རྗེ་བཙུན་ཏཱ་ར་ནཱ་ཐ་དང་བཀའ་བརྒྱུད་པའི་བར་གྱི་འབྲེལ་བ་ཉུང་ཙམ་བཀོད་པ།
༧དགེ་བཤེས་དངོས་གྲུབ་དཔལ།
དགུང་ལོ་བཞིའི་ཐོགས་མཁན་ཆེན་ལུང་རིགས་རྒྱ་མཚོས་ཇོ་ནང་རི་ཁྲོད་དུ་གདན་ཞུ་མཛད་པའི་ལམ་ཁ་ནས་དཔལ་འཁོར་བདེ་ཆེན་གླིང་དུ་ཞག་ཁ་ཤས་སྐབས། སྐུ་གོང་མའི་སློབ་ཆེན་བཀའ་བརྒྱུད་ཀྱི་སྐྱེས་ཆེན་བསམ་གྱིས་མི་ཁྱབ་པ་མང་པོ་དང་ཐུགས་ཡིད་གཅིག་ཏུ་འདྲེས་པ་ཡིན་ཏེ། རང་རྣམ་མ་བཅོས་ལྷུག་པ་ལས།དེ་ནས་དཔལ་འཁོར་བདེ་ཆེན་གྱི་བླ་བྲང་དཀར་པོར་མཆེད་གྲོགས་ཐར་བ་བསླེབས་པའང་ངོ་ཤེས། ཞག་ཤས་སོང་སྐབས། རྗེ་བཙུན་དཔལ་ལྡན་བླ་མ་དམ་པ་འཇམ་དབྱངས་ཀུན་དགའ་རྒྱལ་མཚན་གྱི་ཞལ་སྔ་ནས་དང༌། སྦས་པའི་སངས་རྒྱས་རྗེ་བཙུན་ལྷ་དབང་གྲགས་པའི་ཞབས་དང༌།ཞེས་སོགས་གསུངས་པ་ལྟར་དེ་ནས་བཟུང་སྟེ།བཀའ་ཇོ་ཟུང་གི་བསྟན་འཛིན་དབྱེར་མེད་པའི་མཛད་པ་སྐུ་ཚེ་གང་བོར་བསྐྱངས་པ་ཡིན། ལྷག་པར་དུ་ཁོང་དགུང་ལོ་ལྔ་བར་སླེབས་པ་ན་སྐུ་ཚེ་དེར་གསང་སྔགས་ཀྱི་དབང་ཐོག་མར་ཞུ་ས་དེ་ཡང་། རང་རྣམ་མ་བཅོས་ལྷུག་པ་ལས། དཔལ་ལྡན་བླ་མ་དམ་པ་རྗེ་བཙུན་རྡོ་རིངས་པ་ཆེན་པོ་འཇམ་དབྱངས་ཀུན་དགའ་རྒྱལ་མཚན་གྱི་དྲུང་དུ། སྒྲོལ་དཀར་གྱི་རྗེས་གནང་ཐོག་མའི་རྟེན་འབྲེལ་དུ་ཞུས། སླར་གཤེད་དམར་ལྷ་ལྔའི་དབང་ཞུས།དེ་དུས་དབང་ཞུ་བའི་འདུན་པ་དང་བླ་མ་ལྷར་བསྒོམས་པ་སོགས་གསལ་ཞིང་མོས་གུས་སྐྱེ་བར་བྱུང༌། ཞེས་གསུངས་པ་ལྟར་ཡིན་ལ། ལོ་དེར་སླར་ཡང་བྲག་སྟོད་པ་ཆོས་སྐུ་ལྷ་དབང་གྲགས་པའི་སྐུ་མདུན་ནས་ཀྱང་དབང་བཀའ་ཐོག་མར་ཞུས་པ་ཡིན་ཏེ།
རང་རྣམ་མ་བཅོས་ལྷུག་པ་ལས། དཔལ་ལྡན་བླ་མ་དམ་པ་གྲུབ་པའི་ཁྱུ་མཆོག་ཆེན་པོ་རྗེ་བཙུན་བྲག་སྟོད་པར་ཡང༌། སྒྲོལ་དཀར་གྱི་རྗེས་གནང་དང༌། བླ་མེད་ཀྱི་དབང་འགའ་ཞིག་དང༌། ཚེ་དབང་བརྒྱ་ཚར། ཁྱུང་ཁྲ་དུས་འཁོར་ལུགས། སྒྲུབ་ཐབས་རྒྱ་མཚོ།གྲུབ་བརྒྱའི་ཆོས་སྐོར་སོགས་ཐོབ། ཞེས་གསུངས་སོ།། དུས་དེ་ནས་བཟུང་སྟེ་སྐུ་ཚེ་གང་བོར་བླ་མ་འདི་གཉིས་དང་མཁན་ཆེན་ལུང་རིགས་རྒྱ་མཚོ་རྣམས་རྩ་བའི་བླ་འགྲན་ཟླ་མེད་པར་བཟུང་བ་ཡིན་འདུག་པར་ཁོང་གི་རྣམ་ཐར་ལས་ལན་གཅིག་མ་ཡིན་པར་ཡང་ནས་ཡང་དུ་གསལ་བ་ཡིན་། མང་བས་མ་བརྗོད།ཁྱད་པར་དུ་རང་རྣམ་མ་བཅོས་ལྷུག་པ་ལས།རང་ལོ་བརྒྱད་པ་སྣ་ཚོགས་ཞེས་བྱ་བའི་ལོ་ཁྲུམས་སྟོད་ཀྱི་ཟླ་བའི་ཚེས་ལྔའི་ཉིན། ཆོས་ལུང་བྱང་རྩེའི་རྩེ་མཆོད་ཁང་གི་ཡང་ཐོག་ཏུ་སྔ་མོར་སློབ་པ་བྱས་སྐྲ་བྲེགས་རབ་ཏུ་བྱུང་བའི་རྟགས་མ་ཡིན་པ་རྣམས་དོར། སྐྲ་འབྲེག་མཁན་མ་ཆེན་ཆོས་ཡེ་བ་ཡིན། དོན་གྱི་སླད་དུ་མཚན་ནས་སྨོས་ཏེ་དཔལ་སྟག་ལུང་བ་ཆེན་པོ་རྗེ་བཙུན་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་མཁན་པོ་དང༌། མཚན་བརྗོད་པར་དཀའ་བ་འཇམ་དབྱངས་ཀུན་དགའ་རྒྱལ་མཚན་དཔལ་བཟང་པོའི་ཞབས་ཀྱི་སློབ་དཔོན་དང༌།
རྗེ་དྲུང་ཀུན་དཀའ་དཔལ་བཟང་པོས་དུས་གོ་བ་དང༌། ཆོས་རྗེ་མཆོད་གནས་པས་གྲོགས་དན་པ་མཛད།གཞན་ཡང་དགེ་བའི་བཤེས་གཉེན་བཟང་པོ་ལྔ་ཞུ་བའི་ཡུལ་དང་ལས་གྲལ་དུ་བཞུགས་ཏེ། ཉི་མ་བཞི་ཆ་ཤར་བའི་དུས་སྐྱེས་བུ་གཅིག་དང་རྐང་པ་གཉིས་ཀྱི་དུས་སུ་ཆོས་ལུང་བྱང་རྩེའི་མཆོད་ཁང་རྩེར། ཡོངས་རྫོགས་དགེ་བསྙེན་དང་བར་མ་སྔོན་དུ་འགྲོ་བས་དགེ་ཚུལ་གྱི་སྡོམ་པ་ཡང་དག་པར་མནོས་ཏེ། ཞེས་པ་ལྟར་རབ་བྱུང་དགེ་ཚུལ་གྱི་སྡོམ་པ་ཡང་དཔལ་སྟག་ལུང་བ་ཆེན་པོ་ལས་ཞུས་པ་ཡིན་པར་མ་ཟད། བསྙེན་པར་རྫོགས་པའི་མཁན་སློབ་ཀྱང་། མ་བཅོས་ལྷུག་པ་ལས། ཧོར་ཟླ་བཅུ་གཅིག་པའི་ཚེས་བཅུ་བདུན་དུས་ཚེས་བཟང་པ་ལ་འདུལ་བ་འཛིན་པ་ཐམས་ཅད་ཀྱི་གཙུག་རྒྱན། མངོན་པ་སྨྲ་བ་ཐམས་ཅད་ཀྱི་དབང་ཕྱུགམདོ་སྡེ་འཛིན་པ་ཐམས་ཅད་ཀྱི་གཙོ་བོ། བྱང་ཆུབ་སེམས་དཔའ་ཐམས་ཅད་ཀྱི་ཡབ། རིག་པ་འཛིན་པ་ཐམས་ཅད་ཀྱི་རྡོ་རྗེ་སློབ་དཔོན། རྗེ་བཙུན་དཔལ་ལྡན་བླ་མ་དམ་པ་དོན་གྱི་སླད་དུ་མཚན་ནས་སྨོས་ཏེ། འཇམ་དབྱངས་ཀུན་དགའ་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་མཁན་པོ། བླ་མ་དམ་པ་མཁས་པའི་དབང་ཕྱུག་ཆེན་པོ་སློབ་དཔོན་རིན་པོ་ཆེ་བྱམས་པ་ལྷུན་གྲུབ་པའི་ཞབས་ཀྱིས་ལས་ཀྱི་སློབ་དཔོན། དགེ་བའི་བཤེས་གཉེན་བློ་བཟང་པ་དང༌། རྗེ་དྲུང་ཀུན་དགའ་བསོད་ནམས་སོགས་ཀྱིས་ལས་ཀྱི་ཁ་སྐོང་མཛད་དེ། བསྙེན་པར་རྫོགས་པའི་སྡོམ་པ་ཡང་དག་པར་ཐོབ་བོ།།ཞེས་པ་ལྟར་རྗེ་རྡོ་རིང་པ་ཆེན་པོས་མཁན་པོ་མཛད་པར་གསུངས་པ་ལྟར་རོ།།
