ཉེར་དགུ་པ།
མཛད་པ་པོ། རྗེ་བཙུན་ཏཱ་ར་ནཱ་ཐ།
ཧོར་ཟླ་གསུམ་པའི་ཚེས་བཅུ་གཉིས་ཀྱི་ཉིན། རྒྱབ་རི་སྔོ་འབོར་སྐྱོང་གི་རྩེར་གཏོར་མ་རྒྱ་ཆེ་བ་ཞིག་གཏོང་བ་ལ་ཕྱིན་དུས། ཡར་ལམ་རིའི་རྩེ་འོག་ནས་ཕར་ཤིན་ཏུ་ངལ་ཞིང་ཐང་ཆད་པ་དང༌། རྐང་པ་གཡས་ལ་རྡོ་ཟུར་གྱིས་གནོད་པའི་རྨ་ཆེན་པོ་བྱུང་བ་སོགས། ལྷོངས་ཆེ་སེ་བ་ཅིག(ཞིག)གི་ངང་ནས་གཏོར་བསྔོ་ཕྱེད་ཙམ་སོང་བ་ན། རྩུབ་འགྱུར་དང་ཁམས་ཉོག་པ་སངས། རིག་པ་དྭངས་ཤིང་དམིགས་པ་གསལ་ལ་ཟིལ་ཆེ་བ། དམ་ཅན་ཆོས་སྐྱོང་སྲུངས(སྲུང)མ་རྣམས་དངོས་སུ་ཕང་ཕུང་དུ་འདུས་པའི་ཉམས་སྣང་དང༌། ཁྱོད་ཀྱི་འདོད་དོན་འཕྲིན་ལས་བདག་གིས་བསྒྲུབ་པར་བྱའོ། །ཟེར་བའི་རྣམ་པ་བྱུང་ཞིང༌། འཇུག(མཇུག)ཏུ་བར་ཆད་ཞི་བའི་ཕྱིར། ཕྱོགས་མཚམས་བརྒྱད་ལ་ཟོར་རེ་འཕངས་པས། འུར་སྒྲ་དང༌། ཐུག་ཆོམ་ཆེན་པོ་དང༌། སྡེ་བརྒྱད་རྣམས་རླུང་ནག་འཚུབས་པ་བཞིན་དུ་ཕྱོགས་བཅུར་འགྲོ་བའི་རྣམ་པ་བྱུང༌།
འདི་སྐབས་རྩེ་ཆེན་ཆོས་སྡེའི་ཆོས་བདག་དགེ་བསྙེན་བཟང་ར་བ་དེ། ལུས་གཡས་བསྐུལ་ནས་འདིར་སླེབ(སླེབས)བྱུང་པས། སྤྱིར་དཔལ་ཇོ་ནང་པའི་བསྟན་པ་བསྲུང་བར་ཁས་བླངས། ཁོང་རང་གི་འདོད་དོན་ལ། རྩེ་ཆེན་གྱི་མཁན་པོ་ལ་ཡོངས(ཡོང)དགོས་ཚུལ་དུ་འདུག་ཅིང༌། གནས་སྐབས་སུ་འཕྲིན་ལས་སྒྲུབ་པ་ལ་གཏོར་མ་གཤེར་བའི་ཚུལ་ཡང་བྱེད།
དེ་སྐབས་ཡར་ཀླུངས་ཀྱི་དུས་འཁྲུག་ལ་ཕྱོགས་གཏམ་སྣ་ཚོགས་སྨྲ་བ་ཞིག་ཡོད་པ། ལུས་གཡར་དེ(ཏེ)མི་རྣམས་ཟེར་བའི་གཏམ་སྣ་ཚོགས་དེ་ཁ་ལབ་པར་འདུག །བཟང་ར་རང་ཁོག་ཏུ་ཞུགས་ནས་དམག་གི་གཏམ་སྨྲ་བ་དེ(སྟེ)། དེ་དང་མི་མཐུན་པར་ཞིབ་རྒྱས་མང་པོ་ཟེར་བ་འདུག་པ། རྟིང་ལ་དེ་ཀ་བདེན་ཅིང་ཐིགས(ཐིག)པར་བྱུང༌། དེ་ནས་ཆད་མདོ་མང་པོ་ཞིག་བྱས་ནས་ལོག་སོང༌།
འདི་སྐབས་སྔ་ཕྱིར་རང་རེའི་གྲྭ་པ་གསར་པ་རྣམས་ལ་འཇིག་རྟེན་བསྟན་བཞག་དང་། བདེ་བ་ཅན་གྱི་ཞིང་བཀོད་ཀྱི་མདོ་དང༌། གཟུངས་དབང་གི་རྒྱལ་པོའི་མདོ་ཕྱིར་ཙམ་བཤད་པ་ཡིན་ཏེ། ལོ་གཞོན་པ་དང་། རྗེས་ལ་སློབ་དཔོན་དགེ་རྒན་གྱིས་ནན་བཅགས་བྱེད་མཁན་གྲུལ་ཐུབ་པ་མེད་པས་རྗེས་ཡེ་མ་བྱུང༌། དེ་སྐབས་ཡར་འབྲོག་ནས་དབོན་ས་ཆུ་ཤུལ་མ་གཤེགས་པའི་དགོངས་རྫོགས་ཀྱི་གྲལ་དབུ་ལ་འབོད་མིར་སྡེ་པ་ཁ་བ་ལུང་ནས་འབྱོར།
