ཉེར་བརྒྱད་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
ད་སྔར་གྱི་འཕྲོས་བཤད་ན། དེ་སྐབས་བྱ་མཆུ་བ་རྣམ་རྒྱལ་རྟོགས་ལྡན་བྱས་པ་ལ་དཔོན་གཡོག་ཐམས་ཅད་སྨོན་པའི་གནས་སུ་མཛད་ཀྱིན་འདུག་སྟེ། སླར་ཁོང་པས་འཕྲལ་ཉིད་དུ་རང་རྟགས་བསྟན་པ་དེ་གསར་འགྲོགས་ཆེན་པོ་རྣམས་ལ་སྙིང་རེ་ཚིམ་མོ། །འདིའི་རིགས་ཀ་ཡང་ཡང་ཡོད་པར་འདུག་ཀྱང༌། འཇུངས་མེད་ཚོ་ལ་སུན་རྒྱུ་མེད། དཔག་བསམ་འཁྲི་ཤིང་ལས། ཕལ་ཆེར་ཡོངས་སུ་འདྲིས་ལ་སྡང་། །རྟག་ཏུ་གསར་པ་གསར་པ་འཚོལ། །རིང་ན་གནས་པ་ཐམས་ཅད་ནི། །ཀུན་གྱི་ཡིད་དུ་འོང་བ་ཡིན། །ཞེས་འབྱུང་བ་དེ་དོན་ལ་གནས་པ་ཞིག་གོ །
དེར་འཕྲལ་དུ་འགྲོ་འདོད་ཡིན་ཡང༌། གསུང་ནན་ཆེ་བའི(བས)མཐར་ཐུག་པ་ནས་རྒྱང་ཙམ་སྡོད་དགོས་ཤར། སྒྲོལ་མ་བླ་མེད་ཀྱི་ཆོས་སྐོར་ཆ་ཚང་དང༌། གཅོད་ཁྲིད་སོགས་བཞེད་དགོངས་ལྟར་ཕུལ། ཆོས་གཞུག་མ་དེའི་མིང་བཀྲ་ལ་རྟོག་པ་ཅུང་ཟད་བྱུང༌། ཕྱིར་ཡོང་དུས་སྔ་དྲོའི་དུས་དར་སྡིངས་ནས་ལྕམ་གཅིག་སྐྲ་བཅད་ལ་བྱོན། གཞོན་ནུ་མ་རྒྱན་གྱིས་བརྒྱན་པ་ཆོས་ཀྱི་སྒོར་འཇུག་པ་སོགས་རང་རེ་ལ་ལམ་བཀྲ་དེ་ཐོག་མ་རང་ནས་ལེགས། རྐྱང་ལའི་ལ་ཐོག་པར(བར)ཞབས་དྲུང་དཔོན་གཡོག་རྣམས་ཀྱིས་སྐྱེལ་མ་ལ་ཕེབས། མིང་བཀྲ་དེ་ལའང་རྟེན་འབྲེལ་གྱི་རྟོག་དཔྱད་ཅུང་ཟད་བྱུང་ཞིང༌། ལྷ་རྩེ་ནས་ཡར་འགྲོ་དུས་ཀྱི་སྐྱེལ་མའི་སྐབས་དང༌། འདི་སྐབས་གཉིས་ཀ་རུ་ཞབས་དྲུང་རང་གིས་ནན་བཅགས་མཛད་དེ། མི་དམངས་ཀྱི་དཀྱིལ་དེར་ཞབས་དབང་རེ་བྱེད་དགོས་བྱུང་བ་ལའང༌། ཕྱག་གཡོག་ཕལ་ཆེར་བཞིན་འགྱུར། མུན་སྲོས་པ་བཞིན་དུ་ནག་ཐོམ་ཐོམ་པར་འདུག །དཔོན་གཡོག་རང་ལ་ཤིན་ཏུ་མི་ལེགས་པའི་རྟེན་འབྲེལ་དུ་གོ །
བྲག་རམ་དང་ཨེ་འབྲོག་པའི་རྩྭ་མཚམས་ཀྱི་ཁམ་མཆུའི་ཐད་ནས། ལྷ་རི་རྩེ་པ་རྒྱལ་ཆེན་གྱིས་རྔན་པ་ཆེན་པོ་ཟོས་པའི་ཞུས་སྟབས་ནས། ཞབས་དྲུང་རང་གི་ཐུགས་ཀྱང་འཕྲལ་འཕྲལ་འགྱུར་འགྲོ་བའི(བས)། ད་ལྟ་རང་ཁྲིམས་དྲང་པོ་འདི་དང་འདི་ལྟ་བུ་མཛད་གསུང་བའི་ཞལ་ལེན་ཡོད་འཕྲོ་ལ། ཕྲ་མ་ལ་ཁོང་ཚོས་གང་ཞུས་འདྲི་བ་དང༌། ནགས་ཕུག་པ་དང་རྩོད་གཞིའི་ཐད་ལ་ཡང༌། ངེད་ཚོའི་མི་གདོར་སྐུ་རྒྱལ་ཆད་སྒྲུབ་སོགས་འགེལ་བ་ལྟར་མཛད་ཅིང༌། ལྐོག་ཏུ་ཆད་པའི་དངོས་པོ་བླངས་གྲུབ་གྲུབ་པ་དེ། སླར་ཁོང་ཚོ་ལ་སྤྲོད་པ་སོགས་ངེད་ལ་ཕྱི་མ་ནང་གི་ལུགས་ཡིན་པ་ལ། རང་ཡང་པོར་གཏོང་བ་དེ་འདྲ་མཛད་ཀྱིན་གདའ་འོ། །
