ཀུན་མཁྱེན་རྟོན་པ་བཞི་ལྡན་མདོ་རྒྱུད་དུ་མའི་ལུང་གིས་བསྔགས་ཚུལ།

༄༅། །རྒྱལ་བའི་བསྟན་པ་རིན་པོ་ཆེའི་འཁོར་ལོ་ཐ་མའི་དགོངས་དོན་ལེགས་པར་ཐུགས་སུ་ཆུད་པའི་༧རྗེ་བཙུན་ཇོ་ནང་བ་ཆེན་པོ་ཀུན་མཁྱེན་ཤེས་རབ་རྒྱལ་མཚན་དཔལ་བཟང་བོ་གང་ཉིད་རྒྱལ་བ་སྲས་བཅས་ཀྱི་ལུང་གིས་བསྔགས་ཚུལ་པདྨ་དཀར་པོའི་ཕྲེང་བ། །

དེ་ཡང་ཐུབ་པ་སངས་རྒྱས་བཅོམ་ལྡན་འདས་ཀྱི་གཙུག་ཏོར་རྣམས་པར་རྒྱལ་མའི་རྒྱུད་ལས། བདེ་གཤེགས་མྱ་ངན་འདས་འོག་ནས། །ལོ་ནི་སྟོང་ཕྲག་ཕྱེད་རིང་ཚེ། །གདོང་མར་ཡུལ་དུ་ང་འདྲ་བའི། །བསྟན་པ་འཛིན་པའི་དགེ་སློང་ཞིག །ཆུ་བོ་ལྗོན་ཤིང་ཕྲེང་མཛེས་སུ། །ཀ་ཡོ་རི་ཡི་གྲོང་ཁྱེར་དུ། །ཡབ་ནི་ཡེ་ཤེས་དབང་ཕྱུག་ཆེ། །ཡུམ་ནི་ཚུལ་ཁྲིམས་རྒྱན་ཞེས་གྲགས། །སྲས་ནི་སངས་རྒྱས་མིང་ཅན་འབྱུང་། །ང་ཡི་བསྟན་པའི་རྒྱལ་མཚན་འཛུག །ཆོས་ཀྱི་དུང་འབུད་དར་ཕྱར་འགྱུར། །ཞེས་དང་།

ཆོས་རྗེ་ཀུན་མཁྱེན་གྱི་དངོས་སློབ་ཆོས་གྲགས་དཔལ་བཟང་པོས་མཛད་པའི་རྣམ་ཐར་གསལ་སྒྲོན་དུ་བཀོད་པའི་ཨ་དྲ་ཤི་ལ་བཀོད་པའི་མདོ་ལས། བཅོམ་ལྡན་འདས་ཀྱི་སྨིན་མཚམས་སུ་རྟོག་པ་ལས་བྱུང་བའི་དམྱལ་ཁམས་ཐམས་ཅད་རབ་དུ་འཇོམས་པའི་འོད་ཟེར་སྣ་ཚོགས་པ་འཕྲོས་ནས། མུན་ནག་ཐམས་ཅད་སངས་ཏེ་སེམས་ཅན་ཐམས་ཅད་གྱི་སྡུག་བསྔལ་ཞི་ནས། སངས་རྒྱས་ཀྱི་སྒྲ་དང་ཆོས་ཀྱི་སྒྲ་དང་། དགེ་འདུན་གྱི་སྒྲས་ཁྱབ་པས། གཤིན་རྗེའི་རྒྱལ་པོ་ཡང་ཁྲི་ལས་བབ་ནས་ཕྱག་འཚལ། དེ་ནས་ཨ་དྲ་ཤི་ལས་བཅོམ་ལྡན་འདས་ལ་ཞུས་ནས། ཆོས་ཀྱི་རྒྱལ་པོས་གསོལ་པ། རྟག་ཏུ་གཟིགས་པ་སྤྱན་རས་གཟིགས། །མ་འོངས་དུས་ཀྱི་ཐ་མ་ལ། སྙིགས་དུས་སེམས་ཅན་སྐྱོབས་པའི་ཕྱིར། མ་ཧཱ་སུ་རའི་བྱང་ཕྱོགས་སུ། །ཁ་བ་ཅན་གྱི་ཡུལ་དབུས་ན། །གྲོང་ཁྱེར་ཆེན་པོ་ཀ་ཡོ་རི། །རྣམ་པར་གྲགས་པའི་ས་བདག་ནི། །ཡེ་ཤེས་དབང་ཕྱུག་ཡབ་སྨོས་པ། །དེ་ཡི་སྲས་སུ་བལྟམས་པར་མཐོང་། །དེ་ལ་གང་འབྲེལ་སེམས་ཅན་ཀྱང་། །འཕགས་པའི་གང་ཟག་ཤ་སྟག་གོ །ཞེས་གསུངས་པ་དང་།