ཚེས་བཅོ་ལྔའི་ཉིན་མོ་བཀྲ་ཤིས་གླིང་དུ་ཕྱིན། ཁྲོམ་དབང་ཞིག་ཀྱང་བྱས། འབྲུག་སྒྲ་ཆེར་བསྒྲགས་པ་སོགས། རྟེན་འབྲེལ་གྱི་སྒོ་འགའ་ཤས་ཤར། རྟོགས་ལྡན་བཟང་རྒྱན་པ་དང་གླེང་བརྗོད་པ་འདྲ་བྱས་དུས། ཆོས་རྗེ་ཤོངས་ཆེན་པ་དང༌། དཔོན་པོ་མཁས་བཙུན་པ་དང༌། ཁམས་རིངས་ཆོས་མཛད་སོགས་ལ་ཁོང་གིས་བོ་དོང་བཙན་ཐབས་ཡུན་རིང་དུ་བསླབ་ཚུལ་སོགས་ཁོང་རའི་སློབ་མ་རྣམས་ངོམས་པར་འདུག །
ལར་སེམས་ཆུང་དགའ་མོད་འདུག་སྟེ། བླ་ཆུང་ཕལ་ཆེར་ལ་ཡོད་པའི་ཆོས་བརྒྱད་སད་སུ་དེ་ཁོང་ལའང་གདའོ། །སྔ་སོར་ལྷ་རྩེའི་དམག་གྲོལ་བ་ནས་འདིའི་བར་དུ། ཕྲག་དོག་ཅན་གྱི་བླ་མ། སློབ་དཔོན། སྔགས་པ། བོན་པོ། དགོན་སྡེ་རིགས་མང་པོ་ཞིག་ནས། ངེད་ལ་བསམ་སྦྱོར་ངན་པའི་མཐུ་བཏང་། ངན་བྱེད། རྦོད་གཏོང་སྣ་ཚོགས་བྱས་པའི་ལྟས་མང་པོ་རང་ཞིག་རྨི་ལམ་དུ་ཤར་བྱུང་ནའང༌། རྣམ་རྟོག་ཟ་བའི་སྙེམས་ཁྲིགས་ཡེ་མ་བྱུང༌།
རི་རྩེར་གཏོར་མ་ཆེན་པོ་བཏང་བ་དེས། དེ་དག་ཐམས་ཅད་ཕར་ལོག་པའི་ལྟས་གསལ་པོ་ཞིག་ཚེས་བཅོ་ལྔའི་དགོང་མོ་དེ(དེར)བྱུང་སྟེ། བདག་རང་ཁྲོ་བོའི་སྐུ་གཅིག་ཏུ་གྱུར་ནས། རི་ནག་པོ་གཅིག་བཤིག་ཅིང་བསྒྱེལ་བ་དང༌། ཡང་ངས་མི་ནག་པོ་ཉི་ཤུ་རྩ་འདྲེན་ཞིག་གི་སྐེ་བཅད་དེ་མགོ་རྣམས་ཟོས། འཕྲོ་རྣམས་གཡང་ས་ལ་བསྐྱུར་བ་དང༌། རི་བྲག་ཤིན་ཏུ་མཐོ་བ་དོག་མོ་གཅིག་ཏུ། རླུང་ནག་འཚུབ་མ་མི་བཟད་པའི་གསེབ་ནས། འཇིགས་སུ་རུང་བའི་གཟུགས་ཀྱིས་ས་གཞི་བར་སྣང་ཐམས་ཅད་ཁྱབ་འདུག །ཐམས་ཅད་བདག་ལ་རྒོལ་དུ་བྱུང་བ་ལ། རང་ཤར་བདེན་མེད་སྒྱུ་མ་ལྟ་བུ་ཤེས་ནས། དེ་ཀ་ལ་བཞག་པས། ངེད་རྣམས་མ་འཛིན་པར་གཏོང་རོགས་གྱིས་ཟེར་དེ(ཏེ)། ཐམས་ཅད་ཙབ་ཙོབ་ཏུ་འདུག་པ་ལ། ཕཊ་ཅིག་རྒྱབ། དབྱིངས་རིག་བསྲེས་ནས་བསྐྱུར་བཏང་བས། ངེད་རྒྱལ་པོ་ཡིན་པ་ལ། ངེད་བཙན། ངེད་གཟའ། ངེད་ཀླུ་ཡིན་པ་ལ་འདི་འདྲ་བྱེད་པ་ཨ་ཟེར་ཞིང་། ངུ་ཆོམ་སྡིང་གི་ནམ་མཁའ་མཐའ་མེད་པ་ཞིག་ལ་ཡས(ཡལ)ནས་སོང༌། སེམས་སྟོང་གསལ་གཡོ་བ་མེད་པ་ཡུན་རིང་པ་ཅིག(ཞིག)ཏུ་གནས་བྱུང༌།
དེ་མཚམས་ཅིག(ཤིག)ནམ་མཁའ་ནས་སྙིང་རྗེ་སྒོམས། སྙིང་རྗེ་སྒོམས་ཟེར་བའི་སྒྲ་ཅིག(ཞིག)བྱུང༌། སྤྱིར་ཉོན་མོངས་ཀྱི་རྣམ་རྟོག་རྣམས་སྟོང་ཉིད་རྐྱང་པས་ལམ་དུ་ཁྱེར་ན། རེ་ཞིག་ལམ་དུ་ལོངས་ཡོད་ཀྱང༌། རོ་མ་གཅིག་ལྡང་ཉེན་ཡོད། ཕུགས་མཐའ་གཙང་ཡོང་བ་ལ་སྙིང་རྗེས་ཟིན་པ་དགོས་ཟེར་བའི་ཆོས་སྐད་ལ་བརྟེན་ནས། ལུང་བསྟན་རྫུས་མ་བྱེད་པ་ཡིན་པར་ངོ་ཤེས་བྱུང༌།
