སོ་གཅིག་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
དེ་ནས་ཟླ་བ་དང་པོའི་ཚེས་བཅུ་ལ་བསམ་འགྲུབ་རྩེར་སླེབ(སླེབས)པ་ཡིན། སླེབ(སླེབས)འཕྲལ་ལ་གཟའ་སྐར་དང་བསྟུན་པའི་ཀུན་གཟིགས་སྟེང་གི་བཟབ་ཁང་ལ་རབ་གནས་ཀྱང་བྱས། ཞག་ཤས་སྔ་སོར་གྱི་རྒྱུན་ལྟར་ཚེ་དབང་སོགས་རྐྱེན་སེལ་རྣམས་རིམ་ཅན་དུ་ཕུལ། འདིར་ཟླ་གཅིག་ཙམ་ལོན་ནས། བརྟག་གཉིས་ཀྱི་བཤད་པའི་འཕྲོས་དེ་ཡང༌། བརྟག་པ་ཕྱི་མའི་ལེའུ་གསུམ་པ་ཡན་ཆད་སོང་། དེ་མན་ཆད་བཤད་ལུང་ཙམ་བྱས། དེ་བར་དུ་སྐུ་སྐྱེ་བ་སོགས་ལ་གསར་རྙིང་མ་ངེས་པའི་ལུང་འདྲ་ཡང་བཀླགས།
ཆོས་རྗེ་ཡེ་ཤེས་རྒྱ་མཚོའི་དྲུང་ཡང་ཞལ་ངོ་རྣམས་ཀྱིས་སྤྱན་འདྲེན་མཛད་པའི་གཏིང་སྐྱེས་རང་ལ་ཕེབས་སོང༌། འཕྱིང་རུ་གོང་དཀར་རྡོ་རྗེ་གདན་ནས་བླ་མ་དམ་པ་ཡེ་ཤེས་དབང་པོ་ཆོས་དབྱིངས་སུ་སྐུ་ཐིམ་པའི་དགོངས་པ་གསལ་བ་འདེབས་ཀྱང་སླེབ(སླེབས)། རྟེན་བཞེངས་མ་ཚར་བར་སྡེ་པ་ནས་བཤོལ་འདེབས་ཞིག(ཤིག)ཞུས་པའང་བྱུང༌། བླ་མ་དམ་པ་དེ་བྱ་བཏང་ཡིན་པས་རྟེན་བཞེངས་ཀྱི་རྒྱུ་ཡང་ཕལ་ཆེར་འདི་ནས་ཀ་བསྲིངས་པ་ཡིན། ངེད་ཤིན་ཏུ་བཀའ་ནན་ཆེས་པའི་སྟབས། འདི་སྐབས་ཡུན་རིང་བ་ཞིག་སྡོད་དགོས་བྱུང་སྟེ། སྡེ་སྲིད་ཡབ་སྲས་དྲུང་དུ་དཔལ་རྡོ་རྗེ་འཕྲེང་བའི་དཀྱིལ་འཁོར་བཞི་བཅུ་ཞེ་གཉིས། དགེ་ལེགས་སུ་བྱེད་པའི་དཀྱིལ་འཁོར་གསུམ་སྟེ། དཀྱིལ་འཁོར་བཞི་བཅུ་ཞེ་ལྔར་དབང་བསྐུར་བ་དང༌། གཞན་ཡང་དོན་གཉེར་དགེ་བཤེས་འགའ་ཤས་དང༌། ཁམས་པ་གྲྭ་རིགས་འགའ་དང་བཅས་པ་ལ་ཡང༌། དབང་ཡོངས་སུ་རྫོགས་པ་ཚར་གཅིག་བྱས།