སྐྱེལ་མའི་ས་དེ་ནས་རྟ་ཐོག་ཁེལ་ནས་ཡོངས(ཡོང)དུས། སྣོད་ཁེངས་པ་ཐོགས་པ་སུམ་བརྒྱ་ཙམ་འཕྲེང་དུ་བསྒྲིགས་པ་དང་ཕྲད་པ་སོགས། ངེད་རང་ལ་ནི་ལམ་བཀྲ་ཤིན་ཏུ་དགེ་ཞིང་། བཀྲ་ཤིས་པའི་ངང་ནས། ལམ་བར་དུ་ཡང་ལོངས་སྤྱོད་ཆེན་པོ་དང་བཅས་ཏེ། རིམ་པས་བཀྲ་ཤིས་སྒང་གི་གྲུ་ལ་ཐོན་ཏེ་བསམ་གྲུབ་རྩེར་སླེབ(སླེབས)། དེ་ཉིན་ཕེབས་བསུའི་སར། ཐོག་མར་རླུང་ཆེ་ཞིང་རྗེས་ལ་འཇམ་པ་དང༌། རྒྱ་གར་ལྷོ་ཕྱོགས་ནས་འོངས་པའི་བྷཱ་ཌ་ཞིག་གིས་སྐད་གསངས(གསང)མཐོན་པོས་ཤིས་བརྗོད་བྱེད་པ་སོགས། རྩུབ་ཀྱང་རྩུབ་ལ་བཟང་ཡང་བཟང་བའི་ལྟས་སུ་བྱུང༌། འདི་སྐབས་ཞག་བཅུ་ལྷག་ཅིག་བསྡད། རྐྱེན་སེལ་གྱི་ཆོས་བཀའ་འབུལ་དགོས་རྣམས་དཀྱུས་མཐུན་དུ་ཕུལ་ཞིང༌། ཁྱད་པར་བསྟན་བཅོས་འགྱུར་རོ་འཚལ་གསར་བཞེངས་སུ་མཛད་པ་རྣམས་དང༌། ཉེ་བའི་སྲས་བརྒྱད་ཀྱི་ལུགས་སྐུ་སོགས་རྟེན་གསར་བཞེངས་མང་པོ་ལ། དཔལ་གསང་བ་འདུས་པའི་དཀྱིལ་འཁོར་ལ་བརྟེན་ནས་རབ་གནས་ཟབ་རྒྱས་སུ་བགྱིས། དཀྱིལ་འཁོར་དེ་ཁའི་སྟེང་ནས་ཞབས་དྲུང་ཡབ་སྲས་རང་དང༌། གཞན་བླ་མ་དགེ་བཤེས་གཅིག་གཉིས་དང་བཅས་པ་ལ་དབང་བསྐུར་ཡང་བྱས། རབ་གནས་ཀྱི་མངའ་དབུལ་གྲུབ་མཚམས་དེར། ཤིང་འབྲས་ཤིན་ཏུ་སེར་བ་ཀ་ཏོ་ར་གང་མཆོད་ཤོམས་ཀྱི་དྲུང་དུ་འབུལ་མཁན་བྱུང༌། དེ་ཡང་ཕྱོགས་ནས་གློ་བུར་དུ་བྱུང་བ་ཡིན། ཆེད་ཀྱི(ཀྱིས)སྒྲིགས་པ་མ་ཡིན་རང་འགྲིགས་བྱུང་བ། ཕྱི་རྟགས་ཀྱི་རྟེན་འབྲེལ་ཡང་ལེགས་པར་གོ །དཀྱིལ་འཁོར་སྒྲུབ་པ་དང༌། རྟེན་གྱི་ཡེ་ཤེས་སྤྱན་འདྲེན་སོགས་ཀྱི་སྐབས་ནང་རྟགས་ཀྱང་ལེགས་ཏེ། རབ་གནས་ཤིན་ཏུ་ཞལ་གྲོ་བར་བྱུང༌།
དེ་ནས་བྱང་ཆེན་བརྒྱུད་དེ། ཚོང་འདུས་ཀླུ་སྡེངས་སུ་འབྱོར། ཚོང་འདུས་པའི་སྡེ་པ་སྐུ་གཞོན་པ་དེ་ཆུ་ནད་ཀྱིས་བསྙུང་བར་འདུག་པས་རྫོང་རྩེ་ལ་ཕྱིན་ཏེ། ཚེ་དབང་དང་གཏོར་དབང་ཞིག་བྱས་ཏེ་ཕན་ཐོགས་ནི་ཅང་མ་བྱུང༌། དེ་སྐབས་ཉང་སྟོད་རྩེ་ཆེན་རྫོང་ལ་ཧཾ་པ་ཐེབས། དུས་ཟིང་ཆེན་པོ་ལངས་ཏེ། རྒྱལ་ཁམས་ཀྱི་འགྱུར་ལྡོག་ཆེན་པོ་དེའི་འགོ་ཚུགས་སོ། །ལར་རྒྱལ་ཁམས་ཀྱི་འགྱུར་ལྡོག་ཆེན་པོ་འདི་འདྲ་ཞིག་ཡོད་པའི་ལྟས་ཙམ་ལོ་མང་པོའི་སྔ་རོལ་ནས་ཡང་ཡང་ཤར། དེའི་སྟབས་ཀྱིས་སྔ་མོའི་དུས་ཡང་ཡང་འགྲོ་དགོས་པའི་དཔོན་རིགས་སོ་སོའི་སར་ཡང༌། མི་དགོས་ཁ་མེད་རྣམས་མ་གཏོགས་འགྲོ་བ་ཉུང་དུ་བཏང་ནས། ལོ་འགའ་ཤས་སོང་བ་ཀུན་ལ་གསལ་བ་དེ་ག་ཡིན།
དང་པོ་སྔ་སོར་གཞོན་དུས་ནས་ཀྱང་འགྲུལ་ཤད་ཕེར་བ་རང་ཞིག་མེད། དགེ་ལྡན་པ་དང་ཀརྨའི་བླ་མ་སློབ་དཔོན་ཡོད་པའི་རིགས་དང་པོ་ནས་མིན། འགྲོ་བ་ལ་དགའ་ཤོས་དེ་མིན་པས། ལོ་སྟར་གྱིས་དབུས་གཙང་བསྐོར་ནུས་པ་ཅིག(ཞིག)ཀྱང་མིན། དེ་སྟབས་ནས་རང་རེ་ལ་ཉེ་ཞིང་ཤ་ཚ་བར་རློམ་པ་འགའ་རེས་ཀྱང༌། རྗེ་གྲོལ་མཆོག་དེ་གཅིག་ཏུ་ཡུན་རིང་མི་བཞུགས་པར་ཐམས་ཅད་དུ་སྐོར་ཞིང་གཤེགས་པ་ཡིན། ཁྱེད་རང་ཡང་དེ་བཞིན་རང་བྱེད་དགོས། ཡོན་བདག་སོ་སོའི་དུས་དབང་སོགས་ལ་ལོ་གཅིག་མ་སླེབ(སླེབས)། ལོ་གཉིས་ཀྱང་མ་སླེབ(སླེབས)ན་རིམ་པས་འགྱུར་འགྲོ་བ་ཡིན་ཟེར་བ་དང༌། ཁྱད་པར་འདི་སྐབས་ཀྱི་ལོ་སྔ་མ་རྣམས་ལའང༌། དེ་འདྲའི་རིགས་ཀྱི་གྲོས་འདེབས་བྱེད་པ་མང་དུ་བྱུང་ནའང༌། འགྱུར་འགྲོ་བའི་རིགས་ཀྱི་སློབ་མ་དང་། ཡོན་བདག་དེ་རེ་ཞིག་ངོ་གང་ཟིན་བྱས་ཀྱང་ཕུགས་རྟག་ཐུབ་པ་ཞིག་མི་ཡོང༌། འགྱུར་མཁན་ཚོ་རང་འགྱུར། མི་འགྱུར་མཁན་ཚོ་རང་མ་འགྱུར་སྙམ་ཞེ་མེད་བྱས་ནས་བཞག་པ་ཡིན། དེ་ཁས(གའི)ལ་ལ་ནི་མ་འགྱུར་ཏེ། མ་འགྱུར་བ་ཚོ་ད་ལྟའི་བར་དུ་བདེ་བར་ཡོད་པ་དེ་ཡིན། རེ་མང་ཞིག་འགྱུར་སོང་སྟེ། ངེད་ཀྱི་ལས་སྟབས་ལ་ནི་མ་གནོད་པའི་སྟེང་དུ་གོང་འཕེལ་ལ་སོང༌། འགྱུར་བ་ཅིག(ཞིག)ལ་དེ་ཚོ་ལས་འགྱུར་གོ་བཅད་པ་མ་བྱུང༌། ཁོང་རང་རྣམས་སོ་སོར་ཁུངས་སྟོངས་པའི་དུས་སུ་ཁུར་ཡང་བའི་ཁེ་བྱུང༌། ལར་ནས་དམ་ཚིག་དང་ལྡན་པའི་རྡོ་རྗེ་སློབ་མ་ནི་ཤིན་ཏུ་དཀོན། འཇིག་རྟེན་འཕྲལ་དཔེ་ཙམ་གྱི་དཔོན་སློབ་དང༌། འཇིག་རྟེན་འཕྲལ་དཔེ་ཙམ་གྱི་ཡོན་མཆོད་ལ་སྐྱག་བརྟད(གཏད)ཅིང་ཡོད། ཕཊ།
དེ་ནས་བསམ་སྡིངས་སུ་ཕྱིན། ཞག་ཤས་བསྡད། གཙང་ནས་ཞབས་དྲུང་ཉང་སྡོད་འཁོར་ནས་སྤ་མནམ་དུ་ཕེབས། བྱང་ཕྱོགས་ལ་དམག་འདེགས་པའི་དཔུང་གྲ་སྒྲིག་པའི་སྐབས་སུ་འདུག །དམག་བཤོལ་བའི་ཞུ་བ་ནན་བཅགས་བསྟུད་མར་ཕུལ་ནའང༌། ད་རེས་འདི་ཉིད་བྱང་ལྷོ་བྲག་དབུས་པ་སོགས་ཁོག་འགྲིག་པའི་ངེད་ཚོ་ཤུལ་མེད་ལ་གཏོང་རྩིས་ཀྱི་ཚུར་བགེགས་ཁོ་ན་ཡིན་པས། དམག་བཤོལ་མི་ཐུབ་གསུང་ཡིག་རིགས་ཚོ་སྟོན་པ་མཛད་པའི་རྦད་གཅོད་ཁོ་ན་བྱུང་བ་ནས། དམག་བཤོལ་ནི་མ་ཐུབ། རིམ་པ་ཞུ་བ་གང་ལེགས་བྱེད་པའི་ལུགས་སུ་བྱས།
དེ་ནས་འདོལ་བྱུང་དུ་ཞག་ཤས་ཅིག(ཤིག)བསྡད། དབུས་ལ་འགྲོ་བའི་ཁུངས་ཀྱི་ཆས་ཁ་རྣམས་དེར་བཞག་ནས་སླར་ཡང་ཡོངས། ཡར་ལམ་རིན་ཆེན་གླིང་དུ་ཞག་གཅིག་བསྡད། བར་སྐབས་ལོ་འགའ་ཤས་ཅིག(ཤིག)སྡེ་པ་སྣར་ཐང་ནས་ཡིག་འགྲུལ་སོགས་ཀྱང་བཅད། འབྲེལ་ཐམས་ཅད་སྤངས་ཀྱང༌། ངེད་ལ་གནོད་རྒྱུ་ནི་ཅང་མ་བྱུང༌། འདི་སྐབས་སྔར་ཕར་ལམ་ཚོང་འདུས་སུ་སླེབ(སླེབས)སྐབས་ཀྱང་ཇ་འདྲེན་དང༌། འདི་རེས་ཀྱང་དེའི་སང་ཉིན་ལམ་དུ་ཐབ་འཛིན་སོགས་གཏོང་བ་མཛད།
བྱང་ཞབས་དྲུང་དུ་སྔ་སོར་བསམ་སྡིངས་ནས་སྙན་འབུལ་གྱི་ཞུ་ཡིག་ཞིག་ཀྱང་ཕུལ་བ་ཡིན་ནའང༌། ཐུགས་ཡིད་མ་ཆེས་པའི་དགོངས་པ་ལོག་པ་ཞིག་ཤར་འདུག །སྐབས་འདི་ཚོར་ཡང༌། འཇད་ཤར་ཕྱོགས་པ་སོགས་བྱང་རང་གི་སྤྱན་ལམ་དུ་རྒྱུག་པའི་དཔོན་རིགས་ཅི་རིགས་པས་ཀྱང༌། ཁ་འདོན་དང་ལག་ལེན་གྱི་སྤྱོད་པ་སྣ་ཚོགས་ཞིག(ཤིག)བྱེད་དུ་བྱུང་ནའང༌། དེ་འདྲ་ལ་མ་ལྟས(བལྟས)པར་ཡར་ཡོངས།