གཞན་ཡང་བཀའ་བརྒྱུད་ཀྱི་བསྟན་ལ་བྱ་བ་བྱས་པ་ཡང་སྟག་ལུང་བ་ཆེན་པོ་གྲོང་ནས་སྟག་ལུང་ཐང་གི་གདན་ས་དང་། ཆོས་སྐུ་ལྷ་དབང་གྲགས་པའི་གདན་ས་བྲག་སྟོད་ཆོས་ཀྱི་ཕོ་བྲང་ལ་སོགས་ཀྱི་བསྟན་པ་ཡོངས་རྫོགས་ཀྱི་ཐུགས་འགན་མཐའ་དག་གཅིག་ཆོག་གིས་བཞེས་པ་ཡིན་འདུག་པ་ཡང་རང་རྣམ་དུ་གསལ་ལ། ཁྱད་པར་དུ་རང་རྣམ་ལས། བཀའ་ལས་གསང་འདུས་རིམ་ལྔ་ལ་ཁྲིད་ཡིག་མང་པོ་འདུག་ནའང༌།ཚིག་དོན་གཉིས་ཀ་མར་ལུགས་གཙང་སང་ངེ་བ་མི་སྣང་བས་བརྡའ་དོན་གཉིས་ཀ་མར་ལུགས་ཁོ་ན་ཡིན་པ་གསལ་ལ་ཆ་ཚང་བ་ཞིག་རྩོམས་ཤིག་ཅེས།བཀའ་གནང་ཕེབས་པ་ལ་བརྟེན་ཏེ། རིམ་ལྔ་སྨར་ཁྲིད་གདན་རྫོགས་ཀྱི་ཁྲིད་ཡིག་རྙིང་རྣམས་ལ་འཐོར་ཐབས་སུ་གནས་ཤིང་འགའ་ཞིག་གབ་པ་དང་མི་གསལ་བའི་ཚུལ་དུ་ཡོད་པ་དེ་གསལ་ཞིང་མ་འཁྲུགས་པར་བསྒྲིགས་པ་འདི་བརྩམས་པ།ཞེས་པ་ནས། ཁོ་བོའི་འདི་ཙམ་ཡང་བསྟན་པ་ལ་ཅུང་ཟད་བྱ་བ་བྱས་པ་ཡིན་པར་སེམས།ཞེས་སྟག་ལུང་བ་ཆེན་པོ་ལས་སྟག་ལུང་བཀའ་བརྒྱུད་དང་མར་བའི་ལུགས་ཀྱི་དབང་བཀའ་རྫོགས་པར་ཞུས་ཤིང་། མར་ལུགས་ཁོ་ན་ཡིན་པའི་གཞུང་ཡང་མཛད་འདུག་ན་ཡང་།དེང་སང་ལྷག་མེད་པ་འདྲ།
གཞན་ཡང་། རང་རྣམ་ལས། ང་ཏཱ་ར་ནཱ་ཐ་སྐྲ་སྤར་གང་ནི་དཔལ་སྟག་ལུང་པ་ལ་བཅད། ཆོས་ནི་ཕྱོགས་མེད་དུ་ཞུས། སེམས་ངོ་ནི་རྟོགས་ལྡན་ལྷ་དབང་པས་སྤྲད།བཀའ་བརྒྱུད་རྟོགས་ལྡན་འ་གད་ཅིག་ཡིན་པ་འདུག་ཟེར་ན་ནི་གཞོགས་གཅིག་ནས་འདྲ་རུང་ཡིན། ལུང་བསྟན་ནི་བྱམས་པ་མགོན་པོས་མཛད། ལྟ་བ་ནི་དོལ་པོ་པའི་ལུགས་སྐྱོང༌། ཆོས་སྐད་ནི་རྒྱ་གར་གྲུབ་ཐོབ་ཀྱི་རྗེས་སུ་འབྲང༌། ཆོས་ལུགས་སུ་ཡིན་དང༌། སུའི་གྲྭ་པ་ཡིན་དེ་ད་ཤེས་པར་གདའའམ།བླ་མའི་བྱིན་རླབས་ནི་ཞུགས།མདོ་རྒྱུད་ཀྱི་དོན་ནི་ཤེས། དམ་སྡོམ་ནི་དགགནས་ལུགས་ནི་རྟོགས། ཡི་དམ་ནི་མཇལ། མཁའ་འགྲོ་ནི་འདུ། བཀའ་བསྲུང་ནི་བྲན་དུ་འཁོལ། སྐལ་ལྡན་ནི་རྗེས་སུ་འཛིན། རང་རྒྱུད་ནི་གྲོལ། གཞན་དོན་ནི་ལྷུན་གྱིས་གྲུབ་པ་ཅིག་ཡིན།ཞེས་སོགས་ཤིན་ཏུ་མང་ངོ་།།