དཔལ་བདེ་མཆོག་གི་དཀྱིལ་འཁོར་གྱི་སྐབས། རྡུལ་ཚོན་གྱི་དཀྱིལ་འཁོར་བཞེངས་ཤིང༌། མཆོད་པའི་བཀོད་པ་སོགས་ཆོ་ག་མཐའ་རྒྱས་དང་། གཞན་ཡང་གཏོར་མའི་ཆོ་ག་སོགས་རྡོ་རྗེ་ཕྲེང་བ་དང༌། མན་ངག་སྙེ་མ་ནས་གསུང་པ་ལྟར། རང་གཞུང་ཇི་ལྟ་བ་བཞིན་དུ་སྒྲུབས(བསྒྲུབས)། དེ་སྐབས་སྡེ་སྲིད་ཀྱི་ཕྱག་ཏུ་འབྱོར་པའི་རྟེན་གྱི་རིགས་འགངས་ཆེ་བ་རྣམས་ལ། སྐུ་ཁྲུས་དང་རབ་གནས་ཁ་གསོ་སོགས་དང༌། བཀྲལ་བཏགས་ཀྱི་གུར་ལ་བགེགས་སྤྲོད་སོགས་ཀྱང་བྱས།
དེ་རྗེས་སྡེ་སྲིད་རང་ལ་དཔལ་དུས་ཀྱི་འཁོར་ལོའི་དབང་བསྐུར་ཡོངས་རྫོགས་ཞིག(ཤིག)ཀྱང་བསྒྲུབས། དཔལ་རྡོ་རྗེ་འཇིགས་བྱེད་ཆེན་པོའི་ཆོ་ག་ལ་བརྟེན་པའི་དྲུག་ཅུ་རྩ་བཞིའི་ལག་ལེན་གྱི་ཡི་གེ་ཅུང་ཟད་རྒྱས་པ་འདི་ཡང་སྐབས་འདི་དག་ཏུ་བརྩམས་པ་ཡིན། ཆོས་རྗེ་ཤངས་པ(པར)སློབ་དཔོན་ལ་བརྟག་པ་དང་པོའི་ལེའུ་བདུན་པ་ཡན་ཆད་ཀྱི་བཤད་པ་ཙམ་སོང༌།
ཡང་འདི་སྐབས་མདོ་ཁམས་བྱང་ངོས་ཕྱོགས་ཀྱི་དགོན་པ་ཉུག་རྗེས་ནས། ཀ་བཞི་རྒྱལ་མཚན་སེང་གེའི་སྐུ་སྐྱེ། བླ་མ་ཀུན་དགའ་ལྷུན་གྲུབ་པའི་ཕྱག་གཡོག་གཉེར་པ་ཡང་བྱེད་པ། སོག་པོའི་ཡུལ་དུ་ཛམ་ཐང་པའི་གྲྭ་རིགས་ཆེ་ཆེན་ནང་སོའི་ཡང་གཡོགས་གྲག་ཁ་བྱེད་པ། ཀུན་དགའ་བཀྲ་ཤིས་ཟེར་བ་དེ་ཀ་བཞི་པའི་དཔོན་པོ་གཉིས་དང་བཅས་པ་རྣམས་དབུས་གཙང་གི་གནས་མཇལ་དང༌། ཆེ་ཆེན་ནང་སོའི་མང་སྐོལ་ལ་བྱུང་བ་དང་བཏུན(བསྟུན)། བླ་མ་ཀུན་དགའ་ལྷུན་གྲུབ་ཀྱི་འབུལ་སྐྱེལ་བརྡ་མཚོན་ཙམ་དང༌། དབོན་པོ་གཉིས་པོ་ཡང་རེ་ཞིག་ཆོས་ཞུ་བའི་དབང་དུ་བྱས། ངེད་ལ་དམིགས་ནས་བྱོན། ཀུན་དགའ་བཀྲ་ཤིས་གཡོག་མང་དག་དང་བཅས་པ་ལ་དུས་ཀྱི་འཁོར་ལོའི་དབང༌། རྒྱུད་སྡེ་ལྔའི་དབང༌། གུར་ཞལ་གྱི་རྗེས་གནང་སོགས་འདོད་པ་བཞིན་དུ་བྱས།
འདི་ནས་སོག་ཡུལ་ལ་བླ་མ་ཞིག་ངེས་པར་རྫོང་དགོས་ཟེར་ནས། ནན་བཅགས་ཆེས་པས(ཆེ་བས)ཀུན་དགའ་བློ་འཕེལ་བ་སོགས་གྲྭ་རིགས་འགའ་ཡང་བླ་ཆས་དང་བཅས་ཏེ་རྒྱལ་ཁམས་དེ་དག་ཏུ་འགྲོ་དོན་ལ་རྫོང་དགོས་བྱུང་། དེ་སྐབས་ཁོང་རྣམས་ཀྱིས་ཛམ་ཐང་ནས་རྗེ་རྒྱལ་བ་སེང་གེའི་སྐུ་སྐྱེ་ཁམས་དུ(སུ)བྱོན་པ་དེ་ནི་གཤེགས། སྐུ་སྐྱེ་གཉིས་པའི་ཚུལ་དེ་དབོན་པོ་ཞུ་ཚང་རི་ཤིང་པའི་ཞལ་ངོ་དྲང་སྲོང་འདི་ཡིན་ཟེར་བར་འདུག་པས། འཁྲུལ་མེད་ཡིན་ནམ་མིན་བརྟག་པ་བྱེད་དགོས་ཟེར་བ། ཅུང་ཟད་བརྟགས་པས་ཡིན་དུ་ནི་རུང་ཡང༌། ཛམ་ཐང་ཕྱོགས་སུ་ཕན་ཐོགས་པ་ནི་མི་ཡོང་ཟེར་བ་བྱུང༌། དེ་ཁ་ལྟར་ཞིབ་རྒྱས་སུ་སྨྲས་སོ། །
ཡང་བྱང་ཞབས་དྲུང་ནས་ངམ་རིང་དུ་ཚང་སློག་མཛད་རྒྱུ་བྱུང་ཡང༌། ཡོང་སྒོ་ཡོད་པའི་མངའ་ཞབས་ལར་མེད་པས་ཞུ་ངོ་བྱེད་དགོས་གསུང(གསུངས)། དེ་མཐུན་ངོ་ཆེན་ཞུས་པས་ཡོང་སྒོ་དྲག་པའི་དབང་དུ་བྱས། ཟུར་ཚོ་སྐོར་རྣམས་ཐམས་ཅད་བྱུང་བ་ཡིན། དེ་སྐབས་ངམ་རིང་ཆོས་སྡེ་པ་རྣམས་ཀྱིས། ཁ་སྔ་བང་མགྱོགས་བྱས་པས་ཡོང་སྒོ་དྲག་ཤོས་གང་སླེ་སོགས་མང་ཚད་གཅིག་ཆོས་སྡེ་ལ་འཇགས་གྲུབ་འདུག །སྤྱིར་སྡེ་པ་ལས་དགེ་འདུན་ལ་བྱུང་བ་དེ་ལོས་དགའ་སྟེ། བྱང་པ་རང་ལ་ཁ་འགེགས་སུ་སོང་བ་དེ་ཡིན།
སྡེ་སྲིད་ནས་ངེད་ལ་འདི་སྐབས་ལྷོ་ནས་འཕྱོང་ལུང་འབྲོག་པ་དང༌། གཙང་བསམ་འགྲུབ་བདེ་ཆེན་མ་ལག{ཡ་ལག}སྐོར་བཅས་ཆོས་གཞིས་སུ་སྦྱོར་འཇགས་གནང༌། རྟག་བརྟན་གྱི་ཆོས་སྡེ་འདི་འཛུགས་པའི་བཀའ་གྲོས་ངེས་ཅན་ཐམས་ཅད་ཀྱང་དེ་སྐབས་བྱུང་བ་ལགས། སྡེ་པ་ལྷ་སྲུང་དྲུང་ཡང་ཆོས་སྐོར་འཇུག་པ་མཛད་དེ། མཚན་ཀུན་དགའ་བསྟན་པའི་རྒྱལ་མཚན་དཔལ་བཟང་པོར་བཏགས།