ཀུན་མཁྱེན་ཆེན་པོའི་རྣམ་ཐར་རྣམ་བཤད་ཆེན་པོ་དགེ་ལེགས་ནོར་བུའི་ཕྲེང་བར་བཀོད་པའི་བྷི་རི་ཧ་རིའི་མདོ་ལས། ཁ་བ་ཅན་དུ་ཚེ་ལོ་བརྒྱད་ཅུ་ན། །བསྟན་པ་ཉམས་ཏེ་ཆོས་ཉིད་ཁྱད་དུ་སོད། །ལོག་ལྟར་ཞུགས་པའི་དུས་སུ་ལི་ཙཱ་བི། །ཆོས་ཀྱི་སྒྲོན་མེ་ཐོགས་ནས་དོལ་པོ་ཞེས། །ངའི་མིང་དུ་འཛིན་པའི་གྱ་ནོམ་པ། །ལོ་བརྒྱར་ཆོས་ཀྱི་ཆར་བ་ཕབ། །ཐེག་ཆེན་ཆོས་ཀྱི་རྔ་ཆེན་བརྡུང་། །ཆོས་ཀྱི་མཆོད་སྦྱིན་རྒྱལ་མཚན་བཙུགས། །ཞེས་དང་།

སྤྲིན་ཆེན་པོའི་མདོ་ལས། ཇི་སྐད་དུ། དེ་ནས་དེའི་ཚེ་ལྷོ་ཕྱོགས་ཀྱི་ཡུལ་འདབ་སྟང་ཟིལ་གྱི་རི་ལས་འོད་སྲུང་ཆེན་པོ་དང་ཐབས་ཅིག་ཏུ་འོངས་པའི་ལྷའི་བུ་རྣམས་སྟེང་གི་བར་སྣང་ལ་ཏ་ལ་བདུན་ཙམ་དུ་འཁོད་ནས་དེ་བཞིན་གཤེགས་པ་ལ་མེ་ཏོག་སིལ་མའི་རིམ་པ་རི་རབ་ཙམ་དག་གཏོར་ནས། མིག་མཆི་མས་གང་སྟེ་ངུ་བཞིན་དུ་ཚིག་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་དེ་བཞིན་གཤེགས་པ་ཐབས་ཀྱིས་ཡོངས་སུ་མྱ་ངན་ལས་འདས་པས་ཡོངས་སུ་མྱ་ངན་ལས་འདས་པ་ན། དེ་བཞིན་གཤེགས་པས་གསུངས་པའི་མདོ་འདི་ལྟ་བུ་འདི་དག་འཆང་བར་བགྱིད་པའི་སེམས་ཅན་དེ་དག་ཅི་འདྲག་བ་དག་ཅིག་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་ང་འདས་པའི་འོག་ཏུ་དགེ་བའི་རྩ་བ་བྱས་པ་རྣམས་དང་། སངས་རྒྱས་མང་པོ་ལ་བསྙེན་བཀུར་བྱས་པ་དེ་དག་མདོ་སྡེ་འདི་དག་འཆང་བར་འགྱུར་ཏེ། གཞན་དག་ལ་ཡང་རྒྱས་པར་སྟོན་པར་འགྱུར་རོ། སྤྲིན་ཆེན་པོའི་མདོ་འདི་ཡང་ལོ་བཞི་བཅུའི་བར་དུ་འཛམ་བུའི་གླིང་ན་སྤྱོད་པར་འགྱུར་ཏེ་རྒྱས་པར་ཡང་འགྱུར་རོ། །དེའི་འོག་ཏུ་ཕྱི་མའི་དུས་ན་དམ་པའི་ཆོས་སྤོང་བ་དང་། རྒྱལ་པོ་འཁྲུགས་པ་དང་། དམ་པའི་ཆོས་ནུབ་པར་འགྱུར་བ་མ་འོངས་པའི་དུས་དེ་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལུས་ཡོངས་སུ་མ་སྦྱངས་པ་དང་། ཚུལ་ཁྲིམས་ཡོངས་སུ་མ་སྦྱང་པ་དང་། །སེམས་ཡོངས་སུ་མ་སྦྱངས་བ་དང་། ཤེས་རབ་ཡོངས་སུ་མ་སྦྱངས་པ་དང་། ཤེས་རབ་འཆལ་པ་དང་། ལུག་ལྟར་ལྐུགས་པ་དང་། ཤེས་རབ་ཡོངས་སུ་ཉམས་པ་རྣམས་ཀྱིས་མདོ་འདི་ལྟ་བུ་འཆད་པ་ཐོས་ན་ཡིད་མི་ཆེས་ཤིང་བགད་པར་བྱེད། སྟིང་བར་བྱེད། འཕྱ་བར་བྱེད་ལ། ལྐོག་ཏུ་སོང་ནས་ཕན་ཚུན་ཟློས་ཤིང་སྨོད་བར་བྱེད་དེ་འཕྱ་བའི་བསམ་པས་དེ་དག་ཚིག