མཉམ་གཞག་དེ་ཁའི་ངང་ནས་འདི་སྐད་དུ། སྙིང་རྗེའི་རྒྱུས་དང་ང་ཆེ་སྟེ། །མཛོ་བདག་གི་ཀློགས་སུ་མཛོ་རབ་ཨང༌། །སེམས་ཅན་གདོད་ནས་མེད་པ་ལ། །སྙིང་རྗེའོ་སྙམ་ན་སྙམ་མཁན་འཁྲུལ། །བྱ་བའི་ཚིག་དེ་གསལ་པོར་ལྷང་གིས་ཤར་ཞིང༌། སླར་གང་དུ་ཡང་བཞག་ས་མེད་པའི་མཉམ་བཞག་དེ་ག་ལ་ལ་བཟླས་པས། ཇ་སྦྱོར་གཉིས་གསུམ་ཙམ་སོང་བ་ན། རིག་པ་འཇམ་ཞིང་། བདེ་བ་མདངས་བྱམས་སྙིང་རྗེ་ཆེད་བསྟད(གཏད)བསྒོམས་པ་མ་ཡིན་པར་རང་ཤུགས་སུ་ཤར་བ་ཅིག(ཞིག)བྱུང༌།
སྔར་གྱི་འཇིགས་པ་ཅན་དེ་རྣམས་གཟུགས་མཛེས་པའི་རྣམ་པ་ཅན་དུ་བྱས་ནས། སྒུམ་སྒུམ་ཕྱག་འཚལ་ཞིང་། བཤགས་པ་འབུལ། རྗེས་སུ་བཟུང་དུ་གསོལ་ཟེར་བའི་རྣམ་པ་འདུག་པ་ལ་ཡང༌། དགའ་ཚོར་དང་། མཚན་འཛིན་དང༌། སྲེད་པ་དང༌། རློམ་སེམས་སོགས་གང་ཡང་མ་བྱུང་སྟེ། ཚིག་འདི་སྐད་ཅེས་ཐོལ་ཏེ་སྨྲས་སོ། །
འདི་ཐམས་ཅད་ང་རང་གི་རིག་པའི་རྩལ། །ཕྱི་སྣང་སྲིད་ལྷ་འདྲེ་ག་ལ་སྲིད། །ཁྱོད་ལྷ་འདྲེ་ཡུལ་ནས་མེད་པ་ལ། །རྦོད་གཏོང་དང་གནོད་བྱེད་ག་ལ་ཡོད། །ནང་རིག་པ་ཡོད་དུ་སྐད་བྱས་ཀྱང༌། །བྱར་མེད་ཀྱི་ངང་ལ་རིག་པ་སྟོར། །སྔར་ང་རང་གི་རིག་པ་ཟེར་བ་བྱས། །ང་རང་ཉིད་མེད་པ་ལ་རིག་པ་ཅི། །ལུས་སྣང་བ་འདི་མི་བདེན་རྫུན་པའི་ངང༌། །སེམས་རིག་པ་མིང་སྟོང་སྒྲ་སྐད་ཙམ། །ཁྱེད་གནོད་པ་བྱེད་ན་སུ་ལ་བྱེད། །ཁྱི་བླུན་པོ་བྱ་གྲིབ་ཀྱི་རྗེས་ལ་རྒྱུག །སྣང་སྲིད་ཀྱི་ལྷ་འདྲེ་ཁྱེད་རྣམས་དང༌། །མི་བདག་ཅེས་མིང་སྐམ་ཐ་དད་ཀྱང༌། །དོན་རིག་པ་གཅིག་ལས་གཉིས་སུ་མེད། །གནོད་བྱ་གནོད་བྱེད་ཀྱི་རྩ་བ་བུད། །ཁྱེད་བཤགས་པ་འབུལ་ན་སུ་ལ་འབུལ། །ལར་བཟོད་གསོལ་ལེན་ན་སུ་ཡིས་ལེན། །ཉེས་པ་ནི་རྨི་ལམ་གྱི་བུ་དང་འདྲ། །འགྱོད་ཚངས་ནི་ནམ་མཁའི་མེ་ཏོག་ཡལ། །ཐུགས་རྗེས་འཛིན(གཟུང)བྱ་དང་འཛིན་བྱེད་སུ། །མཐའ་མེད་ཀྱི་ནམ་མཁའ་སྟོང་སང་ལ། །འཛིན་འདོད་ཀྱི་སྤར་ནོམ་བྱེད་པ་འཁྲུལ། །འཇའ་ཚོན་ལ་རྟ་རྒྱུགས་བྱེད་མཁན་གང༌། །ཞེས་པ་ལ་སོགས་པ་ཉམས་འུར་བའི་ཚིག་མང་དུ་ཡོད་དེ། དེ་ཙམ་མ་གཏོགས་ད་དགོས་བརྗེད་འདུག །
དེ་ནས་དེ་རྣམས་ཁྲག་གི་མཆི་མ་ནར་ནར་ཕྱུང་ནས་སྨོན་ལམ་རེ་བཏབ། ལུས་ས་ལ་བོར་བ་བཞིན་བྱས་ཏེ་ཡལ་སོང༌། དེ་ལྟར་བྱུང་བ་འདི་ཡང་། དངོས་རང་ནི་ཅི་ཡིན་རྨི་ལམ་རང་ཡང་མ་ལགས། གཉིད་ལ་ནི་མ་སོང༌། གསལ་སྣང་ནི་ཉིན་མོ་ལས་ཀྱང་ཆེ། ཉམས་སམ་དེ་ཀ་ཡིན་དེ་འོང༌།
ཡང་སྐབས་འདིར་སྨྲས་པ། ངེས་དོན་གྱི་གནད་འགག་གོ་བ་འདིས་ཆོག །མདོ་རྒྱུད་ཀྱི་དགོངས་དོན་ཐལ(ཐང)མར་བརྡལ། །སངས་རྒྱས་སུ་སྒྲོག་པ་ལ་རེ་མ་དགོས། །ཁོང་ཁ་སྒྲིག་མཁན་ཀུན་ཡི་རེ་མུག །ལྷན་སྐྱེས་ཀྱི་བློ་གྲོས་ཁོང་ནས་ཤར། །འགལ་འབྲེལ་གྱི་རིག་པ་ཟད་པ་མེད། །ཐལ་འཕྲེང་ལ་སློབ་གཉེར་མ་དགོས་ཙམ། །པིར་སྐྱོག་གི་པོ་ཏི་ཀུན་རླུང་ལ་བསྐུར། །རིག་པ་རང་གྲོལ་འདི་གདེངས་རེ་ཐུབ། །སྡེ་བརྒྱད་འབྱུང་པོ་ཀུན་བཀའ་བཞིན་ཉན། །དྲག་དམར་གྱི་བསྙེན་པ་ལ་མི་རེ་ཙམ། །རཀ་ཤ་དང་ཐོད་འཕྲེང་ཀུན་སྲང་ཁར་འཐོར། །ཕུང་པོ་ཟན་བསྒྱུར་འདིས་གོ་རེ་ཆོད། །མཐུ་བཏད་དང་འདྲེ་ཁ་ལ་ཞལ་སྐྱེངས་བྱུང༌། །ཡང་བཟློག་ལ་མུར་ཉིད་མི་དགོས་ཙམ། །ཕུར་ཐོགས་ཀུན་གང་དགའ་ཅི་དགའ་གྱིས། །སྟོང་ཉིད་ལ་འདུན་པ་སྒྱུར་བས་ཆོག །སྡང་དགྲ་ལ་ཕྱི་རྟགས་ནང་མར་འོང༌། །མཛེ་ཐོད་ལ་ནོར་རྙིང་འཆོལ་མི་དགོས། །རྫས་འཁོར་ལོ་ཀུན་རྩིག་ཕུགས་སུ་རུལ་རུལ་འདྲ། །ཞེན་མེད་ཀྱི་སྙིང་རྗེ་འདི་གོ་ཆོད་པོ། །དགོས་ངེས་ཀྱི་ལྷ་མི་ཀུན་དབང་དུ་འདུས། །ཕོ་རྟགས་ལ་ཕྱག་མཆོད་མི་དགོས་ཙམ། །དབང་སྡུད་ཀྱི་ཤོག་རིལ་ཀུན་ཆུ་ལ་ཤོར། །རྩོལ་མེད་ཀྱི་བུམ་ཅན་འདི་གོ་ཆོད་པོ། །བདེ་དྲོད་ཀྱི་ངང་ལ་སྲོག་ཐུར་འདྲེས། །རྒོད་རྐང་དང་ལྕགས་སྦུབས་ལ་མི་རེ་ཙམ། །ཁོང་ཤ་སྲེད་འབུ་སྲེད་ཀུན་འོ་རེ་བརྒྱལ། །གང་ཤར་གྱི་ལྷ་སྐུ་གོ་ཆོད་པོ། །འདོད་དོན་ཀུན་གེགས་མེད་ལྷུན་གྱིས་འགྲུབ། །རྔ་བརྡུང་ལ་མི་ཚེ་སྐྱེལ་མ་དགོས། །ཁོང་རེ་དོགས་ཅན་ཀུན་དང་འདྲ་རེ་ཀན། །ཞེས་བྱའོ། །
དེ་ནས་ཟླ་བ་དེ་ཁའི་ཚེས་བཅོ་བརྒྱད་དང་བཅུ་དགུ་ལ། དམག་བརྡ་འགོ་མ་རྣམས་རྒྱབ། གཡས་རུ་བྱད་པའི་ཡུལ་ལངས་སུ་གྲགས་པ། དཔོན་གཡོག་ཐམས་ཅད་ཕུང་བ། སྐུ་ཆགས་ཀྱི་ཞིབ་ཆ་ཆེན་མོ་དེ་མཛད། མདོ་བཤད་པ་དང་དྲང་སྲོང་པས་ངེད་ཀྱི་མཆོད་གཞིས་གསར་རྙིང་ཐམས་ཅད་ལ་ཡང་ཡུལ་ལོག་གི་དམག་བསྐུལ་ལ། བྱང་ཞབས་དྲུང་རང་གི་ཕྱག་རྟགས་ཁྱེར་ནས་སླེབ(སླེབས)། དེ་སྐབས་ངེད་ཡར་འབྲོག་ལ་འབྲེལ་དུ་འགྲོའི་ཆས་ཁ་བརྡེག་འབྲུ་ཚུན་ཆད་གྲུབ་པ་ཡིན་ན་ཡང༌། ཟིན་བུན་ཆེས་པའི་སྟབས། དགག་དགོས་དུ་མ་འདུག་པ་ནས། དེ་རེས་འགྲོ་མ་ཐུབ།
སྐབས་དེར་འབྲས་སྤུངས་པ་དང་། བདེ་མཆོག་རྩེ་བ་རྣམས་སྔ་སོར་རང་རེ་ལ་འཇིགས་སྐྱོབ་ཀྱི་བློ་གཏད་བྱས་པ་ཡིན་ཀྱང༌། བར་དེར་ཡུལ་ལོག་གི་གྲ་ལ་ཅུང་ཟད་ཐེབ(ཐེབས)པའི་སྡོད་ལུགས་མ་མཁས་པ་ལ་བརྟེན། བྱེད་ལུགས་དང་བསྟུན་པའི་ཡོང་ལུགས་ཀྱི་རྣམ་པས་གཟན་སོ་ཅི་རིགས་པ་བྱུང༌།
མཆོད་པའི་ཕྱག་གཡོག་རྣམས་ཀྱིས་ཡུལ་ལོག་གི་སྐབས་མི་འཚམ་པ་དུ་མ་བྱས་ཡོད་ཀྱང༌། རེ་ཞིག་སྒྲོས་མེད་དུ་བཞག་གོ །ཡུལ་ལོག་གི་ཟེར་བུན་ཆེ་བ་རང་གི་སྐབས་དེར་ཡང་། ངེད་ལ་ནི་དོ་གལ་ཙམ་མ་བྱུང་སྟེ། མཚམ་མེ་བའི་ཁོག་ནས་དཔའ(དཔལ)འཁོར་ལོ་སྡོམ་པའི་དཀྱིལ་འཁོར་ལ་ཞི་བའི་སྦྱིན་སྲེག་ཁྲི་ཕྲག་ལྔ་པ་ཞིག་དང་། རྡོ་རྗེ་ཕག་མོ་ལ་ཡང་དེ་ཙམ་ཞིག་ཕུལ། ཉིན་གཅིག་ནག་པོ་ཆེན་པོ་ལ་ཡང་སྟོང་ཕྲག་བཞི་ཕུལ། དེ་དག་གི་རིང་ལ་ཉིན་མོ་ཀུན་དགའ་དཔལ་བཟང་གིས་འགོ་བྱས། གཞི་སྡོད་རྣམས་ཀྱིས་ཤར་གྱི་ཤོལ་ར་ཆེན་མོའི་ཤིང་འདེབས་རྣམས་བྱེད་ཀྱིན་བསྡད། རྟེན་འབྲེལ་ལེགས་པ་ཞིག་ཡིན་འདུག །དེ་དུས་བཏབ་པའི་ཤིང་ལ་མ་སྐྱེས་པ་ཞིག་ཀྱང་མ་བྱུང༌།
ཕྱོགས་ནས་ཡོངས་པའི་མི་རྣམས་ན་རེ། གཙང་མདོག་གཉིས་ཀ་ན་ཡུལ་ལངས་དང༌། དམག་གི་ཤོམ་ལུགས་དང༌། ད་ལྟ་རང་ཁྱེད་ཀྱི་གནས་དགོན་ཆོས་གཞིས་ཐམས་ཅད་ཧབ་ཟས་ལ་གཏོང་བ་ཙམ་གྱིས་རྔམ་འཇིགས་འདི་འདྲ་ལ། འདི་རུ་སླེབ(སླེབས)དུས། འདི་འདྲའི་སོས་དལ་བ་རང་ག་འདྲ་ཡིན་ནམ་ཟེར་མཁན་རྐྱང་བ་བྱུང༌།
དེ་དུས་རྒྱ་གན་ནས་ཀྱིས་འགོ་བྱས་པའི་ཉང་གཙང་གི་ཕོ་ཡན་སོགས་ཀྱི་དམག་རྣམས་ནི་ལམ་ལ་དལ་འགྲོས་རང་དང་། བོ་དོང་རང་དུ་ཡང་ཞག་བཞི་ལྔ་བསྡད། འདི་ཕྱོགས་སུ་ཡུལ་ལངས་མུས་མདོག་གི་དམག་རྣམས་གཞི་མེད་དུ་འཐོར་གྲུབ་པའི་རྗེས་ལ། ཉི་མ་གཉིས་གསུམ་ནས་སྐད་ཆ་ངེས་ཅན་ཚོར་བའི་ནོམ་པ་ལ་རྔམས་ནས་རྒྱུགས། དེའི་སྔོན་ལ་བོ་དོང་ཡན་ཆད་ལ་ཅི་ཡང་ཡོང་མ་ནུས། གཞུག་ཏུ་ཡུལ་འཇོམས་དང་། ངམ་རིང་གི་ནོར་སོགས་ནོམ་པ་ལ་རྔམས་རྒྱུགས་བྱས་པ་ལ། དཔའ་རྟགས་ལེན་པ་དེ་ཡང་ཡ་ཆ་བར་གདའ། གང་ལྟར་ཡུལ་ལངས་གཙང་མདོག་གཉིས་ཅར་ལ་དམག་ཤིན་ཏུ་མང་བ་དེ། རྒྱུ་མཚན་མེད་པ་ལ་བྱེར་པ་དེ་ཡང་སྲུང་མ་རྣམས་ཀྱི་བཀའ་ཆད་ཡིན་པར་ཐེ་ཚོམ་མེད་དོ། །མཁའ་འགྲོ་ཆོས་སྐྱོང་བྱ་བ་རྦད་བསྐུལ་བྱས་པ་རྐྱང་པས་འགྲོ་བ་རང་ཅིག(ཞིག)མིན། དམ་ཚིག་མ་ཉམས་ཤིང་། ཆོས་བསྒོམ་པ་ལ་བུ་བཞིན་སྐྱོང་བ་ཅིག(ཞིག)ཡིན་ལགས།
དེ་ནས་མི་རིང་བར་བདེ་འཇམ་དུ་སོང་བ་དང༌། རང་ཡུལ་ནས་ཨ་ཁུ་ལགས་ཀྱང་སྐུ་ན་ཚོད་སྨིན་གྲགས་པའི(པས)བགྲེས་ནད་ཀྱིས། ཞལ་མ་བཞུགས་ཟེར། འབོད་མཁན་བྱུང་བས་རྐྱེན་བྱས་ཏེ་འཕྲལ་དུ་བཏེག །གྲྭ་པ་གང་ཡོད་རྣམས་ཁྲིད་ནས། མཚེད་ཀྱི་མདའི་གང་རྫོང་ཆུང་ཆུང་དེར། ངེད་དབུས་ནས་འཁོར་གྱི་བར་གྲྭ་པ་རྣམས་སྡོད་ས་བྱེད་པ་བྱས།