དེ་ནས་ཧོར་ཟླ་དྲུག་པའི་ཡར་ངོའི་ཚེས་བཅུ་སྐོར་ལ་ཡར་བཏེགས་ནས། ཆོས་འཁོར་རྩའི་མདོ་དེར་སྣར་ཐང་ནས་ཐབས་འཛིན་ཅིག(ཞིག)ཀྱང་བྱུང༌། བྱང་ཆེན་དུ་ཞག་གསུམ་བཞི་ཞིག་བསྡད། གནས་སྲིན་པོ་རིའི་ཀླུ་སྡིངས་སུ་ཞག་གཅིག་བསྡད་པ། གནས་ཆོས་སྡེའི་སློབ་དཔོན་སོགས་སྐྱ་སེར་མང་པོ་ཞིག་འཕྲད་མཁན་ཡང་བྱུང༌། ཆོས་འབྲེལ་རེ་ཡང་བྱས།
ལུང་ནག་ཤེལ་དཀར་ནས་རྒྱ་གན་ནས་ཆོས་དགོས་པ་ཅི་འདྲ་ཡོད་ཀྱང༌། འབོད་མི་ནན་ཅན་རང་གི་སྟབས་རྫོང་རྩེ་ལ་ཕྱིན། ཞག་པོ་གཉིས་བསྡད། ཚེ་དབང་དང་གུར་མགོན་གྱི་གཏོར་དབང་ཞིག་དགོས་ཟེར་བ་ལྟར་བྱས།
དེ་ནས་ཚུར་ལམ་བྲག་རམ་གྱི་གནོད་སྦྱིན་ལ་གཏོར་མ་ཞིག་ཀྱང་དགོས་པའི་ལྟས་བྱུང་བ་དང༌། སྔར་ཡུལ་དེ་ལ་མ་ཕྱིན་པས་ཇི་ལྟར་འདུག་ལྟ་བ་དང༌སྦྲགས་ཁོར་ཙམ་ཕྱིན་པས། གནོད་སྦྱིན་དེ་དགྱེས་པའི་ལྟས་ཅུང་ཟད་བྱུང༌།
ཟླ་བ་དྲུག་པའི་ཚེས་བཅུ་བདུན་ལ་ཇོ་ནང་དུ་སླེབ(སླེབས)། གྲྭ་བཙུན་རྣམས་ཀྱིས་བསུ་བ་བཟབ(གཟབ)རྒྱས་བྱས་ཤིང་། ཟླ་གཅིག་ཙམ་ཇི་ལྟར་བདེ་བའི་ངང་ནས། ཁམས་པོ་ངོར་དགོན་པ་བ་དབོན་པོ་ལྷུན་གྲུབ་སོགས་མང་རབ་དང༌། ཀ་བཞི་དཔོན་པོ་སོགས་ལ་ཆོས་ཀྱི་རྣམ་གྲངས་ལམ་འབྲས་ལ་སོགས་པ་མང་དག་བྱས། རང་རེའི་གྲྭ་ཚང་གི་གྲྭ་པ་གསར་པ་རྣམས་ཀྱིས་སྒྲུབ་དཀྱིལ་རང་རེས་བསྒྲིགས་པ་འདི་ཁའི་སྟེང་ནས། དཔལ་དུས་ཀྱི་འཁོར་ལོའི་སྒྲུབ་མཆོད་ཐོག་མ་འཛུགས་པ་དེ། ཇོ་ནང་རང་གི་སེར་ཁ་སྒྲུབ་མཆོད་ཀྱི་སྟེང་དུ་འཛུགས་པའི་རྩིས་སུ་བྱས་ནས། བྲིས་ཐིག་གར་སོགས་སྔར་ནས་སྦྱངས་པ་རྣམས་ཀྱང་དེ་སྐབས་གྲ་འགྲིག་པར་བྱས།
ཧོར་ཟླ་བདུན་པའི་ནང་དུ་ཆོག་གྲྭ་འགྲིག་ཅིང་ལེགས་པར་བྱུང༌། ལོ་འདིའི་ནང་དུ་ཙམ(ཅམ)མེ་སྡོད་མ་དགོས་ཙམ་ལ། ཡ་མ་དང་ཁྲག་ངན་སོགས་ཀྱིས་ཡང་ཡང་ན་བ་ཞིག་ཀ་བྱུང༌། སྒྲུབ་མཆོད་གྲོལ་བའི་རྗེས་ལ་དཔོན(དབོན)པོ་ལྷུན་གྲུབ་སོགས་འགའ་ཞིག་ཡུལ་དུ་མགྱོགས་པར་ལྡོག་འགྲོ་བའི་སྟབས་སྦྱོར་དྲུག་ཅིག་ཀྱང་འཆད་དགོས་བྱུང༌། སྔ་ཕྱིར་བསྐུལ(སྐུལ)མཁན་གཞན་ཡང་ཡོད་ལ། ཁོང་ཚོས་ཀྱང་བསྐུལ་ནས་སྦྱོར་དྲུག་གི་འཁྲིག་ཡིག་ཆེ་བ་འདི་བརྩམས། དེའི་ཡན་ལག་ཏུ་ངེས་པར་དགོས་པར་མཐོང་ནས། རྟགས་ཚད་ཀྱི་ཡི་གེ་ངོ་སྤྲོད་ཕྱི་ནང་འཁྲུལ་འཁོར་རྩ་འགྲེལ་རྣམས་ཀྱང་སྟོན་ཀ་དེ་ལ་ཀ་བྲིས་པ་ཡིན།
འདིར་སླེབ(སླེབས)པ་ནས་གཟུང(བཟུང)དེ་བར་དུ་སྒྲུབ་གནས་སྐྱིད་ཕུག་བདེ་ལྡན་གྱི་ཞིག་གསོས་ལེགས་པར་གྲུབ་པ་དང༌། སྤྱི་ཁང་སྐོར་སོགས་དེ་ལོ་ཡང་ལས་ཀ་ཐན་ཐུན་མང་དུ་གྲུབ། སྐུ་འབུམ་མཐོང་གྲོལ་ཆེན་མོར་བྲིའི(ཕྱིའི)སྐོར་ཁང་ལ་བཟང་སྒྲིགས་འབའ་ཞིག་གི་བླ་རེ་དང༌། བུམ་ལྡིར་ལ་ཡང་དེ་མཐུན་གྱི་བླ་རེ་ཁོར་ཡུག །ལྷ་ཁང་གཞན་མ་སོ་སོར་བར་སྐབས་མཛོད་བཟུང་དུས་བླ་བྲེ་གྱག་པ་རྣམས་ལ་ཡང་བླ་བྲེ་ཉི་ཤུ་སྐོར་ཅིག(ཞིག)ཕུལ། འཇའ་འོད་དང་མེ་ཏོག་གི་ཆར་སོགས་ལྟས་ངོ་མཚར་ཆེ་བར་བྱུང༌།
རང་རེ་ཇོ་ནང་པ་ལ་བལྟོས(ལྟོས)པ་རྣམས་ཚེ་འདིའི་བདེ་སྐྱིད་སྙན་གསུམ་གང་དགོས་ཀྱང་། སྐུ་འབུམ་མཐོང་གྲོལ་ཆེན་མོ་འདི་ལ་ཞབས་ཏོག་གི་རྟེན་འབྲེལ་སྒྲིག་པ་རང་གལ་ཆེ་བ་འདུག །འདི་རྟགས་མངོན་གྱུར་དུ་སྟོན་མཁན་ཡིན་པས། ཐམས་ཅད་ཀྱིས་འབད་འབུངས་བྱེད་དགོས་སོ། །
གནས་གཞི་གསར་དུ་འདེབས་དགོས་དེ(ཏེ)ལོ་འདི་ལ་བརྟག་པ་མ་ཆུག་ཅིང(འཆུགས་ཤིང)། ལོ་གསར་ནས་ཤིན་ཏུ་བཟང་བའི་ལྟས་ཤར་པས། དེ་ལོ་ཐེན་པ་ཡིན།