་འདི་སྐད་དུ་ངོ་མཚར་ཏོ། ། ཞེས་པ་ནས། །བཅོམ་ལྡན་འདས་ཡུན་ཇི་སྲིད་ཅིག་ན་དེ་བཞིན་གཤེགས་པའི་སྲས་འོད་སྲུང་ཆེན་པོ་དང་འདྲ་བའི་དགེ་སློང་འབྱུང་བར་འགྱུར། གང་དུ་ནི་སྐྱེ་བར་འགྱུར། དེའི་མིང་ནི་ཇི་སྐད་ཅེས་བགྱི་བར་གཟུང་བར་འཚལ། བཅོམ་ལྡན་འདས་ཀྱིས་བཀའ་རྩལ་པ། ལྷའི་བུ་དག་ང་འདས་པའི་འོག་ལོ་བརྒྱ་ཕྲག་མང་པོ་འདས་པ་ན་ལྷོ་ཕྱོགས་ཀྱི་རྒྱུད་དུ་༼འཁོར་གྱི་མི་མང་པོའི་ནང་ནས་འབྱུང་པར་འགྱུར་རོ་། །དེའི་ལོ་བརྒྱད་ཅུ་༽འཁར་གྱི་རྒྱལ་བོ་བདེ་སྤྱོད་ཅེས་བྱ་བ་འབྱུང་བར་འགྱུར་ཏེ། དེའི་ཚེ་ལོ་བརྒྱད་ཅུ་༽ན་དམ་པའི་ཆོས་ནུབ་པར་འགྱུར་པའི་ལྷག་མ་ཙམ་དུ་ལུས་པའི་དུས་ལ་བབ་པ་དེའི་ཚེ་ངའི་ཉན་ཐོས་འབྱུང་བར་འགྱུར་ཏེ། དམ་པའི་ཆོས་ཀྱང་འབྱིན་པར་འགྱུར་། ཆོས་ཀྱི་འཁོར་ལོ་ཡང་བསྐོར་བར་འགྱུར། ཐེག་པ་ཆེན་པོ་ཡང་གཞན་དག་ལ་རྒྱས་པར་འཆད་པར་འགྱུར་རོ། །མདོ་སྡེ་འདི་ལྟ་བུ་དག་བཤད་པ་ཐོས་ནས་སྔོན་གྱི་ཡང་དག་པར་རྗོགས་པའི་སངས་རྒྱས་རྣམས་ལས་གང་དག་ཐོས་པ་དེ་དག་ཀྱང་ཕྱི་མའི་དུས་ཀྱི་ཚེ་འཛིན་པར་འགྱུར། ཀུན་ཆུབ་པར་བྱེད་པར་འགྱུར། འཆང་བར་འགྱུར། ཀློག་པར་འགྱུར། ཡིད་ཆེས་པར་འགྱུར་རོ། །སེམས་ཅན་གང་དག་དེ་བཞིན་གཤེགས་པའི་མཚན་འདི་དག་ཐོས་ན་ཡིད་མི་ཆེས་པ་དང་། མ་དད་པ་དང་། ཁ་ཏོན་མི་བྱེད་པ་དང་། མི་ཀློག་པ་དང་། མི་འདྲ་བ་དེ་དག་ནི་བདུད་ཀྱི་བྱིན་གྱིས་བརླབས་པ་ཡིན་ནོ། །སེམས་ཅན་གང་དག་དེ་བཞིན་གཤེགས་པའི་མཚན་འདི་དག་ཐོས་ན་ཡིད་ཆེས་པར་བྱེད་ཅིང་དད་པར་འགྱུར་པ་དང་། ཁ་ཏོན་བྱེད་པ་དང་། ཀློག་པ་དང་། འདྲི་བ་དེ་དག་ནི་སངས་རྒྱས་མང་པོས་ཡོངས་སུ་བཟུང་བ་ཡིན་ནོ། །དེ་ནས་དེའི་ཚེ་ལྷའི་བུ་མཐོང་ན་དགའ་བ་དྲི་ཟའི་རྒྱལ་པོས་བཅོམ་ལྡན་འདས་ལ་བསྐོར་བ་བྱས་ཏེ། ལན་ས་ཡར་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་སྲུང་ཆེན་པོ་དང་འདྲ་བ་དེ་བཞིན་གཤེགས་པ་དང་མིང་མཐུན་པ། བྱམས་པ་ཆེན་པོ་ལ་གནས་པ། ཚུལ་ཁྲིམས་ཆེན་པོ་ལ་དྲག་ཏུ་བརྩོན་པ་ཤིན་ཏུ་མཆོག་ཏུ་མཛེས་པ། རིགས་ཆེན་པོར་སྐྱེས་པ། ཚུལ་ཁྲིམས་དང་ལྡན་པ་ཆེན་པོ་དགེ་སློང་གིས་ཡོངས་སུ་བསྐོར་བ། དུས་དང་བཅས། གྲོང་དང་བཅས་པ་དང་། རྣམ་པ་ཅི་འདྲ་བ་ཡང་བཅོམ་ལྡན་འདས་ཀྱིས་རྒྱས་པར་བཤད་དུ་གསོལ། བཅོམ་ལྡན་འདས་དགེ་སློང་དེ་བདག་གིས་ཇི་སྲིད་འཚོའི་བར་དུ་བསྲུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། མཐོང་ན་དགའ་བ་དྲི་ཟའི་རྒྱལ་པོ་དགེ་སློང་དེ་ལུང་བསྟན་པ་ཉོན་ཅིག དེ་ནི་ང་ལ་དབེན་པ་དང་། ངའི་བསྟན་པ་འབྱུང་བར་བྱེད་ཅིང་ཁུར་ཆེན་པོ་ཁྱེར་པ་དང་། ངའི་ཤཱཀྱ་གཞོན་ནུ་ཡིན་ཏེ། མཐོང་ན་དགའ་བ་དྲི་ཟའི་རྒྱལ་པོ་ང་འདས་པའི་འོག་ཏུ་ལྷོ་ཕྱོགས་ཀྱི་རྒྱུད་དྲང་སྲོང་༼དོལ་པོ་༽བྱི་བོ་ཞེས་བྱ་བའི་ཡུལ་འཁོར་དུ་༼ཀ་ཡོ་རི་༽བསོད་ནམས་ཀྱི་གྲོང་ཁྱེར་བྱེ་མ་ཆེན་པོ་ཞེས་བྱ་བ་འབྱུང་སྟེ། གྲོང་དེའི་འབབ་ཆུ་མཛེས་འབྱོར་ཅེས་བྱ་བ་དེའི་བྱང་ཕྱོགས་ཀྱི་འགྲམ་དུ་འབྱུང་བར་འགྱུར་རོ། དེར་རྗེའུ་རིགས་ཆེན་པོ་རྣམས་པར་དག་པ་འབྲ་གོ་ཅན་ཞེས་བྱ་བའི་སའི་ཕྱོགས་སུ་འབྱུང་བར་འགྱུར་ཏེ། ཤཱཀྱའི་རིགས་གཞོན་ནུ་ལི་ཙ་བཱིའི་བུ་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་དེ་ངའི་ཆོས་འབྱུང་བར་བྱ་བའི་ཕྱིར་ལི་ཙ་བཱིའི་བུམ་གཞོན་ནུ་འཇིགརྟེན་ཐམས་ཅད་ཀྱིས་མཐོང་ན་དགའ་བ་བྱང་ཆུབ་སེམས་དཔའ་མི་མཆོག་དེ་དེར་རིགས་ཆེན་པོར་སྐྱེ་བར་འགྱུར་ཏེ། དེའི་ཕ་མ་དང་གཉེན་སྡེ་རྣམས་ཀྱིས་ངའི་མིང་དེའི་མིང་དུ་འདོགས་པར་འགྱུར་རོ། འབྲ་གོ་ཅན་གྱི་རྗེའུ་རིགས་ཆེན་པོའི་རིགས་ཀྱང་དེ་བཞིན་གཤེགས་པའི་རིགས་ཡིན་པར་བལྟའོ། །དེའི་ཚེ་དྲང་སྲོང་༼དོལ་པོ་ཞེས་བྱ་བའི་༽བྱི་བོའི་ཡུལ་འཁོར་ལ་ང་འབྱོར་ཅིང་རྒྱས་ལ་སྐྱེ་བོ་མིང་པོས་གང་བར་འགྱུར་རོ། །དེ་བཞིན་གཤེགས་པ་དང་མིང་མཐུན་པའི་ཁྱེའུ་དེ་ཡང་སྐྱེ་བོ་ཐམས་ཅད་ཀྱི་སྙིང་དུ་སྡུག་པར་འགྱུར་ཞིང་སྐྱེ་བོ་མང་པོ་ཐམས་ཅད་ཀྱིས་བཀུར་བར་འགྱུར་རོ། གང་གི་ཚེ་ཁྱེའུ་དེ་རབ་ཏུ་བྱུང་བ་ན་ཚངས་པ་མཚུངས་པར་སྤྱོད་པའི་འཁོར་དང་། དགེ་སློང་གི་ཚོགས་རྣམས་ཁྲིད་དེ་རང་གི་སྲོག་དང་བསྡོས་ནས་དམ་པའི་ཆོས་སྟོན་ཅིང་། དེ་བཞིན་གཤེགས་པའི་སྤྱོད་པ་འབྱུང་པར་བྱེད་དེ། མཆོག་ཏུ་དགའ་བ་སྤྱོད་པར་འགྱུར་རོ། ཞེས་པ་ནས། མཐོང་ན་དགའ་བ་དྲི་ཟའི་རྒྱལ་པོ་ངའི་ཉན་ཐོས་ཀྱི་ཚིག་ལ་ཡིད་ཆེས་པའི་སེམས་ཅན་དེ་དག་ནི་ཉུང་སྟེ། ཤིན་ཏུ་ཕལ་ཆེར་ནི་མོས་པར་མི་འགྱུར་རོ། མཐོང་ན་དགའ་བ་དྲི་ཟའི་རྒྱལ་པོ་རྣམ་པ་བཞི་དང་ལྡན་ན་ངའི་ཉན་ཐོས་དེ་བཞིན་གཤེགས་པ་དང་མིང་མཐུན་པའི་དགེ་སློང་གི་ཚིག་ལ་ཡིད་ཆེས་པར་འགྱུར་ཏེ། བཞི་གང་ཞེ་ན། སྔོན་གྱི་མཐར་ཡང་ཡང་དག་པར་རྫོགས་པའི་སངས་རྒྱས་སྔ་མ་རྣམས་ལས་ཟབ་མོ་བརྟན་པའི་ཆུའི་རྒྱ་མཚོའི་དུས་ཚོད་ཀྱི་ཏིང་ངེ་འཛིན་འདི་ཐོས་པ་དང་། དགེ་བའི་བཤེས་གཉེན་གྱིས་ཡོངས་སུ་གཟུང་བ་དང་། ལྷག་པའི་བསམ་པ་ལ་ཞུགས་ཤིང་དགེ་བའི་རྩ་བ་ཉེ་བར་བརྟན་པ་དང་། རྒྱ་ཆེན་པོ་ལ་མོས་པ་ལུས་ཀྱིས་མངོན་སུམ་དུ་བྱས་ཏེ། མཐོང་ན་དགའ་བ་དྲི་ཟའི་རྒྱལ་པོ་རྣམ་པ་བཞི་པོ་དེ་དག་གིས་ནི་ངའི་ཉན་ཐོས་ཀྱི་ཚིག་ལ་ཡིད་ཆེས་པར་འགྱུར་རོ། །གང་དག་ཡིད་མི་ཆེས་པ་དེ་དག་ཐམས་ཅད་ནི་བདུད་ཀྱིས་བྱིན་གྱིས་བརླབས་པའི་མི་གཏི་མུག་ཅན་ཡིན་པར་རིག་པར་བྱའོ། །སེམས་ཅན་གང་དག་མོས་པར་འགྱུར་བ་དེ་དག་ནི་སངས་རྒྱས་མང་པོས་ཡོངས་སུ་གཟུང་བ་ཡིན་པར་རིག་པར་བྱའོ། །ཞེས་པ་ནས། མཐོང་ན་དགའ་བ་དྲི་ཟའི་རྒྱལ་པོ་གཞན་ཡང་ངའི་ཉན་ཐོས་དེ་བཞིན་གཤེགས་པ་དང་མིང་མཐུན་པའི་དགེ་སློང་ཆོས་ཀྱི་སྒྲ་ཆེན་པོ་ལན་གསུམ་མངོན་པར་བསྒྲགས་ནས་འཆི་བའི་དུས་བྱེད་པར་འགྱུར་བའི་ཆེ་བ་ཉིད་ལ་ལྟོས། མཐོང་ན་དགའ་བ་དྲི་ཟའི་རྒྱལ་པོ་དེའི་ཚེ་ངའི་དམ་པའི་ཆོས་ཀྱི་ཕྱོགས་ནུབ་པར་འགྱུར་རོ། །དེ་ནི་མཐའ་མར་འབྱུང་བར་འགྱུར་ལ། དེ་དང་འདྲ་བའི་སེམས་ཅན་གཞན་མེད་དེ་མི་སྲིད་དོ། གསོལ་པ་བཅོམ་ལྡན་འདས་དགེ་སློང་དེ་འདི་ནས་ཤི་འཕོས་ནས་གང་དུ་སྐྱེ་བར་འགྱུར། བཅོམ་ལྡན་འདས་ཀྱིས་བཀའ་བསྩལ་པ། མཐོང་ན་དགའ་བ་དྲི་ཟའི་རྒྱལ་པོ་ངའི་ཉན་ཐོས་དེ་ནི་འདི་ནས་ཤི་འཕོས་ནས་སངས་རྒྱས་སུ་འགྱུར་རོ། །གསོལ་པ། བཅོམ་ལྡན་འདས་སེམས་ཅན་ཐམས་ཅད་ལ་སྨན་པའི་སླད་དུ་བཤད་དུ་གསོལ། བཀའ་སྩལ་པ། རིགས་ཀྱི་བུ་ལེགས་སོ། །ལེགས་སོ། །རིགས་ཀྱི་བུ་ཁྱོད་ལེགས་ཀྱིས་རིགས་ཀྱི་བུ་ངའི་ཉན་ཐོས་ཀྱི་ཆེ་བ་ཉིད་ཉོན་ཅིག། རིགས་ཀྱི་བུ་སྐལ་བ་བཟང་པོ་འདི་འདས་ཏེ། སངས་རྒྱས་སྟོང་ཡོངས་སུ་མྱ་ངན་ལས་འདས་པའི་འོག་ཏུ་བསྐལ་པ་དྲུག་ཅུ་རྩ་གཉིས་སུ་སངས་རྒྱས་འབྱུང་བར་མི་འགྱུར་ཏེ། རང་སངས་རྒྱས་བྱེ་བ་ཕྲག་འབུམ་འབྱུང་བར་འགྱུར་རོ། །རིགས་ཀྱི་བུ་བསྐལ་བ་དྲུག་ཅུ་རྩ་གཉིས་པོ་དེ་དག་འདས་ནས་སངས་རྒྱས་གཞན་བདུན་འབྱུང་བར་འགྱུར་རོ། །དེ་ནས་བདུན་པ་ཡོངས་སུ་མྱ་ངན་ལས་འདས་པ་དེའི་ཚེ་འཇིག་རྟེན་གྱི་ཁམས་མངོན་པར་དང་པ་ཞེས་བྱ་བར་འགྱུར་ཏེ། འཇིག་རྟེན་གྱི་ཁམས་མངོན་པར་དང་པ་དེར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྗོགས་པའི་སངས་རྒྱས་ཡེ་ཤེས་འབྱུང་གནས་འོད་ཅེས་བྱ་བར་འགྱུར་རོ། དེ་བཞིན་གཤེགས་པ་དེའི་སངས་རྒྱས་ཀྱི་ཞིང་ན་སེམས་ཅན་འཁོད་པ་དེ་དག་ཐམས་ཅད་མཛེས་པར་འགྱུར་ཞིང་དང་བ་ཐོབ་པར་འགྱུར་རོ། །ཞེས་གསུངས་པ་དང་། །

འཕགས་པ་རྔ་བོ་ཆེའི་མདོ་༼སྡེ་དགེའི་བཀའ་འགྱུར་ཛ་པོད་ཤོག་གྲངས་བརྒྱ་ཉེར་གཉིས་སྲིབ་ལྡེབ་ཡིག་ཕྲེང་བཞི་བ་༽ལས། དེ་ནས་བཅོམ་ལྡན་འདས་ཀྱིས་འོད་སྲུང་ཆེན་པོ་ལ་འདི་སྐད་ཅེས་བཀའ་བསྩལ་ཏོ། །འོད་སྲུང་ཁྱོད་ནི་ཞིང་སྲུང་བ་ལྟ་བུར་མི་ནུས་ཏེ། ཞིང་སྲུང་བཞིན་དུ་ཐབས་ལ་མཁས་པའི་གཞོན་ནུས་མདོ་འདི་ཐམས་ཅད་མཉན་ནས་ལུས་ལ་ཐོགས་ཏེ། འཇིག་རྟེན་དུ་མངོན་སུམ་དུ་འབྱིན་པར་འགྱུར་རོ། །དེ་ནི་ངས་ས་བདུན་པ་ལ་བཞག་སྟེ། མི་ཕལ་བ་ཞིག་ཏུ་བྱིན་གྱིས་བརླབས་ནས་གང་གི་ཚེ་ལོ་བརྒྱད་ཅུ་པ་ལ་བསྟན་པ་ཉམས་པར་འགྱུར་བ་དེའི་ཚེ་ན། ལྷོ་ཕྱོགས་སུ་ཡུལ་མུ་རུན་དུ་ཞེས་བྱ་བ་ན། ཆུ་བོའི་འགྲམ་ལ་བརྟེན་པའི་གྲོང་ཁྱེར་དམག་གིས་མི་ཚུགས་པ་ཞེས་བྱ་བ་དང་། ཉེ་བའི་གྲོང་ཁྱེར་འཕྲེང་བ་ཆེན་པོ་ཞེས་བྱ་བར་ཀ་ཡོ་རི་ཞེས་བྱ་བའི་རིགས་རྒྱུད་དེར་སྐྱེས་ནས་ངའི་མིང་འཆང་བའི་དགེ་སློང་ཞིག་ཏུ་གྱུར་ཏེ། ཞིང་སྲུང་བའི་ཐབས་མཁས་པས། ངའི་དགེ་སློང་གཡེལ་བ་རྣམས་ཀྱི་ནང་དུ་རབ་ཏུ་བྱུང་ནས་དེ་དག་བསྡུ་བའི་དངོས་པོས་བསྡུས་ཏེ་མདོ་འདི་རྙེད་ནས་ལུས་༼ཡིད༽ལ་བཅང་ཏེ། དགེ་འདུན་དག་པར་བྱས་ནས། དང་པོ་རུང་བ་མ་ཡིན་པའི་གཞི་ཆེན་པོ་ཡོངས་སུ་སྤངས་ཏེ། ཆོས་ཆེན་པོ་༼ཡོངས་སུ་༽སྒྲོགས་པར་འགྱུར། རྔ་བོ་ཆེ་ཆེན་པོའི་མདོ་ལས་གསུངས་པའི་ཆོས་ཀྱི་དུང་༼འབུད། ༽ཆོས་ཀྱི་རྒྱལ་མཚན་༼འཛུགས། ཆོས་ཀྱི་རྔ་ཆེན༽སྒྲོགས་པར་འགྱུར་རོ། གཉིས་པ་ཐེག་པ་ཆེན་པོའི་མདོ་སྟོང་བ་ཉིད་ཀྱི་གཏམ་སྨྲ་བར་འགྱུར་རོ། གསུམ་པ་སེམས་ཅན་གྱི་ཁམས་རྟག་པའི་གཏམ་དང་། རྔ་བོ་ཆེ་ཆེན་པོའི་གཏམ་སྨྲ་བར་འགྱུར། ཆོས་ཆེན་པོའི་རྔ་བོ་ཆེ་བརྡུང་བར་འགྱུར། ཆོས་ཆེན་པོའི་དུང་འབུད་པར་འགྱུར། ཆོས་ཀྱི་རྒྱལ་མཚན་འཛུགས་པར་འགྱུར་རོ། ངའི་མངོན་སུམ་དུ་གོ་གྱོན་པར་འགྱུར་རོ། ཕྱིས་མདོ་འདི་ཐོས་ནས་ན་ཚོད་ཆེན་པོརའགྱུར་ཏེ། ལོ་བརྒྱར་མདོ་འདིའི་༼བརྒྱད་ཅུར་མདོ་འདི་ཡི་༽གཏམ་སྨྲ་ཞིང་ཆོས་ཀྱི་ཆར་འབེབས་པར་འགྱུར་རོ། །ལོ་བརྒྱ་༼བརྒྱད་ཅུ་༽འདས་པའི་འོག་ཏུ་དེ་ལྷོ་ཕྱོགས་དེར་ལྷོ་ཕྱོགས་ཀྱི་མི་རྣམས་ཀྱི་ནང་དུ་རྣམ་པར་འཕྲུལ་ཅིང་ཡོངས་སུ་མྱ་ངན་ལས་འདས་པ་སྟོན་པར་འགྱུར་རོ། ཞེས་པ་ནས། ཀྱེ་མ་འཇིག་རྟེན་ཀུན་མཐོང་དགའ། །བརྟན་པོ་དགེ་སློང་གཟུགས་གྱུར་ནས། །རིང་ཞིག་བསྟན་པ་འབྱིན་བྱེད་ཅིང་། །ཆོས་ཀྱི་རྔ་ཆེན་བརྡུང་བར་འགྱུར། །དེ་ནི་མྱ་ངན་ཡོངས་འདས་ནས། །རེ་ཞིག་འཇིག་རྟེན་སྟོངས་བར་འགྱུར། །ཆོས་སྨྲ་དེ་ནི་འདས་གྱུར་ནས། །དེ་འདྲ་གཞན་ནི་འགའ་མི་འབྱུང་། །དེ་འདྲའི་དགེ་སློང་རྙེད་དཀའ་སྟེ། །རིམ་གྱིས་སྣང་བ་ཉམས་པར་འགྱུར། །འདི་ལྟར་དེ་ནི་ལྷོ་ཕྱོགས་སུ། །འབྱུང་བའི་ཐ་མ་གཅིག་ཡིན་ནོ། །དམ་པའི་ཆོས་ནི་ནུབ་པའི་དུས། །ཆོས་སྨྲ་དེ་ནི་འབྱུང་བར་འགྱུར། །ཞེས་དང་། །རྣམ་ཐར་རྣམ་བཤད་ནོར་བུའི་ཕྲེང་བ་ལས་ཀ་ཡ་གོ་རིའི་མདོ་དྲངས་ནས་གསུངས་པ་འདི་ལྟ་སྟེ། ངའི་འཁོར་གྱི་ནང་ནས་མཆོག་གྱུར་གྱ་ནོམ་པ། །ཆོས་ཀྱི་སྒྲོན་མེ་ཐོགས་པ་ལི་ཙ་བི། །མ་འོངས་༼དུས་སུ༽བྱང་གི་ཕྱོགས་ན་ང་ལྟར་གྲགས། ཐམས་ཅད་མཁྱེན་པའི་མཚན་འཛིན་གཞན་ཕན་འབྱུང་། །ཞེས་གསུངས་པ་ལྟར་མཚན་ཡོངས་སུ་གྲགས་པ་ཤེས་བྱ་ཀུན་མཁྱེན་ཤེས་རབ་རྒྱལ་མཚན་དཔལ་བཟང་པོ་ཞེས་བཏགས་སོ། ། ཞེས་གསུངས་སོ།