ཇོ་ནང་དུ་སླེབ(སླེབས)མཚམས་ཁམས་མ་བདེ་བར་ཞག་ཤས་ལུས། ལྷུན་གྲུབ་སྤེའུ་པ་ཀུན་དགའ་བསྐུལ་མ་ཅར་སྡོད་བྱས་ཤིང༌། གཞན་ཡང་ཉིན་རེ་བཞིན་ལྷ་རྩེ་ནས་བྱང་ཞབས་དྲུང་གི་ཕྱག་རྟགས་བང་ཆེན་སོགས་ལ། བཀའ་བཀོད་འཕྱར་རྒྱག་སྣ་ཚོགས་དང་བཅས་པའི་ངེས་ངེས་རང་མེད་པ་ཤ་སྟག་བྱུང༌། ཁམས་མི་བདེ་བཞིན་དུ་དིངས་སུ་ཕྱིན། དེར་ཡང་ཁམས་ཤིན་ཏུ་མི་བདེ་བས་ཞག་འགའ་ཤས་འགོར་ཞིང༌། འདི་དང་བདེ་ཆེན་དུ་རྒྱལ་རྩེ་ནས་བདག་པོ་མཐུ་སྟོབས་པའི་དྲུང་སོགས་ཀྱི་དཀར་ཡང་བྱས་ཆོག་པའི་ཞུ་ངོ་དགོས་ཚུལ་བྱུང་བ་ལྟར། གཙང་སར་ནན་བཅགས་ཞུས་ཀྱང་དོན་འགྲུབ་པ་ཞིག་ནི་མ་བྱུང༌། ལར་རང་དུས་རྒྱུན་དུ་མཐོང་ཡེ་མེད་པ་ལ་དགོས་གལ་འདི་འདྲ་རེ་བྱུང་དུས་ཁྱོད་ཤེས་ཟེར་ཤོར་བར་གདའ་འོ། །སྔར་ནི་ངེད་དང་དགེ་སློང་སྲད་པ་གཉིས་ལ་ཕྱི་མཐོང་འདྲ་འདྲ་ཡིན། སྡིང་མཐོང་ཁོང་ལ་ཆེ་ལགས། ཁོང་གིས་ཕན་འདོགས་གང་བྱུང་བ་དེ་ངས་ཀྱང་ཡོད་པ་ལགས།
དེ་རྗེས་གཙང་ཞབས་དྲུང་གི་དགོངས་པ་ཡང་ཡང་ཞུས། ཅུང་ཟད་ཙམ་དགོངས་བཞེས་ཡོད་པའི་སྐབས། ངེད་ཀྱིས་བདེ་ཆེན་དུ་སླེབ(སླེབས)པར་བྱས། སྔ་སོར་ནས་ངམ་རིང་མཁན་ཆེན་སོགས་མཁན་སློབ་སྤྱི། ཆོས་ཁྲིམས་གཙོ་བོར་གྱུར་པ་མང་དག་གིས། དམག་རྣམས་ཤ་བ་ལུང་ནག་ཏུ་སླེབ་པ་ཙམ་ནས་གཟུང(བཟུང)། སྐོར་གཡེང་འདྲ་བྱེད་ཚུལ་དང༌། ཁྱད་པར་བྱང་པ་རང་གི་ཕྱག་གི་རྟེན་མཆོད་སྣང་ཆེ་བ་ཐམས་ཅད་གཙང་སའི་ཕྱག་ཏུ་སོང་ནི་གྲུབ། གསེར་མང་པོ་བསྐྱལ་ཡང་ནི་ཟེར། བཀའ་གསལ་ནི་ཚིག་གཅིག་ཀྱང་མ་བྱུང་འདུག །གལ་ཏེ་བྱང་པར་ཕན་ཐོགས་ཅིག(ཤིག)བྱུང་ན། ངོ་སོ་གཞན་སུ་ལ་ཡང་མ་ཤོར་བའི་ཁོང་རང་ཚོས་བྱེད་བསམས་པ་ཡང་འདུག །
བྱང་ཞབས་དྲུང་རང་ནས་ཀྱང་ཕར་ཕྱོགས་སུ་དེ་སྐབས་དངོས་པོ་འབུལ་སྤྲོད་སྔ་ཕྱིར་གང་དགོས་ཅི་ཡིན་ཐམས་ཅད་ངམ་རིང་ཆོས་སྡེ་པ་ཁོ་ན་བརྒྱུད་ནས་མཛད་པ་སོགས། བྱང་པ་རང་ལ་ཕན་ཐོགས་སུས་བྱུང་ཀྱང(ཡང)། ངོ་སོ་དེ་ངམ་རིང་ཆོས་སྡེ་པ་སོགས་ངམ་རིང་རང་གི་གཞི་སྡོད་རྩ་བའི་གཡོག་པོའི་རིགས་ཅིག(ཤིག)ལ་ཡོད་པ་བྱེད་དགོངས་པ་དང༌། ཕྱག་གཡོག་ཕལ་ཆེར་ཡང་དེ་ཁོ་ན་སྙིང་ལ་བཞག་པ་དེར་འདུག །ངམ་རིང་མཁན་སློབ་སོགས་དེ་དག་ནི་བྱང་པ་ལ་ཕན་ཐོགས་བྱུང་ན། ངོ་སོ་གང་ཐུབ་དང་ཡུས་ཆེན་པོས། བྱང་པའི་ས་ན་གཞན་སུ་ཡང་མེད་པའི་ཆོས་སྲིད་གཉིས་ཀ་ཁོ་རང་ཚོས་འཛིན། གལ་ཏེ་བྱང་པ་ལ་ཕན་ཐོགས་མ་བྱུང་ན་བྱང་པའི་ནོར་ཕར་སྤྲད་ནས། ཁོང་རང་ཚོ་ཕ་རོལ་གྱི་དཔོན་རིགས་ཁ་དྲག་ཅན་རེ་ལ་སྔོན་མ་ནས་སྒོས་དཔོན་བཙལ་ནས་འཇུ་ཐུབ་པ་བྱས་པའི་ཕྱིས་ཁས་དྲག་པ་རེ་བྱེད་སྙམ་པའི་ཟར་ཟིར་གཡོ་སྒྱུ་དེ་ཀ་མ་གཏོགས་མི་འདུག་ནའང༌། དེ་མི་དགོངས་པ་དབུ་སྦོས་འདུག །ངས་ནི་སྔ་མ་ནས་དེ་ལྟར་གོ་ཞིང་ཤེས་ཀྱང༌། བྱང་རང་དུ་ཕན་ཐོགས་གང་དྲག་ཞི་ཨེ་ཡོང་བསམ།