དེ་ནས་སྟོན་གཞུག་སྐྱིད་ཕུག་ཏུ་རབ་གནས་དང་བསྟུན་ཏེ་ཕྱི་མཚམས་མེ་ལ་བསྡད། སྦྱོར་དྲུག་གི་བཤད་པའི་རྩོམ་པ་དེའི་འགོ་བཙུགས་ནས། གཞི་གཏན་ལ་འབེབས་པའི་སྐོར་རྣམས་སོང་བ་ཙམ་ཞིག །ཉིན་གུང་ཐུན་བར་ཐུན་བར་ལ་བཀའ་བཅུ་བ་ཀུན་དགའ་དབང་ཕྱུག་པས་བྲིས། དབོན་པོ་ལྷུན་གྲུབ་སོགས་དང་ཁོང་ཚོས་ནན་གྱིས་བསྐུལ་ནས། ལུང་རིག(རིགས)རྒྱ་མཚོ་སོགས་འདི་ཁའི་གྲྭ་པ་འགའ་ཤས་ཁམས་ཕྱོགས་སུ་འགྲོ་དོན་ལ་འགྲོ་འདོད་རྣམས་ལ་སོ་སོའི་འདོད་ཆོས་ཐན་ཐུན་འདྲ་ཡང་མ་ཆག་པར་བྱེད་དགོས་བྱུང༌། དེ་རྗེས་ཁོང་རྣམས་ཀྱང་ཁམས་ཕྱོགས་ལ་ཐེགས།
དེ་ནས་དགུན་ཁྲིད་སྔར་ལུགས་བཞིན་བཙུགས། གྲྭ་པ་གསར་པའི་རིགས་མང་པོ་དང་བཅས། འཁྲིད་གསར་པ་ལྟོས་ཆེ་བར་བྱུང༌། ལོ་འདི་ལ་བྱང་ཞབས་དྲུང་རང་ལ་བཅུར་ཐག་ཅུང་ཟད་བྱུང་བ་ནི། སྙིང་གི་གྲོགས་ཐམས་ཅད་ཐད་ལ་བོར་བའི་རྣམ་པས། རྒྱུན་དུ་སྐུ་རིམ་བསྒྲུབས་ཤིང་། བྱང་པ་རང་གི་ཕྱིར་དུ་གཞན་ལ་གཏོར་རྒྱག་དང༌། མཐུ་བཏང་བྱེད་མཁན་གྱི་སྔགས་པའི་རིགས་ལས་ཐུགས་ཉེ་ཤོས་གཅིག་གཉིས་མ་གཏོགས། ཕལ་ཆེར་འདི་དང་འདི་ཡིན་ནོ་ཞེས་གསལ་བར་ཞུས་པའི་སྔགས་པ་རྣམས་ལ་བྲུལ་དྲག་བྱུང་བའི་སྐབས་དེ་ཡིན། བླ་མ་དཀོན་མཆོག་ལེགས་འཛིན་པ་ངེད་ལ་སྔར་ནས་འདྲིས་ཆེ་བ་ཡིན་པ་ལ། ཁོང་གི་སྲས་པོ་རྒན་པ་དེ་སྐྱོན་ཆེ་བ་ཞིག་མེད་ནའང༌། འཕྲལ་གྱི་བྱེད་ལུགས་མ་ཤེས་པས། བསམ་འགྲུབ་རྩེར་བཙོན་ནང་དུ་འདས། སླར་དཀོན་ལེགས་པ་རང་ལ་ཡང་དཀའ་སྐྱོན་གྱི་སྒོ་འདུག་པ་དང༌། ངོ་ཆེན་ཞིབ་སེད་ཞུས་པས། ས་སྐྱའི་སྒོ་རུམ་དུ་མནའ་བསྐྱལ་བས་ཆོག་པར་བྱུང༌། སྟོན་པ་རྡོ་ར་བ་ཡང་སྲོག་འཛེམ་ལ་འདི་ཁར་བྲོས། ཕྱིས་དགོངས་པ་ཞུས་པས་ཡུལ་ལ་ཕྱིན་ཆོག་པར་བྱུང༌། དེས་མཚོན་གཞན་འགའ་རེ་ལ་ཡང་ཕན་ཐོགས་བྱུང༌།