ངེད་ཀྱིས་ཀྱང་ཞག་གཉིས་བསྡད། རིམ་པས་ཆས་འོངས་པས། དབུ་རྒྱན་རྫོང་གི་གྲུ་ཧྲུལ་པོ་དེ་ལ་ཞུགས་ཡོངས(ཡོང)དུས། ག་ནས་བྱུང་ཆ་མེད་པ་ལ་བུད་མེད་ནག་རུལ་ལེ་བ་འཇིགས་པ་ཞིག་གྲུ་ནང་དུ་ཞུགས་ནས་མཉམ་པོར་བྱུང༌། ཆུའི་དཀྱིལ་རང་དུ་སླེབ(སླེབས)ཙམ་ལ། རླུང་ནག་ལུང་མེད་ཞིག(ཅིག)ལངས། གྲུ་ཐམས་ཅད་ཆུས་ཁེངས། སྡིབ(རྡིབ)ལ་ཁད་པ་ལ། སྣང་སྟོང་སྒྱུ་མ་རྨི་ལམ་དང་ལྟ་བུར་རང་ཤར་ཏེ། སྙེམས་ཁྲིགས་རྦད་ཀྱིས་ཆོད་པ་ན། འཕགས་མ་སྒྲོལ་མའི་སྐུའི་རྣམ་པ་ཞིག་ཝལ་གྱིས་ཤར། དེ་ཁའི་ངང་ལ་འགྲམ་དུ་སླེབ(སླེབས)། རླུང་ཡང་ཞི། བུད་མེད་དེ་ཡང་གར་སོང་མ་བྱུང༌།
མདོལ་བྱུང་དུ་སླེབ(སླེབས)དུས། གཙང་སྡེ་སྲིད་ཀྱང༌། དབུས་ཕྱོགས་ཀྱི་བྱུས་ལེགས་ཤིང་ཡར་ལམ་རྒྱལ་རྩེར་ཕེབས་པ་དང་འཛོམ་སྟེ(འཛོམས་ཏེ)། འབོད་མཁན་གནང་བྱུང་བ་ལྟར་རྒྱལ་རྩེར་ཕྱིན། རྩེ་ཆེན་རྒྱབ་ཀྱི་དགའ་ཐོག་ན་ཁ་ནས་གཟུང་ཆིབས་རགས་མང་པོ་དང༌། ཡ་ཚད་ནས་ཆོས་སྡེའི་སེར་འཕྲེང་གྲངས་མང་ཞིང་། ཕྱག་ཁྱེར་རོལ་མོ་སོགས་བཟབ་རྒྱས་དཔེ་མེད་རང་གི་བཀོད་ཤོམས་མཛད་འདུག །དགོངས་བཞེད་ལྟར་གྱི་རྐྱེན་སེལ་དབང་ཆོས་ཅི་རིགས་པ་ཕུལ།
ངམ་རིང་ནས་བྱང་ཞབས་དྲུང་རང་ཕེབས་དགོས་བྱུང་བའི་སྐབས། མནན་གཏད་འགོམ་འཇོག་སོགས་ཀྱི་འཁོར་ལོ་མང་པོ་བྲིས་པ་རྣམས་ཤུལ་དུ་ལུས་པའི་རྗེས་ངན་བསྟན། འཁོར་ལོ་མང་པོ་ཞིག་དེ་སྐབས་ཁྱེར་འདུག་པ་ངེད་ཀྱི(ཀྱིས)བཀྲུ་སྦྱངས་བྱས།
དགེ་ཚ་ཆེན་མོའི་གོས་སྐུ་འགྲིམས་པའི་ཉིན། ཆོས་སྡེའི་སྐུ་འབུམ་ཆེན་མོར་ཕྱིན། ཆོས་སྡེར་མང་ཇ་སྦྲེལ་མ་དང༌། རྟ་བཟང་བ་གཅིག་གིས་གཙོས་པའི་འགྱེད་དང༌། བསྔོ་རྟེན་རྣམ་གཞག་ཐམས་ཅད་ཀྱང་གང་བཟང་རང་བསྒྲུབས། རྟེན་མཇལ་རྣམས་ཞིབ་པར་བྱས། བླ་བྲང་དུ་ཞབས་དྲུང་འཕགས་པའི་དྲུང་དང་ཡང་མཇལ་སྐབས་དེར་ཞག་བཅུ་ཙམ་བསྡད། ཁང་སར་གྲྭ་ཚང་ནས་ཀུན་མཁྱེན་ཆོས་ཀྱི་རྒྱལ་པོའི་སྐུ་བརྙན་གསུང་འབྱོན་མ་སྤྱན་དྲངས་དེ(ཏེ)གསོལ་བ་བཏབ། རེ་ཞིག་རྩེ་རུ་བཞུགས་ན་ལེགས་པ་འདྲ་སྙན་དུ་ཕུལ་ཀྱང༌། ཕྱིས་གྲྭ་ཚང་བས་ནན་བཅགས་ཞུས་ནས་དེ་འཕྲལ་སྤྱན་དྲངས་འདུག །
གཞན་ཡང་ཉིན་རེ་བཞིན་འཕེལ་གདུང་ལ་སྐུ་གྲིབ་སེལ་བྱེད་ཀྱི་སྐུ་ཁྲུས་ཕུལ་བས། ལེགས་པའི་དགེ་མཚན་ཡང་བྱུང༌། སྔ་སོར་རྨི་ལམ་ལ། རྒྱལ་རྩེའི་ལི་མ་ལྷ་ཁང་ན་རྟེན་བཅུ་ལྷག་ཞིག(ཅིག)རམ་མེ་འདུག །གཞན་གང་ཡང་མེད་པའི་སྟོང་སང་ངེ་བ་དེ་འདྲ་ལན་གཉིས་གསུམ་བྱུང་བ། དེ་སྐབས་མངོན་སུམ་ལྟ་བུར་གྱུར་འདུག །