རང་རེའི་མཛོད་པ་ཀུན་དགའ་དཔལ་བཟང་གིས་ཡང་ཡང་སྐོར་གཡང་ཞུས་ཤིང༌། སྒོ་དུ་མ་ནས་ནན་བཅགས་ཕུལ་བས། ཐོག་མའི་ས་འཇགས་རགས་རིམ་ལ་ཡང་ཕན་ཐོགས་ཆེར་བྱུང་ཞིང༌། ཁྱད་པར་ཕྲ་མ་བཏང་གྲུབ་པའི་རྗེས་སུ་ཡང༌། ཞུ་ནན་གང་ཆེ་ཞུས་པས་མུས་ལུང་ནང་དང༌། བུང་ཆུ་འཁོར་སོགས་ངེད་ཀྱི་ངོ་ཆེན་ཁོ་ན་ལ་རྟེན(བརྟེན)ནས་འཕར་ཆ་བྱུང༌།
བྱང་ཞབས་དྲུང་རང་ནས་སྔ་སོར་ལྷ་དབང་རྩེ་ནས་ངེད་འགྲོ་དུས། སྟོད་སྨད་ཀྱི་སྡེ་དཔོན་གཞན་སོ་སོ་ཇི་ལྟར་ཡིན་རུང༌། བྱང་ནས་གཙང་སར་ལོག་པར་འགྲོ་བ་སྔར་ཡང་མ་བྱས་ཤིང་། ཕྱིས་ཀྱང་མི་བྱེད་པས། ཐུགས་ཡིད་ཆེས་ཤིང་བློ་བརྟད(གཏད)པས་ཆོག་ཚུལ་དང༌། ཁྱེད་ཀྱིས་ཀྱང་དེའི་ཁག་ཐེག་པས་ཡོད་ཚུལ་ཞུ་དགོས་གསུངས་པའི་ནན་བཅགས་ཡོད་པ་ལྟར། བསམ་རྩེར་ཕྱིན་དུས་སྙན་དུ་ཡང་ཕུལ་མོད། འདི་སྐབས་ཉང་བྱང་ལྷོ་དབུས་སོགས་སྦྲེལ་པའི་ཡིག་ཚང་དང༌། བྱང་རང་གི་ཕྱག་རྟགས་དང་ཡིག་རིས་མངོན་ཚན་ཅན་ཐམས་ཅད་གཙང་བའི་ཕྱག་ཏུ་ཐེབས་པའི(པས)། ངེད་ཀྱི་མིག་ལམ་དུ་ཡང་འབྱོར་པ་དང༌། བྱང་ཞབས་དྲུང་རང་ལའང་སླར་སྟོན་པ་གནང་དུས། སྤྱིར་ཞུ་ཐེས་ཀྱང་མེད་པའི་བྱེད་དཀའ་བ་དང༌། སྒོས་སུ་སྔ་སོར་ལྷ་དབང་རྩེའི་གསུང་བཀོས{བགོས}དེས་ངེད་ཀྱང་བསླུས་ཤིང་ཁྱི་ཟན་དུ་བསྐྱུར་བར་སོང་འདུག །
འདི་སྐབས་རང་ཡང་ཞབས་དྲུང་རང་ཆོས་ཚུལ་མཛད། ལོ་གསུམ་གྱི་བར་ལ་རྫོང་གཞིས་འགངས་ཆེ་བ་རྣམས་ཉིས་འཛིན་དུ་བྱས། ས་ཆ་རྣམས་རང་མོས་པ་ལ་སྦྱར་ཆོག་པ་ཞུས། དེ་རྗེས་ཐུགས་དམ་ལ་སྒྲིལ་བ་ཡིན། དེའི་ངོ་ཆེན་བྱེད་དགོས་གསུང་བ་སོགས་ཕེབས་བྱུང་བའང་ཞིབ་ཏུ་ཞུས་ནི་ཞུས། རྒྱ་ཞིང་དེ་ཙམ་ལ་ཐུག་ནས་བྱིས་པའི་གསུང་དེས་མགོ་སྐོར་ཐོངས་རིས་མིན་པ་འདུག་ཅིང༌། དེ་རྗེས་ལྷ་རྩེ་ནས་ཕར་ཕེབས་དུས་ཀྱང༌། ངེད་ཀྱི་མི་མ་སླེབ(སླེབས)པ་ལ་མཁན་ཆེན་ཁྱི་གུ་བ་དང༌། ངོར་པ་མཁན་དྲུང་སོགས་སུ་ཡང་ཡོང་མ་ནུས། དཔོན་གཡོག་ཚོ་རང་ཤིན་ཏུ་སྐྲག་པས། ཕེབས་མི་ནུས་པའི་གང་དྲག་ཅི་དྲག་ཏུ་འདུག་པ་ལ། དགོན་བསམ་བར་དུ་ཀུན་དགའ་དཔལ་བཟང་གིས་ཕེབས་སྐྱེལ་ཞུས། དམག་མི་སྣ་ཚོགས་ཁ་གཏོང་འདོད་ནས་ལྟད་མོ་བལྟ་བར་བྱུང་བ་རྣམས་ཀྱང་བསྲུངས། སྙིང་ཐག་པ་ནས་ཞབས་ཏོག་ཏུ་གང་འགྲོ་བྱས། བྱ་བའི་འགྲོས་དང་གཤིས་ལ་དཔགས་པའི་ཕན་ཐོགས་ཀྱང་དགའ་ཚད་རང་བྱུང་བ་ལགས། ཕར་འབྱོན་དུས་རྔོད་པའི་རྟོགས་ལྡན་པས་ཆིབས་སྣ་བྱེད་པ་སོགས་ཡ་ཆ་ལ་བཀྲ་མི་ཤིས་པ་དེ་འདྲའང་གདའ།