གྲུབ་ཐོབ་ཤངས་པ་བཀའ་རྒྱུད་ཀྱི་ཐབས་ལམ་གསེར་གྱི་ཕུང་པོ་ཞེས་བྱ་བའི་གཞུང་།ཁྱུང་པོ་ནས་བརྒྱུད་པ་དུས་དེར་བཀའ་མ་ཆད་པར་བཞུགས་པའི་ནཻ་གུའི་གཞན་ལུས་དང༌། སུ་ཁའི་ལུགས་དང༌། མཁའ་འགྲོ་རྣམ་གསུམ་གྱི་དགོངས་འདུས་དང༌། མེ་ཏྲི་བའི། ཨ་དྭ་ཡ་བཛྲ་ཀྱི་མན་ངག་སྟེ་ལྔ་ག་དམིགས་བསྐོར་གསལ་བའི་ཁྲིད་ཡིག་ཁྱད་པར་ཅན་མཛད་ཡོད་པ་གསུང་འབུམ་པོད་༣༨པར་བཞུགས།
ཁྱད་པར་དུ་ཀརྨ་པ་དགུ་བ་དབང་ཕྱུག་རྡོ་རྗེའི་བཀའ་བརྒྱུད་ཀྱི་བསྟན་པའི་བདག་པོ་ལྟ་བུར་མངའ་གསོལ་བ་ཡིན་ཏེ། རྒྱལ་བའི་བསྟན་པ་རིན་པོ་ཆེ་སྤྱིའི་རྣམ་བཞག་ལས་འཕྲོས་པའི་དཔལ་ལྡན་ཤངས་པའི་ཆོས་སྐོར་གྱི་འབྱུང་ཁུངས་ཡིད་ཀྱི་མུན་སེལ་ལས། བསམ་སྡིངས་སུ་བཞུགས་པའི་སྐབས། ཀརྨ་པ་དབང་ཕྱུག་རྡོ་རྗེ་ཞྭ་དམར་སྤྲུལ་པའི་སྐུ་དང་བཅས་པ་ཞལ་འཛོམས་ལེགས་ཚོགས་ཀྱི་སྟེང་ནས་ཆོས་ཀྱི་གསུང་བགྲོས་ལས་འཕྲོས་ཏེ་དགྱེས་པ་ཆེན་པོར་གྱུར། དབང་ཕྱུག་རྡོ་རྗེ་ཞིང་གཞན་དུ་གཤེགས་པའི་མཚན་མ་དགོངས་ཏེ། རྗེ་བཙུན་ཆེན་པོ་འདི་ཉིད་ལ་བསྟན་པའི་བདག་པོར་མངའ་གསོལ་གྱི་བརྟན་བཞུགས་གསུང་བརྩོམ་དང་བཅས་འབུལ་བར་གནང༌། ཞེས་གསུངས་སོ། །ཆོས་འབྱུང་དེ་ཉིད་ཏཱ་ར་ནཱ་ཐའི་གསུང་འབུམ་པོད་༣༤བར་བཞུགས་ལ།མཛད་པོ་ནི། གཞུང་དེའི་མཇུག་བྱང་ལས། རྗེ་རྡོ་རྗེ་འཆང་ཏཱ་ར་ནཱ་ཐའི་བཀའ་ཇི་ལྟར་གནང་བ་བཞིན་དུ་བྱ་བཏང་འབྱམས་པ་ཡོན་ཏན་མགོན་པོས་བགྱིས་ཞེས་གསུངས་འདུག
ཁྱད་པར་ཁོང་དང་སྐུ་ཐོག་མཉམ་པའི་ཀརྨ་པ་ཞྭ་ནག་སྐུ་ཕྲེང་དགུ་པ་དབང་ཕྱུག་རྡོ་རྗེ་དང་ཐུགས་བརྒྱུད་གཅིག་པར། ཁོང་རང་གིས་མཛད་པའི་གསང་རྣམ་ལས། ཀརྨ་པ་དགུ་པ་དང་ཡང་གཅིག་པས། དབུ་སེ་རང་དང་ཡང་དབྱིངས་གཅིག་པར་འགྱུར་ཞིང༌། ཞེས་གསུངས་སོ། །ངག་དབང་དངོས་གྲུབ་དཔལ་གྱིས།