དེ་ནས་འགྲོ་ཁར་ལྷུན་གྲུབ་སྤེའུ་ནས་རྣམས་ངོ་ཆེན་ཞུ་བར་སླེབ(སླེབས)། རང་རེས་སྙན་དུ་ཕུལ་བས། གང་འོས་ཅིག(ཤིག)ཡོང་གསུང་བ(གསུངས་པ)བྱུང༌། འགྲོ་བ་དང་ཐུག་པས་རྗེས་འཐུད(མཐུད)རྒྱུ་མ་བྱུང༌། ད་ལྟ་ཉིན་བྱེད་གླིང་པས་ངོ་སོ་ཡོང་ཙམ་བྱས་པའི་ས་ཆ་འདི་ཡིན། བྱང་རང་གི་དཔོན་གཡོག་ཐམས་ཅད་བློ་རིགས་འདྲ་བ་ཅིག(ཞིག)ཀ་བདོག །དེ་སྐབས་རི་ནང་སྔགས་འཆང་བ་ཡང་འཕྲད་པར་བྱོན། ཁོང་ཤེས་རབ་སྤུས་གཙང་ཞིང་། སྒྲུབ་པ་ནུས་པ། རྙིང་མ་བའི་ལུགས་ལ་ནག་ཆང་གིས་མ་ཁྱེར། དགེ་སློང་གི་བརྟུལ་ཞུགས་ལ་གནས་པའི་གམ་གཙང་བ་ཞིག་འདུག་ཅིང༌། ངེད་དང་སྣང་བ་དག་པ་ཞིག་ཡིན་ནའང༌། ལས་སྦྱོར་དང་འདྲེ་འདུལ་འགའ་ཞིག་གནད་དུ་མ་སོང་བས་ལན་གདའ། སྐབས་འདིར་སྙིང་རླུང་ལ་གནོད་བྱེད་ཀྱིས་བསྐྱོད་པའི་བློ་ཤིན་ཏུ་མི་བདེ་བ་ཚུགས་པ་མེད་པ་འདྲ་བ་ཞིག་འདུག །ངེད་ཀྱིས་གསང་འདུས་འཕགས་ལུགས་ཀྱི་དབང་བསྐུར་ཞིག་ཀྱང་བྱས། ཅུང་ཟད་བདེ་བ་ཙམ་བྱུང་སྟེ། ཕྱིས་མི་རིང་བར་འཚོ་མ་ཐུབ་པར་འདུག །རྟིང་ལ་བསྔོ་རྟེན་སོགས་སྐྱེལ་མཁན་འབྲང་ཕུར་སླེབ(སླེབས)བྱུང་སྟེ། སྨོན་ལམ་དང་སྒྲིབ་སྦྱོང་གི་དམིགས་གཏད་ཡང་ཡང་བྱས། དྲག་སྔགས་འཇིག་རྟེན་པ་རྣམས་མང་བའི་སྐྱོན་ཡིན་ནམ། ཤིན་ཏུ་རྩུབ་པའི་རྣམ་འགྱུར་ཞིག་གི་ངང་ནས། མཇུག་ཏུ་ལམ་བདེ་བའི་ལྟས་ཙམ་ནི་བྱུང་ངོ༌། །
དེ་སྐབས་མུས་གླིང་ག་སོགས་མུས་སྟོད་ཀྱི་དགོན་པ་རྣམས་དང༌། དབུས་ཀྱི་གྲ་ཐང་དང༌། བྱམས་པ་གླིང་གི་འཛིན་སྐྱོང་བྱེད་དགོས་ཕེབས་ཀྱིན་འདུག་ནའང༌། མི་ཕལ་ཆེར་གྱི་མིག་ལམ་དུ་མི་བདེ་ཞིང་། རྫོང་དཔོན་གྱི་རིགས་ཤིན་ཏུ་རང་མ་དགའ་བ་ཅིག(ཞིག)ཡོང་བ་དང༌། ངེས་དོན་ཀྱི་བསྟན་པ་ལ་ཕན་པ་ནི་མི་ཡོང་བ་འདུག་པས། དེ་དུས་རང་ཡང་དགོངས་གྲོལ་ཞུས། ཕྱིས་ཡི་གེ་འགའ་རེ་ཕུལ་བས། སྟོན་སེར་ཁ་ཅིག(ཞིག)ཁྲོལ་བྱུང༌།
དེ་སྐབས་ངེད་རྒྱལ་རྩེ་ནས་གཡུང་གི་ལ་བརྒྱུད་ནས་ཕྱིན་པས། གཡུང་དར་རྒྱས་པ་རྣམས་ཀྱིས་འབོད་མི་ནན་བཅགས་བྱུང་ནས། ལམ་ཞོར་ལ་ཁོར་ཙམ་ཕྱིན། མང་ཇ་འགྱེད་བཅས་སོགས་བསྒྲུབས། ཡར་སྲིས་སུ་ཡར་འབྲོག་ནས་ཐབ་འཛིན་བྱུང༌།
དེ་ནས་མྱུར་བར་ཤད་འབྲང་ཕུར་སླེབ(སླེབས)། ཆོ་ག་སོགས་བཙུགས་ཤིང༌། དགོན་སོ་སོར་མང་ཇ་འགྱེད་བཅས། མཁའ་རག་ཚོ་བཞི་ལ་ཐང་སྟོན་སོགས་སྐུ་རྗེས་བཟང་ཐག་ཆོད་བཏང༌། དེ་རྗེས་བལ་པོ་རྒྱ་མཚོ་སྤྲིན་སོགས་བཟོ་བོ་མཁས་པ་གསུམ་གྱིས་དུས་གསུམ་སངས་རྒྱས་ཀྱི་སྐུ་གཟུགས་རྒྱ་མཐོ་གང་བ་རེ་གར་ལུགས་སུ་བཞེངས་པ་དང༌། རང་བྱུང་གི་ཟངས་ལ་བཅོམ་ལྡན་འདས་སྨན་པའི་རྒྱལ་པོའི་སྐུ་ལུགས་མ་མཐོ་གང་བ་ཅིག(ཞིག)རྣམས་ནང་རྟེན་གྱི་ཚུལ་དུ་བཞེངས་པ། དེ་རྣམས་བཟོ་སྒྲོས་ཤིན་ཏུ་གཙང་བ། རྒྱ་གར་བ་ལ་འགྲན་བཟོད་པར་བྱུང༌།