ཡང་རྔ་བོ་ཆེའི་མདོ་༼འི་ཤོག་གྲངས་བརྒྱ་ཐམ་པ་༽ལས། མགོན་པོ་ཤཱཀྱ་ཐུབ་པ་ཞེས་བྱ་བ་འབྱུང་བ་དེའི་ཚེ། རྒྱལ་པོ་ཆེན་པོ་ཁྱོད། ལི་ཙྪ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་འགྱུར་ཏེ། དེ་ནས་འཇིག་རྟེན་གྱི་ཁམས་དེར། མགོན་པོ་ཡོངས་སུ་མྱ་ངན་ལས་འདས་པའི་འོག་ཏུ་བསྟན་པ་ནུབ་པའི་དུས་ཀྱི་ཚེ་ལོ་བརྒྱད་ཅུ་ལོན་པ་ན་དགེ་སློང་བློ་འཆང་ཞེས་བྱ་བར་འགྱུར་ཞིང་། ས་བརྒྱད་པ་ལ་གནས་ཏེ། ལུས་གཅིག་ནི་བདེ་བ་ཅན་ན་འདུག་ལུས་གཅིག་ནི་སྤྲུལ་ཏེ་དགའ་ལྡན་དུ་བཞག་ནས་མགོན་པོ་མི་ཕམ་པ་ལ་མདོ་འདི་འདྲི་བར་འགྱུར་རོ། །ཞེས་གསུངས་པ་དང་།

ཡང་འཕགས་པ་རྔ་བོ་ཆེའི་མདོ་ལས། ཆུ་བོ་རབ་མའི་འགྲམ་དུ་མཆོད་རྟེན་བཞེང་པར་འགྱུར་རོ། །ཞེས་དང་། ཀུན་མཁྱེན་མྱ་ངན་ལས་འདའ་ཁར་ཉེ་གནས་ནམ་མཁའ་བྱང་ཆུབ་ཀྱིས་གདོང་མཆི་མས་གང་ནས་སྨྲས་པ། ཀྱེ་མ་སྔོན་ཚེ་ཤཱཀྱ་མགོན་པོ་ཡིས། །ཁྱེད་ལ་ཚེ་ལོ་བརྒྱ་ཅུའི་༼དུས་ཀྱི༽འགྲོ་བ་ལ། །ལོ་བརྒྱར་ཆོས་ཀྱི་དུང་འབུད་དར་ཕྱར་ཞེས། །བཀའ་སྩལ་གནང་བ་ད་རུང་ཡོངས་མི་རྗོགས། །སྐུ་ཚེ་བདུན་ཅུ་རྗོགས་ཏེ་སུམ་ཅུ་ལུས། །སུམ་ཅུར་ལྷང་ངེར་བཞུགས་པའི་ཐུགས་རྗེས་བཟུང་། །ཞེས་གསུངས་པ་དང་།

བཻ་རོའི་རྣམ་ཐར་འདྲ་འབག་ཆེན་མོ་ལས། བདག་གི་སྤྲུལ་བ་ཀུན་མཁྱེན་ཇོ་ནང་ཞེས། །བོད་ཁམས་འདི་ན་མཁས་ཤིང་གྲུབ་རྙེས་པའི། །བསྟན་པའི་སྲོག་འཛིན་མདོ་སྔགས་བདག་པོར་འགྱུར། ཞེས་གསུངས་དང་།

སྤྱན་རས་གཟིགས་ཆོས་རྒྱལ་སྲུང་བཙན་སྒམ་པོས་མྱ་ངན་ལས་འདས་པའི་དུས་སུ་ལུང་བསྟན་འདི་ལྟར་གསུངས་དེ། ཇི་སྐད་དུ། མི་བདག་ཛྙ་ན་ཤྭ་རའི་རྒྱལ་བོའི་བུ། །ནོར་བུ་སྙིང་པོ་ཆུ་ཕོ་འབྲུག་ལས་འབྱུང་། །སྐྱེས་མཆོག་ཁྱད་འཕགས་ཁབ་ནས་མངོན་འབྱུང་སྟེ། །བསྟན་པའི་སྲོག་ཤིང་ཀུན་མཁྱེན་མཚན་དུ་གྲགས། །ཞེས་དང་།

ཨོ་རྒྱནཔདྨ་འབྱུང་གནས་ཀྱི་འཁྲུངས་རབས་སངས་རྒྱས་བསྟན་པའི་ཆོས་འབྱུང་མུན་སེལ་སྒྲོན་མེ་ལས། དོལ་པོའི་ཡུལ་ནས་མཁར་ཆེན་དཔལ་དབང་དང༔ལོ་ཆེན་གཙང་བ་རིང་མོའི་སྤྲུལ་བ་ནི༔རོག་ཚང་ཇོ་ནང་ཞེས་པའི་མགོན་གནས་སུ༔དོལ་བུ་སངས་རྒྱས་ཀུན་དགའ་ལེགས་ཞེས་འབྱུང༔ཞེས་སོགས་གསུང་གི་བདུད་རྩིས་བསྔགས་བརྗོད་ཆོས་ཀྱི་དྲི་ཆར་ཆིལ་ཆིལ་འབབ་པ་དེ་ལྟར་ལགས་སོ། །

ནང་དོན་ཡོངས་ཁུངས། ཤེས་རིག་གླིང་གའི་སྤྱི་སྟེགས་ཆེན་མོ།