འདི་སྐབས་ལྷུན་གྲུབ་སྤེའུ་བ་ལའང༌། ས་འཇགས་སོགས་ཡེ་མི་ཡོང་བའི་བཀའ་བཀྱོན་གྱི་སྒོ་འདུག་ཀྱང་། ནན་ཆེར་ཞུས་པས་ས་ཆ་ཕལ་ཆེར་སྐྱོན་མེད་དུ་འཇགས། དྲང་སྲོང་བ་ལ་སྲོག་ལ་འབབ་པའི་ཁྲིམས་གཅོད་ཀྱི་བཀའ་བཀྱོན་འདུག་ཀྱང༌། སྲོག་ལ་སྐྱོན་མེད་པར་མ་ཟད། ནོར་རྣམས་ཅི་བདེར་ཐོན་ཅིང༌། གཏེར་རྒྱུས་འབྲས་གཤོངས་ལྟོ་སྐལ་དུ་བྱུང་བ་དང༌། ཡ་བྱང་བ་དྲུང་ཆེན་གྲགས་པ་ལ་ཡང༌། སྔ་སོར་ནས་འབུལ་སྤྲོད་འབུལ་དགོས་རྣམས་འགྲོ་མཚམས་ལྟས་པའི་ལོ་ཤས་མ་ཕུལ་བ་དང༌། དམག་གི་དུས་ཀྱང་སྒྱོགས་གཅོག་གི་གདམས་ངག་བྱས་པ་སོགས། སྲོག་ལ་བབ་པའི་བཀའ་བཀྱོན་ཡོད་ཀྱང༌། སྲོག་དང་ནོར་ལ་སྐྱོན་མེད་ཅིང༌། མཆོད་གཞིས་བརྟེན་ནས་རྔོ་མ་ལུང་ཙམ་འཇགས་པ་དང༌། གདོང་དགའ་ནས་སྔ་སོང་ནས་གཉིས་ཀ་མི་འགལ་བ་ཡིན་ཡང༌། རྗེས་ལ་བྱང་ཚོར་མཁས་ཉམས་ངོ་སོ་རྣམ་གྲངས་མང་པོ་དེ་གཙང་སར་འཕོག(ཕོག)ཐུག་ཆེས་པ་དང་། རྒོད་པ་སྐྱོན་དུ་སོང་བ་ཅིག(ཞིག)བྱུང་ནའང་ནན་བཅགས་ཞུས་པས། ད་ལྟའི་ས་ཆ་འདི་རྣམས་རྟིང་ལ་གནང་བ་ཡིན།
གཞན་ཡང་དཔོན་རིགས་མང་པོ་ལ་བཀའ་བཀྱོན་ཡོད་པ་རྣམས་ལའང་ཅི་རིགས་ཅི་རིགས་སུ་ཕན་པ་མང་དུ་བྱུང༌། དེ་བཞིན་དུ་རྒྱན་གཉེར་པ་རྣམས་གོང་དུ་སྨོས་པ་ལྟར། བྲག་སྟོད་ལ་མིག་གི་རྭ་ལས་མ་བདེ་བ་དེ་ཡིན་ཀྱང༌། དེ་སྐབས་ཆས་ཁ་ཐམས་ཅད་བྲག་སྟོད་དུ་སྐྱེད་དགོས་པ་བྱུང༌། གནོད་ལན་དུ་ཕན་འདོགས་པ་དེ་ཀ་ལ་ཟེར།
གཞན་ཡང་སྐབས་འདིར། གཙང་གཞུང་ཆུ་ལྷོ་བྱང་མདོག་སྨད་ཕལ་ཆེར་ལ། ངེད་ཀྱི་ཡུལ་བསྲུང་རེ་བཏང་བས། དམག་གིས་གནོད་པ་ཡེ་མ་བྱུང༌། ཕྱི་ནོར་ནང་ནོར་ཁང་ཞིང་གང་ལ་ཡང་མ་སྐྱོན། བདག་པོ་འཕོ་འཆུག་བྱུང་ཡང་གནས་ཁང་སྐྱོན་མེད་དུ་བསྡད་ཆོག་པའང་ངེད་ཀྱི་དྲིན་ཡིན། གཞན་ཤག་ཚལ་ཡན་ཆད་དང༌། འཕྱོས་མ་ཡན་ཆད་ལ་ངེད་ཀྱིས་བསྲུང་མི་བཏང་བ་རྣམས་མ་གཏོགས་ཇི་ལྟར་གྱུར་པ་ནི་ཀུན་ལ་གསལ།
དེ་སྐབས་ངེད་ཀྱི་དགོན་ཆོས་གཞིས་ཀུན་ཏུ། གཞན་ཐམས་ཅད་ཀྱི་ནོར་སྐྱེད(བསྐྱེད)ས་བྱས་པས། རྒྱལ་ཁམས་ཕལ་ཆེར་ལ་ནོར་གོང་མ་བྱུང་བ་ཡིན། ངེད་ཀྱི་དགོན་གཞིས་འདི་དག་མེད་པའམ་ཡུལ་བསྲུང་མ་བཏང་བ་ཞིག་ཡིན་ན། གཙང་མདོག་གི་གཞུང་འདི་དག་ཀྱང་སྟོང་གོག་ཙམ་ལུས་པའི་ལུང་སྟོང་ཞིག་འོང་བ་ཡོད། ཕན་ནི་ཤིན་ཏུ་ཆེ་སྟེ། དྲིན་ཤེས་པ་ནི་ཕལ་ཆེར་ལ་མི་གདའ། མདོ་བཤད་པ་དང༌། དྲིས་སྣ་པ་དང༌། ཁམས་རིངས་པ་ལ་སོགས་པས་འབྲེལ་ནི་ཆེ་སྟེ། དང་པོར་སོར་གནས་ཀྱི་དུས་ན་ཆོས་ལུང་ཇོ་ནང་གཉིས་ལ། དབང་ཆེའི་རས་གཅོད་དང༌། བླ་མ་དང་ཆོས་ལུགས་ཀྱི་སྒོ་ནས་ཀྱང༌། གཞན་རྣམས་ཁུངས་མ་དང་། སངས་རྒྱས་མངོན་སུམ་པ། ཞབས་ཏོག་ཀྱང་རི་ལྟར་སྤུངས། འདི་ཕྱོགས་ལ་བཀའ་བཀྱོན་དང་ཁྱད་གསོད་ཁོ་ན་བྱེད། འབྲེལ་པ་ཆུ་ཐིགས་གཅིག་ཀྱང་བྱུང་གི་དོགས་བྱེད་མཁན་མང་པོ་ཞིག་པར་སྐབས་དེར་འདི་ཕྱོགས་སུ་འཇིགས་སྐྱོབ་བྱེད་དགོས་བྱུང་ཞིང་། ཡང་ཡུལ་ལོག་གི་སྐབས་དགྲའི་དང་མ་ལ་སླེབ(སླེབས)བྱུང་ཡང༌། དེ་མ་ཐག་ཁམ་ཚུལ{ཁ་མཚུལ}{ཁམ་མཆུ}འདི་བཞིན་སོང་དུས། ཡང་ངེད་ལ་ཡུས་ཆེན་པོ་ཡོད་པ་ལྟར། རེ་ཆེན་པོས་སླེབ(སླེབས)བྱུང་བ་ན་གནོད་ལན་མ་བྱས་པར། ཕན་ཅུང་ཟད་བཏགས་པ་འདི་བཞིན་ཡིན་པས། ཆོས་པའི་ཐ་མ་རང་ཞིག་བྱེད་བསམ་པ་མེད། བདེན་མི་བདེན་ཇི་ལྟར་ཡིན་སོ་སོ་ནས་བསམ་མནོ་ཐོང༌། རྒྱལ་ཁམས་ལ་དྲིས་པས་གསལ།
གཙང་ནས་སྡེ་སྲིད་ཀྱང་བདེ་ཆེན་ལ་ཉིན་འཁོར་ཞིག་དངོས་ལ་འཕྲད་པར་ཕེབས་ཤིང༌། ངེད་ཀྱིས་རི་ཁྲོད་ཆེན་པོར་སླར་འཁོར། ཞག་ཤས་སོང་བ་ན། སྡེ་སྲིད་དཔོན་གཡོག་ཆིབས་རགས་རྣམས་མར་ལམ་རི་ཁྲོད་ཆེན་པོ་མཇལ་བའི་དགོངས་པས་ཕེབས། རྙེད་བཀུར་ཞབས་ཏོག་བཟང་ལ་རྒྱ་ཆེ་བ་ཡང་མཛད། ཞག་གསུམ་བཞུགས། འདི་དག་གི་སྔ་ཕྱིར་དགོན་མཆོད་གཞིས་ཀྱི་རིགས་སྦྱོར་འཇགས་གནང་བ། བཀྲ་ཤིས་གླིང༌། རྫོང་མདུན། ཁྲམ་མདའ། ཁྲམ་ཕུ། ཆོན་བྲག་སྣ་མཐིལ། བོ་དོང་ནས་བཀྲ་ཤིས་སྒང་ཤར་བ་སོགས་ཐེམ་པ་འགའ་ཤས་དང༌། མདོག་ནས་འདམ་བུ་བཀྲ་ཤིས་སྒང་རྣམས་དང༌། ལ་སྟོད་ཕ་དྲུག་ཏུ་བཀྲ་ཤིས་འཛོམ་སོགས་མཆོད་གཞིས་སུ་སྦྱོར་འཇགས་གནང་ཞིང༌། ནགས་ཕུག་འདི་སྔར་ས་འབྲེལ་ལ་བརྟེན་ནས་སེལ་ཅུང་ཟད་ཡོད་པས། མིང་བསྒྱུར་ན་ཕུགས་ཀྱི་རྟེན་འབྲེལ་ལེགས་པར་ཤེས་ནས། མིང་བཀྲ་ཤིས་གླིང་དུ་བསྒྱུར་བ་ཡིན།
དེ་དག་སོ་སོ་ན་ཡོད་པའི་དགོན་གནས་ཅི་རིགས་པ་དང༌། མཚོད{མཆོད}དགོན་གནས། དགྱེ་བསུ། སྤྲུ་མཆེ་བསུ། གླིང་སྔོན། གཡག་པོ། བཀྲ་ཤིས་དགེ་འཕེལ། བཀྲ་ཤིས་རྩེ་སོགས་དང་བཅས་པ་ཡང་སྦྱོར་འཇགས་དང༌། དེ་རྗེས་མི་རིང་བར་མདོག་ལྷོ་དགོན་གནས་དང་བཅས་པའང་བྱུང༌།
དགོན་བསམ་འབྲས་སྤུངས་འདི་ལྷ་རྩེའི་དམག་གི་སྐབས་འཇིགས་སྐྱོབ་ཏུ་བྱང་ཞབས་དྲུང་རང་གིས་ཀྱང་བསླབ་སྟོན་མཛད་ཅིང༌། ཆོས་བརྒྱུད་ཀྱང་གཅིག་པའི་དབང་དུ་བྱས། ངེད་ཀྱི་མིང་སྐྱོང་གི་ཁོངས་བྱས་པས། དགོན་གནས་ཐམས་ཅད་ལ་དམག་གི་འཇིགས་པ་སོགས་མ་བྱུང༌། དེ་མཐུན་སྡེ་སྲིད་ཀྱིས་ཀྱང་ངེད་ལ་སྦྱོར་འཇགས་གནང༌།
མུས་མདའ་དྲིས་སྣ་ཆ་ལག་དང་བཅས་པ་དང༌། ལྷོ་ཕ་དྲུག་གི་མཁར་ལུང་གཉིས་ཐོག་མར་ཀུན་དགའ་དཔལ་བཟང་ལ་གནང་བ་ཡིན་ཀྱང༌། དགེ་རྒྱུན་མཆོད་ཐེས་སུ་ཕུལ་བས། དེ་མཐུན་མཆོད་གཞིས་ཉིད་ལ་སྦྱོར་འཇགས་གནང་བ་ཡིན། ནང་པ་བོང་མཁར་པའི་བརྒྱུད་པ་ནང་སོ་རྒྱ་ཚོ་བ་རྒྱལ་ཆེན་གྱིས་མདོག་གི་གཅེས་དང༌། འཇད་སྲུག་མོ་གཉིས་དགེ་རྒྱུན་མཆོད་ཐེས་སུ་ཕུལ་བ་ལ་ཡང༌། དེ་རྒྱུན་ལ་གནས་པའི་འཇགས་གནས་གནང༌།
