ཇོ་ནང་ཀུན་མཁྱེན་ཆེན་པོ་ཤེས་རབ་རྒྱལ་མཚན།
ཨོཾ་སྭཱ་སྟི་སི་དྷཾཿ(བླ་མ་དང་དཀོན་མཆོག་གསུམ་ལ་ཕྱག་འཚལ་ལོ། །
བླ་མ་དང་འཇམ་པའི་དབྱངས་ལ་ཕྱག་འཚལ་པོ། །
འཁོར་འདས་འཇིགས་པ་ཀུན་ལས་སྐྱོབ་པའི་སྐྱབས། །
ཚུལ་ཁྲིམས་རྣམ་དག་ཤིན་ཏུ་རྒྱལ་གྱུར་ཅིག །
བདུད་ཀྱི་དབང་བསྒྱུར་མཛེས་པའི་གཞོན་ནུ་ཁྱོད། །
བདག་གིས་མ་བཟོད་སྨྲ་བའི་ངག་འདི་ནི། །
བརྩེ་བས་ཕན་པར་སྨྲ་བའི་ཚིག་འདི་གསོན། །
དུག་ཅན་སྣོད་དང་ཕྲད་ན་ཞེ་ སྡང་འཕེལ། །
ཤེས་ལྡན་རྣམས་ཀྱིས་ཐོས་ན་ངོ་མཚར་སྐྱེས། །
དད་པ་ཅན་གྱིས་ཐོས་ན་དང་བ་འདྲེན། །
རིགས་བཟང་བློ་གྲོས་གསལ་ལྡན་གཞོན་ནུ་ཁྱོད། །
མཁས་པའི་གཙུག་རྒྱན་ཐོབ་པར་བྱར་ཡོད་ཀྱང་། །
ལུང་རིགས་འོ་མའི་རྒྱ་མཚོ་སྤངས་པའི་མཐུས། །
མི་གཙང་འདམ་དུ་བྱིང་བ་མ་ཚོར་རམ། །
བདུད་ཀྱི་ཕོ་ཉས་མངག་པའི་མཛེས་མ་ཡིས། །
བཞིན་རས་གཞུ་ལ་ཟུང་མིག་མདའ་བཀང་སྟེ། །
གཞོན་ནུ་ཁྱོད་ཀྱི་སྙིང་གི་དཀྱིལ་དེར་འཕངས། །
ཐར་པའི་རྩ་བ་བཅད་པ་མ་ཚོར་རམ། །
ན་ཆུང་བཞིན་རས་པད་མོ་རྒྱས་པ་ལ། །
གཞོན་ནུ་འཛུམ་པའི་ཚ་ཟེར་ཕོག་པ་ཡིས། །
དགའ་བ་སོ་ཡི་ཟེའུ་འབྲུ་བསྟན་པའི་ཚེ། །
གཞོན་ནུ་ཡིད་ཀྱི་བུང་བ་མ་གཡོས་སམ། །
ན་ཆུང་ཟླ་བའི་བསིལ་ཟེར་ཕོག་པ་ཡིས། །
གཞོན་ནུ་བག་ཡོད་ཆུ་སྐྱེས་ཟུམ་གྱུར་ཅིང༌། །
ཉེས་སྐྱོན་ཀུ་མུ་ཏ་ཡི་ཁ་ཕྱེས་ནས། །
ལྟུང་བའི་སྦྲང་རྩིས་གང་བས་མ་བསླུས་སམ། །
གཞོན་ནུ་རི་དྭགས་ཡུལ་དུ་རྒྱུ་བའི་ཚེ། །
ན་ཆུང་རྔོན་པའི་དམག་གིས་མཐའ་བསྐོར་ཏེ། །
གླིང་བུའི་སྐད་ལྟར་སྙན་པའི་གླུ་ཡིས་བསླུས། །
དགེ་ལེགས་སྲོག་དང་བྲལ་བ་མི་ཤེས་སམ། །
ཕ་ཡུལ་འཕྲང་ལ་བསྒུགས་པའི་ཆོམ་པོ་ཡིས། །
དབང་མེད་འདོད་ཆགས་ཞགས་པས་རབ་བཅིངས་ཏེ། །
མཐོ་རིས་ཐར་བའི་དགོས་འདོད་འབྱུང་བའི་གནས། །
ཚུལ་ཁྲིམས་ནོར་མཆོག་འཕྲོག་བ་མི་ཤེས་སམ། །
བླ་མ་མཁས་པ་རྣམས་ལ་བརྟེན་པའི་མཐུས། །
ལེགས་ཉེས་བླང་དོར་བྱ་བ་ཤེས་བཞིན་དུ། །
རྟག་ཏུ་ཉེས་ལྟུང་འབའ་ཞིག་བསྒྲུབ་པ་ཡི། །
གཞོན་ནུ་ཁྱོད་ནི་ འཆི་ཁར་མི་འགྱོད་དམ། །
རྙེད་པར་དཀའ་བའི་མི་ལུས་ཐོབ་ན་ཡང་། །
སངས་རྒྱས་བསྟན་བའི་བདུད་རྩི་མི་འཐུང་བར། །
འདོད་ཆགས་ཆང་གིས་མྱོས་པའི་གཞོན་ནུ་ཁྱོད། །
ཚེ་འདི་སྟོང་ཟད་བྱས་པ་མ་ཚོར་རམ། །
གསུང་རབ་རྒྱ་མཚོར་བརྩོན་པའི་གཟིངས་བཅས་ཏེ། །
མཁས་ བའི་ནོར་མཆོག་བླང་དུ་ཡོད་བཞིན་དུ། །
བདུད་ཀྱི་བཙོན་རར་འཐབ་རྩོད་འབྱུང་བའི་གཞི། །
ཕ་ཡུལ་སྒྲོག་གིས་བཅིངས་པ་ཁྱོད་རེ་འཁྲུལ། །
ཆང་གི་བུམ་པ་བྱི་དོར་བྱས་པ་ལྟར། །
བཤང་གཅི་ལ་སོགས་མི་གཙང་ཕུང་པོ་ལ། །
མ་བརྟགས་མཛེས་བར་སྣང་བའི་པགས་པས་གཡོགས། །
མི་གཙང་སྣོད་ལ་ཆགས་པ་ཁྱོད་རེ་འཁྲུལ། །
བདེ་བའི་འབྱུང་གནས་ཐར་་ལམ་རིང་དུ་སྤངས། །
སྐྱེ་རྒ་ན་འཆིའི་སྡུག་བསྔལ་མི་བཟོད་པ། །
འཁོར་བའི་འདམ་ལས་ཐོན་པ་མ་མཆིས་ན། །
གཞོན་ནུ་ཁྱོད་ནི་བདུད་ཀྱིས་མ་བསླུས་སམ། །
ལན་ཚྭའི་སྡོང་བུ་འདོད་ཆགས་སྐོམ་གྱིས་ངོམས། །
ཉེས་སྤྱོད་སྡིག་ཏོའི་སྒྲོན་མེ་ཆེར་འབར་བས། །
དགེ་ལེགས་དཔག་བསམ་རྒྱ་མཚོ་སྐམ་པར་བྱས། །
ངན་འགྲོ་མུ་འཚམས་མེད་པར་མི་འཇིགས་སམ། །
ཚུལ་ཁྲིམས་འཆལ་པས་མནར་མེད་ལྷུང་བའི་ཚེ། །
ཡིད་ལ་ཆགས་པའི་གྲོགས་མོས་མདུན་ནས་བོས། །
སྤུ་གྲིས་གཏམས་པའི་ལམ་ལ་གཤེགས་པའི་ཚེ། །
སྡུག་བསྔལ་མི་བཟད་མྱོང་བས་མི་འཇིགས་སམ། །
བུ་ཁྱོད་ཕྱི་མའི་སྡུག་བསྔལ་མི་སེམས་ཀྱང༌། །
ཚེ་འདིར་སྐྱེ་བོ་ཀུན་གྱིས་སྨོད་པར་འགྱུར། །
ཉེ་དུ་འབྲེལ་བ་རྣམས་ཀྱིས་བྲན་བཞིན་བཀོལ། །
ཚེ་འདིར་སྡུག་བསྔལ་འབའ་ཞིག་མི་ཤེས་སམ། །
ལན་ཆགས་འགྲོ་བ་མཛེས་པའི་བུ་འཁྲུངས་ཏེ། །
གཞོན་ནུ་སྐྱེ་བོའི་སྡུག་བསྔལ་མི་བཟོད་བསྐྱེད། །
ལང་ཚོ་རྒྱས་ན་ཚུར་ལ་རྒོལ་བར་བྱེད། །
དེ་ལ་གཉེན་དུ་འཛིན་པ་ཁྱོད་རེ་འཁྲུལ། །
སྡིག་དང་སྡུག་དང་གཏམ་ངན་མི་འཇིགས་སམ། །
སེར་སྣས་ཞིབ་པར་བསགས་པའི་ནོར་རྫས་རྣམས། །
དབང་མེད་ཧོར་འདྲའི་དམག་དཔུང་ཆེར་ལྷགས་ཏེ། །
དབང་མེད་འཕྲོག་པར་བྱེད་པ་མི་ཤེས་སམ། །
ཕན་པར་སྨྲ་བའི་མཁན་སློབ་རྒྱབ་ཏུ་སྤངས། །
ཕུང་བྱེད་བདུད་ཀྱི་བུ་མོ་པང་དུ་བླངས། །
ཆོས་ཀྱི་ལོངས་སྤྱོད་ནམ་མཁའི་སྤྲིན་ལྟར་དེངས། །
སྡུག་བསྔལ་བདེ་བར་འཛིན་པ་ཁྱོད་རེ་འཁྲུལ། །
ཚུལ་ཁྲིམས་ཉམས་པའི་ཉེས་པས་མི་ཆོག་པར། །
ཚུལ་ཁྲིམས་འཆལ་བའི་ལུས་ཅན་གཞོན་ནུ་ཁྱོད། །
དགེ་སློང་ཚུལ་དུ་མ་འཆོས་དཀར་པོ་གྱོན། །
ཚུལ་ཁྲིམས་འཆལ་བའི་ཉེས་བས་མི་ཆོག་པར། །
ཚུལ་འཆོས་ཉེས་པས་གོས་ན་མི་རུང་ངོ་། །
གཞོན་ནུ་ཁྱོད་ནི་ཁྱིམ་པའི་ཚུལ་འཛིན་ན། །
ཁྱིམ་པའི་བྱ་བ་བདག་གིས་བཤད་ཀྱིས་ཉོན། །
ཡོན་ཏན་རྒྱ་མཚོ་མ་ལུས་འབྱུང་བའི་གཞི། །
དཀོན་མཆོག་རིན་ཆེན་གསུམ་ལ་སྐྱབས་སུ་སོང༌། །
སྔར་བྱས་སྡིག་པའི་ལས་ལ་འགྱོད་པ་བསྐྱེད། །
སེམས་ཅན་དོན་དུ་ཉེས་ལྟུང་སོ་སོར་བཤགས། །
སྦྱོར་བ་བྱང་ཆུབ་སེམས་དང་རབ་ལྡན་ཞིང༌། །
དངོས་གཞི་ཆོས་རྣམས་སྒྱུ་མ་ལྟ་བུར་བལྟ། །
མཐར་ནི་མཐའ་ཡས་སེམས་ཅན་དོན་དུ་བསྔོ། །
བྱང་ཆུབ་མཆོག་ཏུ་བསྔོ་བས་རྒྱས་བཏབ་ནས། །
མི་དགེ་བཅུ་སྤང་དགེ་བཅུ་དང་དུ་བླངས། །
སངས་རྒྱས་ཆོས་དང་དགེ་འདུན་རྒྱ་མཚོ་དང༌། །
ཕ་མ་ལ་སོགས་མཆོད་ཡུལ་གུས་པས་མཆོད། །
ཤིན་ཏུ་ཉམ་ཐག་གྱུར་པའི་སེམས་ཅན་ལ། །
སྙིང་རྗེའི་དབང་གིས་རྟག་ཏུ་སྐྱོང་བར་མཛོད། །
ཡན་ལག་བདུན་དང་གཏོར་མ་བྱ་བ་དང༌། །
རིམ་གསུམ་ཟུང་འཇུག་ཡི་དམ་བསྒོམ་བཟླས་དང༌། །
དྲི་མེད་མདོ་ནི་ཀློག་པ་ལ་སོགས་པ། །
བླ་མེད་ཆོས་ཀྱི་ཐེག་པར་གནས་པ་ན། །
ཚེ་རིང་ནད་མེད་དཔལ་འབྱོར་རྒྱས་པར་འགྱུར། །
སེམས་ཅན་ཀུན་ལ་བྱམས་དང་སྙིང་རྗེ་དང་། །
དགའ་དང་བཏང་སྙོམས་ཆེན་པོ་བསྒོམ་པར་བྱ། །
ཡུལ་མི་སྤྱི་སེམས་ལྡན་པས་སྐྱོང་བར་མཛོད། །
ལྟོས་པའི་མི་རྣམས་བསླུ་བར་མ་བྱེད་ཅིག །
མང་པོས་བཀུར་བའི་རྒྱལ་པོ་ཇི་བཞིན་དུ། །
ཡུལ་མི་ཀུན་གྱིས་བཀུར་བའི་གནས་སུ་འགྱུར། །
མདོར་ན་སྒོ་གསུམ་བྱ་བ་མ་ལུས་པ། །
སྔར་བཤད་བསམ་པ་གསུམ་གྱིས་རྒྱས་བཏབ་ནས། །
ཟབ་ཅིང་དགའ་བའི་རྒྱ་མཚོ་སྤེལ་བར་འགྱུར། །
ཕྱི་མ་གཞོན་ནུ་རབ་བྱུང་ཚུལ་ཁྲིམས་ལྡན། །
ཤེས་བྱ་ཀུན་ལ་བློ་གྲོས་མིག་ལྡན་པ། །
བསྟན་པའི་གསལ་བྱེད་ཆེན་པོར་སྨོན་ལམ་ཐོབ། །
བདག་གིས་ཕན་པར་སྨྲ་བའི་ངག་འདི་ནི། །
གཞོན་ནུ་ཁྱོད་ཀྱི་རྣ་བར་མི་སྙན་ཡང༌། །
རྡུལ་བྲལ་འཕགས་པའི་ལུང་དང་མི་འགལ་བར། །
ཤེས་ལྡན་རྣམས་ཀྱི་དང་དུ་བླང་བར་རིགས། །
སློབ་མ་ལ་སྤྲིང་བ་ཞེས་བྱ་བ་དབེན་དགེ་བ་ཀུན་མཁྱེན་པས་སྦྱར། མངྒ་ལཾ། བྷ་ཝན་ཏུ