སྔ་སོར་སྟོན་ཀ་ཕྱག་འཚལ་ལ་མོ་ནས་གཏོར་མ་ཞིག་བཏང་བ། རྨི་ལམ་དུ་མདངས་དཀར་གྱི་བཙན་དེ་གཏོར་མའི་སྐལ་བ་ཆད་ཟེར་སློང་བའི་རྣམ་པ་བྱུང་བས། བར་དེར་མདངས་དཀར་རྫོང་ལ་གཏོར་མ་གཉིས་གསུམ་ཞིག་བཏང་བས། མི་ཐམས་ཅད་མདངས་དཀར་ལ་དགོན་པ་གསར་འདེབས་བྱེད་རྒྱུ་ཡིན་པར་འདུག་ཟེར་བའི་ཚོད་རྒྱག་གིས་ལུང་པ་བཀང༌། འདི་སྐབས་རྩེད་ཆུང་གི་ལ་མགོ་ལ་སྡེ་པ་གཞུང་གི་སྤེའུ་འདི་རྒྱག་པ་མཛད་སོང་སྟེ། དགོས་པ་རང་ནི་ཅང་མི་གདའ། དེ་དུས་རྗེ་བཙུན་ཨུ་རྒྱན་མཚོ་མོའི་སྐུ་སྐྱེའི་དྲུང༌། ཇོ་ནང་གི་གནས་མཇལ་ལ་ཕེབས་གསུང་བ(གསུངས་པ)ཞིག་ཡོད་པའི་སྐབས། རྨི་ལམ་དུ་ཁོང་དཔོན་སློབ་ནང་ཅིག(ཞིག)ནས་ཡར་ཕེབས་ནས། མཚན་བརྗོད་འདོན་གྱིན་འདུག་པས། དུམ་ཅིག(ཞིག)ནས་མ་ཐོན་པར་ཆད་སོང༌། དེ་ནས་འདིར་ཕེབས་ཀྱང་མ་བྱུང་སྟེ། ཁོང་རང་དཔོན་སློབ་ལ་འཕྲིན་ལས་ཀྱི་བར་ཆད་ཡོང་བའི་ལྟས་སུ་གོ །
དུས་ཁྲིད་གྲོལ་ལ་ཁད་ལ་རྒྱལ་རྩེ་ནས་བླ་མ་ཞབས་དྲུང་ཡང་ཕེབས། དེ་ཉིད་གློ་བུར་དུ་འབྲོང་རྩེར་རླུང་འཚུབ་བྱུང་བ་དེ་ཀ་འདྲ་བ་ཞིག་བྱུང་སྟེ། འདིར་སྐུ་བསྙེལ་བ་དེ་ལ་བལྟ་བ་ཡིན་ནམ། དེ་མིན་ནི་ལེགས་པར་བྱུང༌། ཚོགས་སུ་སྒྲུབ་ཐབས་བརྒྱ་རྩའི་རྗེས་གནང་ལུང་དང་བཅས་པ་ཞིག་ཀྱང་བྱས།
འདིར་སྨྲས་པ།
ལེགས་པའི་ཡོན་ཏན་འཆར་ཚུལ་བརྒྱ། །
ཤེས་བྱའི་མཐའ་ལ་ཐུག་མེད་འཆར། །
བསོད་ནམས་བྲལ་བའི་སྐྱེ་བོ་ལ། །
རྟག་ཏུ་ནུབ་པའི་མཚན་མོ་ཉིད། །
ཉིན་བྱེད་འོད་ཟེར་གཅིག་ཤར་བས། །
ཡུལ་ཕྱོགས་བྱེ་བ་བརྒྱ་གསལ་ཡང༌། །
བྱང་ངམ་འོག་ཏུ་ཁ་བལྟས་པའི། །
ཕུག་པར་རྟག་ཏུ་མུན་པ་ཉིད། །
སྐལ་ལྡན་རྣམས་ལ་བླ་མེད་བྱང་ཆུབ་མྱུར་སྟེར་ཞིང༌། །
འགྲོ་བ་ཀུན་ལ་བདེན་དོན་མཐའ་ཡས་འབྱུང་བའི་གཞི། །
ཟབ་མོ་དབུ་མ་བདེ་གཤེགས་སྙིང་པོའི་གཏམ་འདི་དང༌། །
ཟབ་ལམ་མཐར་ཐུག་རྡོ་རྗེའི་རྣལ་འབྱོར་ལས་གཞན་ཅི། །
ཞེས་པའང་བར་སྐབས་སུ་སྨྲས་པའོ།། ༈ །།