འཇད་ཀྱི་དགོན་པ་དངུལ་ཆུ་ཆོས་རྫོང༌། སྤོ་མཐོན་སྔགས་པ་ཆོས་རྗེ་ཚེ་རིང་བས་ངེད་ལ་ཕུལ་བའང་སྦྱོར་འཇགས་རྒྱབ་གནོད་ཞུས་ཤིང་གནང་བ་སོགས། མདོར་ན་མཆོད་གཞིས་མཆོད་ཐེས་ངེད་ཚོ་རང་ལ་བལྟོས་པའི་རྒྱ་ཆེ་བ་དགེ་རྒྱུན་དུ་སྦྱོར་བ་མཛད། དེ་འཕྲལ་ཉིད་དབུས་ཕྱོགས་སུ་དམག་ལངས་པའི་དཔུང་ཆེན་དབུས་ཕྱོགས་སུ་མགྱོགས་པ་མཛད་སོང༌། དེ་ལོ(ལོར)དགུན་འཁྲིད་ནི་དུས་སྐབས་ཡོལ་བས་བཤོལ། བྱང་ཞབས་དྲུང་ལ་བསྙེལ་ཇ་ཞུ་བར་བསྟན་འཛིན་སོགས་བཏང༌། ཁག་དྲུག་མ་གཉིས་དང༌། སྤོབ་རྩེ་བཞི། ཁ་ཐི་ཡུག་སོགས་འབུལ་ཚན་བཟང་བ་རང་ཕུལ་མོད། འཕྲལ་ཕྱི་ལྟར་དགྱེས་དགྱེས་ཙམ་ཡང་མེད་པའི་ཐུགས་ཁྲོས་སེ་བ་ཡོད་འདུག །
ངམ་རིང་ཆོས་སྡེ་ལ་མང་ཇ་རེ་སྔ་སོར་ནས་ཀྱང་གཏོང་གིན་ཡོད་པས། དེ་མཐུན་ཞུར་བཏང་ཡང༌། མཁན་ཆེན་པས་གཙོ་མཛད་ལས་འཛིན་ཕལ་ཆེར་ཞིག་མང་ཇ་མི་འཐུང་བ་ཡིན་ཟེར། ལྐོག་ཤུབ་དིར་དིར་བྱེད་ཀྱིན་ཡོད་འདུག་པས། དེ་ཕྱིན་ཆད་ནས་ངམ་རིང་ལ་མང་ཇ་མ་བཏང༌། འཕགས་པའི་དགེ་འདུན་མངོན་སུམ་དུ་གྱུར་པ་ཅིག(ཞིག)ནི་དེང་སང་གང་བྱས་མི་རྙེད། རྟགས་ཆ་ལུགས་ཙམ་གྱི་དགེ་འདུན་ནི་གང་དུའང་རྙེད་པར་གདའ་འོ་སྙམ་མོ། །ངེད་ཀྱིས་འདིར་སྒྲུབ་སྡེ་གྲྭ་པ་དང་བཅས་པ་ལ་བློ་སྦྱོང་ཞིབ་པ་ཅིག(ཞིག)བྱས། དགུན་མཚམས་དམ་ཞིང་ཐུགས་དམ་འཕེལ་བར་བྱུང༌། བར་སྐབས་དེར་དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་གྱི་ཆོ་ག་འཁྱེར་བདེ་བ་འདི་བརྩམས་པ་ཡིན།
དེ་ནས་འཕྲལ་དུ་དབུས་ཕྱོགས་སུ་འགྲོ་བར་འདོད་ཀྱང༌། ཉེ་སྐོར་འདི་ཀུན་ན་ཟི་རེ་བ་ཞིག་འདུག་པ་དང༌། རང་རེ་ལ་སྡེ་སྲིད་ཀྱིས་མཆོད་གཞིས་གནང་བ་ལ། དོན་མེད་ཕྲག་དོག་ལངས་པའི་མིག་མ་ཤོང་བྱེད་མཁན་སྣ་ཚོགས་ཤིག་འདུག་པས། རེ་ཞིག་འདི་སྐོར་རང་དུ་བསྡད། དགེ་སྦྱོར་འཕེལ་བར་བྱུང་ཞིང༌། གཏོར་མ་འགའ་རེ་ཡང་བཏང༌། རྨི་ལམ་གྱི་ལྟས་ངོ་མཚར་ཆེ་བ་ཤས་ཅིག(ཤིག)ཀྱང་བྱུང༌།
སྐབས་ཅིག(ཤིག)ཁྲོལ་ལེ་མ་ནས་ལོ་ཆེན་སྤྲུལ་སྐུའི་དབོན་པོ་མཁས་བཙུན་པ་ཉུག་ཙམ་ཕྲད་པར་བྱུང་དུས། ཁོང་གི་རྔམ་འདྲེ་ཆེན་པོས་ཇ་དང་ཞོ་ཆང་ཐམས་ཅད་ཉེས། བགེགས་སྐྲོད་ཅིག་བཏང་བས། དེ་འཕྲལ་ཁུགས་བྱུང༌། སྐབས་དེར་ཕྱག་འཚལ་ལ་མོ་ནས་རྫོང་མདོའི་བར་གྱི་རི་འདི་དག་གང་རུང་ཅིག(ཞིག)ལ་སྡོད་གནས་བྱའམ་སྙམ་པའི་བློ་ཡང་ཡང་སྐྱེ་བ་ཞིག་བྱུང་སྟེ། ཕྱིས་དགོན་གནས་འདི་འདིངས་པའི་རྟེན་འབྲེལ་དུ་འདུག །