ལུང་པའི་ཕུ་ན་ཡོད་པའི་སྨན་ཆུ་དེ་ཡང་ཞག་ཤས་བསྟེན། སྐབས་ཅིག(ཤིག)གཤིན་རྗེ་གཤེད་དམར་པོའི་རྒྱུད་ཀྱི་མན་ངག་ལ་བརྟེན་ཏེ། དམ་རྫས་བདུད་རྩི་རིལ་བུའི་སྒྲུབ་པ་ཞིག་བྱས་པ་ཡང༌། དྲི་བཟང་པོས་ལུང་ནང་ཐམས་ཅད་ཆོད་པ་དང༌། སྒྲ་ཆེན་པོ་དང་བཅས་པ་བྱུང༌། འདི་སྐབས་ཀྱང་བདུད་རྩི་མང་དུ་བབས། འགྲུབ་ལེགས་ཤིང་ཡ་མཚན་ཆེ་བར་བྱུང༌། མི་ངོ་རྣམས་ལའང་ཚེ་དབང་བརྒྱ་རྩ་སོགས་དང༌། དབང་རྗེས་གནང་འགའ་རེ་བྱས། མེས་པོ་རིན་པོ་ཆེ་དེ་ཉིད་ཀྱི་སྐུ་གདུང་ཡང་དུས་དེ་ཐུབ་བཞུགས་པ་དང༌། ཨ་ཁུ་ལགས་ཀྱི་གདུང་དེ་ཡང་རིང་དུ་བཞུགས་པ་ལ་དགོས་པ་མི་འདུག་པས། ངན་སོང་སྦྱོང་བའི་དཀྱིལ་འཁོར་ལ་བརྟེན་ནས། འོད་བཞུའི་ཆོ་ག་ཞིབ་འཐེམ་དང་བཅས་པ་ལེགས་པར་བསྒྲུབས།
འདི་སྐབས་ཞིག(ཤིག)བསམ་འགྲུབ་རྩེའི་སྐུ་ཁྲུས་རབ་འབྱམས་པ་དཀོན་མཆོག་དཔལ་བཟང་འདས་པའི་བསྔོ་རྟེན་རྣམས་འབྱོར། ཁོང་འདྲིས་ཆེ་ཞིང་། ངེད་ལ་སྣང་བ་དག་པ་ཞིག་ཡིན་པས། རྒྱང་ཙམ་ཞིག་སྨོན་ལམ་མང་དུ་བཏབ། ཐེབས་པའི་རྟགས་མཚན་བཟང་ཙམ་ཅིག(ཞིག)ཀྱང་བྱུང༌། ཕྱོགས་ཀྱི་ཆོས་ཞུ་བ་འདྲ་ཡང་སླེབ(སླེབས)། རང་རེའི་ཟླ་ལ་ཡོད་པའི་ནང་ཟན་རྣམས་བདེ་མཆོག་གི་ཆོ་ག་དེ་གཏོང་གིན་ཡོད་པས། ཞོར་ལ་ཡང་འགྲོ་བ་འདུག་པ་ཚུན། འཁོར་ལོ་བདེ་མཆོག་སྤྱོད་འཆང་དབང་པོའི་ལུགས་ཀྱི་གདམས་པ། ལམ་སློང་གི་འཁྲིད་སྙན་རྒྱུད་ཡོངས་རྫོགས་དང༌། གཞུང་དྲུག་གི་བཤད་པ་སོགས་ཆོས་སྐོར་ཆ་ཚང་ཞིག་བཤད།
འབྲས་སྤུངས་པ་རྒྱ་ལེ་ཆོས་མཛད་འདས་པའི(པས)བསྔོ་རྟེན་བཟང་རབ་ཅིག་སྐྱེལ་མཁན་བྱུང་བ་དང༌། འཚུར་ཕུ་ནས་དྲུང་པ་རིན་པོ་ཆེ་གུ་ཤི(ཤྲཱི)གྲགས་པ་དོན་གྲུབ་ཀྱི་ཐུགས་དམ་གསལ་འདེབས་མཚོན་བྱེད་ཙམ་སྐྱེལ་མཁན་ཡང་བྱུང༌། ཕ་ཏྲེ་བོ་སྐུ་སྐྱེ་རིན་པོ་ཆེའི་སྤྲུལ་སྐུ་ད་ལྟའི་འདི་དང་པོ་རང་གང་དུ་ཕེབས་བརྟག་པ་དང་། སྐུ་སྐྱེ་ཕེབས་པའི་གསོལ་འདེབས་དང༌། སྐབས་འདིར་ཡང་ཡར་འབྲོག་ནས་སྤྱན་འདྲེན་གྱི་བརྟག་པ་བྱེད་དགོས་པའི་ནན་བཅགས་རང་། མཆོད་དཔོན་པས་བྱེད་དུ་བྱུང་བར་ཅི་རིགས་པ་བྱས་པའང་ལགས། དེ་ལྟར་འབྲང་དུ་ཟླ་བ་གསུམ་ལ་སྣ་བསྟད་པ་ཞིག་བསྡད།
མུ་འགོད།