེ་དང་འགལ་བའི་ཉེས་པ་ནི། །ཉི་ཤུ་གང་ལ་རྣམ་ཆད་པ། །དེ་ཡིས་ས་ནི་བདུན་པ་འཐོབ་པ་ཡིན་ནོ། །དེ་ལ་བདག་ཏུ་འཛིན་པ་དང་སེམས་ཅན་དུ་འཛིན་པ་དང༌། སྲོག་ཏུ་འཛིན་པ་དང༌། གང་ཟག་ཏུ་འཛིན་པར་མི་བྱ་སྟེ། བདག་ལ་སོགས་པ་དེ་དག་གི་ཉོན་མོངས་གཏན་མེད་པའི་ཕྱིར་རོ། །ཆད་པར་འཛིན་པ་དང་རྟག་པར་འཛིན་བར་མི་བྱ་སྟེ། ཆོས་གང་ཡང་མི་སྐྱེ་བ་དེ་རྟག་ཆད་དུ་མི་འགྱུར་བའི་ཕྱིར་རོ། །མཚན་མའི་འདུ་ཤེས་མི་བྱ་སྟེ། ཀུན་ནས་ཉོན་མོངས་པ་གཏན་མེད་པའི་ཕྱིར་རོ། ། རྒྱུར་ལྟ་བ་མི་བྱ་སྟེ། ལྟ་བ་དེ་ཡང་དག་པར་རྗེས་སུ་མི་མཐོང་བའི་ཕྱིར་རོ། །ཕུང་པོ་དང་ཁམས་དང་སྐྱེ་མཆེད་རྣམས་ལ་ཞེན་པར་མི་བྱ་སྟེ། ཆོས་དེ་དག་རང་བཞིན་གྱིས་མེད་པའི་ཕྱིར་རོ། །ཁམས་གསུམ་པ་ལ་ཞེན་པས་གནས་པ་དང་ཆགས་པར་མི་བྱ་སྟེ། དེ་དག་དངོས་པོ་མེད་པའི་ཕྱིར་རོ། ། ཆོས་ཐམས་ཅད་སྟོང་བ་ཉིད་དོ། །ཞེས་བྱ་བས་སྟོང་པ་ཉིད་ལ་ཆད་པར་ལྟ་བ་ལས་བྱུང་བའི་དགེ་བ་སྒྲུབ་ཏུ་མེད་ཅེས་པ་ལ་སོགས་པ་སེམས་ནི་ཀུན་ཏུ་ཞུམ་ཞིང་སྒྱིད་ལུགས་པར་མི་བྱ་སྟེ། ཀུན་བཏགས་དངོས་པོའི་ཆོས་ཐམས་ཅད་མེད་ཀྱང་གཟུགས་སུ་རུང་པ་ལ་སོགས་པའི་རང་གི་མཚན་ཉིད་ཀྱིས་སྟོང་གི་ཡོངས་སུ་གྲུབ་པའི་ངོ་བོ་སྟོང་པ་ཉིད་ཀྱིས་ནི་མི་སྟོང་པའི་ཕྱིར་རོ། །དཀོན་མཆོག་གསུམ་གྱི་དངོས་པོར་དམིགས་པའི་ལྟ་བས་དཀོན་མཆོག་གསུམ་མི་མཐོང་བས་དཀོན་མཆོག་གི། དངོས་པོ་དེར་ལྟ་བ་མངོན་པར་ཞེན་པ་མི་བྱ་སྟེ། མི་དམིགས་པའི་ཡེ་ཤེས་ཉིད་ཀྱིས་མཐོང་བའི་ཕྱིར་རོ། །ཚུལ་ཁྲིམས་ཀྱི་དངོས་པོ་དེར་ལྟ་བས་ཚུལ་ཁྲིམས་ཡོངས་སུ་དག་པར་མི་འགྱུར་བའི་ཕྱིར་ཚུལ་ཁྲིམས་ལ་དེར་ལྟ་བའི། མངོན་པར་ཞེན་པ་མི་བྱའོ། །གལ་ཏེ་སྟོང་པ་ཉིད་ཀྱང་རང་གི་མཚན་ཉིད་ཀྱིས་མི་སྟོང་ན་མི་སྟོང་པའི་ཆོས་ཞིག་ཡོད་པར་འགྱུར་བས་ཆོས་ཐམས་ཅད་སྟོང་པ་ཉིད་དོ། །ཞེས་པ་འདི་དང་སྟོང་པ་ཉིད་ཀྱི་མཚན་ཉིད་འདི་འགལ་ལོ། །ཞེས་སྟོང་པ་ཉིད་ལ་རྩོད་པ་དང༌། སྟོང་པ་ཉིད་ཀྱི་མཚན་ཉིད་ཀྱི་དངོས་པོ་ཡང་མེད་པས་དེས་ཀྱང་སྟོང་བར་ཁས་ལེན་པའི་ཕྱིར། ཆོས་ཐམས་ཅད་སྟོང་པ་ཉིད་དེ་དང༌། སྟོང་པ་ཉིད་ཀྱི་མཚན་ཉིད་འགལ་བའི་ཉེས་པ་གང་ཡིན་པ་དེ་ནི་མེད་དོ། །དེ་ལྟར་བདག་ཏུ་འཛིན་པ་ལ་སོགས་པའི་ཉེས་པ་ཉི་ཤུ་པོ་ས་བདུན་པ་ལ་གནས་པའི་བྱང་ཆུབ་སེམས་དཔའ་གང་ལ་རྣམ་པར་ཆད་པའི་རྒྱུ་དེ་ཡིས་ས་བདུན་པ་རིང་དུ་སོང་བ་འཐོབ་བོ། །ས་བདུན་པ་ལ་གནས་པ་དེས་ཡོན་ཏན་གྱི་ཆོས་དུ་ཞིག་རྫོགས་པར་བྱ་ཞེ་ན། རྣམ་ཐར་སྒོ་གསུམ་ཤེས་པ་དང༌། །འཁོར་གསུམ་རྣམ་པར་དག་ཉིད་དང༌། །སྙིང་རྗེ་དང་ནི་རློམ་མེད་དང༌། །ཆོས་མཉམ་ཉིད་དང་ཚུལ་གཅིག་ཤེས། །མི་སྐྱེ་བཟོད་དང་ཤེས་པ་དང༌། །ཆོས་རྣམས་རྣམ་པ་གཅིག་ཏུ་སྟོན། ། རྟོག་པ་ཀུན་ཏུ་འཇོམས་པ་དང༌། །འདུ་ཤེས་ལྟ་དང་ཉོན་མོངས་སྤོང༌། །ཞི་གནས་ངེས་པར་སེམས་པ་དང༌། །ལྷག་མཐོང་ལ་ནི་མཁས་པ་དང༌། སེམས་དུལ་ཞི་དང་ཐམས་ཅད་ལ། །ཐོགས་པ་མེད་པའི་ཡེ་ཤེས་དང༌། ཆགས་པའི་ས་མིན་གར་འདོད་པར། ཞིང་གཞན་དུ་ནི་མཉམ་འགྲོ་དང༌། ཀུན་ཏུ་བདག་གི་ངོ་བོ་ནི། སྟོན་པ་ཉིད་དང་ཉི་ཤུའོ། །དཔག་ཀྱང་འདི་ལྟར་སྟོང་པ་ཉིད་ཀྱི་དངོས་པོ་ཀྱང་སྟོང་པ་ཉིད་སྟོང་གི་སྟོང་པ་ཉིད་ལ་སྟོང་པ་ཉིད་གཉིས་པ་རྟོགས་པར་མི་བྱེད་པར་ཤེས་པ་ནི་སྟོང་པ་ཉིད་ཀྱི་རྣམ་པར་ཐར་པའི་སྒོ་ཤེས་པ་དང༌། ཆོས་ཐམས་ཅད་ཡིད་ལ་མི་བྱེད་པར་ཤེས་པ་ནི་མཚན་མ་མེད་པའི་རྣམ་པར་ཐར་པའི་སྒོ་ཤེས་པ་དང༌། ཁམས་གསུམ་པའི་སེམས་ཅན་ཐམས་ཅད་ལ་མི་གནས་པར་ཤེས་པ་ནི་སྨོན་པ་མེད་པའི་རྣམ་པར་ཐར་པའི་སྒོ་ཤེས་པ་སྟེ། རྣམ་ཐར་སྒོ་གསུམ་ཤེས་པ་དང༌། དགེ་བ་བཅུ་ཡི་ལས་ཀྱི་ལམ་ཡོངས་སུ་རྫོགས་པ་ནི་ལུས་ངག་ཡིད་གསུམ་གྱི་འཁོར་གསུམ་རྣམ་པར་དག་པ་ཉིད་དང༌། སེམས་ཅན་ཐམས་ཅད་ལ་སྙིང་རྗེ་ཆེན་པོ་ཐོབ་པ་ནི་སྙིང་རྗེ་དང༌། སེམས་ཅན་གྱི་ཞིང་ཡོངས་སུ་དག་པ་ནི་སེམས་ཅན་ཐམས་ཅད་ལ་རློམ་པ་སྟེ་བརྙེས་པ་མེད་པ་དང༌། ཆོས་ཐམས་ཅད་ལ་སྒྲོ་སྐུར་མེད་པ་ནི་ཆོས་ཐམས་ཅད་མཉམ་པ་ཉིད་དང༌། ཆོས་ཐམས་ཅད་ཤིན་ཏུ་རྟོགས་པ་མེད་པའི་ཡེ་ཤེས་ནི་ཡང་དག་པའི་ཚུལ་གཅིག་ཤེས་པ་དང༌། སྡུད་པར་ནི། སྦྱིན་པ་སྦྱིན་པའི་སྔོན་ཏུ་འགྲོ་བ་ཤེས་རབ་སྟེ། །ཚུལ་ཁྲིམས་བཟོད་པ་བརྩོན་འགྲུས་བསམ་གཏན་དེ་བཞིན་ནོ། ། དགེ་ཆོས་ཆུད་མ་གསན་ཕྱིར་ཡོངས་སུ་འཛིན་པ་ཡིན། །འདིས་ནི་ཆོས་རྣམས་ཐམས་ཅད་ཚུལ་གཅིག་སྟོན་པར་བྱེད། ། ཞེས་ཀྱང་གསུངས་སོ། །ཆོས་ཐམས་ཅད་སྐྱེ་མེད་འགག་མེད་འདུ་བྱ་བ་མེད་པར་བཟོད་པ་ནི་མི་སྐྱེ་བ་བཟོད་པ་དང༌། མིང་དང་གཟུགས་མི་སྐྱེ་བ་ཤེས་པ་ནི་སྐྱེ་བ་ཤེས་པ་དང༌། ཆོས་གཉིས་ཀུན་ཏུ་སྤྱོད་པ་མེད་པ་ཉིད་ནི་ཆོས་རྣམས་དངོས་པོ་གཉིས་མེད་པའི་རྣམ་པ་གཅིག་ཏུ་སྟོན་པ་དང༌། ཆོས་ཐམས་ཅད་ལ་རྟོག་པ་མེད་པ་ནི་རྟོག་པ་ཀུན་ཏུ་འཇོམས་པ་དང་ཉན་རང་གི་ལྟ་བ་ཐམས་ཅད་བཟློག་པ་ནི་ཐེག་དམན་གྱི་འདུ་ཤེས་ཉན་རང་གི་ལྟ་བ་སྤོང་བ་དང༌། བག་ཆགས་དང་མཚམས་སྦྱོར་བ་དང་ཉོན་མོངས་པ་ཐམས་ཅད་འདོར་བ་ནི་ཉོན་མོངས་པ་སྤོང་བ་དང༌། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ནི་ཞི་གནས་ངེས་པར་སེམས་བའི་ས་དང་ལྷག་མཐོང་ལ་མཁས་པའི་ས་ཡིན་ནོ། ། ཁམས་གསུམ་ལ་དགའ་བ་མེད་པ་ནི་སེམས་དུལ་བ་དང་དབང་པོ་དྲུག་ན་ཤེས་པ་ཕྱི་རོལ་ལ་རབ་ཏུ་མི་འཕྲོ་བ་ནི་སེམས་ཞི་བ་དང༌། སངས་རྒྱས་ཀྱི་སྦྱན་ཐོབ་པ་ནི་ཐམས་ཅད་ལ་ཐོགས་པ་མེད་པའི་ཡེ་ཤེས་དང༌། སྐྱེ་མཆེད་དྲུག་ལ་བཏང་སྙོམས་སུ་གནས་པའི་ཡེ་ཤེས་ནི་ཆགས་པའི་ས་མ་ཡིན་པ་དང༌། གང་འདོད་པའི་ཞིང་གཞན་དང་གཞན་དུ་གཅིག་ཆར་དུ་འགྲོ་བ་ནི་གར་འདོད་པར་ཞིང་གཞན་དུ་ནི་མཉམ་དུ་འགྲོ་བ་དང༌། འཁོར་གྱི་དཀྱིལ་འཁོར་དེ་དང་དེར་ལུང་སྟོན་པ་ནི་འཁོར་གྱི་དཀྱིལ་འཁོར་ཀུན་ཏུ་བདག་གི་ངོ་བོ་ནི་སྟོན་པ་ཉིད་དང་ཉི་ཤུ་པོ་དེ་ཡོངས་སུ་རྫོགས་པ་ནི་བགྲོད་པ་གཅིག་པའི་ལམ་ས་བརྒྱད་པ་དང་འབྲེལ་པའི་ཕྱིར་ས་བདུན་པ་རིང་དུ་སོང་བ་འདོད་པའོ། །བགྲོད་གཅིག་ལམ་དང་འབྲེལ་པའི་ཕྱིར། །རིང་དུ་སོང་པའི་སར་འདོད་དོ་ཞེས་དང་འཁོར་ལོ་བཀོད་པའི་རྣམ་ཀུན་ལ། འོད་ཀྱི་དྲ་བ་བརྩེ་བ་དང༌། །འཁོར་པའི་མཚོ་ཡི་འདམ་རྒལ་བས། དེ་ལ་རིང་དུ་སོང་ཞེས་བྱ། །ཞེས་སོ། །ས་བརྒྱད་པ་ཡོངས་སུ་སྦྱོང་བའི་ལས་ནི་རྣམ་པ་དུ་བཤད་ཅེ་ན། སེམས་ཅན་ཀུན་ཡིད་ཤེས་པ་དང༌། །མངོན་པར་ཤེས་བས་བརྩེ་བ་དང༌། །སངས་རྒྱས་ཞིང་བཟང་བསྒྲུབ་པ་དང༌། །ཡོངས་སུ་བརྟག་ཕྱིར་སངས་རྒྱས་བསྟེན། དབང་པོ་ཤེས་དང་རྒྱལ་པ་ཡི། ཞིང་སྦྱོང་སྒྱུ་མ་ལྟར་གནས་དང༌། །བསམ་བཞིན་སྲིད་པ་ལེན་པ་དང་ལས་ནི་རྣམ་པ་འདི་བརྒྱད་བཤད་པ་ཡིན་ནོ། ། དེ་དག་ཀྱང་འདི་ལྟར་ཕ་རོལ་གྱི་སེམས་ཤེས་པའི་མངོན་ཤེས་ཀྱིས་སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བ་རྣམས་ཤེས་པ་ནི་སེམས་ཅན་ཀུན་གྱི་ཡིད་ཤེས་པའི་ལས་དང༌། སངས་རྒྱས་ཀྱི་ལྟ་བའི་ཕྱིར་རྫུ་འཕྲུལ་གྱི་མངོན་ཤེས་ཀྱིས་བརྩེ་ཞིང་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བ་ནི་མངོན་པར་ཤེས་པས་བརྩེ་བའི་ལས་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་དབང་ཕྱུག་འཁོར་ལོ་བསྒྱུར་བའི་ས་ལ་གནས་ནས་སེམས་ཅན་སྨིན་པར་བྱ་བའི་ཕྱིར། འཇིག་རྟེན་གྱི་ཁམས་ཀྱི་དེ་ཐམས་ཅད་གཏོང་ཞིང་དེས་རློམ་སེམས་སུ་ཡང་མི་བྱེད་པ་ནི་ཇི་ལྟར་མཐོང་བའི་སངས་རྒྱས་ཀྱི་ཞིང་བཟང་པོ་སྒྲུབ་པའི་ལས་དང༌། ཆོས་ཀྱི་སྐུུ་ལ་ཡང་དག་པའི་ཇི་ལྟ་བ་བཞིན་དུ་ཡོངས་སུ་བརྟག་པའི་ཕྱིར། ཆོས་ལ་བསྙེན་བཀུར་བྱེད་པ་ནི་སུས་ཆོས་མཐོང་བ་དེས་སངས་རྒྱས་མཐོང་ངོ༌། །ཞེས་གསུངས་པའི་ཚུལ་གྱིས་སངས་རྒྱས་བསྟེན་པའི་ལས་དང༌། སྟོབས་བཅུ་ལ་གནས་ནས་སེམས་ཅན་ཐམས་ཅད་ཀྱི་དབང་པོ་རྫོགས་པར་ཤེས་པ་ནི་དབང་པོ་མཆོག་དང་མཆོག་མ་ཡིན་པའི་ལས་དང་མི་དམིགས་པའི་ཚུལ་གྱིས་སེམས་ཅན་ཐམས་ཅད་ཀྱི་སེམས་དག་པར་བྱེད་པ་ནི་རྒྱལ་བའི་ཞིང་སྦྱོང་བའི་ལས་དང་རྒྱུ་མ་ལྟ་བུའི་ཏིང་ངེ་འཛིན་ལ་གནས་་་་་ནས་བྱ་བ་ཐམས་ཅད་བྱེད་ལ། དེའི་སེམས་ཆོས་གང་ལ་ཡང་ཞེན་པས་མི་འཇུག་པ་ནི་སྒྱུ་མ་ལྟ་བུར་གནས་པའི་ལས་དང་ཇི་ལྟ་ཇི་ལྟ་བུས་སེམས་ཅན་སྨིན་པར་འགྱུར་བ་དེ་ལྟ་དེ་ལྟ་བུའི་ལུས་བསམ་བཞིན་དུ་ཡོངས་སུ་འཛིན་པ་ནི་བསམས་བཞིན་དུ་སྲིད་པ་ལེན་པའི་ལས་ཏེ། ལས་རྣམ་པ་འདི་བརྒྱད་རྫོགས་པ་ནི་མཚན་མ་ལ་རྩོལ་བའི་འདུ་ཤེས་དང༌། མཚན་མ་མེད་པའི་འདུ་ཤེས་གཉིས་ཀྱི་མི་གཡོ་བའི། ཕྱིར་ས་བརྒྱད་པ་མི་གཡོ་བ་དག་པ་ཡིན་ནོ། །འདུ་ཤེས་གཉིས་ཀྱིས་མི་གཡོ་བའི་ཕྱིར། །མི་གཡོ་བ་ཞེས་ངེས་པར་བརྗོད། །ཅེས་སོ། །ས་དགུ་པ་ལ་གནས་པས་ཆོས་བཅུ་གཉིས་རྫོགས་པར་བྱའོ། ། བཅུ་གཉིས་པོ་གང་ཡིན་ཞེ་ན། སྨོན་ལམ་དག་ནི་མཐའ་ཡས་དང༌། །ལྷ་ལ་སོགས་པའི་སྐད་ཤེས་དང༌། །སྤོབས་པ་ཆུ་བོ་ལྟ་བུ་དང༌། །མངལ་དུ་འཇུག་པ་མཆོག་དང་ནི། ། རིགས་དང་རུས་དང་ཆོ་འབྲང་དང༌། །འཁོར་དང་སྐྱེ་བ་དག་དང་ནི། །ངེས་འབྱུང་བྱང་ཆུབ་ཤིང་རྣམས་དང༌། །ཡོན་ཏན་ཕུན་སུམ་ཚོགས་པ་དང༌། །དེ་དག་ཀྱང་འདི་ལྟར་ཕར་ཕྱིན་དྲུག་རྫོགས་པར་བྱ་བའི་ཕྱིར། སྨོན་ལམ་ཇི་ལྟ་ཇི་ལྟ་བུ་འདེབས་པ་དེ་ལྟ་དེ་ལྟ་བུར་འགྲུབ་པར་འགྱུར་བ་ནི། སྨོན་ལམ་དག་ནི་མཐའ་ཡས་པ་དང༌། ངེས་པའི་ཚིག་སོ་སོ་ཡང་དག་པར་རིག་པ་ནི་ལྷ་དང་ལ་སོགས་པའི་སྒྲས་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང༌། ནམ་མཁའ་ལྡིང་དང༌། མི་འམ་ཅི་ལ་སོགས་པའི་སྐད་ཤེས་པ་དང༌། སྤོབས་པ་སོ་སོ་ཡང་དག་པ་རིག་པ་ནི། སྤོབས་པའི་རྒྱུན་ཆུ་བོ་ལྟ་བུ་མི་ཟད་པ་དང༌། སེམས་ཅན་གྱི་དོན་དུ་སྟོན་པ་ཙམ་མ་གཏོགས་པས་བརྒྱད་པ་ཡན་ཆད་མངལ་ན་གནས་པ་མེད་ཅིང་ཚེ་རབས་ཐམས་ཅད་དུ་རྫུས་ཤིང་སྐྱེ་བ་ན་མངལ་དུ་འཇུག་པ་ཕུན་སུམ་ཚོགས་པ་དང༌། བྱང་ཆུབ་སེམས་དཔའ་ཆེན་པོའི་རིགས་ཆེན་པོར་སྐྱེ་བ་ནི་རིགས་ཕུན་སུམ་ཚོགས་པ་དང༌། རིགས་གང་ལས་སྔོན་གྱི་བྱང་ཆུབ་སེམས་དཔའ་ཆེན་པོའི་འཁོར་རྣམས་བྱུང་བར་གྱུར་པའི་རིགས་དེར་སྐྱེ་བ་ནི་རུས་ཕུན་སུམ་ཚོགས་པ་དང༌། རྒྱལ་པོའི་རིགས་དང་བྲམ་ཟེའི་རིགས་ཤིང་ས་ལ་ཆེན་པོ་ལྟ་བུ་སྐྱེ་བ་ནི་ཆོ་འབྲང་སྟེ། ཆོ་རིགས་ཕུན་སུམ་ཚོགས་པ་དང༌། སེམས་ཅན་རྣམས་བྱང་ཆུབ་ཏུ་བཀོད་ནས་བྱང་ཆུབ་སེམས་དཔའ་ཆེན་པོའི་འཁོར་ཉིད་དང་ལྡན་པ་འཁོར་ཕུན་སུམ་ཚོགས་པ་དང༌། སྐྱེས་མ་ཐག་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པ་དང༌། དེ་དག་རྣམ་པ་དྲུག་ཏུ་གཡོ་བར་འགྱུར་བ་ནི་སྐྱེ་བ་ཕུན་སུམ་ཚོགས་པ་དང༌། སེམས་ཅན་བྱེ་བ་ཁྲག་ཁྲིག་འབུམ་ཕྲག་དུ་མ་དང༌། ཁྱིམ་ནས་ཁྱིམ་མེད་པར་རབ་ཏུ་འབྱུང་ཞིང༌། སེམས་ཅན་དེ་དག་ཀྱང་ཐེག་པ་གསུམ་ལ་ངེས་པར་འབྱུང་བ་ནི། ངེས་པར་འབྱུང་བ་ཕུན་སུམ་ཚོགས་པ་དང༌། བྱང་ཆུབ་ཤིང་གི་རྩ་བ་གསེར། སྡོང་པོ་བཻཌཱུརྱ་ཡལ་ག་ལོ་འདབ་རྣམས་རིན་པོ་ཆེ་སྣ་བདུན་ལས་གྲུབ་པ་དང༌། ཡལ་ག་ལོ་འདབ་དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་པའི་བར་དུ་སྣང་བས་ཁྱབ་པར་བྱེད་པ་ནི། བྱང་ཆུབ་ཀྱི་ཤིང་གི་བཀོད་པ་འམ་རྒྱན་ཕུན་སུམ་ཚོགས་པ་དང༌། སེམས་ཅན་ཡོངས་སུ་སྨིན་པར་བྱས་ནས་སངས་རྒྱས་ཀྱི་ཞིང་ཡོངས་སུ་དག་པ་ནི་བྱང་ཆུབ་སེམས་དཔའི་ཡོན་ཏན་ཕུན་སུམ་ཚོགས་པ་ཡོངས་སུ་རྫོགས་པ་སྟེ། སོ་སོ་ཡང་དག་པར་རིག་པའི་བློ་གྲོས་བཟང་བའི་ཕྱིར་ས་དགུ་བ་ལེགས་པའི་བློ་གྲོས་རྫོགས་པར་འཐོབ་བ་ཡིན་ནོ། །སོ་སོ་ཡང་དག་རིག་བློ་བཟང༌། །ས་དེ་ལེགས་པའི་བློ་གྲོས་ཡིན། །ཞེས་སོ། །ས་བཅུ་བ་གང་ཞིག་ཡིན་པར་ཤེས་པར་བྱ་ཞེ་ན། །ས་དགུ་འདས་ནས་ཡེ་ཤེས་ནི། །གང་གིས་སངས་རྒྱས་སར་གནས་པ། །དེ་ནི་བྱང་ཆུབ་སེམས་དཔའ་ཡི། །བཅུ་པ་ཡིན་པར་ཤེས་པར་བྱ་བ་ཡིན་ནོ། །ས་དགུ་ནི། ཉན་ཐོས་ཀྱི་ས་བདུན་དང༌། རང་སངས་རྒྱས་ཀྱི་ས་གཅིག་དང༌། བྱང་ཆུབ་སེམས་དཔའི་ས་དགུ་བོ་བྱང་ཆུབ་སེམས་དཔའི་ས་ཞེས་པ་གཅིག་ཏུ་བགྲེངས་བས་ན་ཐེག་པ་གསུམ་གས་བསྡུས་པའི་ས་དགུའོ། །དེ་ལ་དཀར་པོ་རྣམ་པར་མཐོང་བའི་ས་དང༌། རིགས་ཀྱི་ས་དང། བརྒྱད་པའི་ས་དང༌། མཐོང་བའི་ས་དང༌། བསྲབས་པའི་ས་དང༌། འདོད་ཆགས་དང་བྲལ་བའི་ས་དང༌། བྱས་བ་རྟོགས་པ་ཅན་གྱི་ས་སྟེ་བདུན་ནོ། །དཀར་པོ་རྣམ་པར་མཐོང་བའི་ས་ནི། མོས་པས་སྤྱོད་པའི་སའོ། །རིགས་ཀྱི་ས་ནི་བཟོད་པ་ཆེན་པོའི་སའོ། །བརྒྱད་པའི་ས་ནི་རྒྱུན་དུ་ཞུགས་པའི་འབྲས་བུ་ལ་འཇུག་པའི་ས་སྟེ། དགྲ་བཅོམ་པ་ནས་བགྲངས་ནས་བརྒྱད་པར་འགྱུར་རོ། །མཐོང་བའི་ས་ནི་རྒྱུན་དུ་ཞུགས་པའི་འབྲས་བུ་ལ་གནས་པའི་སའོ། །བསྲབས་པའི་ས་ནི་ལན་ཅིག་ཕྱིར་འོང་བའི་ས་སྟེ་དེས་འདོད་པའི་འདོད་ཆགས་དང༌། གནོད་སེམས་བསྲབ་མོར་བྱས་པའི་ཕྱིར་རོ། །འདོད་ཆགས་དང་བྲལ་བའི་ས་ནི་ཕྱིར་མི་འོང་བའི་ས་སྟེ་དེས་འདོད་པ་ལ་བདུན་པ་དང༌། གནོད་སེམས་སྤངས་པས་དེ་ལ་འདོད་ཆགས་དང་བྲལ་བའི་ཕྱིར་རོ། །བྱིས་པ་རྟོགས་པ་ཅན་གྱི་ས་ནི་དགྲ་བཅོམ་པ་ཉིད་དེ། བྱ་བ་བྱས་སོ་ཞེས་ཁོང་དུ་ཆུད་པ་ནི་བྱས་པ་རྟོགས་པ་སྟེ། དེ་ན་འདི་ལ་ཡོད་པས་ན་བྱས་པ་རྟོགས་བ་ཅན་དང་དགྲ་བཅོམ་པའོ། །ཡང་ན་འདི་བྱིས་པ་སྲུང་བའི་ངང་ཚུལ་ཅན་ཡིན་པས་སྲུང་བ་དེའི་ས་ནི་བྱིས་པ་སྲུང་བའི་སའོ། །ཉན་ཐོས་ཀྱི་ས་བདུན་པོ་དེ་དང༌། རང་སངས་རྒྱས་ཀྱི་ས་དང༌། བྱང་ཆུབ་སེམས་དཔའི་ས་སྟེ། ས་དགུ་པོ་དེ་འདས་ནས་བྱང་ཆུབ་སེམས་དཔའ་ས་བཅུ་ལ་གནས་པ་ལ་དེ་བཞིན་གཤེགས་པ་ཞེས་བརྗོད་པའི་རྒྱུ་མཚན་ས་བཅུ་པའི་ཡེ་ཤེས་དེ་ནི་ཕར་ཕྱིན་བཅུ་ནས་རྣམ་མཁྱེན་གྱི་བར་ཡོངས་སུ་རྫོགས་པ་དང༌། བག་ཆགས་དང༌། མཚམས་སྦྱོར་བ་དང༌། ཉོན་མོངས་པ་ཐམས་ཅད་སྤངས་པ་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པའི་རྒྱུ། གང་གིས་སངས་རྒྱས་ཀྱི་སར་གནས་པ་སྟེ་དེ་བཞིན་གཤེགས་པ་ཞེས་བརྗོད་པ་དེ་ནི་བྱང་ཆུབ་སེམས་དཔའི་བཅུ་པ་ཆོས་ཀྱི་སྤྲིན་ཡིན་པ་ཤེས་པར་བྱའོ། །ཏིང་ངེ་འཛིན་དང་གཟུངས་ཀྱི་སྒོ་གཉིས་ཀྱི་སྦྲིན་བཞིན་དུ་ཐོབ་པའི་ཆོས་རྟེན་ལ་ཡོད་པ་ནམ་མཁའ་ལྟ་བུ་ལ་ཁྱབ་པའི་ཕྱིར་ཏེ། སྦྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་གསུངས་སོ། །ལེ་བརྒྱད་མ་ལྟར་འབྱུང་བ་ལྟར། ཉི་ཁྲི་སྣང་བ་ལ་སོགས་པས་འདིར་དཀར་པོ་རྣམ་པར་མཐོང་བའི་ས་ཆད་ཅིང་ཉན་ཐོས་ཀྱི་ས་ཞེས་པ་གཅིག་བཙུད་ནས་དེ་ལ་རང་བཟོའི་བཤད་པ་ཅི་རིགས་སུ་བྱས༌། དེ་རྣམས་ཀྱིས་ཚོགས་ཀྱི་བསྒྲུབ་པ་ལ་ཞུགས་པ་བཤད་ཟིན་ཏོ། །རབ་འབྱོར་གྱིས་ཞུས་པ་གསུམ་པ་ལ་སོགས་པ་ཐེག་པ་དེ་གང་ནས་ངེས་པར་འབྱུང་དེ་གང་དུ་གནས། དེས་སུ་ཞིག་ངེས་པར་འབྱུང༌། ཞེས་པའི་ལན་དུ་ཁམས་གསུམ་ནས་ངེས་པར་འབྱུང་བ་དང༌། གང་དུ་ཡང་གནས་པ་མེད་པ་དང༌། སུ་ཡང་ངེས་པར་འབྱུང་བ་མེད་ཅེས་པ་ལ་སོགས་པ་རྒྱུ་མཚན་དང་བཅས་པ་རྣམས་ཀྱིས་ཡང་དག་པ་མ་ཡིན་པའི་ཀུན་དུ་རྟོག་པའི་ངོ་བོ་ཁམས་གསུམ་ནས་ངེས་པར་འབྱུང་བ་དང༌། དངོས་པོའི་རང་བཞིན་དུ་མི་གནས་པའི་ཚུལ་གྱིས་རྣམ་མཁྱེན་ཉིད་ལ་གནས་པ་དང༌། དོན་དམ་པར་སུ་ཡང་ངེས་པར་འབྱུང་བ་མེད་པའི་ཚུལ་གྱིས་ཐ་སྙད་དུ་གང་ཟག་བྱང་ཆུབ་སེམས་དཔའི་ངེས་པར་འབྱུང་བ་ནི་ཚོགས་སྒྲུབ་ཀྱི་བྱེད་ལས་ཡིན་པས། ཚོགས་ཀྱི་བསྒྲུབ་པ་དེ་གཉེན་པོ་དུ་ཞིག་དུ་འགྱུར་ན། མཐོང་དང་གོམས་པའི་ལམ་དག་ལ། ། གཟུང་དང་འཛིན་པའི་རྣམ་རྟོག་རྣམས། །ཉེ་བར་ཞི་བར་བྱ་བའི་ཕྱིར། །གཉེན་པོ་རྣམ་པ་བརྒྱད་ཅེས་བྱ་བ་ཉིད་དུ་འགྱུར་རོ། །དེ་ལ་མཐོང་ལམ་གྱི་གནས་སྐབས་ལ་སྤང་བྱ་གཟུང་རྟོག་གཉིས་དང༌། འཇིན་རྟོག་གཉིས་སྟེ་གཞི་དང༌། གོམས་པའི་ལམ་གྱི་གནས་སྐབས་ལ་སྤང་བྱ་གཟུང་རྟོག་གཉིས་དང༌། འཛིན་རྟོག་གཉིས་སྟེ་བཞིའོ། །དེ་ལྟར་ལམ་གཉིས་ཀ་ལ་གཟུང་བ་དང་འཛིན་པས་བསྡུས་པའི་རྣམ་པར་རྟོག་པ་བརྒྱད་པོ་དེ་རྣམས་ལམ་སོ་སོ་ལ་ཉེ་བར་ཞི་བར་བྱ་བའི་ཕྱིར་དེ་རྣམས་ཀྱི་གཉེན་པོ་ཡང་རྣམ་པ་བརྒྱད་ཅེས་བྱ་བ་ཉིད་དུ་འགྱུར་རོ། །འདིར་ལམ་སོ་སོ་ལ་གཉེན་པོའི་ངོ་བོ་ནི་ཚོགས་ཀྱི་སྒྲུབ་པ་ཉིད་ཡིན་ལ། སྤང་བྱ་རྣམ་རྟོག་རྣམས་ཀྱི་ངོ་བོ་དབྱེ་བ་དང་བཅས་པ་རྒྱས་པ་ན་སྐབས་ལྔ་པ་ལས་འཆད་པར་འགྱུར་རོ། །དེ་ལྟར་ཚོགས་སྒྲུབ་ཀྱི་ངོ་བོ་དང་དེ་ལ་ཞུགས་པ་དང་དེའི་བྱེད་ལས་རྣམས་ཀྱིས་ཚོགས་ནི་ཞེས་པ་དེ་བཤད་ཟིན་ཏོ། ། ༡༠༽ངེས་འབྱུང་སྒྲུབ་པ་བཤད་པ། ད་ནི་ངེས་པར་འབྱུང་བའི་སྒྲུབ་པ་སྟོན་ཏེ། །མདོ་ལས། ཐེག་པ་ཆེན་པོ་ངེས་པར་འབྱུང་བས་སྔར་ཚོགས་སྒྲུབ་ཀྱི་སྐབས་དང༌། འདིའི་སྐབས་ཀྱི་ཐེག་པ་ཆེན་པོ་ལ་ཁྱད་པར་ཅི་ཡོད་ཅེ་ན། གནོད་འཇོམས་ལས། སྔར་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་སྒྲ་བཤད་པ་ལ་འཇུག་པའི་གནས་སྐབས་སུ་ཕ་རོལ་ཏུ་ཕྱིན་པ་ལ་སོགས་པ་གཟུངས་ཀྱི་སྒོའི་མཐའ་ལ་ཐུག་གི་བར་དུ་བསྒྲུབ་པའི་ཆོས་རྣམས་ཐེག་པ་ཆེན་པོ་ཡིན་པར་བསྟན་ཏོ། །ཞེས་དང༌། ད་ནི་ངེས་པར་འབྱུང་བའི་སྐབས་ཀྱི་འབྲས་བུའི་ཐེག་པ་ཆེན་པོ་སངས་རྒྱས་ཉིད་དུ་སྟོན་ཏོ། །ཞེས་གསུངས་སོ། །དེས་ན་ངེས་འབྱུང་སྒྲུབ་པའི་རང་བཞིན་ཐེག་པ་ཆེན་པོའི་ངོ་བོ་དང་དེའི་ཆེ་བའི་ཡོན་ཏན་གཉིས་ཏེ། དེ་ལ་དང་པོ་ནི་མདོ་ལས། ཕར་ཕྱིན་དྲུག་དང་གཟུངས་ཀྱི་སྒོ་དང་ཏིང་ངེ་འཛིན་ཐམས་ཅད་དང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང་སྟོབས་བཅུ་དང་མི་འཇིགས་པ་བཞི་དང༌། སོ་སོ་ཡང་དག་པར་རིག་པ་བཞི་དང༌། མ་འདྲེས་པ་བཅོ་བརྒྱད་རྣམས་དེ་རྣམ་པར་སྨིན་པའི་བདག་ཉིད་དུ་གྱུར་པའི་ཆོས་གྱི་སྐུས་བསྡུས་པ་ཉིད་དོ། །གནོད་འཇོམས་ལས། ཕ་རོལ་ཏུུ་ཕྱིན་པ་ལ་སོགས་པའི་ཆོས་རྣམས་རྣམ་པར་སྨིན་པའི་བདག་ཉིད་དུ་གྱུར་པའི་ཆོས་ཀྱི་སྐུས་བསྡུས་པ། ཕ་་རོལ་ཏུུ་ཕྱིན་པ་དྲུག་ལ་སོགས་པ་དེ་དག་ཐེག་པ་ཆེན་པོ་ཉིད་དུ་བསྟན་ཏོ། །ཞེས་གསུངས་སོ། །རྣམ་པར་སྨིན་པའི་དོན་ནི། ལྷུན་གྱིས་གྲུབ་ཅིང་རབ་ཏུ་རྒྱས་པ་སྟེ། སྒྲུབ་པ་འདི་ནི་སྐད་ཅིག་མའི་སྦྱོར་བ་གནས་སྐབས་ཡིན་པས། དེར་དཀར་པོའི་ཆོས་ཐམས་ཅད་རབ་ཏུ་སྨིན་ཅིང་རྫོགས་པའོ། །གང་ཚེ་ཆོས་དཀར་ཐམས་ཅད་ཀྱི་རང་བཞིན་ཤེས་རབ་ཕ་རོལ་ཕྱིན། རྣམ་སྨིན་ཆོས་ཉིད་གནས་སྐབས་སྐྱེས། དེ་ཚེ་སྐད་ཅིག་གཅིག་ཡེ་ཤེས་ཞེས་པའི་དོན་ཏོ། །གཉིས་པ་ཆེ་བའི་ཡོན་ཏན་ནི་ཆེད་དུ་བྱ་བ་ལ་སོགས་པ་རྣམས་ཀྱིས་སྟོན་ཏོ། །མདོ་ལས། ཐེག་པ་ཆེན་པོ་ཞེས་བགྱི་བ་འདི་ནི་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ནས་ངེས་པར་འབྱུང་བར་འགྱུར་བས་དེའི་སླད་དུ་ཐེག་པ་ཆེན་པོ་ཞེས་བགྱིའོ། །ཞེས་པ་ནས། རབ་འབྱོར་གྱི་ལེའུ་ཡོངས་སུ་རྫོགས་ཀྱི་བར་གྱིས་ངེས་པར་འབྱུང་བའི་སྒྲུབ་པ་རིལ་བོ་རྫོགས་པར་བསྟན་ཏོ། ། དེ་ལ་ཆེ་བའི་ཡོན་ཏན་རྣམ་པ་བརྒྱད་ཀྱིས་བདག་ཉིད་ངེས་འབྱུང་སྒྲུབ་པ་ཡིན་པར་སྟོན་པ་འདི་ལྟ་སྟེ། ཆེད་དུ་བྱ་དང་མཉམ་ཉིད་དང༌། ། སེམས་ཅན་དོན་དང་འབད་མེད་དང༌། །མཐའ་ལས་འདས་པའི་ངེས་འབྱུང་དང༌། །ཐེག་པའི་མཚན་ཉིད་ངེས་འབྱུང་དང༌། །རྣམ་པ་ཐམས་ཅད་མཁྱེན་ཉིད་དང༌། །ལམ་གྱི་ཡུལ་ཅན་ངེས་འབྱུང་སྟེ། ། རྣམ་པ་བརྒྱད་ཀྱི་བདག་ཉིད་འདི། །ངེས་འབྱུང་བསྒྲུབ་པ་ཡིན་ཤེས་བྱ། འདི་ལ་རབ་འབྱོར་གྱི་ཞུ་བ་ལྔ་བར་མ་ཆད་དུ་བྱུང་བ་ནི། ཐེག་ཆེན་འདི་འཇིག་རྟེན་ཟིལ་གྱིས་མནན་ནས་ངེས་པར་འབྱུང་བས་དེའི་ཆེད་དུ་ཐེག་པ་ཆེན་པོ་ཞེས་བགྱི་བ་དང༌། ཐེག་པ་འདི་ནམ་མཁའ་མཉམ་པ་དང༌། ཐེག་པ་འདི་སེམས་ཅན་དཔག་ཏུ་མེད་པའི་གོ་འབྱེད་པ་དང༌། ཐེག་ཆེན་འདི་ལ་འགྲོ་འོང་གནས་གསུམ་མེད་པ་དང༌། ཐེག་ཆེན་འདི་ལ་སྔོན་དང་ཕྱི་མའི་མཐའ་དང་དབུས་མི་དམིགས་ལགས་སོ་ཞེས་པའི་ལན་དང་བཅས་པ་ཆེད་དུ་བྱ་དང་ཞེས་པ་ནས་མཐའ་ལས་འདས་པའི་ངེས་འབྱུང་དང་ཞེས་པའི་བར་བསྟན་ཏོ། །དེ་ནས་ཡང་དུས་གསུམ་མཉམ་པ་ཉིད་ཀྱི་ཐེག་ཆེན་འདི་ལ་བསླབ་ནས་དུས་གསུམ་གྱི་བྱང་ཆུབ་སེམས་དཔའ་རྣམས་ཀྱིས་རྣམ་མཁྱེན་ཐོབ་པོ་ཞེས་ཞུས་པའི་ལན་དང་བཅས་པས་ཐོབ་པའི་མཚན་ཉིད་ངེས་འབྱུང་བསྟན་ཏོ། །དེ་ནས་ཡང་ཤཱ་རིའི་བུས་དྲིས་པའི་ལན་དུ་རབ་འབྱོར་གྱིས་བྱང་ཆུབ་དེས་ཀྱང་ཆོས་ཐམས་ཅད་ཀྱི་རྣམ་པ་ཤེས་་དེ་ཞེས་པ་ལ་སོགས་པས། རྣམ་པ་ཐམས་ཅད་མཁྱེན་ཉིད་དང་ཞེས་པ་བསྟན་ཏོ། །དེ་ནས་ཡང་ཤཱ་རིའི་བུས་ཇི་ལྟར་བྱང་ཆུབ་ཀྱི་ལམ་ཡོངས་སུ་སྦྱོང་བར་བྱེད་ཅེས་དྲིས་པའི་ལན་རབ་འབྱོར་གྱིས། སྨྲས་པ་དང་བཅས་པས་ལམ་གྱི་ཡུལ་ཅན་ངེས་འབྱུང་སྟེ། ཞེས་པ་བསྟན་ཏོ། ། དེ་ལ་ཆེད་ནི་གང་བྱ་བ་ནི་གང་ཞེ་ན། འཇིག་རྟེན་ཟིལ་གྱིས་མནན་ནས་ངེས་པར་འབྱུང་བ་ནི་ཆེད་ཡིན་ལ་བྱ་བ་ནི་ཐེག་པ་ཆེན་པོ་ཡིན་ནོ། །དེས་ན་ཟིལ་གྱིས་མནན་ནས་ངེས་པར་འབྱུང་བ་འདིའི་ཆེད་དུ་ངེས་འབྱུང་སྒྲུབ་པའི་ངོ་བོ་ཐེག་པ་ཆེན་པོ་ནི་བྱ་བ་ཡིན་ཏེ། མདོ་ལས། ཐེག་པ་ཆེན་པོ་ཞེས་བགྱི་བ་འདི་ནི་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་མནན་ནས་ངེས་པར་འབྱུང་བས་དེའི་སླད་དུ་ཐེག་པ་ཆེན་པོ་ཞེས་བགྱིའོ། །ཞེས་གསུངས་པས། ཟིལ་གྱིས་མནན་ནས་ངེས་པར་འབྱུང་བ་ནི་ངེས་འབྱུང་སྒྲུབ་པ་ལ་ཐེག་པ་ཆེན་པོ་ཞེས་ཟེར་བའི་རྒྱུ་མཚན་དུ་བསྟན་ཏོ། །མདོ་སྡེ་རྒྱན་དུ་ཡང༌། སྒྲུབ་པ་འདི་ནི་སྲིད་དང་འགྲོ་བ་ཀུན། །ཟིལ་གྱིས་མནན་འགྲོ་ཞི་བ་མཆོག་དང་ལྡན། །ཡོན་ཏན་སྣ་ཚོགས་ཚོགས་ཀྱིས་རྣམ་པར་འཕེལ། །བྱམས་པའི་བསམ་པས་རྟག་ཏུ་འགྲོ་བ་སྡུད། །ཅེས་གསུངས་སོ། ། སྐབས་དང་པོ་འདིར་ཆེད་དུ་བྱ་བ་མི་གཅིག་པ་གསུམ་བསྟན་པ་ལ། སྔར་ནི་ཆེན་པོ་གསུམ་གྱི་ཆེད་དུ་བྱ་བ་ནི་སེམས་དཔའ་ཆེན་པོ་ཡིན་ལ་འཇུག་སྒྲུབ་ཀྱི་སྐབས་སུ་བསྒོམ་པ་རྣམ་པར་གཞིག་པའི་ཆེད་དུ་བྱ་བ་ནི་ནང་སྟོང་པ་ཉིད་ལ་སོགས་པ་བསྒོམ་པ་ཡིན་ཞིང༌། འདིར་ནི་ཟིལ་གྱིས་མནན་ནས་ངེས་པར་འབྱུང་བའི་ཆེད་དུ་བྱ་བ་ནི་ངེས་འབྱུང་སྒྲུབ་པའི་ངོ་བོ་ཐེག་ཆེན་ལ་ཐེག་པ་ཆེན་པོ་ཞེས་པ་འདི་ཡིན་ནོ། །འདི་དག་གི་ཁྱད་པར་མ་ཕྱེ་ན་མདོ་དང་འགལ་བར་འགྱུར་རོ། །མདོ་ལས། ཁམས་གསུམ་ལ་སོགས་པ་བདེན་པའི་དངོས་པོར་མེད་པ་ཉིད་ཀྱིས་ཐེག་པ་ཆེན་པོ་འདིས་ཟིལ་གྱིས་མནན་ཞེས་པ་ལ་སོགས་པ་ཤིན་ཏུ་རྒྱས་ཤིང་འབྱམ་ཀླས་པར་གསུངས་པ་ཐམས་ཅད་ཀྱིས་ཟིལ་གྱིས་མནན་ནས་ངེས་པར་འབྱུང་བའི་རྒྱུ་མཚན་འབའ་ཞིག་བསྟན་ཏོ། །མཉམ་ཉིད་ནི་ཐེག་པ་ཆེན་པོ་འདི་ལ་ཕྱོགས་བཅུ་དང་དབྱིབས་དང་ཁ་དོག་ཐམས་ཅད་ལ་སོགས་པ་དངོས་པོའི་ཆོས་ཐམས་ཅད་མེད་པ་ཉིད་ཀྱིས་དོན་དམ་པའི་ཆོས་ཐམས་ཅད་ནམ་མཁའ་དང་མཉམ་པ་ཉིད་དོ། །སེམ་ཅན་གྱི་དོན་ནི་འདུས་མ་བྱས་ཀྱི་དངོས་པོ་ཐམས་ཅད་མེད་པའི་ཕྱིར་རོ། །ནམ་མཁའ་བཞིན་དུ་ཐེག་ཆེན་ནི་སེམས་ཅན་ཐམས་ཅད་ཀྱིས་གཅིག་ཆར་ལྷག་ནས་མཁྱེན་པ་གསུམ་ལ་འཁོད་ནས་གནས་ཀྱང་དོག་པ་མེད་པའི་ཕྱིར། སེམས་ཅན་དཔག་ཏུ་མེད་གྲངས་མེད་ཚད་མེད་པ་རྣམས་ཀྱི་གོ་འབྱེད་པ་ཡིན་ནོ། །ཐེག་པ་ཆེན་པོ་དེའི་དང་དུ་སེམས་ཅན་ཡང་དམིགས་སུ་མེད་པའོ། །ཐེག་ཆེན་འདི་ལ་ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་གང་ནས་ཀྱང་འོང་བའི་སྐྱེ་བ་མེད་གང་དུ་ཡང་འགྲོ་བའི་འགག་པ་མེད་གང་ན་ཡང་གནས་པའི་དངོས་པོ་མེད་པས་གཡོ་བ་མེད་པའི་ཕྱིར། འགྲོ་འོང་གནས་པའི་འབད་པ་མེད་པ་ཡིན་ནོ། །ཐེག་པ་ཆེན་པོ་འདི་ལ་སྔོན་གྱི་མཐའ་དང༌། ཕྱི་མའི་མཐའ་དང་དབུས་དངོས་པོ་མེད་ཅིང་མི་དམིགས་པས་དོན་དམ་པའི་དུས་གསུམ་མཉམ་པ་ཉིད་ཡིན་པའི་ཕྱིར་མཐའ་ཐམས་ཅད་ལས་འདས་པའི་ངེས་པར་འབྱུང་བའི་བདག་ཉིད་ཡིན་ནོ། །འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དུས་གསུམ་མཉམ་པ་ཉིད་ཀྱི་ཐེག་པ་ཆེན་པོ་འདི་ལ་བསླབས་ནས་རྣམ་པ་ཐམས་ཅད་མཁྱེན་པ་ཉིད་ཐོབ་པ་དང༌། ཐོབ་པར་འགྱུར་བ་དང༌། ཐོབ་པར་བགྱིད་པ་ནི་ཐོབ་པའི་མཚན་ཉིད་དུ་གྱུར་པའི་ངེས་པར་འབྱུང་བའི་བདག་ཉིད་དོ། །ངེས་འབྱུང་སྒྲུབ་པའི་ངོ་བོ་ཐེག་པ་ཆེན་པོའི་བདག་ཉིད་ཀྱི་བྱང་ཆུབ་ཀྱི་རྣམ་པ་ཐམས་ཅད་ཤེས་པ་ནི་གཟུགས་སོགས་ཀྱི་རྣམ་པ་ཐམས་ཅད་མཁྱེན་པ་ཉིད་ཡིན་ནོ། །མདོ་ལས། བྱང་ཆུབ་གང་ཡིན་པ་ཉིད་སེམས་དཔའ་ཡིན་པས་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །བྱང་ཆུབ་དེས་ཀྱང་ཆོས་ཐམས་ཅད་ཀྱི་རྣམ་པར་ཤེས་ཏེ། ཆོས་དེ་དག་ལ་མངོན་པར་ཞེན་པ་ཡང་མེད་དོ། ། ཞེས་སོ། །ལམ་གྱི་ཡུལ་ཅན་ངེས་འབྱུང་ལ་ལམ་ནི་སྔར་ཐེག་པ་ཆེན་པོའི་ངོ་བོར། བསྟན་པ་གཟུངས་ཀྱི་སྒོ་ནས་མ་འདྲེས་པ་བཅོ་བརྒྱད་ཀྱི་བར་གང་ཡིན་པ་ཉིད་ཡིན་ཞིང༌། ལམ་དེའི་ངོ་བོར་གྱུར་པའི་ཕ་རོལ་ཏུ་ཕྱིན་པ་དྲུག་ལ་སྦྱིན་པ་པོ་དང་སྦྱིན་བྱ་དང༌། ལེན་པ་པོ་ལ་སོགས་པ་འཁོར་གསུམ་དུ་རྣམ་པར་མི་རྟོག་པའི་ཡེ་ཤེས་ནི་ལམ་གྱི་ཡུལ་ཅན་གྱི་ངེས་འབྱུང་སྟེ། འཁོར་གསུམ་མི་དམིགས་པའི་ཡེ་ཤེས་དེ་ཉིད་བྱང་ཆུབ་ཀྱི་ལམ་ལ་འཁོར་གསུམ་དུ་རྟོགས་པའི་དྲི་མ་ཡོངས་སུ་སྦྱོང་བར་བྱེད་པ་ཡིན་པའི་ཕྱིར་རོ། །དེས་ན་འཇིག་རྟེན་ཟིལ་གྱིས་གནོན་པའི་ཆེ་བ་དང༌། ཆོས་ཐམས་ཅད་མཉམ་པ་ཉིད་ཀྱི་ཆེ་བ་དང༌། སེམས་ཅན་གྱི་དོན་བྱེད་པའི་ཆེ་བ་དང༌། ལྷུན་གྱིས་གྲུབ་པ་འབད་པ་མེད་པའི་ཆེ་བ་དང༌། མཐའ་ཐམས་ཅད་ལས་འདས་པའི་ཆེ་བ་དང༌། རྣམ་མཁྱེན་ཐོབ་པའི་ཆེ་བ་དང༌། གཟུགས་སོགས་ཆོས་ཐམས་ཅད་ཀྱི་རྣམ་པ་ཐམས་ཅད་ཤེས་པའི་ཆེ་བ་དང༌། ལམ་གྱི་ཡུལ་ཅན་འཁོར་གསུམ་དུ་མི་རྟོག་པའི་ཡེ་ཤེས་ཀྱིས་ཡུལ་བྱང་ཆུབ་ཀྱི་ལམ་སྦྱོང་ཞིང་དག་པར་བྱེད་པའི་ཆེ་བ་སྟེ། ཆེ་བའི་ཡོན་ཏན་རྣམ་པ་བརྒྱད་ཀྱིས་བདག་ཉིད་དུ་གྱུར་པའི་ཐེག་པ་ཆེན་པོ་འདི་ངེས་པར་འབྱུང་བའི་སྒྲུབ་པ་ཡིན་པར་ཤེས་པར་བྱའོ། །དེ་རྣམས་ཀྱིས་ཚོགས་ནི་ངེས་པར་འབྱུང་བཅས་རྣམས། །ཐུབ་པའི་རྣམ་ཀུན་མཁྱེན་པ་ཉིད། །ཅེས་པ་དེ་བསྟན་ཟིན་ཏོ། །དེ་ལྟར་ན་སྒོ་གསུམ་ལས་ཤེས་རབ་ཀྱི་ཕ་རོལ་ཏུ་ཕྱིན་པ་འབྲིང་དུ་བསྟན་པའི་སྒོ་དང་རྣམ་གྲངས་བཅུ་གཅིག་ལས་གཉིས་པ་རབ་འབྱོར་གྱིས་ཁྲི་བརྒྱད་སྟོང་པར་རབ་འབྱོར་ལེའུ་ཉེར་གཅིག་ཡན་ཆད་ཀྱིས་རྒྱས་པར་བཤད་པ་སོང་ངོ༌། །དངོས་པོ་བརྒྱད་ལས་རྣམ་ཀུན་མཁྱེན་ཉིད་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་པ་མདོ་ལུགས་མ་ཞེས་བྱ་བ་ལས། སྐབས་དང་པོའི་འགྲེལ་པའོ། །ཉི་ཁྲི་ལེའུ་བརྒྱད་པ་ལྟར་ན་རབ་འབྱོར་ལེའུ་སྟེ་དང་པོའོ། ། གཉིས་པ། ལམ་ཤེས་རྒྱས་པར་བཤད་པ། ༡༽ལམ་ཤེས་ཀྱི་ཡན་ལག་བཤད་པ། ད་ནི་བརྒྱ་བྱིན་གྱི་ལེའུ་ནས་གཉིས་པ་ལམ་ཤེས་པ་ཉིད་ཀྱི་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པར་ཡང་དག་པར་བཤད་དེ། དེ་ལ་རྣམ་གྲངས་གསུམ་པ་ནས་བརྩམས་ཏེ་རྒྱས་པར་བསྟན་པའི་སྒོ་ནི་དྲང་དགོས་པའི་གདུལ་བྱའི་དབང་གིས་བདེན་པ་གཉིས་ཀའི་ཚུལ་དུ་ལམ་ཤེས་པ་ཉིད་ལས་བརྩམས་ཏེ་བྱང་ཆུབ་སེམས་དཔའ་རྣམས་ཀྱི་སྒྲུབ་པ་རྣམ་པར་རྟོག་པ་དང་བཅས་པ་དང༌། རྣམ་པར་མི་རྟོག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟོན་ཏེ། དེ་ཡང་ལྷ་རྣམས་རུང་བར་བྱ་བའི་ཕྱིར། །འོད་ཀྱིས་མོག་མོག་པོར་མཛད་དང༌། །ཡུལ་ངེས་པ་དང་ཁྱབ་པ་དང༌། །རང་བཞིན་དང་ནི་དེ་ཡི་ལས། །ཞེས་པ་ལ་སོགས་པའོ། །ལམ་ཤེས་པ་ཉིད་ཀྱི་དངོས་པོ་བཅུ་ལས་དང་པོ་ནི། སྐབས་འདིར་ཤེར་ཕྱིན་སྟོན་པའི་ལྟས་སུ་འཁོར་འདུས་པ་བསྟན་པ་དང་འོད་བསྟན་པ་ཡང་བྱས་པ་ལས། དེ་བཞིན་གཤེགས་པའི་འོད་ཀྱིས་ལྷ་རྣམས་ཀྱི་འོད་ཟིལ་གྱིས་མནན་པའི་དགོས་པ་ནི། འཁོར་དུ་འདུ་པའི་ལྷ་རྣམས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པའི་སྣོད་དུ་རུང་བར་བྱ་བའི་ཕྱིར་ཏེ། མདོ་ལས་རབ་འབྱོར་གྱིས་ལྷའི་དབང་པོ་ལ་སྨྲས་པ། །བྱང་ཆུབ་སེམས་དཔའ་རྣམས་ཀྱི་ཤེར་ཕྱིན་གང་ཡིན་པ་དང༌། བྱང་ཆུབ་སེམས་དཔའ་ཤེར་ཕྱིན་ལ་ཇི་ལྟར་གནས་པ་དང༌། ཇི་ལྟར་བསླབས་པར་བྱ་བ་བསྟན་གྱི། ལྷའི་བུ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱིས་ཤིག ཅེས་སོ། །དེའི་ཕྱིར་དེ་བཞིན་གཤེགས་པའི་རང་བཞིན་གྱི་འོད་ཀྱིས། ལྷ་རྣམས་ཀྱི་ལས་ཀྱི་རྣམ་པར་སྨིན་པ་ལས་བྱུང་བའི་ལུས་ཀྱི་འོད་མོག་མོག་པོར་ཟིལ་གྱིས་གནོན་པར་མཛད་དོ། །དེ་བཞིན་གཤེགས་པའི་འོད་ནི་བཅོས་མ་མ་ཡིན་པའི་ཕྱིར་རང་བཞིན་ནོ། །ལྷ་རྣམས་ཀྱི་འོད་ནི་སྔོན་གྱི་ལས་ཀྱིས་སྒྲུབ་ཅིང་བཅོས་མའི་རང་བཞིན་ནོ། །ལམ་ཤེས་ཀྱི་ངོ་བོ་བྱང་ཆུབ་སེམས་དཔའི་ཤེར་ཕྱིན་བསྟན་གྱིས་ལྷའི་བུ་སེམས་མ་བསྐྱེད་པ་དག་གི་བླ་ན་མེད་པའི་བྱང་ཆུབ་དུ་སེམས་བསྐྱེད་པར་གྱིས་ཤིག ཅེས་གསུངས་པའི་ཕྱིར་བྱང་ཆུབ་སེམས་དཔའི་ལམ་ཤེས་ཀྱི་བདག་ཉིད་དུ་གྱུར་པའི་ཤེར་ཕྱིན་བསྟན་པའི་སྣོད་དུ་རུང་བའི་ཡུལ་ནི་བླ་ན་མེད་པའི་བྱང་ཆུབ་དུ་སེམས་བསྐྱེད་པ་ཉིད་དུ་ངེས་པའོ། ། ལམ་ཤེས་ཉིད་ཀྱིས་ཐེག་པ་གསུམ་ཆར་གྱི་ཡོན་ཏན་བསྡུས་པའི་ཕྱིར་ཐེག་པ་སུམ་ཆར་ལ་ཁྱད་པ་ཡིན་ཏེ། གནོད་འཇོམས་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཉོན་ཐོས་དང་རང་སངས་རྒྱས་ཀྱི་ས་ལ་ཐམས་ཅད་ཤེས་པ་ཉིད་ཀྱི་ཕྱོགས་དང་མཐུན་པ་དང༌། བྱང་ཆུབ་སེམས་དཔའི་ས་ལ་ལམ་གྱི་རྣམ་པ་ཤེས་པའི་ཕྱོགས་དང་མཐུན་པ་སྟེ། གཉིས་ཀ་ཡང་འདི་བྱང་ཆུབ་སེམས་དཔའ་རྣམ་པ་ཐམས་ཅད་མཁྱེན་པ་ཉིད་ཐོབ་པ་འདོད་པ་ལ། ལམ་གྱི་རྣམ་པར་ཤེས་པ་ཉིད་དུ་བསྟན་པར་བྱའོ། །ཞེས་གསུངས་སོ། །ལམ་ཤེས་དེའི་རང་བཞིན་ནམ། ངོ་བོ་ནི་ཉོན་མོངས་རྟགས་དང་མཚན་མ་དང༌། །མི་མཐུན་ཕྱོགས་དང་གཉེན་པོ་དག །དབེན་དང་ཞེས་པ་ལ་སོགས་པའི་ངོ་བོ་ཉིད་དུ་བསྟན་པ་གང་ཡིན་ཏེ། སྐབས་འདི་ཉིད་དུ་ཡང་མོས་སྦྱོད་ཀྱི་ས་ནས་གཟུང་སྟེ་མཐོང་སྒོམ་གྱི་ལམ་རིམ་གྱིས་སྟོན་པར་འགྱུར་བ་དག་གོ །ལམ་ཤེས་དེའི་བྱེད་ལས་ནི་ཕན་དང་བདེ་དང་སྐྱོབ་པ་ལ་སོགས་པ་འཇིག་རྟེན་གྱི་དོན་བསྒྲུབ་པར་མཛད་པ་གང་ཡིན་པ་དེ་ཉིད་ཡིན་ནོ། ། དེ་དག་གིས་ནི་མོག་མོག་པོར་བྱེད་ལ་སོགས་དང་ཞེས་པ་དེ་བཤད་ཟིན་ཏོ། ། ༢༽ཉན་ཐོས་ལམ་གྱི་སྤངས་རྟོགས་ཀྱི་ཡོན་ཏན་བསྟན་པ། ད་ནི་བྱང་ཆུབ་སེམས་དཔའ་ལམ་ཤེས་པ་ཉིད་ཀྱིས་ཉན་ཐོས་ཀྱི་ལམ་གྱི་སྤངས་རྟོགས་ཀྱི་ཡོན་ཏན་བསྡུས་པ་སྟོན་ཏོ། །དེ་ལ་ལམ་ཤེས་ཀྱི་ངང་ཚུལ་ལམ་རང་བཞིན་ལ་གང་གི་སྒོ་ནས་ཉན་ཐོས་ཀྱི་ལམ་བསྡུས་པར་འགྱུར་ན། ལམ་ཤེས་ཉིད་ཀྱི་ཚུལ་ལ་ནི། །འཕགས་པའི་བདེན་པ་བཞི་དག་གི། ། རྣམ་པ་མི་དམིགས་སྒོ་ནས་ནི། །ཉན་ཐོས་ལམ་འདི་ཤེས་པར་བྱའོ། །འདི་ལ་བྱང་ཆུབ་སེམས་དཔའི་ལམ་ཤེས་པ་ཉིད་ཀྱི་ང་ང་ཚུལ་ལམ་བདག་ཉིད་གང་ཡིན་པ་དེ་ལ་ནི་འཕགས་པའི་བདེན་པ་བཞི་པོ་དག་གི་རྣམ་པ་རྣམས་དངོས་པོར་མི་དམིགས་པའི་སྒོ་ནས་ནི་ཉན་ཐོས་ཀྱི་ལམ་འདི་བསྡུས་པར་ཤེས་པར་བྱའོ། །དེ་ལ་འཕགས་པའི་བདེན་པ་བཞི་པོའི་རྣམ་པ་རྣམས་ཇི་ལྟར་ཡིད་ལ་བྱེད་ན། སྡུག་བསྔལ་དང་ཀུན་འབྱུང་གི་བདེན་པའི་ངོ་བོ་ཕུང་ཁམས་སྐྱེ་མཆེད་རྣམས་མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། སྟོང་པ་དང༌། ནད་ལྟ་བུ་དང༌། འབྲས་དང༌། ཟུག་རྔུ་དང༌། སྡིག་པ་དང༌། གཞན་ལ་རགས་ལས་པ་དང༌། འཇིག་པའི་ཆོས་ཅན་དང༌། མི་བརྟན་པ་དང༌། རབ་ཏུ་འཇིག་པའི་ངང་ཚུལ་ཅན་དང༌། འཇིགས་པ་དང༌། འཚེ་བ་དང༌། འགོ་བའི་ནད་ལྟ་བུར་ཡིད་ལ་བྱེད་པ་བཅོ་ལྔ་སྟེ། དེ་ཡང་མི་དམིགས་པའི་ཚུལ་གྱིས་ཡིད་ལ་བྱེད་དོ། ། འགོག་པའི་བདེན་པ་རྣམ་པ་འདི་ལྟར་ཡིད་ལ་བྱེད་དེ། རྒྱུ་ཀུན་འབྱུང་དང་འབྲས་བུ་སྡུག་བསྔལ་གྱི་རང་བཞིན་རྟེན་འབྲེལ་ཡན་ལག་བཅུ་གཉིས་ནི། ཇི་ལྟར་འབྱུང་ཞིང་ཇི་ལྟར་འགག་ན་མ་རིག་པའི་རྐྱེན་གྱིས་འདུ་བྱེད་རྣམས་འབྱུང་ཞེས་པ་ནས་སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་ཡིད་མི་བདེ་བ་དང་འཁྲུག་བ་རྣམས་འབྱུང་ཞེས་པའི་བར་སྡུག་བསྔལ་གྱི་ཕུང་པོ་འབའ་ཞིག་པ་འདི་འབྱུང་བ་དང༌། མ་རིག་པ་འགགས་པས་འདུ་བྱེད་འགགས་ཅེས་པ་ནས་སྐྱེ་བ་འགགས་པས་རྒ་ཤི་ལ་སོགས་པའི་བར་འགག་པ་དེ་ལྟར་སྡུག་བསྔལ་གྱི་ཕུང་པོ་འབའ་ཞིག་པ་འདི་འགག་སྟེ། དེ་ཡང་བདག་མེད་པ་དང༌། ཞི་བ་དང༌། དབེན་པ་དང༌། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་བྱ་བ་མེད་པར་མི་དམིགས་པའི་ཚུལ་གྱིས་ཡིད་ལ་བྱེད་དོ། །ལམ་གྱི་བདེན་པ་འདི་ལྟར་བསྒོམ་སྟེ། དྲན་པ་ཉེར་བཞག་ནས་མ་འདྲེས་བཅོ་བརྒྱད་ཀྱི་བར་མི་དམིགས་པའི་ཚུལ་གྱིས་བསྒོམ་པར་མདོ་ལས་གསུངས་སོ། །དེ་ལྟར་བདེན་པ་བཞིའི་རྣམ་པ་མི་དམིགས་བའི་ཚུལ་གྱིས་ཡིད་ལ་བྱེད་པ་དང་སྒོམ་པའི་སྒོ་ནས་ཉན་ཐོས་ཀྱི་ལམ་བསྡུས་པ་ཡིན་ནོ། །ད་ནི་ཉན་རང་གི་སའི་ཚུལ་གྱིས་སྔར་གྱི་མི་རྟག་པ་ལ་སོགས་པ་རྣམས་ཀྱི་དོན་བཤད་པར་བྱ་སྟེ། མ་བྱུང་བ་ལས་འབྱུང་བ་དང༌། བྱུང་ནས་ཀྱང་མེད་པར་འགྱུར་བའི་ཕྱིར་མི་རྟག་པར་ཡིད་ལ་བྱེད་དོ། ། བདག་ཉིད་སྡུག་བསྔལ་གསུམ་དང་ལྡན་པ་དང༌། གཞན་དག་གི་སྡུག་བསྔལ་གྱི་རྒྱུར་འགྱུར་བའི་ཕྱིར་སྡུག་བསྔལ་བའོ། །དབང་བསྒྱུར་བའི་འདོད་དགུར་བྱེད་པ་མེད་པ་ལ་སོགས་པས་བདག་རང་ལ་བདག་གི་མཚན་ཉིད་དང་མི་ལྡན་པའི་ཕྱིར་བདག་མེད་པའོ། །ཆུ་ཤིང་གི་སྡོང་པོ་ལྟར་ནང་ན་བདག་གི་སྙིང་པོས་སྟོང་པའི་ཕྱིར་སྟོང་པའོ། །རྐྱེན་དུ་མས་གོས་དགོས་པ་དང་ལུས་དང་ཡིད་ཀྱི་སྡུག་བསྔལ་གྱི་རྩ་བ་ཡིན་པས་ནད་དང་འདྲ་བའི་ཕྱིར་ནད་དོ། །ཞེན་པའི་གནོད་པ་ལྡན་པ་དང༌། ཉོན་མོངས་ཀྱི་མི་གཙང་བ་ཟག་པ་དང༌། སྐྱེ་བ་དང༌། རྒ་བ་དང༌། འཇིག་པས་རིམ་པ་ལྟར་སྐྲད་བ་དང༌། སྨིན་པ་དང༌། རྡོལ་བས་འབྲས་དང་འདྲ་བའི་ཕྱིར་འབྲས་སོ། །ཕྱི་ནང་གི་གནོད་པ་ཟུག་པར་བྱེད་ཅིང་བཅོས་དཀའ་བས་ཟུག་རྔུ་དང་འདྲ་བའི་ཕྱིར་ཟུག་རྔུའོ། །སྨད་པར་བྱ་བ་ཡིན་པ་དང༌། གནོད་པར་འགྱུར་བའི་སྡིག་ཏོ་དང་འདྲ་བའི་ཕྱིར་སྡིག་པའོ། །ལས་བདག་གིར་བྱ་བ་ཡིན་པས་དབང་བྱེད་པ་མེད་པའི་ཕྱིར་གཞན་ལ་རགས་ལས་པའོ། །ན་རྒ་འཆི་བས་འཇིགས་པའི་ངོ་བོ་ཡིན་པའི་ཕྱིར་འཇིགས་པའི་ཆོས་ཅན་ནོ། །འདུ་བྱས་གྱི་མཚན་ཉིད་གསུམ་དང་ལྡན་ཞིང་འཇིག་རྟེན་གྱི་ཆོས་མི་བརྟན་པ་བརྒྱད་དང་ལྡན་པའི་ཕྱིར་མི་བརྟན་པའོ། །རང་གི་ངང་དང་གནོད་པའི་ཀྱང་འཇིགས་པའི་ངང་ཚུལ་ཅན་ཡིན་པའི་ཕྱིར་རབ་ཏུ་འཇིགས་པའི་ངང་ཚུལ་ཅན་ནོ། །འཇིགས་པ་ཐམས་ཅད་ཀྱི་རྒྱུ་ཡིན་པའི་ཕྱིར་འཇིགས་པའོ། །མ་ཚོར་བཞིན་དུ་གནོད་པ་སྣ་ཚོགས་ཀྱིས་འཚེ་བའི་ཕྱིར་འཚེ་པའོ། །གནོད་པ་རྣམ་པ་མང་པོ་དང༌། འདྲ་བ་དང༌། འགོ་པའི་ནད་དང་འདྲ་བའི་ཕྱིར་འགོ་པའི་ནད་དུ་ཡིད་ལ་བྱེད་དོ། །འགོག་པའི་རྣམ་པ་བདུན་གྱི་དོན་ཡང༌། བདག་གི་མཚན་ཉིད་དང་བྲལ་བའི་ཕྱིར་བདག་མེད་པའོ། །སྡུག་བསྔལ་ཐམས་ཅད་ཉེ་བར་ཞི་བའི་ཞི་བའོ། །ཉོན་མོངས་པ་དང་མི་ལྡན་པའི་ཕྱིར་དབེན་པའོ། །བདག་དང་བདག་གི་བས་སྟོང་པའི་ཕྱིར་སྟོང་པའོ། །འདུས་བྱས་ཀྱི་མཚན་མ་ཐམས་ཅད་དང་བྲལ་བའི་ཕྱིར་མཚན་མ་མེད་པའོ། །ཁམས་གསུམ་དུ་མི་སྨོན་པའི་ཕྱིར་སྨོན་པ་མེད་པའོ། །ཕྱི་མ་ལས་མངོན་པར་འདུ་བྱ་བ་མེད་པའི་ཕྱིར། མངོན་པར་འདུ་བྱ་བ་མེད་པར་ཡིད་ལ་བྱེད། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ནི་རྒྱུ་དང་འབྲས་བུའི་བདག་ཉིད་ཀྱིས་སྲིད་པའི་འཁོར་ལོ་སྟེ། ཉོན་མོངས་དང་ལས་དང་སྡུག་བསྔལ་གསུམ་དུ་འདུས་སོ། །དེ་ལ་མ་རིག་པ་དང་སྲེད་པ་དང་ལེན་པ་གསུམ་ནི་ཉོན་མོངས་དང་འདུ་བྱེད་དང་སྲིད་པ་གཉིས་ནི་ལས་དང་རྣམ་པར་ཤེས་པ་དང༌། མིང་དང་གཟུགས་དང༌། སྐྱེ་མཆེད་དྲུག་དང༌། རེག་པ་དང༌། ཚོར་བ་དང༌། སྐྱེ་བ་དང༌། རྒ་ཤི་བདུན་ནི་སྡུག་བསྔལ་ལོ། །དང་པོ་གསུམ་ལས་གཉིས་འབྱུང་ཞིང༌། གཉིས་ལས་བདུན་འབྱུང་ལ། བདུན་ལས་ཀྱང་གསུམ་འབྱུང་བའི་ཚུལ་གྱིས་སྲིད་པའི་འཁོར་ལོ་འདི་ཉིད་ཡང་དང་ཡང་དུ་འཁོར་བ་ཡིན་ནོ། །འགྲོ་བ་སེམས་ཅན་ཀུན་ཡན་ལག་བཅུ་གཉིས་པོ་འདི་ལ་བཏགས་པ་ཡིན་གྱི། འདི་ལ་རྫས་སུ་གྲུབ་པའི་སེམས་ཅན་དང༌། གང་ཟག་ལ་སོགས་པ་ནི་ཅི་ཡང་མེད་དོ། །དེས་ན་སེམས་ཅན་གྱི་དངོས་པོ་སྟོང་བ་རྟེན་ཅིང་འབྲེལ་པའི་ཆོས་རྨི་ལམ་ལྟ་བུ་སྔ་མ་རྣམས་ལས། སྟོང་པ་ཉིད་ཁོ་ནའི་ཡན་ལག་ཕྱི་མ་རྣམས་འབྱུང་བར་ཟད་དོ། །ཕུང་པོ་ཉིང་འཚམས་སྦྱོར་བ་ཡང་ཀུན་གཞི་རྣམ་ཤེས་སྔ་མ་འགགས་ཤིང༌། དེ་ལ་བརྟེན་ནས་འགྲོ་བ་གཞན་འབྱུང་བའི་ཕྱིར་སྔ་མ་དེ་ཉིད་འཕོས་པ་ཡང་མ་ཡིན་ལ་སྔ་མ་དེ་མེད་པར་ཡང་ཕྱི་མ་མི་འབྱུང་བས་ཁ་ཐོན་ལ་སོགས་པའི་དཔེས་རྟོགས་པར་བྱའོ། །དེས་རྟེན་ཅིང་འབྲེལ་བར་འབྱུང་བའི་དོན་ནི་ལན་ཅིག་འགགས་པའི་ཕྱི་ནས་དེའི་རིགས་གཏན་མེད་དུ་སོང་བའི་ཚུལ་གྱིས་ཆད་པ་མ་ཡིན་ལ། སྐྱེས་ནས་བདེན་པའི་ངོ་བོ་རྟག་པ་ཡང་མ་ཡིན་ཀྱང༌། སྔ་མ་ལ་བརྟེན་ནས་ཕྱི་མ་རྣམས་རྨི་ལམ་སྒྱུ་མ་བཞིན་དུ་སྣང་ལ་རང་བཞིན་མེད་པའི་ཆོས་རྣམས་སོ་སོར་སྣང་བའོ། །འཕགས་པ་ཀླུ་གྲུབ་ཀྱི་ཞལ་སྔ་ནས། །ཡན་ལག་བྱེ་བྲག་བཅུ་གཉིས་གང༌། །ཐུབ་པས་རྟེན་འབྱུང་གསུངས་དེ་དག །ཉོན་མོངས་པ་དང་སྡུག་བསྔལ་སྟེ། །གསུམ་པོ་དག་ཏུ་ཟད་པར་འདུས། །དང་པོ་བརྒྱད་དང་དགུ་ཉོན་མོངས། །གཉིས་དང་བཅུ་པ་ལས་ཡིན་ཏེ། །ལྷག་མ་བདུན་ཡང་སྡུག་བསྔལ་ཡིན། །བཅུ་གཉིས་ཆོས་ནི་གསུམ་དུ་འདུས། །གསུམ་པོ་དག་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང༌། །གསུམ་འབྱུང་འཁོར་བའི་འཁོར་ལོ་སྟེ། །ཉིད་ནི་ཡང་དང་ཡང་དུ་འཁོར། །འགྲོ་ཀུན་རྒྱུ་དང་འབྲས་བུ་སྟེ། །འདི་ལ་སེམས་ཅན་ཅི་ཡང་མེད། །སྟོང་པ་ཁོ་ནའི་ཆོས་རྣམས་ལས། །སྟོང་བའི་ཆོས་རྣམས་འབྱུང་བར་ཟད། །ཁ་ཐོན་མར་མེ་མེ་ལོང་རྒྱ། །ས་བོན་མེ་ཤེལ་སྐྱུར་དང་སྒྲས། ། ཕུང་པོ་ཉིང་མཚམས་སྦྱོར་བ་ཡང༌། །མི་འཕོ་པར་ཡང་མཁས་རྟོགས་བྱ། །ཤིན་ཏུ་ཕྲ་བའི་དངོས་པོ་ལའང༌། །གང་གིས་ཆད་པར་རྣམ་བཏགས་པ། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང༌། །འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཞེས་གསུངས་སོ། །དེ་རྣམས་ཀྱིས་རབ་འབྱོར་གྱིས་ལྷའི་དབང་པོ་ལ་བྱང་ཆུབ་སེམས་དཔའི་ཤེར་ཕྱིན་གང་ཡིན་པ་དེ་བསྟན་ཏོ། ། དེ་ལྟར་བཤད་པ་རྣམས་ཀྱིས་སློབ་མ་ཉན་ཐོས་ཀྱིས་ལམ་གང་ཡིན་པ་དེ་བཤད་པ་ལས་ད་རུང༌། རབ་འབྱོར་གྱིས་བྱང་ཆུབ་སེམས་དཔའི་ཤེར་ཕྱིན་ལ་ཇི་ལྟར་གནས་པ་བསྟན་པས་ཉན་ཐོས་ཀྱི་སྦྱོར་ལམ་མི་དམིགས་པའི་སྒོ་ནས་བསྡུས་པ་སྟོན་ཏོ། །དེ་ཡང་མདོ་ལས་སྟོན་ཚུལ་ཇི་ལྟ་བུས་དྲོད་སོགས་བསྟན་ན། འཕགས་པ་ཉན་ཐོས་ལམ་ལ་ནི། །གཟུགས་ལ་སོགས་པའི་སྟོང་པའི་ཕྱིར། ། སྟོང་པ་ཉིད་རྣམས་དབྱེར་མེད་པས། །དྲོ་བ་དེ་དག་མི་དམིགས་པས། །རྩེ་མོར་གྱུར་པ་དག་ཏུ་འདོད། །དེ་ལ་རྟག་ལ་སོགས་ཚུལ་གྱིས། །གནས་པ་བཀག་པས་བཟོད་པ་རྣམས། །ས་བཅུ་དག་ལས་བརྩམས་ནས་ནི། །མི་གནས་རྒྱས་པར་བསྟན་པ་ཡིས། །ཆོས་ཀྱི་མཆོག་ཏུ་གྱུར་བཤད་དེ། ། འདིར་འཕགས་པ་ཉན་ཐོས་གྱི་ལམ་བྱང་ཆུབ་སེམས་དཔའི་ལམ་ཤེས་ཀྱིས་བསྡུས་པ་ལ། མདོ་ལས། དྲོད་སོགས་འདི་ལྟར་བསྟན་ཏེ། གཟུགས་ནི་གཟུགས་ཀྱིས་སྟོང་ངོ༌། །ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་དང་བྱང་ཆུབ་སེམས་དཔའ་ནི་བྱང་ཆུབ་སེམས་དཔས་སྟོང་ཞེས་པ་ནི་གཟུགས་ལ་སོགས་པ་སྟོང་པའི་ཕྱིར་རོ། །གཟུགས་ནས་བྱང་ཆུབ་སེམས་དཔའི་བར་གྱི་སྟོང་པ་ཉིད་གང་ཡིན་པ་དེ་ནི་གཉིས་སུ་མེད་ཅིང་གཉིས་སུ་དབྱེར་མེད་དེ་ཞེས་པ་ནི་སྟོང་པ་ཉིད་རྣམས་དབྱེར་མེད་པ་ཡིན་ནོ། །དེ་ལྟར་གསུངས་པ་ངེས་དྲོ་བ་བསྟན་ཏོ། །ཀུན་བཏགས་པའི་གཟུགས་སོགས་ནི་གཟུགས་ལ་སོགས་པའི་ངོ་བོ་ཉིད་དུ་མེད་ཅིང་དེ་དག་གི་སྟོང་ཉིད་གཅིག་པའི་ཆོས་དབྱིངས་ཉིད་དུ་གནས་པའི་ཡེ་ཤེས་ནི་དྲོད་ཡིན་ནོ། །མདོ་ལས། གཟུགས་ལ་དམིགས་པའི་ཚུལ་གྱིས་གནས་པར་མི་བྱའོ། །ཞེས་པ་ལ་སོགས་གཟུགས་སོགས་དེ་དག་མི་དམིགས་པར་བསྟན་པས་རྩེ་མོར་གྱུར་པ་དག་ཏུ་འདོད་དེ་བསྟན་ཏོ། །དེ་ཉིད་ནི་དངོས་པོའི་གཟུགས་སོགས་མི་དམིགས་པའི་ཚུལ་གྱིས་དེ་བཞིན་ཉིད་དུ་གནས་པའི་ཡེ་ཤེས་སོ། །མདོ་ལས། གཟུགས་སོགས་རྟག་མི་རྟག་མི་རྟག་བདེ་སྡུག་བདག་བདག་མེད་ཞི་མ་ཞི་ཞེས་བྱ་བ་ལ་སོགས་པར་དམིགས་པའི་ཚུལ་གྱིས་གནས་པར་མི་བྱའོ། །ཞེས་པས་གཟུགས་སོགས་དེ་ལ་རྟག་ཅེས་བྱ་བ་ལ་སོགས་པའི་ཚུལ་གྱིས་གནས་པ་བཀག་པས་བཟོད་བ་ཆུང་འབྲིང་ཆེན་པོ་རྣམས་བསྟན་ཏོ། །དེ་ཉིད་ནི་རྟག་པ་ལ་སོགས་པའི་དངོས་པོར་མི་གནས་པའི་ཚུལ་གྱིས་ཡོངས་སུ་གྲུབ་པ་ཉིད་དུ་གནས་པའི་ཡེ་ཤེས་སོ། །མདོ་ལས། ས་དང་པོ་ལ་དམིགས་པའི་ཚུལ་གྱིས་གནས་པར་མི་བྱ་བ་ནས། ས་བཅུ་པ་དང་ཕྱིན་དྲུག་དང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་ལ་སོགས་པའི་བྱང་ཆུབ་སེམས་དཔའི་སྤྱོད་པ་རླབས་བོ་ཆེ་རྣམས་ལ་དམིགས་པའི་ཚུལ་གྱིས་གནས་པར་མི་བྱའོ། །ཞེས་པ་ས་བཅུ་དག་ལས་བརྩམས་ནས་ནི་དམིགས་པའི་ཚུལ་གྱིས་མི་གནས་རྒྱས་པར་བསྟན་པ་ཡིས། ཆོས་ཀྱི་མཆོག་ཏུ་གྱུར་པ་གང་ཡིན་པ་དེ་ཉིད་བཤད་དེ། །དེ་ཉིད་ནི་ཅི་ལ་ཡང་དངོས་པོར་མི་རྟོག་པའི་ཚུལ་གྱིས་ཆོས་ཀྱིས་དབྱིངས་ཉིད་དུ་གནས་པའི་ཡེ་ཤེས་སོ། །དམིགས་མེད་སྤྱོད་པ་ལ་སློབ་པའི་བྱང་ཆུབ་སེམས་དཔའི་དམིགས་པའི་ཚུལ་གྱིས་ཅི་ལ་ཡང་གནས་སུ་མི་རུང་བ། ཅིའི་ཕྱིར་ཞེ་ན་སངས་རྒྱས་ཀྱིས། །མཁྱེན་ནས་ཆོས་རྣམས་མ་གཟིགས་ཕྱིར་ཏེ། །རྫོགས་པའི་སངས་རྒྱས་ཀྱིས་བླ་ན་མེད་པའི་བྱང་ཆུབ་མངོན་པར་སངས་རྒྱས་པ་སྟེ་རྫོགས་པར་ཐུགས་སུ་ཆུད་ཅིང་མཁྱེན་ནས་དམིགས་པའི་ཚུལ་གྱིས་གནས་སུ་རུང་པའི་ཆོས་རྣམས་མ་གཟིགས་པ་དེའི་ཕྱིར་རོ། །དེས་ནས་དམིགས་པའི་ཚུལ་གྱིས་ཅི་ལ་ཡང་མི་གནས་ཤིང༌། དམིགས་པའི་ཚུལ་གྱིས་སྟོང་པ་ཉིད་དུ་གནས་པ་དེ་ལྟར་བྱང་ཆུབ་སེམས་དཔའ་ཤེར་ཕྱིན་ལ་གནས་པར་མི་བྱའོ། །དེ་རྣམས་ཀྱིས་སློབ་མའི་ལམ་གང་དང༌། ཞེས་པ་དེ་བཤད་ཟིན་ཏོ། ། ༣༽བསེ་རུ་ལྟ་བུའི་ལམ་གྱི་སྤངས་རྟོགས་བསྟན་པ། ད་ནི་བྱང་ཆུབ་སེམས་དཔའི་ལམ་ཤེས་པ་ཉིད་ཀྱི་ཚུལ་ལ་བསེ་རུ་ལྟ་བུའི་ལམ་ཀྱི་སྤངས་རྟོགས་བསྡུས་པ་སྟོན་ཏོ། །མདོ་ལས་གནོད་སྦྱིན་རྣམས་ཀྱི་སྐད། སྨྲ་བ་དང༌། བརྗོད་པ་དང༌། ཚིག་གང་ཡིན་པ་དེ་ནི་བརྗོད་ན་ཤེས་པར་རུང་གི། རབ་འབྱོར་ཤེར་ཕྱིན་སྟོན་པ་འདི་ནི་ཤེས་པར་མི་རུང་ངོ༌། ཞེས་པ་ལ་སོགས་པས་དང་པོར་སྟོན་པ་པོ་གཞན་ལ་མ་ལྟོས་པར་ཡང་ཇི་ལྟར་ཉན་པར་འདོད་པའི་ཤེར་ཕྱིན་གྱི་ཆོས་རང་ཉིད་ཀྱིས་སྤྲུལ་པ་དང་རྨི་ལམ་དང་བྲག་ཆ་དང༌། སྒྱུ་མ་ལྟ་བུས་རྟོགས་པའི་རྒྱུས། བསེ་རུ་ལྟ་བུའི་ཡེ་ཤེས་ནི་ཉན་ཐོས་ཀྱི་ཡེ་ཤེས་ལས་ཟབ་པ་ཉིད་དུ་བསྟན་པ་ཏེ། བསྟན་བཅོས་སུ་འདི་ལྟ་སྟེ། རང་བྱུང་བདག་ཉིད་རྟོགས་པའི་ཕྱིར། །གཞན་གྱིས་བསྟན་ཡང་མི་དགོས་ལ།། བསེ་རུ་ལྟ་བུའི་ཡེ་ཤེས་ནི། །ཟབ་པ་ཉིད་དུ་མངོན་པར་བརྗོད། །འདི་ལ་དེ་བཞིན་གཤེགས་པའི་སྤྲུལ་པས་སྤྲུལ་པའི་འཁོར་བཞི་ལ་ཆོས་བསྟན་པའི་དཔེ་དང༌། མི་གཅིག་གི་རྨི་ལམ་དེ་བཞིན་གཤེགས་པ་ཆོས་སྟོན་པའི་དཔེ་དང༌། མི་གཉིས་ཀྱི་རི་ཁྲོད་དུ་དཀོན་མཆོག་གསུམ་གྱི་སྔགས་པ་བརྗོད་ན་གཅིག་གི་བྲག་ཆས་གཅིག་ཤོས་ཀྱི་བྲག་ཆ་སྒྲ་མི་ཤེས་པའི་དཔེ་དང༌། སྒྱུ་མ་མཁན་གྱིས་སྤྲུལ་པའི་སངས་རྒྱས་ཀྱི་སྤྲུལ་པའི་འཁོར་བཞི་ལ་ཆོས་བསྟན་པའི་དཔེ་སྟེ། དཔེ་བཞིའི་སྒོ་ནས་ཆོས་སྟོན་པ་པོ་དང་ཉན་པ་ལ་སོགས་པར་ཡེ་ཤེས་ལ་སྣང་ཡང་དེ་དང་དེའི་དངོས་པོ་མེད་པས་སུས་ཀྱང་བཤད་པ་དང་ཉན་པ་དང་ཐོས་པ་དང་ཤེས་པ་མེད་པའི་ཕྱིར་རང་བྱུང་བདག་ཉིད་ཀྱིས་སྲིད་པ་ཐ་མ་ལ་སློབ་དཔོན་མེད་པར་སྔོན་གོམས་པའི་དབང་གིས་སྤྲུལ་པ་དང་རྨི་ལམ་ལ་སོགས་པའི་སྣང་བ་ལྟར་སྟོན་པ་པོ་ལ་སོགས་པར་ཡེ་ཤེས་ལ་ཤར་བའི་ཚུལ་གྱིས་སེམས་རྟོགས་པའི་ཕྱིར། སྲིད་པ་ཐ་མའི་ལུས་ཐོབ་ཅིང༌། དགྲ་བཅོམ་པ་མངོན་དུ་བྱེད་ན། སློབ་དཔོན་གཞན་གྱིས་སྒྲ་དང་བཅས་པའི་ཆོས་བསྟན་ཡང་མི་དགོས་པར་རྟོགས་པ་ཡིན་ལ་ཇི་ལྟར་རྟོགས་པའི་ཚུལ་ནི་འོག་ནས་ཀྱང་རྒྱས་པར་འཆད་དོ། །བྱང་ཆུབ་སེམས་དཔའི་ས་ལས་ཀྱང༌། །ཉན་ཐོས་རྣམས་དང་རང་སངས་རྒྱས་ཀྱི་བྱེ་བྲག་ནི་འདི་ཡིན་ཏེ། སྲིད་པ་ཐ་མ་ལ་ལུས་ཐ་མ་ཐོབ་པར་གྱུར་པ་ན། སློབ་དཔོན་མེད་པར་སྔོན་གོམས་པའི་དབང་གིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་རྣམས་བསྒོམས་པས་ཉོན་མོངས་པ་ཐམས་ཅད་སྤངས་པའི་དགྲ་བཅོམ་པ་ཉིད་མངོན་གསུམ་དུ་བྱ་སྟེ། དེ་ལྟ་བས་ན་རང་སངས་རྒྱས་ཞེས་བྱའོ། །ཞེས་གསུངས་སོ། །གལ་ཏེ་གཞན་གྱིས་མ་བསྟན་ཀྱང༌། སྟོན་པ་པོ་ལ་སོགས་པའི་སྣང་བ་ཡེ་ཤེས་ལ་འཆར་བ་ཅི་ཞེ་ན། དེ་ཉིད་ཀྱི་ཕྱིར་བསེ་རུ་ལྟ་བུའི་ཡེ་ཤེས་གང་ཡིན་པ་དེ་ནི་ཉན་ཐོས་ཀྱི་སྒྲའི་རྐྱེན་ལས་ལྟོས་པའི་ཡེ་ཤེས་ལས་ཟབ་པ་ཉིད་བསྟན་ཏོ། །མདོ་ལས། ཀྱེ་མ་འཕགས་པ་རབ་འབྱོར་འདི་ནི་ཟབ་པ་བས་ཀྱང་ཆེས་ཟབ་པ་སྟོན། ཕྲ་བ་བས་ཀྱང་ཆེས་ཕྲ་པ་ལ་འཇུག་པས་ཤེས་རབ་ཀྱི་ཕ་རོལ་ཏུ་ཕྱིན་པ་གསལ་བར་བྱེད་པའོ། །ཞེས་དང༌། ལྷའི་བུ་དག་གཟུགས་སོགས་དང་གཟུགས་སོགས་ཀྱི་རང་བཞིན་ནི་ཟབ་པ་མ་ཡིན། ཕྲ་བ་མ་ཡིན་ཞེས་སོ། །འདི་རབ་འབྱོར་གྱིས་གསལ་བར་བྱས་པའི་ཟབ་པ་དང་ཕྲ་བའི་ཤེར་ཕྱིན་འདི་ནི་བསེ་རུ་ལྟ་བུའི་ཡེ་ཤེས་ཉིད་དོ། །གཟུགས་སོགས་ཟབ་པ་དང༌། ཕྲ་བ་བཀག་པ་ནི། ཀུན་རྫོབ་ཀྱི་གཟུགས་སོགས་གཤིས་ལ་མེད་པའི་ཕྱིར། ཆོས་ཉིད་ཀྱི་གཟུགས་སོགས་ནི་ངོ་བོ་ཉིད་ཀྱིས་མི་གཡོ་བའི་ཕྱིར་དེ་དག་ཟབ་པ་དང་ཕྲ་བའི་དངོས་པོ་མ་ཡིན་ཞེས་པའི་དོན་ཏོ། །དེས་ན་ཉན་རང་དང་སངས་རྒྱས་ཀྱི་འབྲས་བུ་འཐོབ་པར་འདོད་པའི་གཟུགས་སོགས་བཏགས་པའི་དངོས་པོ་ཡང་མེད་ཅིང༌། ཆོས་ཉིད་ཀྱི་གཟུགས་སོགས་ཀྱི་ངོ་བོ་བརྗོད་དུ་མེད་པའི་བཟོད་པ་འདི་ལ་མི་རྟེན་དུ་མི་རུང་ངོ༌། ། ད་ནི་སྟོན་པ་པོའི་སྒྲ་མེད་པར་བསེ་རུ་ལྟ་བུའི་ཡེ་ཤེས་ལ་ཇི་ལྟར་སྣང་བའི་ཚུལ་གྱིས་བདག་ཉིད་ཀྱིས་རྟོགས་པ་རྒྱས་པར་སྟོན་ཏོ། །མདོ་ལས། དེ་ནས་ལྷའི་བུ་དག་འདི་སྙམ་དུ་གནས་བརྟན་རབ་འབྱོར་ལ་ཆོས་ཉན་པ་ཇི་ལྟ་བུ་དག་ཏུ་འདོད་པར་བྱའོ་སྙམ་མོ། །དེ་ནས་རབ་འབྱོར་གྱིས་སྨྲས་པ། ལྷའི་བུ་དག་བདག་ལ་ཆོས་ཉན་པ་ནི་སྒྱུ་མའི་སྐྱེས་བུ་འདོད་པར་བྱའོ། །སྤྲུལ་པ་ལྟ་བུར་འདོད་པར་བྱ་སྟེ། དེ་དག་ནི་སུས་ཀྱང་ཉན་པ་དང༌། ཀུན་ཆུབ་པར་བྱེད་བ་དང༌། མངོན་གསུམ་དུ་བྱེད་པ་མེད་དོ། །ཞེས་པ་ལ་སོགས་པ་ནི་བསྟན་བཅོས་ལས། གང་གང་དེ་ནི་གང་གང་ལ། །ཇི་ལྟ་ཇི་ལྟར་ཉན་འདོད་པ། ། དེ་དེ་ལ་དོན་དེ་དང་དེ། །སྒྲ་མེད་ཀྱང་དེ་དེ་ལྟར་སྣང༌། །དེ་ལ་དྲན་པ་ཉེར་བཞག་ལ་སོགས་བ་གང་དང་གང་ཡིན་པའི་ཆོས་ཀྱི་དོན་ནི། རྨི་ལམ་བཞིན་དུ་སྟོན་པ་པོ་སྣང་བའི་གང་ཟག གང་དང་གང་ལ། དཔེ་ཇི་ལྟ་ཇི་ལྟ་བུར་ཉན་པ་པོའི་གང་ཟག་ཏུ་འདོད་པར་བྱ་བ་ནི། སྟོན་པ་པོར་སྣང་བའི་གང་ཟག་དེ་དང་དེ་ལ་ཆོས་ཀྱི་དོན་དེ་དང༌། དེ་སྟོན་པའི་སྒྲའི་དངོས་པོ་མེད་ཀྱང་སྟོན་པ་དང་ཉན་པར་སྣང་པ་དེ་སྒྱུ་མའི་སྐྱེས་བུ་དང་སྤྲུལ་པ་དེ་ལྟ་བུར་བསེ་རུ་ལྟ་བུའི་ཡེ་ཤེས་ལ་སྣང་བའི་ཚུལ་གྱིས་རྟོགས་སོ། །དོན་ནི་དོན་དམ་པར་སྟོན་པ་པོ་དང༌། ཉན་པ་པོ་དང༌། ཐོས་པ་ལ་སོགས་པའི་དངོས་པོ་ཐ་དད་པ་མེད་ཀྱང་སྒྱུ་མ་བཞིན། སྟོན་པ་པོ་ལ་སོགས་པ་ཡེ་ཤེས་ཀྱི་རང་སྣང་འབྱུང་བས་དགྲ་བཅོམ་པའི་འབྲས་བུ་མངོན་གསུམ་དུ་རྟོགས་ཤིང་ཁོང་དུ་ཆུད་ཅེས་པའི་དོན་ཏོ། །མདོ་ལས། སུས་ཀྱང་ཉན་པ་དང༌། རྟོགས་པ་ལ་སོགས་པ་མེད་ཅེས་པ་ནི་སྟོན་པ་པོ་ལ་སོགས་པ་ཀུན་རྫོབ་ཀྱི་དངོས་པོ་ཐ་དད་པ་མེད་པ་ཡིན་གྱི་དོན་དམ་པར་སྒྱུ་མ་བཞིན་དུ་སྟོན་པ་པོ་ལ་སོགས་པ་ཡེ་ཤེས་ཀྱི་རང་སྣང་འབྱུང་བའི་ཕྱིར་དོན་དམ་པའི་ཚུལ་གྱིས་མི་རྟོག་པ་ནི་མ་ཡིན་ཏེ། སྒྲ་མེད་ཀྱང་དེ་དེ་ལྟར་སྣང་ཞེས་གསུངས་པའི་ཕྱིར་རོ། །སྐབས་འདིར་རབ་འབྱོར་གྱིས་སེམས་ཅན་དང་ཆོས་ཉན་པ་སྒྱུ་མ་ལྟ་བུ་ལ་སོགས་པ་ནས་མྱང་འདས་དང་མྱང་འདས་ལས་ཆེས་ལྷག་པའི་ཆོས་ཞིག་ཡོད་ན་དེ་ཡང་རྨི་ལམ་ལྟ་བུ་དང་སྒྱུ་མ་ལྟ་བུའོ། །ཞེས་པ་སྟོན་པ་ནི་དབུ་མ་པ་ཆེན་པོ་དབྱིག་གཉེན་དང༌། ནཱ་རོ་པཎ་ཆེན་དང༌། འབུམ་ཊིཀ་མཁན་པོ་རྣམས་ཀྱིས་དགངོས་པ་མཐུན་པར་རྨི་ལམ་དང་སྒྱུ་མ་ནི་མྱ་ངན་ལས་འདས་པ་དངོས་པོ་མེད་པའི་དཔེ་བསྟན་གྱི། མྱ་ངན་ལས་འདས་པ་མི་བདེན་པ་དང༌། འཁྲུལ་པ་དང་གཤིས་ལ་མེད་པར་སྟོན་པའི་དཔེར་ནི་མ་བཤད་དོ། །དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། ཆོས་ཉན་པ་ནི་སྒྱུ་མ་ལྟ་བུར་འདོད་པར་བྱའོ། །ཞེས་བྱ་བ་ལ་སོགས་པས་དོན་དམ་པར་འཆད་པ་པོ་དང་ཉན་པ་པོ་མེད་པ་ཉིད་དུ་སྟོན་ཏོ། །ཞེས་གསུངས་སོ། །ནཱ་རོ་པཎ་ཆེན་གྱིས་ཀྱང༌། རྣམ་དག་རྣམ་པའི་སེམས་ཀྱིས་ནི། །རང་བཞིན་མྱ་ངན་འདས་པ་ཉིད་ཅེས་པའི་སྐབས་སུ་མདོ་ཉིད་དྲངས༌། འབུམ་ཊིཀ་མཁན་པོས་ཀྱང་ཤིན་ཏུ་རྒྱས་པར་གསུངས་སོ། །དེ་ལྟ་མ་ཡིན་མདོ་ནང་འགལ་བ་དང༌། རྒྱལ་བ་སྲས་བཅས་དགོངས་པ་མི་མཐུན་པའི་སྐྱོན་དུ་ཡང་འགྱུར་རོ། ། མདོ་གཞན་ལས་ཀྱང༌། མི་བསླུ་བའི་ཆོས་མྱ་ངན་ལས་འདས་པ་ནི་་བདེན་པའི་མཆོག་གོ །ཞེས་སོ། ། མདོ་འདི་ཉིད་ཀྱི་འཕྲིན་ལས་ཀྱི་སྐབས་སུ་ཡང༌། འདུས་བྱས་ཀྱི་ཆོས་རྣམས་ནི། ལ་ལ་ཉན་རང་དང་ལ་ལ་བྱང་ཆུབ་སེམས་དཔའི་དང༌། ལ་ལ་དེ་བཞིན་གཤེགས་པའི་དང༌། ལ་ལ་ལས་དང་ཉོན་མོངས་པའི་སྤྲུལ་པ་ཡིན་པའི་ཕྱིར་ཐམས་ཅད་སྤྲུལ་པའོ། །ཆོས་གང་ལ་སྐྱེ་འགག་མེད་པ་མི་མཉམ་པའི་མྱ་ངན་ལས་འདས་པ་ནི་མ་སྤྲུལ་པའོ། །ཞེས་སོགས་ཀྱིས་འདུས་མ་བྱས་ཀྱི་ངོ་བོ་བདེན་པའི་ཆོས་སུ་གསུངས་སོ། །འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། མྱ་ངན་འདས་པ་བདེན་གཅིག་པུར། །རྒྱལ་བ་རྣམས་ཀྱིས་གང་གསུངས་པ༌། །དེ་ཚེ་ལྷག་མ་ལོག་མིན་ཞེས། །མཁས་པ་སུ་ཞིག་རྟོགས་པར་བྱེད། །ཅེས་མྱ་ངན་ལས་འདས་པ་ནི་བདེན་པ་གཅིག་བུ་དང༌། ལྷག་མ་འདུས་བྱས་ཀྱི་ཆོས་རྣམས་ནི་བསྟན་བརྫུན་པ་བསླུ་བའི་ཆོས་ཅན་ལོག་པ་ཉིད་དུ་གསུངས་སོ། །དེས་ན་རྨི་ལམ་དང་སྒྱུ་མ་ནི་སྣ་ཚོགས་སུ་སྣང་ཡང་དེ་དང་དེའི་ངོ་བོར་མ་གྲུབ་པ་དེ་བཞིན་དུ་མྱ་ངན་ལས་འདས་པ་གཉིས་མེད་ཡེ་ཤེས་ཀྱི་རང་སྣང་ཡང་དེ་ལྟར་སྣང་ངོ་ཞེས་པའི་དོན་ཏོ། །དེ་ལྟ་བས་ན་དཔེ་དོན་གྱི་ཆ་ཤས་གང་དང་གང་མཚོན་པ་ཡང་སྐབས་དང་བསྡུན་ནས་གསུངས་རབ་ནང་འགལ་དུ་མི་འགྱུར་བར་དཔེ་དོན་སྦྱར་དགོས་སོ། །དེས་ན་ཆོས་འཆད་པ་དང༌། ཉན་པ་ལ་སོགས་པ་ནས་མྱ་ངན་ལས་འདས་པའི་བར་སྒྱུ་མ་ལྟ་བུར་ཤར་བའི་ཤེར་ཕྱིན་ཟབ་མོ་འདི་བསྟན་པ་ལ་མི་སྐྲག་ཅིང་ལེན་པར་བྱེད་པའི་གང་ཟག་ནི་བཞི་སྟེ། ཡོན་ཏན་རིན་ཆེན་སྡུད་པ་ལས་ཆོས་འཆད་པ་དང་ཉན་པ་དང་བཤད་བྱ་གང་ཡིན་དང༌། །འབྲས་བུ་ཐོབ་དང་རྐྱེན་རྒྱལ་དེ་བཞིན་འཇིག་རྟེན་མགོན། །མཁས་པ་གསལ་བ་ཐོབ་པ་མྱ་ངན་འདས་གང་ཡིན། །དེ་ཀུན་སྒྱུ་མ་ལྟ་བུར་དེ་བཞིན་གཤེགས་པས་བསྟན། གང་ཟག་བཞི་པོ་འདི་དག་དེ་ལ་མི་སྐྲག་ཏེ། །རྒྱལ་སྲས་བདེན་ལ་མཁས་དང་ཕྱིར་མི་ལྡོག་པ་དང༌། ། དགྲ་བཅོམ་དྲི་མ་བསལ་ཅིང་སོམ་ཉི་སྤངས་པ་དང༌། །བཞི་པ་དགེ་བའི་བཤེས་ཀྱིས་ཡོངས་སུ་ཟིན་པའོ། །ཞེས་སོ། །དེ་ལྟ་བས་ན། བྱང་ཆུབ་སེམས་དཔའི་ལམ་ཤེས་པ་ཉིད་ཀྱི་ཤེར་ཕྱིན་ནི་དོན་དམ་པ་དང༌། གཟུགས་སོགས་སྟོང་ཞེས་བྱ་བར་གཟུང་བར་མི་རྟོགས་པས་གཟུང་དོན་རྟོག་པ་སྤོང་ཕྱིར་དང༌། ཀུན་རྫོབ་ཏུ་ཐེག་པ་གསུམ་ལ་སོགས་པ་བསྟན་ཅིང་ཐོབ་པའི་སྒོ་ནས་བྱེད་པ་པོའི་ཆོས་སུ་འཛིན་པ་ཡོད་པས་འཛིན་པ་མི་སྤོང་ཕྱིར་དང་ནི། རྟེན་བྱང་ཆུབ་སེམས་དཔའི་ལམ་གྱིས་བསེ་རུུ་ལྟ་བུའི་ལམ་མི་དམིགས་པའི་ཚུལ་གྱིས་ཡང་དག་པར་བསྡུས་པར་ཤེས་པར་བྱའོ། །མི་དམིགས་པ་ནི་ཐེག་པ་གསུམ་ལ་སོགས་པ་བསྟན་པ་དེ་ཡང་མི་དམིགས་པའི་ཚུལ་གྱིས་བསྟན་ཅིང་རྟོག་པའི་སྒོ་ནས་བསྡུས་པའོ། །དེ་རྣམས་ཀྱིས་ནི་བསེ་རུའི་ལམ་གང་དང་ཞེས་པ་དེ་བཤད་ཟིན་ཏོ། ། ད་ནི་མཐོང་བའི་ལམ་གྱི་རྒྱུར་གྱུར་པ་བྱང་ཆུབ་སེམས་དཔའི་སྦྱོར་ལམ་སྟོན་ཏེ། སེང་བཟང་སོགས་རང་སངས་རྒྱས་ཀྱི་སྦྱོར་ལམ་ཡིན་པར་འདོད། དེ་ཡང་མདོ་ལས་རྣམ་པ་ཇི་ལྟ་བུས་བསྟན་ན་བཏགས་པ་ཀུན་རྫོབ་དང༌། ཆོས་ཉིད་དོན་དམ་གཉིས་ལ་སྒྲོ་སྐུར་དང་བྲལ་བས་དེ་དག་མི་འགལ་བར་སྟོན་པའི་རྣམ་པ་ནི་དྲོ་བར་གྱུར་པའོ། །རྩེ་མོར་གྱུར་པ་ནི། གཟུགས་ལ་སོགས་པ་འགྲིབ་པ་མེད་པ་དང་ལ་སོགས་པའི་སྒྲས་འཕེལ་བ་མེད་པས་ཕྱེ་བ་སྟེ། རྣམ་པ་དེ་ལྟ་བུས་བསྟན་ཏོ།། ནང་སྟོང་པ་ཉིད་ལ་སོགས་པ་ཡིས། གཟུགས་སོགས་མི་འཛིན་པའི་གཏན་ཚིག་ནི་ནང་སྟོང་པ་ཉིད་དང་ལ་སོགས་པའི་སྒྲས་ཕྱི་སྟོང་པ་ཉིད་ཀྱིས་ཕྱིར་ཞེས་སྟོན་པའི་གཟུགས་སོགས་མི་འཛིན་པའི་ཕྱིར་རོ། །ཞེས་པས་བཟོད་པ་བསྟན་ཏོ། །གཟུགས་སོགས་ཀྱི་ངོ་བོ་ཉིད་མེད་པའི་ཕྱིར། གཟུགས་སོགས་སྐྱེ་བ་དང་སོགས་པའི་སྒྲས་འགག་པ་དང༌། བླང་དོར་དང་ཉོན་མོངས་རྣམ་བྱང་དང་འཕེལ་འགྲིབ་མེད་པའི་རྣམ་པ་ཅན་གྱི་ཡེ་ཤེས་སུ་བསྟན་པ་ནི་ཆོས་ཀྱི་མཆོག་གོ །དྲོད་སོགས་བཞི་པོ་དེ་དག་གི་དོན་དུ་ཡང་བདེན་གཉིས་ལ་སྒྲོ་སྐུར་མེད་པའི་ཡེ་ཤེས་དང༌། གཟུགས་སོགས་འཕེལ་འགྲིབ་མེད་པའི་ཡེ་ཤེས་དང༌། གཟུགས་སོགས་གཟུང་འཛིན་མེད་པའི་ཡེ་ཤེས་དང༌། གཟུགས་སོགས་སྐྱེ་འགག་སོགས་མེད་པའི་རྣམ་པ་ཅན་གྱི་ཡེ་ཤེས་སོ། །ཞེས་པའི་དོན་ཏོ། ། ༤༽འབྲས་བུ་མཐོང་བའི་ལམ། དེ་དག་གི་འབྲས་བུ་མཐོང་བའི་ལམ་ནི། བདེན་དང་བདེན་ལ་བཟོད་པ་དང༌། །ཤེས་པའི་སྐད་ཅིག་རྣམ་བཞི་ཡིས། །ལམ་ཤེས་ཉིད་ལ་མཐོང་བའི་ལམ། །ཕན་ཡོན་བཅས་པ་འདི་བཤད་དོ།། ཞེས་པ་ལ་སྡུག་བསྔལ་དང་ཀུན་འབྱུང་གི་བདེན་པ་དང༌། འགོག་པ་དང་ལམ་གྱི་བདེན་པ་ལ་ཆོས་ཤེས་པའི་བཟོད་པ་དང༌། ཆོས་ཤེས་པ་རྗེས་སུ་ཤེས་པའི་བཟོད་པ་དང༌། རྗེས་སུུ་ཤེས་པའི་སྐད་ཅིག་རྣམ་པ་བཞི་བཞི་བསྟན་པ་ཡིས་ལམ་ཤེས་པ་ཉིད་ཀྱི་བདག་ཉིད་ལ་མཐོང་བའི་ལམ་མཐོང་ལམ་ཤེས་ཉིད་ལ་སྐད་ཅིག་མ་བཅུ་དྲུག་ཕན་ཡོན་དང་བཅས་པ་འདི་མདོ་ལས་བཤད་དོ། །ལམ་ཤེས་པའི་བདག་ཉིད་ཀྱི་སྐད་ཅིག་མ་རྣམས་གང་ཞེ་ན། དེ་བཞིན་ཉིད་དང་སངས་རྒྱས་དག །ཕན་ཚུན་རྟེན་པ་རྟེན་མེད་ཕྱིར། །རྣམ་གྲངས་ཁས་མི་ལེན་པ་དང༌། །ཆེན་པོ་ཚད་ནི་མེད་བཅས་དང༌། ། དཔག་མེད་པ་དང་མཐའ་མེད་དང༌། །དེར་གནས་གཟུགས་ལ་སོགས་པ་ལ། །སངས་རྒྱས་ཉིད་དུ་ངེས་འཛིན་དང༌། །བླང་མེད་དོར་བ་མེད་སོགས་དང༌། །བྱམས་ལ་སོགས་དང་སྟོང་ཉིད་དང༌། ། སངས་རྒྱས་ཉིད་ནི་འཐོབ་པ་དང༌། །རྣམ་པར་བྱང་ཀུན་ཡོངས་སྡུད་དང༌། །ཉམ་ང་བ་དང་ནད་ཀུན་སེལ། །མྱ་ངན་འདས་འཛིན་ཞི་ཉིད་དང༌། །སངས་རྒྱས་རྣམས་ཀྱིས་བསྲུང་ལ་སོགས། །སྲོག་མི་གཅོད་པ་ལ་སོགས་པ། །རྣམ་པ་ཀུན་མཁྱེན་ཚུལ་ལ་ནི། །བདག་ཉིད་གནས་ཏེ་སེམས་ཅན་དག ། འཁོར་དང་སྦྱིན་པ་ལ་སོགས་པ། །རྫོགས་པའི་བྱང་ཆུབ་ཏུ་བསྔོ་བ། །ལམ་ཤེས་ཉིད་ཀྱི་སྐད་ཅིག་མ། །ཞེས་པ་འདི་ལ་སྡུག་བསྔལ་ལ་ཆོས་ཤེས་པའི་བཟོད་པ་ནི་དེ་བཞིན་ཉིད་དང་སངས་རྒྱས་དག་ཕན་ཚུན་གཅིག་ལ་གཅིག་དམིགས་སུ་མེད་པ་ལ་རྟེན་པ་དང༌། རྟེན་གྱི་དངོས་པོ་མེད་པའི་ཕྱིར་ངོ་བོ་ཐ་དད་པའི་རྣམ་གྲངས་ཁས་མི་ལེན་པའི་ཡེ་ཤེས་དང༌། སྡུག་བསྔལ་ལ་ཆོས་ཤེས་པ་ནི་ཡུལ་ཆོས་ཉིད་ཀྱི་གཟུགས་སོགས་ཆེ་བའི་ཕྱིར་ཡུལ་ཅན་སྡུག་བསྔལ་ལ་ཆོས་ཤེས་པ་ནི་ཆེ་བ་དང༌། ཡུལ་ཆོས་ཉིད་གཟུགས་སོགས་ཚད་མེད་པའི་ཕྱིར་ཡུལ་ཅན་སྡུག་བསྔལ་ལ་རྗེས་སུ་ཤེས་པའི་བཟོད་པ་ཚད་མེད་པ་དང༌། ཡུལ་ཆོས་ཉིད་ཀྱི་གཟུགས་སོགས་དཔག་ཏུ་མེད་པའི་ཕྱིར་ཡུལ་ཅན་སྡུག་བསྔལ་ལ་རྗེས་སུ་ཤེས་པ་ནི་དཔག་པ་མེད་པ་སྟེ། དེ་ལྟར་སྡུག་བསྔལ་གྱི་བདེན་པའི་སྐད་ཅིག་མ་བཞིའོ། །དཔག་ཏུ་མེད་པའི་འགྲེས་ནི་ཁྲི་བརྒྱད་སྟོང་པ་ན་ཡོད་ཅིང་དབུ་མ་པ་ཆེན་པོ་དབྱིག་གཉེན་ཀྱིས་ཀྱང་བཀྲལ་ལོ། །ཀུན་འབྱུང་གི་བདེན་པའི་སྐད་ཅིག་མ་ནི་ཡུལ་ཆོས་ཉིད་ཀྱི་གཟུགས་སོགས་མཐའ་དང་དབུས་མེད་པའི་ཕྱིར་ཡུལ་ཅན་ཀུན་འབྱུང་ལ་ཆོས་ཤེས་པའི་བཟོད་པ་མཐའ་མེད་པ་དང༌། ཀུན་འབྱུང་ལ་ཆོས་ཤེས་པ་ནི་ཆོས་སྐུའི་བདག་ཉིད་ཀྱི་སྦྱིན་སོགས་ནས་རྣམ་མཁྱེན་གྱི་ངོ་བོར་གྱུར་པའི་ཤེར་ཕྱིན་དེར་གནས་ཤིང་སློབ་པའི་བྱང་ཆུབ་སེམས་དཔའི་གཟུགས་ལ་སོགས་པ་ཕུང་པོ་ལ་སངས་རྒྱས་ཉིད་དུ་ངེས་པར་འཛིན་སྐབས་ཀྱི་ཡེ་ཤེས་ཏེ། དབུ་མ་པ་ཆེན་པོ་དབྱིག་གཉེན་གྱི་ཞལ་སྔ་ནས། ཆོས་ཀྱི་སྐུའི་དེ་བཞིན་གཤེགས་པ་ནི་སངས་རྒྱས་ཀྱི་ཆོས་ཀྱི་ངོ་བོ་ཉིད་དོ། ། དེ་ལ་སློབ་པའི་བྱང་ཆུབ་སེམས་དཔའ་རྣམས་ཀྱང་དོན་དམ་པར་སངས་རྒྱས་ཀྱི་ཆོས་ཀྱི་ངོ་བོ་ཉིད་ཡིན་པས་དེའི་ཕྱིར་བྱང་ཆུབ་སེམས་དཔའ་དང་དེ་བཞིན་གཤེགས་པ་ལ་བྱེ་བྲག་མེད་པས་དེ་བཞིན་མེད་པས་དེ་བཞིན་གཤེགས་པ་ཉིད་དོ་ཞེས་བརྗོད་པར་བྱའོ། །དེའི་ཕྱིར་བྱང་ཆུབ་སེམས་དཔའ་དང་དེ་བཞིན་གཤེགས་པ་ལ་བྱེ་བྲག་མེད་པས་དེ་བཞིན་གཤེགས་པ་ཉིད་དོ་ཞེས་བརྗོད་པར་བྱའོ། ། ཞེས་བྱ་བའི་ཐ་ཚིག་གོ །ཞེས་གསུངས་སོ། །ཀུན་འབྱུང་ལ་རྗེས་སུ་ཤེས་པའི་བཟོད་པ་ནི་བཟང་པ་དང་ངན་པའི་དངོས་པོ་མེད་པས་གཟུགས་སོགས་བླང་བ་མེད་པ་དང༌། དོར་བ་མེད་པ་དང་ལ་སོགས་པའི་སྒྲས་གཟུགས་སོགས་མི་འཛིན་མི་འདོར་བའི་ཚུལ་གྱིས་རྣམ་མཁྱེན་ཉིད་ཡོངས་སུ་འཛིན་པའི་ཡེ་ཤེས་དང། ཀུན་འབྱུང་ལ་རྗེས་སུ་ཤེས་པ་ནི་སེམས་ཅན་ཐམས་ཅད་ལ་བྱམས་སོགས་ཚད་མེད་པ་བཞི་མི་དམིགས་པའི་ཚུལ་གྱིས་བསྒོམ་པས་མི་དང་མི་མ་ཡིན་པས་གླགས་མི་རྙེད་པའི་ཡེ་ཤེས་སྟེ། དེ་ལྟར་ཀུན་འབྱུང་གི་བདེན་པའི་སྐད་ཅིག་མ་བཞིའོ། །འགོག་པ་ལ་ཆོས་ཤེས་པའི་བཟོད་པ་ནིམི་དམིགས་པའི་ཚུལ་གྱིས་སྟོང་ཉིད་ཐམས་ཅད་བསྒོམས་པའི་གང་དུ་འདུག་ཀྱང་བག་ཚ་བ་འམ་འཇིག་པ་གང་ཡང་མེད་པའི་ཡེ་ཤེས་དང༌། འགོག་པ་ལ་ཆོས་ཤེས་པ་ནི་ཚེ་འདིའི་ཡོན་ཏན་གྱི་ཕན་ཡོན་སེམས་ཅན་སྨིན་པ་དང༌། སངས་རྒྱས་ཀྱི་ཞིང་དག་པར་བྱེད་པ་ལ་སོགས་པ་དང་བདུད་རིས་རྣམས་ཀྱི་བསམ་ངན་ཞི་བ་དང་ཚེ་ཕྱི་མ་ལ་ཡང་སངས་རྒྱས་ཉིད་ནི་འཐོབ་པར་བྱེད་པའི་ཡེ་ཤེས་དང༌། འགོག་པ་ལ་རྗེས་སུ་ཤེས་པའི་བཟོད་པ་ནི་སྦྱིན་སོགས་སངས་རྒྱས་ཀྱི་ཆོས་ཐམས་ཅད་ཡོངས་སུ་འཛིན་པས་རྣམ་པར་བྱང་བའི་ཆོས་ཀུན་ཡོངས་སུ་བསྡུས་པའི་ཡེ་ཤེས་དང༌། འགོག་པ་ལ་རྗེས་སུ་ཤེས་པ་ནི་མུ་སྟེགས་ཅན་ལ་སོགས་པས་བྱས་པའི་ཉམ་ང་བའི་གནོད་པ་ཀུན་དང་དུག་གི་ནད་ལ་སོགས་པ་ནད་ཀུན་སེལ་བའི་ཡེ་ཤེས་དེ་དེ་ལྟར་འགོག་པའི་བདེན་པའི་སྐད་ཅིག་མ་བཞིའོ། །ལམ་ལ་ཆོས་ཤེས་པའི་བཟོད་པ་ནི་གཟུགས་སོགས་ནས་རྣམ་མཁྱེན་གྱི་བར་དངོས་པོར་འཛིན་པ་དང་མྱ་ངན་ལས་འདས་པའི་དངོས་པོར་འཛིན་པ་ཞི་བར་བྱེད་པའི་ཡེ་ཤེས་གང་ཡིན་པ་ཉིད་དང༌། ལམ་ལ་ཆོས་ཤེས་པ་ནི་ཕྱོགས་བཅུའི་སངས་རྒྱས་རྣམས་ཀྱིས་བསྲུང་བ་དང་ལ་སོགས་པའི་སྒྲས་བསྐྱབས་པ་དང་བསྐྱང་བར་མཛད་པའི་ཡེ་ཤེས་དེ་ཕྱི་རོལ་གྱི་གནོད་པ་ལས་བསྲུང་བ་དང༌། ནང་གི་ནད་ལ་སོགས་པ་ལས་བསྐྱབས་པ་དང༌། ལུས་ཀྱི་བདེ་བར་བསྒྲུབ་པས་བསྐྱང་བར་མཛད་པའོ། །ལམ་ལ་རྗེས་སུ་ཤེས་པའི་བཟོད་པ་ནི་སྲོག་མི་གཅོད་པ་ལ་སོགས་པ་དགེ་བ་བཅུ་དང༌། སྦྱིན་པ་ལ་སོགས་པ་རྣམ་པ་ཀུན་མཁྱེན་པའི་ཚུལ་ནི། བདག་ཉིད་གནས་ཏེ་སེམས་ཅན་གཞན་དག་ཀྱང་དེ་ལ་འགོད་པའི་ཡེ་ཤེས་དང༌། ལམ་ལ་རྗེས་སུ་ཤེས་པ་ནི་ཕར་ཕྱིན་དྲུག་ལ་སྤྱོད་པའི་ཚེ། སྦྱིན་པ་གཏོང་བ་ལ་སོགས་པ་ཤེས་རབ་བསྒོམ་ཡང་དེ་དག་སེམས་ཅན་ཐམས་ཅད་ཐུན་མོང་དུ་བྱས་ཤིང༌། མི་དམིགས་པའི་ཚུལ་གྱིས་རྫོགས་པའི་བྱང་ཆུབ་དུ་བསྔོ་བའི་ཡེ་ཤེས་དེ་དེ་ལྟར་ལམ་བདེན་པའི་སྐད་ཅིག་མ་བཞིའོ། །དེ་ལྟར་ན་ལམ་ཤེས་པ་ཉིད་ཀྱི་བདག་ཉིད་ལ་མཐོང་བའི་ལམ་སྐད་ཅིག་མ་བཅུ་དྲུག་གནས་སྐབས་དང་མཐུར་ཐུག་གི་ཕན་ཡོན་ཆེན་པོ་དང་བཅས་པའོ། །ངེས་པར་འབྱེད་པའི་ཆ་དང་མཐུན་པ་སྔོན་དུ་སོང་བ་དེ་ནས་འཇིག་རྟེན་ལས་འདས་པའི་ཡེ་ཤེས་བླ་ན་མེད་པ་རྣམ་པར་མི་རྟོག་པ་མཐོང་སྤང་གི་དྲི་མ་མེད་ཅིང་གཟུངས་འཛིན་གཉིས་དང་བྲལ་བའི་ས་དང་པོ་ཐོབ་པ་ནི་མཐོང་བའི་ལམ་སྐད་ཅིག་མ་བཅུ་དྲུག་དེ། དབུ་མ་ཆེན་པོ་མོད་སྡེའི་རྒྱན་ལས། དེ་ནས་དེས་ནི་འཇིག་རྟེན་ལས། །འདས་པའི་ཡེ་ཤེས་བླ་མེད་པ། ། རྣམ་པར་མི་རྟོག་དྲི་མ་མེད། ། འཛིན་པ་གཉིས་དང་བྲལ་བ་འཐོབ། །དེ་འདིའི་གནས་ཡོངས་གྱུར་པ་སྟེ། །ས་ནི་དང་པོ་ཡིན་པར་འདོད། ཅེས་སོ། །དེ་རྣམས་ཀྱིས། འདི་དང་གཞན་པའི་ཡོན་ཏན་གྱིས་ཕན་ཡོན་ཆེ་བ་མཐོང་བའི་ལམ། ཞེས་པ་དེ་བཤད་ཟིན་ཏོ། ། ༦༽སྒོམ་ལམ་གྱི་བྱེད་པ་སྟོན་པ། ད་ནི་སྒོམ་ལམ་གྱི་བྱེད་པ་སྟོན་ཏེ། མདོ་ལས། ཤེར་ཕྱིན་ནི་བྱང་ཆུབ་སེམས་དཔའ་རྣམས་ཡོངས་སུ་དུལ་བ་དང༌། ང་རྒྱལ་མེད་པའི་དོན་དུ་ཉེ་བར་གནས་པ་ཤེར་ཕྱིན་བསྒོམས་པས་རང་བཞིན་གྱི་འདོད་ཆགས་ལ་སོགས་པའི་ཉོན་མོངས་པ་བཅོམ་པ་དང༌། དུག་དང་བྱད་དང་མེ་ལ་སོགས་པས་མི་གནོད་པ་དང༌། བླ་ན་མེད་པའི་བྱང་ཆུབ་འཐོབ་པ་དང༌། ཤེར་ཕྱིན་གྱི་སྙིང་པོ་རྡོ་རྗེ་གདན་གྱི་ས་ཕྱོགས་མཆོད་རྟེན་དུ་བྱས་ཞེས་བསྟན་ཏེ་བསྟན་བཅོས་སུ། ཀུན་ནས་ཞི་དང་ཐམས་ཅད་ལ། །བདུད་དང་ཉོན་མོངས་ལས་རྒྱལ་དང༌། །གནོད་པས་རྫི་བ་མེད་ཉིད་དང༌། །བྱང་ཆུབ་དང་ནི་མཆོད་རྟེན་ཉིད། །ཅེས་སོ། །དེ་ལ་ཤེར་ཕྱིན་གྱིས་བྱང་ཆུབ་སེམས་དཔའ་ཀུན་ནས་ཞི་ཞིང་དུལ་བ་དང་ཐམས་ཅད་དུ་གཞན་ལ་འདུད་ཅིང་ང་རྒྱལ་དང་རློམ་སེམས་མེད་པ་དང༌། ཆགས་སོགས་ཉོན་མོངས་ལས་རྒྱལ་བ་དང༌། དུག་དང་མཚོན་ལ་སོགས་པའི་གནོད་པས་རྫི་བ་མེད་པ་ཉིད་དང༌། བྱང་ཆུབ་འཐོབ་པར་བྱེད་པ་དང་ནི་ཤེར་ཕྱིན་སྒོམ་པའི་ལམ་ཡོངས་སུ་རྫོགས་པའི་ཚེ་སྙིང་པོ་རྡོ་རྗེ་གདན་དུ། བཞུགས་ནས་མངོན་པར་རྫོགས་པར་སངས་རྒྱས་པའི་ས་ཕྱོགས་དེ་སེམས་ཅན་ཐམས་ཅད་ཀྱི་མཆོད་རྟེན་ཉིད་དུ་བྱས་པས་མེ་ཏོག་ལ་སོགས་པས་མཆོད་པར་གྱུར་ཏོ། །དེ་རྣམས་ཀྱིས་བྱེད་པ་དང་ནི་ཞེས་པ་དེ་བཤད་ཟིན་ཏོ། ། ད་ནི་སྒོམ་པའི་ལམ་ཉིད་སྟོན་ཏེ། དེ་ལ་མོས་པ་དང་བསྔོ་བ་དང༌། རྗེས་སུ་ཡི་རང་བ་ཡིད་ལ་བྱེད་པ་དང༌། སྒྲུབ་པ་དང་ཤིན་ཏུ་དག་པ་སྟེ་ལྔ་ཡོད་པ་ལས། ༧༽མོས་པ་བཤད་པ། དང་པོར་རེ་ཞིག་མོས་པ་བཤད་པ་ནི། དབུ་མ་མདོ་སྡེའི་རྒྱན་ལས་མོས་པའི་དབྱེ་བ། མོས་པའི་བར་གཅོད། མོས་པའི་ཕན་ཡོན་མོས་པའི་དཔེ། མོས་པ་ལ་མི་ཞུམ་པ་མོས་པའི་འབྲས་བུ་སྟེ་དྲུག་བསྟན་པ་ལས་སྐབས་འདིའི་མོས་པ་ནི། རྒྱ་ཆེན་པོ་དང་འཁོར་བ་ལས་རིང་དུ་སོང་བ་དང༌། རྒྱལ་པོ་ལྟ་བུའི་མོས་པ་དང༌། བསོད་ནམས་རྒྱ་ཆེན་པོ་རྒྱུན་མི་འཆད་པ་དང༌། དེ་འཕེལ་བ་དང་དེའི་རྒྱུས་མཐར་ཐུག་སངས་རྒྱས་ཀྱི་མཐར་ཐུག་གི་འབྲས་བུ་འཛིན་བའི་མོས་པ་ཡིན་ནོ། །མོས་པ་འདི་ཉིད་ཉི་ཁྲིའི་ལེའུ་བཅོ་བརྒྱད་པའི་སྔོན་ནས་བརྒྱ་བྱིན་གྱིས་ཤེར་ཕྱིན་གྱི་གླེགས་བམ་དང༌། སྐུ་གདུང་གི་མཆོད་རྟེན་ལ་མཆོད་པ་གཉིས་བསོད་ནམས་གང་ཆེ་ཞུས་པ་ནས་བརྩམས་དེ། ལེའུ་ཉེར་གསུམ་པ་ཡོངས་སུ་རྫོགས་པའི་འཚམས་ཀྱི་བར་གྱི་མདོས་སྟོན་ཏོ། །མདོ་འདི་རྣམས་ཀྱིས་ནི་ཤེར་ཕྱིན་ལ་མོས་པའི་རྟགས་ཤེར་ཕྱིན་ལ་བརྟོད་བཀུར་བསྔགས་པ་རྣམས་ཁོ་ན་སྟོན་གྱི། ཤེར་ཕྱིན་ལ་བསྟོད་བཀུར་བསྔགས་པ་ལས་མོས་པ་སྟོན་པའི་མདོ་གུང་དུ་བཙལ་པར་མི་བྱ་སྟེ། གང་དང་གང་ལ་མོས་པ་ནི་སེམས་ཀྱི་འགྱུ་བ་ཡིན་པས་དེ་དང་དེ་བསྟོད་སོགས་ཀྱི་སྒོ་ནས་དེ་དང་དེ་ལ་མོས་པར་གཞན་གྱིས་ཤེས་དགོས་པའི་ཕྱིར་རོ། །དཔེར་ན་འཇིག་རྟེན་ན་ཡང་སྟོད་ར་དང་བཀུར་སྟི་ལ་སོགས་པའི་སྒོ་ནས་མོས་གུས་ཆེ་ཆུང་གཞན་གྱིས་རིགས་པ་བཞིན་ནོ། །གལ་ཏེ་གཞན་གྱིས་མ་རིག་ཀྱང་རང་ཉིད་མོས་པས་སྐབས་དོན་འགྲུབ་པའི་ཕྱིར་བསྟོད་སོགས་ཅི་དགོས་ཞེ་ན་རང་དོན་མོས་པ་དེ་ལྟ་ཡིན་དུ་ཆུག་ཀྱང་གཉིས་དོན་དང༌། གཞན་དོན་མོས་པ་ལ་བསྟོད་སོགས་མེད་ན་གཞན་མོས་པའི་སྒོ་ནས་མི་འཇུག་པའི་ཕྱིར་གཞན་འཇུག་པའི་ཡན་ལག་ཏུ་གང་ལ་མོས་པའི་གནས་སྐབས་དེ་ལ་བསྟོད་བཀུར་སོགས་ངེས་པར་དགོས་སོ། །དེས་ན་འདིར་ཡང་རང་དོན་མོས་པ་དགུའི་གནས་སྐབས་ལ་ཤེར་ཕྱིན་ལ་བསྟོད་པ་དགུ་གཉིས་དོན་མོས་པ་དགུའི་གནས་སྐབས་ལ་བཀུར་བ་དགུ་དང༌། གཞན་དོན་མོས་པ་དགུའི་གནས་སྐབས་སུ་ཤེར་ཕྱིན་ལ་བསྔགས་པ་དགུ་སྟོན་པའི་མདོ་རྣམས་འབྱུང་བ་ནི་རྒྱལ་བའི་དགོངས་པ་ཡིན་ངེས་སོ། །ཁ་ཅིག་ན་རེ་བྱང་ཆུབ་སེམས་དཔའ་ལས་སངས་རྒྱས་ལ་སོགས་པས་བསྟོད་སོགས་འདི་དག་མཛད་ཅིང་དེ་ཡང་དོན་ཇི་ལྟ་བ་བཞིན་དུ་རྟོགས་པ་ཙམ་ཡིན་གྱི་བརྗོད་པའི་ངོ་བོ་ནི་མ་ཡིན་ཟེར་རོ། །དེ་ལྟར་ན་མདོ་དང་འགལ་ཏེ། སྐབས་འདིའི་མདོ་ལས་ཤེར་ཕྱིན་ལ་མེ་ཏོག་ལ་སོགས་པས་མཆོད་པ་དང༌། བསྟོད་པ་དང༌། བཀུར་སྟི་དང༌། ཤེར་ཕྱིན་གྱི་ཡོན་ཏན་བསྔགས་པ་འབའ་ཞིག་བྱུང་བའི་ཕྱིར། དེས་ན་མདོ་ལས་བྱུང་བ་ལྟར་ཚིགས་སུ་བཅད་པར་འབྱུང་བ་འདི་ལྟ་སྟེ། མོས་པ་རང་གི་དོན་དང་ནི། །རང་གཞན་དོན་དང་གཞན་དོན་དང༌། །རྣམ་གསུམ་ཤེས་བྱ་དེ་ཡང་ནི། །ཆུང་དང་འབྲིང་དང་ཆེན་པོ་སྟེ། །སོ་སོར་རྣམ་པ་གསུམ་དུ་འདོད། །ཆུང་ངུའི་ཆུང་སོགས་དབྱེ་བ་ཡིས། །དེ་ཡང་རྣམ་གསུམ་དེ་ལྟར་ན། །རྣམ་པ་ཉི་ཤུ་རྩ་བདུན་འདོད། །མོས་པའི་གནས་སྐབས་རྣམས་ལ་ནི། །ཤེས་རབ་ཕ་རོལ་ཕྱིན་པ་ལ། །དགུ་ཚན་གསུམ་གྱིས་བསྟོད་པ་དང༌། །བཀུར་བ་དང་ནི་བསྔགས་པར་འདོད། །ཅེས་པ་ལྟར་བསྒྱུར་ན་འཁྲུལ་གཞི་ཆུང་ངོ༌། ། དེ་ལ་མོས་པ་རང་གི་དོན་དང་ནི་རང་གཞན་དོན་དེ་གཉིས་དོན་དང་གཞན་དོན་དང༌། རྣམ་པ་གསུམ་དུ་ཤེས་པར་བྱ་ཞིང་གསུམ་པོ་དེ་རེ་རེ་ཡང་ནི་ཆུང་དང་འབྲིང་ཆེན་པོ་གསུམ་གསུམ་དུ་ཕྱེ་སྟེ་སོ་སོར་རྣམ་པ་གསུམ་གསུམ་དུ་འདོད་དོ། །ཆུང་ངུ་ལ་ཡང་ཆུང་ངུའི་ཆུང་ངུ་དང༌། ཆུང་ངུའི་འབྲིང་དང༌། ཆུང་ངུ་ཆེན་པོ་དང༌། འབྲིང་པོའི་ཆུང་ངུ་དང༌། འབྲིང་གི་འབྲིང་དང༌། འབྲིང་གི་ཆེན་པོ་དང༌། ཆེན་པོའི་ཆུང་ངུ་ལ་སོགས་པར་དབྱེ་བ་ཡིས། ཆུང་ངུ་ལ་སོགས་ཏེ་ཡང་སོ་སོར་རྣམ་པ་གསུམ་གསུམ་དུ་ཕྱེ་བ་སྟེ་དེ་ལྟ་ན་རང་དོན་དགུ་དང་གཉིས་དོན་དགུ་དང༌། གཞན་དོན་དགུ་སྟེ། སྡོམས་པས་རྣམ་པ་ཉེ་ཤུ་རྩ་བདུན་དུ་འདོད་ཅིང་བསྟན་ཏོ། །རང་དོན་མོས་པའི་གནས་སྐབས་དགུ་པོ་རྣམས་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྟོད་པ་དགུ་ཚན་གཅིག་དང༌། དོན་གཉིས་མོས་པའི་གནས་སྐབས་དགུ་པོ་རྣམས་ལ་ནི་ཤེས་རབ་ཕ་རོལ་ཕྱིན་པ་ལ་བཀུར་བ་དགུ་ཚན་གཅིག་དང༌། གཞན་དོན་མོས་པའི་གནས་སྐབས་དགུ་པོ་རྣམས་ལ་བསྔགས་པ་དགུ་ཚན་གཅིག་སྟེ། དེ་ལྟར་ན་ཤེས་རབ་ཕ་རོལ་ཕྱིན་པ་ལ་དགུ་ཚན་གསུམ་གྱི་བསྟོད་པ་དང་བཀུར་བ་དང་བསྔགས་པར་འདོད་ཅིང་བསྟོད་ཏོ། །དེ་རྣམས་ཀྱིས་མོས་པ་དང༌། བསྟོད་དང་བཀུར་དང་བསྔགས་པ་དང༌། ཞེས་པ་དེ་བཤད་ཟིན་ཏོ། ། ༨༽ཐེག་ཆེན་འཕགས་པའི་བསྔོ་བ་ཁྱད་པར་ཅན་བཤད་པ། ད་ནི་ཐེག་ཆེན་འཕགས་པའི་བསྔོ་བ་ཁྱད་པར་ཅན་བཤད་པར་བྱའོ། །ཚུལ་ཇི་ལྟར་ཞེ་ན། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་དམིགས་མེད་རྣམ་པ་ཅན། ། ཕྱིན་ཅི་མ་ལོག་མཚན་ཉིད་དོ། །དབེན་དང་སངས་རྒྱས་བསོད་ནམས་ཚོགས། །རང་བཞིན་དྲན་པའི་སྤྱོད་ཡུལ་ཅན། །ཐབས་བཅས་མཚན་མ་མེད་པ་དང༌། །སངས་རྒྱས་རྗེས་སུ་ཡི་རང་དང༌། ། ཁམ་གསུམ་གཏོགས་པ་མ་ཡིན་དང༌། །ཆུང་དང་འབྲིང་དང་ཆེན་པོ་ཡི། །བསྔོ་བའི་མཆོག་ནི་རྣམ་གསུམ་པོ། །བསོད་ནམས་ཆེ་འབྱུང་བདག་ཉིད་དོ། །ཞེས་པའི་ཚུལ་གྱི་འཆད་དོ། །འདི་ནི་དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས། བསྔོ་བ་གང་ལ་མཆོག་ཏུ་བསྔགས་པ་ཆེ། མཛད་པ་དེ་ཡིན་ནོ། །དམིགས་པ་དང་མཚན་མའི་དུག་ཐམས་ཅད་དང་བྲལ་བ་ཐེག་པ་ཆེན་པོ་འཕགས་པའི་ཡེ་ཤེས་ཁམས་གསུམ་ལས་འདས་པ་དོན་དམ་པའི་བསྔོ་བ་ཡིན་པས་བསྔོ་བ་འདི་ལས་ཁྱད་པར་དུ་འཕགས་པའི་བསྔོ་བ་མེད་པའི་ཕྱིར་རོ། །འདི་ཉིད་རྣམ་པ་བདུན་གྱིས་གཏན་ལ་འབེབས་པ་ལ། བསྔོ་བའི་ངོ་བོ་ནི་གང་བྱེད་པ་ནི་གང༌། རྣམ་པ་ནི་གང༌། མཚན་ཉིད་ནི་གང༌། དུག་མེད་ཅིང་བདུད་རྩིའི་མཆོག་ཏུ་གྱུར་པའི་བསྔོ་ཚུལ་ནི་གང༌། ཁམས་གསུམ་ལས་འདས་པའི་ཚུལ་ནི་གང༌། བསོད་ནམས་ཆེན་པོ་འབྱུང་བའི་བདག་ཉིད་ནི་གང་ཞེ་ན། བྱང་ཆུབ་སེམས་དཔའི་བསྔོ་བ་འདིའི་ངོ་བོ་ཁྱད་པར་གྱི་ཆོས་གསུམ་གྱིས་ཉན་རང་གི་བསྔོ་བ་ལས་ཡོངས་སུ་བསྔོ་བའི་ངོ་བོ་ཁྱད་པར་ཅན་ཡིན་ཏེ། ཉན་རང་གི་བསྔོ་བ་ནི། རང་གཅིག་པུ་མྱ་ངན་ལས་བཟླ་བའི་ཕྱིར་དམིགས་པའི་ཚུལ་གྱི་ཉེ་བར་གནས་པ་ཙམ་དུ་ཟད་ལ། བྱང་ཆུབ་སེམས་དཔའ་ནི་སེམས་ཅན་ཐམས་ཅད་མྱ་ངན་ལས་བཟླ་བའི་ཕྱིར་དང༌། མི་དམིགས་པའི་ཚུལ་གྱིས་དང༌། བླ་མེད་བྱང་ཆུབ་ཏུ་བསྔོ་བ་དེས་ནི། ཡོངས་སུ་བསྔོ་པའི་ངོ་བོ་ནི་ཁྱད་པར་ཅན་ཡིན་ནོ། །བསྔོ་བ་དེའི་བྱེད་པ་ནི། མཆོག་སངས་རྒྱས་ཐོབ་པར་བྱེད་པ་ཡིན་ནོ་བསྔོ་བ་དེ་ནི་དམིགས་པ་མེད་པའི་རྣམ་པ་ཅན་ནོ། །འདུ་ཤེས་དང་སེམས་དང་ལྟ་པ་ཕྱིན་ཅི་མ་ལོག་པ་ནི་བསྔོ་བ་དེའི་མཚན་ཉིད་དོ། །བསྔོ་བྱའི་བསོད་ནམས་དེ་དངོས་པོ་ཐམས་ཅད་ཀྱི་དབེན་པར་ཤེས་པའི་ཚུལ་དང༌། མྱ་ངན་ལས་འདས་པའི་སངས་རྒྱས་ཀྱི་བསོད་ནམས་ཀྱི་ཚོགས་ཡོངས་སུ་བསྔོ་ན་ཇི་ལྟར་སངས་རྒྱས་དེ་དག་ལྟར་དེ་དག་གི་དགེ་བའི་ཚོགས་དང༌། མྱ་ངན་ལས་འདས་པའི་རང་བཞིན་དྲན་པའི་སྤྱོད་ཡུལ་ཅན་བསྔོ་བའི་སེམས་དེ་ཡང་མྱ་ངན་ལས་འདས་པར་ཤེས་པའི་ཚུལ་དང༌། ཤེར་ཕྱིན་ལ་བརྟེན་ནས་མཚན་མེད་དང་བསྔོ་བ་མི་འགལ་བའི་ཐབས་ལ་མཁས་པ་དང་བཅས་པའི་ཚུལ་དང༌། བསྔོ་བྱའི་དགེ་བ་མི་དམིགས་ཤིང་མཚན་མ་མེད་པའི་ཚུལ་དང༌། སངས་རྒྱས་ཀྱི་དགེ་བ་དེ་དག་གི་རང་བཞིན་ཇི་ལྟར་ཐུགས་སུ་ཆུད་པ་དེ་ལྟར་བསྔོས་པ་ནི་སངས་རྒྱས་ཀྱིས་རྗེས་སུ་ཡི་རང་བའི་ཚུལ་གྱིས་བསྔོས་པ་སྟེ། ཚུལ་དེ་ལྟར་བསྔོ་བ་ནི། དུག་མེད་ཅིང་བདུད་རྩིར་འགྱུར་བའི་བསྔོ་ཚུལ་ལོ། །ཁམས་གསུམ་དང་དུས་གསུམ་དུ་མ་གཏོགས་པའི་གཟུག་སོགས་ཆོས་ཐམས་ཅད་རང་བཞིན་མེད་པས་དངོས་པོ་མེད་པ་ནི་དངོས་པོ་མེད་པས་དམིཊ་པའི་ཚུལ་གྱིས་བསྔོ་བར་མི་ནུས་སོ། །ཞེས་བྱ་བར་ཤེས་ན། བསྔོ་བ་དུག་མེད་ཅིང་བདུད་རྩིའི་མཐར་ཕྱིན་པར་འགྱུར་བ་ནི་ཁམས་གསུམ་ལས་འདས་པའི་ཚུལ་ལོ། །བསྔོ་བ་ཁྱད་པར་ཅན་དེ་ཉིད་དོ། ། ཆུང་འབྲིང་ཆེ་གསུམ་དུ་ཕྱེས་ནས་བསོད་ནམས་ཆེན་པོ་འབྱུང་བ་ནི། སྟོང་གསུམ་གྱི་སེམས་ཅན་ཐམས་ཅད་ཀྱིས་དགེ་བ་བཅུ་བསམ་གཏན་ཚད་མེད་གཟུགས་མེད་མངོན་ཤེས་ཐོབ་པ་ལས་བསོད་ནམས་ཆེན་པོ་འབྱུང་བའི་བདག་ཉིད་ཆགས་པ་མེད་པའི་བསྔོ་བ་ཆུང་ངུ་དང༌། སྟོང་གསུམ་གྱི་སེམས་ཅན་ཐམས་ཅད་ཉན་རང་འཕགས་པར་གྱུར་པ་ལ། གང་ཟག་ལ་ལས་ནམ་འཚོའི་བར་དུ་ཆོས་གོས་བསོད་སྙོམས་མལ་ཆ་ནད་ཀྱི་རྐྱེན་རྩི་སྟེ་རྐྱེན་བཞིས་མཆོད་པ་ལས་བསོད་ནམས་ཆེན་པོ་འབྱུང་བའི་བདག་ཉིད་ནི་ཆགས་པ་མེད་པའི་བསྔོ་བ་འབྲིང་དང༌། སྟོང་གསུམ་གྱི་སེམས་ཅན་ཐམས་ཅད་བྱང་ཆུབ་སེམས་དཔའ་པར་གྱུར་པ་ལ་ཕྱོགས་བཅུའི་སེམས་ཅན་ཐམས་ཅད་ཀྱིས་བྱང་ཆུབ་སེམས་དཔའ་རེ་རེ་ལ་ཡང་རྐྱེན་བཞིས་མཆོད་པ་ལས་ཀྱང་བསོད་ནམས་ཆེན་པོ་འབྱུང་བའི་བདག་ཉིད་ནི་ཆགས་པ་མེད་པའི་བསྔོ་བ་ཆེན་པོ་སྟེ། དེ་ལྟར་ན་ཆུང་དང་འབྲིང་ཆེན་པོའི་རང་བཞིན་གསུམ་དུ་ཕྱེ་བའི་བསྔོ་བ་གཞན་ནམ་མཆོག་གི་རྣམ་པ་གསུམ་པོ་དེ་བསོད་ནམས་ཆེན་པོ་འབྱུང་བའི་བདག་ཉིད་དོ། །དེས་ན་བསྒོམ་ལམ་ལ་གནས་པའི་བྱང་ཆུབ་སེམས་དཔས། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང༌། །འགྲོ་བ་ཀུན་གྱི་བསོད་ནམས་གང་ཡོད་པ། །དེ་དག་ཀུན་གྱི་རྗེས་སུ་བདག་ཡི་རང༌། །ཞེས་འཁོར་འདས་ཀྱི་དགེ་བ་ཐམས་ཅད་བློས་ཕྱོགས་གཅིག་ཏུ་བསྡུས་པ་ལས་མི་དམིགས་པའི་སྒོ་ནས་རྗེས་སུ་ཡི་རང་བ་ལས་བྱུང་བའི་བསོད་ནམས་དེ་མཚན་མ་མེད་པའི་ཚུལ་གྱིས་བསྔོ་བ་ནི། སྐབས་སྐབས་འདིའི་མདོའི་དགོངས་པར་སྣང་ངོ༌། །ཇི་ལྟར་བསྔོ་བའི་ཚུལ་ཡང༌། འཇམ་དཔལ་དཔའ་བོས་ཇི་ལྟར་མཁྱེན་པ་དང༌། །ཀུན་ཏུ་བཟང་པོ་དེ་ཡང་དེ་བཞིནཏེ། །དེ་དག་ཀུན་གྱི་རྗེས་སུ་བདག་སློབ་ཅིང༌། །དགེ་བ་འདི་དག་ཐམས་ཅད་ཡོངས་སུ་བསྔོ། །ཞེས་ཆོས་ཐམས་ཅད་ཀྱི་གནས་ལུགས་སངས་རྒྱས་དང་བྱང་ཆུབ་སེམས་དཔའ་འམ་དེ་དག་གི་ཇི་ལྟར་མཁྱེན་པའི་དམིགས་པ་དང༌། མཚན་མ་ཐམས་ཅད་མེད་པ་དེ་བཞིན་ཉིད་ཀྱི་ཚུལ་དུ་བསྔོ་བ་ཡང་སྐབས་འདིའི་དགོངས་པ་ཡིན་པར་སྣང་ངོ༌། །བསྔོ་བ་འདི་ནི་ཐེག་ཆེན་གྱི་འཕགས་པ་མ་གཏོགས་པ་མཚན་མར་འཛིན་པའི་བློ་གང་གི་ཡང་སྤྱོད་ཡུལ་མ་ཡིན་ཏེ། རྒྱལ་བ་ཀུན་གྱིས་མཆོག་ཏུ་བསྔགས་པ་དོན་དམ་པའི་བསྔོ་བ་འཇིག་རྟེན་ལས་འདས་པ་ཡིན་པའི་ཕྱིར་རོ། །བསྔོ་བ་འདི་ནི་བསྡུད་པ་ལས་ཀྱང་ཤིན་ཏུ་གསལ་བར་སྟོན་ནོ། །ཉི་ཁྲི་སྣང་བ་ན་བསྔོ་བ་འདིའི་བཤད་པ་མདོ་དང་མཐུན་པ་ལེགས་པོ་ཡོད་དོ། །སློབ་དཔོན་སེང་བཟང་ལ་སོགས་པ་བཤད་པ་ནི་མདོ་དང་མི་འགྲིགས་པར་སྣང་ངོ༌། །བསྔོ་བ་དང་རྗེས་སུ་ཡི་རང་འདི་དག་ཉི་ཁྲིའི་ལེའུ་ཉེར་བཞི་པས་སྟོན་ནོ། །དེ་རྣམས་ཀྱིས་བསྔོ་དང་ཞེས་པ་དེ་བཤད་ཟིན་ཏོ། ། ༨༽རྗེས་སུ་ཡི་རང་བཤད་པ། ད་ནི་རྗེས་སུ་ཡི་རང་གི་ངོ་བོ་རང་གི་བསྔོ་བའི་སྐབས་སུ་བསྟན་པ་དེ་ཉིད་ཇི་ལྟར་བསྒོམས་ན་རྗེས་སུ་ཡི་རང་བའི་དམ་པ་ཁྱད་པར་ཅན་དུ་འགྱུར་ཚུལ་སྟོན་ཏེ། མདོ་ལས། བཅོམ་ལྡན་འདས་ཅི་ཙམ་གྱིས་ན་རྗེས་སུ་ཡི་རང་བའི་དོན་དམ་པར་འགྱུར་ཞེས་སོགས་ནི་བསྟན་བཅོས་སོ། །ཐབས་དང་མི་དམིགས་པ་དག་གིས། །དགེ་བའི་རྩ་ལ་ཡི་རང་ལ། །རྗེས་སུ་ཡི་རང་ཡིད་བྱེད་པ། །བསྒོམ་པ་ཡིན་པར་འདིར་བརྗོད་དོ། །ཞེས་སོ། །ཆོས་ཐམས་ཅད་དངོས་པོའི་རང་བཞིན་མེད་པ་དང༌། རྗེས་སུ་ཡི་རང་བ་མི་འགལ་བར་བསྒྲུབ་པ་བྱང་ཆུབ་སེམས་དཔའི་ཐབས་ལ་མཁས་པ་དང༌། མཚན་མ་ཐམས་ཅད་མི་དམིགས་པ་དག་གིས། དགེ་བའི་རྩ་བ་ཐམས་ཅད་ལ་ཡི་རང་པ་ནི་དེ་བཞིན་ཉིད་ཇི་ལྟ་བཞིན་དུ་རྗེས་སུ་ཡི་རང་བ་ཡིད་ལ་བྱེད་པའི་དམ་པ་བསྒོམ་པའི་ཚུལ་ནི་ཡིན་པར་སྐབས་འདིར་བརྗོད་ཅིང་བསྟན་པ་ཉིད་དོ། །མོས་བསྔོ་དང་རྗེས་སུ་ཡི་རང་འདི་དག་ཟག་བཅས་སུ་འཆད་པ་ནི་མདོ་དང་འགལ་ཞིང་ཟག་བཅས་བཏགས་པ་པར་བཤད་པ་ལ་ཡང་དགོས་པ་མེད་དོ། །མདོ་ལས་མོས་སོགས་འདི་དག་ཟག་པ་མེད་པ་དང༌། མཚན་མ་མེད་པ་དང༌། དམིགས་པ་མེད་པ་དང༌། ཁམས་གསུམ་ལས་འདས་པར་གསུངས་པའི་ཕྱིར་རོ། །དེ་རྣམས་ཀྱིས་རྗེས་སུ་ཡི་རང་བ་ཡིད་ལ་བྱེད་པ་བླ་མེད་དང༌། ཞེས་པ་དེ་བཤད་ཟིན་ཏོ། ། ༡༠༽སྒོམ་ལམ་གྱི་ངོ་བོར་གྱུར་པའི་ཤེར་ཕྱིན་སྒྲུབ་པ་བསྟན་པ། ད་ནི་སྒོམ་ལམ་གྱི་ངོ་བོར་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པ་བསྟན་ཏོ། །ཉི་ཁྲིའི་ལེའུ་ཉེར་ལྔ་པ་ལས་ཤེར་ཕྱིན་ནི་ཤིན་ཏུ་རྣམ་པར་དག་པའི་སླད་དུ་སྣང་བར་བགྱིད་པའོ། །ཞེས་སོགས་དང༌། གཟུགས་སོགས་སྒྲུབ་པ་མེད་པའི་ཕྱིར་ཤེར་ཕྱིན་སྒྲུབ་པར་བྱའོ། །ཞེས་སོགས་ནི་བསྟན་བཅོས་སུ། དེ་ཡི་ངོ་བོ་ཉིད་མཆོག་ཉིད། །ཀུན་ལ་མངོན་པར་འདུ་མི་བྱེད། །ཆོས་རྣམས་དམིགས་པ་མེད་པར་ནི། །གཏོང་པར་བྱེད་པ་དོན་ཆེན་ཉིད། །ཅེས་སོ། །དེ་ལ་ཤེར་ཕྱིན་ཟབ་མོ་དེའི་ངོ་བོ་ནི་་སྐྱོན་དང་མུན་པ་ཐམས་ཅད་བསལ་བས་ཤིན་ཏུ་རྣམ་པར་དག་ཅིང་སྣང་བར་བྱེད་པའི་ངོ་བོ་ཉིད་དང༌། ཤེར་ཕྱིན་དེ་ཕར་ཕྱིན་གཞན་རྣམས་དང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་ནང་ནས་མཆོག་ཉིད་དང༌། གཟུགས་སོགས་སྒྲུབ་པ་མེད་པ་ནི་གཟུགས་སོགས་ཀུན་ལ་མངོན་པར་འདུ་མི་བྱེད་ཅིང་ཆོས་གང་ཡང་ཐོབ་པར་མི་བྱེད་པའི་ཤེར་ཕྱིན་དེ་བསྒྲུབ་པ་དང༌། ཤེར་ཕྱིན་དེས་དམིགས་པའི་ཚུལ་གྱིས་ཆོས་གང་ཡང་ཐོབ་པར་མི་བྱེད་ཀྱི། ཆོས་རྣམས་དམིགས་པ་མེད་པར་རྣལ་འབྱོར་པའི་རྒྱུད་གང་ཡིན་པ་དེ་ལ་ཅི་གཏོད་ཅིང་ཐོབ་པར་བྱེད་པ་དང༌། བྱང་ཆུབ་སེམས་དཔའ་ཤེར་ཕྱིན་ལ་ཡིད་ཆེས་པས་གཟུགས་སོགས་བཏགས་པའི་ཆོས་ཐམས་ཅད་ལ་ཡིད་མི་ཆེས་ཤིང༌། བཏགས་པའི་ཆོས་ཐམས་ཅད་མི་དམིགས་པས་ཤེར་ཕྱིན་ལ་ཡིད་ཆེས་པའི་ཕྱིར་ཤེར་ཕྱིན་དེ་ནི་དོན་དམ་ཆེན་པོ་ཉིད་ཡིན་ནོ། །ཤིན་ཏུ་ཟབ་པས་མོས་པར་དཀའ་བའི་ཤེར་ཕྱིན་དེ་ལ་མོས་པའི་རྒྱུ་གང་ཞེ་ན། སངས་རྒྱས་བསྟེན་དང་སྦྱིན་སོགས་དང༌། །ཐབས་ལ་མཁས་པ་གང་ཡིན་པ། །འདི་ལ་མོས་པའི་རྒྱུ་དག་ཡིན་ནོ། ། སེམས་དང་པོ་བསྐྱེད་ཕྱིན་ཆད་དགེ་བའི་བཤེས་གཉེན་སངས་རྒྱས་གྲངས་མེད་པ་བསྟེན་ཅིང་བསྙེན་བཀུར་བ་དང༌། སྦྱིན་སོགས་ཕ་རོལ་ཕྱིན་དྲུག་སྤྱད་པ་ནི། སྐལ་པ་དཔག་ཏུ་མེད་པ་ནས་བླ་མེད་བྱང་ཆུབ་ཏུ་ཞུགས་པའི་བྱང་ཆུབ་སེམས་དཔའ་ཤེར་ཕྱིན་ཟབ་མོ་འདི་ལ་མོས་རྒྱུ་དང༌། སྦྱིན་སོགས་ལ་མི་དམིགས་པའི་ཚུལ་གྱིས་བརྩོན་ཅིང་ཆོས་ཐམས་ཅད་ཀྱི་འཕེལ་འགྲིབ་མ་མཐོང་བའི་ཐབས་ལ་མཁས་པ་གང་ཡིན་པ། དེ་ནི་བྱང་ཆུབ་སེམས་དཔའ་དབང་རྣོན་ལ་ལས་སེམས་དང་པོ་བསྐྱེད་མ་ཐག་ནས་ཤེར་ཕྱིན་ཟབ་མོ་འདི་ལ་མོས་པའི་རྒྱུ་དག་ཡིན་ནོ། །འོ་ན་མ་མོས་ཤིང་ཤེར་ཕྱིན་ཟབ་མོའི་ཆོས་ཀྱི་འཕོངས་པའི་རྒྱུ་གང་ཡིན་ཞེ་ན། ཆོས་ཀྱི་ཕོངས་པའི་རྒྱུ་དག་ནི། །བདུད་ཀྱི་ཐིབས་ཀྱིས་ནོན་པ་དང༌། །ཟབ་མོའི་ཆོས་ལ་མ་མོས་དང༌། །ཕུང་པོ་ལ་སོགས་མངོན་ཞེན་དང༌། །སྡིག་པའི་གྲོགས་པོས་ཡོངས་འཛིན་པའོ། །དེ་ལ་འདིར་དམ་པའི་ཆོས་སྤོང་བ་ལ་སོགས་པའི་རྒྱུ་བཞི་བསྟན་ཏེ། བདུད་ཀྱི་ཐིབས་ཀྱིས་ནོན་ཞིང་བྱིན་གྱིས་བརླབས་པ་དང༌། དེ་བཞི་ན་ཉིད་ལ་སོགས་པ་ཡོངས་གྲུབ་ཟབ་མོའི་ཆོས་ལ་ཡིད་མ་ཆེས་ཤིང་མ་མོས་པ་དང༌། ཕུང་པོ་ལ་སོགས་པ་ལ་བདེན་པའི་དངོས་པོར་མངོན་པར་ཞེན་པ་དང༌། སྡིག་པའི་གྲོགས་པོས་ཡོངས་སུ་འཛིན་པ་དང་བཞིའོ། །མདོ་ལས། ཕུང་པོ་ལ་སོགས་མངོན་པར་ཞེན་པ་དང༌། སྡིག་པའི་གྲོགས་པོས་ཟྀན་པ་གཉིས་གཅིག་ཏུ་བྱས་ནས། བདག་བསྟོད་ཅིང་གཞན་སྨོད་པ་ལ་རྒྱུ་བཞི་པར་བྱས་སོ། ། བདུད་ཀྱིས་བྱིན་གྱིས་བརླབས་པའི་ངོ་བོ་ནི་བདུད་ལས་འབའ་ཞིག་ལ་དགའ་བའི་སེམས་ཡིན་ནོ། ། སྡིག་པའི་གྲོགས་པོས་ཟིན་པའི་ངོ་བོ་ཡང་ཆོས་སྤོང་ལ་སོགས་པའི་སྡིག་པའི་གྲོགས་དེས་ཇི་ལྟར་བསྟན་པ་བཞིན་ཉམས་སུ་ལེན་པའི་སེམས་ཡིན་ནོ། །ཤེར་ཕྱིན་ཟབ་མོ་ལ་མོས། མ་མོས་ཀྱི་རྒྱུ་སྟོན་པའི་སྐབས་དོན་ལས་གྲོལ་པའི་བཤད་པ་བྱས་ཡོད་དོ། །འདི་དག་ཉི་ཁྲིའི་ལེའུ་ཉེར་དྲུག་པའི་ཕྱེད་སྔ་མས་སྟོན་ཏོ། །དེ་རྣམས་ཀྱིས་སྒྲུབ་དང་ཞེས་པ་དེ་བཤད་ཟིན་ཏོ། ། ༡༡༽དག་པ་བཤད་པ། ད་ནི་དག་པ་བཤད་པར་བྱའོ། །མདོ་ལས། གཟུགས་རྣམ་པར་དག་པ་གང་ཡིན་པ་དེ་ནི་འབྲས་བུ་རྣམ་པར་དག་པའོ། །ཞེས་པ་ལ་སོགས་པ་ཉི་ཁྲིའི་ལེའུར་ཉེར་དྲུག་པའི་ཕྱེད་ཕྱི་མ་ལ་སོགས་པ་རྣམས་སོ། །དག་པའི་ངོ་བོ་གང་ཞེ་ན། །དེ་ནི་དེ་བཞིན་ཉིད་ཡིན་ཏེ། །ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཅེས་སངས་རྒྱས་ཉིད་ཀྱིས་གསུངས་པའི་ཕྱིར་རོ། །བྱམས་མགོན་གྱི་ཞལ་སྔ་ནས་ཀྱང༌། དེ་བཞིན་ཉིད་འདི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་སོ། །དབུ་མ་པ་ཆེན་པོ་དབྱིག་གཉེན་གྱིས་ཀྱང༌། ཕ་རོལ་ཏུ་ཕྱིན་པ་དང་བྱང་ཆུབ་ཀྱི་ཕྱོགས་ལ་སོགས་རྣམ་པར་བྱང་བའི་ཆོས་རྣམས་ཀྱི་འབྲས་བུར་གྱུར་པ་རྣམ་པར་དག་པ་ཞེས་བྱ་བ་གུད་ན་གང་ཡང་མེད་ཀྱིས། ཆོས་ཉིད་ཀྱིས་གཟུགས་ཡོངས་སུ་གྲུབ་པ་ངོ་བོ་ཉིད་དུ་གྱུར་པ་རྟག་ཏུ་གནས་པ་རྣམ་པར་དག་པ་ཉིད་འབྲས་བུར་གྱུར་པའི་རྣམ་པར་དག་པའོ། །ཞེས་བྱ་བའི་ཐ་ཚིག་གོ །ཞེས་དང༌། དེ་ལ་གཟུགས་སོགས་ཀྱི་ཆོས་ཉིད་ཀྱི་གནས་སྐབས་ན་ནི་གཟུགས་རྣམ་པར་དག་པ་ཞེས་བྱའོ། །མྱ་ངན་ལས་འདས་པ་ཞེས་བྱ་བ་ཡང་དག་པའི་མཐའི་གནས་སྐབས་ལ་ནི་འབྲས་བུ་རྣམ་པར་དག་པ་ཞེས་བྱའོ། །ཆོས་ཀྱི་སྐུའི་གནས་སྐབས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཞེས་བྱའོ། ། དེ་ལ་གཟུགས་རྣམ་པར་དག་པའི་དེ་བཞིན་ཉིད་གང་ཡིན་པ་དེ་འབྲས་བུ་རྣམ་པར་དག་པ་སྟེ། རྣམ་པར་གྲོལ་བའོ། །རྣམ་པར་གྲོལ་བ་གང་ཡིན་པ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་སྟེ། ཆོས་ཀྱི་སྐུའོ། །ཆོས་ཀྱི་སྐུ་གང་ཡིན་པ་དེ་ཉིད་གཟུགས་རྣམ་པར་དག་པ་སྟེ། དེ་བཞིན་ཉིད་ཅེས་བྱ་བའི་ཐ་ཚིག་གོ །དེ་བས་ན་དེ་བཞིན་ཉིད་དང་རྣམ་པར་གྲོལ་བ་དང༌། ཆོས་ཀྱི་སྐུ་ནི་དོན་དམ་པར་ཐ་དད་མེད་དེ་གཅིག་གོ །ཞེས་གསུངས་པ་རྣམས་ཀྱི་དོན། འབྲས་བུ་དག་པ་གཟུགས་ལ་སོགས། །དག་པ་ཉིད་དེ་གང་གི་ཕྱིར། །དེ་གཉིས་ཐ་དད་མ་ཡིན་ཞིང༌། །གཅད་དུ་མེད་པས་དག་པར་བརྗོད། །ཅེས་པས་འདིས་གཞི་འབྲས་ཀྱི་ཆོས་ཉིད་ངོ་བོ་གཅིག་པའི་རང་བཞིན་རྣམ་དག་སྟོན་ཏོ། །ཉོན་མོངས་ཤེས་བྱ་ལམ་གསུམ་གྱི་ཉམས་ཕྱིར་སློབ་མ་བསེ་རུ་དང༌། རྒྱལ་སྲས་རྣམས་ཀྱི་དག་པ་སྟེ། །སངས་རྒྱས་རྣམ་ཀུན་ཤིན་ཏུ་བ། །ཞེས་པ་འདིས་ལམ་བདེན་གྱི་ཆོས་ཉིད་གློ་བུར་གྱི་དྲི་མས་ཀྱང་དག་པར་སྟོན་ཏོ། །ས་དགུ་ལ་ནི་ཆེན་པོ་ཡི། །ཆེན་པོ་ལ་སོགས་དྲི་མ་ཡི། །གཉེན་པོ་ཆུང་ངུའི་ཆུང་ངུ་ལ། །སོགས་པའི་ལམ་ནི་དག་པ་ཡིན། །ཞེས་པ་འདིས་བསྒོམ་ལམ་ཆུང་འབྲིང་ལ་སོགས་དགུའི་ཆོས་ཉིད་རང་རང་གི་སྤང་བྱའི་ངོ་སྐལ་གྱིས་དག་པ་སྟོན་ནོ། །དེ་ལ་འབྲས་བུ་མྱང་འདས་ཀྱི་ཆོས་ཉིད་རང་བཞིན་གྱིས་དག་པ་དེ་ཆོས་ཉིད་ཀྱི་གཟུགས་ལ་སོགས་རང་བཞིན་གྱིས་དག་པ་དེ་ཉིད་ཡིན་ཏེ། གང་གི་ཕྱིར། གཅིག་པའི་ཕྱིར་གཉིས་སུ་མེད་དེ་ཐ་དད་དུ་དབྱེ་བར་མི་ནུས་པའི་ཕྱིར་གཉིས་སུ་བྱར་མེད་བྱེ་བྲག་མེད་པའི་ཕྱིར་སོ་སོ་མ་ཡིན་པར་མ་ཆད་ཅིང་རྟག་པའི་ཕྱིར་ཐ་མི་དད་པའི་སྒོ་ནས་དེ་གཉིས་ཐ་དད་མ་ཡིན་ཞིང་གཅད་དུ་མེད། གཞོམ་དུ་མེད། གཤིག་ཏུ་མེད་པས་དེའི་ཕྱིར་དག་པའི་ཆོས་ཉིད་དེ་གཉིས་ངོ་བོ་གཅིག་ཡིན་པར་བརྗོད་ཅིང་བསྟན་ཏོ། །སློབ་མ་རྒྱུན་ཞུགས་ནས་དགྲ་བཅོམ་པར་གྱི་ཆོས་ཉིད་དེ་རང་རང་གི་ངོ་སྐལ་གྱིས་སྤང་བྱས་དག་པ་ཡིན་ཏེ། རང་རང་གི་ངོ་སྐལ་གྱི་སྤང་བྱའི་ཉོན་མོངས་ཉམས་ཤིང་མེད་པའི་ཕྱིར་རོ། །བསེ་རུ་ལྟ་བུ་རང་སངས་རྒྱས་ཀྱི་ཆོས་ཉིད་དེ་རང་རང་གི་ངོ་སྐལ་གྱི་སྤང་བྱས་དག་པ་ཡིན་ཏེ། རང་རང་གི་ངོ་སྐལ་གྱིས་སྤང་བྱ་ཉོན་མོངས་དང༌། ཤེས་བྱའི་སྒྲིབ་པ་ཉམས་ཤིང་སྤངས་པའི་ཕྱིར་རོ། །སར་གནས་ཀྱི་རྒྱལ་སྲས་རྣམས་ཀྱི་ཆོས་ཉིད་དེ་རང་རང་གི་ངོ་སྐལ་གྱི་སྤང་བྱས་དག་པ་ཡིན་ཏེ། རང་རང་གི་ངོ་སྐལ་གྱི་སྤང་བྱ་ལམ་གསུམ་གྱི་སྒྲུབ་པ་ཉམས་ཤིང་དག་པའི་ཕྱིར་རོ། །སངས་རྒྱས་ཀྱི་དེ་བཞིན་དེ་དུས་དང་རྣམ་པ་ཀུན་ཏུ་རྣམ་པར་དག་པ་ཡིན་ཏེ། སྒྲིབ་པ་གཉིས་བག་ཆགས་དང་བཅས་པ་གཏན་ནས་སྤངས་པའི་ཕྱིར་རོ། །ཁམས་གསུམ་ས་དགུ་ནི། སྒོམ་སྤང་ཆེན་པོའི་ཆེན་པོ་ལ་སོགས་པའི་དྲི་མའི་གཉེན་པོ་ཆུང་ངུའི་ཆུང་ངུ་ལ་སོགས་པའི་བསྒོམ་ལམ་གྱི་ཆོས་ཉིད་ནི་རང་རང་གི་ངོ་སྐལ་གྱི་ཆོས་ནི་རང་རང་གི་ངོ་སྐལ་གྱི་སྤང་བྱའི་དྲི་མས་དག་པ་ཡིན་ཏེ། རང་རང་གི་སྤང་བྱའི་གཉེན་པོ་དག་ཅིང་གསལ་བ་ཡིན་པའི་ཕྱིར་རོ། །གལ་ཏེ་གཉེན་པོ་ཆུང་ངུས་སྤང་བྱ་ཆེན་པོ་དང་སྤང་བྱ་ཆུང་ངུ་གཉེན་པོ་ཆེན་པོས་སེལ་བར་མི་འོས་པའི་ཕྱིར་དང༌། ཁམས་གཅིག་ན་ཡོད་པའི་གཉེན་པོས་ཁམས་གསུམ་ཅན་གྱི་སྒྲིབ་པ་སེལ་བ་ཡང་མི་འཐད་པའི་ཕྱིར་སྒོམ་ལམ་དེ་དག་མི་རིགས་སོ། །ཞེ་ན། དེ་ལ་གླན་ཀ་སྤངས་པ་ཡིས། །ལམ་ནི་འཇལ་དང་གཞལ་བྱ་དང༌། མཉམ་པ་ཉིད་ཀྱིས་ཁམས་གསུམ་གྱི། །གཉེན་པོ་ཉིད་དུ་འདོད་པ་ཡིན། །དྲི་མ་སེལ་ཚུལ་དང་གཉེན་པོར་འགྱུར་ཚུལ་དུ་གཉིས་ཡོད་པ་དེ་ལ་སྐྱོན་བརྗོད་པའི་ལན་གདབ་དགོས་པས། གླན་ཀ་དང་པོ་སྣང་བ་ཆུང་ངུས་མུན་པ་ཆེན་པོ་དང༌། མུན་པ་ཆུང་ངུ་ནི་སྣང་བ་ཆེན་པོས་སེལ་བ་ལ་སོགས་པའི་དཔེས་སྤངས་པ་ཡིས་སྐྱོན་མེད་ལ། ཁམས་གཅིག་ན་ཡོད་པའི་ལམ་ནི་འཇལ་བྱེད་ཡུལ་ཅན་གྱི་ཡེ་ཤེས་དང༌། གཞལ་བྱ་འོད་གསལ་ཆོས་ཀྱི་དབྱིངས་དག་ཡུལ་དང་ཡུལ་ཅན་གཅིག་ཏུ་གྱུར་ཅིང༌། གཉིས་སུ་མེད་པར་མཉམ་པ་ཉིད་དུ་གོམས་པ་ཉིད་ཀྱི་ཁམས་གསུམ་ཅར་གྱི་སྒྲིབ་པ་གཅིག་ཅར་དུ་སེལ་བའི་ཕྱིར་ཁམས་གསུམ་ཅར་གྱི་གཉེན་པོ་གཅིག་ཅར་བ་ཉིད་དུ་འདོད་ཅིང་བསྟན་པ་ཡིན་ནོ། །རྣམ་དག་གི་སྐབས་འདིར། གཞན་དག་གིས་གཞུང་དོན་སྒྲིབ་པའི་བཤད་པ་མང་པོ་བྱས་ཡོད་དོ། །དེ་རྣམས་ཀྱིས་ཤིན་ཏུ་དག་པ་ཞེས། བྱ་བ་འདི་ནི་བསྒོམ་པའི་ལམ། །བྱང་ཆུབ་སེམས་དཔའ་མཁས་རྣམས་ཀྱི། །ལམ་ཤེས་ཉིད་ནི་དེ་འདྲར་བཤད། །ཅེས་པ་དེ་བསྟན་ཟིན་ཏོ། །དངོས་པོ་བརྒྱད་ལས་ལམ་ཤེས་ཉིད་ཀྱི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས། མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་བ་མདོ་ལུགས་མ་ཞེས་བྱ་བ་ལས། སྐབས་གཉིས་པའི་འགྲེལ་པའོ། ། གསུམ་པ། གཞི་ཤེས་རྒྱས་པར་བཤད་པ། ༡༽སྲིད་ཞི་ལ་མི་གནས་པའི་ཤེར་ཕྱིན་བཤད་པ། ད་ནི་ཐམས་ཅད་ཤེས་པ་ཉིད་ཀྱི་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པར་བྱ་སྟེ། ཉི་ཁྲིའི་ལེའུ་ཉེར་བདུན་པའི་སྐབས་སུ་ཚུར་རོལ་གྱི་འགྲམ་མམ། ཕ་རོལ་གྱི་འགྲམ་མམ། གཉིས་ཀྱིདབུས་ན་ཡང་མི་གནས་ན་དེ་ནི་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་སོགས་ཀྱི་དོན་ཐམས་ཅད་ཤེས་པ་ཉིད་ཀྱི་དངོས་པོ་དགུ་ལས་རིམ་པ་ལྟར་འབྱུང་བ་ནི། ཚུར་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། །འདིར་བྱང་ཆུབ་སེམས་དཔའ་རྣམས་ཀྱི་སྲིད་ཞི་མཉམ་པ་ཉིད་དང༌། དུས་གསུམ་མཉམ་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ཚུར་རོལ་སྲིད་པའི་མཐའ་དང༌། ཕ་རོལ་ཞི་བའི་མཐའ་དང་སྲིད་ཞི་དེ་དག་གི་པར་ན་ཡང་རྟོག་པ་དང་དམིགས་པའི་ཆོས་ཚུལ་གྱིས་མི་གནས་པ་དེས་དུས་གསུམ་པོ་རྣམས་གཅིག་ཅར་གྱིས་མཉམ་པ་ཉིད་དུ་ཤེས་པའི་ཕྱིར། དེ་ནི་སྲིད་ཞི་དང་དུས་གསུམ་མཉམ་པ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་པར་འདོད་ཅིང་བསྟན་ཏོ། །དེ་རྣམས་ཀྱིས་ཤེས་པས་སྲིད་ལ་མི་གནས་ཤིང༌། སྙིང་རྗེ་ཞི་ལ་མི་གནས་དང༌། ཞེས་པ་དེ་དག་བཤད་ཟིན་ཏོ། ། ༢༽ཤེར་ཕྱིན་ཟབ་མོ་དེ་ལ་རིང་བ་དང་ཉེ་བ་བཤད་པ། ད་ནི་ཤེར་ཕྱིན་ཟབ་མོ་དེ་ལ་རིང་བ་དང་ཉེ་བ་བཤད་པར་བྱའོ། །དེ་ནི་མཚན་མར་དམིགས་སྒོ་ནས། །ཐབས་མ་ཡིན་པས་རིང་བ་སྟེ། །དེ་ནི་ཐབས་ལ་མཁས་པ་ཡིས། །ཡང་དག་ཉེ་བ་ཉིད་དུ་བཤད། །མིང་དང་མཚན་མ་ལ་ཆགས་པའི་བྱང་ཆུབ་སེམས་དཔའ་དེ་ནི་ཤེར་ཕྱིན་ལ་མཚན་མར་དམིགས་པའི་སྒོ་ནས་ཐབས་ལ་མཁས་པ་མ་ཡིན་པས། དུས་གསུམ་མཉམ་ཉིད་ཀྱི་ཤེར་ཕྱིན་དེ་རིང་དུ་སྤོང་བ་སྟེ། ཤེར་ཕྱིན་དེའི་མི་མཐུན་ཕྱོགས་ལ་ཞུགས་པའི་ཕྱིར་རོ། །ཅིར་ཡང་མི་ཞེན་ཅིང་མི་རྟོག་པའི་ཚུལ་གྱི་དུས་གསུམ་གཅིག་ཆར་ཤེས་པའི་བྱང་ཆུབ་སམེས་དཔའ་དེ་ནི་སྲིད་ཞི་དང་དུས་གསུམ་པ་མཉམ་པ་ཉིད་ཤེས་པའི་ཤེར་ཕྱིན་དང༌། ཉེ་བའི་ཐབས་ལ་མཁས་པ་ཡིས། ཤེར་ཕྱིན་དེ་དང་ཡང་དག་པར་ཉེ་བ་ཉིད་དུ་བཤད་དོ། །དེ་རྣམས་ཀྱིས་ཐབས་མ་ཡིན་པས་རིང་བ་དང༌། ཐབས་ཀྱིས་རིང་བ་མ་ཡིན་དང༌། ཞེས་པ་དེ་དག་བཤད་ཟིན་ཏོ། ། ༣༽ཤེར་ཕྱིན་ཟབ་མོ་དེའི་མི་མཐུན་ཕྱོགས་བཤད་པ། ད་ནི་ཤེར་ཕྱིན་ཟབ་མོ་དེའི་མི་མཐུན་ཕྱོགས་བཤད་པར་བྱ་སྟེ། མདོ་ལས། གཟུགས་སྟོང་ཞེས་བྱ་བར་འདུ་ཤེས་ན་ཆགས་པའོ། །ཞེས་སོགས་དང༌། དུས་གསུམ་གྱི་ཆོས་རྣམས་ལ་འདས་པ་དང༌། མ་འོངས་པ་དང༌། ད་ལྟར་བྱུང་བའི་ཆོས་ཞེས་བྱ་བར་འདུ་ཤེས་ན་ཆགས་པའོ། །ཞེས་དང༌། དམིགས་པའི་ཚུལ་གྱིས་སྦྱིན་སོགས་དང༌། །དྲན་པ་ཉེར་བཞག་སོགས་ལ་སྤྱོད་ན་ཆགས་པའོ། ། ཞེས་པའི་དོན་གཟུགས་སོགས་ཕུང་པོ་སྟོང་ཉིད་དང༌། དུས་གསུམ་གཏོགས་པའི་ཆོས་རྣམས་དང། ། སྤྱིན་སོགས་བྱང་ཆུབ་ཕྱོགས་རྣམས་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་གསུངས་སོ། ། མཚན་མ་དང་དམིགས་པ་ལ་ཞེན་པའི་ཚུལ་གྱིས། གཟུགས་དང་ཚོར་བ་ལ་སོགས་པའི་ཕུང་པོ་སྟོང་པ་ཉིད་ཅེས་བྱ་བར་འདུ་ཤེས་པ་དང་བ། ཆགས་ཤིང་ཞེན་པའི་ཚུལ་གྱིས་དུས་གསུམ་དུ་གཏོགས་པའི་ཆོས་རྣམས་ལ་འདས་པའི་ཆོས་དང་མ་འོངས་པའི་ཆོས་དང་ད་ལྟར་བྱུང་བའི་ཆོས་ཞེས་བྱ་བར་འདུ་ཤེས་པ་དང༌། དམིགས་པའི་ཚུལ་གྱིས་སྦྱིན་པ་དང༌། ཚུལ་ཁྲིམས་ལ་སོགས་པ་ལ་སྤྱོད་པའི་འདུ་ཤེས་དང༌། དམིགས་པའི་ཚུལ་གྱིས་དྲན་པ་ཉེར་བཞག་ལ་སོགས་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་སྤྱོད་པའི་འདུ་ཤེས་ནི། ཆགས་ཤིང་ཞེན་པའི་སྒོ་ནས་འདུ་ཤེས་ཕྱིན་ཅི་ལོག་ཡིན་པས་དུས་གསུམ་མཉམ་པ་ཉིད་ཀྱི་ཤེར་ཕྱིན་ཟབ་མོའི་མི་མཐུན་པའི་ཕྱོགས་ཡིན་ནོ། །དེ་རྣམས་ཀྱིས་མི་མཐུན་ཞེས་པ་དེ་བཤད་ཟིན་ཏོ། ། ༤༽མཚན་མར་འཛིན་པའི་འདུ་ཤེས་དེའི་གཉེན་པོའི་ཕྱོགས་བཤད་པ། ད་ནི་མཚན་མར་འཛིན་པའི་འདུ་ཤེས་དེའི་གཉེན་པོའི་ཕྱོགས་བཤད་པར་བྱ་སྟེ། མདོ་ལས། ཐབས་ལ་མཁས་པའི་བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པ་ནི་འདི་སྙམ་དུ། བདག་གིས་སྦྱིན་པ་ཞིག་སྦྱིན་ནོ། །འདི་ལ་སྦྱིན་ནོ། །འདི་ལྟ་བུ་ཞིག་སྦྱིན་ནོ།།སྙམ་དུ་སེམས་པ་མེད་དོ། །ཞེས་སོཊ་ཀྱི་དོན་ནི། སྦྱིན་ལ་སོགས་ལ་ངར་འཛིན་མེད། །གཞན་དག་དེ་ལ་འཛུད་བྱེད་པ། །དེ་ནི་ཆགས་པའི་མཐའ་འགོག་པས། །རྒྱལ་ལ་སོགས་པ་ཆགས་པ་ཕྲ། །འཁོར་གསུམ་དུ་རྟོག་ཅིང་ཆགས་པས་ནི་ཆགས་པ་མེད་པའི་ཤེར་ཕྱིན་ལ་སྤྱོད་པར་མི་ནུས་པའི་ཕྱིར། སྦྱིན་པ་དང་ཚུལ་ཁྲིམས་ལ་སོགས་པ་ལ་འཁོར་གསུམ་ཏུ་རྟོག་པ་ངར་འཛིན་ཅིང་ཆགས་པ་མེད་པ་ནི་ཆགས་པ་ཐམས་ཅད་ཀྱི་གཉེན་པོ་ཡིན་ནོ། །རང་ཉིད་སྦྱིན་སོགས་ལ་དེ་ལྟར་སྤྱོད་ཅིང་གདུལ་བྱ་གཞན་དག་ཀྱང་འཁོར་གསུམ་དུ་མི་རྟོག་པའི་སྦྱིན་སོགས་ཀྱི་སྤྱོད་པ་ལ་འཛུད་པར་བྱེད་པའི་བྱང་ཆུབ་སེམས་དཔའ་དེ་ནི་ཆགས་པའི་མཐའ་ཐམས་ཅད་འགོག་པ་ཡིན་པས་ཆགས་པ་ཕྲ་ཞིང་ཕྲ་བ་ཡང་སྤོང་བ་ཡིན་ནོ། །ཆགས་པ་ཕྲ་མོ་དེ་གང་ཞེ་ན། །ཅི་ཙམ་དུ་མཚན་མར་ཡིད་ལ་བྱེད་པ་དེ་ཙམ་དུ་ཆགས་པ་ཡིན་པའི་ཕྱིར་རོ། །རྒྱལ་བ་སངས་རྒྱས་མཚན་མར་ཡིད་ལ་བྱས་པ་དང༌། སངས་རྒྱས་ཀྱི་དགེ་བའི་མཚན་མར་ཡིད་ལ་བྱས་པ་དང༌། སངས་རྒྱས་དེ་དག་གི་ཉན་ཐོས་ཀྱི་དགེ་བ་ལ་སོགས་མཚན་མར་ཡིད་ལ་བྱས་ནས་བྱང་ཆུབ་ཏུ་བསྔོ་ན་ཆགས་པ་ཕྲ་མོ་ཡིན་ནོ། །ཆགས་པ་དེ་ལྟ་བུས་ཀྱང་མ་གོས་པའི་ཤེར་ཕྱིན་དེ་ནི་ཟབ་པ་ཡིན་ཏེ་གང་གི་ཕྱིར། ཆོས་ཀྱི་ལམ་ནི་རང་བཞིན་གྱིས། །དབེན་པའི་ཕྱིར་ན་དེ་ཟབ་ཉིད། །ཆོས་ཀྱི་སྐུའི་ལམ་དུ་གྱུར་པའི་ཆོས་ཐམས་ཅད་ནི་རང་བཞིན་གྱིས་སྤྲོས་དང་ཆགས་པས་དབེན་པའི་ཕྱིར་ན་དུས་གསུམ་མཉམ་པ་ཉིད་ཀྱི་ཤེར་ཕྱིན་དེ་ཟབ་པ་ཉིད་ཡིན་ནོ། །ཟབ་མོ་དེ་ལྟ་བུ་ལ་སྤྱོད་པའི་བྱང་ཆུབ་སེམས་དཔའ་ཅི་ཤེས་པས་ཆགས་པ་ཐམས་ཅད་སྤོང་ཞེ་ན། ཆོས་རྣམས་རང་བཞིན་གཅིག་པ་སྟེ། ཤེས་པས་ཆགས་པ་སྤོང་བ་ཡིན་ནོ། །གཤིས་ལུགས་དོན་དམ་ཡོངས་གྲུབ་ཀྱི་ཆོས་རྣམས་མ་བྱས་པའི་རང་བཞིན་འོད་གསལ་དུ་གཅིག་པ་ནི་མི་རྟོག་ཡེ་ཤེས་ཀྱིས་མངོན་གསུམ་དུ་སོ་སོར་རིག་པའི་ཚུལ་གྱིས་ཤེས་པས་ཆགས་པའི་རྣམ་པ་ཐམས་ཅད་སྤོང་བ་ཡིན་ནོ། །གལ་ཏེ་མཚན་མ་ལ་སྤྱོད་པའི་བྱང་ཆུབ་སེམས་དཔས་ཀྱང་དོན་དམ་པའི་རང་བཞིན་དུ་གཅིག་པའི་ཤེར་ཕྱིན་དེ་རྟོགས་པས་ཆགས་པ་ཐམས་ཅད་སྤོང་ངོ༌། །ཞེ་ན། མཐོང་བ་ལ་སོགས་བཀག་པ་ཡིས། །དེ་ནི་རྟོག་པར་དཀའ་བར་བཤད། །མཚན་འཛིན་གྱི་བློས་ཤེར་ཕྱིན་དེ་མཐོང་བ་དང་རྟོག་པ་དང་ཤེས་པ་ལ་སོགས་པ་བཀག་པ་ཡིས། ཤེར་ཕྱིན་ཟབ་མོ་དེ་ནི་དམིགས་པ་ལ་ཆགས་པའི་གང་ཟག་གིས་རྟོགས་པརདཀའ་པར་བཤད་པ་ཡིན་ནོ། །རྟོགས་པར་དཀའ་བ་ཙམ་དུ་མ་ཟད་མཚན་འཛིན་ཅན་གྱི་བསམ་པའི་ཡུལ་ལས་ཀྱང་འདས་པར་སྟོན་པ། གཟུགས་ལ་སོགས་པས་མི་ཤེས་ཕྱིར། །དེ་ནི་བསམ་མི་ཁྱབ་པར་འདོད། །མཚན་འཛིན་གྱིས་བསྡུས་པའི་གཟུགས་དང་རྣམ་པར་ཤེས་པ་ལ་སོགས་པས་མི་ཤེས་པའི་ཕྱིར། སྲིད་ཞི་མཉམ་ཉིད་ཀྱི་ཤེར་ཕྱིན་ཟབ་མོ་དེ་ནི་དམིགས་པ་ཅན་གྱི་བསམ་གྱིས་མི་ཁྱབ་པར་འདོད་ཅིང་བསྟན་ཏོ། དེ་དག་གི་མཇུག་བསྡུ་ནི། དེ་ལྟར་ཀུན་ཤེས་ཉིད་ལུགས་ལ། །མི་མཐུན་གཉེན་པོའི་ཕྱོགས་དག་གི །རྣམ་པར་དབྱེ་བ་མ་ལུས་པ། །ཇི་སྐད་བཤད་པ་འདི་ཤེས་བྱ། གོང་དུ་བཤད་པ་དེ་ལྟར་ཀུན་ཤེས་པ་ཉིད་ཀྱི་ལུགས་སམ་སྐབས་ལ། དུས་གསུམ་མཉམ་ཉིད་ཀྱི་ཤེར་ཕྱིན་ཟབ་མོའི་མི་མཐུན་པའི་ཕྱོགས་འཁོར་གསུམ་དུ་རྟོགས་པའི་ཆགས་པ་དང༌། ཆགས་པ་དེའི་གཉེན་པོ་འཁོར་གསུམ་དུ་རྣམ་པར་མི་རྟོག་པ་ཤེས་རབ་ཡིན་ལུགས་ཀྱི་ཆོས་ཀྱི་རང་བཞིན་གཅིག་པར་ཤེས་པའི་ཕྱོགས་དག་གི་རྣམ་པར་དབྱེ་བ་མ་ལུས་པར་སྔར་ཇི་སྐད་བཤད་པ་འདི་མཐའ་དག་ཤེས་པར་བྱའོ། །དེ་རྣམས་ཀྱིས་གཉེན་པོའི་ཕྱོགས་དག་དང༌། ཞེས་པ་དེ་བཤད་ཟིན་ཏོ། ། ༥༽ཤེར་ཕྱིན་ཟབ་མོའི་རྣལ་འབྱོར་བཤད་པ། ད་ནི་ཤེར་ཕྱིན་ཟབ་མོའི་རྣལ་འབྱོར་བཤད་པར་བྱའོ། །མདོ་ལས། གཟུགས་སོགས་རྟག་ཅེས་བྱ་བ་དང༌། མི་རྟག་ཞེས་བྱ་བ་ལ་སོགས་པ་དང༌། གཟུགས་སོགས་མ་རྫོགས་ཞེས་བྱ་བ་དང༌། རྫོགས་ཤེས་བྱ་བ་དང༌། གཟུགས་སོགས་ལ་ཆགས་ཞེས་བྱ་བ་དང་མ་ཆགས་ཞེས་བྱ་བར་མི་སྤྱོད་ན་ཤེར་ཕྱིན་ལ་སྤྱོད་དོ། །ཞེས་སོགས་ཀྱི་དོན། གཟུགས་སོགས་དེ་མི་རྟག་སོགས་དང་དེ་མ་རྫོགས་དང༌། རབ་རྫོགས་དང༌། དེ་ལ་ཆགས་པ་མེད་ཉིད་ལ། །སྤྱོད་པ་བཀག་པས་སྦྱོར་བ་དང༌། །མི་འགྱུར་བྱེད་པོ་མེད་ཉིད་དང༌། །བྱ་དཀའ་རྣམ་གསུམ་སྦྱོར་བ་དང༌། །སྐལ་པ་ཇི་བཞིན་འབྲས་ཐོབ་པས། །འབྲས་ཡོད་འདོད་པ་དེ་དང་ནི། །གཞན་ལས་རག་ལས་མིན་གང་དང༌། །སྣང་བ་རྣམ་བདུན་ཤེས་བྱེད་དོ། །རྣལ་འབྱོར་འདི་ཉི་ཁྲིའི་ལེའུ་ཉེར་བརྒྱད་པས་སྟོན་ནོ། །སྐབས་འདིར་ཤེར་ཕྱིན་ཟབ་མོའི་སྦྱོར་བ་གཅིག་དང༌། ཤེར་ཕྱིན་མི་འགྱུར་བ་དང༌། དེ་ལ་བྱེད་པ་པོ་མེད་པ་དང༌། བྱང་ཆུབ་སེམས་དཔའི་བྱ་བ་དཀའ་བ་རྣམ་པ་གསུམ་དང༌། ཤེར་ཕྱིན་དེ་ལ་བསླབས་པས་རྒྱུན་ཞུགས་ལ་སོགས་པའི་འབྲས་བུ་ཡོད་པ་དང༌། ཤེར་ཕྱིན་གྱི་རྣལ་འབྱོར་ཟབ་མོ་ལ་བརྩོན་པ་དེ་གང་ཟག་གཞན་གྱི་བསྲུང་བ་ལ་རག་མ་ལས་པ་དང༌། རག་མ་ལས་པ་དེའི་ཤེས་བྱེད་དེ་དོན་ཚན་པ་བདུན་སྟོན་ནོ། །འདི་ཐམས་ཅད་སྦྱོར་བར་འཆད་པ་ནི་མི་རིགས་ཏེ། སྦྱོར་བ་ནི་རྣལ་འབྱོར་ཡིན་ལ་འདིར་རྣལ་འབྱོར་མ་ཡིན་པས་དེའི་ཚན་པ་དྲུག་ཡོད་པའི་ཕྱིར་རོ། །སྦྱོར་བ་མ་ཡིན་པ་སྦྱོར་བའི་སྐབས་སུ་སྟོན་པར་མི་འོས་པ་ནི་མ་ཡིན་ཏེ། དོན་གྱི་གཙོ་བོ་མ་ཡིན་ཀྱང་གཙོ་བོ་བསྟན་པའི་ཞར་ལ་སྐབས་སུ་བབ་པའི་དོན་དུ་མ་སྟོན་པ་ནི་ཐམས་ཅད་ལ་མཐུན་སྣང་དུ་གྲུབ་པོ། །དེས་ན་གཟུགས་སོགས་རྟག་པ་དང༌། མི་རྟག་པ་ལ་སོགས་པ་དང༌། སློབ་པའི་ཚེ་ཆོས་ཉིད་ཀྱི་གཟུགས་སོགས་མ་རྫོགས་པ་དང༌། མི་སློབ་པ་འབྲས་བུའི་ཚེ་རྫོགས་པ་དང༌། གཟུགས་དེ་ལ་ཆགས་པ་དང༌། ཆགས་པ་མེད་པ་ཉིད་ལ་དམིགས་པའི་ཚུལ་གྱིས་སྤྱོད་ཅིང་རྣལ་འབྱོར་དུ་བྱེད་པ་བཀག་པས། མི་དམིགས་པའི་ཚུལ་གྱི་ཆོས་ཉིད་ཡོངས་གྲུབ་ཀྱི་གཟུགས་སོགས་རྣལ་འབྱོར་དུ་བྱེད་ཅིང་སྦྱོར་བ་དང་སྤྱོད་པ་ནི་ཤེར་ཕྱིན་ཟབ་མོའི་རྣལ་འབྱོར་ཡིན་ནོ། ། བསྒོམ་བྱའི་ཤེར་ཕྱིན་ཆོས་ཀྱི་དབྱིངས་དེ་བསྟན་པ་དང་མ་བསྟན་པས་འཕེལ་འགྲུབ་ཏུ་མི་འགྱུར་བ་དང༌། ལེགས་ཉེས་བརྗོད་ཀྱང་དེ་ལ་ཆགས་སྡང་གི་བྱེད་པ་པོ་མེད་པ་ཉིད་དང༌། ནམ་མཁའ་ལྟ་བུའི་ཤེར་ཕྱིན་དེ་བསྟན་པའི་ཚེ་སེམས་མ་ཞུམ་པ་བྱ་དཀའ་བ་དང༌། ནམ་མཁའ་ལྟ་བུ་དེ་ལ་བརྩོན་པ་བྱ་དཀའ་བ་དང༌། ནམ་མཁའ་ལྟ་བུའི་བྱང་ཆུབ་ལས་མི་ལྡོག་པ་བྱ་དཀའ་བ་སྟེ། བྱ་དཀའ་བ་གསུམ་པོ་དེ་ལ་བྱང་ཆུབ་དེ་སྦྱོར་ཞིང་གོ་ཆ་བགོས་པའོ། །མདོ་ལས། བྱང་ཆུབ་སེམས་དཔའ་ཤེར་ཕྱིན་བསྟན་པའི་ཚེ་མི་ཞུམ་པ་དང་དེ་ལ་བརྩོན་པ་དང༌། བླ་མེད་བྱང་ཆུབ་ལས་མི་ལྡོག་པ་ནི་དཀའ་བ་བགྱིད་པའོ། །ཞེས་གསུངས་པའི་དོན་ཏོ། །དེ་ནས་དེ་ཅིའི་སླད་དུ་ཞེ་ན། ཤེར་ཕྱིན་བསྒོམ་པ་ནི་ནམ་མཁའ་བསྒོམ་པ་སྟེ་ཞེས་སོགས་ཀྱིས་བྱ་དཀའ་བ་གསུམ་པོ་དེ་དཀའ་བའི་རྒྱུ་མཚན་འབའ་ཞིག་མདོ་ལས་བྱུང་ངོ༌། །དེར་འདུས་པའི་དགེ་སློང་གཅིག་འདི་སྙམ་དུ་སྐྱེ་འགག་མེད་པའི་ཤེར་ཕྱིན་གང་ལ་བསླབས་ན་ཇི་ལྟ་བ་བཞིན་དུ་འབྲས་བུ་ཐོབ་པར་འདུག་པས། ཚུལ་ཁྲིམས་ལ་སོགས་པའི་ཕུང་པོ་ལྔ་དང་རྒྱུན་ཞུགས་ལ་སོགས་པའི་འབྲས་བུ་བཞི་དང་རང་བྱང་ཆུབ་དང་སངས་རྒྱས་དང་དཀོན་མཆོག་གསུམ་དང་ཆོས་ཀྱི་འཁོར་ལོ་བསྐོར་བའི་འབྲས་བུ་ཡང་ཡོད་པའི་བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །སྙམ་དུ་འདོད་པ་དེ་དང་ནི། ཤེར་ཕྱིན་དེ་ལ་གནས་པའི་བྱང་ཆུབ་སེམས་དཔའ་བརྒྱ་བྱིན་ལ་སོགས་པ་གང་ཟག་གཞན་གྱིས་བསྲུང་བ་ལ་རག་ལས་པ་མ་ཡིན་ཏེ། རྒྱུ་གང་གི་ཕྱིར་དང་དཔེ་ཇི་ལྟ་བུ་ཞེ་ན། ཤེར་ཕྱིན་དེ་ལ་གནས་པ་དེ་ཉིད་དེའི་བསྲུང་བའི་མཆོག་ཡིན་པའི་ཕྱིར་དང༌། སྒྱུ་མ་དང༌། སྨིག་རྒྱུ་དང་རྨི་ལམ་དང༌། སྒྲ་བརྙན་དང༌། མི་གཡོ་དང༌། ཆུ་ཟླ་དང༌། སྤྲུལ་པའི་སྣང་བ་རྣམ་པ་བདུན་ལ་བསྲུང་བ་བསྐྱབ་པར་མི་ནུས་པ་བཞིན་དུ། ཞེས་ཤེས་བྱེད་ཀྱི་དཔེར་བཀོད་པ་ཉིད་དོ། །གཞན་དག་གིས་ནི་སྐབས་འདི་མདོ་དང་མི་མཐུན་པའི་བཤད་པ་བྱས་ཡོད་དེ། དེ་རྣམས་ཀྱིས་སྦྱོར་དང་ཞེས་པ་དེ་བཤད་ཟིན་ཏོ། ། ༦༽རྣལ་འབྱོར་སྦྱོར་བའི་ཡན་ལག་ཕན་ཡོན་མཉམ་པ་ཉིད་བཤད་པ། ད་ནི་རྣལ་འབྱོར་རྣམ་པར་སྦྱོར་བའི་ཡན་ལག་ཕན་ཡོན་ཆོས་ཐམས་ཅད་མཉམ་པ་ཉིད་བཤད་པར་བྱའོ། །མདོ་ལས་ཤེར་ཕྱིན་ལ་སྤྱོད་པས་རྨི་ལམ་དང་སྒྱུ་མ་ལྟ་བུའི་ཆོས་རྣམས་ཡོངས་སུ་ཤེས་ཞེས་སོགས་དང༌། གཟུགས་དང་གཟུགས་བདག་གི་དང༌། གཟུགས་ལ་སོགས་དང་གཟུགས་ཀྱི་མཚན་མར་རློམ་སེམས་སུ་མི་བྱེད་ཞེས་སོགས་ཀྱི་དོན། གཟུགས་ལ་སོགས་ལ་རློམ་མེད་པ། རྣམ་བཞི་དེ་ཡི་མཉམ་པ་ཉིད། དེ་ལ་གཟུགས་སོགས་བྱེད་པའི་མཚན་ཉིད་ལ་སོགས་པའི་དངོས་པོར་རློམ་སེམས་སུ་མེད་པ་དང༌། གཟུགས་སོགས་བདག་གི་ཞེས་བྱ་བ་རྗེ་ཁོལ་གྱི་དངོས་པོར་རློམ་སེམས་མེད་པ་དང༌། གཟུགས་སོགས་ཞེས་བྱ་བ་ལ་རྟེན་དང་བརྟེན་པའི་དངོས་པོར་རློམ་སེམས་མེད་པ་དང༌། གཟུགས་སོགས་ཀྱི་མཚན་མར་ཞེས་བྱ་བ་བརྡར་བརྟག་པའི་དངོས་པོར་རློམ་སེམས་མེད་པ་སྟེ། རྣམ་པ་བཞི་པོ་དེ་ནི་སྦྱོར་བ་དེའི་ཕན་ཡོན་ཆོས་ཐམས་ཅད་རྨི་ལམ་དང་སྒྱུ་མ་དང༌། སྨིག་རྒྱུ་དང༌། སྒྲ་བརྙན་དང༌། མིག་ཡོར་དང༌། ཆུ་ཟླ་དང༌། སྤྲུལ་པ་ལྟ་བུར་མཉམ་པ་ཉིད་དུ་ཡོངས་སུ་ཤེས་པ་ཡིན་ནོ། །དེ་རྣམས་ཀྱིས། དེའི་མཉམ་པ་ཉིད་དང་ཞེས་པ་དེ་བ་ཤད་ཟིན་ཏོ། ། ༧ ཀུན་ཤེས་ཚུལ་མཐོང་བའི་ལམ་གང་ཡིན་བཤད་པ། ད་ནི་ཀུན་ཤེས་ཚུལ་མཐོང་བའི་ལམ་གང་ཡིན་པ་དེ་བཤད་པར་བྱའོ། །འདི་ལ་བདེན་བཞིའི་སྒོ་ནས་མདོར་བསྟན་པ་དང༌། སྐད་ཅིག་མའི་སྒོ་ནས་རྒྱས་པར་བཤད་པ་གཉིས་ལས་དང་པོ་ནི། སྡུག་བསྔལ་ལ་སོགས་བདེན་པ་ལ། ཆོས་ཤེས་རྗེས་སུ་ཤེས་པ་དང༌། །བཟོད་ཤེས་སྐད་ཅིག་བདག་ཉིད་འདི། །ཀུན་ཤེས་ཚུལ་ལ་མཐོང་བའི་ལམ། །ཞེས་པ་ལ་སྡུག་བསྔལ་ལ་སོགས་པ་ཀུན་འབྱུང་དང་འགོག་པ་དང་ལམ་གྱི་བདེན་པ་བཞི་པོ་རེ་རེ་ལ་ཡང་ཆོས་ཤེས་པའི་བཟོད་པ་དང་ཆོས་ཤེས་པ་དང༌། རྗེས་སུུ་ཤེས་པའི་བཟོད་པ་དང༌། རྗེས་སུུ་ཤེས་པ་བཞི་བཞིའོ། །དེ་ལྟར་ན་ཤེས་པའི་སྐད་ཅིག་བཞི་བཞི་བཅུ་དྲུག་གི་བདག་ཉིད་འདི་ཀུན་ཤེས་པ་ཉིད་ཀྱི་ཚུལ་ལམ་རང་བཞིན་ལ་མཐོང་བའི་ལམ་ཡིན་ནོ། །གཉིས་པ་རྒྱས་པར་བཤད་པ་ནི། །གཟུགས་རྟག་མ་ཡིན་མི་རྟག་མིན། ། མཐའ་ལས་འདས་དང་རྣམ་དག་དང༌། །མ་སྐྱེས་མ་འགག་ལ་སོགས་དང༌། །མཁའ་འདྲ་ཆགས་པ་སྤངས་པ་དང༌། །ཡོངས་སུ་འཛིན་ལས་གྲོལ་བ་དང༌། །ངོ་བོ་ཉིད་ཀྱིས་བརྗོད་མེད་དང༌། གང་ཕྱིར་འདི་དོན་བརྗོད་པ་ཡིས། །གཞན་ལ་སྦྱིན་དུ་མེད་པ་དང༌། །དམིགས་པ་མེད་པར་བྱེད་པ་དང༌།། ཤིན་ཏུ་རྣམ་དག་ནད་མི་འབྱུང༌། །ངན་སོང་ཆད་དང་འབྲས་བུ་ནི། །མངོན་དུ་བྱ་ལ་མི་རྟོག་ཉིད། ། མཚན་མ་དག་དང་མ་འབྲེལ་དང༌། །དངོས་དང་མིང་དང་གཉིས་པོ་ལ། །ཤེས་པ་སྐྱེ་བ་མེད་པ་ནི།། ཀུན་ཤེས་ཉིད་ཀྱི་སྐད་ཅིག་མ། །ཞེས་པ་ལ། སྡུག་བསྔལ་ལ་ཆོས་ཤེས་པའི་བཟོད་པ་ནི་ཡུལ་ཆོས་ཉིད་ཀྱི་གཟུགས་སོགས་རྟག་མི་རྟག་ལ་སོགས་ཀྱི་སྤྲོས་པ་མ་ཡིན་པའི་ཕྱིར་ཡུལ་ཅན་སྡུག་བསྔལ་ལ་ཆོས་ཤེས་པའི་བཟོད་པ་རྟག་མི་རྟག་སོགས་ཀྱི་སྤྲོས་པ་དང་བྲལ་བའི་ཡེ་ཤེས་དང༌། ཡུལ་ཆོས་ཉིད་ཀྱི་གཟུགས་སོགས་དུས་གསུམ་གྱི་མཐའ་ལས་འདས་པའི་ཕྱིར་ཡུལ་ཅན་སྡུག་བསྔལ་ལ་ཆོས་ཤེས་པ་མཐའ་ཐམས་ཅད་ལས་འདས་པའི་ཡེ་ཤེས་དང༌། །ཡུལ་ཆོས་ཉིད་ཀྱི་གཟུགས་སོགས་ཤིན་ཏུ་རྣམ་པར་དག་པའི་ཕྱིར་ཡུལ་ཅན་སྡུག་བསྔལ་ལ་རྗེས་སུ་ཆགས་པའི་བཟོད་པ་རྣམ་པར་དག་པའི་ཡེ་ཤེས་དང༌། ཡུལ་ཆོས་ཉིད་ཀྱི་གཟུགས་སོགས་མ་སྐྱེས་ཤིང་མ་འགག་པ་དང་ཉོན་མོངས་རྣམ་བྱང་ལ་སོགས་མེད་པའི་ཕྱིར། ཡུལ་ཅན་སྡུག་བསྔལ་ལ་རྗེས་སུ་ཤེས་པ་མ་སྐྱེས་མ་འགག་པ་ལ་སོགས་པའི་ཡེ་ཤེས་ཏེ། དེ་ལྟར་ན་སྡུག་བསྔལ་གྱི་བདེན་པའི་སྐད་ཅིག་མ་བཞིའོ། །ཡུལ་དོན་དམ་གྱི་གཟུགས་སོགས་ནམ་མཁའ་དང་འདྲ་བར་དག་པའི་ཕྱིར། ཡུལ་ཅན་ཀུན་འབྱུང་ལ་ཆོས་ཤེས་པའི་བཟོད་པ་ནམ་མཁའ་དང་འདྲ་བར་དག་པའི་ཡེ་ཤེས་དང༌། ཡུལ་དོན་དམ་གྱི་གཟུགས་སོགས་ཆགས་པ་སྤངས་པའི་ཕྱིར་ཡུལ་ཅན་ཀུན་འབྱུང་ལ་ཆོས་ཤེས་པའི་ཆགས་པ་ཐམས་ཅད་སྤངས་པའི་ཡེ་ཤེས་དང༌། ཡུལ་ཅན་དོན་དམ་གྱི་གཟུགས་སོགས་གཟུང་དུ་མེད་པའི་ཕྱིར་ཡུལ་ཅན་ཀུན་འབྱུང་ལ་རྗེས་སུ་ཤེས་པའི་བཟོད་པ་ཡོངས་སུ་འཛིན་པ་ཐམས་ཅད་ལས་གྲོལ་པའི་ཡེ་ཤེས་དང༌། ཡུལ་དོན་དམ་གྱི་གཟུགས་སོགས་ངོ་བོ་ཉིད་ཀྱིས་བརྗོད་པའི་བདག་ཉིད་མེད་པའི་ཕྱིར་ཡུལ་ཅན་ཀུན་འབྱུང་ལ་རྗེས་སུ་ཤེས་པ་བརྗོད་པའི་ངོ་བོར་མེད་པའི་ཡེ་ཤེས་ཏེ། དེ་ལྟར་ཀུན་འབྱུང་གི་བདེན་པའི་སྐད་ཅིག་མ་བཞིའོ། །གང་གི་ཕྱིར་ཡུལ་འགོག་བདེན་ཟབ་མོ་དང་ཡུལ་ཅན་འགོག་པ་ཆོས་ཤེས་པའི་བཟོད་པ་དག་ཚིག་གི་སྤྱོད་ཡུལ་འདས་པ་དེའི་ཕྱིར་ཡུལ་དང་ཡུལ་ཅན་འདི་དག་གི་དོན་བརྗོད་པ་ཙམ་གྱིས་གཞན་གྱི་རྒྱུད་ལ་མངོན་གསུམ་དུ་བཞིན་ཏུ་མེད་པ་དང༌། ཡུལ་འགོག་བདེན་ཟབ་མོ་དམིགས་སུ་མེད་པའི་ཕྱིར། ཡུལ་ཅན་འགོག་པ་ལ་ཆོས་ཤེས་པ་དམིགས་པ་ཐམས་ཅད་མེད་པར་བྱེད་པའི་ཡེ་ཤེས་དང༌། ཡུལ་འགོག་བདེན་ཟབ་མོ་ཤིན་ཏུ་རྣམ་པར་དག་པའི་ཕྱིར། ཡུལ་ཅན་འགོག་པ་ལ་རྗེས་སུ་ཤེས་པའི་བཟོད་པ་ཤིན་ཏུ་རྣམ་པར་དག་པའི་ཡེ་ཤེས་དང༌། འགོག་པའི་རྗེས་སུ་ཤེས་པ་ནི་མིག་གི་ནད་ལ་སོགས་པ་ནད་ཐམས་ཅད་སེལ་ཞིང་མི་འབྱུང་པའི་ཡེ་ཤེས་དེ། དེ་ལྟར་འགོག་པའི་བདེན་པའི་སྐད་ཅིག་མ་བཞི་འོ། ། ལམ་ལ་ཆོས་ཤེས་པའི་བཟོད་པ་ནི་ངན་སོང་ཆད་ཅིང་ལེགས་པ་ཐམས་ཅད་འབྱིན་པའི་ཡེ་ཤེས་དང༌། །ལམ་ལ་ཆོས་ཤེས་པ་ནི་ཤེར་ཕྱིན་རིན་པོ་ཆེས་མངོན་མཐོ་དང་ངེས་ལེགས་ཀྱི་འབྲས་བུ་ནི་མངོན་གསུམ་དུ་བྱ་བ་ལ་ཡང་མི་རྟོག་པའི་ཡེ་ཤེས་ཉིད་དང༌། ཡུལ་ཆོས་ཀྱི་དབྱིངས་མཚན་མ་དང་མ་འབྲེལ་བའི་ཕྱིར་ཡུལ་ཅན་དུ་ལམ་ལ་རྗེས་སུ་ཤེས་པའི་བཟོད་པ་མཚན་མ་དག་དང་མ་འབྲེལ་བའི་ཡེ་ཤེས་དང༌། ལམ་ལ་རྗེས་སུ་ཤེས་པ་ནི་དངོས་བརྗོད་བྱ་དང་མང་བརྗོད་བྱེད་དང༌། དེ་གཉིས་པོ་གཉིས་ཀ་ལ་དམིགས་པའི་མཚན་འཛིན་གྱི་ཤེས་པ་སྐྱེ་བ་མེད་པའི་ཡེ་ཤེས་ཏེ། དེ་ལྟར་ལམ་གྱི་བདེན་པའི་སྐད་ཅིག་མ་བཞིའོ། །སྐབས་འདིའི་ཡུལ་དང་ཡུལ་ཅན་ཐམས་ཅད་གཉིས་སུ་མེད་པའི་ཡེ་ཤེས་དུས་གསུམ་མཉམ་པ་ཉིད་ཀྱི་ཤེར་ཕྱིན་ཡིན་པའི་ཕྱིར་གཟུང་བ་འཛིན་བཞིན་དུ་སོ་སོ་མི་བསམ་མོ། །བྱང་ཆུབ་སེམས་དཔའི་མཐོང་ལམ་དངོས་སུ་བསྟན་པས་ཐེག་པ་འོག་མའི་མཐོང་ལམ་ཡང་དོན་གྱིས་གོ་བར་བྱ་སྟེ། ཐེག་པ་ཐམས་ཅད་ཀྱི་ཡོན་ཏན་བསྡུས་པའི་ཕྱིར། དེ་ལྟར་བསྟན་པའི་སྐད་ཅིག་མ་རྣམས་ནི་ཀུན་ཤེས་པའི་ངོ་བོར་གྱུར་པ་ཉིད་ཀྱི་མཐོང་ལམ་གྱིས་སྐདཅིག་མ་བཅུ་དྲུག་བསྟན་པ་ཡིན་ནོ། །དེ་རྣམས་ཀྱིས། ཉན་ཐོས་ལ་སོགས་མཐོང་བའི་ལམ། །དེ་འདྲ་ཀུན་ཤེས་ཉིད་དུ་འདོད། །ཅེས་པ་བཤད་ཟིན་ཏོ། །དངོས་པོ་བརྒྱད་ལས་ཐམས་ཅད་ལམ་ཤེས་ཉིད་ཀྱི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། ། མཁྱེན་པ་གསུམ་གྱི་མཇུག་བསྡུ་བ། སྔར་བཤད་པའི་མཁྱེན་པ་གསུམ་གྱི་མཇུག་བསྡུ་བ་ནི། དེ་ལྟར་འདི་དང་ཡང་འདི་དང༌། ། ཡང་འདི་ཡིན་ཏེ་རྣམ་གསུམ་པོ། །འདི་ནི་གནས་སྐབས་གསུམ་པོ་དག །རྫོགས་པར་ཡོངས་སུ་བསྟན་པ་ཡིན། །སྔར་བཤད་པ་དེ་ལྟར་རྣམ་པ་ཐམས་ཅད་མཁྱེན་ཉིད་འདི་དང༌། ཡང་ལམ་ཤེས་པ་ཉིད་འདི་དང་ཡང་ཐམས་ཅད་ཤེས་པ་ཉིད་འདི་ཡིན་ཏེ། མཁྱེན་པ་རྣམ་པ་གསུམ་པོ་ཡོངས་སུ་བསྟན་པ་འདི་ནི། མཁྱེན་པའི་གནས་སྐབས་གསུམ་པོ་དག་ཀྱང་རྫོགས་པར་ཡོངས་སུ་བསྟན་པ་ཡིན་ནོ། ། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་པ་མདོ་ལུགས་མ་ཞེས་བྱ་བ་ལས་སྐབས་གསུམ་པའི་འགྲེལ་པའོ། ། བཞི་བ། རྣམ་རྫོགས་སྦྱོར་བ་རྒྱས་པར་བཤད་པ། ད་ནི་རྣམ་པ་ཀུན་མངོན་པར་རྫོགས་པར་རྟོགས་པའི་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པར་བྱ་སྟེ། འདི་ལ་བཅུ་ཡོད་པ་ལས། ༡༽རྣམ་པ་བཤད་པ། དང་པོ་རྣམ་པ་སྟོན་པ་ལ་མདོར་བསྟན་པ་དང་རྒྱས་པར་བཤད་པ་གཉིས་ལས། ༡ རྣམ་པ་མདོར་བསྟན་པ། དང་པོ་ནི། གཞི་ཤེས་པ་ཡི་བྱེ་བྲག་རྣམས། །རྣམ་པ་ཞེས་བྱ་མཚན་ཉིད་དེ། །ཀུན་མཁྱེན་ཉིད་ནི་རྣམ་གསུམ་ཕྱིར། །དེ་ནི་རྣམ་པ་གསུམ་དུ་འདོད། །ཞེས་སོ། །རྣམ་པ་འདི་རྣམས་སྦྱོར་བ་བཞིས་གང་ལ་བསླབ་པར་བྱ་བའི་ཡུལ་མཁྱེན་པ་གསུམ་གྱི་བདག་ཉིད། གཞི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་དབྱིངས་ཟབ་མོ་གཅིག་གི་རྣམ་པ་ཡིན་པའི་ཕྱིར། ལམ་ཆོས་སུ་འཆད་པ་དང་བཟང་ངན་དུ་མར་འབྱེད་པ་དང༌། སྒོམ་ཚུལ་སྣ་ཚོགས་ཀྱི་ཆོས་སུ་འཆད་པ་ནི་མདོ་དང་མི་མཐུན་ནོ། །མདོ་ལས། རབ་འབྱོར་ཀྱི་དམ་བཅས་པ་དང་བཅོམ་ལྡན་འདས་ཀྱིས་གཏན་ཚིག་གསུངས་པའི་སྒོ་ནས་ཤེར་ཕྱིན་གཅིག་འབའ་ཞིག་གི་རྣམ་པ་བསྟན་པའི་ཕྱིར་རོ། །བསྟན་བཅོས་སུ་དམ་བཅར་གསུངས་པ་རྣམས་བྱུང་ངོ༌། །སྐབས་འདི་ཉི་ཁྲིའི་ལེའུ་ཉེར་དགུ་པ་ནས་འབྱུང་ངོ༌། །དྲན་པ་ཉེར་བཞག་ལ་སོགས་པ་རྣམས་ཀྱི་སྒོམ་ཚུལ་ཚོགས་སྒྲུབ་ཀྱི་སྐབས་སུ་འཆད་པ་མདོའི་དགོངས་པ་ཡིན་པས། དེར་མདོ་ཇི་ལྟ་བ་བཞིན་དུ་ཞི་བ་ལ་རྒྱས་པར་ཕྱེས་ནས་ཡོད་པ་རྣམས་ལ་བལྟ་བར་བྱའོ། །གཞི་དང་ལམ་དང་འབྲས་བུ་གསུམ་ལས་འདི་ནི་སློབ་པ་ལམ་གྱི་གནས་སྐབས་དང༌། མ་འདྲེས་པ་གཞིའི་ཤེར་ཕྱིན་ཟབ་མོ་དེ་བཞིན་ཉིད་ཀྱི་རྣམ་པ་ཡུལ་མཁྱེན་པ་གསུམ་གྱི་ངོ་བོ་སྟོན་ལ། མཚན་ཉིད་ཀྱི་སྐབས་སུ་འབྲས་བུའི་མཁྱེན་པ་གསུམ་གྱི་ངོ་བོ་སྟོན་ཅིང༌། ལམ་གྱི་མཁྱེན་པ་གསུམ་ནི་སྦྱོར་བ་བཞི་དང་སྒྲུབ་པ་བཞི་ལ་སོགས་པ་ཡིན་ནོ། །སྐབས་དང་པོ་གསུམ་པོ་ནི་རྒྱལ་བའི་ཡུམ་གཅིག་ཉིད་གང་ཟག་གསུམ་གྱི་མངོན་རྟོགས་མི་འདྲ་བ་གསུམ་དང་འབྲེལ་པའི་དབང་གིས་གནས་སྐབས་མི་གཅིག་པ་གསུམ་དུ་བསྟན་ཏོ། །རྣམ་པ་འདི་རྣམས་ལམ་བདེན་གྱི་གནས་སྐབས་ནི་མ་ཡིན་ཏེ། ལམ་གྱི་བདེན་པ་དང་རྗེས་སུ་མཐུན་པར་ཕྱེ་ཞེས་གསུངས་པའི་ཕྱིར་རོ། །དེས་ན་གཞི་ཤེས་པ་ཡི་བྱེ་བྲག་རྣམས། །ཞེས་སོགས་ཀྱི་དོན་ནི། སློབ་པ་ལམ་གྱི་གནས་སྐབས་དང་མ་འདྲེས་པ་གཞི་ཤེས་རབ་ཀྱི་ཕ་རོལ་ཏུ་ཕྱིན་པའི་བྱེ་བྲག་རྣམས་སྟོན་པ་ལ་འདིར་རྣམ་པ་ཞེས་བྱ་བའི་མིང་གི་བྱེ་ཕྲག་དེ་རྣམས་ཀྱི་མཚན་ཉིད་དམ་ངོ་བོ་སྟོན་ཏོ། །དེ་རྣམས་ཀྱང་ཀུན་མཁྱེན་པ་ཉིད་ནི་རྣམ་གསུམ་དུ་ཕྱེ་བའི་ཕྱིར། རྣམ་པར་དེ་རྣམས་ནི་མཁྱེན་པའི་རྣམ་པ་ཚན་པ་གསུམ་དུ་འདོད་ཅིང་སྟོན་ཏོ། ། ༢ རྒྱས་པར་བཤད་པ། གཉིས་པ་རྒྱས་པར་བཤད་པ་ལ་མཁྱེན་པ་གསུམ་ལས། དང་པོ་ཐམས་ཅད་ཤེས་པ་ཉིད་ཀྱི་རྣམ་པ་ཉེར་བདུན་ནི་མེད་པའི་རྣམ་པ་ནས་བཟུང་སྟེ། མི་གཡོ་བའི་རྣམ་པའི་བར། བདེན་པ་སོ་སོ་ལ་བཞི་དང༌། ལམ་ལ་དེ་ནི་བཅོ་ལྔར་བཤད་པ་རྣམས་འདི་ལྟ་སྟེ། ནམ་མཁའ་མེད་པའི་ཕྱིར་ཤེར་ཕྱིན་འདི་ནི་མེད་པའི་ཕ་རོལ་ཏུ་ཕྱིན་པ་དང༌། ཆོས་ཐམས་ཅད་མཉམ་པ་ཉིད་ཀྱི་ཕྱིར། ཤེར་ཕྱིན་འདི་ནི་མཉམ་ཉིད་ཀྱི་དང༌། མཐའ་ལས་འདས་པ་སྟོང་པ་ཉིད་ཀྱི་ཕྱིར། ཤེར་ཕྱིན་འདི་ནི་དབེན་པའི་དང༌། ཆོས་ཐམས་ཅད་དམིགས་སུ་མེད་པའི་ཕྱིར། ཤེར་ཕྱིན་འདི་ནི་ཐུབ་པ་མེད་པའི་ཕ་རོལ་ཏུ་ཕྱིན་པ་སྟེ། བཞི་ནི་སྡུག་བསྔལ་གྱི་བདེན་པའི་རྣམ་པའོ། །ཕུང་པོ་ལྔ་མེད་པའི་ཕྱིར་ཤེར་ཕྱིན་འདི་ནི་གནས་མེད་པའི་དང༌། དབུགས་ཕྱི་ནང་དུ་རྒྱུ་བ་མེད་པའི་ཕྱིར། ཤེར་ཕྱིན་འདི་ནི་ནམ་མཁའི་དང༌། རྟོག་དཔྱོད་དམིགས་སུ་མེད་པའི་ཕྱིར་ཤེར་ཕྱིན་འདི་ནི་བརྗོད་དུ་མེད་པའི་དང༌། མིང་བཞིའི་ཕུང་པོ་དམིགས་སུ་མེད་པའི་ཕྱིར། །ཤེར་ཕྱིན་འདི་ནི་མིང་མེད་པའི་ཕ་རོལ་ཏུ་ཕྱིན་པ་སྟེ། བཞི་ནི་ཀུན་འབྱུང་གི་བདེན་པའི་རྣམ་པའོ། །ཆོས་ཐམས་ཅད་འགྲོ་བ་མེད་པའི་ཕྱིར། ཤེར་ཕྱིན་འདི་ནི་འགྲོ་བ་མེད་པའི་དང༌། ཆོས་ཐམས་ཅད་གཟུང་དུ་མེད་པའི་ཕྱིར་དང༌། ཤེར་ཕྱིན་འདི་ནི་མི་འཕྲོག་པའི་དང༌། ཆོས་ཐམས་ཅད་བྱང་ཞིང་ཟད་པའི་ཕྱིར༌། ཤེར་ཕྱིན་འདི་ནི་སྐད་ཅིག་མ་མེད་པའི་དང༌། ཆོས་ཐམས་ཅད་སྐྱེ་འགག་མེད་པའི་ཕྱིར། ཤེར་ཕྱིན་འདི་ནི་སྐྱེ་བ་མེད་པའི་ཕ་རོལ་ཏུ་ཕྱིན་པ་སྟེ། བཞི་ནི་འགོག་པའི་བདེན་པའི་རྣམ་པའོ། །བྱེད་པ་པོ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་བྱེད་པ་པོ་མེད་པའི་དང༌། ཤེས་པ་པོ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་ཤེས་པ་པོ་མེད་པའི་དང༌། སྐྱེ་འཆི་དམིགས་སུ་མེད་པའི་ཕྱིར། ཤེར་ཕྱིན་འདི་ནི་འཕོ་བ་མེད་པའི་དང༌། ཆོས་ཐམས་ཅད་འཇིག་པ་མེད་པའི་ཕྱིར། ཤེར་ཕྱིན་འདི་ནི་འཇིག་པ་མེད་པའི་དང༌། རྨི་ལམ་མཐོང་བ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་རྨི་ལམ་གྱི་དང༌། ཉན་པ་དང་བརྗོད་པ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་སྒྲ་བརྙན་གྱི་དང༌། མེ་ལོང་གི་བཞིན་དམིགས་སུ་མེད་པའི་ཕྱིར། ཤེར་ཕྱིན་འདི་ནི་མིག་ཡོར་གྱི་དང༌། ཆུུ་བབ་པ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་སྨིག་རྒྱུ་ཡི་དང༌། མཚན་མ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་སྒྱུ་མའི་དང༌། མ་རིག་པའི་མུན་པ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་རྨོངས་པ་མེད་པའི་དང༌། ཉོན་མོངས་པ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་ཉོན་མོངས་མེད་པའི་དང༌། ཉོན་མོངས་པ་མེད་པའི་ཕྱིར་འདི་ནི་རྣམ་བྱང་མེད་པའི་དང་གནས་དམིགས་སུ་མེད་པའི་ཕྱིར། ཤེར་ཕྱིན་འདི་ནི་དམིགས་སུ་མེད་པའི་དང༌། སྤྲོས་པ་ཐམས་ཅད་བཅོམ་པའི་ཕྱིར། ཤེར་ཕྱིན་འདི་ནི་སྤྲོས་པ་མེད་པའི་དང༌། རློམ་སེམས་ཐམས་ཅད་བཅོམ་པའི་ཕྱིར། ཤེར་ཕྱིན་འདི་ནི་རློམ་སེམས་མེད་པའི་དང༌། ཆོས་ཀྱི་དབྱིངས་གནས་པའི་ཕྱིར། ཤེར་ཕྱིན་འདི་ནི་མི་གཡོ་བའི་ཕ་རོལ་ཏུ་ཕྱིན་པ་སྟེ་བཅོ་ལྔ་ནི་ལམ་གྱི་བདེན་པའི་རྣམ་པའོ། ། གཉིས་པ་ལམ་ཤེས་པ་ཉིད་ཀྱི་རྣམ་པ་བཅུ་དྲུག་ནི། རྒྱུ་དང་ལམ་དང་སྡུག་བསྔལ་དང༌། འགོགས་པ་ལ་ནི་གོ་རིམས་བཞིན། །དེ་དག་བརྒྱད་དང་བདུན་དང་ནི། །ལྔ་དང་བཅུ་དྲུག་ཅེས་བསྒྲགས་སོ། ། ཆོས་ཐམས་ཅད་མ་ནོར་བར་འཚང་རྒྱ་བར་བྱེད་པའི་ཕྱིར་འདི་ནི་འདོད་ཆགས་དང་བྲལ་བའི་དང༌། ཆོས་ཐམས་ཅད་རྟོག་པ་མེད་པའི་ཕྱིར། ཤེར་ཕྱིན་འདི་ནི་ཀུན་ནས་ལྡང་བ་མེད་པའི་དང༌། ཆོས་ཐམས་ཅད་མཚན་མ་མེད་ཅིང་དམིགས་སུ་མེད་པའི་ཕྱིར། ཤེར་ཕྱིན་འདི་ནི་ཞི་བ་དང༌། འདོད་ཆགས་དམིགས་སུ་མེད་པའི་ཕྱིར། ཤེར་ཕྱིན་འདི་ནི་འདོད་ཆགས་མེད་པའི་དང༌། ཞེ་སྡང་ཡོད་པ་མ་ཡིན་པའི་ཕྱིར། ཤེར་ཕྱིན་འདི་ནི་ཞེ་སྡང་མེད་པའི་དང༌། མི་ཤེས་པའི་མུན་པ་ཐམས་ཅད་སེལ་བའི་ཕྱིར། ཤེར་ཕྱིན་འདི་ནི་གཏི་མུག་མེད་པའི་དང༌། རྟོག་པ་མེད་པའི་ཕྱིར། ཤེར་ཕྱིན་འདི་ནི་ཉོན་མོངས་པ་མེད་པའི་དང༌། སེམས་ཅན་མེད་པའི་ཕྱིར། ཤེར་ཕྱིན་འདི་ནི་སེམས་ཅན་མེད་པའི་ཕ་རོལ་ཏུ་ཕྱིན་པ་སྟེ། བརྒྱད་ནི་རྒྱུ་ཀུན་འབྱུང་གི་རྣམ་པའོ། །ཆོས་ཐམས་ཅད་ཀུན་ནས་ལྡང་བ་མེད་པའི་ཕྱིར། ཤེར་ཕྱིན་འདི་ནི་སྤངས་པའི་དང༌། མཐའ་རྣམ་པར་སྤོང་བའི་ཕྱིར། ཤེར་ཕྱིན་འདི་ནི་མཐའ་གཉིས་སུ་མི་འགྱུར་བའི་དང༌། ཆོས་ཐམས་ཅད་འདྲེས་པ་མེད་པའི་ཕྱིར། ཤེར་ཕྱིན་འདི་ནི་ཐ་མི་དད་པའི་དང༌། ཉན་རང་གི་ས་ལ་འདའ་བར་བྱེད་པའི་ཕྱིར། ཤེར་ཕྱིན་འདི་ནི་ཉམས་པ་མེད་པའི་དང༌། རྟོགས་པ་ཐམས་ཅད་དམིགས་སུ་མེད་པའི་ཕྱིར། ཤེར་ཕྱིན་འདི་ནི་རྟོག་པ་མེད་པའི་དང༌། ཆོས་ཐམས་ཅད་ཀྱི་ཚད་དམིགས་སུ་མེད་པའི་ཕྱིར། ཤེར་ཕྱིན་འདི་ནི་ཚད་མེད་པའི་དང༌། ཆོས་ཐམས་ཅད་དམིགས་སུ་མེད་པའི་ཕྱིར༌། ཤེར་ཕྱིན་འདི་ནི་ནམ་མཁའི་ཕ་རོལ་ཏུ་ཕྱིན་པ་སྟེ། བདུན་ནི་ལམ་གྱི་རྣམ་པའོ། །ཆོས་ཐམས་ཅད་འཇིགས་པ་མེད་པའི་ཕྱིར། ཤེར་ཕྱིན་འདི་ནི་མི་རྟག་པའི་དང༌། ཆོས་ཐམས་ཅད་ཚོལ་བར་སྦྱོར་བ་མེད་པའི་ཕྱིར། ཤེར་ཕྱིན་འདི་ནི་སྡུག་བསྔལ་གྱི་ཕ་རོལ་དང༌། ཆོས་ཐམས་ཅད་ཆགས་པ་མེད་པའི་ཕྱིར། ཤེར་ཕྱིན་འདི་ནི་བདག་མེད་པའི་དང༌། ཆོས་ཐམས་ཅད་དམིགས་སུ་མེད་པའི་ཕྱིར། ཤེར་ཕྱིན་འདི་ནི་སྟོང་པ་ཉིད་ཀྱི་དང༌། ཆོས་ཐམས་ཅད་གྲུབ་པ་མེད་པའི་ཕྱིར། ཤེར་ཕྱིན་འདི་ནི་མཚན་ཉིད་མེད་པའི་ཕ་རོལ་ཏུ་ཕྱིན་པ་སྟེ། ལྔ་ནི་སྡུག་བསྔལ་གྱི་རྣམ་པའོ། །ནང་སྟོང་པ་ཉིད་ལ་སོགས་པ་སྟོང་པ་ཉིད་བཅུ་དྲུག་དམིགས་སུ་མེད་པ་དང༌། དབེན་པ་དང༌། དངོས་པོ་མེད་པའི་ཆོས་ཉིད་ཀྱི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ནང་སྟོང་པ་ཉིད་ལ་སོགས་པའི་ཕ་རོལ་ཏུ་ཕྱིན་པ་བཅུ་དྲུག་ནི་འགོག་པའི་རྣམ་པའོ། ། གསུམ་པ་རྣམ་མཁྱེན་གྱི་རྣམ་པ་བརྒྱ་དང་བཅུ་ནི། དྲན་པ་ཉེར་བཞག་ནས་བཟུང་སྟེ། སངས་རྒྱས་རྣམ་པའི་མཐར་ཐུག་རྣམས། །ལམ་གྱི་བདེན་པའི་རྗེས་མཐུན་པར། །ཀུན་མཁྱེན་གསུམ་དུ་ཕྱེ་བས་ན། །སློབ་མ་བྱང་ཆུབ་སེམས་དཔའ་དང༌། །སངས་རྒྱས་རྣམས་ལ་རིམ་བཞིན་ཏེ། ། སུམ་ཅུ་བདུན་དང་སུམ་ཅུ་བཞི། །སུམ་ཅུ་རྩ་དགུ་དག་ཏུ་བཞེད། །ས་ལ་ལམ་གྱི་བདེན་པའི་རྗེས་སུ་མཐུན་པར་ཕྱེ་བ་ལ་གསུམ་ལས། སློབ་མའི་ཐམས་ཅད་ཤེས་པ་ཉིད་ཀྱི་རྣམ་པ་དང་རྗེས་སུ་མཐུན་པ། ཡུམ་ཤེར་ཕྱིན་ཆོས་དབྱིངས་ཀྱི་རྣམ་པ་སོ་བདུན་ནི། ལུས་དང༌། ཚོར་བ་དང༌། སེམས་དང༌། ཆོས་དང་དགེ་མི་དགེའི་ཆོས་དང༌། རྫུུ་འཕྲུལ་གྱི་རྐང་པ་དང༌། དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང༌། ལམ་དམིགས་སུ་མེད་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་ནི་སོ་བདུན་པོ་དེའི་ཕ་རོལ་ཏུ་ཕྱིན་པའི་རྣམ་པ་སོ་བདུན་ནོ། །གཉིས་པ་བྱང་ཆུབ་སེམས་དཔའི་ལམ་ཤེས་པ་ཉིད་ཀྱི་རྣམ་པ། རྗེས་སུུ་མཐུན་པ་ཡུམ་ཤེར་ཕྱིན་ཆོས་དབྱིངས་ཀྱི་རྣམ་པ་སོ་བཞི་ནི། དབེན་པ་དང༌། ཞི་བ་དང༌། སྨོན་པ་མེད་པ་དམིགས་སུ་མེད་པའི་ཕྱིར། ཤེར་ཕྱིན་འདི་ནི་རྣམ་ཐར་གསུམ་གྱི་དང༌། རྣམ་པར་ཐར་པ་བརྒྱད་དང༌། སྙོམས་འཇུག་དགུ་དང༌། བདེན་པ་བཞི་དམིགས་སུ་མེད་པའི་ཕྱིར། ཤེར་ཕྱིན་འདི་ནི་དེ་དག་གི་དང་སྦྱིན་པ་དང་སེར་སྣ་ལ་སོགས་པར་ཕྱིན་བཅུ་དང་བཟློག །ཕྱོགས་བཅུ་དམིགས་སུ་མེད་པའི་ཕྱིར། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཕར་ཕྱིན་བཅུའི་ཕ་རོལ་ཏུ་ཕྱིན་པའི་རྣམ་པ་སྟེ། དེ་ལྟར་སུམ་ཅུ་རྩ་བཞིའོ། །གསུམ་པ་སངས་རྒྱས་ཀྱི་རྣམ་མཁྱེན་ཉིད་ཀྱི་རྣམ་པ་དང་རྗེས་སུ་མཐུན་པ་ཡུམ་ཤེར་ཕྱིན་ཆོས་ཀྱི་དབྱིངས་ཀྱི་རྣམ་པ་སོ་དགུ་ནི། ཆོས་ཐམས་ཅད་ཐུབ་པ་མེད་པའི་ཕྱིར་ཤེར་ཕྱིན་འདི་ནི་སྟོབས་བཅུའི་དང༌། ལམ་ཤེས་ཀྱི་ཡེ་ཤེས་ཞུམ་པ་མེད་པའི་ཕྱིར་ཤེར་ཕྱིན་འདི་ནི་མི་འཇིག་པ་བཞི་དང༌། རྣམ་མཁྱེན་ཉིད་ཆགས་ཐོགས་མེད་པའི་ཕྱིར་ཤེར་ཕྱིན་འདི་ནི་སོ་སོ་ཡང་དག་པར་རིག་པ་བཞི་དང༌། ཉན་རང་གི་ཆོས་ཐམས་ཅད་ལས་འདས་པའི་ཤེར་ཕྱིན་འདི་ནི་མ་འདྲེས་བ་བཅོ་བརྒྱད་ཀྱི་དང༌། བརྗོད་པ་ཐམས་ཅད་ཀྱི་དེ་བཞིན་ཉིད་ཀྱི་ཕྱིར། ཤེར་ཕྱིན་འདི་ནི་དེ་བཞིན་གཤེགས་པའི་དང༌། ཆོས་ཐམས་ཅད་ལ་དབང་བསྒྱུར་བའི་ཕྱིར། ཤེར་ཕྱིན་འདི་ནི་རང་བྱུང་གི་དང༌། ཆོས་ཐམས་ཅད་འཚང་རྒྱ་བའི་ཕྱིར་ཤེས་རབ་གྱི་ཕ་རོལ་ཏུ་ཕྱིན་པ་འདི་ནི་སངས་རྒྱས་ཀྱི་ཕ་རོལ་ཏུ་ཕྱིན་པ་སྟེ། དེ་ལྟར་སུམ་ཅུ་རྩ་དགུའོ། །དེ་རྣམས་བསྡོམས་པས་བརྒྱ་དང་བདུན་ཅུ་རྩ་གསུམ་ནི་རྒྱུ་སྦྱོར་བ་བཞིས་གང་ལ་བསླབ་པར་བྱ་བའི་ཡུལ་མཁྱེན་པ་གསུམ་གྱི་ངོ་བོ་གཞི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཀྱི་དབྱིངས་ཟབ་མོ་གཅིག་རྣམ་པ་ངོ་བོ་ལ་བཟང་ངན་ལ་སོགས་ཀྱི་ཁྱད་པར་མེད་ཅིང༌། རྣམ་པ་སྡུག་བསྔལ་ལ་སོགས་པ་སྣ་ཚོགས་སུ་སྣང་བ་པྲ་ཕབ་པ་དང་མཚུངས་པའོ། །དེ་རྣམས་ཀྱི་རྣམ་པ་ཞེས་པ་དེ་བཤད་ཟིན་ཏོ། ། ༢༽སྒོམ་པ་པོའི་གང་ཟག་གི་ཁྱད་པར་བཤད་པ། ད་ནི་གཞི་ཤེར་ཕྱིན་གྱི་ཡུལ་མཁྱེན་པ་གསུམ་པོ་དེ་ལ་རྒྱུ་སྦྱོར་བ་བཞིའི་སློབ་པ་པོའི་གང་ཟག་ཤེར་ཕྱིན་གྱི་གཞུང་ཉན་པ་ལ་སོགས་པའི་སྣོད་ལྡན་ལ་བཤད་པར་བྱའོ། །ཉི་ཁྲིའི་ལེའུ་སུམ་ཅུ་པ་ལས། ཤེར་ཕྱིན་འདི་གང་གི་རྣ་ལམ་དུ་གྲགས་པ་དེ་ནི་སྔོན་གྱི་རྒྱལ་བ་ལ་བསྙེན་བཀུར་པ་དང༌། དགེ་བའི་རྩ་བ་བསྐྱེད་པའོ། །ཞེས་སོགས་ཀྱི་དོན། སངས་རྒྱས་རྣམས་ལ་ལྷག་པར་བྱས། །དེ་ལ་དགེ་བའི་རྩ་བ་བསྐྲུན། །དགེ་བའི་བཤེས་ཀྱི་མགོན་བཅས་པ། །འདི་མཉན་པ་ཡི་སྣོད་ཡིན་ནོ། ། ཞེས་པ་ལ་སྔོན་གྱི་སངས་རྒྱས་རྣམས་ལ་ལྷག་པར་བསྙེན་བཀུར་བྱས་པ་དང༌། སངས་རྒྱས་དེ་ལས་དགེ་བའི་རྩ་བ་བསྐྲུན་ཅིང་བསྐྱེད་པ་དང༌། དགེ་བའི་བཤེས་གཉེན་གྱིས་ཡོངས་སུ་ཟིན་པའི་སྒོ་ནས་མཚན་མགོན་དང་བཅས་པ་ནི་ཤེར་ཕྱིན་ཟབ་མོ་འདི་མཉན་པའི་སྣོད་ལྡན་གྱི་གང་ཟག་ཡིན་ནོ། ། ཤེར་ཕྱིན་ཟབ་མོ་འདི་ཐོས་ནས་མི་སྐྲག་ཅིང་སློབ་པའི་སྣོད་དུ་རུང་བའི་རྒྱུ་གང་ཞེ་ན། སངས་རྒྱས་བརྟེན་དང་ཀུན་འདྲི་དང༌། སྦྱིན་དང་ཚུལ་ཁྲིམས་སོགས་སྤྱོད་པས། །ལེན་དང་འཛིན་པ་ལ་སོགས་པའི། །སྣོད་དུ་དམ་པ་རྣམ་བཞེད་དོ། །ཞེས་པ་ལ་སྔོན་གྱི་སངས་རྒྱས་རྣམས་དགེ་བའི་བཤེས་གཉེན་དུ་བསྟེན་པ་དང༌། དེ་དག་ལ་ཤེར་ཕྱིན་གྱི་དོན་ཀུན་མ་ཤེས་པར་ལ་འདྲི་ཞིང་ནུས་པའི་སྒོ་ནས་ཤེས་པ་དང༌། སྐལ་པ་མང་པོར་སྦྱིན་པ་དང་ཚུལ་ཁྲིམས་ལ་སོགས་པ་ཕར་ཕྱིན་རྣམས་ལ་སྔར་སྤྱོད་པའི་རྒྱུས། ད་ལྟ་མི་སྐྲག་ཅིང་དད་པས་དང་དུ་ལེན་པ་དང༌། ཚིག་དོན་འཛིན་པ་དང༌། ལ་སོགས་པ་དོན་ཁོང་དུ་ཆུད་པར་བྱེད་པ་དང༌། སྒོམ་པའི་སྣོད་དུ་རུང་བར་དམ་པ་སངས་རྒྱས་ལ་སོགས་པ་རྣམས་བཞེད་དོ། ། ༣༽བསྒོམ་བྱ་སྦྱོར་བའི་ཁྱད་པར་བཤད་པ། ད་ནི་སྣོད་ལྡན་གྱི་གང་ཟག་དེ་ལྟ་བུས་ཡུལ་ཆོས་ཉིད་ཀྱི་མཁྱེན་པ་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་པོ་ཀུན་མངོན་སུམ་དུ་རྫོགས་པར་རྟོགས་པའི་རྣལ་འབྱོར་བཤད་པར་བྱ་སྟེ། མདོ་ལས། བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པའི་ཚེ། གཟུགས་ལ་མི་གནས་ཏེ། གང་གི་ཚེ་གཟུགས་ལ་མི་གནས་དེའི་ཚེ་གཟུགས་ལ་བརྩོན་པར་བྱེད་དོ། །ཞེས་སོགས་ཀྱི་དོན་གཟུགས་ལ་སོགས་ལ་མི་གནས་ཕྱིར། དེ་ལ་སྦྱོར་བ་བཀག་པའི་ཕྱིར། །དེ་ཡི་དེབཞིན་ཉིད་ཟབ་ཕྱིར། །དེ་རྣམས་གཏིང་དཔག་དཀའ་བའི་ཕྱིར། །དེ་དག་ཚད་ནི་མེད་ཕྱིར་དང༌། །ཚོགས་ཆེན་ཡུན་རིང་རྟོགས་པའི་ཕྱིར། །ལུང་བསྟན་ཕྱིར་མི་ལྡོག་ཉིད་དང༌། །ངེས་འབྱུང་བར་ཆད་མེད་བཅས་དང༌། བྱང་ཆུབ་ཉེ་དང་མྱུར་བ་དང༌། །གཞན་དོན་འཕེལ་མེད་འགྲིབ་མེད་ཕྱིར། །ཆོས་དང་ཆོས་མིན་སོགས་མི་མཐོང༌། ། གཟུགས་སོགས་བསམ་མི་ཁྱབ་མི་མཐོང༌། །གཟུགས་སོགས་དེ་ཡི་མཚན་མ་དང༌། །དེ་ཡི་ངོ་བོར་རྣམ་མི་རྟོག །འབྲས་བུ་རིན་ཆེན་སྦྱིན་བྱེད་དང༌། དེ་ནི་དག་པ་འཚམས་དང་བཅས། །ཞེས་པ་འདི་ཐམས་ཅད་སྦྱོར་བར་འཆད་པ་མདོ་དང་མི་མཐུན་ནོ། །མདོ་ལ་སྦྱོར་བ་གཅིག་དང་ལྷག་མ་སྦྱོར་བ་དང་འབྲེལ་ཞིང་སྐབས་སུ་བབ་པའི་གཞན་དང་གཞན་རྣམས་བསྟན་པའི་ཕྱིར་རོ། ། སྐབས་འདིའི་སྦྱོར་བ་ནི་ཤེར་ཕྱིན་ཟབ་མོ་རྣལ་འབྱོར་ཡིན་ལ་དེ་ལ་ཉིན་མཚན་གྱི་རྣལ་འབྱོར་དུ་བྱེད་པ་ཙམ་མ་གཏོགས་པ་རིགས་མི་འདྲ་བ་དུ་མ་ནི། གསུང་རབ་ཁྱད་འཕགས་རྣམས་སུ་གསུངས་པ་མེད་དོ། །དེས་ན་འདིར་གཟུགས་ལ་སོགས་ལ་མི་གནས་ཞེས་སོགས་ཚིག་རྐང་པ་གཉིས་ཀྱི་སྦྱོར་བ་དང༌། དེའི་དེ་བཞིན་ཉིད་ཞེས་པ་ནས་ཚད་ནི་མེད་ཕྱིར་དང་ཞེས་པའི་བར་གྱིས་བསྒོམ་པའི་ཤེར་ཕྱིན་དེ་ཟབ་པ་དང༌། གཏིང་དཔག་དཀའ་བ་དང༌། ཚད་མེད་པར་སྟོན་ལ། ཚིག་ཆེན་ཞེས་པའི་ཚིག་རྐང་གཉིས་ཀྱིས་ཤེར་ཕྱིན་ཟབ་མོ་དེ་སྣོད་མིན་ལ་བསྟན་པའི་ཉེས་དམིགས་དང་ལུང་བསྟན་ཞེས་པ་ནས་གཞན་དོན་ཞེས་པའི་བར་གྱིས་སྣོད་ལྡན་གྱིས་ཉམས་སུ་བླངས་པའི་ཕན་ཡོན་དང༌། འཕེལ་མེད་ནས་མི་ཁྱབ་མི་མཐོང་གི་བར་གྱིས་ཤེར་ཕྱིན་བསྒོམ་པ་ཡོངས་སུ་རྫོགས་པར་བྱེད་པའི་ཚད་དང་གཟུགས་སོགས་རྣམ་པར་མི་རྟོག་གི་བར་གྱིས་ཡུན་རིང་བོ་ནས་ཕར་ཕྱིན་དྲུག་ལ་སྦྱང་པའི་རྟགས་དང༌། འབྲས་བུ་རིན་ཆེན་སྦྱིན་བྱེད་ཀྱིས་ཤེར་ཕྱིན་དེས་སངས་རྒྱས་ཀྱི་ཆོས་རིན་པོ་ཆེ་སྦྱིན་པར་བྱེད་པ་དང༌། དེ་ནི་དག་པ་ཞེས་པས་ཤེར་ཕྱིན་དེ་ཆོས་དག་པ་ཐམས་ཅད་ཀྱི་ཕུང་པོ་ཡིན་པ་དང༌། འཚམས་དང་བཅས་ཞེས་པས་ཤེར་ཕྱིན་ལ་ཆོས་སྤྱོད་ཀྱི་རིམ་པ་ལ་སོགས་པའི་དུས་མཚམས་བསྟན་པ་ཡིན་ནོ། །དེ་ལ་དམིགས་པའི་ཚུལ་གྱིས་མདོ་ལས་གཟུགས་ལ་སོགས་པ། ཆོས་གང་ལ་ཡང་མི་གནས་པའི་ཕྱིར། མཚན་མ་དང་རྣམ་རྟོག་གིས་རང་གི་སྒྲུབ་པ་ལ་སྦྱོར་བ་ཡང་བཀག་པའི་ཕྱིར་བྱང་ཆུབ་སེམས་དཔའི་ལམ་ཤེས་ཤེར་ཕྱིན་ཟབ་མོའི་རྣལ་འབྱོར་རོ། །དབུ་མ་པ་ཆེན་པོ་དབྱིག་གཉེན་གྱིས་བྱང་ཆུབ་སེམས་དཔའི་ལམ་གྱི་རྣམ་པ་ཤེས་པ་ཉིད་ཀྱི་ཡེ་ཤེས་ནི་ཆོས་གང་ལ་ཡང་མི་གནས་ཏེ། དེ་བས་ན་མི་གནས་པ་ཉིད་དེའི་རྣལ་འབྱོར་དུ་བྱེད་པ་ཞེས་བྱའོ། །ཞེས་དང༌། འགྲེལ་སྔ་མར་ནི་གནས་པ་བཀག་གོ །འདིར་བསྒྲུབ་པ་བཀག་གོ། ཞེས་གསུངས་པའི་དོན་དོ། །གཟུགས་སོགས་དེའི་དེ་བཞིན་ཉིད་ཟབ་པའི་ཕྱིར་ཤེར་ཕྱིན་ཟབ་པ་དང༌། ཆོས་ཉིད་ཀྱི་གཟུགས་སོགས་དེ་རྣམས་གཏིང་དཀའ་བའི་ཕྱིར་ཤེར་ཕྱིན་གཏིང་དཔག་དཀའ་བ་དང༌། ཆོས་ཉིད་ཀྱི་གཟུགས་སོགས་དེ་དག་ཚད་མེད་པའི་ཕྱིར་ཤེར་ཕྱིན་ཚད་མེད་པ་ཡིན་ནོ། །དེ་ཙམ་དུ་གཏིང་དཔག་དཀའ་བ་དང་རྟོགས་པར་དཀའ་བའི་ཕྱིར་ཤེར་ཕྱིན་འདི་ཐེག་པ་ལ་གསར་དུ་ཞུགས་པའི་སྣོད་མིན་ལ་བཤད་པར་མི་བྱ་སྟེ། བཤད་ན་སྐྲག་ཅིང་མ་དད་པས་ཆོས་སྤོང་གི་ལས་བསགས་པའི་རྒྱུས་ཕྱིས་ཚོགས་ཆེན་པོས་ཀྱང་བླ་མེད་བྱང་ཆུབ་ཡུན་རིང་པོར་རྟོགས་པར་དཀའ་བའི་ཕྱིར་རོ། །ཤེར་ཕྱིན་ཐོས་ནས་མི་སྐྲག་པའི་སྣོད་ལྡན་སངས་རྒྱས་རྣམས་ལ་ལྷགས་པར་བྱས་པའི་བྱང་ཆུབ་སེམས་དཔའ་ནི་སྔར་ལུང་མ་བསྟན་ཡང་རིང་བོར་མི་ཐོག་པར་བླ་མེད་བྱང་ཆུབ་ཏུ་ལུང་བསྟན་པར་འགྱུར་བ་དང༌། ཤེར་ཕྱིན་འདི་ལ་དད་ཅིང་དེ་བཞིན་ནན་ཏན་བྱེད་པ་དེ་བླ་མེད་བྱང་ཆུབ་ལས་ཕྱིར་མི་ལྡོག་པའི་ཉིད་དང༌། སྐྱེས་བུ་འབྲོག་དགོན་པ་ནས་འབྱུང་བའི་དཔེས་ཤེར་ཕྱིན་འདི་ལ་དད་ཅིང་སློབ་པ་དེ་འཁོར་བའི་འབྲོག་དགོན་པ་ནས་ངེས་པར་འབྱུང་ཞིང་ས་གཉིས་ཀྱི་བར་ཆད་མེད་པ་དང་བཅས་པར་འཚང་རྒྱ་བར་འགྱུར་བ་དང༌། དཔྱིད་ཀྱི་དཔེས་དགེ་བ་སྨིན་ཅིང་ཤེར་ཕྱིན་ལ་སློབ་པ་དེ་བླ་མེད་བྱང་ཆུབ་ལ་ཉེ་བར་གྱུར་པ་དང༌། སྦྲུམ་མ་མྱུར་དུ་བཙའ་བའི་དཔེས་ཤེར་ཕྱིན་འདི་ལ་རབ་ཏུ་དད་ཅིང་སློབ་པ་དེ་མྱུར་དུ་བླ་མེད་བྱང་ཆུབ་ཏུ་ལུང་བསྟན་པར་འགྱུར་བ་དང༌། དེ་ལྟར་ཤེར་ཕྱིན་ལ་སློབ་ཅིང་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། བསྡུ་བ་བཞིས་སེམས་ཅན་གཞན་གྱི་དོན་རྒྱ་ཆེན་པོ་བྱེད་པ་དང༌། མདོ་ལས། ཇི་ལྟར་བྱང་ཆུབ་སེམས་དཔའི་ཤེར་ཕྱིན་བསྒོམ་པ་རྫོགས་པར་འགྱུར་ཞེས་ཞུས་པའི་ལན། གཟུགས་སོགས་ཀྱི་འཕེལ་བ་མཐོང་བ་མེད་པ་དང་འགྲིབ་པ་མཐོང་བ་མེད་པ་དེའི་ཚེ་ཤེར་ཕྱིན་བསྒོམས་པས་ཡོངས་སུ་རྫོགས་པར་འགྱུར་བའི་ཕྱིར་དང༌། ཆོས་དང་ཆོས་མ་ཡིན་པ་དང༌། དུས་གསུམ་ལ་སོགས་པའི་དངོས་པོ་ཐམས་ཅད་མི་མཐོང་བ་དང༌། གཟུགས་སོགས་བསམ་གྱིས་མི་ཁྱབ་པར་བཏགས་པ་ཐམས་ཅད་ཀྱང༌། མི་མཐོང་བ་དེའི་ཚེ་ཤེར་ཕྱིན་རྫོགས་པར་བྱེད་པའོ། ། བྱང་ཆུབ་སེམས་དཔའ་ཡུན་རིང་པོ་ནས་ཕར་ཕྱིན་དྲུག་ལ་སྤྱད་ཅིང་དགེ་བའི་བཤེས་གཉེན་གྱིས་ཟིན་པའི་རྟགས་ནི། གཟུགས་སོགས་ནི་གཞན་པར་དབང་དང༌། གཟུགས་སོགས་དེའི་མཚན་མ་ཀུན་བཏགས་དང༌། གཟུགས་སོགས་དེའི་ངོ་བོ་ཡོངས་གྲུབ་ལ་དང་པོ་མི་རྟོག་ཅིང་རྗེས་སུ་ཡང་རྣམ་པར་མི་རྟོག་པ་ཡིན་ནོ། །ཤེར་ཕྱིན་འདི་ནི་འདོད་དགུ་ཐམས་ཅད་འབྱུང་བའི་འབྲས་བུའི་ཆོས་རིན་པོ་ཆེ་དགེ་བ་བཅུ་བསམ་གཏན་ཚད་མེད་གཟུགས་མེད་མངོན་ཤེས་དྲན་པ་ཉེར་བཞག་ནས་རྣམ་མཁྱེན་གྱི་བར་བྱང་ཆུབ་སེམས་དཔའ་ལ་བསྒྲུབ་ཅིང་སྦྱིན་པར་བྱེད་པ་དང༌། དོན་དམ་གྱི་གཟུགས་སོགས་ཆོས་ཐམས་ཅད་དག་པའི་སླད་དུ་ཤེར་ཕྱིན་དེ་ནི་དག་པའི་ཕུང་པོའོ། །ཤེར་ཕྱིན་བྲི་བ་ལ་སོགས་པ་མྱུར་དུ་བྱ་བ་དང༌། ཟླ་བ་གཅིག་ནས་ལོའི་བར་གྱིས་བྲི་བ་སོགས་བྱ་ན་ཡང་དེ་བཞིན་དུ་བྱའོ། །ཞེས་ཤེར་ཕྱིན་གྱི་ཆོས་སྤྱོད་ཀྱི་དུས་མཚམས་ངེས་པ་དང་བཅས་པ་མདོ་ལས་གསུངས་པའོ། ། དེ་རྣམས་ཀྱིས་སྦྱོར་བར་བཅས་རྣམས་དང་ཞེས་པ་དེ་བཤད་ཟིན་ཏོ། ། ༤༽ཤེར་ཕྱིན་དེ་ལ་སྤྱོད་པའི་ཡོན་ཏན་བཤད་པ། ད་ནི་ཤེར་ཕྱིན་དེ་ལ་སྤྱོད་པའི་ཡོན་ཏན་བཤད་པར་བྱ་སྟེ། མདོ་ལས། བྱང་ཆུབ་སེམས་དཔའ་ཤེར་ཕྱིན་ཟབ་མོ་འདི་འདྲི་ཀློག་ཁ་དོན་བྱེད་སྒོམ་པ་ལ་བར་ཆད་བྱེད་པར་མི་ནུས་སོ། །ཞེས་སོགས་ཀྱི་དོན། བདུད་ཀྱི་མཐུ་བཅོམ་ལ་སོགས་པ། །ཡོན་ཏན་རྣམ་པ་བཅུ་བཞིའོ། །ཞེས་པའི་ཡོན་ཏན་འདི་དག་ཡུམ་གྱི་ཆོས་སྦྱོད་ཐམས་ཅད་ཀྱི་ཕན་ཡོན་དུ་མདོ་ལས་གསུངས་པ་སྟེ། བདུད་གྱི་མཐུ་བཅོམ་ཞིང་ནུས་པ་མེད་པ་དང་སངས་རྒྱས་ཐམས་ཅད་ཀྱིས་དགོངས་པས་མཁྱེན་ཞིང་ལ་སོགས་པ་ཡོན་ཏན་རྣམ་པ་བཅུ་བཞིའོ། །དེ་རྣམས་ཀྱིས་ཡོན་ཏན་ཞེས་པ་རྣམས་བཤད་ཟིན་ཏོ། ། ༥༽བར་ཆད་ཀྱི་སྐྱོན་བཤད་པ། ད་ནི་ཐེག་པ་ལ་གསར་དུ་ཞུགས་པ་ཆོས་ཀྱི་རོ་མ་མྱོང་བས་ཡུམ་གྱི་ཆོས་སྤྱོད་ལ་བར་ཆད་ཀྱི་སྐྱོན་འབྱུང་བ་བཤད་པར་བྱ་སྟེ། སྡུད་པ་ལས། ཐེག་པ་གསར་དུ་ཞུགས་པའི་སེམས་ཅན་བློ་ཆུང་བ། །གང་ཞིག་དཀོན་པའི་རིན་ཆེན་འདི་ནི་མ་རྙེད་པ། །དེ་ལ་བར་ཆད་བྱ་ཕྱིར་བདུད་ནི་སྦྲོ་བར་འགྱུར། །ཞེས་དང༌། ཉི་ཁྲིའི་ལེའུ་སོ་གཅིག་པ་དང་སོ་གཉིས་པའི་སྐབས་ན་རིགས་ཀྱི་བུ་དང་བུ་མོ་བླ་མེད་བྱང་ཆུབ་ཏུ་སྦྱོད་པ་ལ་བར་ཆད་ཇི་ལྟ་བུ་མཆིས་ཞེས་སོགས་ཀྱི་དོན་སྐྱོན་ནི་བཅུ་ཚན་བཞིར་བཅས་པ། དྲུག་ཏུུ་ངེས་པ་རྟོགས་པར་བྱ། ཞེས་པའི་སྐྱོན་འདི་དག་སྦྱོར་བའི་སྐྱོན་ཏུ་འཆད་པ་ནི་མདོ་དང་མི་མཐུན་ཏེ། མདོ་ལས། ཆོས་སྤྱོད་ཐམས་ཅད་ཀྱི་བར་ཆད་དུ་གསུངས་ཤིང་ཁྱད་པར་དཔོན་སློབ་མི་འགྲིག་པ་ཇི་སྙེད་འབྱུང་བ་ཐམས་ཅད་འཆད་ཉན་གྱི་སྐྱོན་དུ་གསུངས་བའི་ཕྱིར་རོ། ། དེས་ན་སྤོབས་པ་ཧ་ཅང་འཕྱིས་པ་དང༌། ཧ་ཅང་མྱུར་བ་དང༌། གླལ་བ་དང༌། རྒོད་པ་དང༌། ཕན་ཚུན་སྡིགས་པ་དང༌། གཡོ་བ་དང་ཡི་གེ་གཞན་ལ་ཆགས་པ་དང༌། འདིའི་རོ་མ་མྱོང་ནས། སྟན་ལས་ལངས་ཏེ། འགྲོ་བ་དང༌། གླལ་ཞིང་ལུང་འབོག་པ་ལ་སོགས་པ་ཆོས་སྦྱོད་པའི་བར་ཆད་གྱི་སྐྱོན་ནི་བཅུ་ཚན་བཞི་སྟེ། བཞི་བཅུར་བཅས་པའི་སྟེང་དུ་དྲུག་དང་བཞི་བཅུ་རྩ་དྲུག་དུ་ངེས་པར་རྟོགས་པར་བྱ་ཞིང་སྤངས་པར་བྱའོ། །བདུད་ལས་འདི་རྣམས་མ་སྤྲན་ན་སྐྱོན་གྱི་དབང་དུ་འགྲོ་ཞིང་སྤྲན་ན་མི་འགྲོ་བའི་གདུལ་བྱ་ལ། སངས་རྒྱས་ཀྱི་དགེ་བའི་བཤེས་གཉེན་གྱི་བྱ་བ་བདུད་ལས་སྤྲན་པར་མཛད་པ་ཡིན་ཏེ། དེ་ཡང་བྱང་ཆུབ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱ་སྟེ། སྤང་བར་བྱའོ། །ཞེས་གསུངས་པའི་ཕྱིར་རོ། །དེ་རྣམས་ཀྱིས་སྐྱོན་ནི་ཞེས་པ་དེ་བཤད་ཟིན་ཏོ། ། ༦༽མཚན་ཉིད་བཤད་པ། ༡ མདོར་བསྟན་པ། ད་ནི་མཚན་ཉིད་བཤད་པར་བྱ་སྟེ། བསྡུས་ཏེ་མདོར་བསྟན་པ་དང༌། ཕྱེ་སྟེ་རྒྱས་པར་བཤད་པ་གཉིས་ལས། གང་གིས་མཚོན་དེ་མཚན་ཉིད་དུ། །ཤེས་བྱ་དེ་ཡང་རྣམ་པ་གསུམ། །ཤེས་པ་ཁྱད་པར་བྱེད་པ་སྟེ། །ངོ་བོ་ཉིད་གང་དང༌། ཞེས་པ་ལ་ཆོས་གང་གིས་མཚན་གཞི་གང་མཚོན་པར་བྱེད་པ་དེ་མཚོན་བྱ་དེའི་མཚན་ཉིད་དུ་ཤེས་པར་བྱའོ། །འདིར་མཚོན་བྱ་དེ་ཡང་རྣམ་པ་གསུམ་ཡོད་པ་ནི་ཤེས་པ་དང༌། ཁྱད་པར་དང་བྱེད་པ་སྟེ། མཚོན་བྱའོ། །མཚན་ཉིད་བཞི། གང་གིས་ངོ་བོ་ཉིད་དུ་མཚོན་པ་གང་ཡིན་པ་དེ་ཡང་མཚོན་བྱ་བཞི་པར་བཞེད་པ་ཡིན་ནོ། །མཚན་ཉིད་འདི་དག་སྦྱོར་བའི་མཚན་ཉིད་དུ་འཆད་པ་ནི་བྱམས་མགོན་དང་དངོས་སུ་འགལ་ཞིང་མདོ་དང་མི་མཐུན་ལ། རྟོག་དཔྱོད་མི་ལྡན་རྣམས་རྨོངས་པར་བྱེད་པས་བཤད་པར་བས་སོ། །བྱམས་པ་མགོན་པོས་ནི་མཚན་ཉིད་བཞི་པོ་འདི། མཚོན་བྱ་བཞི་པོ་ཤེས་པ་དང༌། ཁྱད་པར་དང༌། བྱེད་པ་དང༌། ངོ་བོ་ཉིད་ཡིན་པར་ཤིན་ཏུ་གསལ་བར་གསུངས་པ་དེ་བོར་ནས། འདི་དག་སྦྱོར་བའི་མཚན་ཉིད་ཏུ་སྟོན་པ་དེ་རིགས་སམ་ཤེས་ལྡན་དག རྒྱལ་བ་རྒྱལ་ཚབ་དག་ལ་ཡིད་ཆེས་པར་གྱིས་ལ་རྟོག་དཔྱོད་མཛོད་ཅིག ཁོ་བོ་ནི་སངས་རྒྱས་དང་ས་བཅུ་པ་རྣམས་དང༌། མི་མཐུན་ན་སུ་ལ་ཡང་ཡིད་རྟོན་པ་མ་ཡིན་ནོ། ། ༢ མཚན་ཉིད་རྒྱས་པར་བཤད་པ། ༡ ཤེས་མཚན་རྒྱས་པར་བཤད་པ། གཉིས་པ་རྒྱས་པར་བཤད་པ་ལ་བཞི་ལས། དང་པོ་ཤེས་པའི་མཚན་ཉིད་རྒྱས་པར་བཤད་པ་ནི། འབྲས་བུའི་མཁྱེན་པ་གསུམ་གྱི་སྒོ་ནས་སངས་རྒྱས་ཀྱི་ཇི་ལྟ་བ་དང་ཇི་སྙེད་པ་ཤེས་པའི་མཚན་ཉིད་སྟོན་པ་ལ། དང་པོ་ཐམས་ཅད་ཤེས་པ་ཉིད་ཀྱི་སྐབས་ཀྱི་ཤེས་པ་འམ་མཁྱེན་པའི་མཚན་ཉིད། མདོ་ལས། སངས་རྒྱས་རྣམས་ལ་ལྷག་པར་བྱ་ཞེས་སོགས་ཀྱིས་བསྟན་པའི་སྣོད་ལྡན་གྱིས་ཤེར་ཕྱིན་ལ་སློབ་པའི་ཚེ། བདུད་ལས་ཀྱིས་མི་ཚུགས་པའི་རྒྱུ་བྱང་ཆུབ་སེམས་དཔའ་དང་ཤེར་ཕྱིན་ལ་སངས་རྒྱས་ཐམས་ཅད་ཀྱིས་དགོངས་ཤིང་གཅེས་སྤྲས་ཀྱི་སྒོ་ནས་བསྲུང་བ་དང༌། སངས་རྒྱས་ཐམས་ཅད་ཤེར་ཕྱིན་ལ་གཅེས་སྤྲས་མཛད་པའི་རྒྱུ་མཚན་ཤེར་ཕྱིན་གྱིས་དེ་བཞིན་གཤེགས་པའི་ངོ་བོར་གྱུར་པའི་སངས་རྒྱས་ཀྱི་ཆོས་ཐམས་ཅད་བསྐྱེད་པ་དང་འཇིག་རྟེན་སྟོན་པ་དང༌། ཤེར་ཕྱིན་ལ་བརྟེན་ནས་སེམས་ཅན་ཀྱི་སེམས་དང་སྤྱོད་པ་མཁྱེན་པ་ཞེས་སོགས་ཀྱི་དོན། དེ་བཞིན་གཤེགས་པ་འབྱུང་བ་དང༌། །འཇིག་རྟེན་འཇིག་མེད་བདག་ཉིད་དང༌། །སེམས་ཅན་སེམས་ཀྱི་སྤྱོད་པ་དང༌། ། དེ་བསྡུས་པ་དང་ཕྱིར་བལྟས་དང༌། །མི་ཟད་པ་ཡི་རྣམ་པ་དང༌། །ཆགས་བཅས་སོགས་དང་རྒྱ་ཆེན་དང༌། ཆེན་པོར་གྱུར་པ་ཚད་མེད་དང༌། །རྣམ་ཤེས་བསྟན་དུ་མེད་པ་དང༌། །སེམས་ལྟར་མེད་དང་ཤེས་པ་དེ། །གཡོ་བ་ལ་སོགས་ཞེས་བྱ་དང༌། དེ་ལས་གཞན་ཡང་དེ་དག་ནི། །དེ་བཞིན་ཉིད་ཀྱི་རྣམ་པར་ཤེས། །ཐུབ་པས་དེ་བཞིན་ཉིད་རྟོགས་ཏེ། །གཞན་ལ་བསྟན་པ་ཞེས་བྱ་འདི། །ཐམས་ཅད་ཤེས་པ་ཉིད་སྐབས་ཀྱི། །ཤེས་པའི་མཚན་ཉིད་བསྡུས་པ་ཡིན། །ཞེས་པ་ལ། དེ་བཞིན་གཤེཊ་པ་འབྱུང་བ་དང༌། །ཞེས་པ་ནས་འཇིག་རྟེན་འདུ་ཤེས་འགོག་པ་ལ། །ཞེས་པའི་བར་གྱི་མདོ་དང་བསྟན་བཅོས་སུ་བསྐྱེད་པ་དང༌། སྟོན་པ་དང་རྟོགས་པ་དང༌། བརྗོད་པར་མཛད་པ་དང༌། སངས་རྒྱས་པ་དང༌། ཐུགས་སུ་ཆུད་པ་དང༌། བྱས་པ་གཟོ་བ་དང་དགོངས་པ་དང་ཤེར་ཕྱིན་ལ་བརྟེན་པ་དང་ཤེས་པ་ཞེས་པ་རྣམས་འབྱུང་བ་ཐམས་ཅད་ནི་མཁྱེན་པའི་རྣམ་གྲངས་སོ། །འདིར་ཤེར་ཕྱིན་ནི་ཆོས་ཀྱི་དབྱིངས་ཡིན་ལ་དེ་ཉིད་གློ་བུར་གྱི་དྲི་མ་དང་བྲལ་བ་ལ་དེ་བཞིན་གཤེགས་པ་བསྐྱེད་ཅེས་པའི་ཐ་སྙད་མཛད་དོ། །ངེས་ན་ཤེར་ཕྱིན་དང་ཆོས་ཀྱི་དབྱིངས་དང་དེ་བཞིན་གཤེགས་པ་གསུམ་གཅིག་གོ །ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་བཞིན་གཤེགས། །ཞེས་དང༌། དེ་བཞིན་ཉིད་འདི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་དང་ཤེར་ཕྱིན་བདུན་བརྒྱ་པར་ཡང་འདི་ལྟར་ཆོས་ཀྱི་དབྱིངས་ཉིད་བཅོམ་ལྡན་འདས་སོ་ཞེས་སོགས་ཤེས་བྱེད་མང་པོས་སོ། །དེས་ན་ཤེར་ཕྱིན་ཟབ་མོའི་ཆོས་ཀྱི་དབྱིངས་ནི་འཕགས་པའི་ཆོས་ཐམས་ཅད་ཀྱི་རྒྱུ་ཡིན་པའི་ཕྱིར། དུས་གསུམ་གྱི་རྒྱལ་བས་དེ་ལ་བསླབས་ནས་འབྲས་བུའི་མཁྱེན་པ་གསུམ་གྱི་ངོ་བོ་ཆོས་ཐམས་ཅད་ཀྱི་ཡིན་ལུགས་ཇི་ལྟ་བ་དང་ཇི་སྙེད་པ་ཤེས་ཤིང་མཁྱེན་པ་འདི་བརྙེས་སོ། །བརྙེས་པར་འགྱུར་རོ། ། དེ་ལ་ཚིག་གི་དོན་ནི་རྒྱལ་པ་ཀུན་གྱི་ལམ་དེ་ལ་བསླབས་པས་ཆོས་ཉིད་གློ་བུར་གྱི་དྲི་མ་དང་བྲལ་བའི་དེ་བཞིན་གཤེགས་པ་བྲལ་བའི་འབྲས་བུ་འབྱུང་ཞིང་ཆོས་ཐམས་ཅད་མཁྱེན་པ་ཉིད་དང༌། བཏགས་པའི་དངོས་པོ་ཐམས་ཅད་དེ་བཞིན་གཤེགས་པ་ལ་མི་སྣང་བས་ཕུང་པོ་ལྔའི་འཇིག་རྟེན་གྱི་ཡིན་ལུགས་འཇིག་པ་མེད་པའི་བདག་ཉིད་དུ་མཁྱེན་པ་དང༌། སོ་སོ་སྐྱེ་བོས་ཇི་ལྟར་ཞེན་པའི་འཇིག་རྟེན་གྱི་དངོས་པོ་ཐམས་ཅད་དེ་བཞིན་གཤེགས་པ་ལ་སྣང་མི་སྲིད་པས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའི་གཤིས་ལུགས་ཡང་དག་པ་ཆོས་ཤིན་ཏུ་གནས་པ་ཇི་ལྟ་བ་བཞིན་དུ་མཁྱེན་པ་དང༌། དངོས་པོ་ཐམས་ཅད་མི་དམིགས་པའི་ཚུལ་གྱིས་སེམས་ཅན་གྱི་སེམས་དེ་ནང་དུ་བསྡུས་པའི་གནས་ལུགས་དང༌། ཕྱིར་བལྟ་སྟེ་སྤྲོས་པའི་གཤིས་ཀྱི་ངོ་བོ་དང༌། སྡུས་སྤྲོས་དེ་དག་གི་གཤིས་ལུགས་རྣམ་པར་མི་རྟོགས་པའི་དབྱིངས་མི་ཟད་པའི་རྣམ་པ་དང༌། འདོད་ཆགས་དང་བཅས་པ་དང་ལ་སོགས་པ་ཞེ་སྡང་དང་གཏི་མུག་དང་བཅས་པ་དང༌། དེ་དག་དང་བྲལ་བའི་སེམས་ཀྱི་ཡིན་ལུགས་དང༌། ཕ་རོལ་གྱི་སེམས་རྒྱ་ཆེན་པོ་དང་སེམས་ཆེན་པོར་གྱུར་པ་དང༌། སེམས་ཚད་མེད་པ་དང༌། རྣམ་ཤེས་ཀྱི་སེམས་བསྟན་དུ་མེད་པ་དང༌། སེམས་དེ་དག་གི་དངོས་པོ་དེ་བཞིན་གཤེགས་པའི་སྤྱན་ལྔ་ལ་མི་སྣང་བའི་ཕྱིར། སེམས་བལྟར་མེད་པ་སྟེ། དངོས་པོར་ཞེན་པའི་བློས་བཏགས་པ་ཙམ་མ་གཏོགས་པ་གཤིས་ལ། དངོས་པོ་མེད་པའི་སེམས་དེ་དག་གི་ཡང་དག་པ་ཉིད་ཇི་ལྟ་བ་བཞིན་དུ་དངོས་པོ་མེད་པར་མཁྱེན་པ་དང༌། ཤེས་པ་དེ་གཡོ་བ་ལ་སོགས་ཞེས་བྱ་དང༌། ཞེས་པ་འདིས་མི་སྟེགས་ཅན་གྱི་རྟག་ཆད་ཀྱི་ལྟ་བ་སྟོན་ཏེ། དེ་ཡང་སྒྲོ་སྐུར་གཉིས་སོ། །ཁྲི་བརྒྱད་སྟོང་པར་འགྱུར་འདི་དང་མཐུན་པར་བྱུང་ལ། ཉི་ཁྲི་ལ་སོགས་སུ་འཕྲོ་བ། འདུུ་བ་བཀྲམ་པ་བཅུམ་པ་ཞེས་བྱ་བ་བཞི་བྱུང་ངོ༌།། དེ་ལ་ལྷག་པར་གཡོ་བ་རྟག་ལྟ་དང༌། བྲལ་བར་གཡོ་བ་ཆད་ལྟ་སྟེ་སྒྲོ་སྐུར་གཉིས་སོ། །བདག་དང་འཇིག་རྟེན་རྟག་ཅེས་ལྟ་བ་ནི་འཕྲོ་བ་དང༌། མི་རྟག་ཅེས་ལྟ་བ་ནི་འདུ་བ་དང༌། རྟག་ཀྱང་རྟག་ལ་མི་རྟག་ཀྱང་མི་རྟག་ལ་ལྟ་བ་ནི་བཀྲམ་པ་དང༌། རྟག་པ་ཡང་མ་ཡིན་མི་རྟག་པ་ཡང་མ་ཡིན་ཞེས་ལྟ་བ་ནི་བཅུམ་པའོ། །དེ་བཞིན་དུ་བདག་དང་འཇིག་རྟེན་མཐའ་དང་ལྡན་པ་དང་མི་ལྡན་པ་དང་ལྡན་ཡང་མི་ལྡན་ཡང་མི་ལྡན་པ་དང༌། ལྡན་པ་ཡང་མ་ཡིན་མི་ལྡན་པ་ཡང་མ་ཡིན་པ་དང༌། དེ་བཞིན་དུ་དེ་བཞིན་གཤེགས་པ་གྲོངས་ནས་ཡོད་པ་དང༌། མེད་པ་དང༌། ཡོད་ཀྱང་ཡོད་མེད་ཀྱང་མེད་པ་དང༌། ཡོད་པ་ཡང་མ་ཡིན་མེད་པ་ཡང་མ་ཡིན་པ་དང༌། ལུས་སྲོག་དང་ལྡན་པ་དང༌། ལུས་གཞན་ལ་སྲོག་ཀྱང་གཞན་ཞེས་པ་སྟེ། སྔོན་གྱི་མཐའ་ལ་བརྟེན་པ་ཅན་དང༌། ཕྱི་མའི་མཐའ་ལ་བརྟེན་པ་བཞི་དང༌། དེ་བཞིན་གཤེགས་པ་ལ་རྟེན་པ་བཞི་དང༌། ལུས་སྲོག་ལ་རྟེན་པ་གཉིས་ཏེ། རྟག་ཆད་ཀྱི་ལྟ་བ་དེ་དག་ཕུང་པོ་ལྔ་ལ་བདག་ཏུ་ཞེན་ཅིང་གནས་པའོ། །ཞེས་རབ་དུ་མཁྱེན་པ་དང༌། དེ་ལྟར་མཁྱེན་པ་དེ་ལས་གཞན་ཡང་གཡོ་བའམ་འཕྲོ་བ་ལ་སོགས་དེ་དག་གི་གནས་ལུགས་ནི་དེ་བཞིན་ཉིད་ཇི་ལྟ་བ་བཞིན་གྱི་རྣམ་པར་མཁྱེན་ཅིང་ཤེས་སོ། །མདོར་ན་ཐུབ་པའི་སྣོད་བཅུད་ཐམས་ཅད་གྱི་གཤིས་ལུགས་དེ་བཞིན་ཉིད་ཇི་ལྟ་བ་བཞིན་མཁྱེན་ཅིང་རྟོག་པ་དེ་སེམས་ཅན་གཞན་ལ་བསྟན་པ་ཞེས་བྱ་བ་འདི། ཐམས་ཅད་ཤེས་པ་ཉིད་ཀྱི་སྐབས་ཀྱི་མཁྱེན་པ་འམ་ཤེས་པའི་མཚན་ཉིད་དེ་དོན་ཐམས་ཅད་བསྡུས་པ་ཡིན་ནོ། །སངས་རྒྱས་བཅོམ་ལྡན་འདས་མཐོང་བ་རྣམ་པར་དག་པས་དངོས་པོའི་འཇིག་རྟེན་གང་ཡང་མི་གཟིགས་ལ། དངོས་པོ་མེད་པའི་སྣོད་བཅུད་སྒྱུ་མ་ལྟ་བུ་ནི་འཇིག་རྟེན་གྱི་གནས་ལུགས་ཆོས་ཉིད་ཡིན་པས། དེ་ཐུགས་སུ་ཆུད་ཅིང་མཁྱེན་པ་ལ་འཇིག་རྟེན་མཁྱེན་པ་ཞེས་གསུངས་སོ། །དེ་རྣམས་ཉི་ཁྲིའི་ལེའུ་སོ་གཉིས་པའི་སྐབས་ནས་སྟོན་ནོ། །གཉིས་པ་སངས་རྒྱས་ཀྱི་སའི་ལམ་ཤེས་ཀྱི་སྐབས་ཀྱི་མཁྱེན་པའི་མཚན་ཉིད་ནི། མདོ་ལས། ཤེར་ཕྱིན་ཟབ་མོ་འདི་ནི་སྟོང་པ་ཉིད་དང་མཚན་མ་མེད་པ་དང༌། སྨོན་པ་མེད་པ་དང༌། འདུ་བྱ་བ་མེད་པ་དང༌། སྐྱེ་འགག་མེད་པ་དང༌། ཉོན་མོངས་རྣམ་བྱང་མེད་པའི་མཚན་ཉིད་དོ། །ཞེས་སོགས་ཀྱི་དོན་སྟོང་ཉིད་མཚན་མ་མེད་པ་དང༌། སྨོན་པ་རྣམ་པར་སྤངས་པ་དང༌། །སྐྱེ་མེད་འགག་པ་མེད་སོགས་དང༌། །ཆོས་ཉིད་རྣམ་པར་འཁྲུལ་མེད་དང༌། །འདུ་མི་བྱེད་དང་རྣམ་མི་རྟོག །རབ་དབྱེ་མཚན་ཉིད་མེད་ཉིད་ལ། །ལམ་ཤེས་ཉིད་ཀྱི་སྐབས་ཀྱི་ནི། །ཤེས་པའི་མཚན་ཉིད་ཡིན་པར་བཞེད། །ཅེས་པ་འདི་རྣམས་ཉི་ཁྲིའི་ལེའུ་སོ་གསུམ་པའི་སྐབས་ན་སྟོན། ཐམས་ཅད་ཤེས་པ་ཉིད་ཀྱི་སྐབས་སུ་ནི་ཡུལ་ཅན་ཐུབ་པའི་ཡེ་ཤེས་ཀྱི་ཡུལ་བདེན་གཉིས་ཀྱི་གནས་ལུགས་ཇི་ལྟར་མཁྱེན་པའི་ཚུལ་བསྟན་ཅིང༌། འདིར་མཁྱེན་པའི་ཡེ་ཤེས་དེ་ཆོས་གང་གི་རང་བཞིན་ནམ་བདག་ཉིད་ཡིན་ཚུལ་སྟོན་ནོ། །དེས་ན་མཁྱེན་པའི་ཡེ་ཤེས་དེའི་ངོ་བོ་ནི་སྟོང་པ་ཉིད་ཀྱི་ཡེ་ཤེས་དང༌། མཚན་མ་མེད་པའི་ཡེ་ཤེས་དང༌། སྨོན་པ་རྣམ་པར་སྤངས་པའི་ཡེ་ཤེས་དང༌། འདུ་བྱ་བ་མེད་པའི་ཡེ་ཤེས་དང༌། །སྐྱེ་བ་མེད་པའི་ཡེ་ཤེས་དང༌། འགག་པ་མེད་པའི་ཡེ་ཤེས་དང༌། ལ་སོགས་པ་ཉོན་མོངས་རྣམ་བྱང་དང༌། དངོས་པོ་མེད་པའི་ཡེ་ཤེས་དང༌། དངོས་པོ་མེད་པའི་ངོ་བོ་ཉིད་ཀྱི་ཡེ་ཤེས་དང༌། མི་གནས་པ་དང་ནམ་མཁའི་མཚན་ཉིད་ཀྱི་ཡེ་ཤེས་ཏེ། སྐྱེ་འགག་མེད་པའི་ཡེ་ཤེས་འདི་ནི་ཆོས་ཉིད་ཀྱི་དེ་བཞིན་ཉིད་ཡིན་ནོ། །ཆོས་ཉིད་ཀྱི་ཡེ་ཤེས་འདི་སྟོང་ཉིད་དང་མཚན་མེད་ལ་སོགས་པའི་མཚན་ཉིད་དམ་ངོ་བོ་ལས་གཞན་དུ། ལྷ་མིར་བཅས་པའི་འཇིག་རྟེན་གྱིས་བསྒྱུར་ཅིང་རྣམ་པར་འཁྲུགས་པར་བྱར་མེད་པ་དང༌། ཆོས་ཉིད་ཀྱི་ཡེ་ཤེས་ཀྱི་མཚན་ཉིད་དམ། ངོ་བོ་དེ་དག་གཟུགས་སོགས་ཀྱིས་འདུས་བྱས་པ་མ་ཡིན་པས་ཆོས་གང་གིས་ཀྱང་ཡེ་ཤེས་འདུ་མི་བྱེད་པ་དང༌། མཁྱེན་པའི་ཡེ་ཤེས་ཆོས་ཐམས་ཅད་ལ་རྣམ་པར་མི་རྟོག་པར་འཇུག་ཅིང༌། སངས་རྒྱས་ནས་དེ་བཞིན་གཤེགས་པས་ངེས་བདེན་གཉིས་ཀྱིས་བསྡུས་པའི་མཚན་ཉིད་ཐམས་ཅད་རབ་ཏུ་དབྱེ་བ་མཛད་པ་དང༌། ཀུན་རྫོབ་ཀྱི་མཚན་ཉིད་ཐམས་ཅད་ཡིན་ལུགས་ལ་མེད་པར་མཁྱེན་པའི་ཡེ་ཤེས་ཆགས་པ་མེད་པ་གང་ཡིན་པ་དེ་ཉིད་ལ། ལམ་ཤེས་ཉིད་ཀྱི་སྐབས་ཀྱི་ནི་ཤེས་པ་འམ། མཁྱེན་པའི་མཚན་ཉིད་དེ་ངོ་བོ་ཡིན་པར་བཞེད་པ་ཡིན་ནོ། ། གསུམ་པ་སངས་རྒྱས་ཀྱི་སའི་རྣམ་མཁྱེན་གྱི་ཚུལ་མཁྱེན་པའི་མཚན་ཉིད་ནི། མདོ་ལས། སངས་རྒྱས་ཀྱི་ཤེར་ཕྱིན་འདི་ལ་རྟེན་ཅིང་སྤྱོད་དོ། །ཞེས་སོགས་ཀྱི་དོན། དེ་ནི་ཉིད་ཀྱི་ཆོས་བརྟེན་ནས། །གནས་དང་གུས་པར་བྱ་བ་དང༌། །བླ་མ་ཉིད་དང་མཉེས་པ་དང༌། །དེ་ལ་མཆོད་དང་བྱེད་མེད་དང༌། །ཀུན་ཏུ་འཇུག་མཁྱེན་གང་ཡིན་དང༌། །མ་མཐོང་སྟོན་པར་མཛད་པ་དང༌། །འཇིག་རྟེན་སྟོང་ཉིད་རྣམ་པ་དང༌། །བརྗོད་དང་ཤེས་མཛད་མངོན་སུམ་མཛད། བསམ་མི་ཁྱབ་དང་ཞི་ཉིད་སྟོན། །འཇིག་རྟེན་འདུ་ཤེས་འགོག་པ་ལ། །རྣམ་པ་ཀུན་མཁྱེན་ཚུལ་ལ་ནི། །ཤེས་པའི་མཉམ་ཉིད་ཅེས་བཤད་དོ། །ཞེས་པ་ལ་སངས་རྒྱས་དེ་ནི་རང་ཉིད་ཀྱི་ཆོས་ཤེར་ཕྱིན་ལ་བརྟེན་ནས་བྱས་པ་མཁྱེན་པར་གནས་པ་དང༌། ཤེར་ཕྱིན་ལ་གུས་པར་བྱ་བ་རིམ་གྲོ་དང༌། བླ་མ་ཉིད་བཀུར་སྟི་དང༌། མཉེས་པ་སྟི་སྟང་དང༌། ཤེར་ཕྱིན་དེ་ལ་མཆོད་པ་མཛད་པ་ནི་བྱས་པ་མཁྱེན་པའི་ཡེ་ཤེས་དང༌། ཆོས་ཐམས་ཅད་བྱེད་པ་མེད་པར་མཁྱེན་པ་དང་མཁྱེན་པའི་ཡེ་ཤེས་བྱས་པ་མེད་པར་ཆོས་ཀུན་ཏུ་འཇུག་ཅིང་ཞུགས་པའི་མཁྱེན་པ་གང་ཡིན་པ་དང༌། གཟུགས་སོགས་དངོས་པོའི་ཆོས་ཐམས་ཅད་མ་མཐོང་བའི་ཕྱིར་གཤེས་ལུགས་ཐམས་ཅད་སྟོན་ཅིང་མཁྱེན་པར་མཛད་པ་དང༌། འཇིག་རྟེན་སྟོང་པ་ཉིད་ཀྱི་རྣམ་པ་མཁྱེན་པ་དང༌། འཇིག་རྟེན་སྟོང་པར་བརྗོད་པ་མཛད་པའི་མཁྱེན་པ་དང༌། འཇིག་རྟེན་སྟོང་བར་ཤེས་པ་མཛད་པའི་མཁྱེན་པ་དང༌། འཇིག་རྟེན་ན་དངོས་པོ་ཐམས་ཅད་ཀྱིས་སྟོང་པར་མངོན་སུམ་དུ་མཛད་པའི་མཁྱེན་པ་དང༌། འཇིག་རྟེན་བསམ་གྱིས་མི་ཁྱབ་པར་སྟོན་པ་སྟེ་མཁྱེན་པ་དང༌། འཇིག་རྟེན་ཞི་བ་ཉིད་དུ་སྟོན་པ་དང་མཁྱེན་པ་དང༌། འཇིག་རྟེན་འདི་དང་ཕ་རོལ་གྱི་འདུ་ཤེས་འགོག་པའི་ཡེ་ཤེས་དེ་ཉིད་ལ། སངས་རྒྱས་ཀྱི་རྣམ་པ་ཀུན་མཁྱེན་པའི་ཚུལ་ལ། ཇི་ལྟ་བ་དང་ཇི་སྙེད་པ་ཐམས་ཅད་ཇི་ལྟ་བ་བཞིན་དུ་ཤེས་པའི་མཚན་ཉིད་དམ་ངོ་བོ་ཡིན་ཞེས་བཤད་པ་ཉིད་དོ། །དེ་རྣམས་ཀྱིས་ནི་གློ་བུར་གྱི་དྲི་མ་བག་ཆགས་དང་བཅས་པ་སྤངས་པའི་དེ་བཞིན་ཉིད་སངས་རྒྱས་ཀྱིས་ས་སྡུད་པའི་མཁྱེན་པ་གསུམ་གྱི་ངོ་བོ་གནས་ལུགས་ཇི་ལྟ་བ་བཞིན་དུ་ཤེས་པའི་མཚན་ཉིད་དམ་རང་བཞིན་བཤད་ཟིན་ཏོ། ། ༢ ཁྱད་མཚན་རྒྱས་པར་བཤད་པ། ད་ནི་གཉིས་པ་འབྲས་བུའི་མཁྱེན་པ་གསུམ་དེ་ཐོབ་བྱེད་ཀྱི་ལམ་ཁྱད་པར་ཅན་གྱི་ཁྱད་པར་གྱི་མཚན་ཉིད་བཤད་པ་ལ་བསྟན་པ་དང་བཤད་པ་གཉིས་ལས་དང་པོ། །བསམ་མི་ཁྱབ་སོགས་ཁྱད་པར་གྱིས། །ཁྱད་ཞུགས་བདེན་པའི་སྦྱོད་ཡུལ་ཅན། །སྐད་ཅིག་མ་ནི་བཅུ་དྲུག་གིས། །ཁྱད་པར་མཚན་ཉིད་བཤད་པ་ཡིན། །ཞེས་པ་ལ་སངས་རྒྱས་ཀྱི་དོན་བསམ་གྱིས་མི་ཁྱབ་པའི་དོན་དུ་ཉེ་བར་གནས་པ་ལ་སོགས་པ་ཁྱད་པར་དུ་བྱེད་པའི་ཆོས་རྣམས་ཀྱིས་ཁྱད་བཞུགས་པའི་ཐེག་ཆེན་གྱི་ལམ། བདེན་པ་བཞིའི་ཡུལ་ལ་སྤྱོད་པའི་ཡུལ་ཅན་གྱི་སྐད་ཅིག་མ་ནི་བཅུ་དྲུག་མདོ་ལས་བཤད་པ་དག་གིས་ཐེག་དམན་ཀྱིས་ལམ་ལས་ཁྱད་པར་དུ་བྱེད་པའི་ཆོས་ཀྱི་མཚན་ཉིད་དམ་རང་བཞིན་བཤད་པ་ཡིན་ནོ། ། གཉིས་པ་སྐད་ཅིག་མ་བཅུ་དྲུག་རྒྱས་པར་བཤད་པ་ནི། མདོ་ལས་ཤེར་ཕྱིན་འདི་སངས་རྒྱས་ཀྱི་དོན་བསམ་གྱིས་མི་ཁྱབ་པ་དང་མི་མཉམ་པ་དང་མཉམ་པ་དང་གཞལ་དུ་མེད་པ་དང༌། བགྲང་དུ་མེད་པའི་དོན་དུ་ཉེ་བར་གནས་ཞེས་སོགས་ཀྱི་དོན། བསམ་མི་ཁྱབ་དང་མི་མཉམ་དང༌། གཞལ་དང་བགྲང་ལས་ཡང་དག་འདས། །འཕགས་པ་ཀུན་སྡུད་མཁས་པ་ཡིས། །རིག་བྱ་ཐུན་མོང་མིན་ཤེས་ཉིད། །མྱུར་ཤེས་བྲི་དང་གང་མེད་དང༌། །སྒྲུབ་དང་ཡང་དག་འགྲུབ་པ་དང༌། །དམིགས་པ་རྟེན་དང་བཅས་པ་དང། །མཐའ་དག་པ་དང་ཡོངས་འཛིན་དང༌། །རོ་མྱང་མེད་དང་ཁྱད་པར་ནི། ། བཅུ་དྲུག་བདག་ཉིད་ཤེས་བྱ་སྟེ། །གང་གིས་ལམ་ནི་གཞན་དག་ལས། །ཁྱད་དུ་འཕགས་པས་ཁྱད་འཕགས་ལམ། །ཞེས་པ་ལ་ཐེག་ཆེན་གྱི་མཐོང་ལམ་འདི་ནི་སངས་རྒྱས་ཀྱི་དོན་བསམ་གྱིས་མི་ཁྱབ་པ་དང༌། མི་མཉམ་དང་མཉམ་པ་དང་གཞལ་བ་ལ་འདས་པ་དང༌། བགྲང་བ་ལ་འདས་པའི་དོན་དུ་ཉེ་བར་གནས་པ་སྟེ། དེ་ལྟར་ཉེ་བར་གནས་པའི་ཁྱད་པར་བཞི་ནི་སྡུག་བསྔལ་གྱི་བདེན་པའི་ཡུལ་ཅན་གྱི་སྐད་ཅིག་མ་བཞིའོ། །འདི་ནི་ཉི་ཁྲིའི་ལེའུ་སོ་བཞི་པ་ལས་སྟོན་ནོ། །ཤེར་ཕྱིན་ཟབ་མོ་ནི་ཕར་ཕྱིན་ལྔ་ནས་རྣམ་མཁྱེན་གྱི་བར་ཁྱད་པར་དུ་འཕགས་པའི་ཆོས་ཀུན་སྡུད་པའི་དང༌། མཁས་ཤིང་འཛངས་པ་ཡིས་རིག་པར་བྱ་བའི་དང༌། ཐེག་ཆེན་ལམ་འདིའི་སྤང་རྟོགས་ནི། ཉན་རང་གི་སྤང་རྟོགས་ཐུན་མོང་མ་ཡིན་པར་ཤེས་པའི་དང༌། ལམ་འདི་ལ་སློབ་པ་དེ་མྱུར་དུ་ངེས་པར་འབྱུང་བར་ཤེས་པར་བྱ་བའི་ཁྱད་པར་དེ་བཞི་ནི། ཀུན་འབྱུང་གི་བདེན་པའི་ཡུལ་ཅན་གྱི་སྐད་ཅིག་མ་བཞིའོ། །འདི་ལ་བསླབས་ཤིང་དུས་གསུམ་གྱི་འཕགས་པ་ཀུན་འབྱུང་ཡང་ཤེར་ཕྱིན་གྱི་ལམ་འདི་ལ་བྲི་བ་མེད་བ་དང་གང་བ་མེད་པའི་དང༌། སྔོན་ལམ་འདི་ལ་གོམས་པའི་བག་ཆགས་ཀྱིས་འདིར་ཡང་འགྲོ་འོང་ལ་སོགས་པའི་གནས་སྐབས་ཐམས་ཅད་དུ་རྒྱུན་མ་འཆད་པར་རྩེ་གཅིག་པའི་ཡིད་ཀྱིས་ལམ་འདི་སྒྲུབ་པའི་དང༌། བླ་མེད་པའི་བྱང་ཆུབ་ཡང་དག་པར་འགྲུབ་པའི་དང༌། གྲུ་ཞིག་པ་ཤིང་དུམ་ལ་བརྟེན་པ་དང༌། བུམ་པ་སོ་བཏང་པའི་དཔེ་གཉིས་ཀྱིས་ཉན་རང་གི་ས་གཉིས་ལས་འདའ་བའི་སླད་དུ་ཤེར་ཕྱིན་ལ་ལྷག་པའི་དམིགས་པའི་ཁྱད་པར་དེ་བཞི་ནི་འགོག་པའི་བདེན་པའི་ཡུལ་ཅན་གྱི་སྐད་ཅིག་མ་བཞིའོ། །གྲུ་ལེགས་པར་བཅོས་པ་དང༌། མི་རྒད་པོ་སྐྱེས་བུ་གཉིས་ལ་རྟེན་པའི་གཉིས་ཀྱིས་ཤེར་ཕྱིན་དང་ཐབས་མཁས་པ་གཉིས་ཀྱིས་རྟེན་དང་བཅས་པས་ས་གཉིས་ལས་འདའ་བའི་དང༌། ཤེར་ཕྱིན་ནི་ཕ་རོལ་གྱི་མཐར་ཕྱིན་པས་མཚན་འཛིན་གྱིས་ཕ་རོལ་གྱི་མཐའ་རྣམ་པར་དག་པའི་དང༌། ཤེར་ཕྱིན་ཟབ་མོ་སྟོན་པའི་ཡོངས་སུ་འཛིན་བསྟེན་པའི་དང༌། ཐམས་ཅད་ལ་འདོད་པ་མེད་པས་ཆོས་ཐམས་ཅད་ལ་རོ་མྱང་བ་མེད་པའི་ཁྱད་པར་དེ་བཞི་ནི་ལམ་གྱི་བདེན་པའི་ཡུལ་ཅན་གྱི་སྐད་ཅིག་མ་བཞིའོ། །དེ་ལྟར་ཐེག་ཆེན་མཐོང་བའི་ལམ་ལ་ཁྱད་པར་གྱི་ཆོས་སྐད་ཅིག་མ་བཅུ་དྲུག་གི་བདག་ཉིད་དུ་ཤེས་པར་བྱ་སྟེ། ཁྱད་པར་གྱི་ཆོས་གང་གིས་བྱང་ཆུབ་སེམས་དཔའི་ལམ་ནི་གཞན་ཉན་རང་དག་གི་ལམ་ལས་ཆོས་བཅུ་དྲུག་གིས་ཁྱད་པར་དུ་འཕགས་པས་ཉན་རང་ལས་ཁྱད་པར་ཆེ་བའི་ལམ་ཡིན་ནོ། །འདིར་ཐེག་ཆེན་གྱི་མཐོང་ལམ་ཁྱད་འཕགས་སུ་བསྟན་པས་སྒོམ་ལམ་ཁྱད་འཕགས་སུ་དོན་གྱིས་གོ་བ་ཡིན་ནོ། །དེ་རྣམས་ཉི་ཁྲིའི་ལེའུ་སོ་བཞི་པ་དང༌། སོ་ལྔའི་སྐབས་ནས་ཀྱང་སྟོན་ནོ། །དེ་རྣམས་ཀྱིས་ལམ་གྱི་ཁྱད་པར་དུ་བྱེད་ཆོས་ཀྱི་ངོ་བོ་འམ་མཚན་ཉིད་བཤད་ཟིན་ཏོ། ། ༣ བྱེད་མཚན་རྒྱས་པར་བཤད་པ། ད་ནི་ཐེག་ཆེན་གྱི་ལམ་དེའི་བྱེད་པའི་མཚན་ཉིད་དམ་རང་བཞིན་བཤད་པར་བྱ་སྟེ། མདོ་ལས། བྱང་ཆུབ་སེམས་དཔའ་རྣམས་འཇིག་རྟེན་ལས་ཕན་པ་དང་བདེ་བ་དང་མགོན་དང་སྐྱབས་སུ་འགྱུར་བར་བྱའོ་ཞེས་བླ་མེད་བྱང་ཆུབ་ཏུ་ཞུགས་སོ་ཞེས་སོགས་ཀྱི་དོན། ཕན་དང་བདེ་དང་སྐྱོབ་པ་དང༌། །མི་རྣམས་ཀྱིས་ནི་སྐྱབས་དག་དང༌། །གནས་དང་དཔུང་གཉེན་གླིང་དང་ནི། །ཡོངས་འདྲེན་པ་ཞེས་བྱ་བ་དང༌། །ལྷུན་གྱིས་གྲུབ་དང་ཐེག་གསུམ་གྱི། །འབྲས་བུ་མངོན་སུམ་མི་བྱེད་བདག །ཐ་མ་རྟེན་གྱི་མཛད་པ་སྟེ། །འདི་ནི་བྱེད་པའི་མཚན་ཉིད་ཡིན། །ཞེས་པ་ལ་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང་ཞེས་པའི་དོན་ལམ་ཤེས་ཀྱི་བྱེད་པ་དགུ་འདི་ནས་གསུངས་སོ། །དེ་ལ་སེམས་ཅན་འགྲོ་བ་རྒྱུད་ལྔ་ནས་བཏོན་ཅིང་མྱང་འདས་ལ་འགོད་པའི་བསམ་པ་ཕན་པ་དང༌། སྡུག་བསྔལ་ལས་གྲོལ་ཞིང་མྱ་ངན་འདས་ལ་འགོད་པའི་བསམ་པ་ནི་བདེ་བ་དང་སྡུག་བསྔལ་ཐམས་ཅད་སྤངས་པའི་ཕྱིར་ཆོས་སྟོན་པའི་བསམ་པ་ནི་མགོན་ནམ་སྐྱོབས་པ་དང༌། སྐྱེ་རྒ་ན་འཆིའི་སྡུག་བསྔལ་ལས་བཀྲོལ་ཞིང་ཕུང་པོ་མ་ལུས་པའི་མྱང་འདས་ལས་འགོད་པའི་བསམ་པ་ནི་སྐྱབས་དང༌། ཆོས་ཐམས་ཅད་ལ་འདྲེ་བ་མེད་པར་བྱ་བའི་ཕྱིར་ཆོས་སྟོན་པའི་བསམ་པ་ནི་གནས་དང༌། གཟུགས་སོགས་ཀྱི་ཕ་རོལ་གང་ཡིན་པ་དེ་གཟུགས་སོགས་མ་ཡིན་པར་ཆོས་སྟོན་པའི་བསམ་པ་ནི་དཔུང་གཉེན་དང༌། གླིང་བཞིན་དུ་ཐོག་མཐའ་ཡོངས་སུ་ཆད་པ་ཞི་བ་དང་བཟང་པོའི་ཆོས་སྟོན་པའི་བསམ་པ་ནི་གླིང་དང༌། གཟུགས་སོགས་སྐྱེ་འགག་ཉོན་མོངས་རྣམ་བྱང་མེད་པ་ཡོངས་སུ་གྲུབ་ཀྱི་ཆོས་སྟོན་པའི་བསམ་པ་ནི་ཡོངས་སུ་འདྲེན་པ་ཞེས་བྱ་བ་དང༌། གཞན་དོན་དུ་གཟུགས་སོགས་ཆོས་ཐམས་ཅད་ནམ་མཁའི་ངང་ཚུལ་ཅན་དུ་ལྷུན་གྱིས་གྲུབ་པ་ཞེས་བྱ་བར་ཆོས་སྟོན་པ་དང༌། ཞེན་པའི་སྒོ་ནས་ཐེག་པ་གསུམ་གྱི་འབྲས་བུ་མངོན་སུམ་དུ་མི་བྱེད་པ་དེ་གཉིས་ཀའི་བདག་ནི་བྱེད་པ་དགུའི་ཐ་མ་རྟེན་གྱི་མཛད་པའམ་བྱེད་པ་སྟེ། དེ་ལྟར་བསྟན་པ་དགུ་པ་འདི་ནི་ལམ་གྱི་བྱེད་པའི་ངོ་བོ་འམ་མཚན་ཉིད་ཡིན་ནོ། །འདིར་གཞན་དག་བྱེད་པ་བཅུ་གཅིག་ཏུ་འཆད་པ་ནི་མདོ་དང་མི་མཐུན་ནོ། ། མདོ་ལས། བྱེད་པ་དགུ་གསུངས་པ་ནི། ཁྲི་བརྒྱད་སྟོང་པ་ལས་རབ་ཏུ་གསལ་ལོ། །དབུ་མ་པ་དབྱིག་གཉེན་གྱིས་ཀྱང༌། མདོ་དང༌། མཐུན་པ་བྱེད་པ་དགུ་གསུངས་སོ། །མཁྱེན་གསུམ་སོ་སོ་ལ་བྱེད་པ་བགོས་ནས་སྦྱོར་བ་དང༌། ཐ་མ་རྣམ་མཁྱེན་གྱི་མཛད་པ་ཡིན་ཟེར་བ་ལ་ཡང་ཡིད་ཆེས་པའི་ཤེས་བྱེད་མེད་ཀྱི་སྟེང་དུ། མདོ་དང་འགལ་ནས་སྣང་ངོ༌། །མདོ་ལས་བྱང་ཆུབ་སེམས་དཔའི་འཇིག་རྟེན་གྱི་རྟེན་དུ་འགྱུར་བར་བྱའོ། །ཞེས་བླ་མེད་པའི་བྱང་ཆུབ་ཏུ་ཞུགས་སོ། །ཞེས། ཁྲི་བརྒྱད་སྟོང་པར་འབྱུང་ངོ༌། །རྟེན་ཞེས་པའི་འདི་ཉིད་ཉི་ཁྲི་ལ་སོགས་སུ་ལམ་དང་བསྡུས་དོན་འགྲེལ་པར་བགྲོད་པ་ཞེས་པར་འབྱུང་ངོ༌། །ཉི་ཁྲིའི་ལོགས་སུ་གནས་ཞེས་པ་སྟེ་རྟེན་ཞེས་པར་བསྒྱུར་ནས་ཡོད་དེ། མཐའི་མཛད་པ་ཞེས་པ་ནི། ཕན་དང་བདེ་དང་ཞེས་པ་ལ་སོགས་ཐམས་ཅད་ལ་སྦྱར་རྒྱུར་སྣང་ངོ༌། ། བྱེད་པ་འདི་རྣམས་ཁྲི་བརྒྱད་སྟོང་པའི་ལེའུ་ཞེ་དྲུག་པ་ན་ཡོད་ཅིང་ཉི་ཁྲི་སོ་དྲུག་པས་སྟོན་དེ། དེ་རྣམས་ཀྱིས་ལམ་ཤེས་ཀྱིས་འཇིག་རྟེན་གྱི་དོན་བྱེད་པའི་མཚན་ཉིད་བཤད་ཟིན་ཏོ། ། ༤ ངོ་བོ་ཉིད་མཚན་རྒྱས་པར་བཤད་པ། ད་ནི་མཚན་ཉིད་བཞི་པ་ལམ་ཤེས་དེའི་ངོ་བོ་ཉིད་ཀྱི་མཚན་ཉིད་བཤད་པར་བྱ་སྟེ། ཉི་ཁྲིའི་ལེའུ་སོ་བདུན་པར་བྱང་ཆུབ་སེམས་དཔའ་འདོད་ཆགས་དང༌། ཞེ་སྡང་དང༌། གཏི་མུག་དང༌། དེ་དག་གི་མཚན་མ་དང༌། དེ་དག་གི་རྣམ་པས་དབེན་པའི་རང་བཞིན་དུ་འགྱུར་རོ། །ཞེས་སོགས་ཀྱི་དོན། ཉོན་མོངས་རྟགས་དང་མཚན་མ་དང༌། །མི་མཐུན་ཕྱོགས་དང་གཉེན་པོ་དག །དབེན་དང་དཀའ་དང་ངེས་པ་དང༌། །ཆེད་དུ་བྱ་དང་མི་དམིགས་དང༌། །མངོན་པར་ཞེན་པ་བཀག་པ་དང༌། ། དམིགས་པ་ཞེས་བྱ་གང་ཡིན་དང༌། །མི་མཐུན་ཐོགས་པ་མེད་དང་དེ། །གཞི་མེད་འགྲོ་མེད་སྐྱེ་མེད་དང༌། །དེ་བཞིན་ཉིད་ནི་མི་དམིགས་དང༌། །ངོ་བོ་ཉིད་བཅུ་དྲུག་བདག་ཉིད། །མཚན་གཞི་ལྟ་བུར་མཚོན་པས་ན། །མཚན་ཉིད་བཞི་པར་བཞེད་པ་ཡིན། ཞེས་པ་ལ་ཆགས་སོགས་ཉོན་མོངས་ཀྱིས་དབེན་པ་དང༌། ཆགས་སོགས་ལ་སྤྱོད་པའི་རྟགས་ཀྱིས་དབེན་པ་དང༌། མཚན་མ་སྟེ་ཆགས་སོགས་ཀྱི་དམིགས་པས་དབེན་པ་དང༌། མི་མཐུན་ཕྱོགས་དག་གཉེན་པོའི་སྤྲོས་པ་དག་གིས་དབེན་པ་རྣམ་མཁྱེན་གྱི་ངང་ཚུལ་དང༌། སེམས་ཅན་གྱི་དོན་དུ་གོ་ཆ་བགོས་ཀྱང་སེམས་ཅན་མི་དམིགས་པ་ནི། ངལ་བ་དང་དུ་ལེན་པས་དཀའ་བ་བགྱིད་པ་དང༌། སེམས་ཅན་ཐམས་ཅད་མྱ་ངན་འདས་པ་ལ་འགོད་པའི་གོ་ཆ་བགོས་པ་དེ་ཉན་རང་གི་སར་མི་ལྟུང་བར་ངེས་པ་དང༌། ཉི་ཚེ་བ་མ་ཡིན་པ་སེམས་ཅན་ཐམས་ཅད་དང་རྣམ་མཁྱེན་གྱི་ཡེ་ཤེས་ཀྱི་ཆེད་དུ་གོ་ཆ་བྱ་བ་དང༌། ཤེར་ཕྱིན་བསྒོམ་པ་ནི་ནམ་མཁའ་བསྒོམ་པའི་ཕྱིར་ཤེར་ཕྱིན་ལ་བསྒོམ་པ་དང་བསྒོམ་བྱ་དང༌། བསྒོམ་པ་པོ་མི་དམིགས་པ་དང༌། སྦྱིན་སོགས་རྣམ་བྱང་གི་ཆོས་ཐམས་ཅད་ལ་མངོན་པར་ཆགས་ཅིང་ཞེན་པ་བཀག་པ་དང༌། འདི་ནས་ཉི་ཁྲིའི་ལེའུ་སོ་བརྒྱད་པས་སྟོན་ནོ། ། ཤེར་ཕྱིན་ཟབ་མོ་འདི་མཁས་ཤིང་འཛངས་པས་དམིགས་ཤིང་རིག་པར་བྱ་བ་སྔར་ཁྱད་པར་གྱིས་མཚན་ཉིད་ཀྱི་སྐབས་སུ་བསྟན་པ་གང་ཡིན་པ་དེ་ཉིད་དང༌། གཟུང་འཛིན་ཐམས་ཅད་བྲལ་བས་འཇིག་རྟེན་ཐམས་ཅད་བྲལ་བས་འཇིག་རྟེན་ཐམས་ཅད་ཡིད་ཆེས་པར་དཀའ་བའི་ཆོས་འཇིག་རྟེན་ཐམས་ཅད་མི་མཐུན་པ་དང༌། འཇིག་རྟེན་དང་མི་མཐུན་ཡང་སྦྱིན་སོགས་རྣམ་བྱང་གི་ཆོས་ཐམས་ཅད་དང་མཐུན་པའི་ཆོས་ནི་གཟུགས་སོགས་ལ་ཐོགས་པ་མེད་པ་དང༌། དེ་བཞིན་ཉིད་ཀྱི་ཤེར་ཕྱིན་ཟབ་མོའི་ཆོས་འདི་ལ་དངོས་པོའི་རྟེན་ནམ་གཞི་མེད་པ་དང༌། འཕགས་པ་རབ་འབྱོར་གྱི་དེ་བཞིན་ཉིད་ཀྱི་ངོ་བོ་གྱུར་པའི་ཤེར་ཕྱིན་འདི་ལ་སྤྲོས་བཅས་ཀྱི་འགྲོ་འོང་མེད་པ་དང༌། སྐྱེ་བའི་ཆོས་ཐམས་ཅད་མི་དམིགས་པའི་ཕྱིར། རབ་འབྱོར་གྱི་ངོ་བོར་གྱུར་པའི་ལམ་ཤེས་ཀྱི་ཤེར་ཕྱིན་འདི་ཆོས་གང་གི་ཡང་རྗེས་སུ་སྐྱེ་བ་མེད་པ་དང༌། ཆོས་དབྱིངས་ཟབ་མོའི་ཤེར་ཕྱིན་འདི་ལ་མཚན་མའི་ཚུལ་གྱིས་གཟུགས་སོགས་དང་དེའི་དེ་བཞིན་ཉིད་ནི་མི་དམིགས་པ་དང༌། མཚན་ཉིད་ངོ་བོ་ཉིད་བཅུ་དྲུག་གི་བདག་ཉིད་རིལ་པོ་གཅིག་ཏུ་གྱུར་པ་འདིས་མཚན་གཞི་ལ་ཐ་དད་པ་ལྟ་བུར་མཚོན་བྱ་ལམ་ཤེས་ཀྱི་ངོ་བོ་ཉིད་མཚོན་པར་བྱེད་པས་ནི། སྦྱིར་མཚན་ཉིད་བཞི་སྟོན་པའི་སྐབས་ཡིན་པ་ལ། སྔར་གསུམ་བཤད་ནས་ངོ་བོ་ཉིད་ཀྱི་མཚན་ཉིད་འདི་བཞི་པར་བཤད་པ་ཡིན་ནོ། །ཁ་ཅིག་གིས་ངོ་བོ་ཉིད་འདི་རྣམ་མཁྱེན་གསུམ་ལ་སོ་སོར་སྦྱར་ནས་འཆད་པ་ནི་ཤེས་བྱེད་ཡིད་ཆེས་པ་མི་སྣང་ངོ༌། །སྤྱིར་མཚན་ཉིད་དེ་རྣམས་ཀྱིས་སྦྱོར་བ་མཚོན་པ་དང་ཁྱད་པར་ངོ་བོ་ཉིད་ཀྱི་བཅུ་དྲུག་གིས་མཁྱེན་གསུམ་གྱི་སྦྱོར་བ་མཚོན་པར་འཆད་པ་ནི་མདོ་དང་གཞུང་གི་དོན་ལས་གོལ་བ་ཡིན་ནོ། །དེས་ན་མཁྱེན་པ་གསུམ་ག་བསྒོམ་པའི་སྦྱོར་བ་དེ་ཉིད་མཁྱེན་པ་གསུམ་ག་སྒོམ་པའི་སྦྱོར་བ་ཡིན་པས་མཁྱེན་གསུམ་གྱི་སྦྱོར་བ་སོ་སོར་ངེས་པ་མེད་པའི་ཕྱིར་དེ་དག་གི་སྦྱོར་བ་སོ་སོར་མཚོན་པའི་མཚན་ཉིད་ནི་རྒྱལ་བ་དང༌། རྒྱལ་ཚབ་ལ་སོགས་པ་ཆོས་ཀྱི་བདག་པོ་རྣམས་ཀྱིས་མ་གསུངས་སོ། །འོ་ན་སྐབས་གསུམ་པ་དང༌། འདིར་བཤད་པའི་ཁྱད་པར་ཅི་ཞེ་ན། དེ་ནི་དགོས་པ་དང༌། གདུལ་བྱ་གཞན་དང་གཞན་ལ་བརྟེན་ནས་སྦྱོར་བའི་དོན་གཅིག་ཉིད་ཟློས་ནས་གསུངས་པ་ཡིན་ཏེ། དཔལ་ཕྱོགས་ཀྱི་གླང་པོའི་ཞལ་སྔ་ནས། སླར་ཡང་དོན་གཞན་ལ་བརྟེན་ནས་དོན་དེ་ཉིད་ནི་ཟློས་པ་ཡིན། ཞེས་གསུངས་པའི་དོན་ཏོ། །དེ་བཞིན་དུ་སྦྱོར་ལམ་དང་མཐོང་བསྒོམ་ལ་སོགས་པ་ཡང་ཡང་གསུངས་པ་རྣམས་ཀྱང་དགོས་པའི་དབང་གིས། སྒྲ་མ་ཟློས་ཀྱང༌། དོན་བཟློས་པ་ཡིན་པར་ཤེས་པར་བྱའོ། །ཟློས་པ་ལ་ཡང་སྒྲ་ཟློས་པ་དང༌། དོན་ཟློས་པ་དང༌། སྐྱོན་ཅན་དང་སྐྱོན་མེད་དེ་བཞི་ཡོད་པར་རྟོགས་པ་དགོས་སོ། །དེ་རྣམས་ཀྱིས་མཚན་ཉིད་བཅས་ཞེས་པ་སྟེ་བཤད་ཟིན་ཏོ། ། ༧༽ཚོགས་ལམ་ཀྱི་ངོ་བོ་ཐར་པ་ཆ་མཐུན་བཤད་པ། ད་ནི་ཚོགས་ལམ་ཀྱི་ངོ་བོ་ཐར་པ་ཆ་མཐུན་བཤད་པར་བྱའོ། །མདོ་ལས། མཚན་མ་དང་བྲལ་བར་སྦྱིན་སོགས་སྦྱོང་ཞིང་སྒོམ་པ་ནི་ཐབས་མཁས་པའོ། །ཞེས་སོགས་ཀྱི་དོན་དང༌། ཐབས་མཁས་པ་བསྟན་པ་དང༌། ཆོས་ལྔ་བཤད་པ་གཉིས་ལས་དང་པོ་ནི། མཚན་མེད་རབ་ཏུ་སྦྱིན་ལ་སོགས། །ཡང་དག་སྒྲུབ་ལ་མཁས་པ་ནི། །རྣམ་པ་ཐམས་ཅད་རྟོགས་འདི་ལ། །ཐར་པའི་ཆ་དང་མཐུན་པར་འདོད། །ཞེས་པ་ལ་མཚན་མ་མེད་པའི་རབ་ཏུ་སྦྱིན་པ་དང༌། ཚུལ་ཁྲིམས་ལ་སོགས་པ་ཡང་དག་པ་ཕྱིན་ཅི་མ་ལོག་པར་སྒྲུབ་པའི་ཐབས་ལ་མཁས་པ་ཚོགས་ལམ་གྱི་ངོ་བོ་ནི། གཞི་ཤེར་ཕྱིན་ཆོས་ཀྱི་དབྱིངས་ཟབ་མོའི་རྣམ་པ་བརྒྱ་དང་བདུན་ཅུ་རྩ་གསུམ་ཐམས་ཅད་མངོན་སུམ་དུ་རྫོགས་པར་རྟོགས་པའི་སྦྱོར་བ་སྟོན་པའི་སྐབས་འདི་ལ། ཐར་པའི་ཆ་དང་མཐུན་པར་འདོད་ཅིང་བསྟན་ཏོ། །གཉིས་པ་དད་སོགས་ཆོས་ལྔ་བཤད་པ་ནི། སངས་རྒྱས་སོགས་དམིགས་དད་པ་དང༌། ། སྦྱིན་སོགས་སྦྱོད་ཡུལ་བརྩོན་འགྲུས་དང༌། །བསམ་པ་ཕུན་ཚོགས་དྲན་པ་དང༌། །རྣམ་པར་མི་རྟོག་ཏིང་འཛིན་དང༌། །ཆོས་རྣམས་རྣམ་པ་ཐམས་ཅད་དུ། །ཤེས་པའི་ཤེས་རབ་དང་རྣམ་ལྔ། །རྫོགས་པའི་བྱང་ཆུབ་རྣོན་པོ་ཡིས། །རྟོགས་སླ་རྟུལ་པོས་རྟོགས་དཀར་བཞེད། ཞེས་པ་ལ་སངས་རྒྱས་ལ་སོགས་པ་དཀོན་མཆོག་གསུམ་དང་ཐེག་ཆེན་གྱི་ཆོས་ལ་དམིགས་པའི་དད་པ་ཕུན་སུམ་ཚོགས་པ་དང༌། སྦྱིན་པ་དང་ཚུལ་ཁྲིམས་ལ་སོགས་པ་ཕ་རོལ་ཏུ་ཕྱིན་པ་རྣམས་ལ་སྤྱོད་པའི་ཡུལ་ཅན་གྱི་བརྩོན་འགྲུས་ཕུན་སུམ་ཚོགས་པ་དང༌། ཐོས་པའི་ཆོས་ཀྱི་ཚིག་དོན་མི་བརྗེད་པ་འཛིན་པ་བསམ་པའི་ཤེས་རབ་ཕན་སུམ་ཚོགས་པའི་དྲན་པ་དང༌། སྒོམ་པའི་ཤེས་རབ་ཆོས་ཐམས་ཅད་ལ་རྣམ་པར་མི་རྟོག་པའི་ཏིང་ངེ་འཛིན་དང༌། བདེན་གཉིས་ཀྱིས་བསྡུས་པའི་ཆོས་རྣམས་ཀྱི་ཡིན་ལུགས་ཀྱི་རྣམ་པ་ཐམས་ཅད་ཕྱིན་ཅི་མ་ལོག་པ་ཉིད་དུ་ཤེས་པའི་ཤེས་རབ་དང་རྣམ་པ་ལྔ་ཡིན་ནོ། །གང་གི་ཕྱིར་མཚན་འཛིན་དང་བཅས་བས་དད་སོགས་དེ་དག་དབང་པོ་རྟུལ་པོའི་ལམ་དང་མཚན་འཛིན་དང་བྲལ་བས་དད་སོགས་དེ་དག་དབང་པོ་རྣོན་པོའི་ལམ་དུ་འགྱུར་བ་དེའི་ཕྱིར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་མཚན་མ་དང་དམིགས་པ་མེད་པར་སྦྱོར་པའི་དབང་པོ་རྣོན་པོ་ཐབས་ལ་མཁས་པ་ཡིས་རྟོགས་པར་སླ་བ་དང་དམིགས་པ་དང་མཚན་མ་ལ་སྤྱོད་པའི་དབང་པོ་རྟུལ་པོ་ཐབས་ལ་མཁས་པ་དང་བྲལ་བས་རྟོགས་པར་དཀའ་བར་བཞེད་དོ། །བླ་མེད་བྱང་ཆུབ་ཀྱི་ངོ་བོར་གྱུར་པའི་གཟུགས་སོགས་ཆོས་ཐམས་ཅད་དམིགས་པ་དང་མཚན་མའི་རང་བཞིན་གྱིས་སྟོང་པའི་ཕྱིར་རོ། །དེ་རྣམས་ཀྱིས་ཐར་དང་ཞེས་པ་ཏེ། བཤད་ཟིན་ཏོ། ། ༨༽སྦྱོར་ལམ་གྱི་ངོ་བོ་ངེས་འབྱེད་ཆ་མཐུན་བཤད་པ། ད་ནི་སྦྱོར་ལམ་གྱི་ངོ་བོར་ངེས་འབྱེད་ཆ་མཐུན་བཤད་པར་བྱ་སྟེ། དེ་ལ་དྲོད་དང༌། རྩེ་མོ་དང༌། བཟོད་པ་དང༌། ཆོས་མཆོག་དེ་བཞི་རིམ་པ་ལྟར་འབྱུང་བ་ནི་མདོ་ལས། སེམས་ཅན་ཐམས་ཅད་ལ་མཉམ་པ་དང༌། བྱམས་པ་དང༌། སྙིང་རྗེའི་སེམས་ཀྱིས་དམིགས་པར་བྱའོ། །ཞེས་སོགས་ཀྱི་དོན། དྲོ་བ་རྣམས་ཀྱིས་དམིགས་པ་འདིར། །སེམས་ཅན་ཐམས་ཅད་ཡིན་པར་བསྔགས། །དེ་དག་ཉིད་ལ་སེམས་མཉམ་སོགས། །རྣམ་པ་དག་ནི་བཅུར་བཤད་དོ། །བདག་ཉིད་སྡིག་པ་ལས་ལྡོག་ཅིང༌། །སྦྱིན་ལ་སོགས་ལ་གནས་པས་གཞན། །དེ་དག་ལ་ནི་འགོད་པ་དང༌། །བསྔགས་པ་བརྗོད་དང་མཐུན་པ་ཉིད། །རྩེ་གྱུར་དེ་བཞིན་བཟོད་པ་ནི། །རང་གཞན་རྟེན་ཅན་བདེན་ཤེས་པ། ཆོས་མཆོག་དེ་བཞིན་སེམས་ཅན་རྣམས། །སྨིན་བྱེད་སོགས་ཀྱིས་ཤེས་པར་བྱ། །ཞེས་པ་ལ་སྦྱོར་ལམ་དྲོ་བ་ཆུང་ངུ་འབྲིང་ཆེན་པོ་རྣམས་ཀྱི་དམིགས་པ་ནི་སྐབས་འདིར་སེམས་ཅན་ཐམས་ཅད་ཡིན་པར་བསྔགས་པ་སྟེ་བསྟན་པའི་ཕྱིར། སྐབས་དང་པོར་བསྟན་པ་དང་མི་གཅིག་གོ །སེམས་ཅན་དེ་དག་ཉིད་ལ་ཚུལ་ཇི་ལྟར་དམིགས་ནས། བྱང་ཆུབ་ཀྱི་སེམས་རང་གཞན་མཉམ་པ་ཉིད་དམིགས་པ་དང༌། བྱམས་སྙིང་རྗེའི་སེམས་དང༌། ང་རྒྱལ་དང་གཡོ་བ་མེད་པའི་སེམས་དང༌། ཕན་པའི་སེམས་དང༌། ཁོང་ཁྲོ་མེད་ཅིང་མི་འཚེ་བའི་སེམས་དང༌། ཕ་མའི་སེམས་དང༌། ཕུ་ནུའི་སེམས་དང༌། གྲོགས་པོའི་སེམས་དང༌། གཉེན་གྱི་སེམས་དང༌། རུས་གཅིག་པའི་སེམས་ཀྱིས་དམིགས་པ་ལ་སོགས་པ་དམིགས་ཚུལ་གྱི་རྣམ་པར་དག་ནི་བཅུར་བཤད་དོ། །སྦྱོར་ལམ་རྩེ་མོ་ལ་གནས་པའི་བྱང་ཆུབ་སེམས་དཔའ་ནི། བདག་ཉིད་མི་དགེ་བ་བཅུའི་སྡིག་པ་ལས་ལྡོག་ཅིང་སྦྱིན་པ་ལ་སོགས་ཕ་རོལ་ཏུ་ཕྱིན་པ་རྣམས་ལ་གནས་པས། སེམས་ཅན་གཞན་སྡིག་པ་སྤོང་བ་དང༌། སྦྱིན་སོགས་སྤྱོད་པ་དེ་དག་ལ་ནི་འགོད་པ་དང༌། སྡིག་པ་སྤོང་བ་དང་སྦྱིན་སོགས་དེ་དག་གི་བསྔགས་པ་བརྗོད་པ་དང༌། སྡིག་པ་སྤངས་པ་དང་སྦྱིན་སོགས་ལ་སྤྱོད་པར་བྱེད་བཞིན་པ་དེ་དག་གི་ལེགས་པ་བརྗོད་ཅིང་མཐུན་པས་དགའ་བར་བྱེད་པ་ཉིད་རྩེ་མོར་གྱུར་པ་ཡིན་ནོ། །རྩེ་མོར་རང་གཞན་གཉི་གའི་དོན་ལ་བརྩོན་པ་དེ་བཞིན་དུ་སྦྱོར་ལམ་བཟོད་པ་ནི་རང་ཉིད་སྡུག་བསྔལ་ཤེས་པར་བྱེད། ཀུན་འབྱུང་སྤོང་བར་བྱེད། འགོག་པ་མངོན་སུམ་དུ་བྱེད། ལམ་བསྒོམ་པར་བྱེད་པ་དང༌། སེམས་ཅན་གཞན་ཡང་དེ་དག་ལ་བསྐུལ་ཞིང་འགོད་པ་དང༌། དེ་དག་གི་ལེགས་པ་བརྗོད་པ་དང༌། གཞན་དང་དེ་དག་ལ་ཞུགས་པ་དེ་དག་གི་ལེགས་པ་བརྗོད་ཅིང་མཐུན་པས་དགའ་བར་བྱེད་པའི་ཕྱིར། རང་གཞན་གཉིས་ཀ་ལ་བརྟེན་པ་ཅན་གྱི་བདེན་པ་བཞིའི་ཡུལ་ཅན་གྱི་ཤེས་པ་ཡིན་ནོ། །སྦྱོར་ལམ་ཆོས་མཆོག་ཀྱང༌། རྩེ་མོ་དང་བཟོད་པ་དེ་བཞིན་དུ་རང་ཉིད་སེམས་ཅན་རྣམས་སྨིན་པར་བྱེད་སོགས་པས་བསྡུས་པ་སངས་རྒྱས་ཀྱི་ཞིང་དག་བར་བྱེད། མངོན་ཤེས་དང༌། རྣམ་མཁྱེན་གྱི་ཡེ་ཤེས་བསྐྱེད་པར་བྱེད། ཆོས་ཕུན་སུམ་ཚོགས་པ་དང༌། དམིགས་པའི་ཆོས་གནས་པའི་འཛིན་པ་འཛིན་པར་བྱེད། གཞན་ཡང་དེ་དག་ལ། བསྐུལ་ཞིང་འགོད་པ་དང༌། དེ་དག་གི་ལེགས་པ་བརྗོད་པ་དང༌། གཞན་གང་དེ་དག་ལ་ཞུགས་པ་དེ་དག་གི་ལེགས་པ་བརྗོད་ཅིང་མཐུན་པས་དགའ་བར་བྱེད་པ་ཞེས་བྱ་བ་རྣམས་ཀྱིས་ཤེས་པར་བྱའོ། །དེ་རྣམས་ཀྱིས་ངེས་འབྱེད་ཆ་མཐུན་དང་ཞེས་པ་དེ་བཤད་ཟིན་ཏོ། ། ༩༽ཐེག་ཆེན་ལ་སློབ་པའི་ཕྱིར་མི་ལྡོག་གི་དགེ་འདུན་གྱི་ཚོགས་བཤད་པ། ད་ནི་ཐེག་ཆེན་ལ་སློབ་པའི་ཕྱིར་མི་ལྡོག་གི་དགེ་འདུན་ཀྱི་ཚོགས་བཤད་པར་བྱ་སྟེ། དེ་ལ་སྦྱོར་ལམ་པའི་ཕྱིར་མི་ལྡོག་པའི་རྟགས་དང༌། མཐོང་ལམ་པའི་ཕྱིར་མི་ལྡོག་པའི་རྟགས་དང༌། བསྒོམ་ལམ་གྱི་རང་བཞིན་བཤད་པ་དང་གསུམ་ཡོད་པ་ལ། སྦྱིར་བསྡུས་ཏེ་བསྟན་པ་དང༌། སོ་སོར་ཕྱེ་སྟེ་བཤད་པ་གཉིས་ལས། དང་པོ་ཉི་ཁྲིའི་ལེའུ་སོ་དགུ་པར། དེ་བཞིན་ཉིད་ཇི་ལྟ་བ་བཞིན་དུ་ཞུགས་ནས་དོན་དང་ལྡན་པར་སྨྲ་ཞིང༌། ལེགས་བཤད་ཚོལ་བའི་རྣམ་པ་དང་ཚུལ་དང་མཚན་མ་དེ་དག་ལྡན་པའི་བྱང་ཆུབ་སེམས་དཔའ་ཕྱིར་མི་ལྡོག་པ་རིག་པར་བྱའོ། །ཞེས་པའི་དོན། ངེས་འབྱེད་ཡན་ལག་ནས་བཟུངས་ཏེ། མཐོང་དང་གོམས་པའི་ལམ་དག་ལ། །བྱང་ཆུབ་སེམས་དཔའ་གང་དག་གནས། །དེ་འདིར་ཕྱིར་མི་ལྡོག་པའི་ཚོགས། །ཞེས་པ་ལ་ངེས་པར་འབྱེད་པའི་ཡན་ལག་སྦྱོར་ལམ་ནས་ཐོག་མ་བཟུངས་ཏེ། མཐོང་བའི་ལམ་དང༌། སྒོམ་པ་གོམས་པ་བྱེད་པའི་ལམ་དག་ལ་འཆད་འགྱུར་གྱི་རྟགས་འདི་དག་དང་ལྡན་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་སྐབས་འདིར་ཐེག་ཆེན་ལ་སློབ་པའི་ཕྱིར་མི་ལྡོག་པའི་ཚོགས་དགེ་འདུན་དཀོན་མཆོག་ཡིན་ནོ། ། གཉིས་པ་ལ་གསུམ་ལས་ཐོག་མར་སྦྱོར་ལམ་པ་ཕྱིར་མི་ལྡོག་པའི་རྟགས་འཆད་པ་ལ་བསྟན་པ་དང༌། བཤད་པ་གཉིས་ལས། དང་བོ་ནི། གཟུགས་ལ་སོགས་ལས་ལྡོག་སོགས་རྟགས། རྣམ་པ་ཉི་ཤུ་བརྗོད་པ་ཡིས། ངེས་འབྱེད་ཡན་ལག་ལ་གནས་པའི། ཕྱིར་མི་ལྡོག་པའི་མཚན་ཉིད་འདི། ཞེས་པ་ལ། གཟུགས་ལ་སོགས་པ་ལས་ལྡོག་པ་དང༌། ཐེ་ཚོམ་དང༌། མི་ཁོམ་པ་ཟད་པ་ལ་སོགས་པའི་རྟགས་ཉི་ཤུ་མདོ་ལས་བརྗོད་ཅིང་བསྟན་པ་ཡིས། ངེས་འབྱེད་ཡན་ལག་གནས་པའི་བྱང་ཆུབ་སེམས་དཔའ་བླ་མེད་བྱང་ཆུབ་ལས་ཕྱིར་མི་ལྡོག་པའི་མཚན་ཉིད་འདི་བསྟན་པ་འདི་ལྟ་སྟེ། གཉིས་པ་མདོ་ལས་གཟུགས་སོགས་ཕུང་པོ་དང་ཁམས་དང་སྐྱེ་མཆེད་དང་རྟེན་འབྲེལ་ལས་ལྡོག་པ་དེ་ནི་བྱང་ཆུབ་སེམས་དཔའི་ཕྱིར་མི་ལྡོག་པར་རིག་པར་བྱའོ། །ཞེས་སོགས་ཀྱི་དོན། གཟུགས་ལ་སོགས་ལས་ལྡོག་པ་དང༌། །ཐེ་ཚོམ་མི་དལ་ཟད་པ་དང༌། །བདག་ཉིད་དགེ་བ་ལ་གནས་ཤིང༌། །གཞན་དག་དེ་ལ་འགོད་པ་དང༌། །གཞན་གྱི་རྟེན་ཅན་སྦྱིན་སོགས་དང༌། །ཟབ་མོའི་དོན་ལའང་སོམ་ཉི་མེད། །བྱམས་ལུས་སོགས་དང་སྒྲུབ་པ་ནི། །རྣམ་པ་ལྔ་དང་མི་འགྲོགས་དང༌། །བག་ལ་ཉལ་ཀུན་འཇོམས་པ་དང༌། །དྲན་པ་དང་ནི་ཤེས་བཞིན་དང༌། །གོས་ལ་སོགས་པ་གཙང་བ་དང༌། ། ལུས་ལ་སྲིན་བུ་རྣམས་མི་འབྱུང༌། །གྱ་གྱུ་མེད་སེམས་སྦྱངས་པ་ནི། །ལེན་དང་སེར་སྣ་མེད་སོགས་དང༌།། ཆོས་ཉིད་ལྡན་པར་འགྲོ་ཉིད་དང༌། །སེམས་ཅན་དོན་དུ་དམྱལ་བར་ཚོལ། །གཞན་གྱི་དཀྲི་བར་མི་བཏུབ་དང༌། །ལམ་གཞན་ཉེ་བར་སྟོན་བདུད་ལ། །བདུད་ཅེས་བྱ་བར་རྟོགས་པ་དང༌། །སངས་རྒྱས་དགྱེས་པའི་སྤྱོད་པ་སྟེ། །རྟགས་ནི་ཉི་ཤུ་དེ་དག་གིས། །དྲོད་དང་རྩེ་མོ་བཟོད་བཅས་དང༌། །ཆོས་མཆོག་རྣམས་ལ་གནས་པ་ནི། །རྫོགས་པའི་བྱང་ཆུབ་ལས་མི་ལྡོག། ཅེས་པ་གཟུགས་ལ་སོགས་པ་ལ་དངོས་པོར་ཞེན་པ་ལས་ལྡོག་པ་དང༌། ཕྱི་རོལ་པའི་ལྟ་བ་ལ་བཟང་པོ་ཡིན་ནམ་སྙམ་པའི་ཐེ་ཙོམ་དང་མི་དལ་བ་དམྱལ་བ་དང༌། ཡི་དྭགས་དང་དུད་འགྲོ་དང་ལྷ་ཚེ་རིང་པོ་དང་དབང་པོ་མ་ཚང་བ་དང་ཡུལ་མཐའ་འཁོབ་ཏུ་སྐྱེས་པ་དང༌། ལྟ་བ་ལོག་པ་དང༌། སངས་རྒྱས་བྱོན་པ་ལ་དགའ་བར་མི་བྱེད་པ་རྣམས་ཟད་པ་ནི་མི་ཁོམ་པའི་འགྲོ་བར་སྐྱེ་བ་ཟད་པ་དང༌། བདག་ཉིད་དགེ་བ་བཅུ་ལ་གནས་ཤིང་བརྩོན་པ་དང༌། གཞན་དག་དགེ་བ་དེ་ལ་བསྐྲུན་ཞིང་འགོད། དགེ་བ་དེ་དག་གི་ལེགས་པ་བརྗོད། དེ་ལ་ཞུགས་པ་དག་གི་ལེགས་པ་བརྗོད་ཅིང་མཐུན་པས་དགའ་བར་བྱེད་པ་དང་གཞན་གྱི་དོན་ལ་རྟེན་པ་ཅན་གྱི་སྦྱིན་སོགས་སྦྱོད་པ་དང༌། ཐེ་ཙོམ་དུ་འགྱུར་བའི་དངོས་པོའི་གཟུགས་སོགས་ཆོས་ཐམས་ཅད་མ་མཐོང་བའི་ཕྱིར་གཤིས་ལུགས་ཟབ་མོའི་དོན་ལའང་སོམ་ཉི་མེད་པ་དང༌། བྱམས་པའི་ལུས་དག་ཡིད་གསུམ་དང་ལ་སོགས་པ་བྱམས་པའི་ལུས་ངག་ཡིད་ཀྱི་ལས་དང་ལྡན་པ་དང༌། འདོད་པ་ལ་མོས་པ་དང༌། གནོད་སེམས་དང༌། གཉིད་རྨུགས་དང༌། རྒོད་འགྱོད་ཐེ་ཙོམ་གྱི་སྒྲིབ་པ་རྣམ་པ་ལྔ་དང་མི་འགྲོགས་པ་དང་བག་ལ་ཉལ་བ་ཀུན་འཇོམས་ཤིང་ཐམས་ཅད་དུ་མེད་པ་དང༌། འགྲོ་འོང་ལ་སོགས་པ་ཐམས་ཅད་ཀྱི་ཚེ་དྲན་པ་དང་ཤེས་བཞིན་གྱིས་ཟིན་པ་དང༌། གོས་ཚགས་ལ་སོགས་པ་གཙང་སྦྲ་དང་ནད་ཉུང་ཞིང་དྲི་ང་བ་མེད་པས་གཙང་བ་དང༌། ལུས་ལ་སྲིན་བུའི་རིགས་སྟོང་ཕྲག་བརྒྱད་ཅུ་རྣམས་མི་འབྱུང་བ་དང༌། །ལུས་ངག་སེམས་གསུམ་རྣམ་པར་དག་ཅིང་ཐེག་པ་འོག་མར་གྱ་གྱུ་མེད་པའི་སེམས་དང༌། སྦྱངས་པའི་ཡོན་ཏན་བཅུ་གཉིས་ནི། དགོན་པ་དང༌། བསོད་སྙོམས་པ་དང༌། ཕྱག་དར་ཁྲོད་བ་དང༌། གདན་གཅིག་པ་དང༌། ཟས་ཕྱིས་མི་ལེན་པ་དང༌། དུར་ཁྲོད་པ་དང༌། བླ་གབ་བས་མེད་པ་དང༌། ཤིང་དྲུང་པ་དང༌། ཅོག་བུ་པ་དང༌། གཞི་ཇི་བཞིན་པ་དང༌། ཆོས་གོས་གསུམ་པ་དང༌། ཕྱིང་བ་པ་རྣམས་དེ་དག་དང་དུ་ལེན་ཅིང་སྤྱོད་པ་དང༌། སེར་སྣ་མེད་པ་ལ་སོགས་པ་ཕར་ཕྱིན་དྲུག་གི་མི་མཐུན་ཕྱོགས་ཀྱི་སེམས་མེད་པ་དང༌། ཆོས་དང་འཇིག་རྟེན་གྱི་བྱ་བ་ཐམས་ཅད་ཤེར་ཕྱིན་ལ་བརྟེན་ནས་ཆོས་ཉིད་ཀྱི་ངང་ཚུལ་དང་ལྡན་པར་འགྲོ་ཞིང་སྦྱོར་བ་ཉིད་དང༌། ལས་ཀྱི་དབང་གིས་ངན་འགྲོར་མི་སྐྱེ་ཡང་སེམས་ཅན་གྱི་དོན་དུ་དམྱལ་བ་ཚོལ་བར་བྱེད་པ། དེ་བདུད་ཀྱི་སྦྲུལ་བའི་དམྱལ་བ་བསྟན་པ་ལ་འཁྲུག་ཅིང་དོགས་པ་མེད་པ་དང༌། དགེ་བའི་བཤེས་གཉེན་ལས་གཞན་བདུད་དང་བདུད་ཀྱི་སྤྲུལ་པས་ལམ་ལོག་པར་བཀྲི་བར་མི་བཏུབ་པ་དང༌། ཐེག་ཆེན་གྱི་ལམ་ལས་གཞན་དམན་པའི་ལམ་ཉེ་བར་སྟོན་པའི་བདུད་ཀྱི་སྤྲུལ་བ་དགེ་སློང་གི་ཆ་བྱད་ལ་སོགས་པ་ལ་བདུད་ཅེས་བྱ་བར་རྟོགས་པ་དང༌། སངས་རྒྱས་དགྱེས་པའི་སྦྱོད་པ་དེ་བཞིན་གཤེགས་པས་ཇི་སྐད་བསྟན་པ་ལྟར་སྦྱོད་ཅིང་སྦྱིན་སོགས་ལས་མི་ཉམས་པར་བདུད་ལས་ཐམས་ཅད་རིག་པ་སྟེ། དེ་ལྟར་བསྟན་པའི་རྟགས་ནི་ཉི་ཤུ་པོ་དེ་དག་གང་རུང་དམ་ཕལ་ཆེར་ཚང་པ་དག་གིས་སྦྱོར་ལམ་དྲོད་དང་རྩེ་མོ་བཟོད་པ་དང་བཅས་པ་དང་ཆོས་མཆོག་རྣམས་ལ་གནས་པའི་བྱང་ཆུབ་སེམས་དཔའ་ནི་བླ་མེད་རྫོགས་པའི་བྱང་ཆུ་བ་ལས་ཕྱིར་མི་ལྡོག་པར་སྒྲུབ་ཅིང་རྟོགས་པར་བྱའོ། །ཁ་ཅིག་རྟགས་འདི་རྣམས་བགོས་ནས་དྲོད་སོགས་ལ་སོ་སོར་སྦྱོར་བ་ནི་ཡིད་ཆེས་པའི་ཤེས་བྱེད་མི་སྣང་ངོ༌། །རྟགས་འདི་དག་གང་རུང་ངམ་ཕལ་ཆེར་ཚངས་པས་ནི་དྲོད་སོགས་གང་ལ་གནས་ཀྱང་ཕྱིར་མི་ལྡོག་དུ་བསྒྲུབ་ནུས་དེ། མདོ་ལས། རྟགས་རེ་རེ་སྨོས་པའི་རྗེས་སུ་ཡང༌། རྣམ་པ་དང་ཚུལ་དང་མཚན་མ་དེ་དག་ལྡན་པའི་བྱང་ཆུབ་སེམས་དཔའ་ཕྱིར་མི་ལྡོག་ཅེས་པ་རེ་རེ་བྱུང་བའི་ཕྱིར་རོ། །དེ་རྣམས་ཀྱིས་སྦྱོར་ལམ་པ་ཕྱིར་མི་ལྡོག་པའི་མཚན་ཉིད་བཤད་ཟིན་ཏོ། ། ད་ནི་གཉིས་པ་མཐོང་ལམ་པ་ཕྱིར་མི་ལྡོག་པའི་མཚན་ཉིད་བཤད་པ་ལ་བསྟན་བཤད་གཉིས་ལས་དང་པོ་ནི། མཐོང་པའི་ལམ་ལ་བཟོད་པ་དང༌། །ཤེས་པའི་སྐད་ཅིག་བཅུ་དྲུག་ནི། །བྱང་ཆུབ་སེམས་དཔའ་མི་ལྡོག་པའི། །མཚན་ཉིད་ཡིན་པར་ཤེས་པས་བྱ། །ཞེས་པ་ལ། མཐོང་བའི་ལམ་ལ་ཆོས་ཤེས་པའི་བཟོད་པ་བཞི་དང༌། ཆོས་ཤེས་པ་བཞི་དང༌། རྗེས་སུ་ཤེས་པའི་བཟོད་པ་བཞི་དང༌། རྗེས་སུུ་ཤེས་པ་བཞི་སྟེ། དེ་ལྟར་བཟོད་པ་དང་ཤེས་པའི་སྐད་ཅིག་མ་བཞི་བཞི་བཅུ་དྲུག་ནི་མཐོང་ལམ་པའི་བྱང་ཆུབ་སེམས་དཔའ་ཕྱིར་མི་ལྡོག་པའི་མཚན་ཉིད་ཡིན་པར་ཤེས་པར་བྱའོ། །འདིར་ནི་རྟགས་ཀྱང་ཡིན་ཤེས་བཟོད་སྐད་ཅིག་མ་བཅུ་དྲུག་ཀྱང་ཡིན་པ་སྟོན་ལ། མཚན་ཉིད་ཀྱི་སྐབས་སུ་ནི་ཁྱད་པར་དུ་བྱེད་པའི་ཆོས་ཀྱང་ཡིན་ཤེས་བཟོད་ཅིག་མ་བཅུ་དྲུག་ཀྱང་ཡིན་པར་སྟོན་ཅིང༌། སྐབས་གསུམ་པར་ནི་གཉེན་པོ་གཞི་ཤེས་ཀྱང་ཡིན། ཤེས་བཟོད་སྐད་ཅིག་མ་བཅུ་དྲུག་ཀྱང་ཡིན་པ་སྟོན་ལ། སྐབས་གཉིས་པར་ནི་ལམ་ཤེས་ཀྱང་ཡིན་ཤེས་བཟོད་སྐད་ཅིག་མ་བཅུ་དྲུག་ཀྱང་ཡིན་པ་སྟོན་ནོ། །གཉིས་པ་རྒྱས་པར་བཤད་པ་ནི་མདོ་ལས། གཟུགས་ཀྱི་འདུ་ཤེས་ལས་ཕྱིར་ལྡོག་གོ ། ཞེས་སོགས་ཀྱི་དོན། གཟུགས་སོགས་འདུ་ཤེས་ལྡོག་པ་དང༌། །སེམས་བརྟན་ཐེག་པ་དམན་དག་ལས། །རྣམ་ལོག་བསམ་གཏན་ལ་སོགས་པའི། །ཡན་ལག་ཡོངས་སུ་ཟད་པ་དང༌། །ལུས་སེམས་ཡང་བ་ཉིད་དང་ནི། །འདོད་པ་སྤྱོད་པ་ཐབས་མཁས་དང༌། །རྟག་ཏུ་ཚངས་པར་སྤྱོད་ཉིད་དང༌། །འཚོ་བ་རྣམ་པར་དག་ཉིད་དང༌། །ཕུང་ཚོགས་བར་ཆད་བྱེད་རྣམས་དང༌། །ཚོགས་དང་དབང་སོགས་བཅས་པ་ཡི། །གཡུལ་འགྱེད་སེར་སྣ་ལ་སོགས་ལ། །སྦྱོར་དང་རྗེས་སུ་སྦྱོར་བ་ཡི། །གནས་པ་སོ་སོར་བཀག་པ་དང༌། །ཆོས་ནི་རྡུལ་ཙམ་མི་དམིགས་ཉིད། །རང་གི་ས་ལ་ངེས་པ་ཉིད། །ས་གསུམ་ལ་ནི་གནས་པ་དང༌། །ཆོས་ཀྱི་དོན་དུ་སྲོག་གཏོང་བ། །དེ་འདྲའི་སྐད་ཅིག་བཅུ་དྲུག་ནི། །བློ་ལྡན་མཐོང་བའི་ལམ་གནས་ཀྱི། །ཕྱིར་མི་ལྡོག་པའི་རྟགས་དག་ཡིན། །ཞེས་པ་ལ་གཟུགས་སོགས་ཀྱི་འདུ་ཤེས་ལ་ལྡོག་པའི་ཡེ་ཤེས་དང༌། འདི་ནས་ཉི་ཁྲིའི་ལེའུ་བཞི་བཅུ་པས་སྟོན་ནོ། །ནམ་མཁའ་དང་མཚུངས་པའི་རྣམ་མཁྱེན་ལ་མོས་པའི་སེམས་བརྟན་པའི་ཡེ་ཤེས་དང༌། ཐེག་པ་དམན་པ་ཉན་རང་གི་ས་དག་ལས་རྣམ་པར་ལོག་པའི་ཡེ་ཤེས་དང༌། བསམ་གཏན་དང་པོ་ལ་སོགས་པ་སྙོམས་པར་འཇུག་ཀྱང་དེ་དག་གི་སྐྱེ་བ་འཛིན་པའི་ཡན་ལག་ཡོངས་སུ་ཟད་ཅིང་བསམ་བཞིན་དུ་གང་འདོད་པར་སྐྱེ་བ་འཛིན་པའི་ཡེ་ཤེས་དེ་བཞིན་སྡུག་བསྔལ་གྱི་བདེན་པའི་སྐད་ཅིག་མ་བཞིའོ། །བཏགས་པ་ཐམས་ཅད་ལྷུར་མི་ལེན་ཅིང་བྱང་ཆུབ་ཡིད་ལ་བྱེད་པའི་ཕྱིར་དྲན་ཤེས་བཞིན་གྱི་སྒོ་ནས་ལུས་དང་སེམས་ལྡང་བ་ཡང་བའི་ཡེ་ཤེས་ཉིད་དང་ནི་ཁྱིམ་ན་གནས་ཀྱང་འདོད་ཡོན་ལྔ་སེམས་ཅན་སྨིན་པའི་དོན་དུ་སྦྱིན་པ་ལ་གཏོང་ཞིང་སྤྱོད་པ་ལ་ཐབས་ལ་མཁས་པའི་ཡེ་ཤེས་དང་ཁྱིམ་ན་གནས་ན་སྟོང་གསུམ་རིན་པོ་ཆེས་བཀང་ཞིང་སྦྱིན་པ་གཏོང་ཡང་རང་ཉིད་འདོད་པ་ལ་མི་སྤྱོད་པར་རྟག་ཏུ་ཚངས་པར་སྤྱོད་པའི་ཡེ་ཤེས་ཉིད་དང༌། འཚོ་བའི་སླད་དུ་དབང་བསྡུད་དང༌། ལུང་སྟོན་པ་ལ་སོགས་མི་བྱེད་པས་འཚོ་བ་རྣམ་པར་དག་པ་ཉིད་ཀྱི་ཡེ་ཤེས་དེ་བཞི་ནི་ཀུན་འབྱུང་གི་བདེན་པའི་སྐད་ཅིག་མ་བཞིའོ། །ཕུང་པོ་ལ་སོགས་པ་ཁམས་དང་སྐྱེ་མཆེད་དང་བར་ཆད་བྱེད་པ་རྒྱལ་པོ་དང་རྐུན་པོ་རྣམས་ཀྱི་གཏམ་ལ་དང་པོར་སྦྱོར་བ་དང༌། རྗེས་སུུ་རྒྱུན་དུ་སྦྱོར་ཞིང་བརྩོན་པའི་གནས་པ་སོ་སོར་བཀག་པའི་ཡེ་ཤེས་དང༌། གྲོང་གི་ཚོགས་ཀྱི་གཏམ་དང་དབང་པོ་མཐོང་པ་པོ་དང་ཤེས་པ་པོ་ལ་སོགས་པ་དང་བཅས་པའི་གཏམ་གྱི་སྦྱོར་བ་ལ་བརྩོན་པར་མི་དམིགས་པའི་ཡེ་ཤེས་དང༌། གཡུལ་འགྱེད་པ་དང་དམག་གི་གཏམ་གྱི་སྦྱོར་བ་ལ་བརྩོན་པར་མི་གནས་པའི་ཡེ་ཤེས་དང༌། སྦྱིན་སོགས་ཀྱི་མི་མཐུན་ཕྱོགས་སེར་སྣ་ལ་སོགས་པའི་གཏམ་ལ་སྦྱོར་བ་དང་རྗེས་སུ་སྦྱོར་བའི་གནས་པ་སོ་སོར་བཀག་པའི་ཡེ་ཤེས་ཏེ། བཞི་ནི་འགོག་པའི་བདེན་པའི་སྐད་ཅིག་མ་བཞིའོ། ། ཁ་ཅིག་གིས་འདིར་མདོ་དང་མི་མཐུན་པའི་བཤད་པ་བློ་རྩེ་གཏད་པ་མེད་པ་བྱས་སྣང་ངོ༌། །ཆོས་ཀྱི་བདག་པོ་དབྱིག་གཉེན་གྱིས་གཏམ་ངན་པའི་སྦྱོར་བ་ལས་ལྡོག་ཅིང་ཡང་དག་པའི་ལས་དང་བསམ་པ་ལ་འཇུག་པ་དང༌། ཞེས་གསུངས་སོ། །མདོ་ལས་བཞན་དུ་ན་ཤེར་ཕྱིན་གྱི་གཏམ་གྱི་སྦྱོར་བ་ལ་བརྩོན་ཞེས་སོ། །ཕྱིར་ལྡོག་པ་དང་ཕྱིར་མི་ལྡོག་པའི་ཆོས་ནི་རྡུལ་ཙམ་མི་དམིགས་པའི་ཡེ་ཤེས་ཉིད་དང༌། རང་གི་ཕྱིར་མི་ལྡོག་པའི་ས་ལ་ངེས་ཤིང་ཐེ་ཙོམ་མེད་པ་ཉིད་ཀྱི་ཡེ་ཤེས་དང༌། ཐེག་པ་གསུམ་གྱི་འཕགས་པའི་གང་ཟག་གསུམ་རང་རང་གིས་གསུམ་ལ་ནི་གནས་པ་དེ་རང་གིས་ལ་ཐེ་ཙོམ་མེད་པར་ངེས་པའི་ཡེ་ཤེས་དང༌། དམ་པའི་ཆོས་ཡོངས་སུ་གཟུང་བ་ཉིད་ཀྱི་དོན་རང་གི་སྲོག་ཀྱང་གཏོང་བའི་ཡེ་ཤེས་དེ་བཞིན་ལམ་གྱི་བདེན་པའི་སྐད་ཅིག་མ་བཞིའོ། །དེ་ལྟར་བཤད་པ་དེ་འདྲ་ཡི་མཐོང་ལམ་སྐད་ཅིག་མ་བཅུ་དྲུག་གི་ནི་བློ་ལྡན་བྱང་ཆུབ་སེམས་དཔའ་མཐོང་བའི་ལམ་ལ་གནས་པ་རྣམས་ཀྱི་བླ་མེད་བྱང་ཆུབ་ལས་ཕྱིར་མི་ལྡོག་པར་སྒྲུབ་པའི་རྟགས་སམ། ཤེས་བྱེད་དག་ཡིན་ནོ། །དེ་རྣམས་ཀྱིས་མཐོང་ལམ་པའི་ཕྱིར། མི་ལྡོག་པའི་མཚན་ཉིད་མདོ་ལས་བྱུང་བ་བཞིན་དུ་བཤད་ཟིན་ཏོ། ། ༡༠༽སྒོམ་ལམ་གྱི་རང་བཞིན་བཤད་པ། ད་ནི་གསུམ་པ་སྒོམ་ལམ་གྱི་རང་བཞིན་བཤད་པ་ལ། ཟབ་པ་དང༌། ཇི་ལྟར་བསྒོམ་པའི་ཚུལ་དང༌། དབྱེ་བ་དང༌། གྲངས་མེད་ལ་སོགས་ཀྱིས་ཁྱད་པར་དང༌། བྱེད་ལས་དང༌། ཟབ་མོའི་ཆོས་ཉིད་བཤད་པ་དྲུག་ལས། ༡ སྒོམ་ལམ་ཟབ་པ་བསྟན་པ། དང་པོ་སྒོམ་ལམ་ཟབ་པར་བསྟན་པ་ནི། ཉི་ཁྲིའི་ལེའུ་ཞེ་གཅིག་པར་བྱང་ཆུབ་སེམས་དཔའ་གང་ལ་གནས་ནས་སངས་རྒྱས་ཀྱི་ཆོས་ཐམས་ཅད་རྫོགས་པར་བྱེད་པའི་གནས་ཟབ་མོ་ནི་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། འདུ་བྱ་བ་མེད་པ་དང༌། སྐྱེ་བ་མེད་པ་དང༌། འདོད་ཆགས་དང་བྲལ་བ་དང༌། འགོག་པ་དང༌། མྱ་ངན་ལས་འདས་པ་དང༌། ཞི་བ་དང༌། དེ་བཞིན་ཉིད་དང༌། ཡང་དག་པའི་མཐའ་དང༌། ཆོས་ཀྱི་དབྱིངས་ཀྱི་ཚིག་བླ་དྭགས་སོ། །ཞེས་སོགས་ཀྱི་དོན། སྒོམ་པའི་ལམ་ནི་ཟབ་པ་སྟེ། །ཟབ་མོའི་སྟོང་པ་ཉིད་ལ་སོགས། །ཟབ་པའི་དེ་ནི་སྒྲོ་འདོགས་དང༌། །སྐུར་པའི་མཐའ་ལས་གྲོལ་བ་ཉིད། །ཅེས་པ་ལ་ལམ་དུས་སུ་ཆོས་ཉིད་དྲི་བཅས་དྲི་མེད་དུ་འགྱུར་བ་ཉིད་ལ་ཆོས་ཉིད་ལ་ཆོས་ཉིད་ཀྱི་མི་རྟག་པའི་དོན་དང༌། ཆོས་ཉིད་ཀྱི་འདུས་བྱས་ཀྱི་དོན་དུ་གསུངས་པའི་ཕྱིར་འདིར་ཆོས་ཀྱི་དབྱིངས་བསྒོམ་ལམ་དུ་གསུངས་པ་དང༌། ལམ་འདུས་བྱས་སུ་བསྟན་པ་གཉིས་འགལ་བར་མི་བསམ་མོ། །དེས་ན་བསྒོམ་པའི་ལམ་ནི་ཟབ་པ་ཡིན་ཏེ། ལམ་གྱི་ངོ་བོ་ཟབ་མོ་སྟོང་པ་ཉིད་ལ་སོགས་པ་ཆོས་དབྱིངས་ཀྱི་མཐར་ཐུག་པ་འདི་རྣམས་ཡིན་པའི་ཕྱིར་རོ། ། ཟབ་མོའི་དོན་ཅི་ཞེ་ན། ཟབ་པའི་དོན་དེ་ནི་སྒྲོ་འདོགས་དང་སྐུར་པའི་མཐའ་ལས་གྲོལ་བ་ཉིད་དོ། །མདོ་ལས་གཟུགས་སོགས་ལས་ཀྱང་བཟློག མྱ་ངན་ལས་འདས་པ་ཡང་བསྟན་ཞེས་པའི་དོན་དེ་གཟུགས་སོགས་དངོས་པོའི་ཆོས་ཐམས་ཅད་ལས་ཀྱང་བཟློག་ཅེས་པས་ཆོས་དབྱིངས་ཟབ་མོ་དེ་དངོས་པོ་ཡིན་པར་སྒྲོ་འདོགས་པའི་མཐའ་ལས་གྲོལ་བ་དང༌། མྱ་ངན་ལས་འདས་པ་ཡང་བསྟན་ཞེས་པས་ཆོས་ཉིད་ཟབ་མོ་དེ་མྱང་འདས་མ་ཡིན་པར་སྐུར་པ་འདེབས་པའི་མཐའ་འས་གྲོལ་བ་ཉིད་དོ། །དེས་ན་ཀུན་རྫོབ་ཏུ་གཟུགས་སོགས་ཡོད་པའི་ཕྱོགས་ཡིན་པ་བཤིག་ཅིང༌། དོན་དམ་དུ་མྱང་འདས་མེད་པའི་ཕྱོགས་ཡིན་པ་བཤིག་ནས། ཡོད་མེད་ཀྱི་ཕྱོགས་དེ་གཉིས་ཀྱི་དབུས་མ་ཆོས་དབྱིངས་ཀྱི་ཐེག་པ་བླ་ན་མེད་པ་ནི་ཟབ་པ་ཉིད་དུ་བསྟན་ཏོ། ། ༢ ཇི་ལྟར་བསྒོམ་པའི་ཚུལ། གཉིས་པ་ཇི་ལྟར་བསྒོམ་པའི་ཚུལ་ནི། མདོ་ལས། ཤེར་ཕྱིན་ལ་ཇི་སྐད་བསྟན་པ་བཞིན་དུ་ཤེར་ཕྱིན་དང་ལྡན་པའི་གནས་ཟབ་མོ་འདི་དག་སེམས་པ་དང་འཇལ་བ་དང་རྟོགས་པར་བྱེད་ན་གྲངས་མེད་ཚད་མེད་དཔག་ཏུ་མེད་པའི་དགེ་བ་འཛིན་ཞེས་སོགས་ཀྱི་དོན། ངེས་འབྱེད་ཡན་ལག་དང་མཐོང་བའི་ལམ་དང་བསྒོམ་པའི་ལམ་ཉིད་ལ། ཡང་དང་ཡང་དུ་སེམས་པ་དང༌། འཇལ་དང་ངེས་རྟོག་བསྒོམ་པའི་ལམ། ཞེས་པ་ལ། མདོ་ལས། རབ་འབྱོར་ཁྱོད་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཀྱི་དོན་དུ་དེ་བཞིན་གཤེགས་པ་ལ་གནས། ཟབ་མོ་རྣམས་འདྲི་བར་སེམས་པ་ལེགས་སོ། །ཞེས་གསུངས་པའི་ཕྱིར་ངེས་འབྱེད་ཡན་ལག་ནས་ཕྱིར་མི་ལྡོག་པའི་བྱང་ཆུབ་སེམས་དཔའ་བསྟན་པས། ཟབ་མོ་བསྒོམ་ཚུལ་ཡང་དེ་ནས་གཟུང་སྟེ་བསྟན་དགོས་པ་དེས་ན་ངེས་འབྱེད་ཡན་ལག་གི་གནས་སྐབས་ཉིད་ལ་ཟབ་མོ་དེ་དག་ལ་ཡང་དང་ཡང་དུ་སེམས་པ་དང༌། མཐོང་བའི་ལམ་གྱི་གནས་སུ་སྐབས་སུ་ཟབ་མོ་དེ་དག་ཉིད་ལ་ཡང་དང་ཡང་དུ་འཇལ་བ་དང༌། སྒོམ་པའི་ལམ་གྱི་གནས་སྐབས་སུ་ཟབ་མོ་དེ་དག་ཉིད་ལ་ཡང་དང་ཡང་དུ་ངེས་པར་རྟོག་པའི་བྱེད་པ་ནི། གནས་སྐབས་དེ་དག་ཏུ་ཚུལ་ཇི་ལྟར་བསྒོམ་ན། དེ་ལྟར་སྒོམ་པའི་ལམ་ཡིན་ནོ། ། ༣ སྒོམ་ལམ་གྱི་དབྱེ་བ་བཤད་པ། གསུམ་པ་སྒོམ་ལམ་གྱི་དབྱེ་བ་བཤད་པ་ནི། དེ་ནི་རྒྱུན་ཆགས་ཡིན་པའི་ཕྱིར། །ཆུང་དང་འབྲིང་དང་ཆེན་པོ་རྣམས། །ཆུང་ངུའི་ཆུང་སོགས་དབྱེ་བ་ཡི། །རྣམ་པས་རྣམ་པ་དགུར་བཞེད་དོ། ། ཞེས་པ་ལ། ཆུ་བོའི་རྒྱུན་ནི་རབ་འབབ་དང༌། མར་མེའི་རྩེ་མོ་རབ་བཅིངས་ལྟར། །རྟག་ཏུ་གོམས་པའི་རྣལ་འབྱོར་གྱིས། །ཉིན་དང་མཚན་དུ་མཉམ་པར་བཞག །ཅེས་གསུངས་པ་ལྟར་སྒོམ་པའི་ལམ་དེ་ནི་བྱང་ཆུབ་མཐོབ་ཀྱི་པར་དུ་རྒྱུན་ཆགས་སུ་བསྒོམ་པ་ཡིན་པའི་ཕྱིར། རྒྱུན་གཅིག་པོ་དེ་ཉིད་ཆུང་ངུ་དང་འབྲིང་དང་ཆེན་པོ་གསུམ་ཏུ་ཕྱེ་བ་རྣམས་ཀྱང༌། ཆུང་ངུའི་ཆུ་ངུ་དང༌། ཆུང་ངུའི་འབྲིང་དང༌། ཆུང་ངུའི་ཆེན་པོ་ལ་སོགས་པ་རེ་རེ་ཡང་གསུམ་གསུམ་དུ་དབྱེ་བའི་རྣམ་པས། སྒོམ་ལམ་རྣམ་པ་དགུར་བཅས་བཞེད་པའི་དགོངས་པ་ཉིད་དོ། ། ༤ གྲངས་མེད་ལ་སོགས་ཀྱི་ཁྱད་པར་བཤད་པ། བཞི་པ་གྲངས་མེད་ལ་སོགས་ཀྱི་ཁྱད་པར་བཤད་པ་ནི། མདོ་ལས། བཅོམ་ལྡན་འདས་གྲངས་མ་མཆིས་པ་དང༌། དཔག་ཏུུ་མ་མཆིས་པ་དང། ཚད་མ་མཆིས་པ་ལ་བྱེ་བྲག་ནི་ཅི་མཆིས། ཁྱད་ནི་ཅི་མཆིས་ཞེས་པའི་དོན། །གྲངས་མེད་ལ་སོགས་པ་བསྟན་པ་རྣམས། །དམ་པའི་དོན་དུ་བཟོད་མ་ཡིན། །ཀུན་རྫོབ་ཏུ་ནི་ཐུགས་བརྩེ་བའི། །རྒྱུ་མཐུན་དེ་དག་ཐུབ་པ་བཞེད། །ཅེས་པ་ལ། དོན་དམ་པ་སྟོང་པ་ཉིད་ཟབ་མོའི་དབྱིངས་ནི་གྲངས་མེད་པ། ཡང་དེ་ཡིན། དཔག་ཏུ་མེད་པ་ཡང་དེ་ཡིན། ཚད་མེད་པ་ཡང་དེ་ཡིན་པས། གྲངས་མེད་པ་ལ་སོགས་མདོ་ལས་བསྟན་པ་རྣམས་དོན་དམ་པ་སྟོང་པ་ཉིད་ཟབ་མོའི་དོན་ཁོ་ན་ཉིད་དུ་གཅིག་པ་ལ་ནི་ཐ་དད་དུ་དབྱེ་བར་བཟོད་པ་མ་ཡིན་ནོ། །ཀུན་རྫོབ་ཏུ་འདས་སམ་འདུས་མ་བྱས་སུ་བགྲང་བར་མ་ནུས་པ་ནི་གྲངས་མེད་པ་དང༌། དུས་གསུམ་གྱི་ཆོས་རྣམས་ལ་ཚད་མི་དམིགས་པ་ནི་དཔག་ཏུ་མེད་པ་དང༌། གཞལ་བར་མི་ནུས་པ་ནི་ཚད་མེད་པའོ། །ཞེས་ཐ་དད་ཕྱེས་ན་བསྟན་པ་ནི། སེམས་ཅན་ལ་ཕན་པ་ཐུགས་བརྩེ་བ་ཆེན་པོའི་འབྲས་བུ་ཡིན་པའི་ཕྱིར་དེ་བཞིན་གཤེགས་པའི་ཐུགས་བརྩེ་བ་ཆེན་པོའི་རྒྱུ་མཐུན་རྒྱུ་དང་འདྲ་བའི་འབྲས་བུ་གྲངས་མེད་ལ་སོགས་ཐ་དད་དུ་ཕྱེས་ནས་བསྟན་པ་དེ་དག་ཐུབ་པ་བཞེད་དོ། །ཁྲི་བརྒྱད་སྟོང་པ་ལ། གྲངས་མེད་པ་དང༌། དཔག་ཏུ་མེད་པ་དང༌། ཚད་མེད་པ་ཞེས་བྱ་བར་བརྗོད་པ། དེ་ནི་དེ་བཞིན་གཤེགས་པའི་བཤད་པའི་རྒྱུ་མཐུན་པ་བསྟན་པ་ཡིན་ནོ། །ཞེས་སོ། །ཆོས་ཀྱི་བདག་པོ་དབྱིག་གཉེན་གྱིས། གྲངས་དང་ཚད་ལ་སོགས་པ་ནི་ཀུན་བཏགས་པ་རྣམས་ལ་ཡོད་་གྱི་སྟོང་པ་ཉིད་ཀྱི་དབྱིངས་ལ་ནི་མེད་དེ་འདི་ནི་བྱེ་བྲག་གོ །ཞེས་དང༌། ཀུན་རྫོབ་ཏུ་བཤད་པ་ནི་ཐུགས་རྗེ་ཆེན་པོའི་རྒྱུ་མཐུན་པའོ། །ཞེས་བྱ་བའི་ཐ་ཚིག་གོ ། ཞེས་གསུངས་སོ། ། ༥ སྒོམ་ལམ་གྱི་བྱེད་ལས་བཤད་པ། ལྔ་པ་སྒོམ་ལམ་གྱི་བྱེད་ལས་བཤད་པ་ལ་ཞུས་ལན་གཉིས་ལས། དང་པོ་མདོ་ཉིསད་དུ། བརྗོད་དུ་མེད་པའི་སྟོང་ཉིད་དེ་ལ་འཕེལ་འགྲིབ་མེད་ན། དེས་སྦྱིན་སོགས་འཕེལ་འགྲིབ་མེད་པར་འགྱུར་རོ། །དེ་ལྟ་ན་རྣམ་མཁྱེན་མེད་པར་འགྱུར་རོ། །རྣམ་མཁྱེན་མེད་ན་སུ་ཞིག་འཚང་རྒྱ་བར་འགྱུར་ཞེས་ཞུས་པ་ནི། དངོས་པོ་བརྗོད་དུ་མེད་པ་ལ། །ཉམས་པ་དང་ནི་འཕེལ་མི་རུང༌། །སྒོམ་ཞེས་བྱ་བའི་ལམ་གྱིས་ནི། །ཅི་ཞིག་ཉམས་ཤིང་ཅི་ཞིག་འཐོབ། །ཅེས་སོ། །སྟོང་ཉིད་ཟབ་མོ་དངོས་པོར་བརྗོད་དུ་མེད་ཅིང་མ་གྲུབ་པ་ལ་ཆོས་ནག་པོའི་དབང་གིས་ཉམས་པ་དང་ནི་དཀར་པོའི་དབང་གིས་འཕེལ་བ་ཡང་མི་རུང་བས། དེས་གཟུང་བའི་སྦྱིན་སོགས་ཡང་འཕེལ་འགྲིབ་མེད་ན། འོ་ན་སྟོང་ཉིད་དེ་སྒོམ་པ་ཞེས་བྱ་བའི་ལམ་གྱིས་ནི་སྤང་བྱ་ཇི་ཞིག་ཉམས་ཤིང་གཉེན་པོ་ཇི་ཞིག་འཕེལ་བའི་སྒོ་ནས་བླ་མེད་བྱང་ཆུབ་ཅི་ཞིག་འཐོབ་ཅེས་ཞུས་པ་དང༌། གཉིས་པ་དེའི་ལན་ནི་མདོ་ལས། ཐབས་མཁས་པའི་བྱང་ཆུབ་སེམས་དཔའ་སྦྱིན་སོགས་འཕེལ་ལོ་སྙམ་དུ་མི་སེམས་ཤིང་མིང་ཙམ་མོ་སྙམ་དུ་སྤྱོད་པའི་ཚེ་སེམས་བསྐྱེད་པ་དེ་དང་དགེ་བ་དེ་དག་བླ་ན་མེད་པའི་བྱང་ཆུབ་ཇི་ལྟ་བ་བཞིན་དུ་བསྔོའོ། །ཞེས་པའི་དོན། བྱང་ཆུབ་ཇི་ལྟར་དེ་བཞིན་དུ། །འདིས་ན་འདོད་པའི་དོན་སྒྲུབ་བྱེད། །བྱང་ཆུབ་དེ་བཞིན་ཉིད་མཚན་ཉིད། །དེ་ཡང་དེ་ཡི་མཚན་ཉིད་བཞེད། །སྐབས་འདིའི་བསྔོ་བ་ནི། སྒོམ་ལམ་གྱི་ངོ་བོ་ཡིན་པའི་ཕྱིར། ཐབས་མཁས་པས་རྨི་ལམ་ལྟ་བུའི་དགེ་བ་དེ་དག་བྱང་ཆུབ་ཇི་ལྟ་བ་དེ་བཞིན་དུ་བསྔོ་བའི་སྒོམ་ལམ་དེས་ནི་འདོད་པའི་དོན་གྱི་མཆོག་ཏུ་བླ་མེད་བྱང་ཆུབ་བསྒྲུབ་ཅིང་ཐོབ་པར་བྱེད་པ་ཡིན་ནོ། །བྱང་ཆུབ་ཇི་ལྟ་བུ་ཞེ་ན། བྱང་ཆུབ་ནི་ཆོས་ཐམས་ཅད་གྱི་དེ་བཞིན་ཉིད་ཀྱི་མཚན་ཉིད་དམ་ངོ་བོ་ཡིན་ཞིང་དེ་བཞིན་ཉིད་དེ་ཡང་བྱང་ཆུབ་དེའི་མཚན་ཉིད་དམ་ངོ་བོ་ཡིན་པར་བཅོམ་ལྡན་འདས་བཞེད་དོ། །ཆོས་ཀྱི་བདག་པོ་དབྱིག་གཉེན་གྱིས་བརྗོད་དུ་མེད་པ་ཉིད་སྟོང་པ་ཉིད་ལ་བྱ་ཞིང༌། སྟོང་པ་ཉིད་ནི་ཆོས་དཀར་པོའི་དབང་གིས་འཕེལ་བ་ཡང་མེད། ཆོས་ནག་པོའི་དབང་གིས་འགྲིབ་པ་ཡང་མེད་པས། ཕ་རོལ་ཏུ་ཕྱིན་པ་ལ་སོགས་པ་ཡང་འཕེལ་བ་དང་འགྲིབ་པ་གཉིས་མེད་ན། འོ་ན་རྒྱུ་གང་གིས་རྣམ་པ་ཐམས་ཅད་མཁྱེན་པ་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པའི་བསྐལ་བ་ཅན་དུ་འགྱུར་ཞེས་ཞུས་པ་སྟེ། དེ་སྐད་ཅེས་ཞུས་པ་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཇི་ལྟ་བ་དེ་ལྟར་ཡོངས་སུ་བསྔོ་བར་བྱེད་དོ། །ཞེས་བྱ་བའི་ཚིག་ཐམས་ཅད་ཐབས་ལ་མཁས་པས་ཡོངས་སུ་བསྔོས་པའི་སྟོབས་ཀྱི་འགྱུར་བ་སྟོན་ནོ། །ཞེས་གསུངས་པའི་དོན་ནོ། ། ༦ ཟབ་མོའི་ཆོས་ཉིད་བཤད་པ། དྲུག་པ་ཟབ་མོའི་ཆོས་ཉིད་བཤད་པ་ལ་ཞུས་པ་དང་ལན་གཉིས་ལས་དང་པོ་ནི། སེམས་ནི་སྔ་མས་བྱང་ཆུབ་པར་རིགས་མིན་ཕྱི་མས་ཀྱང་མ་ཡིན། ཞེས་པ་ལ་སེམས་བསྐྱེད་པ་དང་པོ་ནི་ཕྱི་མ་དང་མི་འགྲོགས། སེམས་བསྐྱེད་པ་ཕྱི་མ་ནི་སྔ་མ་དང་མི་འགྲོགས་ལམ་འགྲོགས་ན་དགེ་བའི་ཚོགས་སུ་མི་འགྱུར་ཞིང༌། དགེ་བ་མ་བསགས་ན་བྱང་ཆུབ་ཐོབ་པར་མི་ནུས་སོ། །སེམས་བསྐྱེད་པ་རེ་རེའི་སྒོ་ནས་ཀྱང༌། སེམས་བསྐྱེད་པ་ནི་སྔ་མ་གཅིག་པུས་བྱང་ཆུབ་ཐོབ་པར་རིགས་པ་མ་ཡིན་ཞིང༌། སེམས་བསྐྱེད་པ་ཕྱི་མ་གཅིག་པུས་ཀྱང་ཐོབ་པར་རིག་མ་ཡིན་ནོ། །ཞེས་ཞུས་པ་དང༌། གཉིས་པའི་ལན་ལ། དཔེའི་སྒོ་ནས་མདོར་བསྟན་པ་དང༌། དོན་གྱི་སྒོ་ནས་རྒྱས་པར་བཤད་པ་གཉིས་ལས་དང་པོ་ནི། མེ་ལྕེ་ཕྲད་པ་དང་པོ་གཅིག་པུས་ཀྱང་སྙིང་པོ་དེ་མ་ཚིག ཕྱི་མ་འབའ་ཞིག་གིས་ཀྱང་མི་ཚིག ཕྲད་པ་སྔ་ཕྱི་མ་བརྟེན་པར་མི་ཚིག །འོན་ཀྱང་སྙིང་པོ་དེ་ཚིག་གོ་ཞེས་བྱ་བ་མར་མེ་དཔེའི་ཚུལ་གྱིས་ནི། ཟབ་མོའི་ཆོས་ཉིད་རྣམ་པ་བརྒྱད། ཅེས་པ་ལ། མར་མེ་ཕྲད་པའི་སྐད་ཅིག་གིས་སྙིང་པོ་ཚིག་པ་ཟབ་པའི་དཔེའི་ཚུལ་གྱིས་སེམས་སྔ་ཕྱི་བག་ཆགས་བརྒྱུད་པར་བྱང་ཆུབ་ཐོབ་པར་བྱེད་པའི་རྟེན་འབྲེལ་ཟབ་མོ་ནི་ཟབ་མོའི་ཆོས་ཉིད་རྣམ་པ་བརྒྱད་ཀྱི་བསྟོན་ཏོ། །གཉིས་པ་དོན་གྱི་སྒོ་ནས་རྒྱས་པར་བཤད་པ་ནི། སྐྱེ་བ་དང་ནི་འགག་པ་དང༌། དེ་བཞིན་ཉིད་དང་ཤེས་བྱ་དང༌། །ཤེས་དང་སྤྱོད་དང་གཉིས་མེད་དང༌། །ཐབས་མཁས་པ་ལ་ཟབ་པ་ཉིད། །ཅེས་པ་ལ་སེམས་བསྐྱེད་སྔ་མ་འགགས་པ་ནི་ཕྱིར་མི་སྐྱེ་ཡང་སྔ་མ་འགགས་པ་ལ་བརྟེན་ནས་སེམས་བསྐྱེད་པའི་ཕྱི་མ་སྐྱེ་བ་ཟབ་པ་དང༌། འགག་པ་ལ་འགག་པ་གཅིག་པ་མེད་པས་འགགས་དེ་མི་འགག་པའི་ཕྱིར་འགག་པ་ཟབ་པ་དང༌། ཕྲ་ཞིང་རྟོགས་པར་དཀའ་བས་དེ་བཞིན་ཉིད་ཟབ་པ་དང༌། སེམས་དང་སེམས་ཀྱི་ཆོས་ཉིད་དེ་ཉིད་དང་གཞན་དུ་མེད་པས་ཤེས་བྱ་བདེན་པ་གཉིས་ཟབ་པ་དང༌། མཐོང་བྱ་མཐོང་བྱེད་གཉིས་མེད་པས་དེ་བཞིན་ཉིད་ཀྱིས་དེ་བཞིན་ཉིད་ཀྱིས་དེ་བཞིན་ཉིད་ཤེས་པ་ཟབ་པ་དང༌། ཅི་ལ་ཡང་མི་སྤྱོད་པའི་ཚུལ་གྱིས་ཤེར་ཕྱིན་ལ་སྤྱོད་པ་ཟབ་པ་དང༌། དེ་བཞིན་ཉིད་ལ་གནས་པ་ལ་གནས་བྱ་གནས་བྱེད་གཉིས་མེད་པས་ཟབ་པ་དང༌། མཚན་མ་དང་མཚན་མ་མེད་ཀྱི་འགྱུ་བ་ཐམས་ཅད་མེད་ཀྱང་སངས་རྒྱས་ཀྱི་ཆོས་མ་རྫོགས་པར་འཚང་རྒྱ་མི་རྒྱ་བ་ནི་བྱང་ཆུབ་སེམས་དཔའི་ཐབས་ལ་མཁས་པ་ལ་ཟབ་པ་ཉིད་བཤད་པ་ཡིན་ནོ། །དེ་ལྟར་སྐྱེ་འགག་ལ་སོགས་པའི་ཡིན་ལུགས་ཟབ་མོའི་ཆོས་ཉིད་རྨི་ལམ་དང་མཚུངས་པ་ནི་དངོས་པོར་ཞེན་པའི་བློ་ལས་འདས་པའི་ཕྱིར་ཟབ་པ་ཉིད་དུ་བསྟན་ཏོ། །དེ་རྣམས་ཀྱིས་སློབ་པའི་ཕྱིར་མི་ལྡོག་པའི་ཚོགས་ཞེས་པ་དེ་བཤད་ཟིན་ཏོ། ། ༡༡༽སྲིད་ཞི་མཉམ་ཉིད་ཀྱི་ཏིང་ངེ་འཛིན་བཤད་པ། ད་ནི་སྲིད་ཞི་མཉམ་ཉིད་ཀྱི་ཏིང་ངེ་འཛིན་བཤད་པར་བྱ་སྟེ། ཉི་ཁྲིའི་ལེའུ་ཞེ་གཉིས་པར་བྱང་ཆུབ་སེམས་དཔའ་ཉིན་པར་སྟོང་པ་ཉིད་ཀྱི་ཏིང་ངེ་འཛིན་བསྒོམས་པར་ཤེར་ཕྱིན་བསྒོམས་པ་འཕེལ་ན་རྨི་ལམ་སྒོམས་པས་ཀྱང་འཕེལ་ལོ་ཞེས་སོགས་ཀྱི་དོན། ཆོས་རྣམས་རྨི་ལམ་འདྲ་བའི་ཕྱིར། །སྲིད་དང་ཞི་པར་མི་རྟོག་པ། །ལས་མེད་ལ་སོགས་གླན་ཀ་ཡི། །ལན་ནི་ཇི་སྐད་བཤད་པ་ཟད། །ཅེས་པ་ལ་སད་པ་དང་རྨི་ལམ་ཁྱད་མེད་པའི་བྱང་ཆུབ་སེམས་དཔའ་སྲིད་ཞིས་བསྡུས་པའི་ཆོས་རྣམས་དངོས་པོ་མེད་པ་རྨི་ལམ་དང་འདྲ་བར་མཐོང་བའི་ཕྱིར། སྲིད་དང་ཞི་བའི་དངོས་པོ་ཐ་དད་པར་མི་རྟོག་པ་ནི་སྲིད་ཞི་མཉམ་པ་ཉིད་ཡིན་ནོ། །ཐམས་ཅད་རྨི་ལམ་དང་འདྲ་ན་ལས་མེད་པ་དང་ལ་སོགས་པ་ཤེར་ཕྱིན་སྒོམ་པ་དང་བྱང་ཆུབ་ཏུ་བསྔོ་བ་མེད་པར་འགྱུར་ཞེས་པའི་ཀླན་ཀའི་ལན་ནི་ཤཱ་རིའི་བུས་སྨྲས་པ་བཅོམ་ལྡན་འདས་ཀྱིས་ཆོས་ཐམས་ཅད་རྨི་ལམ་ལྟ་བུར་གསུངས་ན། དེ་ལ་སོགས་པའི་མི་འབྲི་བར་འགྱུར་བ་མེད་དོ། །ཞེས་དང༌། སད་ནས་རྟོག་ན་ནི་དེ་ལ་སོགས་པའམ་འབྲི་བར་ཡང་འགྱུར་རོ། །ཞེས་སོགས་མདོ་ལས་ཇི་སྐད་བཤད་ཟིན་ཏོ། །དོན་ནི་རྨི་ལམ་ལ་དངོས་པོ་མེད་པས་ལས་མེད་ལ་སད་ནས་རྟོག་ན་ནི་སད་དུས་ཀྱི་བློ་དེ་ལས་སོགས་པ་དང༌། ཐམས་ཅད་རྨི་ལམ་དང་མཚུངས་པའི་བྱང་ཆུབ་སེམས་དཔའ་ལ་ཤེར་ཕྱིན་བསྒོམ་པ་དང་བསྔོ་བ་ཡོད་མེད་ཀྱིས་སྦྲོས་བ་དང་བྲལ་ཞེས་པ་མདོའི་དགོངས་བར་སྣང་ངོ༌། །འཕགས་པ་འཇམ་དཔལ་གྱི་ཞལ་སྔ་ནས་ཀྱང༌། སེམས་ཅན་ཕན་ལས་བསོད་ནམས་དང༌། །སེམས་ཅན་གནོད་ལས་སྡིག་པ་སྟེ། །ཕན་དང་གནོད་པ་རྣམས་མེད་ན། །ལས་མེད་འབྲས་མེད་པའོ། །ཞེས་གསུངས་པས། རྒྱལ་བ་སྲས་བཅས་རྣམས་དགོངས་པ་གཅིག་ཏུ་བྱུང་ངོ༌། །ལ་ལ་དག་གིས་རྨི་ལམ་སེམས་ནི་གཉིད་ཀྱིས་ཉམས། ཞེས་སོགས་ལ་ཀྱོག་བཤད་བྱས་ནས་རྨི་ལམ་དུ་ལ་སོགས་པར་བཤད་པ་ནི་འདི་རྣམས་དང་འགལ་ལོ། །དེ་རྣམས་ཀྱིས་སྲིད་དང་ཞི་བ་མཉམ་ཉིད་དང་ཞེས་པ་དེ་བཤད་ཟིན་ཏོ། ། ༡༢༽སངས་རྒྱས་ཀྱི་ཞིང་དག་པ་བླ་ན་མེད་པ་ཉིད་དུ་སྒྲུབ་པར་བཤད་པ། ད་ནི་སྲིད་ཞི་མཉམ་ཉིད་དུ་རྟོགས་པའི་བྱང་ཆུབ་སེམས་དཔའ་རང་ཉིད་འཚང་རྒྱ་བར་འགྱུར་བའི་སངས་རྒྱས་ཀྱི་ཞིང་དག་བ་བླ་ན་མེད་པ་ཉིད་དུ་སྒྲུབ་པར་བཤད་པར་བྱའོ། །ཉི་ཁྲིའི་ལེའུ་ཞེ་གཉིས་བ་དང་ཞེ་གསུམ་པ་གང་གའི་ལྷ་མོའི་ལེའུ་ནས་བྱུང་པའི་དོན། སེམས་ཅན་འཇིག་རྟེན་དེ་བཞིན་དུ། །སྣོད་ཀྱི་འཇིག་རྟེན་མ་དག་ལ། །དེ་ལ་དག་པར་བསྒྲུབ་པ་ཡིས། །སངས་རྒྱས་ཞིང་ནི་དག་པ་ཉིད། །ཅེས་པ་ལ་བྱང་ཆུབ་སེམས་དཔའ་ཕར་ཕྱིན་དྲུག་ལ་སྤྱོད་པའི་ཚེ། ངན་སོང་གསུམ་དང་ཕར་ཕྱིན་དྲུག་གི་མ་མཐུན་ཕྱོགས་ལ་གནས་པ་དང༌། སེར་སྣ་ལ་སོགས་པའི་འབྲས་བུ་ལ་སྤྱོད་པའི་ཉེས་པ་སྡུག་འཕོངས་སྣ་ཚོགས་ཀྱིས་སེམས་ཅན་གྱི་འཇིག་རྟེན་མ་དག་པ་མཐོང་པ་དེ་བཞིན་དུ། སྣོད་ཀྱི་འཇིག་རྟེན་སའི་རྒྱུ་ལས་གྲུབ་པ་གསེར་དངུལ་ལ་སོགས་དང་མི་ལྡན་པ་གཡང་ས་དང་རྡོང་དུམ་ཚེར་མ་ལུང་ཁུང་ལ་སོགས་པས་མི་སྙོམས་ཤིང་རད་རོད་ཅན་མི་གཙང་བའི་ཉེས་པས་མ་དག་པ་མཐོང་བ་དེ་ལ་མ་བཟོད་ནས། རང་གི་སངས་རྒྱས་ཀྱི་ཞིང་དུ་སྣོད་བཅུད་ཀྱི་ཉེས་པ་དེ་དག་མེད་ཅིང༌། སྣོད་བཅུད་དག་པར་སྒྲུབ་པའི་སླད་དུ་སྦྱིན་སོགས་ལ་བརྩོན་པའི་བྱང་ཆུབ་སེམས་དཔའ་ཡིས། རང་གི་སངས་རྒྱས་ཀྱི་ཞིང་དུ་བཅུད་ཀྱི་ཉེས་པ་དེ་དག་མེད་ཀྱི་སྟེང་དུ་མངོན་ཤེས་དང་འོད་དང་བདེ་སྐྱིད་ལ་སོགས་ཀྱི་ཡོན་ཏན་ཕུན་སུམ་ཚོགས་པ་དང༌། སྣོད་ཀྱི་ཉེས་པ་དག་མེད་ཀྱི་སྟེང་དུ་གཞི་བཻཌཱུརྱ་སྔོན་པོའི་རྒྱུ་ལས་གྲུབ་ཅིང༌། ལག་མཐིལ་ལྟར་མཉམ་པ་གསེར་གྱི་བྱེ་མ་བདལ་པ་རྒྱ་ཁྱོན་ཡངས་པ་ཚད་མེད་པ་དེ་ལྟ་དེ་ལྟར་སྒྲུབ་པའི་ཕྱིར་ཕར་ཕྱིན་དྲུག་ལ་སྤྱོད་པ་དེས། རང་གི་སངས་རྒྱས་ཀྱི་ཞིང་ནི་དག་པ་བླ་ན་མེད་པ་ཉིད་འགྲུབ་པར་འགྱུར་རོ། །དེ་རྣམས་ཀྱིས་ཞིང་དག་བླ་ན་མེད་པ་ནི། རྣམ་ཀུན་མངོན་རྫོགས་རྟོགས་པ་སྟེ། ཞེས་པ་དེ་བཤད་ཟིན་ཏོ། ། ༡༣༽ཐབས་ལ་མཁས་པའི་ངོ་བོ་ཡོངས་སུ་འདྲེས་པ་ཤེས་པའི་ཡེ་ཤེས་བཤད་པ། ད་ནི་ཐོག་མར་སྒོམ་པ་ནས་ཅི་སྲིད་བསྒོམ་པ་མཐར་ཐུག་གི་པར་དུ་སྦྱོར་བ་འདིའི་ལས་ལ་ཁྱབ་བྱེད་དུ་འཇུག་པར་་བྱང་ཆུབ་སེམས་དཔའི་ཐབས་ལ་མཁས་པའི་ངོ་བོ་ཡོངས་སུ་འདྲེས་པ་ཤེས་པའི་ཡེ་ཤེས་བཤད་པར་བྱའོ། །ཉི་ཁྲིའི་ལེའུ་ཞེ་བཞི་པར། བྱང་ཆུབ་སེམས་དཔའ་རྣམ་ཐར་གསུམ་ལ་སོགས་པ་སངས་རྒྱས་ཀྱི་ཆོས་རྣམས་ལ་ཇི་ལྟར་འདྲེས་པ་བགྱི་ཞིང་སྒོམ་པར་བགྱི་ཞེས་སོགས་ཞུ་བ་ལན་དང་བཅས་པའི་དོན། ཡུལ་དང་སྦྱོར་བ་ཅན་འདི་ནི། །དགྲ་རྣམས་ལས་ནི་འདས་པ་དང༌། །མི་གནས་ཇི་བཞིན་ཤུགས་དང་ནི། །ཐུན་མོང་མ་ཡིན་མཚན་ཉིད་དང༌། །མ་ཆགས་པ་དང་མི་དམིགས་དང༌། །མཚན་མ་སྨོན་ལམ་ཟད་པ་དང༌། །དེ་ཡི་རྟགས་དང་ཚད་མེད་པ། །ཐབས་ལ་མཁས་པ་རྣམ་པ་བཅུ་ཞེས་པ་ལ་ཐབས་མཁས་ཀྱི་ངོ་བོ་ནི་མདོ་ལས་རིམ་གྱིས་སློབ་པའི་ཚུལ་དང༌། དུས་དང་དུས་མ་ཡིན་པ་ཤེས་པའི་ཚུལ་གཉིས་ཀྱིས་བསྟན་ཏེ། དེ་ཡང་དང་པོར་གཟུགས་སོགས་ཆོས་ཐམས་ཅད་སྟོང་པ་ཞེས་བྱ་བར་བརྟག་ཅིང་བསླབ་པ་དང་དེ་ལྟར་གོམས་པ་དེ་ནས་སྟོང་མཉམ་པས་ཀྱང་སེམས་མི་གཡེང་བར་བསླབ་པ་དང༌། དེ་ལྟར་གོམས་ཤིང་སྟོང་མི་གཡེང་བས་ཆོས་གང་ཡང་མི་མཐོང་བ་དང༌། མ་མཐོང་བས་བར་མ་དོར་རྒྱུན་ཞུགས་ལ་སོགས་པ་ཉན་རང་གི་འབྲས་བུ་མངོན་དུ་མི་བྱེད་དོ། །ཇི་སྐད་དུ། སྟོང་ཉིད་བག་ཆགས་གོམས་པ་ཡིས། །དངོས་པོའི་བག་ཆགས་སྤོང་འགྱུར་ཞིང༌། །ཅི་ཡང་མེད་ཅེས་གོམས་པ་ཡིས། །དེ་ཡང་ཕྱི་ནས་སྤོང་བར་འགྱུར།། ཞེས་དང༌། གང་ཚེ་དངོས་་དང་དངོས་མེད་དག། བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པ་རབ་ཏུ་ཞི། །ཞེས་པའི་དོན་སྣང་ངོ༌། །དུས་དང་དུས་མ་ཡིན་པ་ཤེས་པའི་ཐབས་ལ་མཁས་པ་ནི། སྟོང་པ་ཉིད་ལ་གནས་བཞིན་དུ་བླ་མེད་བྱང་ཆུབ་ཀྱི་ཚོགས་གཉིས་མ་སྨིན་གྱི་བར་དུ་སྟོང་ཉིད་དམ་པ་མེད་པ་དེ་མངོན་སུམ་དུ་མི་བྱེད་པའི་ཚུལ། རྗེས་ཐོབ་ཀྱི་སེམས་ཀྱིས་རྣམ་ཀུན་མཆོག་ལྡན་གྱིས་སྟོང་པ་ཉིད་ལ་འདི་ནི་འདྲེས་པར་བྱ་བའི་དུས་ཡིན་གྱི། མངོན་སུམ་དུ་བྱ་བའི་དུས་མ་ཡིན་ནོ། །ཞེས་སོ་སོར་རྟོགས་དང༌། སེམས་དམིགས་པ་ལ་འདོགས་ཏེ་དེས་བར་མ་དོར་སངས་རྒྱས་ཀྱི་ཆོས་ལས་མི་ཉམས་ལ། ཟག་པ་ཟད་པ་ཡང་མངོན་དུ་མི་བྱེད་དོ།། ཅིའི་ཕྱིར་ན། ཐབས་ལ་མཁས་པའི་ཡེ་ཤེས་རླབས་པོ་ཆེ་དེ་ལྟ་བུ་དང་ལྡན་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་་གནས་ཤིང་འདི་ནི་འདྲིས་པར་བྱ་བའི་དུས་ཏེ། མངོན་དུ་བྱ་བའི་དུས་མ་ཡིན་ནོ། ། ཞེས་རབ་ཏུ་ཤེས་པ་དང༌། འདི་ན་སྦྱིན་སོགས་སངས་རྒྱས་ཀྱི་ཆོས་རྣམས་ལ་སློབ་ཅིང་འདྲིས་པར་བྱེད་པའི་དུས་སོ། །འདི་ནི་སྟོབས་བཅུ་ལ་སོགས་སངས་རྒྱས་ཀྱི་ཆོས་རྣམས་ཐོབ་པར་བྱེད་པའི་དུས་སོ། །ཞེས་སོ་སོར་རྟོགས་ཅིང་ཤེས་པས་བར་མ་དོར་ཉན་རང་གི་འབྲས་བུ་རྣམས་མངོན་སུམ་དུ་མི་བྱེད་བ་ཡིན་ནོ། ། དེས་ན་གཞི་ཤེར་ཕྱིན་ཆོས་དབྱིངས་ཀྱི་ཡུལ་མཁྱེན་པ་གསུམ་དང༌། ཤེར་ཕྱིན་ཟབ་མོའི་རྣལ་འབྱོར་གཉིས་སྦྱོར་ཞིང་ཉམས་སུ་ལེན་པ་ཅན་གྱི་ཐབས་ལ་མཁས་པ་དང་བཅས་པ་འདི་ནི། སྐྱེས་བུ་དཔའ་པོ་དགྲ་རྣམས་བཅོམ་ནས་གཉེན་བཤེས་དང་བཅས་པ་འབྲོག་དགོན་པ་ནས་ཐར་པའི་དཔེས། སེམས་ཅན་མ་བཏང་བའི་སྙིང་རྗེས་ཞི་བའི་དགྲ་དང༌། སྟོང་ཉིད་མ་བཏང་བའི་ཤེས་རབ་ཀྱིས་སྲིད་པའི་དགྲ་རྣམས་ལས་ནི་འདས་པའི་་ཐབས་ལ་མཁས་པ་དང༌། བྱ་བར་སྣང་ལ་རྒྱུུ་བ་གནས་མེད་ཀྱང༌། གནས་པའི་དཔེས། སྟོང་ཉིད་ལ་སྤྱོད་ཀྱང་དེ་ལ་མི་གནས་ཤིང་འདྲིས་པར་བྱེད་པའི་ཐབས་ལ་མཁས་པ་དང༌། འཕོང་ལ་ཤིན་ཏུ་གོམས་པའི་ཇི་ལྟར་འདོད་པ་བཞིན་འཕེན་པའི་དཔེས་ཇི་སྲིད་དགེ་བ་རྣམས་བླ་མེད་བྱང་ཆུབ་ཏུ་མ་སྨིན་པ་དེ་སྲིད་ཡང་དག་པའི་མཐའ་མངོན་དུ་མི་བྱེད་ཅིང་སྨིན་པ་ན་མངོན་སུམ་དུ་བྱེད་པ་ཐབས་མཁས་པ་ཇི་ལྟ་བ་བཞིན་དུ་གོམས་པའི་ཤུགས་ཀྱི་ཐབས་ལ་མཁས་པ་དང༌། ཤེས་རབ་ཀྱི་ཡང་དག་པའི་མཐའ་ལ་སློབ་ཀྱང༌། བར་མ་དོར་ཞི་བར་མི་ལྟུང་བའི་རྒྱུ་སྙིང་རྗེས་སེམས་ཅན་མ་བཏང་བ་ནི་ཉན་རང་དང་ཐུན་མོང་མ་ཡིན་པའི་མཚན་ཉིད་ཀྱི་ཐབས་ལ་མཁས་པ་དང༌། གང་ཟག་གི་བདག་དང་ཕྱིན་ཅི་ལོག་བཞི་ལ་མ་ཆགས་པའི་ཐབས་ལ་མཁས་པ་དང༌། སེམས་ཅན་ལ་སོགས་པ་གང་ཟག་གི་བདག་དང་གཟུགས་ལ་སོགས་པ་ཆོས་ཀྱི་བདག་མི་དམིགས་པའི་ཐབས་ལ་མཁས་པ་དང༌། སྐྱེས་པ་བུད་མེད་དང་ཕུང་པོ་ལ་སོགས་པའི་མཚན་མ་ཟད་པའི་ཐབས་ལ་མཁས་པ་དང༌། ཁམས་གསུམ་དུ་བརྒྱ་བྱིན་ལ་སོགས་པ་ལ་དགའ་བའི་སྨོན་ལམ་ཟད་པའི་ཐབས་ལ་མཁས་པ་དང༌། ཐབས་ལ་མཁས་པའི་བྱང་ཆུབ་སེམས་དཔའ་དེའི་སངས་རྒྱས་ཀྱིས་བླ་ན་མེད་པའི་བྱང་ཆུབ་ཏུ་ལུང་བསྟན་པའི་རྟོགས་པ་སྟོང་ཉིད་ལ་འདྲེས་པར་བྱེད་པ་སྟོན་པའི་ཐབས་ལ་མཁས་པ་དང༌། ལུང་བསྟན་པ་དང་ལུང་མ་བསྟན་པ་དང་ཕྱིར་མི་ལྡོག་པའི་རྣམ་གྲངས་ཚད་མེད་པ་ཤེས་པའི་ཐབས་ལ་མཁས་པ་སྟེ། དེ་ལྟར་ཐབས་ལ་མཁས་པ་རྣམ་པ་བཅུ་ནི་རྣམ་རྫོགས་སྦྱོར་བའི་རང་བཞིན་འདྲེས་པའི་ཤེས་པའི་ཡེ་ཤེས་སྲིད་ཞི་མཉམ་པ་ཉིད་ཡིན་ནོ། །མདོ་ལས་འདྲིས་པ་བྱེད་པ་དེ་ལྟ་བུའི་ཡེ་ཤེས་མཐོང་བ་དང་ལྡན་པའི་བྱང་ཆུབ་སེམས་དཔའ་ནི་འདུ་བྱ་བ་མེད་པར་ལྟུང་བའམ། ཁམས་གསུམ་པ་དང་ལྷན་ཅིག་གནས་པའི་སྐབས་མེད་དེ་དེ་ནི་གནས་མ་ཡིན་ནོ། །ཞེས་གསུངས་པའི་དོན་ཏོ། །དེ་རྣམས་ཀྱིས་འདི་ནི་ཐབས་མཁས་བཅས་པ་ཡིན་ཞེས་བཤད་ཟིན་ཏོ། །དངོས་པོ་བརྒྱད་ལས་རྣམ་ཀུན་མངོན་རྫོགས་རྟོགས་པའི་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་པ་མདོ་ལུགས་མ་ཞེས་བྱ་བ་ལས། སྐབས་ལ་བཞི་པའི་འགྲེལ་པའོ། ། ལྔ་བ། རྩེ་སྦྱོར་རྒྱས་པར་བཤད་པ། ༡༽རྩེ་མོ་དེའི་རྟགས་བཤད་པ། ད་ནི་རྩེ་མོར་ཕྱིན་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པར་བྱ་སྟེ། ཉི་ཁྲིའི་ལེའུ་ཞེ་ལྔ་པར་བྱང་ཆུབ་སེམས་རྨི་ལམ་ན་ཉན་རང་གི་སེམས་མི་བསྐྱེད་ཅིང་ཆོས་ཐམས་ཅད་རྨི་ལམ་དང་སྒྲ་བརྙན་དང་གཟུགས་བརྙན་དང་སྨིག་རྒྱུ་དང་སྤྲུལ་པ་དང་འདྲ་བ་ཉིད་དུ་བལྟ་ལ་མངོན་པར་འདུ་མི་བྱེད་ན་ཕྱིར་མི་ལྡོག་པའི་མཚན་ཉིད་དུ་རིག་པར་བྱའོ། །ཞེས་སོགས་ཀྱི་དོན། རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་ལྷ་ལ་སོགས། །རྩེ་མོར་ཕྱིན་པའི་སྦྱོར་བའི་རྟགས་རྣམ་པ་བཅུ་གཉིས་དག་ཏུ་བཞེད། ཅེས་པ་ལ་སྐབས་འདིའི་་ཆོས་བཅུ་ལས་དང་པོ་རྣམ་རྫོགས་སྦྱོར་བ་དེ་རབ་ཏུ་གྱུར་པ་ནི་རྩེ་མོར་ཕྱིན་པའི་རྣལ་འབྱོར་ཡིན་ལ། རྣལ་འབྱོར་དེ་ཐོབ་ནས་བྱང་ཆུབ་སེམས་དཔའ་སངས་རྒྱས་རྣམས་ཀྱིས་བླ་མེད་བྱང་ཆུབ་ཏུ་ལུང་སྟོན་ཅིང༌། ལུང་བསྟན་པ་ཉིད་ཕྱིར་མི་ལྡོག་པས། རྩེ་མོར་ཕྱིན་པ་དང༌། ལུང་བསྟན་པ་དང༌། ཕྱིར་མི་ལྡོག་པ་གསུམ་དོན་གཅིག་ཉིད་དོ། །སྐབས་བཞི་པར་རྣམ་རྫོགས་ཀྱི་རྣལ་འབྱོར་དེ་ཐབས་མཁས་ཀྱིས་ཟིན་པའི་ཚེ། རྩེ་མོར་ཕྱིན་པར་སྣང་ངོ༌། །ཐབས་མཁས་པ་དགུ་པ་དག་བཅུ་པར་ལུང་བསྟན་པ་དང་སྤྲེལ་ནས་ཕྱིར་མི་ལྡོག་པའི་རྟགས་ཉིད་རྩེ་སྦྱོར་གྱི་རྟགས་སུ་གསུངས་པའི་ཕྱིར་རོ། །དེས་ན་རྩེ་མོའི་རྣལ་འབྱོར་ཐོབ་པའི་བྱང་ཆུབ་སེམས་དཔའ་སད་དུས་སུ་ཆོས་རྣམས་རྨི་ལམ་དང་འདྲ་བར་ལྟ་བར་མ་ཟད་རྨི་ལམ་ན་ཡང་ཆོས་རྣམས་ཀུན། རྨི་ལམ་དང་སྒྲ་བརྙན་ལྟ་བུར་ལྟ་བ་ལ་སོགས་པ་དང༌། རྨི་ལམ་ན་དེ་བཞིན་གཤེགས་པ་དགེ་སློང་སོགས་ལྟ་དང་ཀླུ་ལ་སོགས་པ་འཁོར་ཚད་མེད་པ་མངའ་བ་ལ་ཆོས་སྟོན་པ་མཐོང་བ་དང༌། ཡང་རྨི་ལམ་དེ་བཞིན་གཤེགས་པ་ནམ་མཁའ་ལ་འཕགས་ཤིང་ཆོས་སྟོན་པ་མཚན་དཔེ་འབར་བ་སྤྲུལ་བ་མང་པོ་འགྱེད་པ་མཐོང་བ་དང༌། ཡང་རྨི་ལམ་ན་འཇིག་རྟེན་དུ་མྱ་ངན་དྲག་པོ་སྣ་ཚོགས་བྱུང་བ་མཐོང་ན་མི་འཇིགས་པ་དང༌། ཡང་རྨི་ལམ་ན་ངན་སོང་གསུམ་མཐོང་ན་རང་ཉིད་སངས་རྒྱས་པའི་ཞིང་དེར་ངན་སོང་གསུམ་པོ་མེད་པ་ཉིད་དུ་སྤྱད་དོ། །སྙམ་པ་དང༌། རྨི་ལམ་སད་པའི་ཚེ་གྲོང་མེས་ཚིག་པ་ཞི་བ་ལ་སོགས་པའི་བདེན་ཚིག་འགྲུབ་པ་དང༌། གལ་དེ་བདག་འཚང་རྒྱ་ན་ཞེས་པའི་བདེན་ཚིག་གིས་སྐྱེས་པ་འམ་བུད་མེད་གཟུངས་བའི་མི་མ་ཡིན་གུད་དུ་འགྲོ་བ་དང༌། བདུད་ལས་སྣ་ཚོགས་རིག་པ་དང༌། བྱང་ཆུབ་སེམས་དཔའ་ལ་ལྕི་བའི་ལྟུང་བ་རིག་པ་དང། ཉན་རང་གི་སེམས་ཀྱིས་དབེན་པ་བྱང་ཆུབ་སེམས་དཔའ་དགོན་པ་དང༌། ནགས་སུ་གནས་པའི་དོན་དུ་རིག་པ་དང༌། བྱང་ཆུབ་སེམས་དཔའ་དེས་དགེ་བའི་བཤེས་གཉེན་གང་ཡིན་དང༌། སངས་རྒྱས་ཀྱི་ཡུམ་གང་ཡིན་རིག་པ་དང༌། སངས་རྒྱས་ཀྱི་ཞིང་དག་པ་དང་སེམས་ཅན་སྨིན་པར་འདོད་པ་ལ་སོགས་པ་རྩེ་མོར་ཕྱིན་པའི་སྦྱོར་བ་ཐོབ་པའི་རྟགས་ནི། རྣམ་པ་བཅུ་གཉིས་དག་ཏུ་འདོད། རྟགས་དང་རྣམ་འཕེལ་ལ་སོགས་པ་བཞི་པོ་འདི་རྩེ་སྦྱོར་ཐོབ་ནས་མཐར་ཐུག་གི་བར་གྱི་ཆོས་སུ་གསུངས་པའི་ཕྱིར། དྲོད་སོགས་བཞིར་འཆད་པ་ནི་ཤེས་བྱེད་ཡིད་ཆེས་པ་མི་སྣང་ངོ༌། ། སྦྱོར་ལམ་བཏགས་པ་བར་བཤད་པ་ལ་ཡང་དགོས་པ་མེད་ཅིང་གནོད་བྱེད་དང་བཅས་སོ། །དེས་ན་རྩེ་མོ་དེའི་རྟགས་དང༌། རྩེ་མོ་དེའི་བསོད་ནམས་རྣམ་པར་འཕེལ་བ་དང༌། རྩེ་མོ་དེའི་བྱང་ཆུབ་ཀྱི་སེམས་བརྟན་པ་དང༌། རྩེ་མོ་དེའི་ཏིང་ངེ་འཛིན་གྱི་སེམས་ཀུན་ཏུ་གནས་པ་ཡིན་ནོ། །དེ་རྣམས་ཀྱིས་དེའི་རྟགས་དང་ཞེས་པ་དེ་བཤད་ཟིན་ཏོ། ། ༢༽རྩེ་སྦྱོར་དེའི་བསོད་ནམས་རྣམ་པར་འཕེལ་བ་བཤད་པ། ད་ནི་རྩེ་མོའི་རྣལ་འབྱོར་གང་གི་རྒྱུད་ལ་ཡོད་པ་དེ་ལ་རྩེ་སྦྱོར་དེའི་བསོད་ནམས་དཔག་ཏུ་མེད་པ་རྣམ་པར་འཕེལ་བ་བཤད་པར་བྱ་སྟེ། ཉི་ཁྲིའི་ལེའུ་ཞེ་ལྔ་པའི་གསུམ་གཉིས་ཙམ་སོང་བའི་སྐབས་ནས། འཛམ་བུ་གླིང་གི་སེམས་ཅན་ཇི་སྙེད་ཡོད་པ་ཐམས་ཅད་མིའི་ལུས་ཐོབ་ནས་སངས་རྒྱས་པར་གྱུར་པ་ལ་ནམ་འཚོལ་བར་ཏུ་ལ་ལ་ཞིག་གིས་མཆོད་པའི་བསོད་ནམས་ལས། ཤེར་ཕྱིན་འདི་ལ་སྤྱོད་པས་བསོད་ནམས་ཆེས་མང་དུ་འཕེལ། ཞེས་སོགས་ཀྱི་དོན། འཛམ་བུ་གླིང་གི་སྐྱེ་བོ་སྙེད། །སངས་རྒྱས་མཆོད་པའི་དགེ་ལ་སོགས། རྣམ་མང་དུ་ནི་དཔེར་མཛད་ནས། །རྣམ་འཕེལ་བཅུ་དྲུག་བདག་ཉིད་དོ། ཞེས་པ་ལ་འཛམ་བུ་གླིང་གི་སྐྱེ་བོ་ཇི་སྙེད་ཡོད་པ་དེ་སྙེད་སངས་རྒྱས་སུ་གྱུར་པ་ལ་འགའ་ཞིག་གིས་ནམ་མཚོའི་བར་མ་ཆོད་པའི་དགེ་བ་དང༌། ལ་སོགས་པ་སྟོང་གསུམ་གྱི་སྐྱེ་བོ་ཇི་སྙེད་སངས་རྒྱས་སུ་གྱུར་པ་ལ་ནམ་་འཚོའི་བར་དུ་མཆོད་པའི་དགེ་བ་སྟེ་གཉིས་དང༌། འཛམ་བུ་གླིང་གི་སེམས་ཅན་ཇི་སྙེད་པ་མིར་གྱུར་ལ། དེ་དག་ལས་ཞིག་གིས་དགེ་བ་བཅུ་བསམ་གཏན་ཚད་མེད་གཟུགས་མེད་མངོན་ཤེས་ལྔ་སྟེ་འཇིག་རྟེན་གྱི་ཕུན་ཚོགས་དང༌། རྒྱུན་ཞུགས་དང༌། ཕྱིར་འོང་དང༌། ཕྱིར་མི་འོང་དང༌། དགྲ་བཅོམ་པ་དང༌། རང་བྱུང་དང་བླ་མེད་བྱང་ཆུབ་ལ་བཀོད་དེ་དེ་དག་གི་དགེ་བ་ཡང་རང་གི་སྐབས་སུ་སངས་རྒྱས་སུ་བསྔོ་བ་དང༌། བཅས་པའི་དགེ་བ་བདུན་དང༌། སྟོང་གསུམ་གྱི་སེམས་ཅན་ཇི་སྙེད་མིར་གྱུར་ལ། དེ་དག་ལ་ལ་ཞིག་གིས་འཇིག་རྟེན་པའི་ཕན་ཚོགས་ལ་བཀོད་པ་དང༌། རྒྱུན་ཞུགས་པ་དང༌། ཕྱིར་འོང་ལ་དང༌། ཕྱིར་མི་འོང་ལ་དང༌། དགྲ་བཅོམ་པ་ལ་དང༌། རང་བྱང་ཆུབ་ལ་དང༌། བླ་མེད་བྱང་ཆུབ་ལ་བཀོད་ཅིང་དགེ་བ་ཡང་རང་རང་གི་སྐབས་སུ་སངས་རྒྱས་སུ་བསྔོས་པ་དང་བཅས་པའི་བསོད་ནམས་བདུན་ནོ། །དེ་ལྟར་བདུན་ཚན་གཉིས་ཀྱི་སྟེང་དུ་སྔ་མ་གཉིས་དེ་དགེ་བ་བཅུ་དྲུག་གི་རྣམ་པ་མང་དུ་བསྟན་པ་ན་དཔེར་མཛད་ནས། རྩེ་སྦྱོར་ལ་གནས་པའི་བྱང་ཆུབ་སེམས་དཔའ་ཆོས་ཐམས་ཅད་རྨི་ལམ་ལྟ་བུར་ཡིད་ལ་བྱེད་པ་དང་མ་བྲལ་བས་ཤེར་ཕྱིན་ལ་སྤྱོད་ཅིང་གཞན་ལ་སྟོན་པ་ནི་དགེ་བའི་རྣམ་པ་ཆེས་མང་དུ་འཕེལ་བ་བཅུ་དྲུག་གི་བདག་ཉིད་དོ། །དེ་ནས་མདོ་ལས་དེ་ལྟར་སྤྱོད་པའི་བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྦྱིན་གནས་སུ་འགྱུར་ཏེ། དེ་ཅའི་ཕྱིར་ཞེ་ན། ཞེས་སོགས་ཀྱིས་བསོད་ནམས་ཆེ་བའི་རྒྱུ་མཚན་དང༌། ཤེར་ཕྱིན་ལ་རྩེ་གཅིག་ཏུ་བརྩོན་ཚུལ་དང༌། ཆོས་ཟབ་མོའི་ཡིན་ལུགས་ལ་སོགས་པ་སྟོན་ནོ། །ཉི་ཁྲིའི་ལེའུ་ཞེ་ལྔ་བའི་སྨད་ཀྱི་ཆ་ནས་ཞེ་བདུན་པ་རྫོགས་ཀྱི་བར་དུ་འབྱུང་ངོ༌། །དེ་རྣམས་ཀྱིས་རྣམ་འཕེལ་དང་ཞེས་པ་དེ་བཤད་ཟིན་ཏོ། ། ༣༽རྩེ་སྦྱོར་དེའི་སེམས་ཅན་གྱི་དོན་མི་གཏོང་བ་བཤད་པ། ད་ནི་རྩེ་སྦྱོར་དེའི་ཐེག་ཆེན་གྱི་སེམས་བསྐྱེད་བསྟན་པ་བཤད་པར་བྱས་ཏེ་ཉི་ཁྲིའི་ལེའུ་ཞེ་བརྒྱད་པར། ལྷའི་དབང་པོའི་བཅོམ་ལྡན་འདས་ལ་མེ་ཏོག་གིས་མཆོད་ནས་དགེ་བ་འདས་བླ་མེད་བྱང་ཆུབ་དུ་དམིགས་པའི་བྱང་ཆུབ་སེམས་དཔའ་དག་གིས། སངས་རྒྱས་ཀྱི་དང༌། རྣམ་མཁྱེན་གྱི་དང༌། རང་བྱུང་གི་དང༌། ཟག་མེད་ཀྱི་ཆོས་རྣམས་ཡོངས་སུ་རྫོགས་པར་གྱུར་ཅིག་ཅེས་སོགས་ཀྱིས་དོན། ཀུན་མཁྱེན་ཉིད་གསུམ་ཆོས་རྣམས་ཀྱི། ཡོངས་སུ་རྫོགས་པ་བླ་མེད་པ། །སེམས་ཅན་དོན་ཡོངས་མི་གཏོང་བ། །བརྟན་བ་ཞེས་ནི་མངོན་པར་བརྗོད། །ཅེས་པ་ལ་ཀུན་མཁྱེན་པ་ཉིད་གསུམ་གྱི་རང་བཞིན་སངས་རྒྱས་ཀྱི་ཆོས་རྣམས་ཀྱི་རྣམ་པ་མ་ལུས་པ་ཡོངས་སུ་རྫོགས་པར་བྱེད་པ་བླ་ན་མེད་པའི་དག་པ་དང༌། སེམས་ཅན་ཐམས་ཅད་ཀྱི་དོན་ཡོངས་སུ་བློས་མི་གཏོང་བ་ཉིད་ཉན་རང་དུ་མི་ལྡོག་པས། དེ་ཉིད་བྱང་ཆུབ་ཀྱི་སེམས་བརྟན་པ་ཞེས་མི་མངོན་པར་བརྗོད་ཅིང་བསྟན་ཏོ། །དེ་རྣམས་ཀྱིས་བརྟན་དང་ཞེས་པ་དེ་བཤད་ཟིན་ཏོ། ། ༤༽རྩེ་སྦྱོར་གྱི་ཏིང་ངེ་འཛིན་གྱི་སེམས་ཀུན་ཏུ་གནས་པ་བཤད་པ། ད་ནི་རྩེ་སྦྱོར་གྱི་ཏིང་ངེ་འཛིན་གྱི་སེམས་ཀུན་ཏུ་གནས་པ་བཤད་པར་བྱ་སྟེ། མདོ་ལས། སེམས་དང་པོ་བསྐྱེད་པ་དང༌། ཡུན་རིང་པོ་ནས་སྤྱོད་པ་དང༌། ཕྱིར་མི་ལྡོག་པ་དང༌། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་ལ་རྗེས་སུ་ཡི་རང་བའི་བསོད་ནམས་ནི་ཚད་མེད་དོ། །ཞེས་སོགས་ཀྱི་དོན། གླིང་བཞི་པ་དང་སྟོང་དག་དང༌། །སྟོང་གཉིས་གསུམ་དག་དཔེར་མཛད་ནས། །བསོད་ནམས་མང་པོ་ཉིད་ཀྱིས་ནི། །ཏིང་འཛིན་ཡོངས་སུ་བསྒྲགས་པ་ཡིན། ཞེས་པ་ལ་ཏིང་ངེ་འཛིན་འདིའི་ངོ་བོ་ཉིད་དུ་རྗེས་སུ་ཡི་རང་བ་འདི་ཡིན་ནོ། །གླིང་བཞི་པ་དང་སྟོང་གི་འཇིག་རྟེན་དང་སྟོང་གསུམ་གྱི་འཇིག་རྟེན་གྱི་ཁམས་ནི་སྐྲའི་རྩེ་མོ་ཙམ་དུ་བསིལ་བའི་ཚད་ཀྱང་གཟུང་དུ་སྲིད་ཀྱི་རྗེས་སུ་ཡི་རང་བ་དང་ལྡན་པའི་སེམས་བསྐྱེད་པའི་བསོད་ནམས་ལ་ནི་ཚད་མེད་དོ། །ཞེས་བྱ་བ་དག་དཔེར་མཛད་ནས། བསོད་ནམས་མང་པོ་ཚད་མེད་པ་གསུང་བ་ཉིད་ཀྱིས་ནི། བྱང་ཆུབ་སེམས་དཔའ་དེ་དག་སེམས་བསྐྱེད་ལ་རྗེས་སུ་ཡི་རིང་བ་དང་མཚུངས་ལྡན་ནི། རྩེ་གཅིག་པའི་ཏིང་ངེ་འཛིན་འདི་ཡོངས་སུ་བསྒྲགས་ཤིང་བསྟན་པ་ཡིན་ནོ། །དེ་རྣམས་ཀྱིས་སེམས་ཀུན་གནས་པ་དང་ཞེས་པ་དེ་བཤད་ཟིན་ཏོ། ། ༥༽མཐོང་སྒོམ་གྱི་སྤང་བྱ་རྣམ་རྟོག་བཞི་བཤད་པ། ད་ནི་མཐོང་སྒོམ་གྱི་སྤང་བྱ་རྣམ་རྟོག་བཞི་བཤད་པར་བྱ་སྟེ། འདི་ལ་བསྡུས་ཏེ་མདོར་བསྟན་པ་དང་ཕྱེ་སྟེ་རྒྱས་པར་བཤད་པ་གཉིས་ལས། བསྡུས་ཏེ་མདོར་བསྟན་པ། དང་པོ་ནི། འཇུག་པ་དང་ནི་ལྡོག་པ་ལ། །གཟུང་བའི་རྣམ་རྟོག་སོ་སོར་ཏེ། །དགུ་ཡི་བདག་ཉིད་ཅི་བཞིན་ཡུལ། །མིན་པའི་བདག་ཉིད་དག་ཤེས་བྱ། །ཞེས་པ་ལ་ཡུལ་ཡོན་ཏན་ཅན་དུ་མཐོང་བ་ལ་འཇུག་པའི་རྣམ་པར་རྟོག་པ་དང་ནི་སྐྱོན་ཅན་དུ་མཐོང་བ་ལ་ལྡོག་པའི་རྣམ་པས་རྟོག་པ་ལ་གཟུང་བའི་རྣམ་རྟོག་གཉིས་ཏེ། སོ་སོར་གཉིས་པོ་དེ་རེ་རེའི་ཡང་དགུ་དགུའིབདག་ཉིད་དུ་ཡུལ་གྱི་སྒོ་ནས་ཕྱེ་བ་དེ་རྣམས་ཀྱིས་གཟུང་བ་ཇི་ལྟ་བ་བཞིན་དུ། ཡུལ་རྣམས་བདེན་པར་ཡོད་པ་མིན་པའི་བདག་ཉིད་དག་དུ་ཤེས་པར་བྱའོ། །དེས་གཟུངས་རྟོག་མདོར་བསྟན་ནས་འཛིན་རྟོག་ཀྱང་བསྡུས་ཏེ་བསྟན་པ་ནི། སོ་སོར་སྐྱེ་བོ་འཕགས་དབྱེ་བས། །སེམས་ཅན་རྫས་དང་བཏགས་ཡོད་པར། །རྣམ་རྟོག་འཛིན་པ་དག་ཏུ་འདོད། །དེ་དག་སོ་སོར་དགུ་བདག་ཉིད། །གལ་ཏེ་གཟུང་དོན་དེ་བཞིན་མེད། །དེ་དག་གང་གི་འཛིན་པར་འདོད། །དེ་ལྟར་དེ་དག་འཛིན་པ་ཡི། །ངོ་བོ་སྟོང་བའི་མཚན་ཉིད་དོ། །ཞེས་པ་ལ་སོ་སོའི་སྐྱེ་བོ་དང་འཕགས་པའི་འཛིན་རྟོག་གཉིས་སུ་དབྱེ་བས། སེམས་ཅན་རྗེས་སུ་ཡོད་པར་རྟོག་པས་སོ་སྐྱེ་འཛིན་རྟོག་དང༌། སེམས་ཅན་བཏགས་པ་ཙམ་དུ་ཡོད་པར་རྣམ་བར་རྟོག་པ་འཕགས་པའི་འཛིན་པ་རྟོག་པ་དག་ཏུ་འདོད། གཉིས་པ་དེ་དག་སོ་སོར་ཡུལ་གྱི་སྒོ་ན་དགུ་དགུའི་བདག་ཉིད་དུ་འཆད་པར་འགྱུར་རོ། །གལ་ཏེ་གཟུང་བའི་དོན་འཛིན་རྟོག་གིས་གཟུང་བ་དེ་བཞིན་དུ་རྫས་དང་བཅས་པའི་དངོས་པོར་གྲུབ་པ་མེད་ན་དེ་དག་དངོས་པོར་གྲུབ་པ་གང་གི་འཛིན་པ་མ་འཁྲུལ་པའི་དངོས་པོར་འདོད་དེ་མི་གྲུབ་པོ། །གཟུང་དོན་དངོས་པོར་མེད་པ་དེ་དེ་ལྟར་འཛིན་པ་དེ་དག་འཛིན་པའི་ངོ་བོ་མ་འཁྲུལ་བས་སྟོང་པའི་མཚན་ཉིད་དུ་གྲུབ་པ་ཉིད་དོ། །དེ་དག་གིས་བསྡུས་ཏེ་མདོར་བསྟན་པ་སོང་ནས། ཕྱེ་སྟེ་རྒྱས་པར་བཤད་པ། གཉིས་པ་ཕྱེ་སྟེ་རྒྱས་པར་བཤད་པ་ལ་མཐོང་སྤང་གི་རྟོག་པ་བཞི་རྒྱས་པར་བཤད་པ་དང༌། སྒོམ་སྤང་གི་རྟོག་པ་བཞི་རྒྱས་པར་བཤད་པའོ། ། ༡ མཐོང་སྤང་གི་རྟོག་པ་བཞི་རྒྱས་པར་བཤད་པ། དང་པོ་མཐོང་སྤང་གི་འཇུག་པའི་གཟུང་རྟོག་བཤད་པ་ནི། ངོ་བོ་ཉིད་དང་རིགས་དང་ནི། །ལམ་ནི་ཡང་དག་འགྲུབ་པ་དང༌། །ཤེས་པའི་དམིགས་པ་མ་འཁྲུལ་དང༌། །མི་མཐུན་ཕྱོགས་དང་གཉེན་པོ་དང༌། །རང་གི་རྟོགས་དང་བྱེད་པ་དང༌། །དེ་ཡི་ལས་བྱའི་འབྲས་བུ་ལ་འཇུག་པའི་ཕྱོགས་ཀྱི་རྟེན་ཅན་གྱི། རྣམ་རྟོག་དེ་ནི་རྣམ་དགུར་འདོད་ཅེས་པ་ལ་རྣམ་བྱང་གི་ཆོས་ཐམས་ཅད་བཏགས་པའི་ཆོས་ཀྱི་དབེན་པའི་ངོ་བོ་ཉིད་དང༌། ཐེག་ཆེན་གྱི་རིགས་དང་ནི། ལམ་ནི་བྱང་ཆུབ་ཡང་དག་པར། འགྲུབ་པར་བྱེད་པ་དང༌། ལམ་ཤེས་པའི་དམིགས་པ་མ་འཁྲུལ་པ་དང༌། མི་མཐུན་ཕྱོགས་དང་གཉེན་པོ་བྱེད་དང༌། བྱང་ཆུབ་སེམས་དཔའ་རང་གི་རྟོགས་པ་དང༌། བྱེད་པ་ལམ་ཤེས་དང༌། ལམ་ཤེས་དེའི་བྱེད་ལས། བྱ་བའི་འབྲས་བུ་ཚོགས་གཉིས་དེ་རྣམས་ལ་འཇུག་བྱང་འཛིན་པ་རྟེན་རྣམ་པར་བྱང་བ་ལ་རྟེན་པའི་ཕྱོགས་ཀྱི་རྟེན་ཅན་གྱི་གཟུང་བའི་རྣམ་པར་རྟོག་པ་དེ་ནི། རྣམ་པ་དགུར་འདོད་དོ། ། གཉིས་པ་ལྡོག་པའི་གཟུང་རྟོག་བཤད་པ་ནི། སྲིད་དང་ཞི་བར་ལྷུང་བའི་ཕྱིར། །རྟོགས་པར་དམན་པ་ཉིད་དང་ནི། །ཡོངས་སུ་འཛིན་པ་མེད་པ་དང༌། །ལས་ཀྱི་རྣམ་པ་མ་ཚང་དང༌། །གཞན་གྱི་རྐྱེན་གྱིས་འགྲོ་བ་དང༌། །ཆེད་དུུ་བྱ་བ་ལོག་པ་དང༌། །ཉི་ཚེ་བ་དང་སྣ་ཚོགས་ཉིད། །གནས་དང་འཇུག་ལ་རྨོངས་པ་དང༌། །རྗེས་ལ་འགྲོ་ཞེས་བྱ་བ་དང༌། །རྣམ་རྟོག་དགུ་ཡི་བདག་ཉིད་འདི། ། ལྡོག་པའི་ཕྱོགས་ཀྱི་རྟེན་ཅན་ཏེ། །ཉན་ཐོས་ལ་སོགས་ཡིད་ལ་འབྱུང༌། །ཞེས་པ་ལ་ཐབས་མེད་ཤེས་རབ་བྲལ་བས་སྲིད་དང་ཞི་བར་རྟོགས་པའི་མཚན་འཛིན་དུ་ལྷུང་བའི་ཕྱིར། ཉན་རང་གི་རྟོགས་པ་དམན་པ་ཉིད་དང༌། ཐབས་མཁས་ཀྱི་ཤེར་ཕྱིན་གྱི་ཡོངས་སུ་འཛིན་པ་མེད་པ་དང༌། སངས་རྒྱས་སྒྲུབ་པའི་ལམ་གྱི་རྣམ་པ་ཐབས་ཤེས་མ་ཚང་བ་དང༌། དམན་པའི་ལམ་ལ་བརྟེན་པ་དེ་དག་རྣམ་མཁྱེན་དུ་འགྲོ་ན་གཞན་ཤེར་ཕྱིན་གྱི་རྐྱེན་གྱིས་འགྲོ་དགོས་པ་དང༌། ཆེད་དུ་གཉེར་བྱའི་འབྲས་བུ་རྣམ་མཁྱེན་ལས་ལྡོག་པ་དང༌། ཡེ་ཤེས་ཉེ་ཚེ་བ་དང༌། སྦྱིན་སོགས་ལ་དམིགས་པའི་མཚན་འཛིན་སྣ་ཚོགས་པ་ཉིད་དང༌། རྣམ་མཁྱེན་དུ་གནས་པ་དང་དེར་འཇུག་པའི་ལམ་ལ་རྨོངས་པ་དང༌། སྦྱིན་སོགས་ལྔ་ཤེར་ཕྱིན་གྱི་རྗེས་ལ་འབྲང་ནས་རྣམ་མཁྱེན་དུ་འགྲོ་ཞེས་བྱ་བ་དེ་རྣམས་ལ་རྣམ་པར་རྟོག་པར་བྱེད་པ་དགུའི་བདག་ཉིད་འདི། དམན་པའི་ལམ་སྐྱོན་དུ་མཐོང་བས་ལྡོག་པའི་ཕྱོགས་ཀྱི་རྟེན་ཅན་ཏེ། ལྡོག་པའི་གཟུང་རྟག་འདི་རྣམས་ཉན་ཐོས་ལ་སོགས་པའི་དམན་པ་ལ་དམིགས་པའི་ཡིད་ལས་འབྱུང་ངོ༌། ། གསུམ་པ་རྫས་འཛིན་གྱི་རྟོག་པ་བཤད་པ་ནི། འཛིན་པ་དང་ནི་དོར་བ་དང༌། །ཡིད་ལ་བྱེད་དང་ཁམས་རྣམས་ནི། །གསུམ་པོ་དག་དང་ཉེར་འབྲལ་དང༌། །གནས་དང་མངོན་པར་ཞེན་པ་དང༌། ། ཆོས་ཀྱི་དངོས་པོ་དག་པ་དང༌། །ཆགས་པ་དང་ནི་གཉེན་པོ་དང༌། །ཇི་ལྟར་འདོད་བཞིན་འགྲོ་ཉམས་ལ། འཛིན་པ་དང་པོར་ཤེས་པར་བྱ། །ཞེས་པ་གཟུགས་སོགས་འཛིན་པ་དང༌། འདོར་བ་དང༌། གཟུགས་སོགས་ཡིད་ལ་བྱེད་པ་དང༌། ཡིད་ལ་བྱེད་པས་ཁམས་རྣམས་ནི་གསུམ་པོ་དག་དང་ཉེ་བར་འབྲེལ་ཞིང་འབྲི་བ་དང༌། གཟུགས་སོགས་ལ་གནས་པ་དང༌། གཟུགས་སོགས་ལ་མངོན་པར་ཞེན་པ་དང༌། ཞེན་བྱའི་ཆོས་ཀྱི་དངོས་པོ་བཏགས་པ་དང༌། འཁོར་གསུམ་དུ་ཞེན་པའི་ཆགས་པ་དང༌། དེའི་གཉེན་པོ་ཤེར་ཕྱིན་གྱི་སྤྱོད་པ་དང༌། ཤེར་ཕྱིན་དུ་འདུ་ཤེས་ཤིང་ཆགས་ན་ཡང་ཇི་ལྟར་འདོད་པ་བཞིན་དུ་འགྲོ་བར་བྱེད་པའི་ཤེར་ཕྱིན་ལས་ཉམས་པ་སྟེ། དེ་རྣམས་ལ་རྫས་སུ་འཛིན་པ་ནི་འཛིན་པ་གཉིས་ཀྱི་དང་པོར་ཤེས་པར་བྱའོ། ། བཞི་བ་བཏགས་འཛིན་གྱི་རྟོག་པ་བཤད་པ་ནི། ཆེད་བཞིན་ངེས་པར་མི་འབྱུང་དང༌། །ལམ་ལ་ལམ་མིན་ངེས་འཛིན་དང༌། །འགག་དང་བཅས་པའི་སྐྱེ་བ་དང༌། །དངོས་པོ་ལྡན་དང་མི་ལྡན་དང༌། གནས་དང་་རིགས་པ་འཇིག་པ་དང༌། །དོན་དུུ་གཉེར་རྒྱུ་མེད་པ་དང༌། །ཕྱིར་རྒོལ་བ་ནི་དམིགས་པ་ལ། །འཛིན་པའི་རྣམ་རྟོག་གཞན་ཡིན་ནོ། །ཞེས་པ་ལ་ཉན་རང་ལམ་གྱིས་གང་གི་ཆེད་དུ་དམིགས་པ་བཞིན་རྣམ་མཁྱེན་དུ་ངེས་པར་མི་འབྱུང་བ་དང༌། ཤེར་ཕྱིན་གྱིས་ཟིན་པ་འི་ཕར་ཕྱིན་དྲུག་བྱང་ཆུབ་སེམས་དཔའ་རྣམ་མཁྱེན་དུ་འགྲོ་བའི་ལམ་ཡིན་པ། ཉན་རང་གི་ལམ་ནི་བྱང་ཆུབ་སེམས་དཔའི་ལམ་མ་ཡིན་པ་ཉིད་དུ་ངེས་པར་འཛིན་པ་དང༌། ཆོས་རྣམས་འགག་པ་དང་བཅས་པའི་སྐྱེ་བ་དང༌། གཟུགས་སོགས་ཀྱི་དངོས་པོ་ལྡན་པ་ཡང་མ་ཡིན་མི་ལྡན་པ་ཡང་མ་ཡིན་པ་དང༌། གཟུགས་སོགས་ལ་གནས་པ་འཇིག་པ་དང༌། གནས་བྱ་གཟུགས་སོགས་ཀྱི་རིགས་ནི་གང་ལ་ཡང་གནས་པ་འཇིག་པ་དང༌། འཚང་རྒྱ་བར་འདོད་པས་ཕར་ཕྱིན་དྲུག་དོན་དུ་གཉེར་བ་དང༌། ཐམས་ཅད་ལ་དབང་བསྒྱུར་བའི་རྒྱུ་འམ་སྒོ་ཤེར་ཕྱིན་ལས་གཞན་མེད་པ་དང་བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པ་ལ་བདུད་ཀྱི་ཕྱིར་རྒོལ་བ་རྣམས་ནི་དམིགས་པ་སྟེ་དེ་རྣམས་ལ། བཏགས་པའི་དངོས་པོར་འཛིན་པར་བྱེད་པའི་རྣམ་རྟོག་ནི་རྫས་འཛིན་ལས་གཞན་བཏགས་འཛིན་ཡིན་ནོ། །དེ་རྣམས་ཀྱིས་མཐོང་སྤང་གི་རྟོག་པ་བཞི་བཤད་ནས། གཉེན་པོ་མཐོང་ལམ་བཤད་པ། ད་ནི་གཉེན་པོ་མཐོང་ལམ་བཤད་པར་བྱ་སྟེ། དེ་ལ་བྱང་ཆུབ་གཏན་ལ་དབབ་པ་དང༌། མཐོང་ལམ་ཉིད་བཤད་པ་དང༌། དེ་ནས་ཏིང་ངེ་འཛིན་གཉིས་བཤད་པ་དང་གསུམ་མོ། །གསུམ་པོ་འདི་རྣམས་སྟོན་པའི་མདོ་ཉི་ཁྲིའི་ལེའུ་མངས་སུ་མཐོང་སྤང་གི་རྟོག་པ་དང་པོ་གཉིས་ཀྱི་བར་དུ། ལེའུ་ལྔ་བཅུ་དང༌། ང་གཅིག་པ་དང༌། ང་གཉིས་པ་སྟེ་གསུམ་འབྱུང་ངོ༌། །དེ་ནས་ལེའུ་ང་གསུམ་པ་ནས་མཐོང་སྤང་གི་རྟོག་པ་ཕྱི་མ་གསུམ་དང༌། སྒོམ་སྤང་གི་རྟོག་པ་བཞི་པོ་སྤྲེལ་ནས་རིམ་པ་བཞིན་དུ་བྱུང་ངོ༌། །ལེ་བརྒྱད་མ་དང་བསྡུས་དོན་འགྲེལ་པར་མངོན་རྟོག་རྒྱན་གྱི་གོ་རིམ་བཞིན་དུ་སྒྲིགས་སྣང་ངོ༌། ཉི་ཁྲྀ་ལེ་མངས་ཀྱི་ལེའུ་ཞེ་བརྒྱད་པའི་སྟོད་ནས་ཅུང་ཟད་ཙམ་མ་གཏོགས་པ་རྣམས་དང༌། ཞེ་དགུ་པ་ཐམས་ཅད་ཉི་ཁྲི་སྣང་བ་ལ་སོགས་ཀྱི་རྟོག་པ་མདོར་བསྟན་དང༌། མཐོང་སྤང་གི་རྟོག་པ་དང་པོ་ལ་སྦྱར་ཡོད་དོ། ། བྱང་ཆུབ་གཏན་ལ་དབབ་པ། དེས་ན་དང་པོ་བྱང་ཆུབ་གཏན་ལ་དབབ་པ་ནི། མདོ་ལས་དགེ་སློང་བརྒྱ་དྲུག་ཅུ་པོ་འདི་དག་སྐལ་བ་དཔེ་སྐར་མ་ལྟ་བུ་ལ་བླ་ན་མེད་པའི་བྱང་ཆུབ་ཏུ་འཚང་རྒྱ་སྟེ། མེ་ཏོག་སིལ་མ་ཞེས་བྱ་བའི་དེ་བཞིན་གཤེགས་པ་ཤ་སྟག་འཇིག་རྟེན་དུ་འབྱུང་བར་འགྱུར་རོ། །ཞེས་སོགས་ཀྱི་དོན། བྱང་ཆུབ་ལ་གཞན་སྟོན་པ་དང༌། །དེ་ཡི་རྒྱུ་ནི་ཡོངས་གཏོང་དང༌། །དེ་ཐོབ་བར་ཆད་མེད་པའི་རྒྱུ། །བསོད་ནམས་མང་པོའི་མཚན་ཉིད་དོ། །ཞེས་པ་ལ་ཤེར་ཕྱིན་ལ་སྤྱོད་པའི་བྱང་ཆུབ་སེམས་དཔའ་བླ་མེད་བྱང་ཆུབ་ཐོབ་པར་ངེས་པའི་ཕྱིར། བྱང་ཆུབ་ལ་གཞན་ཤེར་ཕྱིན་ལ་སྤྱོད་པ་དམ་པས་རྣམ་པར་སྤྱོད་པའི་དགེ་སློང་བརྒྱ་དྲུག་ཅུ་ལུང་བསྟན་པ་དང༌། བྱང་ཆུབ་དེ་ཐོབ་པའི་དོན་ཏུ་ཤེར་ཕྱིན་ལ་སྤྱོད་དགོས་ཤིང༌། སྤྱོད་པ་ཡང་ཤེར་ཕྱིན་གྱི་ཚིག་དོན་མ་ཉམས་པར་ཐོབ་པ་ལ་རགས་ལས་པས། བྱང་ཆུབ་དེ་ཐོབ་པར་བྱེད་པའི་རྒྱུ་ཤེར་ཕྱིན་ནི་ཚིག་དོན་ཆུད་མ་ཟོས་པར་གཟུང་ཞིང་ཁུང་དུ་ཆུད་པར་བྱས་ནས་གཞན་ལ་སྟོན་ཅིང་རྒྱ་ཆེར་སྤེལ་ཅིག་ཅེས་ཀུན་དགའ་བོ་ལ་ཡོངས་སུ་གཏོད་བ་དང༌། དེ་ལྟར་གཅད་པ་ལས་ཚིག་དོན་མ་ཉམས་པ་དེ་ཆོས་མཆོག་ཆེན་པོ་ལ་གནས་པའི་བྱང་ཆུབ་སེམས་དཔའ་ས་ཐོབ་པའི་དགེ་བ་བྱང་ཆུབ་དེ་ཐོབ་པ་ལ་པར་ཆད་མེད་པའི་རྒྱུ་བསོད་ནམས་ཚད་མེད་དུ་འཕེལ་བའི་མང་པོ་ནི་མཐོང་ལམ་བར་ཆད་མེད་ལམ་གང་ཡིན་པ་དེའི་མཚན་ཉིད་དོ། །སྐུ་མེད་པ་དང་བཅས་པ་དང་སྐུ་ཐོབ་པ་དང༌། སྐུ་ཡོངས་རྫོགས་དང་ཞེས་མཐོང་ལམ་དུ་ཆོས་སྐུ་ཐོབ་པ་དང༌། ས་ལྷག་མ་རྣམས་ཀྱིས་ཆོས་སྐུ་ཡོངས་སུ་རྫོགས་པར་གསུངས་པའི་ཕྱིར་རོ། །ས་དང་པོར་ཐོབ་པའི་ཆོས་སྐུ་བྱང་ཆུབ་དེའི་ངོ་བོ་གང་ཞེ་ན། དྲི་མ་ཟད་དང་མི་སྐྱེ་བའི། །ཡེ་ཤེས་བྱང་ཆུབ་ཅེས་བརྗོད་དོ།། ཟད་མེད་སྐྱེ་མེད་ཕྱིར་དེ་དག། གོ་རིམ་བཞིན་དུ་ཤེས་པར་བྱ། །ཞེས་པ་ལ་ཡེ་ནས་ཡོད་པའི་དྲི་མ་གློ་བུར་དུ་ལམ་གྱིས་ཟད་པར་བྱས་པ་མ་ཡིན་གྱི། གདོད་མ་ཉིད་ནས་དྲི་མ་ཟད་པ་དང༌། །གདོད་མ་ཉིད་ནས་མི་སྐྱེ་བའི་གཉིས་མེད་ཡེ་ཤེས་ནི་བྱང་ཆུབ་འདིའི་ངོ་བོ་ཡིན་ཞེས་བརྗོད་ཅིང་བསྟན་ཏེ། གང་གི་ཕྱིར་དྲི་མ་སྔར་ཡོད་གློ་བུར་དུ་ཟད་པ་མེད་པའི་ཕྱིར་དྲི་མ་ཟད་པའི་ཡེ་ཤེས་དང༌། སྐྱེ་བ་སྔར་ཡོད་གློ་བུར་དུ་སྐྱེ་བ་མེད་པའི་ཕྱིར་མི་སྐྱེ་བའི་ཡེ་ཤེས་ཞེས་དེ་དག་གོ་རིམ་བཞིན་དུ་སྦྱར་ནས་ཤེས་པར་བྱ་རྒྱུ་ཡིན་ནོ། །དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོར། ཟད་པ་གཉེན་པོས་ཟད་པ་མ་ཡིན་ཏེ། །སྔོན་ནས་ཟད་པས་དེ་ཕྱིར་ཟད་ཅེས་བསྟན། །ཞེས་པའི་དོན་དང༌། རྒྱུད་བླ་མར་ཡང༌། རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་དང༌། ཇི་ལྟར་སྔར་བཞིན་ཕྱིས་དེ་བཞིན་འགྱུར་བ་མེད་པའི་ཆོས་ཉིད་དོ། །ཞེས་དང༌། འདི་ལ་བསལ་བྱ་ཅི་ཡང་མེད། ཅེས་སོགས་ཀྱི་དོན་ཏོ། །གལ་ཏེ་བྱང་ཆུབ་ཀྱི་རང་བཞིན་ཟད་པ་དང་མི་སྐྱེ་བའི་ངོ་བོ་ནི་མཐོང་ལམ་གྱིས་གློ་བུར་དུ་བྱས་པས་རིགས་སོ་ཞེ་ན་དེ་ལ་སླར་དྲིས་པ། འགོག་པ་མེད་པའི་རང་བཞིན་ལ། །མཐོང་ཞེས་བྱ་བའི་ལམ་གྱིས་ནི། །རྣམ་པར་རྟོག་རིགས་ཅི་ཞིག་ཟད། །སྐྱེ་མེད་རྣམ་པ་ཅི་ཞིག་འཐོབ། །ཅེས་པ་རྣམ་རྟོག་དང་དེའི་སྐྱེ་བ་ཡེ་ནས་ཡོད་པར་མཐོང་ལམ་གྱི་གློ་བུར་དུ་འགོག་པ་མེད་པའི་བྱང་ཆུབ་རང་བཞིན་རྣམ་དག་འདི་ལ། མཐོང་ཞེས་བྱ་བའི་ལམ་གྱི་ནུས་པས་ནི་སྔར་ཡོད་ཀྱི་རྣམ་པར་རྟོག་པའི་རིགས་ནི་ཇི་ཞིག་གློ་བུར་དུ་ཟད་པར་བྱས། རྣམ་རྟོག་དེའི་སྐྱེ་བ་སྔར་ཡོད་བཀག་ནས་གློ་བུར་དུ་སྐྱེ་མེད་ཀྱི་རྣམ་པར་བྱང་ཆུབ་ཀྱི་ངོ་བོ་སྔར་མེད་ཅི་ཞིག་འཐོབ་པར་བྱས། ཞེས་སླར་དྲིས་པ་དང༌། དེའི་ལན་གཞན་གྱིས་ཆོས་རྣམས་ཀྱང་ཡོད་ལ། ཤེས་བྱ་ལ་ཡང་སྟོན་པ་ཡང༌། །སྒྲུབ་པ་ཟད་པར་བརྗོད་པ་གང༌། །འདི་ལ་ཁོ་བོས་མཚར་དུ་རྩིས། །ཞེས་པའི་དོན་དྲིས་པ་དེའི་ལན་དུ། གཞན་གྱིས་སྒྲིབ་པའི་ཆོས་རྣམས་ཀྱང་གདོད་ནས་ཡོད་ལ། ཤེས་བྱ་ལ་ཡང་སྟོན་པ་བྱང་ཆུབ་འདིའི་སྒྲིབ་པ་གདོད་ནས་ཡོད་པ་རྣམས་ལམ་གྱིས་གློ་བུར་དུ་ཟད་པར་བྱས་པ་ཡིན། ཞེས་བརྗོད་པ་གང་ཡིན་པ་འདི་སྔོན་མེད་པ་རྨད་དུ་བྱུང་བ་ཆེན་པོ་གཅིག་འདུག་པ་ལ་ཞེས་ཁོ་བོས་ངོ་མཚར་དུ་རྩིས་དེ་བཞད་གད་ཀྱི་གནས་སུ་བྱའོ། །དེས་ན་འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །གང་གི་ཕྱིར་སྐྱོན་གྱི་རྣམ་པ་གདོད་ནས་ཡོད་མ་མྱོང་བ་ལ་གློ་བུར་དུ་སྐྱོན་བསལ་བ་དང་ཡོན་ཏན་བཞག་དུ་མེད་པ་དེའི་ཕྱིར་བྱང་ཆུབ་འདི་ལ་སྔར་ཡོད་ཀྱི་སྒྲིབ་པ་དང༌། དེའི་སྐྱེ་བ་ལས་ཀྱི་གླུ་བོར་དུ་བསལ་བྱ་ཅི་ཡང་མེད། གློ་བུར་ལམ་གྱིས་བཞག་པ་བྱ་བ་སྔར་མེད་ཀྱི་དྲི་མ་ཟད་པ་དང་སྐྱེ་མེད་ཀྱི་རྣམ་པ་ཅུང་ཟད་མེད་དོ། །དེས་ན་བསལ་བཞག་མེད་པའི་ཡང་དག་བྱང་ཆུབ་ཉིད་ལ་མི་རྟོག་ཏིང་ངེ་འཛིན་གྱིས་དགག་སྒྲུབ་དང་བསལ་བཞག་མེད་པར་ཡང་དག་ལྟ་ཞིང་བསྒོམ་མོ། ། དེ་ལྟར་བསྒོམ་པ་ལས་ས་དང་པོར་རྣམ་་པར་མི་རྟོག་པའི་ཡེ་ཤེས་ཀྱིས་ཡང་དག་མཐོང་བའི་ལམ་ཐོབ་ནས་འཇིག་རྟེན་གྱི་འཆིང་བ་གློ་བུར་བ་ལས་རྣམ་པར་གྲོལ་ཞིང་འཇིག་རྟེན་ལས་འདས་པ་ཡིན་ནོ། ། མཐོང་ལམ་ཉིད་བཤད་པ། གཉིས་པ་མཐོང་ལམ་ཉིད་བཤད་པ་ནི། ཉི་ཁྲིའི་ལེའུ་ང་གཅིག་པའི་སྨད་ཤོག་གུ་གཅིག་ཙམ་ནས་བྱང་ཆུབ་སེམས་དཔའ་སྦྱིན་སོགས་ཕར་ཕྱིན་རེ་རེ་ལ་གནས་ཤིང་ལྔ་པོ་ཡོངས་སུ་འཛིན་ཞེས་པའི་དོན། སྦྱིན་པ་ལ་སོགས་རེ་རེ་ནི། དེ་དག་ཕན་ཚུན་བསྡུས་པ་གང་སྐད་ཅིག་གཅིག་པའི་བཟོད་པ་ཡིས། བསྡུས་པ་དེ་འདིར་མཐོང་བའི་ལམ། ཞེས་པ་ལ་སྦྱིན་པར་གཞན་ལྔ་པོ་བསྡུས་པ་དང༌། ཚུལ་ཁྲིམས་སུ་གཞན་ལྔ་པོ་བསྡུས་པ་ལ་སོགས་པར་ཕར་ཕྱིན་རེ་རེ་ནི་དྲུག་པོ་དེ་དག་རེ་རེས་ལྔ་ལྔ་བསྡུས་པའི་ཚུལ་ཀྱིས་ཕན་ཚུན་ཐམས་ཅད་ཀྱིས་ཐམས་ཅད་བསྡུས་པའི་ཡེ་ཤེས་གང་ཡིན་པ། མཐོང་ལམ་གྱི་སྐད་ཅིག་མ་གཅིག་སྡུག་བསྔལ་ལ་ཆོས་ཤེས་པའི་བཟོད་པ་ཡིས་བསྡུས་པ་སྟེ། སྐབས་འདིར་མཐོང་བའི་ལམ་དུ་བསྟན་ཏོ། །སྔར་གོ་བསྒྲུབ་ཏུ་ནི་རང་རང་ལས་ཕྱེ་བ་དྲུག་དྲུག་རང་རང་ལ་སོ་སོར་བསྡུས་པ་ཡིན་ལ། འདིར་ནི་རང་རང་ལས་མ་ཕྱེ་བར་དྲུག་པོ་རེ་རེས་ལྔ་ལྔ་ཕན་ཚུན་བསྡུས་པའི་ཕྱིར་འདི་གཉིས་སྡུད་ཚུལ་གཅིག་ཏུ་འཆད་པ་མདོ་དང་འགལ་ལོ། ། ཏིང་ངེ་འཛིན་གཉིས་བཤད་པ། གསུམ་པ་དེ་ནས་ཏིང་ངེ་འཛིན་གཉིས་བཤད་པ་ནི། དེ་ནས་སེང་གེ་རྣམ་བསྒྱིངས་པའི། །ཏིང་ངེ་འཛིན་ལ་སྙོམས་ཞུགས་ནས། །རྟེན་ཅིང་འབྲེལ་འབྱུང་ལུགས་མཐུན་དང༌། །ལུགས་མི་མཐུན་ལ་རྟོག་པར་བྱེད། །ཅེས་པས་སེང་གེ་རྣམ་པར་བསྒྱིངས་པའི་ཏིང་ངེ་འཛིན་ནི། བྱང་ཆུབ་སེམས་དཔའ་བསམ་གཏན་དང་པོ་ལ་སྙོམས་པར་འཇུག་གོ། དེ་ལས་ལངས་ནས་བསམ་གཏན་གཉིས་པ་ལའོ། ། དེ་ལས་ལངས་ནས་བསམ་གཏན་གསུམ་པ་ལའོ། །དེ་ནས་ལངས་ནས་བསམ་གཏན་བཞི་པ་ལའོ། །དེ་ལས་ལངས་ནས་ནམ་མཁའ་མཐའ་ཡས་སྐྱེ་མཆེད་ལའོ། །དེ་ལས་ལངས་ནས་རྣམ་ཤེས་མཐའ་ཡས་སྐྱེ་མཆེད་ལའོ། །དེ་ལས་ལངས་ནས་ཅུང་ཟད་མེད་པའི་སྐྱེ་མཆེད་ལའོ། །དེ་ལས་ལངས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལའོ། །དེ་ལས་ལངས་ནས་འགོག་པ་ལའོ། །ཡང་དེ་ལས་ལངས་ན་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ནས་བཟུངས་ཏེ་དེ་ལུགས་ལས་བཟློག་པའི་རིམ་པ་ལྟར་བསམ་གཏན་དང་པོའི་བར་དུ་སྙོམས་པར་འཇུག་པ་སེང་གེ་རྣམ་པར་བསྒྱིངས་པའི་ཏིང་ངེ་འཛིན་ཡིན་ནོ། །དེ་ལྟར་སེང་གེ་རྣམ་པར་བསྒྱིངས་པའི་ཏིང་ངེ་འཛིན་ལ་སྙོམས་པར་ཞུགས་ནས། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟིགས་ཀྱི་རྐྱེན་གྱིས་སྐྱེ་མཆེད་དྲུག སྐྱེ་མཆེད་དྲུག་གི་རྐྱེན་གྱིས་རེག་པ་རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ་སྲིད་པའི་རྐྱེན་གྱིས་སྐྱེ་བ་སྐྱེ་བའི་རྐྱེན་གྱིས་རྒ་ཤི། ཞེས་རྟེན་ཅིང་འབྲེལ་འབྱུང་ལུགས་དང་མཐུན་པ་དང༌། མ་རིག་པ་འགག་ན་འདུ་བྱེད་འགག་ཅེས་པ་ནས། སྐྱེ་བ་འགག་ན་རྒ་ཤི་འགག་ཅེས་པའི་བར་དུ་ལུགས་དང་མི་མཐུན་པ་ལ་སོ་སོར་རྟོག་པར་བྱེད་དོ།། ཉི་ཁྲིའི་ལེ་མངས་རྣམས་སུ་རྟེན་འབྲེལ་འདི་དག་སྟོན་པའི་མདོ་མ་བྱུང་ལ། བསྡུས་དོན་འགྲེལ་པ་ལ་སོགས་ན་མདོ་སྣང་ངོ༌། །དེ་ལྟར་སེང་གེ་རྣམ་པར་བསྒྱིངས་པའི་ཏིང་ངེ་འཛིན་སྨིན་པར་བྱས་ནས་ཐོད་རྒལ་གྱི་ཏིང་ངེ་འཛིན་ལ་སྙོམས་པར་འཇུག་པ་ནི། འགོག་དང་བཅས་པའི་སྙོམས་འཇུག་དགུར། །རྣམ་པ་གཉིས་སུ་སོང་འོང་ནས། །འདོད་པར་གཏོགས་པའི་རྣམ་པར་ཤེས། །མཉམ་གཞག་མིན་པའི་འཚམས་བཟུངས་ཏེ། །ཐོད་རྒལ་དུ་ནི་སྙོམས་འཇུག་པ། །གཅིག་དང་གཉིས་གསུམ་བཞི་དང་ལྔ། །དྲུག་དང་བདུན་དང་བརྒྱད་རྒལ་ནས། །འགོག་པའི་བར་དུ་མི་འདྲར་འགྲོ །ཞེས་པ་བསམ་གཏན་དང་པོ་ལ་སྙོམས་འཇུག་ནས། རིམ་གྱིས་བསམ་གཏན་གཉིས་པ་དང༌། གསུམ་པ་དང༌། བཞི་པ་དང༌། ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅི་ཡང་མེད་པའི་སྐྱེ་མཆེད་དང༌། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་གོ །དེ་ལས་ལངས་ནས་འགོག་པ་ལ་སྙོམས་པར་འཇུག་གོ །དེ་ལས་ལངས་ནས་ཡང་བསམ་གཏན་དང་པོ་ལའོ། །དེ་ལས་ལངས་ནས་འགོག་པ་ལའོ། །དེ་ལས་ལངས་ནས་བསམ་གཏན་གཉིས་པའོ། །ཞེས་པའི་ཚུལ་གྱིས་འགོག་པ་དང་སྤེལ་ནས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་དུ་སྙོམས་པར་འཇུག་གོ །སྲིད་རྩེ་ལས་ལངས་ནས་འགོག་པའོ། ། འགོག་པ་ལས་ལངས་ནས་མཉམ་པར་མ་བཞག་པའི་སེམས་སུ་བྱེད་དོ། །དེ་ལས་འགོག་པ་ལའོ། ། དེ་ལས་ལངས་ནས་མཉམ་པར་མ་བཞག་པར་ལའོ། །དེ་ལས་སྲིད་རྩེ་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་ཅུང་ཟད་མེད་པའི་སྐྱེ་མཆེད་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་རྣམ་ཤེས་མཐའ་ཡས་སྐྱེ་མཆེད་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་ནམ་མཁའ་མཐའ་ཡས་སྐྱེ་མཆེད་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་བསམ་གཏན་བཞི་པ་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་བསམ་གཏན་གསུམ་པ་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་བསམ་གཏན་གཉིས་པ་ལའོ། །དེ་ལས་ལངས་ནས་མཉམ་པར་མ་བཞག་པ་ལའོ། །དེ་ལས་བསམ་གཏན་དང་པོ་ལ་སྙོམ་པར་འཇུག་གོ །དེ་ལས་ལངས་ནས་མཉམ་པར་མ་བཞག་པའི་སེམས་ལ་གནས་པའོ། །ཞེས་པ་ཐོད་རྒལ་གྱི་ཏིང་ངེ་འཛིན་གྱི་སྙོམས་པར་འཇུག་ལུགས་འདི་ནི་མདོ་ཇི་ལྟ་བ་བཞིན་དུ་བྲིས་པའོ། །སྙོམས་པར་འཇུག་ལུགས་མདོ་ནས་གསུངས་པ་འདི་དང༌། འགོག་པའི་བར་དུ་མི་འདྲར་འགྲོ། ཞེས་པའི་འདི་གཉིས་ཅུང་མ་འགྲིག་པས། མདོ་དང་བསྟན་བཅོས་འདི་དང༌། འདི་དག་གི་འགྲེལ་པ་འགྱུར་མི་འདྲ་བ་གང་རྙེད་ལ་བལྟ་བར་བྱའོ། །ཏིང་ངེ་འཛིན་གཉིས་པོ་འདི་དག་ཤེས་རབ་གྱི་ཕར་ཕྱིན་དུ་གཞན་ལྔ་པོ་བསྡུས་པའི་ནང་ནས་བསམ་གཏན་གྱི་ཕར་ཕྱིན་ཉིད་ཡིན་པར་གསུངས་པའི་ཕྱིར། འདི་གཉིས་ལ་སྒོམ་ལམ་ཡིན་མིན་གྱི་ཁྱད་པར་འབྱེད་པ་མདོ་དང་མི་འགྲིག་གོ ། ༢ སྒོམ་སྤང་གི་རྣམ་རྟོག་བཞི་རྒྱས་པར་བཤད་པ། གཉིས་པ་སྒོམ་སྤང་གི་རྣམ་རྟོག་བཞི་ལ། དང་པོ་འཇུག་པའི་གཟུངས་རྟོག་ནི། མདོ་ལས། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་མདོ་དང་རྒྱས་པ་ཤེས་པར་འགྱུར་རོ། །ཞེས་སོགས་ཀྱི་དོན་མདོར་བསྡུས་རྒྱས་དང་སངས་རྒྱས་ཀྱིས་བཏང་བས་ཡོངས་སུ་མ་བཟུང་དང༌། དུས་གསུམ་ཡོན་ཏན་མེད་པ་དང༌། ལེགས་པའི་ལམ་ནི་རྣམ་གསུམ་ལ། །གཟུང་བའི་རྣམ་རྟོག་འདི་གཅིག་སྟེ། །སྦྱོར་བའི་རྣམ་པ་སྤྱོད་ཡུལ་ཅན། །ཞེས་པའི་ཆོས་ཀྱི་དབྱིངས་དེ་བཞིན་ཉིད་ཙམ་དུ་ཤེས་པ་ནི་མདོར་བསྡུས་པ་ཤེས་པ་དང༌། གཟུགས་ཀྱི་དེ་བཞིན་ཉིད་དང༌། ཚོར་བའི་དེ་བཞིན་ཉིད་ལ་སོགས་པ་ཆོས་ཅན་སོ་སོའི་དེ་བཞིན་ཉིད་ཤེས་པ་ནི་རྒྱས་པ་ཤེས་པ་དང༌། དེ་བཞིན་ཉིད་ཀྱི་ངོ་བོ་ནི། མདོ་ལས། དེ་བཞིན་ཉིད་གང་ལ་སྐྱེ་བ་མི་དམིགས། འཇིག་པ་མི་དམིགས། གནས་པ་ལས་གཞན་དུ་འགྱུར་བ་མི་དམིགས་པ་འདི་ནི་གཟུགས་ནས་རྣམ་མཁྱེན་བར་གྱི་དེ་བཞིན་ཉིད་དེ། དེ་ལ་བྱང་ཆུབ་སམེས་དཔའ་བསླབ་པར་བྱའོ། །ཞེས་སོགས། ཐབས་མཁས་ཀྱིས་ཟིན་པའི་བྱང་ཆུབ་སེམས་དཔའ་ཇི་སྐད་བསྟན་པའི་ཤེར་ཕྱིན་ལ་ཚུལ་བཞིན་དུ་སློབ་པ་ནི་སངས་རྒྱས་ཐམས་ཅད་ཀྱིས་གོམས་ཤིང་དགེ་བའི་བཤེས་གཉེན་གྱིས་ཟིན་པ་ཡིན་ལ། དེ་ལས་བཟློག་པའི་སྤྱོད་པ་ཅན་ནི་སངས་རྒྱས་ཀྱི་དགེ་བའི་བཤེས་གཉེན་གྱིས་ཡོངས་སུ་མ་བཟུང་བ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་དུས་གསུམ་གྱི་སངས་རྒྱས་འབྱུང་བའི་ཡོན་ཏན་མེད་པ་ལས་བཟློག་པ་དང༌། བདེན་གཉིས་ཀྱིས་བསྡུས་པའི་ཆོས་ཐམས་ཅད་ལ་མཁས་པའི་ལེགས་པ་དང་ལྡན་པའི་ལམ་རྣམ་པ་གསུམ་ནི་ཤེར་ཕྱིན་ལ་སྦྱོད་པ་མོས་སྦྱོད་ཀྱི་ལམ་དང་ཤེར་ཕྱིན་སྒྲུབ་པ་མཚན་མ་མེད་ཅིང་རྩོལ་བ་དང་བཅས་པ་ས་བདུན་པའི་བར་དང༌། ཤེར་ཕྱིན་བསྒོམ་པ་རྩོལ་བ་མེད་པར་ལྷུན་གྱིས་གྲུབ་པ་ས་བརྒྱད་པ་ཡན་ཆད་ཀྱི་ལམ་ཏེ་གསུམ་པོ་དེ་རྣམས་སོགས་པ། ཡུལ་དགུ་པོ་དེ་རྣམས་ལ་ཡོན་ཏན་ཅན་དུ་མཐོང་བས་གཟུང་བའི་རྣམ་པར་རྟོག་པར་བྱེད་པ་འདི་གཟུང་རྟོག་གཉིས་ཀྱི་དང་པོ་འཇུག་པའི་གཟུང་རྟོག་གཅིག་སྟེ་ཤེར་ཕྱིན་ལ་སྦྱོར་བའི་རྣམ་པ་དེའི་སྤྱོད་པ་ཡུལ་དུ་བྱས་པའི་ཡུལ་ཅན་ཡིན་ནོ། ། གཉིས་པ་ལྡོག་པའི་གཟུང་རྟོག་ནི། མདོ་ལས། ཅི་ནས་ཀྱང་སེམས་དང་སེམས་ལས་བྱུང་བའི་ཆོས་མི་རྒྱུ་བ་དེ་ལྟར་ཤེར་ཕྱིན་ལ་སྤྱོད་སྒྲུབ་བསྒོམ་པར་བྱའོ། །ཞེས་སོགས་ཀྱི་དོན། གཉིས་པ་སེམས་དང་སེམས་འབྱུང་རྣམས། །འཇུག་པའི་ཡུལ་ཅན་ཡིན་བཞེད་དེ། །སེམས་མི་བསྐྱེད་དང་བྱང་ཆུབ་ཀྱི། །སྙིང་པོ་ཡིད་ལ་མི་བྱེད་དང༌། ཐེག་པ་དམན་པ་ཡིད་བྱེད་དང༌། །རྫོགས་པའི་བྱང་ཆུབ་ཡིད་མི་བྱེད། །སྐོམ་དང་སྒོམ་པ་མེད་པ་དང༌། །དེ་དག་ལས་ནི་བཟློག་ཉིད་དང༌། །ཇི་བཞིན་དོན་མིན་རྣམ་རྟོག་པ། །སྒོམ་པའི་ལམ་ལ་ཤེས་པར་བྱ། །ཞེས་པ་རྟོག་པ་གཉིས་པ་ལྡོག་པའི་གཟུང་རྟོག་ནི་སེམས་ཀུན་གཞི་རྣམ་ཤེས་དང་སེམས་འབྱུང་འཇུག་པའི་རྣམ་ཤེས་རྣམས་ཡུལ་ལ་འཕྲོ་ཞྀང་འཇུག་པ་ཡུལ་དུ་བྱེད་པའི་ཡུལ་ཅན་ཡིན་པར་བཅོམ་ལྡན་འདས་བཞེད་དེ། ཡུལ་དགུ་པོ་ནི་བྱང་ཆུབ་ཀྱི་སེམས་མི་བསྐྱེད་པ་དང༌། བླ་མེད་བྱང་ཆུབ་ཀྱི་སྙིང་པོ་ཡིད་ལ་མི་བྱེད་པའི་སེམས་སེམས་བྱུང་རྒྱུ་བ་དང༌། ཐེག་པ་དམན་པ་ཡིད་ལ་མ་བྱེད་པའི་སེམས་སེམས་བྱུང་རྒྱུ་བ་དང༌། རྫོགས་པའི་བྱང་ཆུབ་ཡིད་ལ་མི་བྱེད་པའི་སེམས་སེམས་བྱུང་དང༌། ཤེར་ཕྱིན་བསྒོམ་པས་རྣམ་མཁྱེན་ཐོབ་བམ་སྙམ་པའི་སེམས་སེམས་བྱུང་རྒྱུ་བ་དང༌། སྒོམ་པ་མེད་པས་ཐོབ་བམ་སྙམ་པ་དང༌། དེ་དག་ལས་ནི་བཟློག་པ་སྒོམ་ཀྱང་བསྒོམ་ལ་བསྒོམས་ཀྱང་མ་བསྒོམས་པས་ཐོབ་བམ་སྙམ་པ་དང༌། བསྒོམས་པ་ཡང་མ་ཡིན་ལ་མ་བསྒོམས་པ་ཡང་མ་ཡིན་པས་ཐོབ་བམ་སྙམ་པའི་སེམས་བྱུང་ཉིད་དང༌། དེ་བཞིན་ཉིད་ལ་དེ་ཁོ་ན་ཉིད་ཇི་ལྟ་བ་བཞིན་གྱི་དོན་མ་ཡིན་པར་འཇུག་པའི་སེམས་སེམས་བྱུང་རྣམས་ལ་སྐྱོན་ཅན་དུ་མཐོང་བས་ལྡོག་པའི་རྣམ་པར་རྟོག་པར་བྱེད་པ་ནི། བསྒོམ་པའི་ལམ་གྱི་གནས་སྐབས་ལ་སྤང་བྱར་ཤེས་པར་བྱའོ། ། གསུམ་པ་འཛིན་པའི་རྣམ་རྟོག་དང་པོ་བཤད་པ་ནི། མདོ་ལས། བདག་གམ། སེམས་ཅན་ནམ། གང་ཟག་གམ། སྲོག་གམ། གང་ཟག་མི་དམིགས་ན། ཇི་ལྟར་བདག་དང༌། སེམས་ཅན་དང༌། སྲོག་དང༌། གང་ཟག་ཁམས་སུ་གདགས་པར་བྱའོ། །དེ་ལྟར་ཆོས་ཐམས་ཅད་དུ་མ་བཏགས་པས་རྣམ་མཁྱེན་ཐོབ་པར་འགྱུར་རོ། །ཞེས་སོགས་ཀྱི་དོན། སེམས་ཅན་བཏགས་པའི་སྤྱོད་ཡུལ་དང༌། ། ཆོས་བཏགས་པ་དང་སྟོང་ཉིད་མིན། །ཆགས་དང་རབ་འབྱེད་བདག་ཉིད་དང༌། །དངོས་པོར་བྱེད་དང་ཐེག་གསུམ་དང༌། །ཡོད་ནི་དག་པ་མ་ཡིན་དང༌། །སྤྱོད་པ་རྣམ་པར་འཁྲུགས་པ་ལ། །འཛིན་པར་བྱེད་པ་དང་པོར་དེ། །ཤེས་རབ་བྱ་བར་བསྒྲགས་པ་ཡིན། །ཞེས་པ་སེམས་ཅན་བཏགས་པའི་དངོས་པོར་འཛིན་ཅིང་སྤྱོད་པའི་ཡུལ་ཅན་དང༌། ཆོས་ཐམས་ཅད་བཏགས་པའི་དངོས་པོ་དང་སེམས་ཅན་དམྱལ་བ་ལ་སོགས་པ་བཏགས་པའི་དངོས་པོ་སྟོང་པ་མ་ཡིན་པ་ཉིད་དང༌། ཅི་ཙམ་དུ་དམིགས་པའི་ཚུལ་གྱིས་སྤྱོད་པ་དེ་ཙམ་དུ་གཟུང་འཛིན་གཉིས་ལ་ཆགས་པ་དང༌། གཟུགས་སོགས་ཆོས་རྣམས་སོ་སོར་རབ་ཏུ་འབྱེད་པའི་བདག་ཉིད་དང༌། ཆོས་ཐམས་ཅད་རང་གི་མཚན་ཉིད་ཀྱིས་སྟོང་པར་མ་མཐོང་བས་དངོས་པོར་འདུ་བྱེད་པ་དང༌། ཐེག་པ་གསུམ་པོ་རྣམ་པར་དགོད་པ་དང༌། དེ་བཞིན་གཤེགས་པའི་སྤྲུལ་པ་ལ་ཡོན་ཕུལ་བ་ནི་དག་པ་མ་ཡིན་པ་དང། ཆོས་ཅན་སོ་སོའི་ཆོས་ཉིད་གུད་དུ་ཕྱེ་བའི་སྤྱོད་པ་ཆོས་ཉིད་རྣམ་པར་འཁྲུགས་པ་སྟེ། དེ་རྣམས་ལ་དངོས་པོར་འཛིན་པར་བྱེད་པ་ནི་འཛིན་རྟོག་དང་པོར་དེ་ཤེས་པར་བྱའོ། །ཞེས་བྱ་བར་བསྒྲགས་པ་སྟེ་བསྟན་ཏོ། ། བཞི་པ་འཛིན་རྟོག་གཉིས་པ་བཤད་པ་ནི། སེམས་ཅན་་བཏགས་དང་དེ་རྒྱུ་ཡིས། །ཡུལ་ཅན་དེ་ཡིས་རྣམ་འཇོམས་པས །སྒོམ་པའི་ལམ་དང་འབྲེལ་པ་ཡི། །མི་མཐུན་ཕྱོགས་གཞན་རྣམ་པ་དགུ། །ཞེས་པ་སེམས་ཅན་བཏགས་པའི་དངོས་པོ་དང༌། དངོས་པོ་དེའི་རྒྱུའི་ཡུལ་ཅན་གྱི་འཛིན་རྟོག་ནི། སྒོམ་ལམ་དེ་ཡིས་རྣམ་པར་འཇོམས་པས་ན། གཉེན་པོ་སྒོམ་པའི་ལམ་དང༌། དེའི་སྤང་བྱར་འབྲེལ་པ་ལམ་དེའི་མི་མཐུན་ཕྱོགས་འཛིན་རྟོགས་སྔ་མ་ལས་གཞན་རྣམ་པ་དགུ་སྟོན་པ་འདི་ལྟ་སྟེ། བདག་ཉིད་ཇི་བཞིན་ཀུན་མཁྱེན་ནི། །གསུམ་གྱི་སྒྲིབ་པ་རྣམ་གསུམ་དང༌། །ཞི་ལམ་དེ་བཞིན་ཉིད་སོགས་དང༌། །མཚུངས་པར་ལྡན་དང་མི་ལྡན་དང༌། །མི་མཉམ་སྡུག་བསྔལ་ལ་སོགས་དང༌། །ཉོན་མོངས་རྣམས་ཀྱི་རང་བཞིན་དང༌། །གཉིས་སུ་མེད་ལ་ཀུན་རྨོངས་ལ། །རྣམ་པར་རྟོག་པ་ཐ་མར་བཞེད། །ཅེས་པ་མཁྱེན་གསུམ་གྱི་སྤངས་པའི་བདག་ཉིད་ཇི་ལྟ་བ་བཞིན་དུ་ཀུན་མཁྱེན་ནི་གསུམ་གྱི་རང་རང་གི་སྤང་བྱའི་སྒྲིབ་པ་རྣམ་པ་གསུམ་སྤངས། བྱེ་བྲག་དང༌། ཆོས་ཐམས་ཅད་ཞི་བའི་རྣམ་པ་རྣམ་མཁྱེན་གྱི་ལམ་དང༌། དེ་བཞིན་ཉིད་དང་ཡང་དག་པའི་མཐའ་ལ་སོགས་པ་དང་ཤེར་ཕྱིན་མཚུངས་པར་ལྡན་པ་མི་ལྡན་པ་དང༌། ཤེར་ཕྱིན་ཉན་རང་བདུད་ཀྱི་རིས་གང་གིས་ཀྱང་མི་ཐུབ་པས་སུ་དང་ཡང་མི་མཉམ་པ་དང༌། སྡུག་བསྔལ་སོགས་བདེན་པ་བཞི་དང༌། ཉོན་མོངས་རྣམས་ཀྱི་རང་བཞིན་ཆགས་སོགས་ཀྱི་དེ་བཞིན་ཉིད་དང་གཟུང་འཛིན་དང༌། གཉིས་སུ་མེད་པའི་དོན་ཏེ་དེ་རྣམས་ལ་ཀུན་ཏུ་རྨོངས་པ་རྣམས་ལ་རྣམ་པར་རྟོག་ཅིང་འཛིན་པར་བྱེད་པ་ནི་བསྒོམ་སྤང་གི་འཛིན་རྟོག་གཉིས་ཀྱི་ནང་ནས་ཐ་མ་ཡིན་པར་མདོ་ལས་བཞེད་དོ། ། ༦༽གཉེན་པོ་མཐོང་སྒོམ་དག་གིས་སྤང་བྱ་རྣམ་རྟོག་ཟད་པའི་འབྲས་བུ་བཤད་པ། ད་ནི་གཉེན་པོ་མཐོང་སྒོམ་དག་གིས་སྤང་བྱ་རྣམ་རྟོག་དེ་རྣམས་ཟད་པའི་འབྲས་བུ་བཤད་པ་ནི། ཉི་ཁྲིའི་ལེའུུ་ང་བཞི་པར། བྱང་ཆུབ་སེམས་དཔའ་སེམས་ཅན་རྣམས་ཀྱི་ཕྱིར་བླ་མེད་བྱང་ཆུབ་ཏུ་ཞུགས་ནས་ཕར་ཕྱིན་དྲུག་ལ་སྤྱོད་ཅིང་རྣམ་མཁྱེན་ཐོབ་པར་བྱེད་པ་དེ་ལ་ལོ་མ་དང༌། མེ་ཏོག་དང༌། འབྲས་བུ་ལྟར་སེམས་ཅན་ཐམས་ཅད་ཉེ་བར་འཚོ་བར་འགྱུར་རོ། །དེ་ལ་ལོ་མ་ནི་བྱང་ཆུབ་སེམས་དཔའ་ལ་རྟེན་ནས་སེམས་ཅན་ངན་སོང་ལས་གྲོལ་བའོ། ། མེ་ཏོག་ནི་བྱང་ཆུབ་སེམས་དཔའ་རྟེན་ནས་རྒྱལ་རིགས་བྲམ་ཟེའི་རིགས་ཁྱིམ་བདག་གི་རིགས་ཆེ་ཞིང་མཐོ་བ་དང༌། འདོད་ལྷ་དང༌། གཟུགས་ཁམས་གཟུགས་མེད་ཁམས་ཀྱི་ལྷར་སྐྱེ་བ་དང༌། འབྲས་བུ་ནི་བྱང་ཆུབ་སེམས་དཔའ་ཉིད་རྣམ་མཁྱེན་ཐོབ་ནས་སེམས་ཅན་དེ་དག་ཐེག་པ་གསུམ་གྱི་གནས་སྐབས་དང་མཐར་ཐུག་གི་འབྲས་བུ་ལ་འགོད་ཅིང་ཐོབ་པར་བྱེད། ཅེས་སོགས་ཀྱི་དོན། ཡམས་ནད་འདི་རྣམས་ཟད་ནས་ནི། །ཡུན་རིང་ལོན་ནས་དབུགས་ཕྱིན་ལྟར། །རྣམ་པ་ཀུན་ཏུ་འགྲོ་བ་ཡི། །བདེ་སྒྲུབ་ཡོན་ཏན་ཕུན་ཚོགས་ཀུན། །རྒྱ་མཚོ་ཆེ་ལ་ཆུ་བོ་བཞིན། །འབྲས་བུ་མཆོག་གི་སྦ་བ་ཡིས། །སེམས་དཔའ་ཆེན་པོ་དེ་ལ་ནི། །རྣམ་པ་ཀུན་ཏུ་བརྟེན་པར་བྱེད། །ཅེས་པ་དཔེར་ན་ཡམས་ནད་དང་འདྲ་བའི་རྣམ་རྟོག་འདི་རྣམས་སྨན་དང་འདྲ་བའི་ལམ་གྱིས་ཟད་པར་བྱས་ནས་ནི། སྔར་ཐོག་མ་མེད་པ་ནས་འཁོར་བའི་ནད་ཀྱིས་ངལ་ཞིང་དུབ་པ་ལས། ཡུན་རིང་ཞིག་ལོན་ནས། ནད་པ་ཡམས་ནད་ལས་གྲོལ་ཞིང་དབུགས་ཕྱིན་པ་བདེ་བའི་གནས་ཐོབ་པ་ལྟར་གྱུར་པ་དེའི་ཚེ། དུས་དང་རྣམ་པ་ཀུན་ཏུ་འགྲོ་བའི་བདེ་བ་མཐའ་དག་སྒྲུབ་པར་བྱེད་པའི་ཡོན་ཏན་ཕན་སུམ་ཚོགས་པ་ཟད་མི་ཤེས་པ་ཀུན་དཔེར་ན་རྒྱ་མཚོ་ཆེན་པོ་ལ་ཆུ་བོ་ཆེན་པོ་ཚད་མེད་པ་བརྟེན་པ་བཞིན་དུ་འབྲས་བུ་དོན་གཉིས་མཐར་ཕྱིན་པའི་སངས་རྒྱས་རྐང་གཉིས་རྣམས་ཀྱི་མཆོག་ཐོབ་པ་དག་གིས་མཛེས་ཤིང་སྤང་བའི་བྱང་ཆུབ་སེམས་དཔའ་ཆེན་པོ་དེ་ལ་ནི་དུས་རྣམ་པ་ཀུན་ཏུ་བརྟེན་པར་བྱེད་པ་ཡིན་ནོ། །དེ་རྣམས་ཀྱིས་མཐོང་ཞེས་བྱ་དང་སྒོམ་པ་ཞེས་བྱ་བའི་ལམ་ནི་སོ་སོ་ལ། རྣམ་པར་རྟོག་པ་རྣམ་བཞི་ཡིས། ། གཉེན་པོ་རྣམ་པ་བཞི་དང་ནི། །ཞེས་པ་དེ་དག་བཤད་ཟིན་ཏོ། ། ༧༽བར་ཆད་མེད་པའི་ཏིང་ངེ་འཛིན་ལོག་པར་རྟོག་པ་བསལ་བ་དང་བཅས་པ་བཤད་པ། ད་ནི་བར་ཆད་མེད་པའི་ཏིང་ངེ་འཛིན་ལོག་པར་རྟོག་པ་བསལ་བ་དང་བཅས་པ་བཤད་པར་བྱ་སྟེ། མདོ་ལས། སྟོང་གསུམ་གྱི་སྟོང་ཆེན་པོའི་སེམས་ཅན་ཐམས་ཅད་ཉན་ཐོས་ཀྱི་ས་བདུན། རང་སངས་རྒྱས་ཀྱི་ས་ལ་གནས་པ་དང༌། བྱང་ཆུབ་སེམས་དཔའི་སྐྱོན་མེད་པར་ཞུགས་པ་གྱུར་ཀྱང༌། དེ་དག་བསོད་ནམས་དེས་བྱང་ཆུབ་སེམས་དཔའ་བྱང་ཆུབ་ཏུ་ཞུགས་པའི་བསོད་ནམས་ཀྱི་བརྒྱའི་ཆར་ཡང་ཉེ་བར་མི་འགྲོ་ཞེས་སོགས་ཀྱི་དོན། སྟོང་གསུམ་སྐྱེ་བོ་ཉན་ཐོས་དང༌། །བསེ་རུའི་རྟོག་པ་ཕུན་ཚོགས་དང༌། །བྱང་ཆུབ་སེམས་དཔའི་སྐྱོན་མེད་ལ། །བཀོད་པའི་དགེ་རྣམས་དཔེར་མཛད་ནས། །བསོད་ནམས་མང་པོ་ཉིད་ཀྱིས་ནི། །སངས་རྒྱས་ཉིད་ཀྱི་བར་མེད་དེ། །བར་ཆད་མེད་པའི་ཏིང་འཛིན་ནི། །དེ་ནི་རྣམ་པ་ཀུན་མཁྱེན་ཉིད། །ཅེས་པ་སྟོང་གསུམ་གྱི་སྐྱེ་བོ་ཐམས་ཅད་ཉན་ཐོས་ཀྱི་རྟོགས་པ་ཕུན་སུམ་ཚོགས་པ་ལ་བཀོད་པའི་དགེ་བ་དང༌། སྐྱེ་བོ་དེ་རྣམས་བསེ་རུ་ལྟ་བུའི་རང་རྒྱལ་གྱི་རྟོགས་པ་ཕུན་སུམ་ཚོགས་པ་ལ་བཀོད་པའི་དགེ་བ་དང༌། དེ་བས་ཀྱང་སྐྱེ་བོ་དེ་རྣམས་བྱང་ཆུབ་སེམས་དཔའི་སྐྱོན་མེད་པ་ལ་བཀོད་པའི་དགེ་བ་རྣམས་ཀྱིས་ཏིང་ངེ་འཛིན་ནི་འདིའི་བསོད་ནམས་ཀྱི་བརྒྱའི་ཆར་ཡང་ཉེ་བར་མི་འགྲོ་ཞེས་དཔེར་མཛད་ནས། བསོད་ནམས་མང་པོ་གསུངས་པ་ཉིད་ཀྱིས་བསྟན་པའི་ཏིང་ངེ་འཛིན་འདི་དང༌། སངས་རྒྱས་ཉིད་ཀྱི་བར་ན་སྒྲིབ་པས་ཆོད་པ་མེད་དོ། །དེ་བས་ན་སངས་རྒྱས་དང་བར་ཆད་མེད་པའི་ཏིང་ངེ་འཛིན་གང་ཡིན་པ་དེ་ནི་རྣམ་པ་ཀུན་མཁྱེནཔའི་ཡེ་ཤེས་ཉིད་ཡིན་ནོ། །རྣམ་མཁྱེན་འདིའི་དམིགས་པ་ནི་གང༌། བདག་པོ་གང༌། རྣམ་པ་ནི་གང་ཞེ་ན། ཁྲི་བརྒྱད་སྟོང་པར་རྣམ་པ་ཐམས་ཅད་མཁྱེན་པ་ཉིད་ཀྱི་དམིགས་པ་ནི་དངོས་པོ་མེད་པའོ། །དབང་བྱེད་པ་ནི་དྲན་པའོ། །རྣམ་པ་ནི་ཞི་བའོ། །ཞེས་གསུང་པའི་དོན། འདི་ཡི་དམིགས་པ་དངོས་མེད་དེ། །བདག་པོ་དྲན་པ་ཡིན་པ་བཞེད། །རྣམ་པ་ཞི་ཉིད་འདི་ལ་ནི། །རབ་ཏུ་སྨྲ་རྣམས་བརྒྱུད་མར་རྒོལ། ཞེས་པ་ཐམས་ཅད་ཀྱི་ཡིན་ལུགས་དངོས་པོ་མེད་པ་ནས་བརྩམས་ནས་སངས་རྒྱས་ཀྱི་མཁྱེན་པ་འཇུག་པའི་ཕྱིར། རྣམ་མཁྱེན་འདིའི་དམིགས་པ་ནི་དངོས་པོ་མེད་པ་ཡིན་ཏེ། རྣམ་མཁྱེན་འདི་བསྒྲུབ་བར་བྱེད་པའི་རྒྱུ་ལ་དབང་བྱེད་པའི་བདགཔོ་ནི་དྲན་པའི་དབང་པོ་ཡིན་པར་མདོ་ལས་བཞེད་དོ། །རྣམ་མཁྱེན་འདིའི་རྣམ་པ་ནི་སྡུག་བསྔལ་ཐམས་ཅད་ཉེ་བར་ཞི་བ་ཉིད་ཡིན་ནོ། །ཆོས་ཀྱི་བདག་པོ་དབྱིག་གཉེན་གྱིས། རྣམ་པ་ཐམས་ཅད་མཁྱེན་པ་ཉིད་ཀྱི་དམིགས་པ་ནི་དངོས་པོ་མེད་པའོ། །ཞེས་བྱ་བ་ནི་དངོས་པོ་མེད་པ་ལས་བརྩམས་ནས་འཇུག་ཅེས་བྱ་བའི་དོན་ཏེ། དམིགས་པའི་རྐྱེན་ནི་མ་ཡིན་ནོ། །དབང་བྱེད་པ་ནི་དྲན་པའོ་ཞེས་བྱ་བ་ནི་སྔོན་གྱི་རྒྱུའི་དབང་གིས་བརྗོད་ཀྱི། དེའི་ཚེ་ནི་མ་ཡིན་ནོ། །ཞེས་གསུངས་སོ། །རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཆོས་ཐམས་ཅད་དངོས་པོ་མེད་པར་མཁྱེན་པ་འདི་ལ་ནི། དངོས་པོར་ཞེན་པའི་གྲུབ་མཐའ་སོ་སོར་རབ་ཏུ་འཛིན་པ་དངོས་སྨྲ་རྣམས། ཆོས་ཐམས་ཅད་དངོས་པོ་མེད་ན། རྣམ་མཁྱེན་ལ་བརྟེན་པའི་ཆོས་བཅུ་དྲུག་པོ་འདི་རྣམས་མི་འཐད་ཅེས་རྒྱུད་མར་རྒོལ་པར་བྱེད་པའི་རྩོད་གཞི་བཅུ་དྲུག་པོ་རྒྱུད་མར་བྱུང་བ་འདི་ལྟ་སྟེ། དམིགས་པ་འཐད་དང་དེ་ཡི་ནི། །ངོ་བོ་ཉིད་ངེས་གཟུང་བ་དང༌། །རྣམ་ཀུན་མཁྱེན་ཉིད་ཡེ་ཤེས་དང༌། དམ་པའི་དོན་དང་ཀུན་རྫོབ་དང༌། སྤྱོད་དང་དཀོན་མཆོག་གསུམ་པོ་དང༌། ཐབས་བཅས་ཐུབ་པའི་རྟོག་པ་དང༌། ཕྱིན་ཅི་ལོག་ནི་ལམ་བཅས་དང༌། གཉེན་པོ་མི་མཐུན་ཕྱོགས་དག་དང༌། མཚན་ཉིད་དང་ནི་སྒོམ་པ་ལ། །སྨྲ་བ་རྣམས་ཀྱི་ལོག་རྟོག་པ། །རྣམ་པ་ཀུན་མཁྱེན་རྟེན་ཅན། །རྣན་པ་བཅུ་དྲུག་དག་ཏུ་བཞེད། །ཅེས་པ་ལ་གང་གིས་ཕྱིར་རྣམ་མཁྱེན་གྱིས་དམིགས་པའི་ཆོས་ཐམས་ཅད་དངོས་པོ་མེད་ན་རྣམ་མཁྱེན་ལ་རྟེན་པ་ཅན་འདི་རྣམས་མི་འཐད་ཞེས་རྒོལ་བ་དངོས་པོ་སྨྲ་བ་རྣམས་ཀྱི་ལོག་རྟོག་སེལ་དགོས་པའི་ཕྱིར། ལོག་པར་བསྒྲུབ་པ་དེ་དག་གིས་ལན་རྣམས་རིམ་པ་ལྟར་གདབ་པ་ནི། གཟུགས་སོགས་ཆོས་ཐམས་ཅད་ལ་འདུས་བྱས་ཀྱི་ངོ་བོ་མེད་པའི་ཕྱིར། རྣམ་མཁྱེན་གྱི་དམིགས་པ་དངོས་པོ་མེད་པར་འཐད་པ་དང༌། ཆོས་ཐམས་ཅད་ཆོས་དབྱིངས་ཀྱི་ངོ་བོ་ཉིད་ཡིན་པའི་ཕྱིར། དམིགས་པ་དེའི་ནི་ངོ་བོ་དངོས་པོ་མེད་པ་ཉིད་དུ་ངེས་པར་གཟུང་བ་འཐད་པ་དང༌། ཆོས་ཐམས་ཅད་དངོས་པོ་མེད་པའི་ངོ་བོ་ཉིད་དུ་འདྲེས་པར་བྱེད་པའི་སྦྱིན་སོགས་ལ་སྤྱོད་པ་ཉིད་བྱང་ཆུབ་ཀྱི་ལམ་ཡིན་པའི་ཕྱིར་ལམ་དེས་རྣམ་པ་ཀུན་མཁྱེན་པ་ཉིད་ཀྱི་ཡེ་ཤེས་ཐོབ་པར་འཐད་པ་དང༌། དངོས་པོ་མེད་པའི་ངོ་བོ་ཉིད་ལ་བདེན་གཉིས་གཞན་དང་གཞན་དུ་གྲུབ་པ་མེད་ཀྱང་དངོས་པོའི་འདུ་ཤེས་ཅན་གི་གིས་དོན་དམ་པ་དངོས་པོ་མེད་པའི་ངོ་བོ་ཉིད་དེ་ཤེས་པར་བྱ་བའི་དོན་དུ་དངོས་པོ་ཡོད་མེད་ཀྱི་ཐ་སྙད་དགོས་པ་ནི་ཀུན་རྫོབ་ལ་རྟེན་པའི་ཕྱིར་དམ་པའི་དོན་དང་ཀུན་རྫོབ་ཀྱི་དབྱེ་བ་འཐད་པ་དང༌། འདི་ནི། ཉི་ཁྲིའི་ལེའུ་ང་ལྔ་པས་སྟོན་ནོ། །ཅི་ནས་ཀྱང་བློ་རྣམ་པ་གཉིས་སུ་མི་འགྱུར་བར་གཟུགས་སོགས་དངོས་པོས་སྟོང་ཞེས་བྱ་བར་སྤྱོད་པ་ནི་བྱང་ཆུབ་ཀྱི་དོན་དུ་སྤྱོད་པ་ཡིན་པའི་ཕྱིར། བྱང་ཆུབ་སེམས་དཔའི་སྤྱོད་པའི་འཐད་པ་དང༌། དངོས་པོ་མེད་པའི་ཡང་དག་པའི་དོན་རབ་ཏུ་རྟོགས་པའི་ཕྱིར་སངས་རྒྱས་དཀོན་མཆོག་འཐད་པ་དང༌། དངོས་པོ་མེད་པ་དེ་བཞིན་ཉིད་ཀྱི་ངོ་བོ་བྱང་ཆུབ་ཡིན་པའི་ཕྱིར་ཆོས་དཀོན་མཆོག་འཐད་པ་དང༌། བྱང་ཆུབ་སེམས་དཔའ་རྣམས་དངོས་པོ་མི་དམིགས་པའི་ཚུལ་གྱིས་བྱང་ཆུབ་དེ་ལ་སློབ་པའི་ཕྱིར་དགེ་འདུན་དཀོན་མཆོག་འཐད་པ་དང༌། འདི་ནི་ཉི་ཁྲིའི་ལེའུ་ང་དྲུག་པ་དང༌། །ང་བདུན་པས་ཐབས་ལ་མཁས་པ་སྟོན་ནོ། །ཆོས་ཐམས་ཅད་དངོས་པོ་མེད་པར་རྟོགས་པའི་ཐབས་མཁས་དང་བྲལ་ནས་རྣམ་མཁྱེན་མི་ཐོབ་པའི་ཕྱིར་ཆོས་ཐམས་ཅད་རང་གི་མཚན་ཉིད་ཀྱིས་སྟོང་པར་ཤེས་ཤིང་འཇུག་པའི་ཐབས་མཁས་དང་བཅས་པ་འཐད་པ་དང༌། བདེ་ནས་སྐབས་འདི་རྫོགས་ཀྱི་བར་ཉི་ཁྲིའི་ལེའུ་ང་བརྒྱད་པས་སྟོན་ཏོ། །དངོས་པོ་མེད་པའི་ངོ་བོ་ཉིད་ལས་མི་གཡོ་བའི་ཡེ་ཤེས་ལ་དངོས་པོ་ཡོད་མེད་ཀྱི་སྦྲོས་པ་མེད་པའི་ཕྱིར་ཐུབ་པའི་མངོན་རྟོགས་པ་འཐད་པ་དང༌། དངོས་པོ་ངོ་བོ་ཉིད་མེད་པའི་གཟུགས་རྟག་མི་རྟག་སོགས་སུ་ཞེན་པ་ནི་ཕྱིན་ཅི་ལོག་ཏུ་སྦྲོས་པ་ཡིན་པའི་ཕྱིར་ཕྱིན་ཅི་ལོག་འཐད་པ་དང༌། བྱང་ཆུབ་སེམས་དཔའ་ནི་ངོ་བོ་ཉིད་མེད་པའི་ལམ་ཐམས་ཅད་སློབ་པའི་ཕྱིར་རྣམ་མཁྱེན་ཐོབ་བྱེད་ཀྱི་ལམ་དང་བཅས་པ་འཐད་པ་དང༌། ལམ་ཐམས་ཅད་ལ་སློབ་ཀྱང་ཤེས་པར་དང་མཐོང་བས་དམན་པའི་ས་བརྒྱད་ལས་འདའ་བའི་ཕྱིར་གཉེན་པོ་ལམ་ཤེས་འཐད་པ་དང་བྱང་ཆུབ་སེམས་དཔའ་རྒྱུན་ཞུགས་ལ་སོགས་ཉན་རང་གི་འབྲས་བུ་མངོན་དུ་བྱེད་པ་སྤོང་བའི་ཕྱིར་ལམ་ཤེས་ཀྱི་མི་མཐུན་ཕྱོགས་ཉན་རང་གི་ས་དག་འཐད་པ་དང༌། དངོས་པོའི་མཚན་ཉིད་མེད་པའི་དབྱིངས་ཀྱང་གློ་བུར་དུ་གནས་པར་མ་བྱས་ཤིང་ཡེ་ནས་དེ་བཞིན་དུ་གནས་པའི་ཕྱིར་ཆོས་ཐམས་ཅད་མཚན་ཉིད་མེད་པར་མཚན་ཉིད་གཅིག་པ་འཐད་པ་དང༌། དངོས་པོར་རྟོགས་པའི་སྒོམ་པ་རྣམ་པར་བཤིག་ནས་མཚན་ཉིད་མེད་པར་བསྒོམ་པ་ཉིད་ཤེར་ཕྱིན་བསྒོམ་པ་ཡིན་པའི་ཕྱིར་ཤེར་ཕྱིན་བསྒོམ་པ་འཐད་པ་སྟེ། དེ་རྣམས་ཀྱིས་དེ་དག་ལ་དངོས་པོར་སྨྲ་བ་རྣམས་ཀྱི་མི་འཐད་སྙམ་པའི་ལོག་པར་རྟོགས་པས་ཀུན་ནས་བསླང་བའི་རྩོད་པ་རྣམ་པ་ཀུན་མཁྱེན་པ་ཉིད་ལ་རྟེན་པ་ཅན་གྱི་ཆོས་ལ་རྒོལ་བའི་རྣམ་པ་བཅུ་དྲུག་དག་ཏུ་བྱུང་བ་རྣམས་བསལ་བར་བཞེད་པ་ཡིན་ནོ། །དེ་རྣམས་ཀྱིས་བར་ཆད་མེད་པའི་ཏིང་ངེ་འཛིན། ལོག་པར་སྒྲུབ་དང་བཅས་པ་ནི། རྩེ་མོའི་མངོན་རྟོགས་ཞེས་པ་དེ་དག་བཤད་ཟིན་ཏོ། །དངོས་པོ་བརྒྱད་ལ་རྩེ་མོར་ཕྱིན་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོནཔར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་པ་མདོ་ལུགས་མ་ཞེས་བྱ་བ་ལས་སྐབས་ལྔ་པའི་འགྲེལ་པའོ། ། དྲུག་པ། མཐར་གྱིས་སྦྱོར་བ་རྒྱས་པར་བཤད་པ། ད་ནི་མཐར་གྱིས་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པར་བྱ་སྟེ། མཐར་གྱིས་པའི་དོན་ནི་ཆོས་ཐམས་ཅད་དངོས་པོ་མེད་པ་རྨི་ལམ་ལྟ་བུའི་ངོ་བོར་མཐོང་བའི་རྩེ་སྦྱོར་ཐོབ་ནས་ཆོས་ཀྱི་སྐུ་རིམ་གྱིས་རྫོགས་ཤིང་རིམ་གྱིས་རྟོགས་པའི་དོན་ཡིན་ནོ། །མགོན་པོ་ཀླུ་སྒྲུབ་ཀྱི་ཞལ་སྔ་ནས་ཀྱང༌། ཇི་ལྟར་ཚེས་པའི་ཟླ་བ་ནི། །རིམ་གྱིས་རིམ་གྱིས་འཕེལ་བར་མཐོང༌། །དེ་བཞིན་ས་ལ་ཞུགས་རྣམས་ཀྱང༌། །རིམ་གྱིས་རིམ་གྱིས་འཕེལ་བར་མཐོང༌། །ཇི་ལྟར་ཡར་ངོའི་བཅོ་ལྔ་ལ། །ཟླ་བ་རྫོགས་ཤིང་གསལ་བ་ལྟར། །དེ་བཞིན་ས་ཡི་མཐར་ཐུག་ན། །ཆོས་ཀྱི་སྐུ་ཡང་རྫོགས་ཤིང་གསལ། །ཞེས་པའི་དོན་དང༌། དེ་བཞིན་གཤེགས་པ་ཉིད་ཀྱི་གསུང་རབ་གཞན་དུ། །ཇི་ལྟར་ཟླ་ཤར་རིམ་པ་ཡིས། །ཆ་རྣམས་ཀྱིས་ནི་རྫོགས་པར་འགྱུར། །གྲིབ་མ་ཉམས་པར་རྫོགས་པ་སྟེ། །ཟླ་བ་ཆད་དང་རྫོགས་པ་མིན། །དེ་བཞིན་ཡེ་ཤེས་ཤར་རིམ་པས། །ས་རྣམས་ཀྱིས་ནི་རྫོགས་པར་འགྱུར། །ཉོན་མོངས་ལ་སོགས་ཉམས་པ་རྫོགས། །ཡེ་ཤེས་ཆད་དང་རྫོགས་པ་མིན། ། ཞེས་པའི་དོན་དང༌། མདོ་འདི་ཉིད་དུ་ཡང༌། ཉི་ཁྲིའི་ལེའུ་དེ་དགུ་པ། རྣམ་མཁྱེན་ཐོབ་པར་བྱེད་པའི་སྦྱིན་སོགས་ལ་མཐར་གྱིས་སྤྱོད་པ་ཡོད་ཅེས་དང༌། དེ་ལྟར་སངས་རྒྱས་སོགས་རྗེས་སུ་དྲན་པ་ལ་བསླབས་ཤིང་སྦྱིན་སོགས་རྣམ་མཁྱེན་གྱི་བར་རྫོགས་པར་བྱེད་དོ། །ཞེས་པ་དང༌། སེམས་དང་པོ་བསྐྱེད་པ་ནས་བཟུངས་ཏེ། མཐར་གྱིས་འཇུག་པའི་ལམ་རྫོགས་པར་འདོད་པས་དངོས་པོ་མེད་པའི་ཚུལ་གྱིས་ཕར་ཕྱིན་རྣམས་ལ་བསླབ་པར་བྱའོ། །ཞེས་སོགས་ཀྱི་དོན་ཏོ། །འདི་ཉིད་དུ་ཡང༌། དེ་རབ་དེ་ཡི་གོ་རིམ་དང༌། །དེ་མཐའ་དེའི་རྣམ་སྨིན་ཞེས་གསུངས་སོ། །དེས་ན་སྐད་ཅིག་མའི་གནས་སྐབས་སུ་ནི། ཆོས་ཀྱི་རྟོགས་པ་ལ་རིམ་པ་གསུངས་པ་མེད་དེ། དེ་མཐའ་ཞེས་པས་རིམ་པ་དེ་མཐར་ཐུག་པ་དང༌། ཡེ་ཤེས་སྐད་ཅིག་མ་གཅིག་གིས་ཟག་མེད་ཀྱི་ཆོས་ཐམས་ཅད་ཅིག་ཆར་དུ་རྟོགས་པར་གསུངས་པ་དང། ཉི་ཁྲིའི་ལེའུ་ང་ལྔ་པ་ལ་སོགས་པར། རྡོ་རྗེ་ལྟ་བུའི་ཏིང་ངེ་འཛིན་སྐད་ཅིག་མ་གཅིག་དང་ལྡན་པའི་ཡེ་ཤེས་ཀྱིས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་དོ། །ཞེས་ཡང་དང་ཡང་དུ་གསུངས་པ་དང༌། །ནམ་ཞིག་ས་ཡི་མཐར་ཐུག་ན། །ཆོས་ཀྱི་སྐུ་ཡང་རྫོགས་ཤིང་གསལ། ། ཞེས་གསུངས་པ་རྣམས་ཀྱི་དོན་ཏོ། །མདོ་ལས། ཆོས་ཐམས་ཅད་དངོས་པོ་མེད་པའི་ངོ་བོ་ཉིད་ལ་མཐར་གྱིས་སྤྱོད་པ་དང༌། མཐར་གྱི་སློབ་པ་དང༌། ནན་ཏན་ཏུ་བྱེད་པ་གང་གིས་འཚང་རྒྱ་བར་འགྱུར་བའི་མཐར་གྱིས་སྤྱོད་པ་དང༌། སློབ་པ་ལ་ནན་ཏན་ཏུ་བྱེད་པ་ཇི་ལྟར་ཡོད་པར་འགྱུར་ཞེས་ཞུས་པ་ལན་དང་བཅས་པའི་དོན། སྦྱིན་པ་ཤེས་རབ་བར་དག་དང༌། །སངས་རྒྱས་ལ་སོགས་དྲན་དང་ཆོས། །དངོས་པོ་མེད་ངོ་བོ་ཉིད་ཀྱིས་ཏེ། །མཐར་གྱིས་པ་ཡི་བྱ་བར་བཞེད། ཅེས་པ་ལ། སྦྱིན་པ་ལ་སོགས་ཤེས་རབ་ཀྱི་ཕ་རོལ་ཏུ་ཕྱིན་པ་དག་ལ་དངོས་པོ་མེད་པའི་ཚུལ་གྱིས་རིམ་པ་ཡོད་ཚུལ་ནི། སེམས་དང་པོ་བསྐྱེད་པ་ནས་བཟུང་སྟེ་ཆོས་ཐམས་ཅད་རྨི་ལམ་ལྟ་བུ་དངོས་པོ་མེད་པའི་ངོ་བོར་ཤེས་པས་མི་དམིགས་པའི་ཚུལ་གྱིས་བཞིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་ལ་སྤྱོད་པ་ནི། དངོས་པོ་མེད་ཀྱང་རིམ་ཀྱིས་ཉན་རང་གི་ས་ལས་འདས་ནས་བྱང་ཆུབ་སེམས་དཔའི་སྐྱོན་མེད་པར་འཇུག་གོ །དེར་ཞུགས་ནས་མཐར་གྱིས་སངས་རྒྱས་ཀྱི་ཞིང་དག་པ་དང༌། སེམས་ཅན་སྨིན་པར་བྱས་ནས་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་དོ། །དེ་ལྟར་ན་ཕ་རོལ་ཏུ་ཕྱིན་པ་དྲུག་གིས་དངོས་པོའི་ངོ་བོ་ཉིད་མེད་ཀྱང་མཐར་གྱིས་སྤྱོད་པ་ཡོད་པ་ཡིན་ནོ། ། འདིར་སེམས་དང་པོ་བསྐྱེད་པ་ནས་ཞེས་པ་ནི་ཆོས་ཐམས་ཅད་སྒྱུ་མ་ལྟ་བུར་མཐོང་བའི་རྩེ་སྦྱོར་ཐོབ་ནས་བཟུང་སྟེ། ཞེས་པའི་དོན་ཏོ། །སེམས་དང་པོ་བསྐྱེད་པ་ནས་བཟུང་སྟེ། ཆོས་ཐམས་ཅད་དངོས་པོའི་ངོ་བོ་ཉིད་མེད་ལ་དངོས་པོ་མེད་པའི་དངོས་པོ་མེད་པ་དྲན་པར་མི་ནུས་པའི་ཕྱིར། སངས་རྒྱས་གཟུགས་སོགས་ཕུང་པོ་ལྔ་དང༌། གཟུགས་ཀྱི་སྐུ་དང༌། ཚུལ་ཁྲིམས་སོགས་ཕུང་པོ་ལྔ་དང༌། སྟོབས་བཅུ་ལ་སོགས་པ། རྟེན་འབྲེལ་གི་དངོས་པོ་དྲན་པ་མེད་ཅིང་ཡིད་ལ་བྱ་བའི་དངོས་པོ་མེད་པ་སྒྱུ་མ་ལྟ་བུ་ནི། སངས་རྒྱས་རྗེས་སུ་དྲན་པ་བསྒོམ་པའོ། །དེ་ལྟར་དགེ་མི་དགེ་ལ་སོགས་པ་འཁོར་འདས་ཀྱིས་བསྡུས་པའི་ཆོས་ཐམས་ཅད་དྲན་པ་མེད་ཅིང་ཡིད་ལ་བྱ་བ་མེད་པ་རྨི་ལམ་ལྟ་བུ་ནི་ཆོས་རྗེས་དུ་དྲན་པ་བསྒོམ་པའོ། །དེ་བཞིན་དུ་ཉན་ཐོས་ཀྱི་དགེ་འདུན་སྐྱེས་བུ་ཟུང་བཞི་དང༌། གང་ཟག་བརྒྱད་པོ་དྲན་པ་མེད་ཅིང་ཡིད་ལ་བྱ་བ་མེད་པ་སྤྲུལ་པ་ལྟ་བུ་ནི་དགེ་འདུན་རྗེས་སུ་དྲན་པ་བསྒོམ་པའོ། །དེ་བཞིན་དུ་ཚུལ་ཁྲིམས་དྲི་མ་མེད་པ་ལ་གནས་ཏེ། ཚུལ་ཁྲིམས་དེ་དྲན་པ་མེད་ཅིང་ཡིད་ལ་བྱ་བ་མེད་པ་ཆུ་ཟླ་ལྟ་བུ་ནི་ཚུལ་ཁྲིམས་རྗེས་སུ་དྲན་པ་བསྒོམ་པའོ། །དེ་བཞིན་དུ་ལུས་དང༌། ཟང་ཟིང་དང༌། ཆོས་ཀྱི་སྦྱིན་པ་གཏོང་ཡང་དངོས་པོ་གསུམ་དུ་དྲན་པ་མེད་ཅིང་ཡིད་ལ་བྱ་བ་མེད་པ་དྲི་ཟའི་གྲོང་གི་ལུས་དང་ལོངས་སྤྱོད་ལྟ་བུ་ནི་གཏོང་བ་རྗེས་སུ་དྲན་པ་བསྒོམ་པའོ། །དེ་བཞིན་དུ་འདོད་ལྷ་དང༌། གོང་མ་གཉིས་ན་སྤྱོད་པའི་ཕྱིར་མི་འོང་གི་ལྷ་དེ་དག་དངོས་པོར་དྲན་པར་མེད་ཅིང་དངོས་པོ་ཡིད་ལ་བྱ་བ་མེད་པ་གཟུགས་བརྙན་ལྟ་བུ་དྲན་ཅིང་ཡིད་ལ་བྱེད་པ་ནི་ལྷ་རྗེས་སུ་དྲན་པ་བསྒོམ་པའོ། །ལྟར་ན་སེམས་དང་པོ་བསྐྱེད་པ་ནས་བཟུང་སྟེ། སངས་མ་རྒྱས་ཀྱི་བར་དུ་རིམ་གྱིས་སངས་རྒྱས་ལ་སོགས་པ་རྗེས་སུ་དྲན་པ་དྲུག་གིས་མཐར་གྱིས་འཇུག་པའི་ལམ་ལ་སློབ་པས། དངོས་པོ་མེད་པའི་ཚུལ་གྱིས་སྦྱིན་སོགས་ནས་རྣམ་མཁྱེན་གྱི་བར་གྱི་ཆོས་སྐུ་རིམ་གྱིས་རྟོགས་ཤིང་རྫོགས་པར་བྱེད་པ་ཡིན་ནོ། །སེམས་དང་པོ་བསྐྱེད་པ་ནས་བཟུང་སྟེ། ཆོས་ཐམས་ཅད་དངོས་པོ་མེད་པའི་ངོ་བོ་ཉིད་ཀྱི་ཚུལ་གྱིས་སྦྱིན་སོགས་ནས་རྣམ་མཁྱེན་གྱི་བར་ལ་བསློབ་པས་ཆོས་སྐུ་རིམ་གྱིས་རྣམ་མཁྱེན་གྱི་བར་དུ་རྫོགས་པ་དེ། མཐར་གྱིས་འཇུག་པའི་ལམ་གི་བྱ་བ་ཡོངས་སུ་རྫོགས་པར་བཞེད་དོ། །གང་གིས་ཕྱིར་དེ་ལྟ་ཡིན་པ་དེའི་ཕྱིར་མཐར་གྱིས་པའི་ཆོས་སྐུ་རིམ་གྱིས་རྫོགས་པ་དེ་རིམ་གྱིས་རྟོགས་པ་བརྒྱ་ཇེ་ཆེར་འཕེལ་བ་ཡིན་གྱི། དེ་ལས་གཞན་དུ་སྨྲ་བ་རྣམས་ནི་མདོ་དང་མི་མཐུན་ནོ། །དེ་རྣམས་ཀྱིས་མཐར་གྱིས་པ་རྣམ་གསུམ་རྣམ་བཅུ་ཞེས་པ་དེ་དག་བཤད་ཟིན་ཏོ། །དངོས་པོ་བརྒྱད་ལས་མཐར་གྱིས་པའི་དངོས་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་ཚིག་ལེའུ་བྱས་པའི་འགྲེལ་པ་མདོ་ལུགས་མ་ཞེས་བྱ་བ་ལས། སྐབས་དྲུག་པའི་འགྲེལ་པའོ། ། བདུན་པ། སྐད་ཅིག་སྦྱོར་རྒྱས་པར་བཤད་པ། དེ་ནི་སྐད་ཅིག་མ་གཅིག་གིས་མངོན་པར་བྱང་ཆུབ་རྫོགས་པར་བྱང་ཆུབ་པའི་དངོས་པོ་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པར་བྱ་སྟེ། ཉི་ཁྲིའི་ལེའུ་དྲུག་ཅུ་པར་སེམས་བསྐྱེད་པ་གཅིག་གིས་སྦྱིན་སོགས་ནས་མཚན་དཔེའི་བར་རྫོགས་པར་བྱེད། ཅེས་དང༌། ཟག་པ་མེད་པའི་སེམས་ལ་གནས་ཤིང་སྦྱིན་པ་གཏོང་ཞེས་སོགས་ཀྱི་དོན། སྦྱིན་པ་ལ་སོགས་རེ་རེས་ཀྱང་ཟག་མེད་ཆོས་ཀུན་བསྡུས་པའི་ཕྱིར། ཐུབ་པའི་སྐད་ཅིག་གཅིག་པ་ཡིས། །རྟོགས་པ་འདི་ནི་ཤེས་པར་བྱ། །ཇི་ལྟར་སྐྱེས་བུས་ཟོ་ཆུན་རྒྱུན། །རྟོག་ཐབས་གཅིག་གིས་བསྐྱོད་པ་ན། །ཐམས་ཅད་གཅིག་ཆར་འགུལ་བ་ལྟར། །སྐད་ཅིག་གཅིག་ཤེས་དེ་བཞིན་ནོ། །ཞེས་པ་ལ། ཡེ་ཤེས་འདི་ནི་ངེས་འབྱུང་བསྒྲུབ་པའི་གནས་སྐབས་བར་ཆད་མེད་པའི་ཏིང་ངེ་འཛིན་ས་བཅུའི་རྒྱུན་མཐའི་སྐད་ཅིག་མ་རྡོ་རྗེ་ལྟ་བུའི་ཏིང་ངེ་འཛིན་ནི། ནམ་མཁའི་ཁམས་ཀྱི་མཐར་ཐུག་པ་ཡོངས་སུ་གང་བའི་འོད་གསལ་ཆོས་ཀྱི་སྐུ་སྔ་ཕྱི་མེད་པར་གཅིག་ཆར་དུ་རྟོགས་པར་བྱེད་པ་ཡིན་ནོ། །ཏིང་ངེ་འཛིན་གཅིག་པའི་འདི་ཉིད་རྟོགས་ཚུལ་གྱིས་སྒོ་ནས་བཞིར་བཤད་དོ། །ཡེ་ཤེས་འདིས་ཆོས་སྐུ་རྫོགས་པ་རྟོགས་པ་ནི་ཡེ་ཤེས་སོ། ། སྐད་ཅིག་མ་གཅིག་གིས་རྫོགས་པར་གཅིག་ཆར་དུ་རྟོགས་པ་ཡིན་གྱི། འདིར་རིམ་གྱིས་རྟོགས་པ་ནི་མ་ཡིན་ཏེ། ཆོས་སྐུའི་སྒྲིབ་པ་ཐམས་ཅད་ཟད་པས་སངས་རྒྱས་ཀྱི་ཆོས་ཐམས་ཅད་རྣམ་པར་དག་པའི་ངོ་བོར་ཡོངས་སུ་རྫོགས་པའི་ཕྱིར་རོ། །འཕགས་པ་ཀླུ་སྒྲུབ་ཀྱི་ཞལ་སྔ་ནས། ནམ་ཞིག་ས་ཡི་མཐར་ཐུག་ན། །ཆོས་ཀྱི་སྐུ་ཡང་རྫོགས་ཤིང་གསལ། །ཞེས་དང༌། གང་ཚེ་ཏིང་འཛིན་རྡོ་རྗེ་ཡིས། ། བུམ་པ་དེ་ནི་བཅག་གྱུར་པ། །དེ་ཚེ་དེ་ནི་ནམ་མཁའ་ཡི། །མཐར་ཐུག་བར་དུ་སྣང་བར་བྱེད། །ཅེས་པའི་དོན་དང༌། ས་ཡོངས་སུ་སྦྱོང་བའི་སྐབས་སུ་ཡང༌། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པའི་ཕྱིར་ས་བཅུ་པ་ལ་ནི་བྱང་ཆུབ་སེམས་དཔས་དེ་བཞིན་གཤེགས་པ་ཉིད་དུ་བརྗོད་དོ། ། ཞེས་སོགས་ཀྱི་དོན་ཏོ། ། དེས་ན་སྦྱིན་པ་དང་ཚུལ་ཁྲིམས་ལ་སོགས་པའི་ཡེ་ཤེས་སྐད་ཅིག་མ་རེ་རེས་ཀྱང་ཟག་མེད་ཀྱི་ཆོས་ནམ་མཁའ་གང་བ་ཀུན་བསྡུས་པའི་ཕྱིར། ཐུབ་པའི་རྣམ་མཁྱེན་ཐོབ་པའི་ཡེ་ཤེས་སྐད་ཅིག་མ་གཅིག་གིས་འོད་གསལ་ཆོས་ཉིད་ཀྱི་སྐུ་རྫོགས་པར་གཅིག་ཆར་དུ་མཁྱེན་པའི་རྟོགས་པ་མཐའ་ཐུག་གི་རྟོགས་ཚུལ་འདི་ནི་ཤེས་པར་བྱའོ། །སྔ་ཕྱི་མེད་པར་གཅིག་ཆར་དུ་ཤེས་པ་ནི་དཔེ་ཇི་ལྟ་བུ་ཞེ་ན། ཇི་ལྟར་སྐྱེས་བུས་ཟོ་ཆུན་གྱི་རྒྱུད་རྡོགས་པ་བསྣུན་པའི་ཐབས་གཅིག་གིས་བསྐྱོད་ཅིང་བསྒུལ་བ་ན། ཟོ་བ་ཐམས་ཅད་སྔ་ཕྱི་མེད་པར་གཅིག་ཆར་དུ་འགུལ་པ་དེ་ལྟར་ཡེ་ཤེས་སྐད་ཅིག་མ་གཅིག་གིས་གཅིག་ཆར་དུ་ཤེས་པ་ནི་དཔེ་དེ་བཞིན་ནོ། །མདོ་ལས། བྱང་ཆུབ་སེམས་དཔའ་དེ་རྣམ་པར་སྨིན་པ་ལས་བྱུང་བའི་སྦྱིན་སོགས་ཕ་རོལ་ཏུ་ཕྱིན་པ་རྣམས་དང༌། རྣམ་སྨིན་ལས་བྱུང་བའི་མངོན་ཤེས་རྣམས་དང༌། རྣམ་སྨིན་ལས་བྱུང་བའི་བྱང་ཆུབ་ཀྱི་ལམ་ངེས་པ་ཉིད་ལ་སྤྱོད་ཅིང༌། ཆོས་ཐམས་ཅད་ཡོངས་སུ་རྫོགས་པར་ཐོབ་ནས། རྣམ་པ་ཐམས་ཅད་མཁྱེན་པ་ཉིད་རྗེས་སུ་ཐོབ་ཞེས་སོགས་ཀྱི་དོན། གང་ཚེ་ཆོས་དཀར་ཐམས་ཅད་གྱིས། །རང་བཞིན་ཤེས་རབ་ཕ་རོལ་ཕྱིན། །རྣམ་སྨིན་ཆོས་ཉིད་གནས་སྐབས་སྐྱེས། །དེ་ཚེ་སྐད་ཅིག་གཅིག་ཡེ་ཤེས། །ཞེས་པ་ལ། ས་བཅུ་པའི་མཐར། བར་ཆད་མེད་པའི་ཏིང་ངེ་འཛིན་ཐོབ་པ་གང་གི་ཚེ་རྣམ་བྱང་གི་ཆོས་དཀར་པོ་ཐམས་ཅད་ཀྱི་རང་བཞིན་ཏུ་གྱུར་པ་ནམ་མཁའ་གང་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་སྐུར་རྣམ་པར་སྨིན་པ་ལྷུན་གྱིས་གྲུབ་པའི་འབྲས་བུ་ཆོས་ཉིད་ཀྱི་གནས་སྐབས་སུ་རྫོགས་པར་སྒྲིབ་པ་མཐའ་དག་དང་བྲལ་བར་སྐྱེས་པ་དེའི་ཚེ། ཆོས་ཀྱི་སྐུ་རྫོགས་པར་སྐད་ཅིག་མ་གཅིག་གིས་གཅིག་ཆར་དུ་རྟོགས་པའི་ཡེ་ཤེས་སོ། །ཉི་ཁྲིའི་ལེའུ་རེ་གཅིག་པར། བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པའི་ཚེ། རྨི་ལམ་དང༌། སྒྱུ་མ་དང༌། སྨིག་རྒྱུ་དང༌། ཆུ་ཟླ་དང༌། མིག་གཡོར་དང༌། སྒྲ་བརྙན་དང༌། གཟུགས་བརྙན་དང༌། དྲི་ཟིའི་གྲོང་ཁྱེར་དང༌། སྤྲུལ་པ་ལྟ་བུའི་ཉེ་བར་ལེན་པ་ཕུང་པོ་ལྔ་ལ་གནས་ཤིང་ཕར་ཕྱིན་དྲུག་ལ་སྤྱོད་དོ། །ཞེས་སོགས་ཀྱི་དོན། སྦྱིན་ལ་སོགས་པའི་སྤྱོད་པ་ཡིས། ། ཆོས་ཀུན་རྨི་ལམ་འདྲར་གནས་ནས། །ཆོས་རྣམས་མཚན་ཉིད་མེད་པ་ཉིད། །སྐད་ཅིག་མ་ནི་གཅིག་གིས་རྟོགས། །ཞེས་པ་ལ་བྱང་ཆུབ་སེམས་དཔའ་དུས་དེར་ཡང་སྦྱིན་པ་ལ་སོགས་པའི་སྤྱོད་པ་མི་འདོར་བའི་ཆོས་ཀུན་རྨི་ལམ་དང་འདྲ་བར་རྟོགས་པའི་ཡེ་ཤེས་ལ་གནས་ནས། གཤིས་ལུགས་དོན་དམ་གྱི་ཆོས་རྣམས་དངོས་པོའི་མཚན་ཉིད་མེད་པ་སྒྱུ་མ་དང་འདྲ་པ་ཉིད་དུ་རྫོགས་པར། ཡེ་ཤེས་སྐད་ཅིག་མ་གཅིག་གིས་གཅིག་ཆར་དུ་རྟོགས་སོ། །མདོ་ལས། བྱང་ཆུབ་སེམས་དཔའ་ཤེར་ཕྱིན་ལ་སྤྱོད་པའི་ཚེ། ཆོས་ཐམས་ཅད་རྨི་ལམ་དང༌། སྒྲ་བརྙན་དང༌། མིག་ཡོར་དང༌། སྒྱུ་མ་དང༌། སྨིག་རྒྱུ་དང༌། སྤྲུལ་པ་ལྟ་བུར་ཤེས་སོ། །དེ་ཡང་ཇི་ལྟར་ཤེས་ན། རྨི་ལམ་མི་མཐོང༌། རྨི་ལམ་མཐོང་བ་མི་མཐོང༌། སྒྲ་བརྙན་མི་མཐོང༌། སྒྲ་བརྙན་ཉན་པ་མི་མཐོང༌། མིག་ཡོར་དང༌། སྒྱུ་མ་དང༌། སྨིག་རྒྱུ་དང༌། སྤྲུལ་པ་མི་མཐོང་ངོ༌། །སྤྲུལ་བ་མཐོང་བ་མི་མཐོང་ངོ༌། །ཞེས་སོགས་ཀྱི་དོན། རྨི་ལམ་དང་ནི་དེ་མཐོང་ཉིད། །གཉིས་ཀྱི་ཚུལ་དུ་མི་མཐོང་ལྟར། །ཆོས་རྣམས་གཉིས་སུ་མེད་པ་ཡི། །དེ་ཉིད་སྐད་ཅིག་གཅིག་གིས་མཐོང༌། །ཞེས་པ་ལ་ཇི་ལྟར་རྨི་ལམ་དང༌། །རྨི་ལམ་དེ་མཐོང་བ་དེ་དག་ཉིད་དངོས་པོ་གཉིས་ཀྱི་ཚུལ་དུ་མི་མཐོང་བ་དེས་དེ་ལྟར་དོན་དམ་འོད་གསལ་ངོ་བོ་ཉིད་སྐུའི་ཆོས་སྐུའི་ཆོས་རྣམས་གཟུང་འཛིན་གཉིས་སུ་མེད་པའི་ཡེ་ཤེས། དེ་ཁོ་ན་ཉིད་ཀྱི་ཆོས་སྐུའི་རྫོགས་པར་ས་བཅུ་རྒྱུན་མཐའི་ཡེ་ཤེས་སྐད་ཅིག་མ་ནི་གཅིག་གིས་གཅིག་ཆར་དུ་མཐོང་བ་དེས་ན་ས་བཅུ་པའི་མཐར་ཐུག་པའི་ཡེ་ཤེས་སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་པ་ཡིན་ནོ། །དེ་རྣམས་ཀྱིས། སྐད་ཅིག་མ་གཅིག་གིས་མངོན་རྫོགས་བྱང་ཆུབ་པ། མཚན་ཉིད་ཀྱིས་ནི་རྣམ་པ་བཞི། ཞེས་པ་དེ་དག་བཤད་ཟིན་ཏོ། །དངོས་པོ་བརྒྱད་ལས། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པའི་དངོས་པོ་ཤེས་རབ་ཀྱིས་ཕ་་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། ། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་བ་མདོ་ལུགས་མ་ཞེས་བྱ་བ་ལས། སྐབས་བདུན་པའི་འགྲེལ་པའོ། ། བརྒྱད་པ། ཆོས་སྐུ་རྒྱས་པར་བཤད་པ། ད་ནི་ཆོས་ཀྱི་སྐུ་བཤད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པར་བྱ་སྟེ། དེ་ལ་ངོ་བོ་ཉིད་ལོངས་རྫོགས་བཅས་དང༌། །ཞེས་པའི་ཚིགས་སུ་བཅད་པའི་འདི་ལ། མགོན་པོ་སྦྱན་རས་གཟིགས་དབང་ཕྱུག་གིས་བཤད་པ་མཛད་པ་ནི། ངོ་བོ་ཉིད་ཀྱི་སྐུ་དེ་སྐུ་གསུམ་མཛད་པ་དང༌། བཞིར་ངེས་པར་བྱམས་པས་གསུངས། ཞེས་གསུངས་པས། ངོ་བོ་ཉིད་ཀྱི་སྐུ་ནི་དབྱེ་གཞི་དང་སྐུ་ལྷག་མ་གསུམ་མཛད་པ་དང་བཅས་པ་རྣམས་དེ་ལས་ཕྱེ་བའི་ཡ་ཀྱལ་ཡིན་པར་སྣང་ངོ༌། །སྐབས་འདིར་ཡང་ཐོག་མར་ངོ་བོ་ཉིད་ཀྱི་སྐུ་བསྟན་ནས་དེ་ལས་ཀྱིས་སྐུ་གསུམ་མཛད་པ་དང་བཞིར་གསུངས་པས་སོ། ། ༡༽ངོ་བོ་ཉིད་སྐུ་བཤད་པ། དེས་ན་ངོ་བོ་ཉིད་ཀྱི་སྐུ་གཅིག་པུ་འདི་ཉིད་འབའ་ཞིག་མཐར་ཐུག་གི་དོན་ཡིན་པར་གསུངས་རབ་ཟབ་དགུ་རྣམས་སུ་གཏན་ལ་ཕབ་པའི་ཕྱིར། འདི་ཉིད་ལ་སྔགས་ཀྱི་ཐེག་པར་ལྷག་ཅིག་སྐྱེས་པའི་སྐུ་དང༌། བདེ་བ་ཆེན་པོའི་སྐུ་དང༌། ཡེ་ཤེས་ཉིད་ཀྱི་སྐུ་དང༌། ངོ་བོ་ཉིད་གྱི་སྐུ་དང༌། ཆོས་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུ་དང༌། དོན་དམ་པའི་བདེན་པ་དང༌། ཆོས་ཀྱི་དབྱིངས་དང༌། འཇམ་དཔལ་ཡེ་ཤེས་སེམས་དཔའ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཕྱག་རྒྱ་ཆེན་མོ་དང༌། ཐེག་པ་ཆེན་པོ་དང༌། དོན་དམ་བྱང་ཆུབ་ཀྱི་སེམས་དང་རྡོ་རྗེའི་ཐེག་པ་དང༌། དུས་ཀྱི་འཁོར་ལོ་དང༌། གསང་བ་འདུས་པ་དང༌། ཀྱེའི་རྡོ་རྗེ་དང༌། འཁོར་ལོ་སྡོམ་པ་ལ་སོགས་པར་གྲགས་སོ། །ངོ་བོ་ཉིད་ཀྱི་སྐུ་འདི་ཉིད་ལ། མཚན་ཉིད་ཀྱི་ཐེག་པར་དོན་དམ་པའི་སྐུ་དང་རང་དོན་གྱི་སྐུ་དང༌། རྣམ་པར་གྲོལ་པའི་སྐུ་དང༌། དེ་བཞིན་གཤེགས་པའི་སྙིང་པོ་དང༌། ཆོས་ཀྱི་སྐུ་དང༌། འགོག་པའི་བདེན་པ་དང༌། མྱ་ངན་ལས་འདས་པ་དང༌། གཉིས་སུུ་མེད་པའི་ཡེ་ཤེས་དང༌། རྒྱལ་བ་ཀུན་གྱི་ཡུམ་དང༌། ཆོས་ཀྱི་དབྱིངས་ལ་སོགས་པར་གྲགས་སོ། །དེས་ན་དོན་འདི་ཉིད་མདོ་རྒྱུད་རྣམས་སུ་མིང་མཐའ་ཡས་པས་བསྟན་པའི་ཕྱིར་མིང་ཡང་ཆེ་ཞིང་རྒྱ་ཆེ་བ་ཡིན་ནོ། །མིང་མང་ཡང་དོན་གཤིས་ལ་ཆོས་ཀྱི་སྐུ་གཅིག་པུ་འདི་ལས་བསྟན་པ་མེད་པའི་ཕྱིར་དོན་གཅིག་གཉིས་མེད་ཆོས་ཀྱི་དོན་ཡིན་ནོ། །ལུས་དང་སྐུ་དང་ཕུང་པོ་རྣམས་དོན་གཅིག་ཏུ་གོ་བར་བྱའོ། །ཡན་ལག་དུ་མ་འདུས་ཤིང་སྤུངས་བ་ལ་ལུས་ཞེས་པ་དང༌། ཞེས་པའི་སྒོ་ནས་སྐུ་ཞེས་པའི་མིང་གིས་བསྟན་ཏོ། །དེ་ལྟ་བས་ན་འདིར་སངས་རྒྱས་རྣམ་ཀྱིས་ལུས་ངོས་འཛིན་པ་ལ། གཞི་ངོ་བོ་ཉིད་ཀྱི་ལུས་དང༌། ཆོས་ཀྱི་ལུས་དང༌། ལོངས་སྤྱོད་རྫོགས་པའི་ལུས་དང༌། སྐུ་འདི་རྣམས་མ་གཏོགས་པའི་སངས་རྒྱས་ཞེས་བྱ་བ་ནི་གུད་ན་ཅི་ཡང་མེད་དོ། །དེ་ལ་དོན་དམ་པ་འོད་གསལ་ལ་ཟག་པ་མེད་པའི་ཆོས་ནམ་མཁའ་གང་བ་རྣམས་དེ་བཞིན་ཉིད་དུ་གནས་ཤིང་བཅོས་མ་མ་ཡིན་པའི་ཆ་ནས་ངོ་བོ་ཉིད་ཀྱི་སྐུ་དང༌། དེ་དག་ཡོན་ཏན་གྱི་ཆོས་མཐའ་ཡས་པའི་ཕུང་པོར་གནས་པའི་ཆ་ནས་ཆོས་ཀྱི་སྐུ་དང༌། དེ་དག་ཉིད་མཚན་དང་དཔེ་བྱད་བཟང་པོའི་བདག་ཉིད་ཆོས་ཐམས་ཅད་རྫོགས་པར་ལོངས་སྤྱོད་པ་ཁ་དོག་དང་སྐུ་དང་མཛད་པ་སྣ་ཚོགས་པའི་ཆ་ནས་ལོངས་སྐུ་དང༌། དེ་དག་ཉིད་སངས་རྒྱས་དང་བྱང་ཆུབ་སེམས་དཔའ་དང་ཚངས་པ་དང་བརྒྱ་བྱིན་དང་རྒྱལ་པོ་དང་གཟིངས་དང་ཟམ་པ་ལ་སོགས་པ་གང་ལ་གང་འདུལ་གྱིས་སྣོད་བཅུད་ཐམས་ཅད་ཀྱི་རྣམ་པ་མཐའ་ཡས་པ་ཉིད་དུ་སྟོན་པའི་ཆ་ནས་སྤྲུལ་པའི་སྐུའོ། །དེས་ན་སྐུ་གཅིག་ཏུ་གསུངས་པ་དང༌། དུ་མར་གསུངས་པ་མི་འགལ་བའི་ཕྱིར་སྐུའི་གྲངས་མང་ཉུང་ལ་རྩོད་པ་མི་བྱའོ། །མགོན་པོ་སྦྱན་རས་གཟིགས་ཀྱིས། དེ་ཉིད་གཅིག་པུ་སྐུའི་རབ་ཏུ་དབྱེ་བས་རྣམ་པ་བཅུ་དྲུག་ཞེས་ངོ་བོ་ཉིད་ཀྱི་དེ་ཉིད་གཅིག་པུ་སྐུ་བཅུ་དྲུག་ཏུ་གསུངས་པའི་ཕྱིར་དང༌། རྗེ་བཙུན་འཇམ་དབྱངས་མགོན་གྱིས་ངོ་བོ་ཉིད་ཀྱི་སྐུའི་གཟུགས་ཀྱི་ཕུང་པོ་མཐའ་ཡས་པ་ཐམས་ཅད་སྤྲུལ་པའི་སྐུ་དང༌། སྒྲའི་ཕུང་པོ་མཐའ་ཡས་པ་ཐམས་ཅད་ལོངས་སྤྱོད་རྫོགས་པའི་སྐུ་དང༌། ཆོས་ཀྱི་ཕུང་པོ་མཐའ་ཡས་པ་ཐམས་ཅད་ཆོས་ཀྱི་སྐུ་དང༌། བདེ་བའི་ཕུང་པོ་མཐའ་ཡས་པ་ཐམས་ཅད་བདེ་བའི་སྐུ་དང༌། ཡེ་ཤེས་ཀྱི་ཕུང་པོ་མཐའ་ཡས་པ་ཐམས་ཅད་ཡེ་ཤེས་ཀྱི་སྐུ་སྟེ་ལྔར་ཡང་གསུངས་པའི་ཕྱིར་དང༌། བྱམས་ཆོས་རྣམས་སུ་སྐུ་བཞི་ཡང་གསུངས་ཤིང༌། སྐུ་གསུམ་ཀྱིས་སངས་རྒྱས་ཀྱི་སྐུ་ཐམས་ཅད་བསྡུས་པར་ཡང་གསུངས་པའི་ཕྱིར་རོ། །སྐུའི་གྲངས་ལ་རྩོད་པ་འདི་ནི་བྱིས་པ་སོ་སོའི་སྐྱེ་བོ་མི་ཤེས་པ་རྣམས་ལ་འབྱུང་བར་གསུངས་ཏེ། བྲམ་ཟེ་ཆེན་པོ་དཔལ་ས་ར་ཧའི་ཞལ་སྔ་ནས། ང་ཡིས་རྩེད་མོ་བྱས་པ་ལ། །བྱིས་པ་རྣམས་ནི་ཧ་ཅང་བཅད། །ཨ་མ་གཞན་ལས་བུ་དེ་སྐྱེ་མི་འགྱུར། །དེ་ཕྱིར་རྣལ་འབྱོར་སྤྱོད་པ་དཔེ་དང་བྲལ། །ཞེས་གསུངས་པའི་དོན། ཆོས་སྐུ་ང་ཡིས་རྩེད་མོས་གཟུགས་སྐུའི་རྣམ་འགྱུར་བྱས་པ་དེ་ལ་བྱིས་པ་སྐུ་གསུམ་དབྱེར་མེད་དུ་མི་ཤེས་པ་རྣམས་ནི་སྐུ་མང་ཉུང་ལ་མ་འཆམ་ཞིང་རྩོད་པས་ཧ་ཅང་བཅད་དོ། །ཨ་མ་གཞན་ཆོས་སྐུ་མ་ཡིན་པ་ལས་བུ་གཟུགས་སྐུ་རྣམ་འགྱུར་འབྱུང་པར་མི་འགྱུར་བ་དེའི་ཕྱིར། རྣལ་འབྱོར་ཆོས་སྐུ་དང༌། དེའི་སྤྱོད་པ་གཟུགས་སྐུ་གཉིས་ཀ་དཔེ་དང་བྲལ་བ་སྟེ་ཆོས་སྐུའི་རྣམ་འགྱུར་ཡིན་པས་དོན་ལ་ཆོས་སྐུ་མ་ཡིན་པའི་གཟུགས་སྐུ་མེད་ཅེས་པའི་དོན་ཏོ། །དེས་ནས་སྐུ་གསུམ་གྱི་དབྱེ་བ་ནི་མདོ་སྡེའི་རྒྱན་ལས། སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ལོངས་སྤྱོད་རྫོགས་པ་དང༌། །གཞན་ནི་སྤྲུལ་པའི་སྐུ་ཡིན་ཏེ། །དང་པོ་གཉིས་པོའི་རྟེན་ཡིན་ནོ། །ཞེས་དང༌། ལོངས་སྤྱོད་རྫོགས་པ་ལ་ཐ་དད་པ་དྲུག་བསྟན་པ་ནི། ལོངས་སྤྱོད་རྫོགས་པ་ཁམས་ཀུན་ཏུ། །འཁོར་ཡོངས་སྡུད་དང་ཞིང་དང་མཚན། །སྐུ་དང་ཆོས་རྫོགས་ལོངས་སྤྱོད་དང༌། མཛད་པ་དག་གིས་ཐ་དད་དོ། །ཞེས་པས་ལོངས་སྐུ་ནི་འཇིག་རྟེན་གྱི་ཁམས་ཐམས་ཅད་ན་འཁོར་གྱི་དཀྱིལ་འཁོར་གྱིས་དང༌། སངས་རྒྱས་ཀྱི་ཞིང་དག་གིས་དང༌། འཚམས་ཀྱིས་དང༌། སྐུས་དང༌། ཆོས་ལ་ལོངས་སྤྱོད་རྫོགས་པ་དང༌། མཛད་པ་དག་གིས་ཐ་དད་པ་དྲུག་གོ །སངས་རྒྱས་སྤྲུལ་པ་དཔག་མེད་པ། །སྤྲུལ་པའི་སྐུར་མི་འདོད་པ་སྟེ། །དོན་གཉིས་ཕན་སུམ་ཚོགས་པ་ནི། །རྣམ་པ་ཐམས་ཅད་གཉིས་ལ་གནས། །ཞེས་པ་ལོངས་སྐུ་ནི་རང་གི་དོན་དང༌། སྤྲུལ་བ་ནི་གཞན་གྱི་དོན་ཏེ། དོན་གཉིས་ཕུན་སུམ་ཚོགས་པ་དེ་ཡང་རང་བཞིན་གྱི་སྐུ་དང་ལོངས་སྐུ་དང་སྤྲུལ་སྐུ་དང་གཉིས་ལ་རིམ་པ་བཞིན་དུ་གནས་སོ། །སྐུ་གསུམ་དག་གིས་སངས་རྒྱས་ཀྱི།། སྐུ་བསྡུས་པར་ནི་ཤེས་བྱ་སྟེ། །སྐུ་གསུམ་དག་གིས་རང་གཞན་གྱི། །དོན་འདི་རྟེན་དང་བཅས་པར་བསྟན། །ཞེས་པ་དེ་ལ་རང་གཞན་གྱི་དོན་ལོངས་སྤྲུལ་འདི་གཉིས་ནི་ཆོས་ཀྱི་སྐུ་ལ་བརྟེན་པའི་ཕྱིར་རོ། །དེ་དག་རྟེན་དང་དགོངས་པ་དང༌། །འཕྲིན་ལས་ཀྱི་ནི་མཉམ་པ་ཉིད། །རང་བཞིན་དང་ནི་རྒྱུན་མི་འཆད། །རྒྱུན་གྱིས་དེ་དག་རྟག་པ་ཉིད། །ཅེས་པ་སངས་རྒྱས་ཐམས་ཅད་ཀྱི་སྐུ་གསུམ་པོ་འདི་གོ་རིམ་ལྟར་རྟེན་ཆོས་དབྱིངས་དང་དགོངས་པ་དང་འཕྲིན་ལས་ཁྱད་པར་མེད་པས་དེའི་སྒོ་ནས་མཉམ་པ་ཉིད་དོ། །ཆོས་སྐུ་རང་བཞིན་གྱི་རྟག་པ་དང༌། ལོངས་སྐུ་རྒྱུན་མི་འཆད་པས་རྟག་པ་དང༌། སྤྲུལ་སྐུ་མི་སྣང་བར་བྱས་ནས་ཡང་དག་ཡང་དུ་སྤྲུལ་པ་ཀུན་ཏུ་སྟོན་པའི་ཕྱིར། རྒྱུན་གྱིས་རྟག་པ་ཉིད་དོ། །སྐུ་བཞིའི་དབྱེ་བ་ནི། །འཇིག་རྟེན་མགོན་པོའི་ཞལ་སྔ་ནས། །རྣམ་པ་ཀུན་གྱི་མཆོག་ལྡན་པའི། །སྐུ་ནི་མོས་པ་སྣ་ཚོགས་ལས། །རང་རང་བསམ་པས་སེམས་ཅན་གྱིས། །མཐོང་བ་སྤྲུལ་པའི་མཚན་ཉིད་དོ། །གང་ཞིག་སེམས་ཅན་ཀུན་གྱི་སྒྲས། །རྫུ་འཕྲུལ་བདག་ཉིད་རབ་གསལ་བྱེད། །སེམས་ཅན་བསམ་པའི་དབང་གིས་འདི། །ལོངས་སྤྱོད་རྫོགས་སྐུའི་མཚན་ཉིད་དོ། །མི་རྟག་པ་མིན་རྟག་པའང་མིན། །གཅིག་མིན་དུ་མའི་མཚན་ཉིད་མིན། །དངོས་མིན་དངོས་པོ་མེད་པ་འང་མིན། འདི་ནི་རྟེན་འབྲེལ་ཆོས་སྐུའོ། །སྟོང་ཉིད་སྙིང་རྗེ་དབྱེར་མེད་ཅིང༌། །ཆགས་དང་ཆགས་བྲལ་རྣམ་པར་སྤངས། ཤེས་རབ་མ་ཡིན་ཐབས་ཀྱང་མིན། །འདི་ནི་ངོ་བོ་ཉིད་སྐུ་གཞན། །ཞེས་པ་དེ་ལ་འོད་གསལ་སྟོང་པ་ཉིད་དང་དམིགས་པ་མེད་པའི་སྙིང་རྗེ་བདེ་བ་ཆེན་པོ་དབྱེར་མེད་ཅིང༌། ཆགས་པ་དཀར་ཕྱོགས་དང༌། ཆགས་བྲལ་ནགས་ཕྱོགས་གཉིས་སྤངས་པའི་ཆ་བཅུ་དྲུག་པ་རྡོ་རྗེ་ཟླ་བ་དྲི་མེད་འོད། དོན་དམ་གྱི་ཐབས་ཤེས་གཅིག་ཏུ་འདྲེས་པ་འདི་ནི་སྐུ་བཞིར་བྱས་པའི་སྒོ་ནས་སྐུ་སྔ་མ་གསུམ་ལས་གཞན་ངོ་བོ་ཉིད་ཀྱི་སྐུའོ། །ཆོས་སྐུ་ནི་མི་རྟག་པ་ལ་སོགས་པ་སྤྲོས་པ་མཐའ་དག་གི་རྟེན་དང་བྲལ་བའི་ཡེ་ཤེས་སོ། །གཟུགས་སྐུ་གཉིས་པོའི་བཤད་པ་འོག་ནས་སྟོན་ནོ།། སྐུ་རྣམས་བདེན་པ་གཉིས་སུ་བསྟན་པ་ནི། ངོ་བོ་ཉིད་ཀྱི་སྐུ་དང་ཆོས་ཀྱི་སྐུ་གཉིས་དོན་དམ་པ་ཆོས་ཉིད་ཀྱི་སྐུ་འབའ་ཞིག་ཡིན་ལ། གཟུགས་སྐུ་གཉིས་ནི་སངས་རྒྱས་རང་ཉིད་ཀྱི་ཆ་ནས་དོན་དམ་པ་ཆོས་ཉིད་ཀྱི་སྐུ་འབའ་ཞིག་ཡིན་ཡང༌། གདུལ་བྱའི་སེམས་ཅན་གྱིས་ཆོས་ཅན་དངོས་པོའི་སྐུར་མཐོང་བའི་ཆ་ནས་ཀུན་རྫོབ་པའི་སྐུ་དང༌། བཏགས་པ་པ་ཡི་སྐུ་དང༌། བརྡའི་སྐུ་ལ་སོགས་པར་གསུངས་སོ། །དེས་ཆོས་ཉིད་ཀྱི་ལོངས་སྐུ་དང༌། སྤྲུལ་སྐུ་དེ་ཉིད་གདུལ་བྱ་དངོས་པོར་འཛིན་པའི་བག་ཆགས་ཤས་ཆེ་བ་རྣམས་ལ་དངོས་པོའི་སྐུ་སྣ་ཚོགས་པར་སྣང་ཡང་དངོས་པོའི་སྐུ་ནི་གདགས་གཞི་དེ་ཉིད་ལ་བརྟགས་པ་ཙམ་དུ་ཟད་ཀྱི། དོན་ལ་ནི་གཟུགས་སྐུའི་རྣམ་པར་སྣང་ཡང་ཆོས་སྐུ་ཉིད་ཡིན་པའི་ཕྱིར་རོ། །དཔེར་ན་བྱང་ཆུབ་སེམས་དཔའ་རྟག་ཏུ་ངུས། ཏིང་ངེ་འཛིན་གྱི་དང་ནས་ཆོས་སྐུའི་སངས་རྒྱས་མང་པོ་གཟིགས་པ་རྣམས་ཏིང་ངེ་འཛིན་ལས་ལངས་པའི་ཚེ་དངོས་པོའི་སྐུར་བཟུང་ནས་བྱང་ཆུབ་སེམས་དཔའ་ཆོས་འཕགས་ལ་དྲིས་པས། དེ་བཞིན་གཤེགས་པ་ཐམས་ཅད་ཆོས་ཉིད་ཀྱི་སྐུ་ཡིན་པར་ངོ་སྤྲད་པ་བཞིན་ནོ། །རྡོ་རྗེ་གཅོད་པའི་མདོར་ཡང༌། གང་དག་ང་ལ་གཟུགས་སུ་ལྟ། །གང་དག་ང་ལ་སྒྲར་ཤེས་པ། །ལོག་པར་སོང་ལ་ཞུགས་པ་སྟེ། །སྐྱེ་བོ་དེ་ཡིས་ང་མི་མཐོང༌། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་བ་རྣམས་ནི་ཆོས་ཉིད་ལྟ། །ཞེས་རང་ཉིད་ཀྱི་ཡིན་ལུགས་དང༌། གདུལ་བྱའི་མཐོང་ལུགས་གཉིས་གསུངས་པ་ལ། རང་ཉིད་ཀྱི་ཡིན་ལུགས་ནི་ཆོས་ཉིད་ཀྱི་སྐུ་དང༌། སེམས་ཅན་གྱི་མཐོང་ལུགས་ཆོས་ཅན་དངོས་པོའི་སྐུར་མཐོང་བ་ནི་བློ་དོན་དང་མི་མཐུན་པས། དོན་གྱི་ངོ་བོ་ལས་བློ་ཕྱིན་ཅི་ལོག་ཏུ་སོང་བ་དེས་བློ་དོན་མཐུན་པའི་ཚུལ་གྱིས་ཡིན་ལུགས་ཆོས་ཉིད་སྐུ་ཡིན་པ་དེ་མི་མཐོང་ངོ༌། །དེས་ན་འདྲེན་པ་རྣམས་ནི་ཆོས་ཉིད་ཀྱི་སྐུར་བལྟ་བར་བྱའོ། །ཞེས་པའི་དོན་ནོ། །དངོས་འཛིན་ཅན་ལ་དངོས་པོར་སྣང་ཆའི་གཟུགས་སྐུ་དེ་ཆོས་ཉིད་ཀྱི་སྐུ་དེ་ཉིད་ཀྱང་མ་ཡིན་ལ། དེ་ཉིད་ལས་གཞན་ཡང་མ་ཡིན་ཞིང༌། དེ་ཉིད་དངོས་པོར་སྣང་བའི་སྒོ་ནས་ཞེན་ཅིང་བཏགས་པའི་ཕྱིར་ཆོས་ཉིད་ཀྱི་སྐུ་དེ་ཉིད་མེད་པར་ཡང་འབྱུང་བ་མ་ཡིན་ནོ། ། དཔེར་ན་རྨི་ལམ་དུ་མཐོང་བའི་དེ་བཞིན་གཤེགས་པ་ལ་རང་ལས་དོན་གཞན་དུ་གྱུར་པའི་སྐུར་གཟུང་ནས་མོས་གུས་བྱེད་པ་བཞིན་ནོ། །ཕྱིན་ཅི་ལོག་པ་དེ་ལྟ་ན་ཡང་དེ་བཞིན་གཤེགས་པ་དངོས་པོའི་སྐུར་མཐོང་བ་ཙམ་ཡང་དགེ་བ་ཚད་མེད་པ། བསགས་པ་ལ་བརྟེན་ནས། གློ་བུར་གྱི་དྲི་མ་ཅུང་ཟད་དག་པས་གདོད་མ་ནས་རང་ལ་རང་ཆས་སུ་ཡོད་པའི་སེམས་ཉིད་གཤིས་ལུགས་ཀྱི་སངས་རྒྱས་ཡིན་པ་དེ་ཕྱི་རོལ་ན་བཞུགས་པའི་སངས་རྒྱས་ལྟ་བུར་ཤར་བ་ཡིན་ནོ། །དེ་ཉིད་རང་གི་དོན་དམ་གྱི་སེམས་སྣང་བ་ཡིན་པར་མི་ཤེས་ཀྱང་རེ་ཞིག་ཕྱི་རོལ་ན་ཡོད་པ་ལྟ་བུར་སྣང་བ་ལ་བརྟེན་ནས། རིམ་གྱིས་འཕགས་པའི་ལམ་ཐོབ་པ་དང་ནང་གི་ཆོས་སྐུ་ཉིད་དུ་མཐོང་བར་འགྱུར་རོ། ། བྱམས་པ་མགོན་པོའི་ཞལ་སྔ་ནས། རྒྱུད་བླ་མར། དེ་བཞིན་དད་སོགས་དྲི་མེད་ཅན། །རང་སེམས་དད་སོགས་བསྒོམས་པ་ལ། །སྣང་བ་རྫོགས་པའི་སངས་རྒྱས་ནི། །མཚན་དང་དབྱེ་བྱད་དང་ལྡན་དང༌། །ཆགས་པ་དང་ནི་བཞེངས་པ་དང༌། །བཞུགས་པ་དང་ནི་གཟིམས་པ་དང༌། །སྤྱོད་ལམ་སྣ་ཚོགས་མཛད་པ་ཅན། །ཞི་བའི་ཆོས་ནི་གསུངས་པ་དང༌། །མི་གསུང་མཉམ་པར་བཞགས་པ་དང༌། །ཆོ་འཕྲུལ་རྣམ་པ་སྣ་ཚོགས་དག། མཛད་པ་གཟིམས་མདངས་ཆེན་པོ་ཅན། །སེམས་ཅན་རྣམས་ཀྱིས་མཐོང་བར་འགྱུར། །དེ་མཐོང་ནས་ཀྱང་འདོད་ལྡན་པ། །སངས་རྒྱས་ཉིད་ཕྱིར་རབ་སྦྱོར་ཏེ། །དེ་རྒྱུ་ཡང་དག་བླངས་ནས་ནི། །འདོད་པའི་གོ་འཕང་ཐོབ་པར་བྱེད། །སྣང་བ་དེ་ནི་ཤིན་ཏུ་ཡང༌། །རྟོག་མེད་གཡོ་བ་མེད་པ་ཉིད། །དེ་ལྟ་ན་ཡང་འཇིག་རྟེན་ན། །དོན་ཆེན་པོས་ནི་ཉེ་བར་གནས། །འདི་ནི་རང་སེམས་སྣང་བ་ཞེས། །སོ་སོའི་སྐྱེ་བོས་མི་ཤེས་མོད། །དེ་ལྟ་ན་ཡང་གཟུགས་མཐོང་སྟེ། །དེ་དག་ལ་ནི་དོན་ཡོད་འགྱུར། །རིམ་གྱིས་དེ་མཐོང་ལ་བརྟེན་ནས། །ཐེག་པ་འདི་ལ་གནས་པ་རྣམས། །ནང་གི་དམ་པའི་ཆོས་སྐུ་ནི། །ཤེས་རབ་མིག་གིས་མཐོང་བར་འགྱུར། །ཞེས་པའི་དོན་ཏོ། ། རང་སེམས་ཀྱི་སངས་རྒྱས་ཆོས་དེ་ལ་སྐྱེ་འགག་མེད་ཀྱང་བསོད་ནམས་དང་སྡིག་པའི་དབང་གིས་གཟུགས་སྐུ་གཉིས་འཁྲུངས་པ་དང༌། འདས་པ་ལྟ་བུར་སྐྱེ་འགག་ཏུ་སྣང་བ་ཡང༌། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །འགྲོ་བར་གཟུགས་བརྙན་འཆར་ནུབ་རྙོག་མེད་དང༌། །རྙོག་པའི་རང་སེམས་རབ་འཇུག་དབང་གིས་འཇུག །ཇི་ལྟར་འཇིག་རྟེན་དག་ན་གཟུགས་སྣང་ལྟར། །དེ་བཞིན་ཡོད་དང་ཞིག་ཅེས་དེ་མི་བལྟ། །ཞེས་དང༌། དགེ་བ་བཻཌཱུརྱ་འདྲ་ཡིས། །སེམས་ལ་སངས་རྒྱས་མཐོང་བའི་རྒྱུ། །དེ་དག་ལ་ནི་མི་བཟློག་པའི། །དད་པའི་དབང་པོ་རྒྱས་པ་ཉིད། །དགེ་བ་སྐྱེད་དང་འཇིག་པས་ན། །སངས་རྒྱས་གཟུགས་ནི་སྐྱེ་དང་འཇིག ། བརྒྱ་བྱིན་བཞིན་དུ་ཐུབ་པ་ནི། །ཆོས་ཀྱི་སྐུ་ཡིས་སྐྱེ་འཇིགས་མེད། །དེ་བཞིན་དུ་ནི་འབད་མེད་པར།། སྐྱེ་མེད་འགག་མེད་ཆོས་སྐུ་ལས། །སྲིད་པ་ཇི་སྲིད་གནས་པར་དུ། །སྟོན་པ་ལ་སོགས་མཛད་པ་འཇུག །ཅེས་གསུངས་སོ། །འཇིག་རྟེན་མགོན་པོའི་ཞལ་སྔ་ནས་ཀྱང༌། སེམས་ཅན་རྣམས་ཀྱི་སྐྱེ་བ་གཞན་གྱི་བག་ཆགས་ཀྱི་སྟོབས་ཀྱིས་རྨི་ལམ་དུ་མ་སྐྱེས་པའི་ལུས་བཞིན་དུ། བཅོམ་ལྡན་འདས་ཀྱི་སྐུའི་སྣང་བ་དང༌། གསུང་གི་སྣང་བར་འགྱུར་རོ། །ཇི་ལྟར་རྨི་ལམ་དུ་སློབ་མ་རྣམས་ཀྱིས་མཁན་པོ་མཐོང་ནས་ཐེ་ཙོམ་གྱི་དོན་འདྲི་བར་བྱེད་ཅིང༌། མཁན་པོས་ཀྱང་སློབ་མ་རྣམས་ཀྱི་ཐེ་ཙོམ་གྱི་དོན་ཐེ་ཙོམ་མེད་པར་བྱེད་ཀྱང༌། དེ་ན་མཁན་པོ་མེད་ཏོ། །སློབ་མ་རྣམས་ཀྱི་སེམས་ཀྱི་བག་ཆགས་ཀྱི་སྣང་བའོ། །དེ་བཞིན་དུ། སེམས་ཅན་བསོད་ནམས་དང་ལྡན་པ་རྣམས་ཀྱི་རང་གི་སེམས་ཀྱི་སྣང་བ་སྟེ། བཅོམ་ལྡན་འདས་ནི་སྐྱེས་པ་མ་ཡིན་ཞིང་འགགས་པ་མ་ཡིན་ནོ། །ཞེས་གསུངས་པའི་དོན་ཏོ།། དེས་ན་ཆོས་ཀྱི་སྐུ་ཉིད་གཟུགས་སྐུའི་རྣམ་པར་ཤར་བ་ལ་སེམས་ཅན་གྱིས་དངོས་པོའི་སྐུར་མཐོང་བའི་ཆ་དེ་ཉིད་སྐུ་བཏགས་པ་བ་དང་ཀུན་རྫོབ་པ་དང༌། བརྡའི་སྐུ་ཡིན་ནོ། །རྣམ་བ་ཀུན་གྱི་མཆོག་ལྡན་པའི། །སྐུ་ནི་མོས་པ་སྣ་ཚོགས་ལས། །རང་རང་བསམ་པས་སེམས་ཅན་གྱིས། །མཐོང་བ་སྤྲུལ་བའི་མཚན་ཉིད་དོ། །གང་ཞིག་སེམས་ཅན་ཀུན་གྱི་སྒྲས། །རྫུ་འཕྲུལ་བདག་ཉིད་རབ་གསལ་བྱེད། །སེམས་ཅན་བསམ་པའི་དབང་གིས་འདི། །ལོངས་སྤྱོད་རྫོགས་སྐུའི་མཚན་ཉིད་དོ། །ཞེས་སྔར་དྲངས་པ་འདིས་ཀྱང་རང་ཉིད་ཀྱི་ཡིན་ལུགས་རེ་དང་སེམས་ཅན་གྱི་མཐོང་ལུགས་རེ་སྟེ། གཞི་གཅིག་གི་སྟེང་དུ་བདེན་པ་གཉིས་ཀའི་སྐུ་སྟོན་ཏོ། །དེ་ལ་ཆོས་ཉིད་དོན་དམ་གྱི་སྐུ་རྣམ་པ་ཀུན་གྱི་མཆོག་དང་ལྡན་པ་ནི་་ཡིན་ལུགས་དང༌། མོས་པའི་བག་ཆགས་ཀྱི་དགེ་བ་མི་འདྲ་བ་སྣ་ཚོགས་ལས་རང་རང་སྔར་ཇི་ལྟར་གོམས་པའི་བསམ་པས་སེམས་ཅན་རྣམས་ཀྱིས་དངོས་པོ་མི་འདྲ་བ་སྣ་ཚོགས་ཀྱི་སྐུར་མཐོང་བ་ནི་སྤྲུལ་པའི་སྐུ་ཀུན་རྫོབ་པ་ཡིན་ནོ། ། དོན་དམ་ཆོས་ཉིད་ཀྱི་སྒྲ་གང་ཞིག་སེམས་ཅན་ཀུན་གྱི་སྒྲའི་རྣམ་པ་ཚང་བའི་ལོངས་སྐུས་གསུང་རྗེས་སུ་བསྟན་པའི་རྫུ་འཕྲུལ་གྱི་ཆོ་འཕྲུལ་རབ་ཏུ་གསལ་བར་བྱེད་པ་ནི་ཡིན་ལུགས་དང༌། སེམས་ཅན་གྱི་བསམ་པ་དགེ་བའི་བག་ཆགས་མི་འདྲ་བའི། དབང་གིས་དངོས་པོ་སྣ་ཚོགས་ཀྱི་སྐུར་མཐོང་བ་འདི་ལོངས་སྐུ་བཏགས་པ་བ་ཡིན་ནོ། །གཟུགས་སྐུ་གཉིས་སྟོན་པའི་སྐབས་སུ། རྒྱུད་བླ་མར། ཇི་ལྟར་ཚོན་ནི་སྣ་ཚོགས་ཀྱིས། ། ནོར་བུ་དེ་དངོས་མིན་པར་སྣང༌། །དེ་བཞིན་འགྲོ་རྐྱེན་སྣ་ཚོགས་པས། །ཁྱབ་བདག་དེ་དངོས་མིན་པར་སྣང༌། །ཞེས་པའི་དོན་ཏོ། །གསེར་འོད་དམ་པ་ལས། གཟུགས་སྐུ་གཉིས་སངས་རྒྱས་ཀྱི་སྐུར་བཏགས་པ་བར་གསུངས་པ་དང༌། ལང་གར་གཤེགས་པར། ཆོས་ཀྱི་སངས་རྒྱས་སངས་རྒྱས་ཡིན། ། ལྷག་མ་དེ་ཡི་སྤྲུལ་པའོ། །ཞེས་དང༌། རྒྱུད་བླར་གཟུགས་སྐུ་གཉིས་བརྡའི་སྐུར་གསུངས་པ་དང༌། དབུ་མ་རྩ་ཤེར། དེ་བཞིན་གཤེགས་པ་བརྟག་པ་དང༌། མྱ་ངན་ལས་འདས་པ་བཏགས་པའི་རབ་ཏུ་བྱེད་པས་སངས་རྒྱས་ཀྱི་དངོས་པོ་བཀག་པ་རྣམས་སེམས་ཅན་རྣམས་ཀྱི་མཐོང་བའི་བཏགས་ཆ་རེ་ཡིན་པར་ཤེས་པར་བྱའོ། །དེ་ལྟར་མ་ཡིན་ན་གསུང་རབ་མང་པོར་ནང་འགལ་དུ་འགྱུར་བའི་ཕྱིར་རོ། །མགོན་པོ་སྦྱན་རས་གཟིགས་ཀྱི་ཞལ་སྔ་ནས། སྐྱེ་བ་དང་འགག་པའི་ཆོས་ཅན་གྱི། རྡོ་རྗེ་སེམས་དཔའ་ལ་སྟོབས་བཅུ་དང་མི་འཇིགས་པ་བཞི་ལ་སོགས་པའི་ཡོན་ཏན་རྣམས་མི་སྲིད་དོ། ། ཞེས་དང༌། བཅོམ་ལྡན་འདས་གཟུགས་ཅན་དུ་འདོད་པ་དེ་ལྟར་ན། སངས་རྒྱས་པ་རྣམས་དང་མུ་སྟེགས་པ་རྣམས་ཀྱི་མཁས་པ་རྣམས་ལ་ཡང་ཤེས་རབ་དམན་པ་ཉིད་ཀྱི་ཕྱིར་བྱེ་བྲག་མེད་དོ། །ཞེས་གསུངས་སོ། །དེས་ན། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །བདག་ཉིད་ཀྱི་ནི་འབྱོར་པའི་གནས། །དམ་པའི་དོན་གྱི་སྐུ་ཡིན་ཏེ། །དྲང་སྲོང་རྣམས་ཀྱི་བརྡའ་ཡི་སྐུ། །ཕ་རོལ་ཕུན་སུམ་ཚོགས་པ་གནས། །དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་པ་རྣམས་ཀྱང་དེ་ལྟར་གོ་དགོས་སོ། །སེམས་ཅན་གྱི་མཐོང་ལུགས་ཙམ་མ་གཏོགས་པ། །སངས་རྒྱས་ལ་ནི་དངོས་པོའི་སྐུ་རྡུལ་ཕྲ་རབ་ཙམ་ཡང་མེད་དོ། །གནས་ཡོངས་སུ་གྱུར་པ་ཐམས་ཅད་དེ་བཞིན་ཉིད་ཙམ་ཟད་པའི་ཕྱིར་རོ། །ཆོས་དང་ཆོས་ཉིད་རྣམ་པར་འབྱེད་པ་ལས། དེ་བཞིན་ཉིད་དྲི་མ་མེད་པར་གྱུར་པ་ན། ཐམས་ཅད་དེ་བཞིན་ཉིད་ཙམ་དུ་སྣང་བའི་དེ་ཡང་གནས་གྱུར་པ་གྲུབ་པ་ཡིན་ནོ། ། ཞེས་གསུངས་པའི་དོན་ཏོ། །སངས་རྒྱས་ཀྱི་སར་སྐུ་ཐམས་ཅད་ཆོས་ཉིད་དུ་གཅིག་ཀྱང༌། དོན་དམ་གྱི་སྐུ་བྲལ་བའི་ཡོན་ཏན་དང་ལྡན་པ་རང་དོན་དང༌། ཀུན་རྫོབ་ཀྱི་སྐུ་རྣམས་སྨིན་གྱི་ཡོན་ཏན་དང་ལྡན་པ་གཞན་དུ་འཇོག་པའི་ཁྱད་པར་ནི། སེམས་ཅན་ལ་སྣང་དུ་རུང་བ་དང་མི་རུང་བ་ལས་ཡིན་ཏེ། ཆོས་ཉིད་ཀྱི་སྐུ་སྟོབས་སོགས་དང་ལྡན་པར་མི་སྣང་ཞིང༌། ཆོས་ཅན་གྱི་སྐུ་མཚན་བཟང་དང་ལྡན་་པ་དངོས་པོའི་རྣམ་པར་སྣང་བའི་ཕྱིར་རོ། །དོན་གྱི་ཡིན་ལུགས་ནི། སངས་རྒྱས་གང་ཡིན་སྐུ་གསུམ་གའི་བདག་ཉིད་དང༌། སངས་རྒྱས་ཀྱི་སྐུ་གང་ཡིན་སྟོབས་སོགས་དང་ལྡན་དགོས་ཏེ། སྐུ་གསུམ་དག་གིས་བྱང་ཆུབ་ཆེ། །རྣམ་པ་ཀུན་མཁྱེན་ཐམས་ཅད་དུ། །སེམས་ཅན་་ཀུན་གྱི་ཐེ་ཚོམ་དག །གཅོད་པ་ཁྱོད་ལ་ཕྱག་འཚལ་ལོ། །ཞེས་པས་སོ། །དེ་ལྟ་བས་ན་སྐུ་དང་ཡེ་ཤེས་ཀྱི་རོལ་བ་ཡང་བསམ་གྱིས་མི་ཁྱབ་བ། སེམས་ཅན་གྱི་བག་ཆགས་ཀྱི་སྣང་བ་ཡང་བསམ་གྱིས་མི་ཁྱབ་བོ། ། ཡེ་ཤེས་ཀྱང་སྔགས་ཀྱི་ཐེག་པར་ལྔ་དང༌། མཚན་ཉིད་ཀྱི་ཐེག་པར་བཞིར་གསུངས་ཏེ། མདོ་སྡེའི་རྒྱན་དུ། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་རྟེན། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་སངས་རྒྱས་ཀྱི་ཡེ་ཤེས་བཞི་བསྟན་པ་དེ་ལ་མེ་ལོང་ལྟ་བུའི་ཡེ་ཤེས་ནི་ཆོས་ཀྱི་ངོ་བོས་མི་གཡོ་བ་དང༌། ཡེ་ཤེས་གསུམ་ནི་དེ་ལ་བརྟེན་པ་དང༌། རྣམ་འགྱུར་སྣ་ཚོགས་པའི་སྒོ་ནས་གཡོ་བའོ། མེ་ལོང་ལྟ་བུའི་ཡེ་ཤེས་ནི་རྟག་ཏུ་ངལ་བ་མེད་པ་དང༌། ཡུལ་གྱི་སྒོ་ནས་ཡོངས་སུ་མ་ཆད་པ་དང༌། དུས་ཀྱི་སྒོ་ནས་རྟག་དུ་ལྡན་པ་དང༌། རྟག་ཏུ་སྒྲིབ་པ་དང་བྲལ་བས་ཤེས་བྱ་ཀུན་ལ་མ་རྨོངས་པ་དང༌། རྣམ་པའི་དངོས་པོ་མེད་པའི་ཕྱིར། ཤེས་བྱ་དེ་དག་ལ་མངོན་དུ་ཕྱོགས་པ་མ་ཡིན་པ་སྟེ། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་དང༌། །རྟག་ཏུ་དེ་ལ་མངོན་ཕྱོགས་མིན། །ཞེས་སོ། །ཡེ་ཤེས་གསུམ་པོ་རྣམ་པ་ཐམས་ཅད་ཀྱི་རྒྱུ་ཡིན་པའི་ཕྱིར་ཡེ་ཤེས་ཐམས་ཅད་ཀྱི་འབྱུང་གནས་ཆེན་པོ་འདྲ་བ་དང༌། དེ་ནི་ལོངས་སྤྱོད་རྫོགས་པའི་སངས་རྒྱས་ཐམས་ཅད་ཀྱང་ཡིན་ལ། ཡེ་ཤེས་ཀྱི་གཟུགས་བརྙན་འབྱུང་བའི་ཕྱིར།། མེ་ལོང་ལྟ་བུའི་ཡེ་ཤེས་ཏེ། །ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་ཕྱིར་ཏེ། །ཞེས་སོ། །བྱང་ཆུབ་སེམས་དཔའ་མངོན་པར་རྟོགས་པའི་དུས་ན་སེམས་ཅན་རྣམས་ལ་མཉམ་པ་ཉིད་ཀྱི་ཤེས་པ་ཐོབ་པ་དེ་བསྒོམ་པ་དག་པས་བྱང་ཆུབ་ཐོབ་པའི་ཚེ་མི་གནས་པའི་མྱ་ངན་ལས་འདས་པར་ཞུགས་པ་ནི་མཉམ་པ་ཉིད་ཀྱི་ཡེ་ཤེས་ཏེ། སྒོམ་པ་དག་པས་སེམས་ཅན་ལ། མཉམ་པ་ཉིད་ཀྱི་ཡེ་ཤེས་འདོད། མི་གནས་ཞི་བར་ཞུགས་པ་ནི། མཉམ་ཉིད་ཡེ་ཤེས་ཡིན་པར་འདོད། ཅེས་སོ། ། མཉམ་ཉིད་ཡེ་ཤེས་དེ་ཉིད་དུས་ཐམས་ཅད་དུ་བྱམས་པ་ཆེན་པོ་དང༌། སྙིང་རྗེ་ཆེན་པོ་དང་ལྡན་ཞིང་སེམས་ཅན་རྣམས་ལ་སྐུའི་ཁ་ཏོག་སྔོན་པོ་ལ་སོགས་པ་མོས་པ་ཇི་ལྟ་བ་བཞིན་དུ་སངས་རྒྱས་ཀྱི་སྐུ་སྟོན་པར་མཛད་དེ། དུས་རྣམས་ཀུན་ཏུ་བྱམས་པ་དང༌། །ཐུགས་རྗེ་ཆེན་པོ་དག་དང་ལྡན། །སེམས་ཅན་རྣམས་ལ་མོས་པ་བཞིན། །སངས་རྒྱས་ཀུན་གྱི་ངེས་པར་སྟོན། །ཞེས་སོ། །སོ་སོར་རྟོགས་པའི་ཡེ་ཤེས་ནི། །ཤེས་བྱ་ཀུན་ལ་རྟགས་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །འཁོར་གྱི་དཀྱིལ་འཁོར་རྣམས་སུ་ནི། །འབྱོར་བ་ཐམས་ཅད་སྟོན་མཛད་པ། །ཐེ་ཚོམ་ཐམས་ཅད་གཅོད་པ་ཡི། །ཆོས་ཆེན་ཆར་ནི་རབ་ཏུ་འབེབས། །ཞེས་པ་གོ་སླའོ། །བྱ་བ་གྲུབ་པའི་ཡེ་ཤེས་ནི། །འཇིག་རྟེན་གྱི་ཁམས་ཐམས་ཅད་དུ་སྤྲུལ་པ་སྣ་ཚོགས་ཤིང་དཔག་ཏུ་མེད་པ་བསམ་གྱིས་མི་ཁྱབ་པས་སེམས་ཅན་ཐམས་ཅད་ཀྱི་དོན་མཛད་པ་པོ་སྟེ། བྱ་བ་གྲུབ་པའི་ཡེ་ཤེས་ནི། །ཁམས་གསུམ་ཀུན་ཏུ་སྣ་ཚོགས་ཤིང༌། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་དོན་བསྒྲུབས་པ་པོ། །ཞེས་སོགས། སངས་རྒྱས་ཀྱི་སྤྲུལ་པ་དེ་ནི་རྟག་ཏུ་མཛད་པའི་བྱེ་བྲག་དང་གྲངས་དང་ཞིང་གི་སྒོ་ནས་རྣམ་པ་ཐམས་ཅད་དུ་བསམ་གྱིས་མི་ཁྱབ་སྟེ། སངས་རྒྱས་སྤྲུལ་པ་དེ་རྟག་ཏུ། །མཛད་པ་གྲུབ་པའི་བྱེ་བྲག་དང༌། །གྲངས་དང་ཞིང་གིས་རྣམ་ཀུན་ཏུ། །བསམ་མི་ཁྱབ་པར་ཤེས་པར་བྱ། །ཞེས་སོ། །དེས་ན་ཐོས་པའི་ཆོས་རྣམས་འཛིན་པ་དང༌། སེམས་ཅན་ཐམས་ཅད་ལ་བདག་གཞན་མཉམ་པ་ཉིད་ཀྱི་སེམས་མཉམ་པ་དང༌། ཡང་དག་པའི་ཆོས་རབ་ཏུ་སྟོན་པ་དང༌། སེམས་ཅན་ཐམས་ཅད་ཀྱི་བྱ་བ་བསྒྲུབ་པའི་ཕྱིར་ཡེ་ཤེས་བཞི་པོ་ཡང་དག་པར་འབྱུང་སྟེ། འཛིན་པའི་ཕྱིར་དང་སེམས་མཉམ་ཕྱིར༌། །ཡང་དག་པའི་ཆོས་རབ་ཏུ་སྟོན་ཕྱིར་དང༌། བྱ་བ་བསྒྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང༌། །ཞེས་སོ། །འདི་རྣམས་ཀྱང་ཡིན་ལུགས་ལ་ཆོས་ཀྱི་དབྱིངས་ཀྱི་ཡེ་ཤེས་ཡིན་སངས་རྒྱས་དང་སེམས་ཅན་ལ་ལྟོས་ནས་བདེན་པ་གཉིས་ཀྱི་བྱེ་བྲག་ཀྱང་ཤེས་པར་བྱའོ། །གང་གི་ཕྱིར་ངོ་བོ་ཉིད་ཀྱི་སྐུ་འདི་ཉིད་སྐུ་གསུམ་ཡེ་ཤེས་བཞིའི་བདག་ཉིད་དང༌། སྐུ་བཞི་ཡེ་ཤེས་ལྔ་ཡི་བདག་ཉིད་དང༌། སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་་དཔག་མེད་འགྱེད་པ་པོ་ཡིན་པ་དེའི་ཕྱིར། གཞུང་གི་དོན་ལ་འཇུག་པ་ནི། ཐུབ་པའི་ངོ་བོ་ཉིད་སྐུ་ནི། ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་པ་ཐུབ་པ་ཡང་ཡིན་ལ། །ངོ་བོ་ཉིད་ཀྱི་སྐུ་ཡང་ཡིན་པས་ན། །ཐུབ་པའི་ངོ་བོ་ཉིད་སྐུ་གང་ཡིན་པ་དེ་ནི་་ཟག་པ་མེད་པའི་བྱང་ཆུབ་ཕྱོགས་མཐུན་ལ་སོགས་པ་མཐར་ཐུག་པའི་ཆོས་གང་དག་ཐོབ་པར་གྱུར་པའི་ངོ་བོ། །སྒྲིབ་གཉིས་བག་ཆགས་དང་བཅས་པ་སྤངས་པས། རྣམ་པ་ཀུན་ཏུ་རྣམ་པར་དག་པ་དེ་དག་བཅོས་མ་གློ་བུར་བ་མ་ཡིན་གྱི། རང་བཞིན་པའི་སྐུ་གཉུག་མའི་མཚན་ཉིད་ཅན་ཡིན་ནོ། །ཟག་པ་མེད་པའི་ཆོས་དེ་དག་གང་དང་གང་ཡིན་པར་བརྗོད་ཅེ་ན། བྱང་ཆུབ་ཕྱོགས་མཐུན་ཚད་མེད་དང༌། །རྣམ་པར་ཐར་དང་མཐར་གྱིས་ནི། །སྙོམས་འཇུག་དགུ་ཡི་བདག་ཉིད་དང༌། །ཟད་པར་བཅུ་ཡི་བདག་ཉིད་དང༌། །ཟིལ་གྱི་གནོན་པའི་སྐྱེ་མཆེད་ནི། །རབ་ཏུ་དབྱེ་བས་རྣམ་བརྒྱད་དང༌། །ཉོན་མོངས་མེད་དང་སྨོན་མཁྱེན་དང༌། །མངོན་ཤེས་སོ་སོ་ཡང་དག་རིག། རྣམ་པ་ཐམས་ཅད་དག་བཞི་དང༌། །དབང་བཅུ་དང་ནི་སྟོབས་བཅུ་དང༌། །མི་འཇིགས་པ་ནི་བཞི་དག་དང༌། །བསྲུང་བ་མེད་པ་རྣམ་གསུམ་དང༌། །དྲན་པ་ཉེར་བཞག་རྣམ་གསུམ་དང༌། ། བསྙེལ་བ་མི་མངའི་ཆོས་ཉིད་དང༌། །བག་ཆགས་ཡང་དག་བཅོམ་པ་དང༌། །སྐྱེས་ལ་ཐུགས་རྗེ་ཆེན་པོ་དང༌། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་དང༌། །རྣམ་པ་ཐམས་ཅད་མཁྱེན་ཉིད་དང༌། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་པ་དེ་ལ་འབྲས་བུ་ཆོས་ཀྱི་སྐུ་བསྡུས་པའི་དྲན་པ་ཉེར་བཞག་ལ་སོགས་པ་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་ཏེ། འདི་རྣམས་ལམ་གྱི་གནས་སྐབས་སུ་ཇི་ལྟར་ཉམས་སུ་ལེན་པའི་ཚུལ་ནི་སྔར་ཚོགས་སྒྲུབ་ཀྱི་སྐབས་སུ་བསྟན་ཟིན་ཏོ། །དེ་བཞིན་དུ་ཚད་མེད་དང༌། རྣམ་ཐར་དང༌། སྙོམ་འཇུག་དང༌། མངོན་ཤེས་དང༌། སོ་སོ་ཡང་དག་པར་རིག་པ་བཞི་དང༌། སྟོབས་བཅུ་དང༌། མི་འཇིགས་པ་བཞི་དང༌། མ་འདྲེས་པ་བཅོ་བརྒྱད་ལམ་གྱིས་བསྡུས་པ་རྣམས་ཀྱི་དོན་ཡང་སྔར་བསྟན་ཟིན་ཏོ། ། འདིར་ནི་འབྲས་བུ་སངས་རྒྱས་ཀྱི་སས་བསྡུས་པ་ཟག་མེད་ཀྱི་དབྱིངས་འབའ་ཞིག་ཏུ་གོ་བར་བྱའོ། །འདིར་སེམས་ཅན་ཐམས་ཅད་ལ་བརྩེ་པའི་བྱམས་སོགས་ནི་དགོངས་པ་ཉིད་དེ། བྱམས་པ་བདེ་བ་དང་ཕྲད་པར་དང༌། སྙིང་རྗེ་སྡུག་བསྔལ་དང་བྲལ་བར་དང༌། དགའ་བ་བདེ་དང་མི་འབྲལ་བར་དང༌། བཏང་སྙོམས་ཕན་པར་དགོངས་པ་ཉིད་དེ། སེམས་ཅན་རྣམས་ལ་བརྩེ་བ་ཅན། །ཕྲད་དང་བྲལ་བའི་དགོངས་པ་ཅན། །མི་འབྲལ་པ་ཡི་དགོངས་པ་ཅན། །ཕན་བདེ་དགོངས་ཁྱོད་ལ་ཕྱག་འཚལ། ། ཞེས་སོ། །འདིར་རྣམ་ཐར་ཟིལ་གནོན་ཟད་པར་གྱི་ཁྱད་པར་ནི། སྒྲུབ་པ་ཐམས་ཅད་ལས་ངེས་པར་གྲོལ་བ། རྣམ་པར་ཐར་པ་དང༌། ཉིད་ཀྱི་ཐུགས་ལ་མངའ་བསྒྱུར་བས་ཇི་ལྟར་བཞེད་པ་བཞིན་དུ་བྱིན་གྱིས་རློབ་པ་འཇིག་རྟེན་ཐམས་ཅད་ཟིལ་གྱིས་གནོན་པ་དང༌། ཤེས་བྱ་ཐམས་ཅད་ལ་ཡེ་ཤེས་ཀྱིས་ཁྱབ་པ་ཟད་པར་གྱི་སྐྱེ་མཆེད་དེ། ཐུབ་པའི་སྒྲིབ་ཀུན་ངེས་པར་གྲོལ། འཇིག་རྟེན་ཐམས་ཅད་ཟིལ་གྱིས་གནོན། །ཁྱོད་ཀྱི་མཁྱེན་པས་ཤེས་བྱ་ཁྱབ། །ཐུགས་གྲོལ་ཁྱོད་ལ་ཕྱག་འཚལ་ལོ། །ཞེས་སོ། །ཟད་པར་གྱིས་དབྱེ་བ་བཅུ་ནི། མཐའ་དག་ས་དང༌། ཆུ་དང༌། མེ་དང༌། རླུང་དང༌། སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་དང༌། རྣམ་པར་ཤེས་པ་དང༌། ནམ་མཁའ་སྟེ། ལམ་དུས་སུ་ཡང་བསམ་གཏན་པ་སེམས་ལ་དབང་ཐོབ་པས་ཟད་པར་འདི་དག་ཇི་ལྟར་མོས་པ་བཞིན་དུ་འཆར་བ་ནི། སྲོག་གཟུགས་གྲུབ་པའི་མཐུ་ལས་སོ། །ཟིལ་གྱིས་ནོན་པའི་སྐྱེ་མཆེད་ཀྱི་དབྱེ་བ་བརྒྱད་ནི། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཕྲ་མོ་ཁ་དོག་སྡུག་མི་སྡུག་མཐོང་ཡང་ཟིལ་གྱིས་མནན་ཏེ་ཤེས་ཤིང་མཐོང་བ་དང༌། དེ་བཞིན་ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་རགས་པ་དང་ཁ་དོག་སྡུག་མི་སྡུག་མཐོང་ཡང་ཟིལ་གྱིས་མནན་ནས་ཤེས་ཤིང་མཐོང་བ་སྟེ་གཉིས་དང༌། ནང་གཟུགས་མེད་པར་དུ་འདུ་ཤེས་ཤིང་ཕྱི་རོལ་གྱི་གཟུགས་ཕྲ་བ་དང་རགས་པ་གཉིས་སྔ་མ་བཞིན་ཤེས་ཤིང་མཐོང་བ་སྟེ་བཞི་དང༌། དེ་བཞིན་དུ་ནང་གཟུགས་མེད་པར་འདུ་ཤེས་ཤིང་ཕྱི་རོལ་གྱི་གཟུགས་སྔོན་པོ་དང༌། སེར་པོ་དང༌། དམར་པོ་དང༌། དཀར་པོ་མཐོང་ཡང་དེ་དག་ཟིལ་གྱི་མནན་ཏེ་ཤེས་ཤིང་མཐོང་བ་སྟེ་དེ་ལྟར་བརྒྱད་དོ། །སྔོན་པོ་དང༌། ཁ་དོག་སྔོན་པོ་དང༌། སྔོན་པོར་སྣང་བ་དང༌། མདོག་སྔོན་པོ་བཞིའི་ཁྱད་པར་སྔ་མ་གཉིས་རང་བཞིན་དང༌། ཕྱི་མ་གཉིས་བཅོས་མ་སྟེ། རང་བཞིན་པའི་དཔེ་མེ་ཏོག་ལ་སོགས་པ་རེ་རེ་དང༌། བཅོས་མའི་དཔེ་སྔོན་པོ་ལ་སོགས་པའི་གོས་རེ་རེ་བྱུང་བས་སོ། །འདིར་མངོན་ཤེས་དྲུག་གིས་གདམས་ངག་འདོམས་པ་ནི། རྫུ་འཕྲུལ་གྱི་མངོན་ཤེས་ཀྱིས་གདུལ་བྱའི་སར་གཤེགས་ནས། གཞན་གྱི་སེམས་ཀྱི་རྣམ་གྲངས་ཤེས་པས་སེམས་ཀྱི་སྤྱོད་པ་མཁྱེན་པར་མཛད་དེ། ལྷའི་རྣ་བས་དེ་དག་གི་སྐད་ཤེས་པ་དང༌། སྔོན་གྱི་གནས་རྗེས་སུ་དྲན་པས་སྔོན་གྱི་གནས་ནས་འདིར་འོངས་པ་དང༌། ལྷའི་མིག་གིས་ཕྱི་མའི་མཐར་འགྲོ་བ་དང༌། ཟག་ཟད་ཀྱིས་འཁོར་བ་ལས་ངེས་པར་ཇི་ལྟར་མཁྱེན་པ་དེ་བཞིན་དུ་ལེགས་པར་འདོམས་ཏེ། ཤེས་ནས་སྤྱོད་པ་མཁྱེན་མཛད་དེ། །དེ་དག་སྐད་ཀྱིས་སེམས་ཅན་གྱི། །འོད་དང་འགྲོ་དང་ངེས་འབྱུང་ལ། །ལེགས་འདོམས་ཁྱོད་ལ་ཕྱག་འཚལ་ལོ། །ཞེས་སོ། །འདིར་གང་ལ་ཡང་བློ་གྲོས་རྟག་ཏུ་ཐོགས་པ་མི་མངའ་བས་སོ་སོ་ཡང་དག་པར་རིག་པ་བཞིས་རྟེན་ཆོས་དང༌། དེ་ལ་རྟེན་པ་དོན་གཉིས་བཤད་བྱ་དང༌། གསུང་དང་མཁྱེན་པ་གཉིས་འཆད་བྱེད་ཡིན་པ་ལ་དེ་དག་ལེགས་པར་སྟོན་ཏེ། རྟེན་དང་རྟེན་པ་བཤད་བྱ་དང༌། །གསུང་དང་མཁྱེན་པ་འཆད་བྱེད་ལ། །བློ་གྲོས་རྟག་ཐོགས་མི་མངའ་བ། །ལེགས་སྟོན་ཁྱོད་ལ་ཕྱག་འཚལ་ལོ། །ཞེས་སོ། །རྣམ་པ་ཐམས་ཅད་དུ་ཡོངས་སུ་དག་པ་བཞི་ནི། ལུས་ལེན་པ་དང༌། གནས་པ་དང༌། གཏོར་བ་ལ་མངའ་བརྙེས་པས་ལུས་ཡོངས་སུ་དག་པ་དང༌། སྤྲུལ་པ་དང་བསྒྱུར་བ་ལ་མངའ་བརྙེས་པས་དམིགས་པ་ཡོངས་སུ་དག་པ་དང༌། ཏིང་ངེ་འཛིན་ལ་མངའ་བརྙེས་པས་ཐུགས་ཡོངས་སུ་དག་པ་དང༌། ཡེ་ཤེས་ལ་མངའ་བརྙེས་པས་མཁྱེན་པ་ཡོངས་སུ་དག་པ་སྟེ་བཞིའོ། །ལེན་དང་གནས་དང་གཏོང་པ་དང༌། ། སྤྲུལ་དང་ཡོངས་སུ་བསྒྱུར་བ་དང༌། །ཏིང་ངེ་འཛིན་དང་ཡེ་ཤེས་ལ། །མངའ་བརྙེས་ཁྱེད་ལ་ཕྱག་འཚལ་ལོ། །ཞེས་སོ། །དབང་བཅུ་ནི། ཚེ་དང་སེམས་དང༌། ཡོ་བྱད་དང༌། ལས་དང༌། སྐྱེ་བ་དང༌། མོས་པ་དང༌། སྨོན་ལམ་དང༌། རྫུ་འཕྲུལ་དང༌། ཡེ་ཤེས་དང༌། ཆོས་ལ་དབང་བ་སྟེ་བཅུའོ། ། སྟོབས་བཅུ་སེམས་ཅན་རྣམས་ལ་བསླུ་བའི་བདུད་འཇོམས་པར། བདེ་འགྲོ་དང་ངན་འགྲོའི་ཐབས་ལ་བསླུ་བ་དང༌། ལྷ་ལ་སོགས་པ་སྐྱབས་མིན་པ་ལ་སྐྱབས་སུ་བསླུ་བ་དང༌། ཟག་བཅས་ཀྱི་དག་པ་ཙམ་གྱིས་རབ་ཏུ་དག་པར་བསླུ་བ་དང༌། ཐེག་ཆེན་གྱི་ངེས་པར་འབྱུང་བ་ལ་རབ་ཏུ་བསླུ་བའི་བདུད་འཇོམས་པ་སྟེ། ཐབས་དང་སྐྱབས་དང༌། དག་པ་དང༌། ཐེག་ཆེན་ངེས་པར་འབྱུང་བ་ལ། །སེམས་ཅན་རྣམས་ནི་བསླུ་བ་ཡི། །བདུད་འཇོམས་ཁྱོད་ལ་ཕྱག་འཚལ་ལོ། །ཞེས་སོ། །མི་འཇིགས་པ་བཞི་ནི་རིམ་པ་ལྟར། །རང་གི་དོན་དུ་ཡེ་ཤེས་དང༌། །སྤངས་པ་དང་གཞན་གྱི་དོན་དུ་ངེས་པར་འབྱུང་བ་དང༌། གེགས་སྟོན་པར་མཛད་པ་ལ་གཞན་དག་གིས་མི་རྫི་བའི་ཕྱིར་མི་འཇིགས་ཏེ། རང་གཞན་དོན་དུ་ཡེ་ཤེས་དང༌། །སྤངས་དང་ངེས་འབྱུང་གེགས་བྱེད་པ། །སྟོན་མཛད་མུ་སྟེགས་གཞན་དག་གིས། །མི་རྫི་ཁྱོད་ལ་ཕྱག་འཚལ་ལོ། །ཞེས་སོ། །དེ་བཞིན་གཤེགས་པའི་སྐུ་གསུང་ཐུགས་ཀྱི་སྤྱོད་པ་ཤིན་ཏུ་དག་པས་སྤྱོད་པ་མ་དག་པ་གཞན་གྱི་ཤེས་ཀྱིས་དགོས་ནས་བསྲུང་བ་དེ་མེད་པའི་ཕྱིར་འཁོར་གྱི་ནང་ན་བག་རྐྱང་སྟེ་གསུང་བ་དང༌། ཆོས་ཉན་པ་ལ་གུས་པ་དང༌། མ་གུས་པ་དང༌། ཆ་མཉམ་པའི་འཁོར་གསུམ་ལ་ཆགས་པ་དང༌། ཁོང་ཁྲོ་བ་དང༌། ཆ་མཉམ་པའི་གཡེང་བ་གསུམ་གྱིས་དྲན་པ་མི་བསྙེལ་བའི་ཕྱིར་བཏང་སྙོམས་ཀྱིས་དྲན་པ་ཉེ་བར་བཞག་པ་རྣམས་གསུམ་སྟེ། བསྲུང་མེད་བསྙེལ་བའི་མི་མངའ་བ། །འཁོར་གྱི་ནང་ནས་བག་བརྐྱངས་གསུང༌། །ཀུན་ནས་ཉོན་མོངས་གཉིས་སྤངས་པ། འཁོར་སྡུད་ཁྱོད་ལ་ཕྱག་འཚལ་ལོ། །ཞེས་སོ། །བསྙེལ་ནས་སེམས་ཅན་གྱི་དུས་ལས་འདའ་བ་མི་སྲིད་པ་མཛད་པ་རྟག་ཏུ་འབྲས་བུ་ཡོད་པ་ནི་བསྙིལ་བ་མི་མངའ་བའི་ཆོས་ཉིད་དེ། སེམས་ཅན་ཀུན་གྱི་བྱ་བ་ལ། །ཁྱོད་ནི་དུས་ལས་མ་འདའ་བས། །མཛད་པ་རྟག་ཏུ་དོན་མངའ་བ། ། མི་བསྙེལ་་ཁྱོད་ལ་ཕྱག་འཚལ་ལོ། །ཞེས་སོ། །ཉོན་མོངས་ཟད་ཀྱང་བག་ཆགས་མ་བཅོམས་པས། ཉན་རང་ལ་ལུས་ཀྱི་འགྱུར་བ་དང༌། གླང་པོ་འཁྲུལ་བ་དང༌། ཐུབ་པ་ལ་སོགས་ཀུན་མཁྱེན་མིན་པའི་སྤྱོད་པ་ཡོད་པ་ལྟར་དེ་བཞིན་གཤེགས་པ་ལ་གནས་པ་དང་རྒྱུ་བ་ལ་རྟག་ཏུ་ཀུན་མཁྱེན་མ་ཡིན་པའི་སྤྱོད་པ་མི་མངའ་བ་ནི་བག་ཆགས་ཡང་དག་པར་བཅོམ་པ་སྟེ་ཀུན་མཁྱེན་ཁྱོད་ལ་རྒྱུ་བ་དང༌། གནས་པ་ཀུན་ལ་རྟག་པར་ནི། །ཀུན་མཁྱེན་མིན་སྤྱོད་མི་མངའ་བ། །ཡང་དག་དོན་ལྡན་ཁྱོད་ཕྱག་འཚལ། །ཞེས་སོ། །སུ་ནི་དར་སུ་ནི་རྒུད་ཅེས་པའི་ཚུལ་གྱིས་འཇིག་རྟེན་ལ་ཉིན་ལན་གསུམ་མཚན་ལན་གསུམ་སོ་སོར་གཟིགས་པ་ནི་སྐྱེ་བོ་ལ་ཐུགས་རྗེ་ཆེན་པོ་སྟེ་འཇིག་རྟེན་ཀུན་ལ་ཉིན་མཚན་དུ། །ལན་དྲུག་ཏུ་ནི་སོ་སོར་གཟིགས། །ཐུགས་རྗེ་ཆེན་པོ་དང་ལྡན། ཕན་དགོངས་ཁྱོད་ལ་ཕྱག་འཚལ་ལོ། །ཞེས་སོ། །སྤྱོད་པ་མ་འདྲེས་པ་དྲུག་དང༌། རྟོགས་པ་མ་འདྲེས་པ་དྲུག་དང༌། ཡེ་ཤེས་མ་འདྲེས་པ་གསུམ་དང༌། འཕྲིན་ལས་མ་འདྲེས་པ་གསུམ་སྟེ་བཅོ་བརྒྱད་ནི། ཐུབ་པ་ཁོ་ནའི་མ་འདྲེས་པའི་ཆོས་བཅོ་བརྒྱད་དེ། སྤྱོད་པ་དང་ནི་རྟོགས་པ་དང༌། །ཡེ་ཤེས་དང་ནི་འཕྲིན་ལས་ཀྱིས། །ཉན་ཐོས་རང་སངས་རྒྱས་ཀུན་གྱི། །བླ་མ་ཁྱོད་ལ་ཕྱག་འཚལ་ལོ། །ཞེས་སོ། །སྐུ་གསུམ་གྱིས་བྱང་ཆུབ་ཆེན་པོ་བསྙེས་ནས་སེམས་ཅན་ཐམས་ཅད་ཀྱི་ཐེ་ཙོམ་ཐམས་ཅད་གཅོད་པའི་ཕྱིར་རྣམ་པ་ཐམས་ཅད་མཁྱེན་པ་ཉིད་དེ། སྐུ་གསུམ་དག་གིས་བྱང་ཆུབ་ཆེ། །རྣམ་པ་ཀུན་བརྙེས་ཐམས་ཅད་དུ། །སེམས་ཅན་ཀུན་གྱི་ཐེ་ཙོམ་དག། གཅོད་པ་ཁྱོད་ལ་ཕྱག་འཚལ་ལོ། །ཞེས་སོ། །རྣམ་པ་ཐམས་ཅད་མཁྱེན་པ་ཉིད་ཀྱི་ངོ་བོ་ནི། ཆོས་ཐམས་ཅད་ཀྱི་སྙིང་པོར་ཡོངས་སུ་གྲུབ་པ་དེ་བཞིན་ཉིད་ཡིན་ཏེ། དཀོན་མཆོག་སྤྲིན་ལས། དེ་ནི་དེ་བཞིན་ཉིད་ཅེས་བྱའོ། །ཡང་དག་པའི་མཐའ་ཞེས་བྱའོ། །རྣམ་པ་ཐམས་ཅད་མཁྱེན་པ་ཉིད་ཅེས་བྱ་ཞེས་སོ། །མཐར་ཐུག་འོད་གསལ་ཆོས་ཀྱི་སྐུ་ཞེས་བྱ་བ་དེ་རྣམས་ངོ་བོ་ཉིད་ཀྱི་སྐུས་བསྡུས་པའི་ཟག་མེད་ཀྱི་ཆོས་དེ་དག་ཡིན་པར་བརྗོད་པ་ཡིན་ནོ། ། ཉོན་མོངས་པ་མེད་པ་ནི། ཉན་ཐོས་ཉོན་མོངས་མེད་པ་ཡི། །མི་ཡི་ཉོན་མོངས་ཡོངས་སྤོང་ཉིད། །གྲོང་སོགས་སུ་དེའི་ཉོན་མོངས་རྣམས། །རྒྱུན་གཅོད་རྒྱལ་བའི་ཉོན་མོངས་མེད། །ཅེས་པ་ལ་ཉན་ཐོས་ཀྱི་ཉོན་མོངས་པ་མེད་པ་ནི་མའི་ཉོན་མོངས་པ་སྐྱེ་བའི་རྐྱེན་སྤོང་བ་ཙམ་དང༌། ཉོན་མོངས་སྐྱེས་པ་རྣམས་ཀྱི་གཉེན་པོ་མི་བྱེད་པ་ཉིད་དོ། །གྲོང་ལ་སོགས་པ་རྣམས་སུ་སེམས་ཅན་ཕ་རོལ་པོ་དེ་དང་དེའི་ཉོན་མོངས་རྣམས་སྐྱེས་པ་དང༌། སྐྱེ་འགྱུར་རྒྱུན་གཅོད་པའི་མཐུ་ཡོད་པའི་ཏིང་ངེ་འཛིན་དེ་རྒྱལ་བའི་ཉོན་མོངས་པ་མེད་པའོ། །ཇི་སྐད་དུ། སེམས་ཅན་དག་ནི་ཐམས་ཅད་ཀྱི། །ཉོན་མོངས་མ་ལུས་ཐམས་ཅད་འདུལ། །ཉོན་མོངས་འཇོམས་མཛད་ཉོན་མོངས་ལ། །ཐུགས་རྗེ་བཅས་ཁྱོད་ལ་ཕྱག་འཚལ། །ཞེས་སོ། །སྨོན་ནས་ཤེས་པ་ནི། སངས་རྒྱས་སྨོན་ནས་མཁྱེན་པ་ནི། །ལྷུན་གྱིས་གྲུབ་དང་ཆགས་སྤངས་དང༌། །ཐོགས་པ་མེད་དང་རྟག་གནས་དང༌། །འདྲི་བ་ཀུན་ལན་འདེབས་པར་བཞེད།། ཅེས་པ་ལ་བདེན་གཉིས་ཀྱིས་བསྡུས་པའི་ཤེས་བྱ་གང་ཡང་རུང་བ་འགའ་ཞིག་ཤེས་པར་སྨོན་དེ་ཤེས་པ་ནི་སྨོན་ལམ་སྔོན་དུ་སོང་བས་སྨོན་ནས་ཤེས་པའོ། །སངས་རྒྱས་ཀྱི་སྨོན་ནས་མཁྱེན་པ་ནི་ལྷུན་གྱིས་གྲུབ་པར་མངོན་དུ་གྱུར་པ་དང༌། ཆགས་པ་སྤངས་པ་དང༌། ཤེས་བྱ་ལ་ཐོགས་པ་མེད་པ་དང༌། རྟག་ཏུ་མཉམ་བཞག་ལ་གནས་པ་དང༌། འདྲི་བ་ཀུན་གྱི་ལན་འདེབས་པ་ཉིད་ཀྱིས་ཆོས་ལྔས་ཁྱད་པར་དུ་འཕགས་པར་བཞེད་དོ། །གཞན་དག་ནི་དེ་ལ་བཟློག་པའོ། །ཇི་སྐད་དུ། ལྷུན་གྱིས་གྲུབ་ཅིང་ཆགས་མི་མངའ། །ཐོགས་པ་མི་མངའ་རྟག་པར་ནི། །མཉམ་པར་བཞག་ཅིང་འདྲི་ཀུན་གྱི། །ལན་ལྡོན་ཁྱོད་ལ་ཕྱག་འཚལ་ལོ། །ཞེས་སོ། །གལ་ཏེ་སངས་རྒྱས་སེམས་ཅན་གྱི་དོན་ལ་བསྙེལ་བ་མེད་པར་ཀུན་ཁྱབ་ཏུ་རྟག་པར་བཞུགས་ན། སེམས་ཅན་ཐམས་ཅད་ལ་མི་སྣང་བ་ཅི་ཞེ་ན། རྒྱུ་ནི་ཡོངས་སུ་སྨིན་གྱུར་ནས། །གང་དང་གང་ལ་གང་དང་ནི། །གང་ཚེ་བྱ་བ་ཕན་གྱུར་པ། །དེ་དང་དེ་ལ་དེ་སྣང་ངོ༌། །ཞེས་པ་སངས་རྒྱས་མཐོང་བའི་རྒྱུ་དད་པ་ལ་སོགས་པའི་དགེ་བ་ནི་ཡོངས་སུ་སྨིན་པར་གྱུར་པ་དེ་ནས། སྐུ་ལ་སོགས་པའི་འཕྲིན་ལས་གང་དང་གདུལ་བྱ་གང་ལ་འདུལ་བའི་རྣམ་པ་གང་དང་ནི། དུས་གང་གི་ཚེ་འདུལ་བའི་བྱ་བ་ལ་ཕན་པར་གྱུར་པ་དེའི་ཚེ་འཇིག་རྟེན་དུ་བྱོན་པའི་སངས་རྒྱས་དེ་སྣང་བ་དང་གདུལ་བྱ་དེ་ལ་གདུལ་བའི་རྣམ་པ་སྐུ་དང་གསུང་གི་རྣམ་འགྱུར་སྣ་ཚོགས་པ་དེ་སྣང་ངོ༌། །གལ་ཏེ་སངས་རྒྱས་འཇིག་རྟེན་དུ་བྱོན་ནས། སེམས་ཅན་ཡིན་ནོ་ཅོག་ལམ་ལ་འགོད་དམ་ཞེ་ན། ལྷ་ཡི་རྒྱལ་པོས་ཆར་ཕབ་ཀྱང༌། ས་བོན་མི་རུང་མི་འཁྲུངས་ལྟར། ། སངས་རྒྱས་རྣམས་ནི་བྱོན་གྱུར་ཀྱང༌། །སྐལ་བ་མེད་པས་བཟང་མི་མྱོང༌། །དཔེ་ཇི་ལྟར་ལྷའི་རྒྱལ་པོས་ཕྱོགས་རིས་མེད་པར་ཆར་ཕབ་ཀྱང༌། མེས་ཚིག་པ་ལྟ་བུ་ས་བོན་དུ་མི་རུང་བ་ལ་འདོད་པའི་འབྲས་བུ་མི་འཁྲུང་བ་ལྟར། སངས་རྒྱས་རྣམས་ནི་འཇིག་རྟེན་དུ་བྱོན་ནས་དམ་ཆོས་བདུད་རྩིའི་ཆར་པ་ཀུན་ལ་ཕབ་པར་འགྱུར་ཀྱང༌། ཆོས་ཀྱི་སྐལ་བ་མེད་པས་བསྟན་པ་བདུད་རྩིའི་རོ་བཟང་པོ་མི་མྱོང་ངོ༌། །སྐལ་པ་ཡོད་ན་དུས་ནམ་ཡང་འཕྲིན་ལས་ཀུན་ཁྱབ་ཏུ་འཇུག་པ། དེ་ལྟར་མཛད་པ་རྒྱ་ཆེའི་ཕྱིར། །སངས་རྒྱས་ཁྱབ་པར་ངེས་པར་བརྗོད། །དེ་ཉིད་ཟད་པ་མེད་པའི་ཕྱིར། །རྟག་པ་ཞེས་ཀྱང་བརྗོད་པ་ཡིན་ནོ། །གོང་དུ་གསུངས་པ་དེ་ལྟར་སྐུ་གསུངས་ཐུགས་ཀྱི་མཛད་པ་རྒྱ་ཆེ་བ་ནམ་མཁའ་དང་མཚུངས་པའི་ཕྱིར། སངས་རྒྱས་ཀྱིས་ནམ་མཁའ་ཁྱབ་པར་ངེས་པར་བརྗོད་དོ། །མཛད་པ་དེ་ཉིད་ནི་དུས་ནམ་ཡང་ཟད་པ་མེད་པའི་ཕྱིར་ཆོས་ཀྱི་སྐུ་རྟག་པ་ཞེས་ཀྱང་བརྗོད་པ་ཡིན་ནོ། ། ༢༽ལོངས་སྤྱོད་རྫོགས་པའི་སྐུ་བཤད་པ། ད་ནི་ལོངས་སྤྱོད་རྫོགས་པའི་སྐུ་བཤད་པར་བྱ་སྟེ། དེ་ལ་བསྟན་པ་དང༌། བཤད་པ་གཉིས་ལས་དང་པོ་ནི། མཚན་ནི་སུམ་ཅུ་རྩ་གཉིས་དང༌། དཔེ་བྱད་བརྒྱད་བཅུའི་བདག་ཉིད་འདི། །ཐེག་ཆེན་ཉེ་བར་ཡོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པ་མཚན་དཔེ་འདི་ལ་བདེན་པ་གཉིས་ཀྱི་དབྱེ་བ་ཤེས་པར་བྱ་སྟེ། གཤིས་ལུགས་ཆོས་ཉིད་ཀྱི་མཚན་དཔེ་དོན་དམ་དང༌། སེམས་ཅན་གྱི་མཐོང་ལུགས་དངོས་པོའི་མཚན་དཔེ་ཀུན་རྫོབ་པའོ། །མཚན་དང་དཔེ་བྱད་ལ་གྲངས་ངེས་བསྟན་པ་ནི། སེམས་ཅན་གྱི་བསམ་པའི་དབང་གིས་ཡིན་གྱི། དོན་ལ་ནི་མཚན་དང་དཔེ་བྱད་བཟང་པོ་མཐའ་ཡས་པར་སོར་འཕྲེང་གི་མདོ་ལས་གསུངས་སོ། །འདི་དག་གིས་སྐྱེས་བུ་ཆེན་པོར་མཚོན་པས་ན་མཚན་ནོ། །དེ་ལ་འཁོར་ལོས་བསྒྱུར་བའི་མཚན་ནི་འདུས་བྱས་ཡིན་ལ། སངས་རྒྱས་ཀྱི་མཚན་ནི་སོ་སོར་རང་རིག་པའི་ཡེ་ཤེས་འདུས་མ་བྱས་པ་ཡིན་ཏེ། ལང་ཀར་གཤེཊ་པར། མངོན་པར་འདུ་བྱེད་མཚན་རྣམས་ཀྱིས། །སངས་རྒྱས་མཚན་ལྡན་མ་ཡིན་ཏེ། །དེ་དག་འཁོར་ལོས་སྒྱུར་ཡོན་ཏན། །དེས་ནི་སངས་རྒྱས་མི་བརྗོད་དོ། །སངས་རྒྱས་མཚན་ནི་ཡེ་ཤེས་ཏེ། །ལྟ་བའི་ཉེས་པ་རྣམས་སྤངས་པ། །སོ་སོ་རང་གི་ལྟ་བས་རྟོགས།ཞེས་པའི་དོན་ཏོ། །དེས་ན་ལོངས་སྤྱོད་རྫོགས་པའི་སྐུའི་མཚན་ཉིད་ནི། གཉིས་མེད་ཡེ་ཤེས་ཀྱི་ངོ་བོ་གྱུར་པའི་མཚན་ནི་སུམ་ཅུ་རྩ་གཉིས་དང་དཔེ་བྱད་བརྒྱད་ཅུའི་བདག་ཉིད་དུ་གྱུར་པ་འདི་ཐེག་པ་ཆེན་པོའི་ཆོས་རྫོགས་པར་ཉེ་བར་ལོངས་སྤྱོད་པའི་སྐུ་ཡིན་པའི་ཕྱིར། ཐུབ་པའི་ལོངས་སྤྱོད་རྫོགས་པའི་སྐུ་ཡིན་པར་མདོ་ལས་བཞེད་དོ། །གཉིས་པ་རྒྱས་པར་བཤད་པ་ལས། མཚན་བཟང་བཤད་པ་དང༌། དཔེ་བྱད་བཤད་པ་གཉིས་ལས་དང་པོ་ནི། ཕྱག་ཞབས་འཁོར་ལོའི་མཚན་དང་རུ་སྦལ་ཞབས། །ཕྱག་དང་ཞབས་སོར་དྲ་བས་འབྲེལ་པ་དང༌། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་བདུན་དག་མཐོ་བ་དང༌། །སོར་མོ་རིང་དང་རྟེང་ཡངས་སྐུ་ཆེ་དྲང༌། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ན་ཡ་འདྲ་ཕྱག་རིང་མཛེས། །འདོམས་ཀྱི་སྦ་བ་སྦུབས་སུ་ནུབ་པའི་མཆོག ། ལྤགས་པ་གསེར་མདོག་ལྤགས་པ་སྲབ་པ་དང༌། །སྤུ་ནི་རེ་རེ་ནས་གཡས་ལེགས་འཁྲུངས་དང༌། ། ཞལ་མཛོད་སྤུས་བརྒྱན་རོ་སྟོད་སེང་གེ་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པ་རོ་མཆོག་སྣང༌། །སྐུ་ནི་ནྱ་ཀྲོ་རྡ་ལྟར་ཆུ་ཞེང་གབ། གཙུག་ཏོར་དབུར་ལྡན་ལྗགས་རིང་མཛེས་པ་དང༌། །ཚངས་དབྱངས་འགྲམ་པ་སེང་གེའི་འདྲ་དང་ཚེམ། །ཤིན་ཏུ་དཀར་དང་ཚད་མཉམ་ཐག་བཟང་དང༌། །གྲངས་ནི་བཞི་བཅུ་ཐམ་བ་ཚང་བ་དང༌། །སྦྱན་ནི་མཐོན་མཐིང་སྦྱན་རྫི་བ་མཆོག་གི །འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་པ་མདོ་ལས་མཚན་འདི་རྣམས་བསྟན་པ་དང་བཤད་པ་དང་རྒྱུ་དང་འབྲས་བུ་སྟེ་རྣམ་པ་བཞིས་བསྟན་ནོ། །དེ་ལ་སྔོན་གྱི་ལས་སྨོས་པས་ནི། མཚན་འདི་དག་སྒྲུབ་བྱེད་ཀྱི་རྒྱུ་དང༌། སྔ་ལྟས་སྨོས་པས་ནི། མཚན་འདི་དག་གི་འབྲས་བུ་བསྟན་པར་ཤེས་པར་བྱའོ། །བླ་མ་བསུ་བསྐྱལ་དང༌། ཆོས་ཉན་པ་ལ་སྡོད་པ་དང༌། མཆོད་རྟེན་ལ་སོགས་པ་ལ་སྟི་སྟང་བྱས་པས། ཕྱག་དང་ཞབས་རྩིབ་སྟོང་བའི་འཁོར་ལོའི་མཚན་པ་སོ་ལ་རྐོས་པ་དང་འདྲ་བ་ལྡན་པ་སྟེ། དེ་ནི་འཁོར་ཤིན་ཏུ་མང་བོའི་ལྔ་ལྟས་སོ། ཡིད་དམ་ལ་བརྟན་པས་ཞབས་རུ་སྦལ་བཞིན་དུ་གནས་པ་སྟེ། དེ་ནི་མི་གཡོ་ཞིང་བརྟན་པའི་སྔ་ལྟས་སོ། །བསྡུ་པ་བཞི་གོམས་པར་བྱས་པས་ཕྱག་དང་ཞབས་ཀྱི་སོར་མོ་ངང་བའི་རྒྱལ་པོ་ལྟར་དྲ་བས་འབྲེལ་བ་སྟེ། དེ་ནི་འཁོར་མྱུར་དུ་འདུ་བའི་སྔ་ལྟས་སོ། །བཟའ་བཏུང་ཞིམ་ཞིང་ཉམས་སུ་བདེ་བ་བྱིན་པས་ཕྱག་ནི་ཞབས་དང་བཅས་པ་འཇམ་ཞིང་གཞོན་ཤ་ཆགས་པ་དང༌། ཐུབ་པ་འདིའི་སྐུ་འདི་ནི་ཞབས་གཉིས་དང་ཕྱག་གཉིས་དང་ཕྲག་པ་གཉིས་དང་ལྷག་པ་སྟེ་བདུན་དག་མཐོ་བ་དང༌། མཚན་དེ་གཉིས་ནི། བཟའ་བ་དང་བཅའ་བ་དང་བཏུང་བ་ཞིམ་ཞིང་ཉམས་སུ་བདེ་བ་འཐོབ་པའི་སྔ་ལྟས་སོ། །བཅིངས་པ་ལས་བགྲོལ་སྲོག་སྐྱབས་སྲོག་གཅོད་སྤངས་པས་ཕྱག་ཞབས་ཀྱི་སོར་མོ་རིང་བ་དང་རྟིང་པ་ཡངས་པ་དང༌། སྐུ་ཆེ་ཞིང་དྲང་བ་སྟེ། དེ་ནི་སྐུ་ཚེ་རིང་བའི་སྔ་ལྟས་སོ། །དགེ་བའི་ཆོས་བླངས་བ་དང༌། གཟུང་བ་སྤེལ་ཞིང་མ་འགྲིབ་པར་བྱས་པས་ཞབས་ཀྱི་འབུར་སྐྱོང་མི་མངོན་པ་དང༌། བ་སྤུའི་རྩེ་མོ་ནི་གྱེན་ཕྱོགས་པ་སྟེ། དེ་ནི་མི་མཉམ་པའི་ཆོས་དང་ལྡན་བའི་སྔ་ལྟས་སོ། །རིག་པ་དང་བཟོའི་ལས་རང་གིས་བླངས་བ་དང༌། གཞན་ལ་བྱིན་པས་བྱིན་པ་རི་དྭགས་ཨེ་ན་ཡ་ཤ་བའི་བྱིན་པ་འདྲ་བ་སྟེ། དེ་ནི་མྱུར་དུ་འཛིན་པའི་སྔ་ལྟས་སོ། །ནོར་ལ་སེར་སྣ་མ་བྱས་པས། མ་བཏུད་ཀྱང་བཏུད་ཀྱང་བརླ་དྲང་བོར་སླེབ་པའི་ཕྱག་རིང་ཞིང་མཛེས་པ་སྟེ། དེ་ནི་ཡོ་བྱད་ལ་མངའ་བརྙེས་པ་དང༌། དུལ་བའི་སྔ་ལྟས་སོ། །མཛའ་བ་མ་ཕྱེ་བ་དང་ཕྱེ་བའི་སེམས་ཅན་ཚངས་སྦྱོད་ལ་སྐུལ་བ་དང༌། གསང་ཚིག་བསྲུངས་པས། འདོམས་ཀྱང་སྦ་ཞིང་གསང་བར་བྱ་བ་གླང་པོ་ཆེ་བཞིན་དུ་སྦུབས་སུ་ནུབ་པའི་མཆོག་སྟེ། དེ་ནི་བུ་མང་བའི་ལྔ་ལྟས་སོ། །གོས་སྟན་དང་གཞལ་མེད་ཁང་དང་གནས་བཟང་པོ་བྱིན་པས་ལྤགས་པ་གསེར་གྱི་མདོག་ལྟར་སྣུམ་པ་དང༌། ལྤགས་པ་སྲབ་པ་སྟེ། དེ་དག་ནི་གདན་ན་བཟའ་ཁང་བ་གཞལ་མེད་ཁང་གནས་བཟང་པོ་འཐོབ་པའི་སྔ་ལྟས་སོ། །འདི་འཛི་སྤངས་པ་དང་མཁན་སློབ་ཕ་མ་ལ་སོགས་ལ་ཚུལ་བཞིན་བཀུར་སྟི་ལ་སོགས་བྱས་པའི་བ་སྤུ་ནི་བུ་ག་རེ་རེ་ནས་གཡས་སུ་ལེགས་པར་འཁྱིལ་བ་འཁྲུངས་པ་དང༌། །ཞལ་གྱི་སྨིན་མའི་དབུས་དཀར་ཞིང་ཤིན་ཏུ་ཕྲ་བ་སུམ་ཅུ་རྩ་གཉིས་མཛོད་སྤུ་གཡས་སུ་འཁྱིལ་བ་ཟླུམ་པོས་བརྒྱན་པ་སྟེ། དེ་ནི་མཉམ་པ་ཉིད་མེད་པའི་སྔ་ལྟས་སོ། །མི་ཟློས་ལ་སྙམ་པར་སྨྲ་ཞིང་ལེགས་བཤད་མཐུན་པརའཛིན་པས་རོ་སྟོད་སེང་གེའི་རོ་སྟོད་འདྲ་བ་དང༌། སྐུ་འདིའི་དཔུང་པའི་མགོ་ལྷུན་མཛེས་ཤིང་ཟླུམ་པ་སྟེ། འདི་ནི་ཐུབ་པ་མེད་པའི་སྔ་ལྟས་སོ། །ནད་པ་རྣམས་ལ་སྨན་དཔྱད་རིམ་གྲོ་དང༌། རྩི་དང་ཕན་པའི་ཟས་ཕྱིན་པས་ཐལ་གོང་མགྲིན་པ་ཟླུམ་ཞིང་ཐོང་ཀ་རྒྱས་པ་དང༌། ཐུབ་པ་འདི་ལ་རླུང་མཁྲིས་བད་ཀན་གྱིས་མ་ཉམས་པའི་རྩའི་མཆོག་རྣམས་མངའ་བས་རོ་མི་ཞིམ་པ་ཡང་རོ་མཆོག་ཏུ་སྣང་བ་སྟེ། དེ་ནི་ནད་ཉུང་བའི་སྔ་ལྟས་སོ། །སྐྱེད་མོས་ཚལ་དང་འཁོར་བཟའ་བཏུང་དང༌། ཟམ་སྟེགས་བྱེད་པ་དང༌། གཙུག་ལག་ཁང་ལ་སོགས་བ་གཏོང་ཞིང་བྱིན་པས་སྐུ་ནི་ཆུ་ཞིང་མཉམ་པ་སྟེ། ནྱ་ཀྲོ་ཏ་ལྟར་ཆུ་ཞེང་གབ་བ་དང༌། དབུ་གཙུག་ཏོར་དང་ལྡན་པ་སྟེ། དེ་ནི་མངའ་ཐང་ཆེན་པོ་མངའ་བའི་སྔ་ལྟས་སོ། །ཡུན་རིང་བོར་ཚིག་སྙན་ཅིང་འཇམ་ལ་ཉམས་སུ་བྱེད་བ་སྨྲས་པས་ལྗག་དབུ་སྐྲ་དང༌། སྙན་གྱི་བར་དུ་སླེབ་ལ་དཔྲལ་བ་ཡང་ཁེབས་པས་རིང་ལ་ཡངས་ཤིང་མཛེས་པ་དང༌། ཚངས་པའི་དབྱངས་ནང་དུ་ཇི་ལྟ་བ་བཞིན་དུ་ཡང་ཐོབ་པ་སྟེ། དེ་གཉིས་ནི་ཡན་ལག་ལྔ་ལྡན་གྱི་གསུང་མངའ་བའི་སྔ་ལྟས་སོ། །ཡན་ལག་ལྔ་ནི་ཡོངས་སུ་ཤེས་ཤིང་ཤེས་པར་འགྱུར་བ་དང༌། མཉན་ན་དགའ་བ་དང༌། ཟབ་ཅིང་དབྱངས་རྗེས་སུ་འབྱུང་བ་དང༌། གདང་མི་ཕྲ་བ་དང༌། མི་འཁྲུགས་ཤིང་གསལ་བའོ། །ཡུན་རིང་པོ་ནས་ཚིག་འཁྱལ་བ་སྤངས་ཤིང་དུས་སུ་སྨྲས་པས་འགྲམ་པ་སེང་གེའི་དང་འདྲ་བ་སྟེ། དེ་ནི་ཚིག་ཀུན་གྱིས་ཉན་པའི་ལྔ་ལྟས་སོ། །འཚོ་བ་ཡོངས་སུ་དག་པས་ཚེམ་ཤིན་ཏུ་དཀར་བ་དང༌། ཚད་མཉམ་པ་སྟེ། དེ་ནི་འཁོར་སྔ་ནས་བསགས་པའི་སྔ་ལྟས་སོ། །ཡུན་རིང་བོ་ནས་བདེན་ཞིང་ཕྲ་མ་མེད་པའི་ཚིག་སྨྲས་པས། ཚེམས་ཐག་བཟང་བ་དང༌། གྲངས་ནི་བཞི་བཅུ་ཐམ་པ་ཚང་བ་སྟེ། དེ་ནི་འཁོར་དབྱེར་མི་ཕྱེད་པའི་སྔ་ལྟས་སོ། །ཆགས་སྡང་རྨོངས་པ་མེད་པའི་མིག་གིས་བལྟས་པས། སྤྱན་ནི་དཀར་བ་དང༌། མཐོན་མཐིང་གི་ཤན་ཕྱེད་པ་དང༌། སྤྱན་གྱི་རྫི་མ་བ་ཁྱུ་མཆོག་གི་རྫི་མ་དང་འདྲ་བ་སྟེ། དེ་ནི་ཀུན་ནས་མཛེས་པའི་ལྔ་ལྟས་སོ། །བཤད་མ་ཐག་པ་འདི་དག་གྲངས་སུམ་ཅུ་རྩ་གཉིས་ཚངས་པའི་མཚན་བཟང་པོ་སྟེ། འདི་ལ་མཚན་ནི་གང་གང་གི། སྒྲུབ་པར་བྱེད་པའི་རྒྱུ་གང་ཡིན་པའི་དགེ་བ། དེ་དང་དེ་ནི་རབ་རྫོགས་པས། འབྲས་བུ། མཚན་ནི་འདི་དག་ཡང་དག་འགྲུབ་པོ། རྒྱུ་དགེ་བ་ཡང་བླ་མ་སྐྱེལ་བ་ལ་སོགས་པ་དང༌། དམ་བཅས་ཡང་དག་བླངས་པ་བརྟན་པ་དང༌། བསྡུ་བ་བསྟེན་དང་གྱ་ནོམ་པའི། དངོས་པོ་སྦྱིན་དང་གསང་བྱ་བ། ཐར་བར་བྱེད་དང་དགེ་བ་ནི། ཡང་དག་བླངས་བ་སྤེལ་ལས་སོ། །འབྲས་བུ་མཚན་རྣམས་ཀྱི་སྒྲུབ་བྱེད་རྒྱུའི་མཚན་ཉིད་ཏེ། མདོ་ལས་ཇི་སྐད་འབྱུང་བ་བཞིན་དུ་སྔར་བཤད་པ་དེ་རྣམས་ཤེས་བར་བྱའོ། །གཉིས་པ་དཔེ་བྱད་བཟང་པོ་བཤད་པ་ནི། ཐུབ་པའི་སེན་མོ་ཟངས་མདོག་དང༌། །མདོག་སྣུམ་མཐོ་དང་སོར་མོ་རྣམས། ། ཟླུམ་རྒྱས་བྱིན་གྱིས་ཕྲ་བ་དང༌། །རྩ་མི་མངོན་དང་མདུད་པ་མེད། །ལོང་བུ་མི་མངོན་ཞབས་མཉམ་དང༌། །སེང་གེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང༌། །མཛེས་གཤེགས་དྲང་དང་འཁྲིལ་བག་ཆགས། །བྱི་དོར་བྱས་འདྲ་རིམ་པར་འཚམ། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང༌། །སྐུ་ཡི་ཁོ་ལག་ཡངས་ཤིང་བཟང༌། །གོམ་སྙོམས་པ་དང་སྤྱན་གཉིས་ནི། དག་དང་གཞོན་ཤ་ཅན་ཉིད་དང༌། སྐུ་ཞིམ་མེད་དང་རྒྱས་པ་དང༌། ཤིན་ཏུ་གྲིམས་པའི་སྐུ་ཉིད་དང༌། ཡན་ལག་ཤིན་ཏུ་རྣམ་འབྱིས་དང༌། གཟིགས་པ་སྒྲིབ་མེད་དག་པ་དང༌། སྐུ་ཟླུམ་སྐབས་ཕྱིན་མ་རྙོངས་དང༌། །ཕྱ་ལེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་བ་དང༌། །ཀུན་ནས་བལྟ་ན་སྡུག་པ་དང༌། །ཀུན་སྤྱོད་གཙང་དང་སྐུ་ལ་ནི། །སྨེ་བ་ནག་བག་མེད་པ་དང༌། །ཕྱག་ནི་ཤིང་བལ་ལྟར་འཇམ་དང༌། །ཕྱག་རིངས་མདངས་ཡོད་ཟབ་རིང་དང༌། ། ཞལ་ནི་ཧ་ཅང་མི་རིང་དང༌། །མཆུ་ནི་བིམ་པ་ལྟར་དམར་དང༌། །ལྗགས་མཉེན་པ་དང་སྲབ་པ་དང༌། །དམར་དང་འབྲུག་གི་སྒྲ་ཉིད་དང༌། གསུང་མཉེན་པ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང༌། །བྱིན་གྱིས་ཕྲ་དང་ཤངས་མཐོ་དང༌། །མཆོག་ཏུ་དག་པ་དག་དང་ནི། །སྦྱན་ཡངས་པ་དང་རྫི་མ་སྡུག །པད་མའི་འདབ་མ་འདྲ་བ་དང༌། །སྨིན་ཚུགས་རིང་དང་འཇམ་པ་དང༌། །སྣུམ་དང་སྤུ་ནི་མཉམ་པ་དང༌། །སྙན་རིང་རྒྱས་དང་སྙན་མཉམ་དང༌། །ཉམས་པ་རྣམ་པར་སྤངས་པ་དང༌། །དཔྲལ་བ་ལེགས་པར་འབྱེས་པ་དང༌། །དབྱེས་ཆེ་བ་དང་དབུ་རྒྱས་དང༌། དབུ་སྐྲ་བུང་བ་ལྟར་གནག་དང༌། སྡུག་འཇམ་མ་འཛིངས་མི་བཤོར་དང༌། །དྲི་ཞིམ་སྐྱེས་བུའི་ཡིད་འཕྲོག་དང༌། །དཔལ་གྱི་བེའུ་དང་བཀྲ་ཤིས་དང༌། གཡུང་དྲུང་འཁྱིལ་བས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་པ་དཔེ་བྱད་བཟང་པོ་འདི་རྣམས་ལ། །བཅོམ་ལྡན་འདས་རྣམས་ལ་ཡོན་ཏན་འདི་དང་འདི་མངའ་བས། དཔེ་བྱད་འདི་དང་འདི་མངའ་བ་ཡིན། ཞེས་པའི་རྒྱུ་མཚན་རེ་རེ་མདོ་ལས་བྱུང་བ་འདི་ལྟ་སྟེ། སངས་རྒྱས་བཅོམ་ལྡན་ནི་མངོན་པར་འདུ་བྱ་བ་ཐམས་ཅད་ལས་དབེན་པ་སྟེ། ཐུབ་པའི་སེན་མོ་ཟངས་ཀྱི་མདོག་ལྟར་འདུག་པ་དང༌། སེམས་ཅན་ལ་ཕན་པ་དང༌། བདེ་བའི་ཐུགས་མངའ་པས་སེན་མོའི་མདོག་སྣུམ་པ་དང༌། རིགས་རྒྱུད་མཐུན་པར་བྱུང་བས་སེན་མོ་མཐོ་བ་དང༌། ཁ་ན་མ་ཐོ་བ་མེད་པས་སོར་མོ་རྣམས་ཟླུམ་པ་དང༌། དགེ་བ་ཤིན་ཏུ་ཚོགས་པས་སོར་མོ་རྒྱས་པ་དང༌། རིམ་ཀྱིས་གྲུབ་པས་སོར་མོ་བྱིན་གྱིས་ཕྲ་བ་དང༌། འཕྲིན་ལས་དང༌། འཚོ་བ་ཤིན་ཏུ་དབེན་པས་རྩ་མི་མངོན་པ་དང༌། ཉོན་མོངས་ཀྱི་མདུད་པ་བཀྲོལ་བས་མདུད་པ་མེད་པ་དང༌། དབེན་པའི་ཆོས་མངའ་བས་ལོང་བུ་མི་མངོན་པ་དང༌། མཉམ་པ་ཐམས་ཅད་ལས་འདས་པས་ཞབས་མཉམ་པ་དང༌། མིའི་སེང་གེ་ཡིན་པས་སེང་གེའི་སྟབས་སུ་གཤེགས་པ་དང༌། མིའི་གླང་པོ་ཆེ་ཡིན་པས་གླང་ཆེན་གྱི་སྟབས་སུ་གཤེགས་པ་དང༌། ནམ་མཁའ་ལ་བཞུད་པས་བྱ་ངང་པའི་རྒྱལ་པོའི་སྟབས་སུ་གཤེགས་པ་དང༌། མིའི་ཁྱུ་མཆོག་ཡིན་པས་ཁྱུ་མཆོག་གི་སྟབས་སུ་གཤེགས་པ་དང༌། མཐུན་པའི་ལམ་མངའ་བས་གཡས་ཕྱོགས་སུ་གཤེགས་པ་དང༌། ལྟ་ན་མཛེས་པ་མཛེས་པར་གཤེགས་པ་དང༌། ཐུགས་ཡོན་པོ་མི་མངའ་པས་དྲང་པོར་གཤེགས་པ་དང༌། དག་པའི་ཡོན་ཏན་སྟོན་པས་སྐུ་ཤིན་ཏུ་ལེགས་པའི་འཁྲིལ་བག་ཆགས་པ་དང༌། སྡིག་པ་ཤིན་ཏུ་སྦྱངས་པས་སྐུ་བྱི་དོར་བྱས་པ་འདྲ་བ་དང༌། ཆོས་རིམ་གྱིས་སྟོན་པས་སྐུ་རིམ་པ་ནས་རིམ་པར་འཚམས་པ་དང༌། སྐུ་གསུང་ཐུགས་གཙང་བས་སྐུ་ཤིན་ཏུ་གཙང་བ་དང༌། རང་བཞིན་གྱིས་ཐུགས་འཇམ་པས་སྐུ་ཤིན་ཏུ་འཇམ་པ་དང༌། རང་བཞིན་གྱིས་ཐུགས་དག་པས་སྐུ་ཤིན་ཏུ་དག་པའི་སྐུ་དང༌། ཆོས་དང་འདུལ་བ་ཤིན་ཏུ་རྫོགས་པས་དཔེ་བྱད་ཡོངས་སུ་རྫོགས་པ་དང༌། ཡོན་ཏན་ཡངས་ཤིང་བཟང་བ་སྟོན་པས་སྐུའི་ཁོ་ལག་ཡངས་ཤིང་བཟང་བ་དང༌། སེམས་ཅན་ཐམས་ཅད་ལ་མཉམ་པའི་ཐུགས་མངའ་བས་གོམས་པ་སྙོམས་པ་དང༌། གཟིགས་པ་ཤིན་ཏུ་དག་པས་སྤྱན་གཉིས་ནི་དག་པ་དང༌། འཇམ་པའི་ཆོས་སྟོན་པས་སྐུ་གཞོན་ཤ་ཅན་ཉིད་དང༌། རྟག་ཏུ་ཞུམ་པ་མེད་པའི་ཐུགས་མངའ་བས་སྐུ་ཞུམ་པ་མེད་པ་དང༌། མི་དགེ་བའི་རྩ་བ་ཐམས་ཅད་བྱང་བས་སྐུ་ཤིན་ཏུ་རྒྱས་པ་དང༌། ཡང་སྲིད་བཅོམ་ཞིང་ཟད་པས་ཤིན་ཏུ་གྲིམས་ཤིང་མཁྲེགས་པའི་སྐུ་ཉིད་དང༌། རྟེན་འབྲེལ་གྱི་ཡན་ལག་ལེགས་པར་སྙོན་པས་ཡན་ལག་དང་ཉིང་ལག་ཤིན་ཏུ་སྤ་བར་རྣམ་པར་མཛེས་པ་དང༌། གཟིགས་པ་ཤིན་ཏུ་དག་པས་གཟིགས་པ་རབ་རིབ་སྒྲིབ་པ་མེད་ཅིང་དག་པ་དང༌། ཚུལ་དང་ལྡན་པའི་སློབ་མ་མངའ་བས་དཀུ་ཟླུམ་པ་དང༌། འཆོར་བའི་ཉེས་པ་ཐམས་ཅད་ཤིན་ཏུ་སྦྱངས་པས་ཕྱལ་སྐབས་ཕྱིན་པ་དང༌། ང་རྒྱལ་གྱི་དེའུ་བཅོམ་པས་ཕྱལ་མ་རྙོངས་པ་དང༌། ཆོས་ཟད་པ་བཟློག་པས་ཕྱལ་ཕྱམ་མེ་བ་དང༌། ཆོས་ཤིན་ཏུུ་ཟབ་མོ་ཐུགས་སུ་ཆུད་པས་ལྟེ་བ་ཟབ་པ་དང༌། མཐུན་པར་འཛིན་པའི་སློབ་མ་མངའ་བས་ལྟེ་བ་གཡས་ཕྱོགས་སུ་འཁྱིལ་པ་དང༌། སློབ་མ་ཀུན་ནས་མཛེས་པའི་དགེ་འདུན་མངའ་བས་ཀུན་ནས་བལྟ་ན་སྙིང་དུ་སྡུག་པ་དང༌། ཐུགས་ཤིན་ཏུ་གཙང་བས་ཀུན་སྤྱོད་ཤིན་ཏུུ་གཙང་བ་དང༌། ཆོས་ནག་པོ་དང་བྲལ་བའི་ཆོས་དང་འདུལ་བ་མངའ་བས་སྐུ་ལ་སྨེ་བ་ནག་བག་མེད་པ་དང༌། ཤིང་བལ་ལྟར་ཡང་པ་འཐོབ་པའི་ཆོས་སྟོན་པས་ཕྱག་ཤིང་བལ་ལྟར་འཇམ་པ་དང༌། དགེ་སྦྱོང་ཆེན་པོ་བརྙེས་པས་ཕྱག་གི་རི་མོ་སྣུམ་པའི་མདངས་ཡོད་པ་དང༌། ཟབ་ཅིང་བརྟེན་པར་བཞུགས་པས་ཕྱག་གི་རི་མོ་ཟབ་པ་དང༌། བཟོད་པའི་ཆོས་སྟོན་པས་ཕྱག་གི་རི་མོ་རིང་བ་དང༌། བསླབ་པའི་གནས་ཧ་ཅང་མི་རིང་བར་འཆའ་བས་ཞལ་གྱི་སྒྲོས་ནི་ཧ་ཅང་མི་རིང་བ་དང༌། གཟུགས་བརྙན་འཇིག་རྟེན་དུ་བཀྱེ་བས་མཆུ་ནི་བིམ་པ་ལྟར་དམར་ཞིང་གཟུགས་བརྙན་སྣང་བ་དང༌། འཇམ་ཞིང་ཏུལ་བས་ལྗགས་མཉེན་པ་དང༌། ཡོན་ཏན་ཕྲ་བའི་ཚོགས་དང་ལྡན་པས་ལྗགས་ཤིན་ཏུ་སྲབ་པ་དང༌། བྱིས་བའི་སྐྱེས་བུ་འདོད་ཆགས་ཅན་གྱིས་ཆོས་དང་འདུལ་བ་གཏིང་དཔག་དཀའ་བས་ལྗགས་ཤིན་ཏུུ་དམར་བ་དང༌། གླང་པོ་དང་འབྲུག་གི་སྒྲ་ལྟ་བུར་བསྙིངས་པ་མི་མངའ་བས་འབྲུག་གི་སྒྲ་དབྱངས་དང་ལྡན་པ་ཉིད་དང༌། སྙན་ཅིང་འཇམ་པར་སྨྲ་བའི་སློབ་མ་མངའ་བས་གསུང་མཉེན་ཅིང་འཇམ་པ་དང༌། སྲིད་པར་ཀུན་ཏུ་སྦྱོར་བས་ལས་འདས་པས་ཚེམས་མཆེ་བ་ཟླུམ་པ་དང༌། སྐྱེ་བོ་རྣོ་བ་རྣམས་འདུལ་བས་ཚེམས་མཆེ་བ་རྣོ་བ་དང༌། ཆོས་དང་འདུལ་བ་ཤིན་ཏུུ་དཀར་བས་ཚེམས་མཆེ་བ་ཤིན་ཏུུ་དཀར་བ་དང༌། སའི་ཕྱོགས་མཉམ་པ་ལ་བཞུགས་པས་མཆེ་བ་མཉམ་པ་དང༌། རིམ་གྱིས་རྟོགས་པའི་ཆོས་སྟོན་པས་མཆེ་བ་བྱིན་གྱིས་ཕྲ་བ་དང༌། ཤེས་རབ་ཀྱི་རི་བོ་མཐོན་པོ་ལ་བཞུགས་པས་ཤངས་མཐོ་བ་དང༌། འདུལ་བའི་སྐྱེ་བོ་གཙང་མ་མངའ་བས་ཤངས་མཆོག་ཏུ་དག་ཅིང་གཙང་བ་དང༌། སངས་རྒྱས་ཀྱི་ཆོས་ཡངས་པ་མངའ་བས་སྤྱན་རིང་ཞིང་ཡངས་པ་དང༌། སེམས་ཅན་གྱི་ཚོགས་ཤིན་ཏུ་བསགས་པས་རྫི་མ་སྡུག་པ་དང༌། ལྷ་དང་ལྷ་མ་ཡིན་དང་ན་ཆུང་མཆོག་རྣམས་ཀྱིས་དགའ་བར་བྱ་བ་ཡིན་པས་སྤྱན་པད་མའི་འདབ་མ་འདྲ་བ་དང༌། རྟག་ཏུ་ཡངས་པ་གཟིགས་པས་སྨིན་མའི་ཚུགས་རིང་བ་དང༌། འཇམ་པོས་འདུལ་བ་ལ་མཁས་པས་སྨིན་མ་འཇམ་པ་དང༌། དགེ་བའི་སྣུམ་གྱིས་སྣུམ་པའི་སྐྱེ་བོ་འདུལ་བས་སྨིན་མ་སྣུམ་པ་དང༌། སྐྱོན་ཐམས་ཅད་མཁྱེན་པས་སྨིན་པའི་སྤུ་མཉམ་པ་དང༌། ཆོས་ཡངས་ཤིང་དོན་དང་ལྡན་པ་མངའ་བས་སྙན་ཤལ་རིང་ཞིང་ལེགས་པར་རྒྱས་པ་དང༌། ཉོན་མོངས་པའི་རྒྱུད་ལས་རྒྱལ་བས་སྙན་མཉམ་པ་དང༌། སེམས་ཅན་བསམ་པ་མ་ཉམས་པ་འདུལ་བས་སྙན་གྱི་དབང་པོ་ཉམས་པ་རྣམ་པར་སྤངས་པ་དང། ལྟ་བའི་རྣམ་པ་ཐམས་ཅད་བྱང་བས་དཔྲལ་བ་ལེགས་པར་གྲུབ་པ་དང༌། ཕས་ཀྱི་རྒོལ་བ་ཤིན་ཏུ་འདུལ་བས་དཔྲལ་བ་དབྱེས་ཆེ་བ་སྟེ་ཡངས་པ་དང༌། སྨོན་ལམ་དམ་པ་རྫོགས་པས་དབུ་རྒྱས་པ་དང༌། ཡུལ་གྱི་པུང་པ་བཟློག་པས་དབུ་སྐྲ་བུང་བ་ལྟར་གནག་པ་དང༌། མཐོང་སྒོམ་གྱིས་སྤང་བྱའི་བག་ལ་ཉལ་བ་ཟད་པས་དབུ་སྐྲ་སྡུག་པ་དང༌། ཐུགས་འཇམ་པོས་བསྟན་པའི་སྙིང་པོ་ཐུགས་སུ་ཆུད་པས་དབུ་སྐྲ་འཇམ་པ་དང༌།རྟག་ཏུ་མ་འཁྲུགས་པའི་ཐུགས་དང་ལྡན་པས་དབུ་སྐྲ་མ་འཛིངས་པ་དང༌། བརླང་བའི་གསུང་དང་བྲལ་བས་དབུ་སྐྲ་མི་བཤོར་བ་སྟེ་མི་རྩུབ་པ་དང༌། བྱང་ཆུབ་ཀྱི་ཡན་ལག་སྤོས་ཀྱི་མེ་ཏོག་གིས་སྐྱེ་བོ་མཐུན་པར་སྒྲུབ་པས་དབུ་སྐྲ་དྲི་ཞིམ་ཞིང་སྐྱེས་བུའི་ཡིད་འཕྲོག་པར་བྱེད་པ་དང༌། སངས་རྒྱས་བཅོམ་ལྡན་འདས་རྣམས་ནི་ཕྱག་དང་ཞབས་དཔལ་གྱི་བེའུ་དང་བཀྲ་ཤིས་དང་དགའ་བ་འཁྱིལ་བས་བརྒྱན་པ་སྟེ། དེ་རྣམས་ནི་སངས་རྒྱས་ཀྱི་དཔེ་བྱད་བཟང་པོ་བརྒྱད་ཅུར་མདོ་ལས་བཞེད་པ་ཡིན་ནོ། ། ༣༽སྤྲུལ་པའི་སྐུ་བཤད་པ། ད་ནི་སྤྲུལ་པའི་སྐུ་བཤད་པར་བྱ་སྟེ། །དབུ་མ་མདོ་སྡེའི་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ ཐབས་ཡིན་ནོ། །ཞེས་དང༌། རྒྱུད་བླ་མར་ཡང༌། །ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང༌། །དགའ་ལྡན་ནས་ནི་འཕོ་བ་དང༌། །ལྷུམས་སུ་འཇུག་དང་བལྟམས་པ་དང༌། །བཟོ་ཡི་གནས་ལ་མཁས་པ་དང༌། །བཙུན་མོའི་འཁོར་དགྱེས་རོལ་བ་དང༌། ། ངེས་འབྱུང་དཀའ་བ་སྤྱོད་པ་དང༌། །བྱང་ཆུབ་སྙིང་པོར་གཤེགས་པ་དང༌། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང༌། །མྱ་ངན་འདས་པར་གཤེགས་མཛད་རྣམས། ། ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར། །གང་གིས་སྲིད་པ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག ། མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཅེས་པ་སྣ་ཚོགས་པའི་སྤྲུལ་པ་གང་གིས་སྲིད་པ་ཇི་སྲིད་གནས་ཀྱི་བར་དུ། འགྲོ་བ་སེམས་ཅན་ཐམས་ཅད་གང་ལ་གང་འདུལ་དེར་སྟོན་པའི་ཚུལ་གྱིས་གནས་སྐབས་དང༌། མཐར་ཐུག་གི་ཕན་པའི་རྣམ་པ་སྣ་ཚོགས་པ་དག་མཉམ་པ་སྟེ་གཅིག་ཆར་དུ་མཛད་པའི་སྐུ་གང་ཡིན་པ་དེ་ནི་ཐུབ་པའི་གཟུགས་སྐུ་གཉིས་ལས་སྤྲུལ་པའི་སྐུ་ཡིན་ནོ། །དཔེར་ན་མེ་ལ་ལར་འབར་བར་སྣང་ཞིང་ལ་ལར་ཞི་བར་སྣང་བ་དང༌། ཞི་བར་སྣང་བ་ལས་སླར་ཡང་འབར་བར་སྣང་བ་ལྟར། སྐུ་འདི་ནི་སྣང་བ་ལས་ནི་སྣང་བ་དང༌། ལ་ལར་མི་སྣང་བ་ལས་སླར་ཡང་ལ་ལར་སྣ་ཚོགས་སུ་སྟོན་པའི་ཕྱིར་ཇི་སྲིད་འཁོར་བ་གནས་ཀྱི་བར་དུ་རྒྱུན་མི་འཆད་པ་ཡིན་ནོ། ། ༤༽འཕྲིན་ལས་བཤད་པ། དེ་བཞིན་འཁོར་བ་ཇི་སྲིད་འདི། ལས་ནི་རྒྱུན་མི་འཆད་པར་འདོད། །ཅེས་པ་སྐུ་དང་གསུང་དང་ཐུགས་ཀྱི་ལས་ཐམས་ཅད་སེམས་ཅན་གྱི་དོན་འབའ་ཞིག་ཏུ་ལྷུན་གྱིས་གྲུབ་པར་འཇུག་པ་ནི་འཕྲིན་ལས་ཏེ། རྒྱུད་བླ་མར། དཔེ་དགུས་འཕྲིན་ལས་གསུངས་ལ། །མི་རྟོག་བཞིན་ཏུ་སྐུའི་སྣང་བ་སྟོན་པ་བརྒྱ་བྱིན་གྱི་དཔེ་དང༌། འབད་པ་མེད་པར་ཆོས་གསུངས་པ་ལྷའི་རྔའི་དཔེ་དང༌། མཁྱེན་བརྩེས་ཀུན་ལ་ཁྱབ་པ་སྤྲིན་གྱི་དཔེ་དང༌། ཆོས་སྐུ་ཀུན་ལ་མ་གཡོས་པ་བཞིན་ཏུ་སྤྲུལ་པ་སྟོན་པ་ཚངས་པའི་དཔེ་དང༌། ཡེ་ཤེས་ཀྱི་སྣང་བ་འཕྲོ་བ་ཉི་མའི་དཔེ་དང༌། ཐུགས་ཀྱི་གསང་བ་ཡིད་བཞིན་ནོར་བུའི་དཔེ་དང༌། གསུང་གི་གསང་བ་སྒྲ་བརྙན་གྱི་དཔེ་དང༌། སྐུ་ཡི་གསང་བ་ནམ་མཁའི་དཔེ་དང༌། འགྲོ་བའི་དཀར་པོའི་ཆོས་ཀྱི་གཞི་རྟེན་དུ་གྱུར་པས་གཞིའི་དཔེ་སྟེ་དགུས་སོ། །ཇི་སྐད་དུ། གང་ཞིག་བརྒྱ་བྱིན་རྔ་དང་སྤྲིན་བཞིན་དང༌། །ཚངས་ཉི་རིན་ཆེན་ཡིད་བཞིན་ནོར་རྒྱལ་བཞིན། ། སྒྲ་བརྙན་ནམ་མཁའ་ས་གཞི་སྲིད་མཐའི་པར། །འབད་མེད་གཞན་གྱི་དོན་བྱེད་རྣལ་འབྱོར་རིག ། རིན་ཆེན་ལྷ་དབང་སྣང་བཞིན་སྟོན་པ་སྟེ། །ལེགས་པར་འདོམས་མཛད་ལྷ་ཡི་རྔ་དང་འདྲ། །ཁྱབ་བདག་མཁྱེན་དང་རྩེ་ཆེན་སྦྲིན་ཚོགས་ནི། །མཐའ་ཡས་འགྲོ་བ་སྲིད་རྩེའི་བར་དུ་ཁྱབ། །ཚངས་བཞིན་ཟག་མེད་གནས་ལས་མ་བསྐྱེད་པར། སྤྲུལ་བ་རྣམ་པ་དུ་མ་རབ་ཏུ་སྟོན། །ཉི་བཞིན་ཡེ་ཤེས་སྣང་བ་རབ་འཕྲོ་གང༌། །རྣམ་དག་རིན་ཆེན་ཡིད་བཞིན་ནོར་འདྲའི་ཐུགས། །རྒྱལ་བ་རྣམས་ཀྱི་གསུང་སྟེ། བྲག་ཆ་བཞིན་དུ་ཡི་གེ་མེད། སྐུ་ནི་ནམ་མཁའ་ལྟ་བུར་ཁྱབ་དང་གཟུགས་མེད་རྟག་པ་ཉིད། ས་བཞིན་འགྲོ་བའི་དཀར་པོའི་ཆོས་ཀྱི་སྨན་རྣམས་མ་ལུས་པའི། རྣམ་པ་ཀུན་ཏུ་གཞིར་གྱུར་པ་ནི་སངས་རྒྱས་ས་ཡིན་ནོ། །ཞེས་གསུངས་སོ། །དེ་ལ་སྐུའི་རྣམ་འགྱུར་ནི་སྐུའི་གསང་བ་དང༌། གསུང་གི་རྣམ་འགྱུར་ནི་གསུང་གི་གསང་བ་དང༌། ཐུགས་ཀྱི་རྣམ་འགྱུར་ནི་ཐུགས་ཀྱི་གསང་བའོ། ། རྣམ་འགྱུར་དེ་དག་གསང་ཞིང་སྦས་བ་བཞིན་དུ་གཞན་གྱིས་ཇི་ལྟ་བ་བཞིན་དུ་མི་ཤེས་པ་ནི་གསང་བའི་དོན་ཏོ། །འཇིག་རྟེན་ན་ཡང་གསང་དགོས་པའི་དོན་དེ་གཞན་གྱིས་ཤེས་པ་དང་མ་ཤེས་པ་ལས་གསང་ཐུབ་མ་ཐུབ་པར་འཇོག་པ་བཞིན་ནོ། །གསང་བ་བསམ་གྱིས་མི་ཁྱབ་པའི་མདོར་ཡང༌། སྐུ་གསུང་ཐུགས་ཀྱི་རྣམ་འགྱུར་བསམ་གྱིས་མི་ཁྱབ་པ་ལ་གསང་བའི་དོན་དུ། ལག་ན་རྡོ་རྗེས་གསུངས་སོ། །དེས་ན་སྤྲུལ་བའི་སྐུ་སྣ་ཚོགས་པས་འཁོར་བ་སྲིད་དུ་གཅིག་ཆར་གཞན་དོན་མཛད་པ་དེ་བཞིན་དུ་ཡུན་འཁོར་བ་ཇི་སྲིད་གནས་ཀྱི་བར་དུ་ཐུགས་པ་འདིའི་སྐུ་གསུང་ཐུགས་ཀྱི་མཛད་པ་འཕྲིན་ལས་ནི་རྒྱུན་མི་འཆད་པར་འདོད་ཅིང་བསྟན་ཏོ། ། ཇི་ལྟར་སེམས་ཅན་གྱི་ལུས་ངག་ཡིད་ཀྱི་ལས་ནི་རྣམ་ཤེས་ཀྱི་རྗེས་སུ་འགྲོ་ཞིང་རྣམ་ཤེས་ཀྱི་རྗེས་སུ་འབྲང་བ་ལྟར། སངས་རྒྱས་ཀྱི་སྐུ་གསུང་ཐུགས་ཀྱི་ལས་དག་ཀྱང་ཡེ་ཤེས་ཀྱི་རྗེས་སུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་ཡིན་ནོ། །ལས་གསུམ་པོ་དེ་ཉིད་སྐབས་འདིར་རྣམ་པ་ཉི་ཤུར་ཕྱེ་ནས་གསུངས་པ་འདི་ལྟ་སྟེ། འགྲོ་རྣམས་ཞི་བའི་ལས་དང་ནི། །བསྡུ་རྣམ་བཞི་ལ་འགོད་པ་དང༌། །ཀུན་ནས་ཉོན་མོངས་བཅས་པ་ཡི། །རྣམ་པར་བྱང་བ་རྟོགས་པ་དང༌། །སེམས་ཅན་རྣམས་དོན་ཇི་བཞིན་གྱི། དོན་དང་ཕ་རོལ་ཕྱིན་དྲུག་དང༌། །སངས་རྒྱས་ལམ་དང་རང་བཞིན་གྱིས། །སྟོང་པ་ཉིད་དང་གཉིས་ཟད་དང༌། བརྡ་དང་དམིགས་པ་མེད་པ་དང༌། །ལུས་ཅན་རྣམས་ནི་ཡོངས་སྨིན་དང༌། ། བྱང་ཆུབ་སེམས་དཔའི་ལམ་དང་ནི། །མངོན་པར་ཞེན་པ་བཟློག་པ་དང༌། །བྱང་ཆུབ་ཐོབ་དང་སངས་རྒྱས་ཞིང༌། །རྣམ་པར་དག་དང་ངེས་པ་དང༌། །སེམས་ཅན་དོན་ནི་ཚད་མེད་དང༌། །སངས་རྒྱས་བསྟེན་སོགས་ཡོན་ཏན་དང༌། །བྱང་ཆུབ་ཡན་ལག་ལས་རྣམས་ནི། ཆུད་མི་ཟ་དང་བདེན་མཐོང་དང༌། །ཕྱིན་ཅི་ལོག་ནི་སྤངས་པ་དང༌། །དེ་བཞིན་མེད་པའི་ཚུལ་དང་ནི༌། །རྣམ་པར་བྱང་དང་ཚོགས་དང་ནི། །འདུས་བྱས་འདུས་མ་བྱས་པ་ལ། །ཐ་དད་ཡོངས་སུ་མི་ཤེས་དང༌། །མྱ་ངན་འདས་ལ་འགོད་པ་སྟེ། །ཆོས་ཀྱི་སྐུ་ཡི་འཕྲིན་ལས་ནི། རྣམ་པ་ཉི་ཤུ་བདུན་དུ་བཞེད། །ཅེས་པ་ལ་འདིར་དེ་ལ་འགོད་པ་དང་དེ་ལ་སྦྱོར་བ་དང་དེ་ལ་བཀྲི་བ་དང་དེ་ལ་འདྲེན་པ་དང་དེ་ལ་བསྐུལ་པ་དང་དེ་ལ་གཞུག་པ་དང་དེ་ལ་གདམས་པ་ཞེས་པ་དག་རྣམ་གྲངས་སུ་རིག་པར་བྱའོ། །ངན་སོང་དང་ལྷའི་འགྲོ་བ་རྣམས་རིམ་གྱིས་ཞི་བ་ཐེག་པ་གསུམ་གྱི་མྱ་ངན་ལས་འདས་པ་ལ་འགོད་པའི་འཕྲིན་ལས་དང༌། མིའི་འགྲོ་བ་རྣམས་བསྡུ་བའི་དངོས་པོ་རྣམ་བཞི་ལ་འགོད་པའི་འཕྲིན་ལས་དང༌། ཀུན་ནས་ཉོན་མོངས་པ་དང་བཅས་པའི་རྣམ་པར་བྱང་བའི་ཆོས་དག་སྒྱུ་མ་ལྟ་བུར་རྟོགས་པ་ལ་འགོད་པའི་འཕྲིན་ལས་དང༌། སེམས་ཅན་རྣམས་ཡང་དག་པའི་མཐའི་དོན་ཇི་ལྟ་བ་བཞིན་གྱི་དོན་ལ་འགོད་པ་དང༌། སྒྱུ་མ་ལྟ་བུའི་ཕ་རོལ་ཏུ་ཕྱིན་དྲུག་གི་སྦྱོད་པ་ལ་འགོད་པ་དང༌། སངས་རྒྱས་་ཀྱི་ལམ་རྣམ་པ་ཐམས་ཅད་མཁྱེན་པ་ཉིད་ལ་འགོད་པ་དང༌། ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་ཤེས་པ་ལ་འགོད་པ་དང༌། གཉིས་ཆོས་ཐམས་ཅད་གདོད་ནས་ཟད་པར་ཁོངས་སུ་ཆུད་པ་ལ་འགོད་པ་དང༌། རང་བཞིན་གྱིས་སྟོང་ཡང་ཆོས་ཀྱི་རྣམ་དབྱེ་བྱེད་པའི་ཆོ་བཏགས་པའི་ཐ་སྙད་འཇིག་རྟེན་གྱི་བརྡ་ཉེ་བར་བཟུང་བ་ལ་འགོད་པ་དང༌། སྦྱིན་སོགས་ཀྱི་སྤྱོད་པ་འཁོར་གསུམ་དུ་དམིགས་པ་མེད་པ་ལ་འགོད་པ་དང༌། ལུས་ཅན་རྣམས་དགེ་བའི་རྩ་བ་ཡོངས་སུ་སྨིན་པ་ལ་འགོད་པའི་ལས་དང༌། རྒྱལ་སྲས་ཀྱིས་མི་བསླབ་པའི་ཆོས་གང་ཡང་མེད་པའི་ཆོས་ཐམས་ཅད་བྱང་ཆུབ་སེམས་དཔའི་ལམ་དུ་ཤེས་པ་ལ་འགོད་པ་དང༌། སེམས་ཅན་རྣམས་དངོས་པོར་མངོན་པར་ཞེན་པའི་རློམས་སེམས་བཟློག་པ་ལ་གདམས་པའི་ལས་དང༌། བྱང་ཆུབ་ལ་བསླབས་པས་་མ་འདྲེས་པའི་བར་རྫོགས་ན་རྡོ་རྗེ་ལྟ་བུའི་ཏིང་ངེ་འཛིན་གྱི་བྱང་ཆུབ་འཐོབ་པ་ལ་འགོད་པ་དང༌། རང་གཞན་གྱི་ལུས་ངག་ཡིད་ཀྱི་གནས་ངན་ལེན་དག་པ་ནི་སངས་རྒྱས་ཀྱི་ཞིང་རྣམ་པར་དག་པ་ལ་འགོད་པ་དང༌། སེམས་དང་བོ་བསྐྱེད་པ་ནས་བྱང་ཆུབ་སེམས་དཔའ་སངས་རྒྱས་ཀྱི་ཕུང་པོར་ངེས་པ་ལ་འགོད་པ་དང༌། བྱང་ཆུབ་སེམས་དཔའ་སེམས་ཅན་གྱི་དོན་ནི་ཚད་མེད་པ་འགྲུབ་པ་ལ་འགོད་པ་དང༌། བྱང་ཆུབ་སེམས་དཔའ་ཕྱོགས་བཅུའི་སངས་རྒྱས་བསྙེན་བཀུར་དང༌། ཆོས་ཉན་པ་དང་མངོན་ཤེས་ཀྱི་ཕར་ཕྱིན་གྲུབ་པ་ལ་སོགས་པའི་ཡོན་ཏན་ལ་འགོད་པ་དང༌། བྱང་ཆུབ་བསྒྲུབ་པའི་ལམ། སྦྱིན་སོགས་ཀྱི་ཡན་ལག་འཁོར་གསུམ་དུ་མི་རྟོག་པའི་དགེ་བ་ལ་འགོད་པ་དང༌། སངས་རྒྱས་ཀྱིས་དོན་བྱས་པའི་སེམས་ཅན་གྱི་དགེ་བ་ཕྱིས་ཆུད་ཟོས་ཤིང་འཁོར་བར་ལྟུང་བ་མ་ཡིན་པའི་ལས་དགེ་བ་རྣམས་ནི་ཆུད་མི་ཟ་བ་ལ་འགོད་པ་དང༌། འཕགས་པའི་བདེན་པ་བཞི་མཉམ་པ་ཉིད་དུ་མཐོང་བ་ལ་འགོད་པ་དང༌། སེམས་ཅན་རྣམས་ཕྱིན་ཅི་ལོག་བཞི་པོ་ནི་སྤངས་བ་ལ་འགོད་པ་དང༌། ཕྱིན་ཅི་ལོག་དེའི་གཞིའི་འམ་གནས་སུ་གྱུར་པའི་དངོས་པོ་མེད་པའི་དཔེའི་ཚུལ་ཆོས་ཐམས་ཅད་རྨི་ལམ་ལྟ་བུར་མཐོང་བ་ལ་འགོད་པ་དང༌། རྣམ་པར་བྱང་བ་ཆོས་ཐམས་ཅད་ཀྱི་མཉམ་པ་ཉིད་ལ་འགོད་པ་དང༌། སྒྱུ་མ་ལྟ་བུའི་བསོད་ནམས་དང་ཡེ་ཤེས་ཀྱི་ཚོགས་ལ་འགོད་པ་དང༌། འདུས་བྱས་དང་འདུས་མ་བྱས་ཀྱི་མཉམ་པ་ཉིད་གང་ཡིན་པ་དོན་དམ་པ་དེ་ལ་ཐ་དད་ཡོངས་སུ་མི་ཤེས་པ་ལ་འགོད་པ་དང༌། གང་གིས་ཀྱང་མ་སྤྲུལ་བའི་སྟོང་བ་ཉིད་སྐྱེ་མེད་འགག་མེད་མི་མཉམ་བའི་མྱ་ངན་འདས་པ་ལ་འགོད་བའི་འཕྲིན་ལས་ཏེ། དེ་ལྟར་ན་ཆོས་ཉིད་ཀྱི་སྐུའི་མཛད་པ་འཕྲིན་ལས་བཤད་མ་ཐག་པ་འདི་སྐབས་འདིར་དབྱེ་བ་རྣམ་པ་ཉི་ཤུ་རྩ་བདུན་དུ་བཅོམ་ལྡན་འདས་བཞེད་དོ། །དེའི་ཕྱིར་སངས་རྒྱས་ཀྱི་ངོ་བོ་ཉིད་ཀྱི་སྐུ་ནི་སྐུ་གསུམ་མཛད་པ་དང་བཞིར་ཡང་དག་པར་བསྟན་ཏོ། །དེ་རྣམས་ཀྱིས། ངོ་བོ་ཉིད་ལོངས་སྦྱོད་རྫོགས་བཅས་དང༌། །དེ་བཞིན་གཞན་པ་སྤྲུལ་བ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་བརྗོད། །ཅེས་པ་རྣམས་བཤད་ཟིན་ཏོ། ། དངོས་པོ་བརྒྱད་ལས་ཆོས་ཀྱིས་སྐུས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བཤད་པ་ཡིན་ནོ། །སྐབས་བརྒྱད་པ་འདི་ཉི་ཁྲིའི་ལེའུ་རེ་གཉིས་པའི་སྟོད་ཅུང་སོང་བ་ནས་བཟུང་སྟེ། ལེའུ་བདུན་བཅུ་རྩ་གཅིག་པ་ཆོས་ཉིད་མི་འགྱུར་བའི་ལེའུ་རྫོགས་མཚམས་ཀྱི་བར་གྱིས་སྟོན་ནོ། །དེ་ལྟར་བསྟན་པ་དེ་རྣམས་ཀྱིས་དགོས་འབྲེལ་བསྟན་ནས་དངོས་པོ་བརྒྱད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་བཤད་པ་སོང་ཟིན་ཏོ། ། ༼༣༽དོན་བསྡུས་གཞན་དང་གཞན་གྱིས་མཇུག་བསྡུས་ཏེ་བསྟན་པ། ད་ནི་གསུམ་པ་དོན་བསྡུས་གཞན་དང་གཞན་གྱིས་འཇུག་བསྡུས་ཏེ་བསྟན་པ་ནི། མཚན་ཉིད་དེ་ཡི་སྦྱོར་བ་དང༌། །དེ་རབ་དེ་ཡི་སྦྱོར་པ་དང༌། །དེ་རབ་དེ་ཡི་གོ་རིམ་དང༌། །དེ་མཐའ་དེ་ཡི་རྣམ་སྨིན་ནི། །དོན་བསྡུས་གཞན་ཏེ་རྣམ་པ་དྲུག །ཞེས་པ་གང་ལ་བསླབ་པར་བྱ་བའི་གཞི་ཤེས་རབ་ཀྱི་ཕ་རོལ་ཏུ་ཕྱིན་པ། ཆོས་ཀྱི་དབྱིངས་སྐབས་དང་པོ་གསུམ་གྱི་གནས་སྐབས་སུ། དེ་དང་དེའི་མངོན་པར་རྟོགས་པ་དང་མཐུན་པའི་མཁྱེན་པ་གསུམ་གྱི་མཚན་ཉིད་དང༌། གཞི་ཤེས་རབ་ཀྱི་ཕ་རོལ་ཏུ་ཕྱིན་པ་འགོག་བདེན་ཟབ་མོའི་མཁྱེན་པ་གསུམ་གྱི་མཚན་ཉིད་དེའི་རྣམ་པ་བརྒྱ་དང་བདུན་ཅུ་རྩ་གསུམ་པོ་ཀུན་མངོན་སུམ་དུ་རྫོགས་པར་རྟོགས་པའི་རྣལ་འབྱོར་དང༌། རྣལ་འབྱོར་དེ་རབ་ཏུ་གྱུར་པ་ཆོས་ཐམས་ཅད་དངོས་པོ་མེད་པ་རྨི་ལམ་ལྟ་བུའི་ངོ་བོར་མཐོང་བ་རྩེ་མོའི་རྣལ་འབྱོར་དང༌། ཆོས་ཐམས་ཅད་དངོས་པོ་མེད་པ་སྒྱུ་མ་ལྟ་བུའི་ངོ་བོར་ཁོང་དུ་ཆུད་པ་ནི་རྣལ་འབྱོར་རབ་ཏུ་གྱུར་པ་དེའི་ངང་ནས་ལམ་བགྲོད་པས་རིམ་གྱིས་ཆོས་སྐུ་རྫོགས་པའི་གོ་རིམ་མཐར་གྱིས་པའི་རྣལ་འབྱོར་དང༌། ཆོས་སྐུ་ཡོངས་སུ་རྫོགས་པས་རིམ་པ་དེ་མཐར་ཐུག་པ་ཡེ་ཤེས་སྐད་ཅིག་མ་གཅིག་ཆར་དུ་ཆོས་སྐུ་རྫོགས་པའི་རྣལ་འབྱོར་དང༌། རྣལ་འབྱོར་དེའི་འབྲས་བུ་རྣམ་པར་སྨིན་པ་ལྷུན་གྱིས་གྲུབ་པའི་ཆོས་སྐུ་སྟེ། དེ་རྣམས་ནི་ཤེར་ཕྱིན་གྱི་དོན་བསྡུས་པའི་ཚུལ་སྔར་བསྟན་པ་ལས་གཞན་རྣམ་པ་དྲུག་ཡིན་ནོ། ། ཡུལ་ནི་རྣམ་པ་གསུམ་པོ་རྒྱུ་སྦྱོར་བ་བཞིའི་བདག་ཉིད་དང༌། ཆོས་སྐུ་འཕྲིན་ལས་འབྲས་བུ་ནི་དོན་བསྡུས་གཞན་དེ་རྣམ་པ་གསུམ་ཞེས་པ་བྱང་ཆུབ་སེམས་དཔའ་གང་ལ་བསླབ་བར་བྱ་བའི་ཡུལ་ཆོས་ཉིད་ཀྱི་གནས་སྐབས་མཁྱེན་པ་རྣམ་པ་གསུམ་པོ་དང༌། དེ་སྒྲིབ་བ་དང་བྲལ་བར་བྱེད་པའི་རྒྱུ་སྦྱོར་བ་བཞིའི་བདག་ཉིད་དང༌། ཆོས་ཀྱི་སྐུ་འཕྲིན་ལས་དང་བཅས་པ་བྲལ་བའི་འབྲས་བུ་སྟེ། དེ་དག་ནི་ཤེར་ཕྱིན་གྱི་དོན་བསྡུས་ཚུལ་སྔར་བསྟན་པ་རྣམས་ལས་གཞན་རྣམ་པ་གསུམ་དུ་བསྡུས་པའི་ཚུལ་ཡིན་ནོ། །དེ་རྣམས་ཀྱིས་དོན་བསྡུས་གཞན་དང་གཞན་གྱི་མཇུག་བསྡུས་ཏེ་བསྟན་པ་དང༌། དེའི་གོང་དུ་དགོས་འབྲེལ་བསྟན་ནས་དངོས་པོ་བརྒྱད་ཀྱི་ཤེར་ཕྱིན་བཤད་པ་དང༌། དེའི་གོང་དུ་བསྟན་བཅོས་ལ་འཇུག་པའི་སྒོ་འདོད་པའི་ལྷ་ལ་ཕྱག་འཚལ་བ་དང་གསུམ་གྱིས་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པ་མདོ་ཇི་ལྟ་བ་བཞིན་དུ་རྒྱལ་བས་བསྟན་པ་འབའ་ཞིག་གི་དབང་དུ་བྱས་ནས་བཤད་པ་ཡིན་ནོ། ། རྒྱལ་ཚབ་བྱམས་པ་མགོན་པོས་མཛད་པའི་བསྟན་བཅོས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་འགྲེལ་བ་མདོ་ལུགས་མ་ཞེས་བྱ་བ་འདི་ཡང་ཕྱོགས་མེད་རིས་མེད་པ་རྟོན་པ་བཞི་ལྡན་གྱིས་བུ་སློབ་མང་པོས་ཡང་ཡང་གསོལ་བ་བཏབ་པའི་ངོར་ཡོངས་སུ་རྫོགས་པར་སྦྱར་བའོ། །མདྒ་ལཾ། བྷ་ཝན་དུ། དགེའོ། །བཀྲ་ཤིས།